Saturday, February 27, 2010

الوزير جاى

ناسف على فترة التاخير فى الفترة الماضيه..وذلك لدواعى بدايه الترم التانى وما يحمله من تبعيات خطيرة على المستوى الدولى ..من تحضير ودفاتر درجات وتكت وجلاد وطباشير والنوم مبكرا لمطارده العيال فى المدرسه النظيفه الجميله المتطورة التى بلغ التطور فيها الى اقصى درجه ..فمدرستى حائزة على الجوده التعليميه ودى شهاده زى شهاده الايزو ..يعنى من الاخر ميه ميه ..وبالمناسبه فيه بند فى الجوده احنا طبقناه فى المدرسه وهو سبب تقدمها واذدهارها.. البند ده اختلف عليه معظم الناس لانه بند قوى قد يسبب طفرة رهيبه فى العمليه التعليميه البند ده بيقول بالنص الواحد : الحوكمه فى اطار من المعلوماتيه ..الحقيقه انا ذهلت اول ماسمعته ..مش عن جهل والله لكن لانه اخيرا احنا عرفنا مشكلتنا فى التعليم ..المشكله ياساده هى اننا معندناش حوكمه ..اللفظ ده عاجبنى اوى بيفكرنى بالعولمه وبالقولبه وبالمعلمه والخلجنه والكوكبه والفشخره و اللهلبه والزفلطه بقى اى واحد عايز يبقى مثقف يروح راقع لفظ من دول..يقوم الناس علطول يعرفو انه مثقف ويخافو منه ويمكن يقولو عليه ليبرالى كمان .وكمان لفظ المعلوماتيه بيفكرنى بسنيه الكلوباتيه اشهر راقصه فى العشرينات .المهم ..الحوكمه فى اطار من المعلوماتيه بند رهيب وضعه الجهابزة من اساطين التعليم فى مصر لعلمهم بان المشكله فى الحوكمه وليس فى شيئ اخر ..انا مرة شفت واد سايب الحنفيه مفتوجه فى المدرسه قمت زعقتله وقلتله انت ياولد ..انت معندكش حوكمه ولا ايه ؟ مش لازم تبقى فى اطار من المعلوماتيه ؟ راح الواد معيط ومبربر لما سمع كلمه حوكمه وقالى : والله منا يا مستر دا الواد محمد فتحى بتاع تالته رابع هوالى عمل كدا ..طبعا فرحت وقلت الحوكمه دى كلمه رهيبه زى كلمه البلاللام ..كلمه سحريه تفتح الابواب المغلقه ..ياسلام عليك يا واد ياميجو يامفتح ..بعدها طلبنى المدير عشان فيه شكوى من الاولاد ان فيه درس مش فاهمينه ..دخلت بكل ثقه وقلتله : يااستاذى الفاضل انا بطبق الاساليب التربويه داخل الفصل وبحاول اطور منهم (تذكرت الكلمه ) وبعدين احنا بنطبق الحوكمه فى اطار من المعلوماتيه ..بصلى واتبرجل ..وقالى انا عارف انك بتشرح بضمير وان الحوكمه شيئ مهم (خاف لا كلمه الحوكمه تكون حاجه وحشه ) بس حاول انك تطبقها فى اطار من المعلوماتيه عشان متجيش مشاكل .. خرجت بعدها قابلت عم عادل الفراش كان عايز يقبض حساب الشهر بتاع الشاى والقهوة ..قلت لما اجرب عليه تاثير الكلمه
حسابك كام ياعم عادل ؟ 15 جنيه يا استاذ
ايه ده ؟ انا مشربتش كل ده ..انت كدا عندك حوكمه فى اطار من المعلوماتيه
عمل صوت قبيح من مناخيره وقال لفظ على وزن حوكمه بس بالبلدى
معلوماتيه ايه ..انا عايز المعلوم ..والا مش هاتشوف شاى ولا قهوة تانى
الحوكمه يا افاضل كلمه رهيبه ..فضلت استخدمها مع اى واحد يقابلنى فى المدرسه ..واكتشفت انها اعادت الفصول الى نظافتها وانها جددت الكراسي التى يجلس عليها التلاميذ ..وطورت المناهج وطبقت الكادر وطبقت تأمين صحى سليم على التلاميذ ..وطبقت انشطه وحدثت معامل الكومبيوتر واخرجت تلاميذ نابغين هايبقو زى زويل ومحفوظ فى المستقبل ووووووو..عرفنا المشكله فين ؟
الحوكمه فى اطار من المعلوماتيه
ركبت ميكروباص كان زحمه اوى والركاب فوق بعض وقلت اجرب على السواق الكلمه : بقولك ايه ياسطى هى العربيه مافيهاش حوكمه؟
بصلى شذرا على انغام اغنيه يانى يانى يانى الى كان مشغلها ..حضرتك عايز تنزل عند الحوكمه الدستوريه العليا ؟
قلتله لا ..انا بسالك على الحوكمه
قالى : ااه فهمت ..الحوكمه الصبح كانت عامله كمين عالطريق برة وخدت رخص زمايلى ..بس انا طلعت ناصح ومشيت من جوة
روحت البيت وقلت لما اشوف مشمش هاتتاثر بالكلمه ولا لا ؟
دخلت وسالتنى السؤال المعتاد: اتاخرت ليه ؟
استجمعت شجاعتى وقلت فى سري انا معايا سلاح خطير : كان عندنا حوكمه فى اطار من المعلوماتيه
متخضتش وفضلت زى ماهى ..قمت قايلها تانى ...كان عندنا حوكمااااااااااه
سكتت وبرقت
انت مش عارف ان البيت هنا فيه قولبه فى اطار من الامبرياليه؟
خفت وسكت
انا اسف مش هاتاخر تانى
تحياتى
ميجوووو
من امام الحوكمه

Thursday, February 18, 2010

الضربه القاضيه

يلتف الجمهور حول حلبه الملاكمه ..الصيحات تتعالى والهتافات تتوالى ..الجميع متعطش للفوز ..تصفيق حاد ..لقد دخل الملاكمان وهما يستعرضان عضلاتهما المفتوله وينظران الى بعضهما نظرة تحدى ووعيد ..يخلعان ملابسهما المطرزة بالالوان الفاقعه .ينتفضان مثل الطاووس ..ويعلن المذيع عن بدايه الصراع

الجوله الاولى

صاحب شركه خاصه يذل عماله وموظفيه ويمتص دماؤهم ..ينهكهم فى العمل ويهددهم بان الباب يفوت جمل وان لو حد عايز يمشي هايلاقى الف غيره وبنص المرتب والى مش عاجبه يضرب دماغه فى الحيط ..بينما الموظفون فى جلساتهم السريه يشتموه ويتهموه انه حرامى وانه مبيفهمش حاجه ولولاهم ماكانت الشركه وقفت على رجليها وانه مايقدرش يستغنى عنهم ولو مشيو الشركه هاتقع .يتفقون فيما بينهم اتفاق غير معلن ان ينتقمو منه بطريقه لا اراديه ..استهلاك التليفونات فى المكالمات الخاصه ..تصوير اوراقهم الخاصه على ماكينه التصوير الخاصه بالشركه .. بذل اقل مجهود فى العمل ..بذل اكبر مجهود فى لعب سوليتير وفيفا والتشات على الفيس بوك ..ومن جهه اخرى قرر هو ان يستغل ادنى فرصه فى عقابهم ..تاخير = خصم ..عدم الاهتمام بالمظهر ..يعنى مش لابس الكرافت او مش حالق دقنك ....العكننه على الموظفين ب ميييتنج كل شويه بشويه كلام فاضي ...وهكذا يستمر الخصمان فى تسديد الضربات للاخر ..لكن تنتهى الجوله الاولى بدون ضربه قاضيه

الجوله الثانيه

تتهم الزوجه زوجها بانه انانى ولا يفكرالا فى نفسه ..لا يهمه غير رغباته الشخصيه ..كل مايهمه هو العوده للمنزل فيجدها فى انتظاره والطعام مجهز ليلتهمه ..ويدير مفتاح التليفزيون ليشاهد مباراه الكرة ..ثم تنتظره فى غرفه النوم مرتديه الملابس الساخنه وتشعره بانه هارون الرشيد ..ليعطيها بعد ذلك ظهره ويغط فى نوم عميق ..بينما هو يتهمها بانها انانيه وانها لاتعرف كيف ياتى لها بالمال ..وانه طالع عين اهله فى الشغل عشان يجيب القرش وهى مش حاسه بيه ..وانه ضحى بكل حاجه عشانها ومش مخليها محتاجه حاجه هى وعيالها ..هى تشكوه فى جلساتها السريه لصديقاتها وتنتقم انتقام غير معلن ..فقد تتعمد ان تسمع كاظم الساهر امامه او ان تقرأ كتاب لاشعار نزار قبانى ..وهو يتعمد الذهاب للمقهى او قضاء اكبر وقت خارج المنزل ..هى تفكر فى الخلع ..وهو يفكر فى الطلاق

والاولاد يفكرون فى الرسوب فى المدرسه ..وتتوالى الضربات الساخنه ..لكن لم تأتى الضربه القاضيه بعد

الجوله الثالثه

تقف الحكومه امام الجماعه المحظورة بكل قوتها ..ترى الحكومه ان الاخوان جماعه غير شرعيه وانهم انتشروا بصورة كبيرة داخل الشارع المصرى ولذلك يجب تقليم اظافرهم لانهم يسعون للسلطه عن طريق الدين ..بينما يرى الاخوان انهم الاحق بالسلطه لانهم يقدمون خدمات حقيقيه للشارع المصرى وانهم يريدون ان يعيدون الخلافه الى عصرها الذهبى بتطبيق الشريعه ..ويقف الاقباط بين الجماعتين فهم يرتمون فى احضان النظام حتى ولو كان ظالما فعلى الاقل افضل من الاخوان بينما البدو ساخطون على الحكومه بسبب ممارساتها معهم ..وعلى جانب اخر يطالب النوبيون بالعداله معهم ..فهم فاض بهم الكيل بسبب تهجيرهم المستمر واقصاؤهم من المشهد نهائيا ..قامت الحكومه بتقليم اظافر الاخوان بعده طرق عن طريق الاعتقال وتجميد الثروات والمشاريع والتزوير احيانا ..بينما اكتفى الاخوان بالنزول الى الشارع واكتساب ارضيه واسعه من اجل توجيه ضربات قاسيه وموجعه للنظام .. اما الاقباط فيحاولون استغلال اى فرصه ضد النظام عن طريق اقباط المهجر او تدويل قضاياهم لكن بصورة غير معلنه .. والبدو يقومون بطرق انتقاميه نتيجه للمعامله السيئه ضدهم ..فيساعدون على تهريب المخدرات والاسلحه وكل العمليات الغير مشروعه كانتقام خفى من النظام ..والنوبيون حالهم حال الاقباط فهم يحاولون تدويل قضيتهم ..لواثارة القضيه النوبيه ...ومازالت الضربات متتاليه ومتلاحقه بين اللاعبين على حلبه الملاكمه لكن تنتهى الجوله بدون ضربه قاضيه فنيه
الجوله الرابعه
الشيخ يعظ فى برنامجه ويتهم الكتاب المقدس بانه محرف وان الاقباط هم سبب الفتنه الطائفيه وشيخ اخر يتهم البابا بانه راس الافعى وان المسيحيون مشركين وسيدخلون النار فى اسفل السافلين ..ولم ينس ان يلعن اليهود والنصارى وييذكر المشاهدين بقضيه غزة واخواننا فى الشيشيان وافغانستان والعراق وفى اخر البرنامج لم يفته ان ينبه الى ان اهل السنه هم الفرقه الناجيه وان المذاهب الاخرى بدع وضلالات ..وفى تليفزيون اخر يتبع ايران اخذ الشيخ يسب اهل السنه وانهم على ضلاله وانهم هم الاحق بالخلافه وانهم الاحق عند الله وهم على باطل ...لم يسكت احد القساوسه على احدى الفضائيات الاوربيه ونبه الى ان المسلمين يتقاتلون فيما بينهم وان دينهم على باطل ويدعو الى العنف واخذ يفند براهينه على ذلك ..رد عليه شيخ على احدى الفضائيات المصريه بانه لن يرد عليه لانه اكبر من ذلك وانه سيفتح النار على المسيحيين واقباط المهجر وشنوده المخادع فلن يسكت وسيفضح الكنيسه ..واستضاف مكسيموس فى الحلقه التاليه الذى انتهز الفرصه ليكتسب ارضيه عند المسلمين ويكيل عبارات المدح لهم ولدينهم باعتبار عدو عدوى صديقى ..واخذ يكيل الاتهامات للكنيسه القبطيه والبابا شنوده وهدد بانه يلقى مسانده دوليه ..وان الحكومه تساند الكنيسه القبطيه ضده ولم ينس ان يقول ان ظهور العذراء ماهو الاخدعه نال هذا الراى اعجاب الشيخ الجالس معه فى الحلقه ..واثناء ذلك تلقى اتصال من قس انجيلى يؤكد كلامه لتنتهى الحلقه بأن يرد احد قساوسه الكنيسه فى برنامج على القناه القبطيه انه يملك الف دليل على ظهور العذراء وان الانجيليين لن يدخلو الملكوت ( الجنه ) وانهم لايؤمنون بالعذراء وقداستها وان المسلمين افضل من الانجيليين لانهم يقدرون العذراء اكثر منهم ..لكن رد شيخ اخر على قناه فضائيه خاصه ان المسلمين يقدرون العذراء لكن ظهورها خدعه ..ليظهر نفس القسيس على فضائيه خاصه اخرى ليقول انه يملك الف دليل على ظهورها وان الانجيل غير محرف ..لياتى بعدها قس على الفضائيه الاوروبيه ليتهم الاسلام بالعنف ويفند شبهات حول الاسلام
وتستمر الضربات بين اللاعبين على حلبه الملاكمه ..لكن بدون ضربه قاضيه فنيه
الى اللقاء فى باقى الجولات
تحيااااتى
ميجوووووووووووو

Tuesday, February 16, 2010

قاتل توت عنخ امون



اسباب وفاة توت عنخ امون فى مؤتمر صحفى عالمى

........من سبعه الاف سنه واحنا منعرفش مين الى قتل توت عنخ امون ..

اعتقد ان الفراعنه خايبين ..لو كانوا عايشين فى مصر الحديثه

كانو عرفو ان الجانى ....مختل عقليا

تحيااااتى

ميجوووووووو عنخ امون

Friday, February 12, 2010

عيد الحب

الواحد مش عارف يقضيها ازاى فى الفالانتاين ؟ دا عيد الحب ياجماعه ..لازم نصحى الصبح نفطر حب.. نتغدى حب.. نتعشى حب لكن ماهو الحب ؟؟

الحب لكل الناس ..فلا احد يستطيع ان يعيش بدونه


ان تتحمل الحبيب مهما كان

اطفال الانابيب

حاله هيام وعشق بين الحبيب وحبيبه

الغرق فى الحب حتى اذنيك

هو ده الحب الحقيقى

وسكر حلوة الدنيا سكر لالالالالااااااااا

هابى ظالانتاين داى

تحياتى

سمير صبرى

قصدى ميجوووو

تحديث : اعتذر للساده زوار البلكونه عن هذا البوست واعدكم بعدم تكرار التجربه مرة اخرى ..لقد فكرت مع نفسي ووجدت انى متشائم اكثر من اللازم وانى عندما كتبت هذا البوست عن الحب كنت مثل غراب الشوم ..وخميرة العكننه الى بتفكر الناس بالامهم واوجاعهم فى وقت يحتاجون فيه الى بقعه ضوء او منفذ ينسون فيه همومهم ..لقد اصبحت مثل هادمى اللذات ومفرقى الجماعات الذين ينتظرون اى فرصه لجلد الذات او ينتظرون جنازة ويشبعون فيها لطما ..اعتذر بشده عن هذا البوست وكان اولى ان احاول ان ازيد مساحه بقعه الضوء ..ولكنى وضعت امامها جدار اسمنتى ..اعتذر لكل من قرأ هذا البوست ومنعته من ان يعيش حاله حب ولو وهميه... لكل من يحاول ان يوقد شمعه وانا داريت ضوءها ..لكل الذين يحتاجون الى الحب حتى فى خيالهم ..الحب الذى اصبحنا نفتقده بشده

واعدكم بعدم تكرار التجربه ولذا وجب الاعتذار

والاعتراف بالحق فضيحه ..قصدى فضيله

تحياتى : ميجوووووو

من امام مستودع الانابيب (ملحوظه :الى فيه داء مش بيبطله ) الف شكر

Wednesday, February 10, 2010

اول يوم اجازة _ الجزء الثانى

فى اول يوم اجازة وانا مدرس وانا مش تلميذ قابلت حمار ..شبهت عليه ..ايه دا انا اعرف الحمار ده كويس ..شفته قبل كدا ..شكله مش غريب عليا ..ملامحه هى هى بس متغيرة شويه ..بان عليه السن ..كان لابس نضارة وشعره بقى فيه شويه ابيض ..بصلى من طرف عينه ..الله الله دا باين يعرفنى انا كمان ..غريبه دى .. عينى فضلت فى عينه لحد ماقربت منه ..خلع نضارته ودقق فيا ودار بيننا الحوار التالى
ميجو : انا متهيالى اعرف حضرتك كويس
الحمار: وانا كمان اعرفك ..متهيالى شفتك قبل كدا
ميجو : انت كنت شغال زمان مع خضرى قصاد مدرستى النظيفه الجميله المتطورة ..صح
الحمار : انت عارفنى كويس اهو ..مين بقى حضرتك
ميجو : انا كنت تلميذ فى المدرسه دى وكنت بشوفك كل يوم
الحمار : اااه ..اهلا وسهلا ..بس انتو كنتو عيال اشقيا اوى
ميجو : معلش بقى ..بس كل حاجه بتتغير
الحمار : على رأيك ..كل حاجه بتتغير ..بس ان جيت للحق الجيل اليومين دول بقى اصعب منكو ..العيال لا فيه لا تربيه ولا اخلاق
ميجو : اسألنى انا ..منا شغال مدرس
الحمار : ربنا يكون فى عونك ..تخيل العيال بقت بيجيبو صواريخ ويحدفوها عليا
ميجوو: ياااه ..هى وصلت لحد كدا؟
الحمار : انا هاقولك حاجه ..زمان لما كنت شاب صغير كان فيه عيال من سن حضرتك كدا ..لمؤاخذه يا استاذ ..فيهم واد شيطان جاب عصايا طويله ..وفضل يضرب فيا على ضهرى ..سكت وقلت عيل صغير ..حب يعمل شو عليا قصاد العيال ..طنشت وقلت سيبه يلعب
انما يجيب العصايا ويحاول انه لمؤاخذه ..لمؤاخذه يعنى ..يعملى بيها حاجه أبيحه ..دا الى مسكتش عليه ابدا
ميجو : ( يانهار اسود لو افتكر انى انا الى عملت كدا)ده مش بعيد يشغلنى مكانه عالعربيه الكارو ..ها وعملتله ايه الواد ده
الحمار : رقعته رفسه محترمه فى بطنه ..سوبر سوفليكس
ميجو :( ممسكا بطنه ) طبعا يستاهل
الحمار : دنا لو قابلته تانى دلوقتى اقطعه بسنانى
ميجو : طبعا طبعا ..بس قولى ليه يعنى سبته يضربك ..ماكان من الاول تبعده عنك
الحمار : منا قلت عيل وعايز يلعب ..اعمل عقلى بعقل عيل صغير ..وبعدين انا طيب مبحبش ااذى حد
ميجو :اسمحلى دى مش طيبه دى ...
الحمار : عارف ..متكملش ...حموريه
ميجو : انا اسف مقصدش بس يعنى انت الى اتهاونت فى حقك
الحمار : انت بتلومنى اوى ليه كدا ..متبصوا لنفسكو ..على الاقل انا جيت فى مرحله ورفست ويحصل الى يحصل..عند الكرامه وستوب.. انما انتو بقى الى ساكتين على حقكو ..انا مش متخيل ان فيه ناس ممكن تقف طابور طويييييل عشان تشترى عيش ..على الاقل انا البرسيم بيجيلى لحد عندى ..عمرى ما وقفت فى طابور عشان اشترى انبوبه بوتجاز..بتقولو كلام شعارات وخلاص ومبتطبقوش منه حاجه ..بص المدرسه دى مكتوب عليها نظيفه وجميله وتطورة ..تصدق بايه ..بشوف عيال فى ابتدائى جايبين موبايلات وبيتفرجو على افلام سيكو سيكو ..ومبيتكسفوش ..كدا عينى عينك ..لدرجه مرة واد جابلى فيلم و حطه قصاد عينى وفرجنى عليه وصحابه بيضحكو
ميجو : طب ومرفستهوش ليه زى الواد بتاع زمان
الحمار : ارفس مين ولا مين انا لو رفست كل واحد بيعمل وضع غلط ..مش هاخلص
ميجو : وفين كرامتك
الحمار : وفين كرامتك انت ..بذمتك انت راضي عن العيال الى فى المدرسه عندك ؟ وراضي عن المناهج الى بتديهالهم؟
ميجو : معاك حق ..انا حاسس انى بوشين ..وحاسس انى بديهم كلام فارغ
الحمار : تخيل مرة جه عيال صايعه بعد ماتش مصر والجزاير ..ورسمو عليا علم الجزاير ..وزفونى فى المنطقه ..وقعدو يشتمو فى الجزاير ..واللى ماشي يضرب ..واللى جاى يضرب ..لحد ماكنت هاعيط
ميجو : يااه ..فيه ناس كدا ؟
الحمار : عيال صايعه وضايعه ..دا بييجو يستخبو تحت العربيه الكارو يشربو بانجو وبرشام صراصير
ميجوو: وانت كنت بتطنش طبعا
الحمار : وانا هاعملهم ايه يعنى ..عيال مغيبه اصلا ولو شفتهم وهما راسمين علم مصر على وشهم تقول دول رايحين يحاربو
ميجو: اهو بينفسو عن نفسهم
الحمار : انتو ناس مزيفه ..بتوع كلام وبس
ميجو: معاك حق
الحمار : انا ببقى قاعد هنا وشايف الشارع كله ...بيعدى عليا اشكال والوان ..ببقى شايف الى عاملى فيها شيخ ..وهو بيخون مراته
والى عامله نفسها الخضرة الشريفه ...وهى ماشيه مع طوب الارض ووووو.. تخيل مرة بقلب فى الموبايل بتاع المعلم الى شغال معاه ..وببص لقيت كليب ..فيه واحد ظابط بيحط خشبه فى ... فى ...لمؤخذه يعنى ..والمتهم عمال يصوت زى النسوان ..تفتكر انا لو كنت مكانه كنت عملت ايه
ميجوو : كنت رفسته طبعا
الحمار : لمؤاخذه يبقى انت متعرفش الحمار كويس انا كنت قتلته وقطعت جتته حته حته وميهمنيش اموت بعد كدا
ميجو : طب ماهو احنا برضه مبنسكتش وبنعمل مظاهرات
الحمار : هأو هأو أواو..مظاهرات يابو مظاهرات ..انتو فالحين بس تعملو مظاهرات لغزة والجدار ..ولو فيه عيل مات فى كوالالامبور بتاخدكو النخوة اوى ..انما الى يموت منكو ..بتسكتو ..بتتهان كرامتكو وبتسكتو ..ياخى متحرقش دمى بقى
ميجو:يييياه انا مكسوف منك اوى
الحمار : وحياة ابوك متقلبش عليا المواجع وبلاش السيرة دى ..عشان مغلطش اكتر من كدا
ميجوو : انت قلبت عليا انا المواجع
الحمار : على العموم فرصه سعيده ..متعرفتش بحضرتك
ميجو: مش مهم تعرف اسمي ..المهم انا عرفتك كويس
الحمار : بس انا استريحتلك والله ..زى ماتكون قريبى كدا
ميجو : احنا فعلا قرايب ..بس عالاقل انت بتعرف ترفس
تحياتى
ميجووووو
فكرة : عمو عصاااااام

Monday, February 8, 2010

خليك مكانى

المشهد الاول : ليل داخلى الساعه 3 الصبح ..اخيرا ساندو نامت ..انا مرهق وتعبان وكذلك مشمش ..بطل القصه ميجو يرمى راسه على السرير ويغط فى نوم عميق بينما تنام مشمش مع المفعوصه على السرير الاخر وفجأه صحى البطل على نداء زوجته مشمش
مشمش : ميجو ميجوووووووو
ميجويطنش وينفض
مشمش: ميجوووووووو
ميجو : يتظاهر بالنوم ويرد بتثاقل ..نعم
مشمش : انا افتكرت حاجه مهمه اوى
ميجو: ايه خير ..الفلوس خلصت بتاعه البيت ؟
مشمش : مش كدا ..انا افتكرت حاجه مهمه مضايقانى
ساورتنى بعض الشكوك ان مشمش عملت مصيبه وخليتهالى مفاجأه زى ماراحت اشترت لاب توب من ورايا ..هيأت نفسي للكارثه
ميجوو: خير ياحبيبتى ..قولى ايه مضايقك ..حد ضايقك فى الشغل
مشمش : لا مافيش حد يعرف يضايقنى
ميجو : امال ايه الى حصل
مشمش : احنا بقالنا سنتين متجوزين صح؟
ميجو : اه ..طب هو انا زعلتك فى حاجه ؟
مشمش : لا خالص بس افتكرت انك قبل الخطوبه مقلتليش انك بتحبنى وعايز تتجوزنى
نزل عليا الخبر كالصاعقه
ميجو : ازاى يعنى ..امال احنا عايشين مع بعض ازاى ؟ صحيتى الصبح لاقيتينى معاكى فى بيت واحد ..وبعدين انتى هاتعمليلى زى فؤاده فى شيئ من الخوف ؟ اجيب الجيران ويقولو جواز ميجو من مشمش باااااااااطل بااااااااااطل
مشمش : انت مديتنينش فرصه افكر ومقولتليش انا عايز اتجوزك
ميجو : طب ممكن اديكى فرصه تانيه تفكرى وتعيدى حساباتك .وبعدين ياستى حقك عليا انا غررت بيكى ومش هاعمل كدا تانى .بس سيبينى انام وبكرة الصبح يحلها حلال
مشمش: بس كان مفروض افكر وارد عليك
ميجو : ماهى النتيجه واحد فى الاخر ياحبيبتى
مشمش : بس افرض مكنتش وافقت
ميجوو: معلش قسمتك ونصيبك
مشمش : ماهو انا كنت هوافق عليك ..مش هى دى المشكله ..المشكله انك مقلتليش زى بقيت البنات انا بحبك وعايز اتجوزك
ميجو:الوليه اتهبلت فى دماغها ولا ايه ؟ وبعدين فى اليوم الى مش فايت ده ..طيب ياحبيبتى انا اسف ممكن اجى اتقدملك تانى ..حدديلى معاد مع بابا وخدى وقتك براحتك ..وفكرى على اقل من مهلك ..(والله لو اعرف كدا كان مفروض انى انا الى افكر ميت مرة )خلاص ياحبيبتى ..يالا نامى بقى عندنا شغل الصبح
مشمش : بس بابا الله يرحمه
ميجو: ماهو كان لازم يموت يا حبيبتى ..مكانش يقدر يستحمل هبل اكتر من كدا
تحياااتى
ميجووووو

Saturday, February 6, 2010

اول يوم اجازة


بعد عناء طويل فى موسم دراسي ساخن ..وبعد هوجه الانفلونزا فى المدارس ...وبعد تصحيح وكنترول ورصد درجات ومراقبه وتطليع عين العيال ..اخيرا خدت اجازة وفرحت بالظبط زيي زيهم..اول ماخلصت حسيت انى عايز اطلع السكوتر والبلاى ستيشن ..نفس شعورى وانا تلميذ بالظبط هو نفس شعورى وانا مدرس ..مش عارف ده كويس ولا وحش انك تفضل عندك احساس انك لسه تلميذ وتعيش اجواء الطفوله (على وزن اجواء البطوله ) تحس بالاجازة وتحس بالتكت والجلاد والواجبات والحوش بتاع المدرسه وتحيه العلم والاذاعه المدرسيه والاجواء الاسطوريه بتاعه الطفوله المشرده.. وعلى طريقه حسن الهلالى بتاع الفيلم مش صديقى حسن الهلالى المدون ..هارجع بالزمن ربع قرن ايام ماكنت فى ابتدائى فى مدرسه حكوميه نظيفه وجميله ومتطورة .واسترجع ذكرياتى فى الماضي

اول يوم فى الاجازة ...ياسلاااااام على اليوم التاريخى الجميل ده ..بيبقى يوم عظيم وله طعم مختلف عن باقى الايام ..كنت بتسابق انا وصحابى على مين اول واحد يخرج من باب المدرسه وكانت بتبقى زعله بجد لو طلعت التانى او التالت ..انا فاكر فى سنه من السنين كان فيه حمار جنب عربيه كارو قصاد المدرسه واول ماخرجنا من المدرسه فى اول يوم اجازة ..طلعلى قرنين زى بتوع الشيطان وفكرت انى اعمل مسابقه جامده مع صحابى ..سباق التحدى ..جبت عصايه طويله واتفقت مع صحابى ونشوف مين اكتر واحد يضرب الحمار على مؤخرته ويطلع يجرى من غير ما الحمار مايرفسه ..طبعا انا كنت واثق من نفسي انى هاكسب لانى واد عفريت وصاحب قدرات خاصه فى اذيه الناس والحيوانات..المهم طبعا كله خاف انه يضرب الحمار وساعتها حسيت بالفخر ونشوة الانتصار على اصحابى ..وبدأت اضرب الحمار على مؤخرته واجرى ..اضرب واجرى ..وهما يسقفو ..كل مايسقفو تزيد رغبه التحدى عندى واشعر بنشوة البطوله ..كان عرض (وان مان شو ) وهم مبهورين بادائى الفذ ..خدتنى الجلاله حبتين وحبيت ازود جرعه الاثاره زى بتوع السيرك ..وقلتلهم هاعمل حركه محدش يعرف يعملها غيرى ..هاحط العصايا عند مؤخرة الحمار( لمؤاخذه عند ديله) ..اخذو يتهامسون وينظرون لبعضهم نظرة تعجب ودهشه من قدراتى الخارقه .....وعلى طريقه انا شجيع السيما ..امسكت العصايه وقربت بخفه ورشاقه مثل ماتادور يناطح الثور ..ترررررررررررررررارم تررررررام ..وفجأه قربت من الحمار ولسه بحط العصايه عند لمؤاخذه ديله ...بعدها ب3 ايام لقيت ماما واخواتى واقفين عند السرير وانا بين الوعى واللاوعى ..وسمعت همس كلام ..الحمدلله جت سليمه ..ربنا ستر ..دا بقاله تلات ايام لا بيصد ولا بيرد ..واد جن مصور ..اعمليله لسان عصفور عشان يعوض السوايل وابقى غيرى ملايه السرير عشان مبلوله .ومن ساعتها تعلمت حكمه فى اول يوم اجازة ..لا تضع عصا فى مؤخرة حمار مهما كانت الاسباب ..لكن الحكمه الاهم التى ادركتها فيما بعد : الحمار قد يتحمل الضرب كثيرا..وقد يتحمل الجوع كثيرا ..لكن لا يتحمل اهانه كرامته كثيرا

تحياتى
ميجوووووو
من امام مؤخرة حمار

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق