Tuesday, March 31, 2009

صاحب رأس المال

مقالة بلال فضل الجمعه اللي فاتت هي اللي خلتني اكتب في الموضوع ده
بيتهيألي اكيد عدد كبير مننا اتعرض لمواقف زي ديه. مثلاً
محل ارزاق الموجود في المعادي جراند مول - المكتوب عنه في إيلاف تحت اسم مطعم الارهاب المصري - المحل ده محل وجبات سريعه ومايفرقش اي حاجة عن اي حته تانيه غير انه لما تيجي ساعه الصلاة مش مهم انت وراك ايه ولا واقف من امتى. كل واحد يرمي اللي في إيده ويبطلوا يأخدوا اوردرات ويشيلوا التربيزات بالناس اللي عليها ويقفلوا البيبان لا حد يطلع ولا حد يخش ويوطوا النور ويفرشوا الحصر ويصلوا كلهم. الموضوع ده بياخد اد ايه يا عم. يأخد نص ساعه نقل وتتضليم وفرش حصر وصلاة ولم حصر ورجوع تاني لأماكنهم
لا ومش كفايه كدة لا دانت لو طلبت بيبسي او كوكا في الاورد تلاقي الراجل بصلك بصه تحسسك بجرمك وكفرك البين ويقولك بصوت جهوري حجنوري مفيش غير شوبس او مكه كولا
فرعهم الجديد اللي في مصر حلوان بقه مختلف شوية. كنت ماشية ناحيته انا وامي واصرت انها تعزمني على الفطار هناك. قولتلها كوك دور وبتزا بلس مفيش بينا وبينهم خطوتين والتاكسي على حسابي
امي: ما خلاص ماحنا جنبه
انا: انا عندي مبدأ ومبحبش اتعامل مع العالم ديه
امي: بلا مبدأ بلا نيله. وبعدين مفيش دلوقتي وقت صلاة
انا: يعني انتي عارفه هي الصلاة امتي
امي: يعني انتي طارشه. انتي سامعه صوت ادان
انا: لا
امي: يبقى مفيش صلاة
انا: براحتك
ودخلنا لاقيناهم مشغلين قناه المجد ومفيش حد يأخد اوردرات ولما سألت قالوا علشان الصلاة. وبعدين رجعت الترابيزة
امي: إيه؟
انا: بعد الصلاة
أمي: صلاة ايه؟
انا: أساليهم
شوية والادان ادن قولنا يا فرج الله. وبعدين لاقيتهم واقفين مكانهم مفرشوش زي فرع المول. قولت ياد النيله لسه هنستنى لما يفرشوا
انا: ماتيلا نمشي ده سكتهم لسه طويله. ده احتمال يبقى غدا مش فطار
امي: خلاص قربوا يخلصوا
انا: هما لسه ابتدوا
امي: انتي زنانه قوي
انا: طيب
بعد نص الساعه من كلام العمال مع بعض وخروج اتنين تلاته من المحل ورجوعهم تاني. لاقيت الراجل ابتدى ياخد اوردرات. أمال الصلاة فين؟ الا ما حد ساب مكانه. وطول الوقت عمالين يرغوا
انا: يعني معلمين اللي جابونا الادب ومحدش منهم حتى راح غسل وشة
وموت من الضحك وقولت لأمي احسن. قاتلي خلاص مش هانجي هنا تاني. وبعدين بعد ماجه الاوردر قالتي ده حتى اكلهم زي الزفت وفضلت تبرطم طول القعدة. قولتلها ما كان من الاول
وده نفس اللي بيعلموه التابعي شارع 9 ساعه صلاة الجمعه يقفلوا المحل ويقفوا قدامة لا بيصلوا ولا هما فاتحينه
موقف تاني حصل مع واحد قريبي. كان داخل سوبر ماركت عادي فاتح ساعه الصلاة وفيه واحدة محجبه بتشتري حاجات. قام قريبي ده منزل اللي هو عاوزة -حاجات قيمتها اكتر من 100 جنيه - وجه يحاسب
البياع: بعد الصلاة يا بيه
قريبي: هو انت مش شايفني عمال اشيل واحط من الصبح ماقولتش كدة من الاول ليه؟
البياع: والله ديه تعلميات صاحب المحل
قريبي: طب والست اللي كانت بتشتري حاجات من شوية
البياع: ديه كانت بتشتري شيبسي وحاجات بجنيه ولا اتنين
قريبي: طب هو انت مشكلتك في قيمه الحاجات اللي بتتاع يعني الجنيه مش حرام والـ 100 جنيه هي اللي حرام. ولا في مبدأ الببيع نفسه. ما هو جنيه زي ميه!!!!!!!!!؟
البياع: والله ديه تعليمات صاحب المحل يا بيه
قريبي: طب قول لصاحب المحل اني انا ومراتي كنا بناخد حاجتنا كلها من عندك وبطلنا خلاص
البياع: يا بيه ما يصحش. طب قول انت عايز ايه وانا اوصلك الحاجة لغايه العربية
قريبي سابه بيرغي ومشي وراح اشترى من محل تاني
حادثه تانيه حصلت معايا. كنت نازلة اشتري هديه: صليب دهب. دخلت محل صاحبه مسلم ومش حاطط صلبان في الفاترينه فقولت اكيد مش عنده. بس اخويا - كان معايا ساعتها - قال لا ده عنده حاجات حلوة جوة. دخلت الراجل كان في منتهى الذوق واعتذر لأخويا وقاله انت عارف انك زبون المحل لكن الصلبان كلها خلصت في الكريسماس وراس السنه والعيد فاضل عليه يومين زي مانت عارف. بس انا جيالي تشكيله كويسة كمان يومين. مكنش عندي وقت اجي كمان يومين فقولت لآخويا لا اكيد هنلاقي
دخلنا عند واحد مسيحي عندك صلبان يا عم قال اه. قولناله طب عايزين نتفرج. قال من عيني بس عن اذنكم ده وقت غدا، اتفضلوا معانا، 5 دقايق واكون خلصت. قولت يمكن جايب علبه كشري ولا سندوتش اي حاجة
قلت لاخويا خلينا قاعدين الخمس دقايق. لاقيناه طلع شنط شنط شنط اشي شورية سي فود وجمبري ورز بالسمك وايه بوفيه مفتوح يا معلم
طبعاً لطع اللي جابونا بتاع 15 دقيقه فوق الـ 5 دقايق الاصليين وبعد ما خلص وشرب الشاي. طلع الصلبان فالحاجة اللي عنده مكنتش قد كدة. وقعد يقول انا بيبع الصلبان خدمة!!!!!!!!!!!!!؟ ومبكسبش فيها. اصل انت لما تخش عند اي محل هنا وتسأله تلاقيه بيقولك انا مبشتغلش في الحاجات ديه. ومضيقين عليا وبيحاربوني
طبعاً انا فصلت منه من ساعه ما قال انه بيبيع الصلبان خدمة. اصل خدم ديه معناها عندنا انه بيعملها مجاناً. وقولتله هو مفيش حاجات ذوقها احسن من كدة؟ قالي لا الحاجة معظمها خلصت في الكريسماس لكن في حاجات كويسة جايه كمان يومين
قولتله ولا يومين ولا تلاته هات الصليب ده. قولت في عقل بالي الصليب في الاول وفي الاخر دهب لو عجب الناس يبقى كويس معجبهمش يرحوا يبعوه ولا يغيروه
خرجت عنده وانا مضايقه من اللي بيحصل. اخش محل تلاقي اللي فيه مربي دقنه لغايه نص بطنه اقوله صباح الخير يا ميردش يا يقول وعليكم السلام. ده غير طبعاً اللطعه بتاعه الصلاة ده موضوع تاني كبير
اخش عند واحد مسيحي يكون دمه تقيل عامل زي الطحينه وكل اما اسال عن حاجة مالاقيهاش والحاجة عنده تبقى اغلى من برة ربع جنيه ولا نص جنيه.وطبعاً لما يشوف الصليب يقعد يشتكيلي همه من ان محدش بيشتري منه وان المحلات اللي حواليه عايزه يقفل
هي الناس ديه مبتفهمش. صاحب راس المال الفعلي هو اللي بيشتري مش صاحب المحل. انا لو عايزة باكو شاي هشتريه ان مكنش من فلان يبقى من علان. انما الفكرة فلوسي راحت لمين
مش المفروض اني اشتري من محل صاحبه بيعاملني باستحقار ولا يلوي وشه في وشي حتى لو اللي عنده مش موجود في اي حته تانيه.
ولا المفروض لاني مسيحيه اشتري من محل مسيحي معظم الحاجة اللي فيه اسعارها زايده علشان هو مضطهد. في حين ان الحقيقه انه جشع.
انا مقدرش اعمل حمله شعبيه لمقاطعه الهبل ومحلات القتنه الطائفيه. انا عن نفسي مبشتريش من اي محل برفض يشغل ناس بسبب انتمائهم الديني اياً كان مش بسبب عدم كفائتهم.
اللي مش عايز يبع ساعه الصلاة يقفل مش يبقى فاتح لكن مش بيبيع. او ما يفتحش حاجة خدميه. محل اكل يعني الناس داخله عايزة تأكل دلوقتي مش بعد الصلاة
اللي حاسس انه مضطهد - لو كان صحيح - يحاول يجذب الزبون بأي طريقه. انا عن نفسي عندي استعداد امشي 100 متر لمحل بيبع الحاجة ارخص من المحل اللي تحت بيتنا لانها بتجمل ده علم اسمه التسويق مش يقعد يندب
بلاش ندي فرصه للعالم ديه انها تزيد. مش من مصلحتنا ان المسيحين يشغلوا مسيحين والمسلمين يشغلوا مسلمين
علشان انا قلبي حاسس باللي هايحصل: الغرض الاساسي من البوست ده محاربه سلوكيات خاطئة ستكنا عليها بدافع الخوف او الاسحتسان الغير المعلن او العيب لغايه لما الموضوع خرج من ايدنا
لا اقصد الإساءة لأي دين على حساب اي دين واروجو مرعاه ذلك في التعليقات
Love,
MishMish

Sunday, March 22, 2009

اغانى وطنيه 2009


فدائى فدائى فدائى
اهدى الحكومه دمائى

واموت اعيش

مايهمنيش

ويارب اروح الفرن الاقى


...

فدائى فدائى فدائى

اموت اعيش ..مايهمنيش

........

وسط الطابور

هناك مكانى

والعيش دا عندى اغلى الامانى

وسط السنج ..وسط المطاوى

لازم اقاتل ..

لازم اصارع

واموت اعيش مايهمنيش

ويارب اروح الفرن الاقى ..


فدائى فدائى فدائى
.....

لو مت يا امى ماتبكيش

راح اموت علشان بجنيه عيش

افرحى يامه وزفينى

ويوم ماتاكلو افتكرينى

وان طالت يامه السنين


خلى اخواتى الصغيرين

يكونو زييي فدائيين
.......
ميجووووو

Tuesday, March 17, 2009

بالنوسبه للوزارة ... اقول

بعد سلسله من الاحداث الكويسة والاحداث اللي مش، حضرت انا وميجو ندوة للفنان محمود ياسين عن المسرح وجات سيرة الثقافه في البلد قام محمود ياسين خدها فرصه وقعد يشكر في وزير الثقافه ولا كأنه بيتكلم عنه في برنامج في القناه الاولى

المهم بعد الندوة واحنا مروحين قعدت اتناقش انا وميجو في موضوع الندوة وقولتله انا معجبنيش ابداً الكلام اللي قاله على وزير الثقافه الندوة مكنتش متسجله يعني. حتى لو متسجله المفروض فنان بالحجم ده لازم يقول رايه بصراحه

ميجو: ما وزير الثقافه بتاعنا كويس فعلاً

مشمش: ياااااااااااااااالهوي هو انت بقالك قد ايه بره مصر

ميجو: لا بره مصر ولا جوه مصر. ده راجل فنان ومثقف

مشمش: هو انا قولت انه معاه دبلون، ما هو لازم يبقي مثقف مش وزير ثقافه وبعدين ده موضوع شخصي ماليش دعوة بيه، انا بتكلم على شغله. تقدر تشاور على اي حاجة حلوة في البلد وتقول الفضل في الموضوع ده يرجع لوزير الثقافه الفنان المثقف

ميجو: الوزير شغله انه يحط الخطوط العريضه والموظفين في الوزارة المفروض ينفذوا توجيهاته

مشمش:خطوط عريضه ايه ورفيعه ايه. انا مش هاقولك فين تأثير الوزارة على رجل الشارع. سيبك من ان القاهرة هي اللي واخده نصيب الاسد في العروض الفنيه والمتاحف ويا ريت بيتعملها دعايه كويسة. إلا الواحد لما بيدور على حدث ثقافي بيبقى عامل زي ما يكون بيدور على سر حربي. وبعد القاهرة تيجي اسكندرية وبعدين الاقصر واسوان علشان السياحه -يعني الكلام مش لينا - وبقيه المحافظات ولاد كلب مبيفهموش لا في الفن ولا في الثقافه. ويوم ما راحوا يا عيني مركز ثقافه يتفرجوا على مسرحيه قام المسرح ولع بيهم.

بلاش.....شوف معرض الكتاب اللي المفروض انه من اكبر الاحداث على المستوى الداخلي والخارجي. اكتر الكتب اللي بتتباع فيه كتب الدين والطبيخ. على اساس ان بفضل مجهوداته بقينا زي تور الله في برسيمه

فاكر حادثه الحجاب؟

ميجو: طبعاً

مشمش: واحد في مكانه لازم يبقى يفكر الاول قبل ما يتكلم. ولما الكلام يخرج من بقه لازم يتحمل مسئوليته كامله ويدافع عن وجهه نظره. لكن لما الدنيا قامت ومقعدتش. جاب ورا وانتصر الحجاب بالصوت العالي والتهديدات بالقتل والحرق وإقامة الحد على الوزير المثقف الفنان. اليونسكو

ميجو: اشمعنى

مشمش: مش لما واحد من بتوع المحظورة - كل قرياته عن عذاب القبر والثعبان الاقرع والجدل الفقهي حول النقاب ابو عين واحدة ولا عنتين - وقف يزعق في مجلس الشعب ومقدم استجواب لوزير الثقافه علشان انه سمع ان في مكتبه الاسكندريه 3 كتب إسرائيليه من اصل ملايين الكتب - زي ما مكتوب عالسيت بتاعهم- قام بدل ما الوزير يقوله عيب يا جاهل يا ظلامي الكلام ده. مكتبة الإسكندرية الجديدة هدفها استعادة روح الانفتاح والبحث التي ميزت المكتبة القديمة؛ فهي ليست مجرد مكتبة وإنما هي مجمع ثقافي.

لا رد برد بنفس المستوى الفكري للأخ بتاع المحظورة وقال : ان الكلام ده مش مظبوط ولو في كتب زي كدة في مكتبه الاسكندريه هيحرقهم بنفسه. ولما بدأ الكلام عن ترشيحه لليونسكو سمعنا العبارة المشهورة بتاعته: انتبه من فضلك الوزير يرجع إلى الخلف!!!!!!!!!!!! الله

اللي كان هيحرق الكتب قعد يتكلم عن الاثار اليهوديه في مصر ودور اليهود الفعال في بناء الحضارة المصريه وحاجات جامدة جداً عن اسرائيل. طب مش اللي يقول كلمه يبقى قدها يا عم

ميجو: يا بنتي التيار اقوى منه. البلد بتتعرض لهجمه وهابيه شديدة قضت على كل مظاهر الجمال فيها. اركبي ميكروباص ولا انزلي امشي في بير ام سلطان. الجهل والقبح هما اسياد الموقف
مشمش: اما الجهل والقبح هما اسياد الموقف يبقى هو بيشتغل ايه؟!. لو مش عارف يعمل حاجة يسيب مكانه لحد غيرة يعمل. لو مفيش فايدة في البلد يبقى الحكومة تلغي الوزارة ديه من اساسه وتعمل مكانها موقف ميكروباصات افيد واوفر
على فكرة الصور الرائعه ديه من ابداعات الوزير الفنان المثقف
Love,
MishMish

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق