Monday, May 28, 2012

لله الامر من قبل ومن بعد

وكالعادة دايماً فرحتنا مكسورة ومبتكملش لان اقصى اوقات السعادة في مصر لا تتعدى 24 ساعه. وبعد ما تخليت عن ترشيحي لخالد على وصوت لحمدين علشان الاصوات ماتتنيلش تتفتت. وكان المتوقع هو الاعادة ما بين ابو الفتوح وصباحي لكن طبعاً بما اننا في بلد العجايب النتيجه جات حاجة تالته خالص ملهاش دعوة باي توقع وهي 

الاعادة مابين اكتر اتنين اتمسح بيهم ارضيه الفيس بوك والتوك شوز
يعني انا عايزة اعرف لو مرسي - لاقدر الله - بقى الرئيس هايعمل ايه لو ماشي في الشارع ولاقي صورة ميشلان مثلاً
او لو الفريق شفيق في اثناء مؤتمر صحفي بعد اعلان فوزه في الانتخابات - لا قدر الله برضه -  قام  واحد رباط جذمته اتفك ووطي يربطه او لا مؤاخذه الجذمة فيها زلطة فقلعها علشان ينفضها.

 وبدل ما نتلم كدة ونشوف هنعمل ايه في المصيبه اللي احنا فيها ديه قاعدين ندور نلبسها لمين
ناس تقولك المسيحيين هما السبب هما اللي نجحوا شفيق
الله هما المسيحيين بقوا اغلبيه دلوقتي واصواتهم ليها قيمة مش المسيحيين قال عنهم سليم العوا ان عددهم في مصر 6% يعني 4 مليون مواطن و800000.
وسبحان الله كلهم مطابقين لشروط التصويت مفيش منهم اطفال مثلاً مفيش منهم حد هربان من التجنيد مثلاً مفيش منهم حد انتخب اي حد تاني غير شفيق. امال الناس بتوع احنا اسفين يا ريس واحنا اسفين يا مشير وبتوع انا فل كبير وزهقت من التحرير والجماهير اللي كان بيقودها عوكشه مرشح البط واللي كان سبب في موت جلال عامر - الله يرحمه رشحت مين؟ 

وبعدين الغريب ان اللوم على المسيحيين اللي خلوا شفيق في المركز التاني طب واللي خلوا مرسي في المركز الاول ايه ظروفهم . وبالمرة ادي اصوات الخارج علشان الناس اللي هايقولوا اقباط المهجر


اللي انا اصلاً عايزة افهمه باي وش الاخوان بينزلوا بمرشح للرئاسه وهما كانوا قاعدين بدم بااااااااااااارد يرغوا في اي كلام في المجلس والكتتاتني فرحان بالجرس وفي حرب دايرة على بعد كام متر في محمد محمود
وده لينك الجلسه الشهيرة اللي جاب فيها محمد ابو حامد الدليل على ان الداخليه بتضرب نار على المتظاهرين ورئيس المجلس بيقرا تصريحات الداخليه وبقيه النواب رد السجون بيقولوا على محمد ابو حامد إن جائكم فاسق بنبأ

وللتذكرة احداث محمد محمود كانت بسبب فض الاعتصام اللي دعى اليه ابو اسماعين وبعض القوى الثوريه بسبب مماطله المجلس العسكري في تحديد ميعاد تسليم السلطة والاعتراض على وثيقه السلمي 
احداث محمد حمود

بعد ده كله في ناس دمها ساقع راحت تنتخب مرسي وتخليه المرشح الرئاسي الاول
لا وايه في دعوات دلوقتي قال للانتخاب مرسي على انه مرشح الثورة علشان شفيق فلول يا اخي .......... -كلمه قليلة الادب
لاحظوا ان اللي قالبها مسلمين ومسيحيين الاخوان علشان تصب في مصلحتهم
لاحظوا ان نواب المجلس محلوش ازمة الانابيب ولا التعديات على الاراضي الزراعيه ولا ازمة الزباله اللي غرقت البلد ولا فرض سيطرة القانون ولا انهيار الاقتصاد ولا اي حاجة من ديه.
 نواب المجلس بسبب معانتهم من  وجودهم في السجون فترات طويله فمعظهم عندهم هوس جنسي او Pathological liars بما فيهم الستات فكل جلساتهم بتدور حوالين مواضيع ذٌكرها قبيح - لا مؤاخذه 
لاحظوا ان النواب المحترمين هما اللي جم من على قوائم الكتله المصرية والثورة مستمرة (اللي انتخبوهم الاقباط اللي قالوا لا بالمناسبه في غزوة الصناديق اللي ضربت في وش ابو اسماعين)
لاحظوا ان اولاد مرسي اول ماشموا نفسهم وابوهم مبقاش محظورة اعتدوا على ضابط شرطة بالضرب المبرح، أثناء قيامه بأداء عمله بميدان سفنكس بمدينة الزقازيق. ونشبت مشادة كلامية قام على إثرها ابنا الدكتور مرسى بجذب الضابط من ملابسه وقالا له، “أنت مش عارف إحنا أولاد مين؟” 

والكلام ده في سبتمبر 2011 يعني قبل ما يبقى في كلام عن رئاسه ولا نيله وتفاصيل الحادثة اهيه: http://www.arabeety.com/news.php?id=998


لاحظوا ان مفيش فرق ما بين ولاد مرسي الامريكان وولاد المقلوع الانجليز
عايز تقاطع الانتخابات براحتك عايز تنتخب شفيق براحتك مش عايز ثورة وعايز استقرار برضه براحتك انما تقولي ناخد ضمانات مكتوبه من الاخوان احب اقولك يلي مستني الإخوان ينهضوا بمصر ، يا مستني نتنياهو يصلي العصر.

MishMish


Sunday, May 20, 2012

ويسألوك يا ودع "نتنيل ننتخب مين؟"

فاكر انت وانت صغير لما كانوا في العيله يحطوك في النص ويسألوك عايز تطلع ايه؟ وتكون الاجابه النموذجيه ياما دكتور ياما مهندس. على ما اعتقد مفيش حد كان طموحه انه يطلع حرامي او بلطجي او متحرش بس للاسف الظروف اللي بيتربى فيها الطفل هي اللي يإما بتطلعه مهندس او دكتور ياما بتنزله تخليه حرامي او بلطجي.
فالخلاص من وجود النوعيات ديه من البشر في مجتمعنا مش هايكون عن طريق رئيس يامر بقطع الايدين والرجلين ويعملنا حفلات رجم جماعي على طريقه عصور ما قبل الحضارة. الخلاص من النوعيات ديه من البشر بيكون عن طريق القضاء على الاسباب اللي جعلتهم مجرمين وحتى لو اجرموا نديهم فرصه تانيه يمكن لما الظروف تتغير حالهم يتغير بدل ما نوصمهم بالعار الى الابد. يبقى ربنا بيرحم واحنا لا. والدليل على كدة ان المجتمعات اللي بتحل مشاكلها كلها بالبتر والقتل لا هي مجتمعات ملائكيه ولا متحضرة ولا متقدمة.
احنا محتاجين لرئيس لينا كلنا مش لرئيس لمعظمنا والباقي "يموت بغيظه" .... محتاجين رئيس يعيشنا في جنه على الارض ومالوش دعوة بأخرتنا .... احنا هنتصرف.

لو قالك "اللي تعرفه احسن من اللي متعرفوش" قوله "كان زمنا لسه عايشين على الجمع والالتقاط وبنلبس جلود الحيوانات". اللي نعرفه زفت وقطران وهو اللي وصل نفسه ووصلنا للي احنا فيه.

"والله الاستاذ خالد علي راجل محترم بس فرصته قليله واحنا مش عاوزين نفتت اصواتنا." جمله بسمعها من معظم الناس اللي اعرفهم. ما هو لو كل اللي مقتنعين بخالد على انتخبوا خالد على فرصته مش هتبقى قليله. انتخبه لو انت فعلاً مقتنع بيه. حتى ولو فرصته قليله يا سيدي اهو على الاقل نبقى صوتنا كراماً
وريح نفسك مسرحية الانتخابات الرئاسيه وتسليم السلطة لا يعلم نهايتها الا المخرج اللي مطلع تيت ام المشاهدين والممثلين على حد سواء.


 انا عارفه اني المفروض ابقى حياديه وان سي الاستاذ ميجو من مؤيدي حمدين ولكن صوتي لخالد على




Love,
MishMish

Sunday, May 6, 2012

اتانى هذا التعليق من شخص مجهول على اخر بوست كتبته واترك لكم التعليق عليه بحريه

بوست ينم عن حقد وغل دفين فيكم يالمصاروة تظنون انكم جنس سامي نبيل أما غيركم فهم مجرد بدو غجر متخلفين .. المشكلة ان المصري واخذ في نفسه مقلب ومصدق ان مصر ام الدنيا وان الخليجي انسان بدوي همجي يعيش في خيمة ..
المصري بطبعه ناكر للجميل, اقتصاد بلده الهش لم يكن ليتماسك لولا مساعدات الخليج , وفي المقابل تجده ينهال سباباً وشتماً على الخليج واهل الخليج بينما يمسح مؤخرته القذرة بالريال السعودي!

والله يالمصارة خلكم عايشين في اوهامكم وخيالاتكم .. لكن الواقع بيفرض نفسه في النهاية , وستظل مصر مزبلة الشعوب بشعبها الساذج الهمجي ..
أما دول الخليج فلن يضرها نبح الكلاب


علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق