Wednesday, February 27, 2008

تعاطفاً مع مصر

اظن عرفتوا هتكلم عن ايه، انا عارفه ان الموضوع جه متأخر كتير بس انا مكنتش هاعلق عليه علشان شايفه انه تصرف خايب من واحد خايب فرحولو ناس خايبين وبعدين اتيهألي اننا فضناها سيرة. لكن من الواضح انها ما افضتش. غاظني قوي مقال كان منشور في إيلاف عن المدعو ابو تريكة



واللي غاظني اكتر تعليقات الناس عليه وخصوصاً واحد بهيم بدرجه غبي جداً مسمي نفسه إيهاب المصري - إيكاش يا اخويا تأكل فسيخ بايظ يوم شم النسيم ونخلص من المصريين اللي من عينتك - وخصوصاً تعليقه رقم 151


وتعليقات تانيه بتقول اننا - هما يعني - عرب مش فراعنه والنبي جاتكم نيله ده لو الفراعنه عرفوا انكوا هتبقوا من نسلهم كانوا انتحروا انتحار جماعي

المهم العالم ديه غريبة قوي ممكن يبقى عندها انتماء لاي حاجة إلا لبلادها. يعني واحد بيلعب في منتخب مصر - اللي عملته بني ادم وبياخد منها ملايين كل سنه - فرحان قوي وهو بيجري في المعلب بعد ما جاب الجون الاول ويرفع الفنله بتاعته وتحتها تي شيرت مكتوب عليه "تعاطفاً مع غزة" ياخي ........ واطن انتوا عارفين انا اقصد ايه
فرقت ايه عن بتاع "طظ" في مصر ولا انت تلميذه وهو اللي علمك الإنتماء

طب ما تعاطفتش ليه يا فالح مع

حرس حدود مصر اللي بتعلب في منتخبها واللي استشهدوا واتصابوا على ايدين غجر غزة اللي بتحبها

ضحايا السلام 98 اللي لغايه دلوقتي محدش من اهلهم خد حق ولا باطل

مرضي الكبد الوبائي اللي سببه الزفت اللي بيحطوة بتوع المبيدات المسرطنة وعارفاه الحكومة ومطنشه في الاكل والشرب ويا ريت لاقينه

شباب مصر - اللي عمتلك بني ادم - اللي بيلموا اللي فاضل منهم بعد ما كله السمك في البحر علشان حظهم ماكنش بمب زي حظ حضرتك وربنا فتاحها عليهم ولبسوا شورت وقعدوا يجروا ورا الكورة علشان في اخر الماتش يهبدوا فلوس قد كدة واللي مطلوب منهم قوه عضليه مش مخ ولا مؤاخدة

حضارتنا الفرعونيه اللي غايظة البدو بتوع الجاز مننا و كل همهم انهم يمحوها من عالارض علشان عمرهم لا زمان ولا دلوقتي ولا بعد مليون سنه هبيقي عندهم حاجة تشبهاها

إندثار الفن والجمال بكل صوره وانتشار ثقافه القبح والبدواة
إرتفاع الاسعار اللي خلى الناس تكفر - وده اكيد ما تعرفش انت عنه حاجة

كل اتنين بيحبوا بعض ونفسهم يبنوا بيتهم واحمد عز بيغليلهم الحديد كل شوية ومحدش عارف يقف له

وحاجات تانيه كتير تسهتاهل انك تتعاطف معاها يا لاعيب المنتخب الوطني

مـصــر الاول وقبل الكل يا ابو جهل

وده بقه التي شيرت بتاعي



Love,

MishMish

Monday, February 18, 2008

ذي سحالي

القصيدة ديه عشقتها موووووووووت من ساعه ما سررور وريتهالي على مدونة الارض بتتكلم عربي


أنا حرّه وأموت في الحريّه

ومزاجي أعمل سحلـيّـه

أزحف ع الأرض وع الحيطه

واطلع وانزل واعمل زيطه

واضرب في الشمس طرمبيطه

أنا حره بديلي وبراسي

وماحدّش يكتم أنفاسي

وما احطش ماسك لإحساسي

ولا احط قزازولا أقفل شيش

عقلي يا هزازكلّك نغاشيش

وأنا حره أعيش

أنا عاوزه أعيش

أنا بدي أعيش

أنا نفسي أعيش

على كيف كيفي


أنا حرّه وأموت في الحريّه

ومزاجي أعمل سحلـيّـه

أرقع في الشمس الزغروطه

واخد حمام من غير فوطه

أنا حره براسي وبديلي

حره بنهاري وبليلي

حره بمناخيري القطقوطه

أنا حره بخشمي ماهوش خشمك

وما احطش برقع ولا يشمك

ولا احط قزازولا أقفل شيش

عقلي يا هزازكلّك نغاشيش

وأنا حره أعيش


أنا حرّه وأموت في الحريّه

ومزاجي أعمل سحلـيّـه

أنا ابقى سحليه وسيمه

ويجيني برص بتاع سيما

وبتاع مزيكا وترا لم لم

واتاوي في حضنه وأنا باحلم

ويقول لي ابتسمي يا بسيمه

وافرحي بالميه وبالخضره

ماتحطيش احمر ولا بودره

ولا احط قزازولا أقفل شيش

عقلي يا هزازكلّك نغاشيش

وأنا حره أعيش


أنا حرّه وأموت في الحريّه

ومزاجي أعمل سحلـيّـه

سحليه وحبايبي سحالي

أنا حره بحالي ومحتالي

حرة أصحصح والا أسخسخ

والا أغني وقلبي يشخشخ

أبواب الدنيا فاتحه لي

ما اقعدشي في الأوده لوحدي

وما احطش إيدي على خدي

ولا احط قزازولا أقفل شيش

عقلي يا هزازكلّك نغاشيش

وأنا حره أعيش

أنا عاوزه أعيش

أنا بدي أعيش

أنا نفسي أعيش

على كيف كيفي


"فؤاد حداد – قصيدة "ذي سحاليمن ديوان "رقص ومغنى" ضمن ديوان "أشعار فؤاد حداد" (أو الدواوين الخمسة) – الناشر دار المستقبل العربي

Love,

MishMish

Wednesday, February 13, 2008

Monday, February 11, 2008

طباخ الرئيس

علشان اثبت لميجو (زوجوجي) اني بحب السيما ومعنديش مشاكل مع الافلام العربي - طبعا الكلام ده من ورا قلبي- قولته اني هاخش معاه اي فيلم يختاره - وده كمان من ورا قلبي -. ولما روحنا عند السينما لاقيت افلام كتير مفيهاش ولا فيلم اجنبي عدل فسكت وبعدين لاقيت فيلم طباخ الرئيس قولت ده فيلم كوميدي وفي ظل الظروف اللي احنا فيها ديه - عرسان جداد بقه - مفيش داعي للنكد ونشوف حاجة تضحك شوية

قوم روحت انشكيت في لساني وقولتيه عايزة اخش الفيلم ده يا ميجو وطبعاً هو اعترض وقالي: لا باين من اسمه وإعلاناته انه تافه وانا كلمتي لا يمكن تنزل الارض ابداً، روحت شغلت الزنانه: علشان خاطري يا حبيبي، ده اول فيلم اخشه معاك بعد الجواز و....و....و... المهم قالي: خلاص تنزل المرة دي لكن المرة الجايه لا يمكن تنزل الارض ابداً. فرحت طبعاً ودخلنا الفيلم

وشوية بعد بتاع نص ساعه كدة من بدايته مابقتش عارفه اروح منه فين هو بصراحه طلع ابن ناس ومقالش ولا كلمة بس بصلي بصه ذات معنى وسكت. الفيلم كان بااااااااايخ واحداثه بطئية ومفهوش غير افيهين بيجوا في التليفزيون - وديتو الشعب فين واحنا اللي كنا تحت الكوبري- وشكراً على كدة

المهم استعوضنا ربنا في تمن التذاكر وحاولت ادور على الجانب المشرق في هذوها التجربة

ميجوا كان رايه الفيلم بنافق الرئيس بطريقه هابله لان احداث الفيلم زي مانتوا عارفين بتقوم حوالين شخصية الرئيس المهتم بشعبه واللي عايز يعمل حاجة بس للاسف هو معزول عن البلد بسبب المجموعه اللي حواليه علاوة على انه في مرات معدودة في الفيلم بيكتشف زيف المعلومات اللي بتتقدمله. ومع كدة بيتعمد الإعلام إنه يخبي كل الحاجات ديه عن الشعب

بس انا بصراحة كنت شايفه ان فكرة الفيلم مع انها هابله زي ما ميجو قال لكنها مخيفه في نفس الوقت لو صحيح الرئيس عايز يعمل حاجة بس اللي حواليه عازلينه ومعيشنه في بلد تخيلي يبقى الوضع اللي احنا فيه ده ممكن يتغيربوصول صوتنا ليه

لكن اللي يخوف صحيح هو: ان لو طلع الرئيس مش عايش في بلد تخيلي ولا حاجة وعارف كويس ايه اللي بيحصل في البلد وموافق عليه
يبقى ايه العمل ساعتها؟؟؟؟
Love,
MishMish

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق