البلكونـــــــــــه

على فين ياسطي ؟؟

2011-12-08T00:30:00.002+02:00

فى الثمانينات كان التاكسي بمثابه عمله نادرة فمن كان يجد تاكسي كأنه وجد الخل الوفى ..وتطورت التاكسيات الى حد ما واصبحت مهنه من لا مهنه له ومع انتشار نظام التقسيط ورخص ثمن السيارات الى حد ما.. ادى ذلك الى انتشار التاكسيات بصورة لافته فاصبح التاكسي متوفر الى حد ما ..كان التاكسي لونه مميز وهو اللون الابيض والاسود ..استمر نظام التاكسي الابيض والاسود فترة طويله ..لم يكن يتطور ..لكن لم يكن يتدهور ..كنت تركب التاكسي الابيض والاسود فتتعب من المناهدة مع السائق فى تحديد الاجرة الى المكان الذى تريد ان تذهب اليه ..ويحلفلك باغلظ الايمان بانه سيرجع فاضي وان المشوار مش جايب تمنه وانه والله بيروحه بكذا ..وما ان تنتهى رحله المفاوضات وتركب وتتكل على الله ..قد يصادفك ان باب التاكسي به مسمار يمزق بنطلونك او ان الكرسي به شحم فيتسخ البنطلون فى افضل الاحوال ..ستجد نفسك مجبرا على قبول الامر الواقع وستجد نفسك مجبرا على سماع الاغانى التى يسمعها السائق او سماع مشكلته الشخصيه مع حماته ..وتلعن اليوم الذى قررت فيه ركوب التاكسي ..وتلاحظ وانت فى الطريق ان السائق يسير بسرعه جنونيه ويدخل فى اضيق الحوارى ويسلك طرق غريبه يعرفها من واقع خبرته ..لا يهمه المطبات كل مايهمه هو انجاز مشوارك بسرعه حتى يستطيع اللحاق بزبون اخر فريسه له ..مع انه منذ قليل حالف باغلظ الايمان ان الحال واقف وان الدنيا نايمه ..هو بالقطع سائق انتهازى محتال يتلاعب بك من اجل مصلحته الشخصيه ..اما التاكسي الذى يركبه فكان عشوائيا على كل حال ومع الوقت ظهر تاكسي العاصمه الاصفر الذى يشبه تاكسيات اوروبا ..لكنه لم يكن يشبه شوارع مصر ..هلل الجميع له باعتباره نقله حضاريه ..لكنهم نسوا ان ينقلوا معه المواطن نقله حضاريه تتناسب مع التاكسي الاصفر ..كان هذا التاكسي متماشيا مع المرحله ..ومع وزارات رجال الاعمال المتعاقبه ومع اللون الاصفر ..بعد اكتشاف حقيقه هذا التاكسي بعداده الاصفر مثل ابتسامته ابتعد عنه المصريون بذكائهم المعهود واستمروا فى ركوب الابيض والاسود بعد ظهور التاكسي الاصفر وانزواؤه على طبقات معينه ..بدات علامات التمرد على التاكسي الابيض واسود فظهر ت عمليه الاحلال والتجديد وشاهد الجميع التاكسي الابيض يتهادى فى الشوارع ..ولان المصري عدو مايجهله ..واللى اتلسع من الاصفر يتفخ فى الابيض ..رفضه المصريون فى البدايه ..الا ان مجموعه من الناس ضحت بالركوب مرة من اجل اخبار الاخرين بنتائج التجربه ..واتضح انه وسيله نظيفه وحديثه وحضاريه وعدادها عادل للجميع ...اطمان الجميع الى التاكسي الابيض واعطوه الامان ..واصبح الابيض واسود فى خبر كان واشتكى سائقوه من انتهازيه سائقى الابيض ...لكن مع الوقت اتضحت بعض الحقائق ..سائق التاكسي الابيض يضغط على زر العداد بمجرد ركوبك وهذا شيئ حميد ..لكن الغير حميد هو انك تجد ان التاكسي يسير بسرعه 150 نمله فى الدقيقه ..بمجرد وجود ظلطه فى الشارع او قطه عابرة تجد ان السائق يهدئ من سرعته لكى يتفاداها ..كثيرا ما يكون الشارع خاليا والسائق مصمم ان يسير وراء سيارة بطيئه او معطله وقد ينزل من التاكسي ليتشاجر مع سائقها ..وتجده يشكو من انعدام الاخلاق ومن الفوضي وقد يرجع بك الى ايام زمن الفن الجميل ...اما المشكله الرئيسيه انك تجد سائق التاكسي يختار ابعد الطرق وانظفها حتى لو كان طريق راس الرجاء الصالح .فتسأله سؤالا غير منطقي : على فين ياسطي ؟؟.فى النهايه تصل الى مشوارك لتنظر فى العداد لتحد ان مشوارك قد تكلف اكثر مما يكلفك التاكسي الابيض واسود ..فتشعر انه لا فرق بين الاثنين سوي ان هذا بعداد والاخر بدون ...ميزة الابيض انه فى ظاهره وسيله حضاريه ..لكن مشكلته فى سائقه الذى يتمتع بغباء شديد فهو يريد ان يحوله الى تاكسي ابيض واسود ..مع ان كل الامكانيات متاحه امامه ليكون الافضل ..بغباؤه اضاع الفرصه ليجعل الجميع يلجأون الى التوك توك

ميجووووووووووووووو

لعبه المنديل وسميرة ابراهيم واشياء اخرى

2011-11-18T15:25:00.001+02:00

في لعبة المنديل يقف الفريقين قدام بعض وواحد واقف ماسك المنديل في النص بنهم بالظبط. وينادي على رقم يجوا اتنين وليهم هدف واحد المنديل ... كل واحد يحط ايد جنب المنديل وايد ورا ضهر صاحبه ... كل الواحد حاطط في دماغه خطه للفوز ... واحد هدفه يشد المنديل ويجري وواحد تاني قرر انه يسيبه من المنديل ويركز في انه يلمس اللي خطف المنديل علشان النقطة تتحسبله

ساعات كتير الوقفه تتطول واللعبه تبوخ وفي الحاله ديه بيبقى قدام اللي ماسك المنديل او "السلطة" حل من اتنين:

يقول سلالالالالاطة: وساعتها الكل بينزل ويتكرر نفس الموقف اللي فات بس على كتير وساعتها واحد بس عادتاً بيبقى واقف بعيد في الاخر مستخبي في الزحمة بياخد المنديل ويجري

ياما يرفع المنديل ويلغي الدور

فتحوا السجون او المساجين هربوا وبقى عندنا 500 الف بلطجي وفي تقديرات تانيه متفائله 150 الف بس ..قلنا الحقونا ..قالوا المحاكمات تبقى عسكريه علشان نضمن سرعه الحكم وتنفيذ القانون وردع الخارجين عن القانون ...قلنا هيه

حبسوا علاء عبد الفتاح وسابولنا البلطجيه .... احيه

الدنيا "هااااجت" علشان عليا قلعت هدومها "بمزاجها" واتصورت وحطت صورتها على مدونتها .... فدخل المجاهدون "الهائجون" ومدعي الفضيله ليشاهدوا صورة العاهرة ... وعلقوا قائلين " .... الصورة محركتيش فيهم حاجة .... وصبوا عليها لعنات الله والبشر " وخرجوا يستغفرون ويشعرون بالفخر لانهم ادوا واجبهم المقدس ورفعوا رايات الجهاد دون ان يتحرك فيهم حاجة

وصل عدد المعجبين بالمدونة على الفيس بوك الى 10668 وعدد المعلقين على الفيس بوك الى 3143 وعدد التعليقات على المدونة نفسها على بلوجر 440 تعليق وتقدم أعضاء الائتلاف العام لخريجى الحقوق والشريعة بلاغ للنائب العام لـ"تطبيق الحد" على علياء المهدى وكريم عامر. بينما سميرة ابراهيم التي انتهكت "قصراً وظلماً وتخلفاً" واخريات على يد العسكر يوم 9 مارس

وعن انتهاكات كشف العذرية، أوضحت سميرة أن إحدى السيدات التابعة للجيش طلبت منها خلع ملابسها، وكانت الغرفة التي تقف بها المتظاهرات مشرعة الأبواب والشبابيك، ولما رفضن أدخلت عليهن جنودا، واعتدى أحدهم عليها بالضرب. وقالت: «اضطريت أخلع وبعدين اللي على الشباك واقفين عملين يضحكوا ويتغمزوا علينا، وكانوا عساكر على ضباط. أنا يوميها أتمنيت الموت...... وبعدين لقيتها بتقولي اخلعي عشان البيه هيكشف عليكي، وبعدين خلعت البنطلون. وبعدما كشف قالي تعالي امضي انك بنت"

ولفتت سميرة الى أنها تقدمت ببلاغ للنائب العام منذ ذلك الحين، ولكن لم يتم التحقيق فيه، الأمر الذي دعا عدة منظمات حقوقية لإقامة دعويين نيابة عن سميرة أمام القضاء الإداري، للطعن في عدم اتخاذ الجيش للإجراءات اللازمة حيال القضية. وسوف تنظر في 29 نوفمبر.

سميرة لم يقف بجوارها المجاهدون "الهائجون" ولا الائتلاف العام لخريجى الحقوق والشريعة ووصل عدد المعجبين لصفحتها على الفيس بوك 339 ... الظاهر ان الناس ديه ماينفعش معاها غير اللي عملته عليا .... ههاهاهاه احلى من الشرف مفيش

إلى اخوتي في الدين والوطن اعضاء اتحاد ماسبيرو "انت حمار يا حمار" .... لا والنعمة بسأل بجد ...كل اما تعملوا مسيرة من اول كنيسه صول لغايه اربعين شهداء ماسبيرو يتم الاعتداء عليكو .... طب ايه بقه

قبل ما حد منكم يتخن في صوتة وعروقه تنفر وهو بتكلم عايزاه بس يتخيل انه واقف في البلكونة وخير اللهم اجعله خير لاقي الف واحد بلاش 200 واحد رافعين علم اسود عليه شعارات دينيه اسلامية او علم السعودية وماشين في الشارع وبيقولوا "اسلامية ... اسلامية" او اي شعار ديني تاني وقول بمنتهى الامانه هتحس بايه وبعدها تعالى اتكلم عن الحق والمستحق والاضطهاد والظلم و... وكل الحاجات

زي مانت مش عايز تعيش في افغانستان ...هما كمان مش عايزين يعيشوا في الفاتيكان

مفكرتوش ليه المرة الوحيدة اللي المسيحيين اتلموا فيها بعشرات الالاف لاكتر من 12 ساعه يوم 11 \ 11 يوم الصلاة متمش فيها الاعتداء عليهم ليه؟

افتحوا هوشع اصحاح 4 ايه 12 مكتوب "شعبي يسأل خشبه وعصاه تخبره" ..... يا رب نكون فهمنا

MishMish

البحث عن فضيحه

2011-10-24T11:50:00.001+02:00

هو شاب مفتول العضلات يدعى نيازى ...فى ايام الجامعه كان عضوا فى فريق الجودو فهو ماهر فى تلك اللعبه وفى العاب فنون القتال .كان مؤمنا بمبدأ القوة اولا ...كان نيازى متهورا ولا يجيد التعامل مع باقى الزملاء ولا يجيد ضبط النفس ولا يرى امامه لمسافه اتنين متر فى حاله غضبه ..فكان مثل الديناصور الضخم الى يتخبط فى متخف للخزف ..ويذكر انه فى احدى المرات تشاجر مع احد المعيدين حينما نادى عليه اثناء المحاضرة ليسأله شفويا فضحك بعض الطلاب حينما سمعوا اسم نيازى ..فثار وترك المحاضرة وهو ينظر نظرة تهديد لذلك المعيد.ولزملائه ...وفى مرة اخرى ضرب زميله وجاره فوزى المنتمى الى احد التيارات الدينيه بالجامعه علقه ساخنه لانه دعاه مرة الى الصلاة مرت الايام وتخرج نيازى من الجامعه ليلتحق بالتجنيد الاجبارى فكان فخورا باللون الكاكى ويسير متباهيا به ..كان نيازى يحب الهام تلك الفتاه الجميله التى تسكن فى العمارة المجاورة والتى كان الشارع كله ييسمع صرخاتها حينما كان يضربها ابوها بالحزام الجلدى ليربيها كما كان يقول ..حاول ان يلفت نظرها بشتى الطرق حتى انه لمح لها انه يريد طلب يدها ..لكنها لم تبدى اى رد فعل سواء بالايجاب او بالسلب ..فهى كانت متخوفه من نيازى بسبب صورة ابوها المختزنه فى عقلها الباطن كما انه فى نفس الوقت كان هناك فوزى الملتزم المتدين الذى لم تعطيه ايضا رد بالسلب او الايجاب فالاثنان لم يكونا فتى احلامها ..وهنا كانت بدايه الصراع ..فكر نيازى فى حيله يلفت بها نظر الهام ..فلم يجد سوي التباهى ببدلته العسكريه واستعراض قوته ..فافتعل مشاجرة كبيرة مع احد الاشخاص ليضربه علقه ساخنه لكى يحرك مشاعرها ..ونظر بطرف عينيه الى شباك الهام ..ليجدها واقفه تصرخ ..اخويااااا محسن ..اخويا محسن ..فكان ذلك الشخص المضروب هو اخوها ..صعق نيازى مما سمعه ..وحاول ان يصلح الاوضاع فعالج محسن باحدى الصيدليات ..واعتذر له على مرأى ومسمع من الشارع كله ..وتعلل بانه اعصابه تعبانه شويه اليومين دول ...انتهى الموضوع ومازالت صورة الهام فى مخيله نيازى وقرر ان يتخلى عن طريقته العنيفه ..ففكر فى حيله جديده ..فذهب الى عم نخله الترزى ليفصل له بدله كحلى فاخرة ..ارتداها وسار بها امام شباك الهام وفى وسط الشارع ليستعرض اناقته ..لكن الهام كانت نظرتها له انه مفتعل جدا وليس على طبيعته ..فشعر هو بان حيله البدله لم تنجح ...قرر مرة اخرى ان يلفت نظرها خاصه ان فوزى قرر النزول بعنف الى حلبه المنافسه ..فقرر نيازى ان يبعث لها رساله على الميل الخاص بها .هذه الرساله مركبه بالفوتوشوب وفيها يظهر نيازى وهو ممسكا ياسير اسرائيلى بجوار دبابه اسرائيليه محترقه ...ظن نيازى ان مشاعر الهام ستلتهب لكنها ردت عليه بايميل اخر ..هو فيه حرب اليومين يانيازى ؟؟..ابقى شوفلك واحد محترف فوتوشوب يركبلك الصور اتت نيازى فكرة جديده ..وهو ابعاد غريمه فوزى حتى يصبح هو المنافس الوحيد..فاتقرب اكثر واكثر من فوزى واقنعه انه تخلى عن عنفه وانه تاب الى الله وسينتظم فى الصلاه وصارحه بحب الهام وانه ان لم يتزوجها فسوف يعود الى حالته الاولى ولن ينتظم فى الصلاة مرة اخرى ..سالت الدموع من عين فوزى وقرر بنبل الفرسان ان يتنازل عن الهام فى مقابل توبه نيازى ..تلك كانت الصفقه الغير معلنه ..لم يكن فوزى يعرف ان نيازى سيفتك به بعد ان يظفر بالهام ..لكن الهام اكتشفت تلك الصفقه بحدسها وبفراستها ..وقررت الابتعاد عن فوزى ونيازى ..فصورة ابوها مازالت مختزنه بعقلها الباطن الان يفكر نيازى فى حيله جديده ليتقرب بها من الهام ..وطريقه ينتقم من فوزى ..الحل الاخير كان استدراجها واغتصابها بالقوة حتى تصبح ذليله وساعتها ستقبل قدميه ليقبل بها زوجه ..اما فوزى فسيكون مصيره معروف ..ياترى هل سينفذ نيازى تلك الخطه فى الايام القادمه ؟؟مسكين نيازى ..لم يعرف ان هناك طريقه سهله جدا ..هو ان يحب الهام بجد

ميجووووووووو

بقرة حاحا مش هاتقلع الحجاب ... على الاقل دلوقتي

2011-10-17T15:26:00.001+02:00

لسبب واحد بسيط؟ وهو انها وبعد كل النهب ده فيها النفس وهما ناويين على خرابها

وعلشان تفضل البقرة تحت ايديهم لازم يلهوا صحابها وبحسبه بسيطة الموضوع مش محتاج غير تضيع 24 ساعه من اليوم كل يوم

ومايقدر على تضيع الوقت غير اتنين السحرة وبتوع التعتيم

السحرة شغلانتهم يقعنوا اصحاب البقرة ان في اسياد طول الوقت غضبانين وزعلانين ومش راضين وعسسهم مالين الدنيا قاعدين للسقطة واللقطة ومحدش معزور ... وكله هيجي عليه الدور

وسبب فقرهم غضب الاسياد ... ويفضلوا العباد يلفوا على الاوليا ويخرجوا من حضره يدخلوا زار يمكن ترضا الاسياد. واهم حاجة يفضل الحجاب لافف عالراس

والبقرة تنادي وتقول يا ولادي ... حاحا ... ولاد الشوم ... حاحا ... رايحين في النوم

وبتوع التعتيم وظيفتهم يضيعوا اللي فضل من الـ 24 ساعه بتاعه اليوم ... وكل يوم

كل يوم نفس الكلام ونفس الضيوف ونفس الشتايم ونفس الفتاوي ونفس المشاكل ونفس الضحايا ونفس الجناه ونفس النهايه لا هي نار ولا هي رماد وهلما جرجر. واهم حاجة يفضل الحجاب لافف عالعين

والبقرة انقهرت ... حاحا ... ف القهر انصهرت ... حاحا ...وقعت ف البير ... حاحا ... سألوا النواطير ... حاحا ... طب وقعت ليه ... حاحا ... وقعت م الخوف ... حاحا ... و الخوف ييجي ليه ... حاحا ... من عدم الشوف

بعد مرور 9 شهور من ثورة لم يحدث بعدها شيء

MishMish

المزمور 35

2011-10-10T10:54:00.002+02:00

من مزامير تراتيل معلمنا داود النبي والملك بركاته على جميعنا امين

خاصم يا رب مخاصمي.قاتل مقاتلي. امسك مجنا وترسا وانهض الى معونتي واشرع رمحا وصد تلقاء مطاردي. قل لنفسي خلاصك انا‏. ليخز وليخجل الذين يطلبون نفسي. ليرتد الى الوراء ويخجل المتفكرون باساءتي. ليكونوا مثل العصافة قدام الريح وملاك الرب داحرهم. ليكن طريقهم ظلاما وزلقا وملاك الرب طاردهم. لانهم بلا سبب اخفوا لي هوة شبكتهم.بلا سبب حفروا لنفسي. لتاته التهلكة وهو لا يعلم ولتنشب به الشبكة التي اخفاها وفي التهلكة نفسها ليقع. اما نفسي فتفرح بالرب وتبتهج بخلاصه. جميع عظامي تقول يا رب من مثلك المنقذ المسكين ممن هو اقوى منه والفقير والبائس من سالبه شهود زور يقومون وعما لم اعلم يسالونني. يجازونني عن الخير شرا ثكلا لنفسي. اما انا ففي مرضهم كان لباسي مسحا.اذللت بالصوم نفسي.وصلاتي الى حضني ترجع. كانه قريب كانه اخي كنت اتمشى.كمن ينوح على امه انحنيت حزينا. ولكنهم في ظلعي فرحوا واجتمعوا.اجتمعوا علي شاتمين ولم اعلم.مزقوا ولم يكفوا. بين الفجار المجان لاجل كعكة حرقوا علي اسنانهم يا رب الى متى تنظر.استرد نفسي من تهلكاتهم وحيدتي من الاشبال. احمدك في الجماعة الكثيرة في شعب عظيم اسبحك. لا يشمت بي الذين هم اعدائي باطلا ولا يتغامز بالعين الذين يبغضونني بلا سبب. لانهم لا يتكلمون بالسلام وعلى الهادئين في الارض يفتكرون بكلام مكر. فغروا علي افواههم.قالوا هه هه قد رات اعيننا. قد رايت يا رب.لا تسكت يا سيد لا تبتعد عني. استيقظ وانتبه الى حكمي يا الهي وسيدي الى دعواي. اقض لي حسب عدلك يا رب الهي فلا يشمتوا بي. لا يقولوا في قلوبهم هه شهوتنا.لا يقولوا قد ابتلعناه. ليخز وليخجل معا الفرحون بمصيبتي.ليلبس الخزي والخجل المتعظمون علي ليهتف ويفرح المبتغون حقي وليقولوا دائما ليتعظم الرب المسرور بسلامة عبده. ولساني يلهج بعدلك.اليوم كله بحمدك

إلى كل من شارك بالتحريض وبالسكوت عن شهادة الحق في احداث ماسبيرو

MishMish

فانتوم اوف ذا ثورة

2011-10-01T23:43:00.001+02:00

بصوا يا جدعان احنا من الواضح اننا بنخبط دماغنا في الحيط والثورة دخلت في حارة سد.

السياسه لا مؤاخذه عايزة ناس قذرة تفهم في اللعب القذر.... محاكمة المقلوع واعوانه وسجنهم وتحقيق العدالة ... ده ممكن يحصل في فيلم عربي قديم .... ليه بقه؟

لان المقلوع والاربعين حرامي اللي معاه في طرة مش هما دول كل الحرامية .... لان بالعقل كدة علشان واحد زي المقلوع يقعد 30 سنه يجرف في خير البلد ويبعها بالجمله وبالقطاعي للي يسوى واللي مايسواش مكنش هايتم الا لو كان كل اللي حواليه فاسدين بشكل او بأخر

والفساد مش في طبقه واحدة ولا اتنين لالالالالالالالالالا ده متوغل ومتجدد زي سنان سمكة القرش اللي بتاكل تقريباً كل حاجة ولانها ما بترحمش بيقولك سمكة القرش بيطلعها حوالي 20,000 سنه طول فترة حياتها ... النسيج المسئول عن السنان عندها عامل زي السلالم الكهرباء ...لو سنه اتكسرت تطلع واحد تانيه مكانها - الكلام ده حقيقه علمية على فكرة

وبعدين على راي الليمبي "واحد مصاحب على علوكة واشرف كخه هايطلع ايه يعني؟ .... طيار!!!!!!!!!" وبنفس المبدأ ناس كانت بتشتغل وعايشين ملوك ايام المقلوع وبينفذوا اوامره وبتقولوا عليه الزعيم والقائد هايبقوا ايه يعني؟

وبعدين على علوكة واشرف كخه مش هايسمحوا ان المقلوع يتحاكم الا على جثتهم ليه بقه؟

لان كل الفساد مرتبط ببعضه .... والناس ديه ممكن تولع في البلد بحالها بطرق يمكن مكنتش تيجي على دماغ المقلوع نفسه ... ولعلمكم مش هايبقى عندهم اي نوع من انواع الشفقه او الرحمه لان الناس ديه بتمشي بمبدأ "إذا جاك الطوفان حط ابنك تحت رجليك واجري" ولا هتلاقي واحد منهم بيجري من البوليس ويخش يستخبى في الجامع وهو معاه سكينه ويقعد البوليس والعساكر ساعه الا ربع بره محتارين في قلع البيادات بتاعتهم والمجرم جوه بيحاول يهرب من مدخل تاني للجامع لغايه لما يسمع صوت الاذان فتجيله رعشه ويبص لنفسه ويبص للمكان اللي هو فيه وينزل السكينه ويطلع يسلم نفسه للظابط بعد ما يكون الظابط قلع الفردتين فيستناه لما يلبسهم تاني علشان يتسجن او يتعدم

اللي بيحصل ان الواحد منهم ان الواحد لو دخل الجامع ماسك سكينه البوليس هيخش وراه بالجزم وساعتها هايكون هو دبح المؤذن وسرق صندوق التبرعات وهرب

الحل ايه بقه؟

الحل سهل وبسيط وسياسي وقذر ..... الحل "عفى الله عن ما سلف"

يعني نساوم المقلوع وبقيه الاربعين الحرامي اللي منهم في طرة واللي لم يصبه الدور يا تشتري نفسك برد الفلوس يا تتعدم. واظن مفيش حد فينا عنده شك في مسئوليه المقلوع وبقيه الاربعين حرامي عن الخراب اللي احنا فيه ده ... ولو حصل - ولو انه مستبعد جداً - وحد منهم مات برئ يبقى جزاؤه عند ربنا وبعدين هو مش اول واحد في الافات ماتوا في الدويقه والعبارات وحوادث الطريق وقوارب الهجرة وغيرهم كتير ودول جزائهم في الجنه ان شالله

انما اي حل تاني غير ده فهو تضيع للوقت والجهد لان الوضع اللي احنا فيها ده Fishy او زفر على راي الاجانب .... احنا مشكلتنا اننا حاسين اننا بنحارب اسياد مش بني ادمين. والاسياد ما ينفعش نعيش معاهم في امان ...دول لازم يتطردوا علشان نعرف نقعد فيها

MishMish

عنتر ولبلب - القلم الاول

2011-09-20T09:07:00.003+02:00

لبلب هو شاب مصري ابن بلد كما يطلق عليه ...يكافح ويسابق الزمن لكى يتزوج (لوزة) وهى

اسم على مسمي ....اتفق مع والدها رضوان الصرماتى على تسديد جنيه كل اسبوع ..كقسط من مهر (لوزة)

محبوبته ..كان يدفع القسط من ايراد محله (الحريه)..لكن فجأة ظهر فى الحارة (عنتر)

..الذى افتتح كازينو منافس ل (لبلب) ..بدأ عنتر يفرض سطوته على الحارة معجبا بقوته

البدنيه التى لا ينافسه احد فيها ..كان عنتريفعل اى شيئ فى سبيل جذب الزبائن الى

محله ..لكن لبلب بذكاؤه الفطرى قرر النزول باسعار بضاعته ليعيد الزبائن الى محله

(الحريه) مرة اخرى ..كان رضوان ابو لوزة يساند عنتر بطريقه مضادة للبلب ..هو

انتهازى جشع .. .يريد احتكار لوزة لتحقق مصالحه الشخصيه .بينما كان هناك من شخصيات الحارة من

يحب لبلب ويتمنى له ان يتزوج (لوزة).وكان هناك ايضا كثيرون صامتين لا يهمهم مايحدث فى الحارة ..احتدم الصراع بين

عنتر ولبلب ..حتى انتهى بتدمير محله (الحريه)..وهنا قرر ابو لوزة (رضوان) ان يعطى

لبلب مادفعه من مهر ويفك الارتباط بينه وبين لوزة ..حزن لبلب كثيرا ووجد نفسه

ضائعا وشريدا فمحله دمر ومحبوبته ضاعت منه لتذهب الى عنتر ..ليفكر فى ترك الحارة

والذهاب بعيدا عنها ..لكن اصدقاؤه ومحبيه اقنعوه ان يبقى ليتحدى عنتر ولا يترك

(لوزة) وحدها ..تناجيه لوزة من شرفتها ..فيستجيب قلبه ويقرر البقاء لمواجهه عنتر

يهدده عنتر بان يترك الحارة فى غضون اسبوع والا كسر عظامه ..لكن لبلب قرر انه

سيصفعه على وجهه كل يوم ..يقبل عنتر الرهان معتمدا على قوته وعلى اعوانه مثل

(رضوان الصرماتى)..وهنا كان التحدى الاكبرللبلب : مش هامشي ..هو اللى يمشي ..لكن

كيف يمشي ؟؟ تلك هى المشكله ...بدأ لبلب فى التفكير فى الورطه التى وضع نفسه فيها

فان خسر التحدى فسيخسر محل الحريه ..ومحبوبته لوزة التى ستذهب لوزة مقشرة الى فم

عنتر بمساعده الانتهازى رضوان ..كمان ان عنتر سيسحق عظامه كما وعده ..فكر لبلب فى

حيله ..فقد تنكر لبلب فى هيئه قزم وخبأ فى حذاؤه ساعه عنتر ..ليفاجأ عنتر بصفعه تنهال على وجهه امام الناس جميعا

..يهرب لبلب ..بعد ان ضربه (القلم الاول)..وهو فى منتهى السعادة

لكنه مازال قلقا ..(فالقلم) الاول لم يسقط

عنتر ويجعله يرحل عن المنطقه ..فهو لا قيمه له بدون باقى (الاقلام)..حتى لو وصل

الى (القلم) السادس فطالما لم يضربه السابع فهو مهزوم ..وسيطحن عنتر عظامه ..على

لبلب ان يعرف ذلك جيدا

لبلب لم يضربه سوي (القلم) الاول ..والا ستذهب( لوزة) ..ويضيع محله (الحريه)..ويطحنه

..عنتر بعد ان تركه لبلب يستعيد قوته

القلم الاول لا يعنى شيئ ...طالما ظل غارقا لبلب فى نشوة القلم الاول
ميجوووووووووووو

المواطن جلعاد ياكوف

2011-09-15T15:49:00.001+02:00

استيقظت مبكرا كالمعتاد لاذهب الى عملى كمدرس فى مدرسه العلوم الحديثه باحدى ضواحى تل ابيب ..وكعادتى لا افعل اى شيئ قبل ان اتناول قهوة الصباح ..بحثت عن علبه القهوة فلم اجدها ..بحثت مرارا وتكرارا ..فأنا من مدمنى القهوة .فلا استطيع ان ابدأ اى عمل الا بعدان اشرب فنجان الصباح فانا بدون هذا الفنجان اشعر بان الصورة امامى مهتزةوغير واضحه المعالم ... فتحت الراديو لاستمع الى اخر الاخبار ..: كان المذيع يتحدث العبريه الفصيحه ..لغتنا الجميله ..كان المذيع يلقى بعض الاخبار الخفيفه : اهلا باعزائى مستمعى اذاعه تل ابيب .نشرة اخبار الصباح ..صرح السيد دافيد عاميت وزير التربيه والتعليم انه لا نيه مطلقا لتاجيل الدراسه وانها ستبدأ فى موعدها .وانه اصدر قرارا وزاريا بان تضع كل مدرسه لافته على الباب :(مدرستى نظيفه وجميله ومتطورة )..كما صرح السيد اللواء عاميخاى ادون رئيس هيئه نظافه وتجميل تل ابيب ..بانه ستتم ازاله اكوام القمامه المتراكمه بعد تسويه مستحقات شركه النظافه الاسبانيه وان المشكله فى طريقها للحل .وفى محافظه يافا يكرم اليوم البطل الشعبي نيحاماد شيحات الذى انزل العلم المصري من على سفارة مصر فى اسرائيل وسيمنحه المحافظ شقه ووظيفه تكريما له .كما اصدر السيد عامير اساف وزير التموين قرارا بفصل توزيع الخبز عن المخابز تيسيرا على المواطنين ومنعا لظاهرة طوابير العيش ..وفى سياق اخر ..يصل الى القاهرة اليوم السيد زويل بنيامين حنانيا الحاصل على جائزة نوبل فى العلوم لتستشيره وزارة التربيه والتعليم فى كيفيه وضع صورته فى كتاب القراءة الخاص بالصف الخامس الابتدائى ..ومن الاخبار المحليه ..يفتتح اليوم السيد اللواء اورون ايلياهو مشروع التامين الصحى بقريه عوزيت البلد بعد انهياره للمرة الخامسه بسبب الصرف الصحى .كما يعلن السيد عاموس عيتيد عن توفير 350 الف فرصه عمل كحراس امن وعمال نظافه لشباب تل ابيب وايضا توفير 200 الف وظيفه للبنات كخادمات فى دول الخليج ....كما صرح بانه سيتم اليوم صرف الدفعه 125 من مستحقات ضحايا عبارة بيت يام التى دمرها عزت العلايلى ونبيل الحلفاوى فى الطريق الى ايلات ...ومن اخبار الرياضه :يواجه اليوم فريق نادى اهالى تل ابيب حامل لقب الدورى للمرة السابعه عشرعلى التوالى نادى المقاولون اليهود فى اطار الجوله ال145 لدورى كرة القدم ..بينما يواجه فريق زيماليك نادى الاتحاد الحيفى فى الجوله نفسها ..الى هنا انتهت اعزائى المستمعين نشرة اخبار الصباح ...يعلو صوت الراديو باغنيه جميله : ياحبيبتى يا اسرائيل للمطربه الكبيرة شادين يليها اغنيه :حلوة بلادى الساميه للمطربه وردات ..وبعد ان استمتعت بهذه الاغانى الوطنيه الرائعه ..جاء وقت برنامجى المفضل : ابله يوئيلا والذى استمع اليه يوميا منذ الطفوله والذى ربانى على القيم والاخلاق الساميه ..لم اكن سعيدا تماما بما يحدث فى بلادى ..اسرائيل... فهناك بعض السلبيات التى تؤرقنى ..فجماعه الاخوان اليهود صاحبه شعار (اليهوديه هى الحل ) تحاول السيطرة على الحكم ..وجماعه الحاخامات الاصوليين يسيطرون على تفكير الناس ويوجهونهم كما يريدون .الى جانب بعض منتفعى النظام صاحبه شعار : احنا اسفين يانتنياهو ..اشعر ان نهايه وطنى اقتربت واصبحنا ملطشه الامم العربيه .بددت همومى بانى تذكرت انى ساقضي اليوم سهرة ممتعه امام التليفزيون الاسرائيلى مع اسرتى لنتناول الفيشار واللب .. فامامى خياران كلاهما افضل من الثانى..الاول فيلم : شالوم ياصاحبى ..والثانى : فيلم : دمى ودموعى ومستوطناتى ... استيقظت زوجتى الجميله هوديس احرونوت .التى تعمل كموظفه فى السحل المدنى وتذهب متأخرة دائما الى عملها فزملائها المخلصين يوقعون بدلا منها فى دفتر الحضور ..اتجهت هوديس ناحيه المطبخ وجدتنى تائها وابحث عن شيئ ما ..سالتنى زوجتى الجميله هوديس : عما تبحث حبيبى ؟..قلت..اين علبه القهوة ياحبيبتى هوديس ..ردها كان حالما ورومانسيا ....
ما قلتلك ميت مرة يامنيل جنب برطمان الشاي ..هو احنا كل يوم فى الموال ده ..تقوم الصبح مش شايف قصادك وتسألنى فين برطمان البن ..بطل بقى تسهر لحد الصبح عالقهوة وتتسرمح مع صحابك ..عيشه بقت تقرف..كان يوم اسود يوم ماتجوزتك وبعدين مين هوديس دى بقى.. يا احمد يابن انيسه ؟

اوشه بيلعب سينجل

2011-08-26T20:03:00.002+02:00

كام اوشه قابلته فى حياتك منذ ان كنت اوشه صغير؟؟..افتكر كده كام واحد كان بيحب يلعب سينجل ومخلى الباقى نيكست ..من يوم ماتولدت ..وانت نيكست ابوك وامك واخواتك الكبار كلهم اوشه باشكال مختلفه ..كله عاوز يبقى هو السنتر وهو نمرة واحد .هو المركز والبؤرة ..ابوك عاوزك تسمع كلامه تبقى نسخه منه وتورثه كما ورث ابوه ايضا ...وامك عاوزة تبقى ناصح زيها وتتعامل باسلوبها ..انت خيبان وهى اللى بتفهم ..اتجوز يا واد بنت خالتك ..مش هاتلاقى احسن منها ..هما بيلعبوا سينجل وانت نيكست ..مش مهم انت رايك ايه ولا اختيارك ايه ..اختياراتهم تأتى فى المقام الاول ..وانت اختياراتك نيكست ...فى المدرسه المناهج وضعها اوشه بنفسه بناء على تعليمات اوشه اخر ..مناهج تجعلك نيكست ..وما ان تناقش او تشغل عقلك تلاقيه بيبصلك ببصته الشهيرة ليسكتك ..ياتى المدرسين وكل منهم ينفذ سياسه اوشه بحذافيرها ....ليجعلك تظل نيكست طول عمرك ..فى العمل ترى اوشه يفقعك الذنبه من هنا ليجعلك نيكست ..كل شخص يريدك بعده ..انا ومن بعدى الطوفان هذه الثقافه تراها فى الشارع كل لحظه ..فى اشارة المرور تجد اوشه يمر بسيارته امامك ليغلق عليك الطريق او ركن صف تانى ..تفتح التليفزيون لترى رجال الدين كل منهم جالسا على كرسيه متقمصا شخصيه اوشه ..وكل اوشه منهم سينجل ويريد ان يرى الباقيين منهم نيكست ..هو الصواب والباقى خطا ..مع اتفاقهم جميعا على تصدير صورة الله لنا على انه قوة ديكتاتوريه مرعبه ترغب فى تعذيب البشر بقوانينه ..مع ان الله خلقنا لانه يحبنا ولانه اله رحوم ولانه هكذا ..فقد خلقنا احرارا وخلق لنا العقل لكى نختار ولكى لانصبح نيكست ..خلق الله ادم وخلق له حواء لكى تكون الحياة مشتركه للتعاون وكل فرد يحتاج الى الاخر ..هذه هى الحياة ..انا والاخر ..لا يجوز ان بنفرد شخص ويترك الاخر نيكست ..انظر الى الثورة سر نجاحها انها كانت عمل جماعى وكل الناس توحدت فى هدف واحد لا احد يلعب سينجل ...كانت منظومه جماعيه لذلك لم يستطع احد ان يقف فى طريقها ..اما بعد الثورة فقد بهتت الصورة وظلت تبهت اكثر واكثر لان اوشه ظهر على السطح ووقف على المنصه..وكل شخص يريد المكاسب لنفسه هو ..الاف الائتلافات والاف الاحزاب والشخصيات ..كل منهم يريد ان يصبح اوشه ..والباقيين نيكست ..وهكذا يظل اوشه يطاردك فى كل مكان ..ولن يختفى اوشه الا لو اصبح اللعب جماعى ..ولا تنتظروا ان يهبط الحظ فجأة علينا ونكسب فى دولسيكا ونتخلص من اوشه ..ابحث فى داخلك ..هل انت اوشه ام انت من الذين يحبون اللعب جماعيا
ميجوووووووووووووو

ارهاصات ... يا رب تطلع غلط

2011-08-23T16:09:00.004+02:00

الراجل البركه (William Engdahl - Egypt Expert) ده بيقول "لا توجد ثورة في مصر ولكنها احداث مصممه للتخلص من مبارك الذي كان شوكة في جانب سياسات اوباما الخاصه بالشرق الاوسط ووضع نفس الاشخاص - من لديهم الولاء لامريكيا - في القمة ولكن باوجهه مختلفه" ...وبقيه الفيديو مهم برضه للاطلاع ومش هترجم اكتر من كدة علشان انا عندي عيال عايزة اربيهم

مبدئياً البوست طويل علشان ده تجميع لكل الاحداث من يوم التنحي لغايه تاريخ كتابه البوست

لو ملكش في التفاصيل ركز في الملخص وابقى اتسلى بعد كدة على كيفك

بص يا سيدي / ستي احنا كان عندنا ثورة وتاهت

توهان الثورة تم على 5 مراحل

المرحلة الاولى "بدايه التقسيم" وديه مرحلة تحويل الايد الواحدة الى ايدين كتير

وديه ابتديت بالانقسام حول فض الاعتصام بعد التنحي او البقاء لضمان تنفيذ مطالب الثورة ثم الاستفتاء ثم هبوط القرضاوي على الميدان ومنع وائل غنيم من التحدث على المنصه

المرحلة التانيه "استخدام الورقه الرابحه دائماً" وتحويل شعار "الهلال مع الصليب قشطة ومربى وحليب" الى "يا ايها الكافرون" - من الناحيتين عموماً

عن طريق 5 احداث طائفيه كبرى - لم يقدم احد فيها للمحاكمة كالعادة - علاوة على الحديث عن غزوة الصناديق وعودة 3000 قيادي من الجماعات الاسلامية من اجمل بقاع الدنيا "افغانستان والشيشان والبوسنه والصومال وايران" وختمت بجمعه الوحدة الوطنيه اللي حولها صفوت حجازي فجأة الى جمعه ظهور جيش محمد والزحف لتحرير القدس

وطبعاً كانت الاحداث ديه سبب ان المسيحيين يروحوا لانهم مالهمش لازمة ولا ديه

المرحلة الثالثه "تفيت القوى السياسية"

وديه اللي دق اول مسمار في نعشها الاخوان والسلفيين وبعدين بقيه الاحزاب والقوى السياسيه وقعت لوحدها. فبعد ما كان شعار الاخوان "دولة مدنيه بمرجعيه اسلامية" بقى "اسلامية اسلامية رغم انف العلمانيه" وقامت حرب التصريحات والتوقيعات والمليونيات وانتهت بمليونه ما تمت "في حب مصر"

المرحلة الرابعه "تشويه الثورة"

وديه بدأت بحرب هوجاء من العوام ضد النخبه والمثقفين ثم التصريحات بتلقي حركة 6 ابريل تمويل امريكي وتدريب في صربيا (واي حد يعرف مدى حساسيه عوام المسلمين ناحيه البلدين ودول على فكرة مش قليلين) الى محاكمة كل من ينتقد المجلس العسكري

المرحلة الخامسة "تحجيم الثورة"

وديه ابتدت بتجريم الاعتصامات و فض الاعتصام بالقوة الغير مباشرة مرة عن طريق ادعاء وجود بلطجيه وفلول الحزب الوطن ثم فض الاعتصام بالقوة وبعدين طلعت مليونيه "قندهار" بتاعه 29 يوليو حرمت الميدان على بقيه الشعب وكرهتهم فيه ومن ساعتها والميدان ثكنه عسكريه محدش عارف يجي ناحيته.

وطبعاً ما نسيوش اخوانا اعضاء حزب الكنبه العظيم وادوها تصريحات بقه عن توقف عجله الانتاج وانخفاض الاستثمارات وحالة مبارك الصحيه وقطع المعونة وانتشار التنظيمات المسلحه واعلان سينا امارة اسلامية

ثم التصعيد ضد اسرائيل وبعد ما كانت الدعوة الى مليونيه 9 سبتمبر بقى الخطاب الرسمي في الاعلام الرسمي واللي مش رسمي هي : دلوقتي مش وقت مليونيات او اعتصامات دلوقتي وقت وحدة الصف لازم كلنا نقف ورا الجيش لمواجهه اسرائيل

وتوته توته انا مش عايزة اكمل الحدوتة

خلينا نركز شوية في اللي حصل من يوم التنحي ١١ فبراير

١- بدايه التقسيم

١٤ فبراير " انقسم متظاهرو ميدان التحرير بين قرار البقاء فى الاعتصام والعودة إلى منازلهم، وفى الوقت الذى قال فيه مؤيدو البقاء إن جزءا من مطالبهم فقط هو الذى تحقق، بينما تتبقى مطالب إلغاء قانون الطوارئ والإفراج عن جميع المعتقلين، قرر عدد من المتظاهرين تفكيك خيامهم، داعين زملاءهم إلى الاكتفاء بما تحقق من نصر بتنحى الرئيس مبارك" وفي نفس العدد من الجريدة "مصادر: مبارك يخضع للعلاج فى شرم الشيخ بعد دخوله فى غيبوبة تامة" - المصري اليوم
١٦ فبراير "«لجنة جديدة» لتعديل الدستور برئاسة «البشرى» وعضوية فقهاء قانون وإخوانى وقبطى.. وتسليم التعديلات خلال ١٠ أيام" البشري المعروف بتوجهه الاسلامي والاخ صبحي صالح (الفلوطة) - "توقف السياحة فى الأقصر وأسوان.. و«المالية» و«القوى العاملة» تتحملان رواتب عمال الفنادق" - " مصادر: «مبارك» يعتزم مواصلة تسجيل مذكراته صوتياً.. ويصر على «الموت فى مصر»" - المصري اليوم
١٧ فبراير "مسؤول سعودى: مبارك مستسلم ويريد الموت فى شرم الشيخ.. والرياض عرضت استضافته لكنه رفض" انتوا عارفين اخوانا بتوع الجاز فتحينها سبيل لكل المقلوعين - "٣١ منظمة حقوقية: تشكيل لجنة إعداد الدستور لم يعكس التنوع السياسى والمجتمعى وتفتقر للفقهاء المستقلين" - المصري اليوم
١٩ فبراير "القرضاوى يخطب الجمعة فى «التحرير» ويدعو لتسميته «ميدان الشهداء».. ويؤكد: إرادة الشباب من إرادة الله" - "حرس «القرضاوى» يمنع وائل غنيم من الصعود للمنصة" الكلام ده كان في جمعه النصر اول مليونيه بعد التنحي واللي حصل ده خلى الناس تقلق لانه كان شبه الي حصل في ايران - المصري اليوم

2- استخدام الورقة الرابحه دائماً

6 مارس "العنف الطائفى يعود بعد فترة هدوء أيام «ثورة ٢٥ يناير»: مقتل شخصين وإشعال حريق فى كنيسة بـ«أطفيح» بسبب علاقة بين مسلمة ومسيحى" - المصري اليوم
10 مارس "ليلة دامية فى منشأة ناصر: اشتباكات مسلحة بين الأقباط والمسلمين تسقط ١٣ قتيلاً و١٤٠ مصاباً واحتراق ٢٠ منزلاً وعدد من السيارات" - المصري اليوم
22 مارس "محمد حسين يعقوب: انتصرنا فى «غزوة الصناديق» والبلد بلدنا واللى مش عاجبه يروح أمريكا" - المصري اليوم
1 ابريل "٣٠٠٠ قيادى بالجماعات الإسلامية يعودون من أفغانستان والشيشان والبوسنة والصومال وإيران" - المصري اليوم
3 ابريل "«الجماعة الإسلامية» تطالب بإنشاء شرطة لـ«تغيير المنكر والأمر بالمعروف» - المصري اليوم
18 ابريل "اعتصام قنا يدخل مرحلة العصيان المدنى للمطالبة برحيل المحافظ.. واستمرار توقف حركة القطارات" - المصري اليوم
9 مايو "التطرف يحرق «الثورة» الطائفية تقتل ١٢ وتصيب ٢٣٢ فى «إمبابة».. ومجلس الوزراء: «سنضرب بيد من حديد»" - المصري اليوم
14 مايو "مليونية «الوحدة الوطنية» و«دعم فلسطين»: «جيش محمد» يظهر فى «التحرير».. والمتظاهرون: «لا للفتنة»" - مع ان الدعوة كانت لجمعه وحدة وطنيه تحولت الى "حمل المتظاهرون الأعلام الفلسطينية، وطالبوا بطرد السفير الإسرائيلى، وقطع العلاقات مع إسرائيل، ورددوا هتافات «على القدس رايحين، شهداء بالملايين»، و«الشعب يريد العودة إلى فلسطين»، وارتدى عدد كبير منهم شارات خضراء فوق رؤوسهم كتبوا عليها «جيش محمد»، وقال الشيخ صفوت حجازى فى رسالة للمتظاهرين، إن الجموع المحتشدة فى الميدان على استعداد لأن تسير إلى تل أبيب" - المصري اليوم
16 مايو "«المصري اليوم» ترصد اشتباكات ماسبيرو: ٥ ساعات من المعارك بالحجارة والمولوتوف والرصاص" - المصري اليوم20 مايو "أقباط «ماسبيرو» يتراجعون عن فض الاعتصام بعد اشتباكات فى عين شمس بسبب افتتاح كنيسة" - المصري اليوم
23 مايو "«الجلسة العرفية» تربط الموافقة على افتتاح «كنيسة عين شمس» بالتخلى عن بناء القبة وتعليق الصلبان" - المصري اليوم

3- تفتيت القوى السياسيه

16 ابريل "«الإخوان»: نسعى لإقامة الحكم الإسلامى وتطبيق «الحدود» بعد امتلاك الأرض" - المصري اليوم
17 ابريل "شباب الثورة والقوى السياسية ضد «دولة الإخوان»" - المصري اليوم
13 مايو "«بديع»: «الإخوان» تتعامل مع الأحزاب بمبدأ «الأم».. والصحفيون العلمانيون يحرضون ضد الدين.. والبابا لم يجد ضمانة غير الشريعة" - " الأحزاب ترد على «بديع»: «الإخوان» ليست «أمنا».. والجماعة أصيبت بأمراض تضخم الذات والاستعلاء مثل نظام مبارك" - المصري اليوم
21 مايو "انقسام حول قانون «الحقوق السياسية»: «الإخوان» ترحب.. والأحزاب تنتقد تجاهل استخدام «المال والدين» فى الانتخابات" - المصري اليوم
23 مايو "مشادات عنيفة واتهامات بـ«التخوين» فى أولى جلسات الحوار الوطنى بسبب حضور رموز من «الحزب الوطنى» المنحل" - المصري اليوم
26 مايو "٢١ من القوى السياسية تشارك فى «مليونية تصحيح المسار».. والإخوان والسلفيون يصفونها بـ«ضد الشعب»" اللي هي كانت ميلونية الدستور اولاً - المصري اليوم
3 يونيو "اتحاد شباب الثورة ينسحب من الحوار بسبب «عدم الجدية».. و«ينتقد سيطرة شباب الإخوان والإسلاميين»" - المصري اليوم
7 يونيو "اتهامات متبادلة بين القوى السياسية و«الإخوان» فى مناظرة «الدستور أولاً أم الانتخابات؟»" - المصري اليوم
21 يونيو "قوى «الثورة» تعلن جمع «٥ ملايين» توقيع لتأييد «الدستور أولاً».. وفقهاء قانون يؤكدون «مشروعية الحملة»" - المصري اليوم
24 يونيو "شباب ثورة الغضب الثانية: «الدستور أولاً» لم يعد مطلبنا الأساسى.. و«مليونية ٨ يوليو» لتحقيق باقى الأهداف" - المصري اليوم
5 يوليو "رئيس «الحرية والعدالة»: من يطالب بتأجيل الانتخابات هم الصهاينة وأذناب النظام" - المصري اليوم
6 يوليو "«المجلس الوطنى والوطنية للتغيير» يهددان بمقاضاة قيادات «الإخوان» بسبب تصريحات «مرسى» - المصري اليوم
6 اغسطس "القوى السياسية توافق على مشاركة الطرق الصوفية فى مليونية «حب مصر» للرد على «جمعة لم الشمل»" - المصري اليوم
9 اغسطس "الحكومة تفشل فى إقناع القوى الثورية بالتراجع عن «مليونية حب مصر»" - المصري اليوم

4 - تشويه الثورة

30 يونيو "ساويرس: لم أقصد الإساءة للإسلام وخصصت جائزة باسم «طنطاوى» وفوضت «الطيب» فى وحدتنا الوطنية" بدايه اسقاط ساويرس وزعزعة استثمارته وقوة الحزب الذي يمثله وقناة اون تي في وجريدة المصري اليوم - المصري اليوم
24 يوليو "«الروينى»: لدينا أدلة على تلقى «٦ أبريل» تمويلاً أجنبياً .. وكفاية غير مصرية" - المصري اليوم
14 اغسطس "مجهولون يسرقون «حمزاوى».. ويختطفون الفنانة «بسمة» تحـت تهديـد الســلاح" - المصري اليوم والتلميحات القذرة زي التعليق ده على جردية اليوم الساقع "ياسيدي علي الليبرالية ....الباشا رايح يتسحر مع واحده صاحبته الساعة واحدة بعد نص الليل .. اللهم تقبل صيامنا"
17 اغسطس "إحالة «أسماء محفوظ» إلى المحكمة العسكرية بتهمة «إهانة المجلس العسكرى» " - المصري اليوم

5- تحجيم الثورة

5 مارس "أزمة خامات فى مصانع الأغذية والمطاحن: الموردون الأجانب يصرون على التحصيل نقداً.. والمصانع تعمل بنصف طاقتها" - المصري اليوم

24 مارس "قانون لتجريم بعض حالات الاعتصام والحبس وغرامة ضخمة لـ «المخالفين»" - المصري اليوم

17 مايو "الجيش يطلق صرخة تحذير: الاستثمار الأجنبى «صفر» .. والفقر يصل إلى ٧٠٪" - المصري اليوم
29 يونيو "عصام شرف يطلب استبعاد ٧ وزراء بسبب عدم تنفيذ «أهداف الثورة».. والمجلس العسكرى يرفض" - المصري اليوم
30 يونيو" عودة الدماء و «الدموع» لميدان التحرير" وديه احداث التحرير اللي وقعت بعد احداث مسرح البالون - المصري اليوم
22 يوليو "«الكونجرس» يناقش مشروع قانون قطع المعونة عن مصر" - المصري اليوم
30 يوليو "جمعة «تفريق الشمل» .. الإخوان والسلفيون يهتفون: «إسلامية إسلامية».. و٣١ من القوى السياسية تنسحب" الجمعه المعروفه بجمعه قندهار ومن ساعتها محدش هوب ناحيه الميدان - المصري اليوم
2 اغسطس "الجيش يفض الاعتصام .. ويفتح «التحرير» للمرور" - المصري اليوم
10 اغسطس "«السلفية» تشكل لجاناً شرعية لفض المنازعات فى سيناء وتستعين بـ٦ آلاف مسلح لتنفيذ الأحكام بالقوة" - المصري اليوم
13 اغسطس "«التحرير» يتحول إلى ثكنة عسكرية فى «حب مصر»" وفي تفاصيل الخبر بيقول: "اصطف عساكر الأمن المركزى والشرطة العسكرية حول حدائق الميدان لمنع المواطنين من التواجد داخلها، وزار المشير حسين طنطاوى الميدان لمدة ٥ دقائق عقب صلاة الجمعة للاطمئنان على قوات الشرطة العسكرية." - المصري اليوم
20 اغسطس "الإسلاميون يحذرون «المجلس العسكرى» من «ثورة ثانية» بسبب «المبادئ فوق الدستورية»" - المصري اليوم
21 اغسطس "القوى السياسية تتمسك بطرد السفير الإسرائيلى واستدعاء المصرى و«الوطنية للتغيير» تنظم مسيرة لدعم الجيش" - المصري اليوم
22 اغسطس "تواصل الاحتجاجات الشعبية فى المحافظات ضد الاعتداءات الإسرائيلية.. ومطالب بـ«طرد السفير وإغلاق السفارة وقطع الغاز» - المصري اليوم

ارهاصات: علامات .. يعني ما قبل حدوث الشيء .. فتستخدم مثلاً للحديث عن دلائل نبوة

ربنا يستر

MishMish

خيار المتطرف: الجوع أو التنصير

2011-07-30T20:09:00.000+02:00

على شاشة التلفزيون العربي المحافظ تسرد هذه الأم الصومالية قصتها الموغلة في الحزن

المخيف حد عودة الروح لأي ضمير ميت: تقول الأم إنها بقيت ليوم كامل على قارعة الطريق في حيرة وهي تختار طفلاً واحداً من بين طفلين فرحلة الجوع لا تحتمل إنقاذ الاثنين. وبالطبع، اختارت الأصغر لأنها الفطرة ولأنه الجسد الهزيل الأخف حملاً. وكلما مشت قليلاً عادت مجبرة إلى طفلها وكررت هذه – المشاوير – مرات قبل أن تجزم بالرحيل. هل يستطيع أحد منكم أن يتخيل نفسه في هذا الخيار الموحش؟
وخذ في المقابل الموغل في التطرف أن الأباطرة من – حركة الشباب – الذين يتمسحون باسم هذا الدين الإنساني العظيم، يتوعدون كل منظمات الأرض الخيرية والإنسانية بالقتل والسحل ويتهمون كل ضمائر الأرض بالتنصير والتبشير ويهددون كل من ينوي أن يأتي لإنقاذ ملايين الأطفال والنساء بحرب ضروس. عن أي تنصير أو تبشير يتحدث هؤلاء من سدنة الفكر المتطرف بينما آلاف الآباء والأمهات أوهن من القدرة على حمل طفل جائع على الأكتاف. عن أي جوع يتحدث أباطرة العضلات المفتولة وهم يحملون الرشاشات والرصاص في وجوه تنضح بالدهن من التخمة. أم تختار الحياة لطفل من طفلين، وشاب يحمل من الرصاص أضعاف وزن العظام لطفل تتركه أمه على قارعة الطريق. وفي ثنايا هذا التهديد والوعيد لم تجد منظمات العمل الإنساني من وسيلة إلا أن ترمي الأكل بالطائرات من الجو. وللأسف الشديد فإن العالم الذي يعقد قمة – الفاو – من أجل هذه المجاعة المخيفة هو ذات العالم الإنساني الذي تتوعده – حركة الشباب – بالقتل وتحمل من أجله الرصاص بينما نحن في موقف المتفرج على هذا العقل الذي توهم الخيال: الأم بين النجاة أو الموت والمتطرف ما بين الجوع أو التنصير لسبب بسيط: لأن المتطرف في السلطة لم يعرف الجوع ولا الخيار ما بين طفلين

علي سعد الموسى - الوطن السعودية
http://www.elaph.com/Web/NewsPapers/2011/7/672427.html?entry=homepagenewspapers

ومن اني انا لحركة شباب الندامه ... جاتكم ستين نيله

Don't Judge Too Quickly ..... We Won't

2011-07-20T14:08:00.000+02:00

Enjoy,
MishMish

وده تحت السلم ... في تعبان

2011-07-11T15:02:00.003+02:00

بيقولك

الرئيس اليمني المحروق صالح يستعد للعودة إلى صنعاء ١٧ يوليو .... وإن ما يقلق الرياض وواشنطن هو القوة الكبيرة فى الشارع اليمنى للإسلاميين، وهو ما يعكس مخاوف من المرحلة المقبلة من قوة نفوذ التيار الإسلامى فى اليمن، الأمر الذى يفسر التوجه (السعودى - الأمريكى) القاضى بالدفع بأن يكون أحمد على صالح، نجل الرئيس اليمنى هو مرشح الحزب الحاكم لخوض الانتخابات الرئاسية المقبلة لكون ذلك الضمانة الوحيدة للحفاظ على مصالح واشنطن والرياض فى اليمن

الخبر هنا في المصري

طيب اذا عرفنا ان السعودية صرفت من سنه 1975 لغايه سنه 2000 أكثر من 70 مليار دولار لنشر المذهب الوهابي اي ما يعادل اكثر من 2 مليار دولار سنوياً - المصدر

اللي هو نفس المذهب / المنهج الذي يتبعه الاسلاميين (اللي السعودية متخوفه منه) والغرض الاساسي منه هو تحويل الشعوب الى قطعان من معدومي الفكر يساق شمال ويمين بالفتاوي اللي تخدم السلطة .... وزي مانتوا عارفين ان الدولة السعودية الحديثة صنيعة شركات النفط الأمريكية وحكومة الولايات المتحدة تماماً. ففي العشرينات كانت السعودية مجتمع إقطاعي حكم فيه عائلات مختلفة مناطق متعددة. وتم تشكيلها كدولة في 1932 عندما هزم ابن سعود وعشيرته العائلات الأخرى ووحدوا الدولة وأطلقوا عليها أسمهم. - المصدر

طيب واذا عرفت ان وكيل وزارة التجارة لشؤون التجارة الدولية بوزارة التجارة الأميركية فرانسيسكو سانشيز أعلن أن الشركات الأميركية وقعت عقودا مع الحكومة السعودية خلال العام الجاري بنحو 525 مليار ريال "140 مليار دولار" تركزت في قطاع الطاقة. - المصدر

وان متوسط مبيعات النفط الخام السعودي في الولايات المتحدة بلغ مليون و148 ألف برميل يومياً - المصدر

يبقى مين المسئول دلوقتي عن اللي بيحصل دلوقتي في العالم العربي المنكوب؟ ياما نرضى بحكم طرطور ظالم مستبد يصادر حتى على الهوى اللي بنتنفسه ياما يهددنا بالاسلاميين - اللي هما انتاج سعودي وامريكي مشترك؟

عايزين حريه براحتكم انا هامشي واسيبهالكم بس علشان تبقوا عارفين

تحت السلم .... في تعبان

وبعدين يجي واحد عبقري زي وزير الخارجيه الجديد يقول ان السعوديه - بتاعه الجاز - هي الشقيقه الكبرى لمصر - لفظ قبيح - !!!!!!! ؟

وعلشان التمثليه تكمل يطل علينا المسئولين الامريكيين بخطابات عن حق الشعوب العربية في تقرير مصيرها والتمتع بالديموقراطيه؟

السعودية جابت التعبان وامريكيا بتكفله والخرفان في مصر وفي سوريا وفي اليمن والبحرين و..و... بتتساق للدبح علشان خاطر عنين استقرار الشقيقه الكبرى والمحافظة على نصيب الدولة العظمى في الجااااااااااززززززززز

جاااااااااااااااااااااااااااااااااااااااااز

MishMish

توكيل اتصالات

2011-07-04T16:57:00.000+02:00

فى قريه الاحلام كان الناس يعيشون فى هدوء تحت ولايه الملك المحبوب ..الذى كان يمتاز بالعداله والحريه والرحمه والمحبه ..كان بابه مفتوحا لكل الناس فلم يأتى له احد ابدا ورده ..فمن السهل جدا ان تقابل الملك بدون اى ميعاد مسبق ..لا توجد حاشيه ولا بطانه ولا حراس يمنعونك من الدخول الى حضرة الملك ..قد تطلب منه طلبا فيرفض تنفيذه لك ..لكن لحكمته ورجاحه عقله تكتشف فيما بعد انه كان محقا فى رفض طلبك من اجل مصلحتك ..وانه قد رتب شيئا افضل لك ..كانت المسافه بين اهل القريه وبين الملك قريبه جدا بالرغم من بعدها جدا ..فالطريق يحتاج الى مجهود شاق للوصول للملك لكن كل هذا التعب يهون بمجرد وصولك الى حضرته ..كان الملك يعتبر اهل قريه الاحلام وجميع القرى الاخرى بمثابه ابناؤه ..فأى مرسوم يصدره يكون من هذا المنطلق

كانت الامور تسير على مايرام ..الى ان ظهرت مجموعه من الناس فى القريه غريبه الشكل والملامح عن اهلها كانوا جميعا يرتدون زى موحد..بدأوا يحفرون و يضعون اساسات لبعض المشروعات المبهمه ..وحينما كان يسألهم الناس عما يفعلون ..كانوا يلتزمون الصمت ...فكانوا يواصلون العمل وكأنهم الات صماء ..الى ان فكر الناس فى اللجوء الى الملك ليخبروه بما يفعله هؤلاء فى قريتهم ..وما ان علم اعضاء المجموعه الغامضه بذلك الا واسرعوا بارسال مندوب لهم لاهل القريه ..هذا المندوب كان حلو الحديث لين الكلام يمتلك كاريزما وحضور ومقنع على طريقه رجال المبيعات الناجحين ...فى هذا الاجتماع تحدث المندوب مع اهل القريه بطرقه وديه وتركهم يطرحون تساؤلاتهم وشكوكهم ..الى ان ازال الغموض وازاح الستار عن مفاجأة كبيرة وسارة لاهل القريه ..فاعلن ان الملك قد فوض مجموعته لانشاء شبكه اتصالات واسعه فى القريه لتدخل القريه عالم التكنولوجيا من اوسع الابواب ..والمفاجأة الاكبر ان هذه الشبكه بها خط ساخن مباشر مع الملك لكى يكون على اتصال دائم بهم وليريحهم من عناء المشوار الى قصره ولذلك فان الملك اعطاهم توكيل لبناء شبكه الاتصالات ..صمت الجميع من هول المفاجأة السارة ..ثم صفقوا طويلا واخذوا يرقصون ويهتفون ...عاش الملك عاش الملك ..

بدأ العمل فى القريه بهمه ونشاط لتركيب شبكه الاتصالات ..كان اهالى القريه يساعدون فى البناء وفى بعض الاحيان كان اعضاء المجموعه الغامضه يستمتعون بالجلوس تحت المظلات وشرب العصائر المثلجه ويتركون اهل القريه يعملون تحت اشرافهم ..فاهل القريه طيبون جدا ..استمر العمل بجديه الى ان تم الانتهاء من الشبكه وتم افتتاحها فى حفل رائع ..تم فيه توزيع ارقام الهواتف فى الشبكه الجديده بعد ملأ استمارة بيانات لككل فرد من افراد القريه.. كانت الشركه بين الحين والاخر تقوم بعمل عروض سخيه لاهل القريه ..فمرة مكالمات مجانيه ..ومرة حقيبه بها مواد تموينيه ..ومرة سحب على سيارات واجهزة منزليه ..كان الناس فرحون بهذه العروض والمكافأت السخيه ..على الرغم من انها كانت من اشتراكاتهم التى يدفعونها..نسي الجميع الملك وانشغلوا بالشبكه الجديده ..التى كان شعارها ..نحن الملك... كانت الشبكه تتعرض لرقابه مركزيه من خلال غرفه تحكم ..فاى اتصال بين الناس يمر اولا على غرفه التحكم ..فكان هناك مركز لخدمه العملاء وهذا المركز كان سريا ..فرئيس المجموعه كان يرى انه يجب التحكم فى اتصالات الناس ليحميهم من انفسهم وانه يفعل ذلك بنيه حسنه ..حتى ان احد اعضاء المجموعه قال له ذات مرة احنا كده بنتجسس على الناس ..فرد بجمله تاريخيه : طظ فى الناس وابو الناس احنا بنعمل لمصلحتهم ...كان اهل القريه يتحدثون فيما بينهم من خلال الشبكه ..فالاب يتحدث مع ابناؤه وما ان ينهى المكالمه حتى يجد شخصا يحدثه فى موضوع المكالمه ويعطيه درسا فى تربيه الابناء ..المفروض ان تفعل كذا وكذا ..هذا لا يليق ..وهذا يليق ..هذا حرام وهذا حلال ..وكأن التجسس غير حرام اصلا ..وفى احدى المرات كان احد افراد القريه يتحدث مع صديق له على انه تعرف على احدى الفتيات ووقع معها فى الخطيئه وانه نادم على فعل ذلك بشدة فكيف سيقابل الملك فى الحفل السنوى ويضع عينه فى عينه ..وما ان انهى المكالمه حتى فوجئ بشخصيه تحدثه على الهاتف وتوبخه بشدة على مافعل وان الملك سيغضب بشدة وسيعاقبه اشد العقاب على مافعل ..مع ان الملك لو كان علم بهذا كان سيرحم هذا الشاب المسكين الذى ندم على فعلته ...ومن الحوادث المعروفه ايضا فى القريه انه كان هناك شاب يهوى الكتابه والتاليف فعرفت المجموعه الغامضه من خلال محادثه تليفونيه انه يؤلف كتاب يخالف اراؤهم وتوجهاتهم ..فوجئ هذا الشاب بتهديدات بالقتل وبالطرد من القريه عقابا له ...كان اهل القريه ينصاعون لنصائح المجموعه الغامضه فهم يحملون توكيل الملك ..زاد نفوذ المجموعه شيئا فشيئا حتى اصبحوا يتحكمون فى حياه الناس الذين صدقوا انهم يحملون توكيل من الملك ليحتكروا كل شيئ ...الافكار والاحلام والاتصالات مع الملك ..مع انهم اضافوا خاصيه الى الخط المباشر بالملك فحينما تتصل بالملك تجد رساله الية ترد عليك : الهاتف الذى طلبته خارج نطاق الخدمه ..ويتم تحويل المكالمه تلقائيا الى احد اعضاء مجموعتهم الذى يفيدك فى حل مشكلتك ..كل حسب تخصصه ظلت الامور تتسارع ..الى ان اجتمع مجموعه من الشرفاء والحكماء ومن بينهم الشاب الكاتب الذى تعرض للتهديد بالقتل ..وقرروا الذهاب الى الملك واخباره بما تفعله هذه المجموعه ..فالامر خطير جدا ...ذهبت المجموعه فى جنح الظلام خوفا من علم المجموعه الغامضه ..ودخلوا الى قصر الملك ..واخبروه بما حدث فى قريتهم ..وفوجئوا بعلم الملك بما يحدث فهو الملك الحكيم الذى يعرف الكبيرة والصغيرة عن رعيته ..ولما سألوه :لماذا لم تتدخل اذن بالرغم من معرفتك بما يحدث ..رد عليهم الملك : كنت انتظر ردة فعلكم ..فانا لا اساعد احد لا يريد ان يساعد نفسه ..عليكم بالخطوة الاولى وستجدون منى كل العون ..فهذه قريتكم التى تعيشون فيها وهذه هى حياتكم ..ابدأوا بخطوة ايجابيه وساسبقكم بعشرات الخطوات لكن تذكروا ..انا لم اعطى توكيلا لاحد

ميجوووووو

صور ...وتعليقات

2011-06-28T13:38:00.003+02:00

الدعايه الساسيه لحزب الإقصائيين والمفكرين بما تحت حزام البنطلون

اللي شايف ان ده مسيء 

ايه رأيه في السفاله ديه

ده مش حقد على الدين ...ده إنذار لعدم تسليم السلطة لمدعي الحكم بإسم الله

اغتيال براءة ... مش حرام

MishMish

انهيار عصبي

2011-06-26T13:33:00.000+02:00

حياتنا كلها عباره عن سلسله احداث تؤدي في النهايه الى انهيار عصبى.

بنتلقى مجموعه من الاوامر واحنا صغيرين "اوعى كلمه نقولها هنا تطلع بره" اوعى تشتم " و الجمله متنتهيش الا وتسمع مين ابن الكلب الواطى اللى معلى الكاسيت كده فاكر نفسه عايش فى الشارع لوحده ده و لا ايه".

و بعدين تكبر شويه و تبقى فى اعدادى مثلا الولد يفضلوا يجروا وراه "اوعى تشرب سجاير. السجاير هتدمر صحتك ........روح هاتى طفايه بقى عشان السجاره اللى فى ايدى قربت تخلص". و اوعى تعاكس بنات و تسمع حكاية وانا فى سنك كنت ملاك برفرف بجناحات والمفروض انك تصدق الحكايات ديه.

و البنت بقى ياعينى يومها طين لمجرد انها كبرت اوعى تكلمى حد فى الشارع و صوتك وانت بتضحكى و اوعى تبصى لحد وانت بتكلميه ايه يقول ايه بجحه ...........و حاجات كتير و لو البنت قالت يا ماما انا بحب زميلى فى المدرسه يتم نقلها فورا لمدرسة بنات بس و عادة بتبقى المدرسه اشبه بسجن النسا و المدرسات نصهم معنسين و يتحدوا البنات الصغيرين وكل ما بنت تعمل حاجه يقولولها انت فاكره نفسك حلوه ولا ايه انت مستحليه نفسك يا بت...........لا حول الله قمة البهدله و طبعا خلال المراحل العمريه المختلفه لو صادفك الحظ وكنت موهوب فى حاجه رقص ايقاعى موسيقى رسم او حتى زراعه و قلت انا عايز ادخل مسابقة كذا تلاقى الرد فورا انت اتجننت و دروسك ومذاكرتك وكل الاهالى عايزه تطلع ولادها مهندسين ودكاتره بس مفيش اى وظيفه تانيه بتبقى من طموح الاهل

دخلت ثانوى انسى بقى يا معلم ولا خروجات و لا اصحاب و لا تليفون ولا اى حاجه خالص دروس خصوصيه و مدرسه فقط لا غير و طبعا قبل ما تبتدى الدراسه تلاقى اهلك حجزولك كل المواد "طب انا شاطر فى الانجليزى يا ماما مش عايز اخد فيه درس" اخرص عمى فى عينيك انت اتجننت و بعدين هتاخد غصب عن عين اهلك انت عايزنى لما اموت تقول اللى يحرقها مطرح ما راحت ما ساعدتنيش و استخصرت فيا" قال يعنى لما حد يموت هنفتكر بقى انه استخصر انهى درس عشان ادعى عليه و كل الشتيمه اللى فاتت دى عادى يعنى

الامتحانات جت و البيت بقى مكهرب و كل ماتقوم من على المذاكره تسمع صوت مخيف انت رايح فين يازفت ترد بصوت يرتعش من شدة الخوف انا ....انا .....انا رايح الحمام "اه حجة البليد روح روح واول ما تدخل تسمع انت هتقعد جوه اليوم كله و لا ايه يلا يا فاشل مع العلم انك عمرك ما سقطت........خلصت ايام الذل و جت الاجازه اول يوم فى الاجازه عادة بتنام بقى تعوض كل سنين العناء و الشقاء و الاشغال الشاقه اللى انت فيها تلاقى الصبح بدرى قوم يابنى انت هتفضل نايم كده على طول.......قوم عشان ربنا يفتحها فى وشك ........اللى نفسى اعرفه هيفتحها ازاى هو انا هانزل اسرح بلبن مثلا هيفتحها فى ايه بالظبط هيعرضوا فيلم لاول مره فى التليفزيون مثلا ناهيك بقى عن معاملة الكلاب اللى انت بتتعاملها لغاية ما تظهر النتيجه و اول ما تظهر النتيجه لو ربنا نصفك تلاقيهم بيحيلوك فانت تتغندر بقى مين قدك ياعم واول طلب تطلبه تسمع نفس الصوت المخيف فاكره من ايام الامتحانات"هو انت صدقت نفسك تلاقيك غشيت يا فاشل" يالا استعد للسنه الجايه تعرف لو مجموعك نقص هاعمل فيك ايه (فانت ايدك على قلبك بقى ياترى الوحش هيعمل ايه) و لا اعمل ليه انا مالى اللى ياكل على ضرسه ينفع نفسه" طب ما كان من الاول انتوا مالكو بقى.........

المهم جت الكليه بقى و انت مبسوط اخيرا بعدت عن القبضه الداميه المطبقه عليك من يوم مااتولدت واول ما تدخل الكليه تكون طيب كده و مصاريفك اول سنه مظبوطه و بعدين بقى يبان اثار التربيه السيئه واثار الكبت يطلع و تبتدى تسرق بقى من تمن الكتب و تسحب منهم المصاريف 3 او 4 مرات على سبيل الانتقام بس مش اكتر و طبعا بقى تسمع بعد كده احاديث الفخر بيك فى جلسات العائله انك دخلت كلية ايه و جبت مجموع ايه و نجحت فى اول سنه ازاى و انشاء الله عمرك ما هتكوع فى الكليه ...............شويه كده فى الكليه و تتقى ربنا بقى حرام فترجع كويس تانى وتحس انك كبرت وعادة بتبقى اخر سنه فى الكليه على اساس انك داخل بقى سوق العمل و تلاقى كتافك عليت كده وانت ماشى فى الشارع وتبص لنفسك فى المرايه كتير واعز اصحابك يهزر معاك تقوله عيب بقى احنا كبرنا .......المسخره كلها بقى فى اول انترفيو تلاقى عم الكبير عمل قطه و هيعيط لصاحب الشغل عشان يشغله و تقعد تفتى بقى و انا كنت اشطر واحد فى الكليه و السيره الذاتيه بتاعتك نصها مضروب و تحس دايما ان صاحب الشغل بيضحك على الكلام اللى انت بتقوله.......واول ما تشتغل تحس انك فجاه بقيت كائن محبط كئيب ايتم من الاخر واول وظيفه تتعين فيها لازم تحب زميلتك فى الشغل حتى لو كنت مرتبط بواحده تانيه وهى هى نفس الكلمه "اللى قبل كده كانت عيله اما امت شخصيتك بهرتنى".................وتزداد سخافه و تصبح اقرب شبها بالكائن المخيف اللى فى البيت اللى كل يوم اول ماتروح تسمع ازى الشغل عامل ايه تلاقيك عملت مصيبه كالعاده ....انت طبعا ترد الحمد لله مفيش مصيبه ولا حاجه ......ليه هو انا مش عارفك .......ياباب مفيش حاجه ....طب انت قالب وشك كده ليه جتك داهيه وانت شبه امك كده

خلال طول المده دى سمعت كلمة فسحه خروجه مع العيله من غير ماتبقى الخروجه دى جنينة الحيوانات و طول الطريق تسمع ابوك وامك بيتخانقوا على مصروف البيت و فى الاخر يطلعوا مدكنين قد كده بس يا عينى يستقطعوا من مصروفك كل شهر على اساس ان فى خصم فى المرتب الشهر ده او مجرد تعسف كده ولو ابديت اعتراض تسمع هو انت مبتحسش خالص كده يابنى حس بينا حرام عليك و انت تفتكر ان اهلك فقرا و لما تكبر تكتشف انهم اغنيا فجأه

عمرك قلت انا عايز اعمل كده وحد شجعك ....عمرك نجحت و حد جابلك هديه تكون انت عايزها مش بابا و ماما شايفين انها هتنمى ذكائك المحدود

تفضل طول عمرك يشككوا فى ذكائك وقدراتك لغاية ما تحس انك عامل زى حزلقوم ذكائك محدود وعدا كل الحدود

وبعد كل ده تروح تختار عروسه نسخه من امك والبنت تختار ابوها ....زى مانكون بنشتاق للنكد اللى اتربينا عليه و طول الوقت تبقى مشدود ومتضايق زى ابوك بالظبط والبنت قلقانه نسخه من امها

بذمتك مش ده يجبلك انهيار عصبى

إهداء من رومي

لمحة المعيه من سياسات ابو جمال الخارجيه

2011-06-13T16:16:00.000+02:00

يحكي انه في عشاء السفارة المصريه، التقي دكتور بطرس غالي - امين عام المنظمة الدوليه للفرانكفونيه السابق - بالوفد المصري المكون من 5 نواب اللذين يمثلون البعثه المصريه في الدورة الخامسه والعشرين للجمعيه البرلمانيه الفرنكفونيه. وجد الدكتور بطرس ان 3 منهم لا يتكلمون سوى العربيه

فأبدى اندهاشه لسفير مصر حمدي ندي وسأل - وياريته ما سأل

"لماذا اتوا لحضور هذا الاجتماع هنا في اوتاوا، إذا كانوا لا يتكلمون الفرنسيه، ولا حتى الانجليزية؟" فهمس السفير في اذنه:

"طرحت السؤال نفسه على رئيس البعثه، فأجبني أن مجلس الشعب اعتمد نظام التناوب، لكي يتسنى لكل نائب أن يقوم على الاقل برحله إلى الخارج في أثناء ولايته. ولو كنا نريد حصر هذا الامتياز في النواب الذين يتكلمون لغه اجنبيه فقط، فإن المختارين سوف يكونون قله ضئيله. ولسوف يؤدي ذلك إلى إغضاب الاكثريه الساحقه من النواب"

وانحشر النواب الثلاثه الذين لا يتكلمون سوى العربيه، وهم متحدرون من أقاصي الصعيد في زاويه صغيرة، لعدم تمكنهم من التحادث إلى الشخصيات الفرنكفونيه والأنغلوفونيه التي غصت بها قاعه الاستقبال.

فما رايكم دام فضلكم في المصيبه ديه

الفرانكوفونية: هي منظمة دولية للدول الناطقة باللغة الفرنسية (كلغة رسمية أو لغة منتشرة) والحكومات، تحتوي المنظمة على 55 عضوا وحكومة و30 مراقبا.

منقول بتصريف من كتاب: بإنتظار بدر البدور ... يوميات 1997 - 2002 بقلم بطرس بطرس غالي ص238 - 239

MishMish

ماذا ستنتفعون يا من تخنقون حلم الحرية؟

2011-06-09T14:17:00.001+02:00

ماذا سينتفع اصحاب المصالح السياسيه لو ربحوا جميع مقاعد مجلس العشب وخسروا مصر

ماذا سينتفع البشوات لو ربحوا خوف وخنوع الناس وخسروا الاحترام

ماذا سينتفع اصحاب الجماعات الدينيه من الاستيلاء على الدنيا وخسارة الاخرة

ماذا سينتفع الانسان لو ربح العالم كله وخسر نفسه

ماذا ستنتفعون يا من تقتلون روح الثورة والامل في نفس شعب عانى لعقود كامله من الإمراض والتجهيل والإقصاء والنهب المنظم

ماذا ستنتفعون يا من تركتم الساحه وسلطم الاضواء على كل صاحب فكر مريض بينما غيبتم وبكل عنف من له رؤيه وضمير وحب لهذا الوطن

ماذا ستنتفعون يا من اشعتم الفوضى وتركتم البلطجيه والهاربين من السجون يقتلون براعم التحضر التي ازدهرت في اول ايام الثورة

ماذا ستنتفعون يا من تركتم نيران الفتنه الطائفيه تشتعل لتحرق الرابطة التي وحدت ابناء الشعب الواحد وفتته الى جزر منعزلة بعد ما وحدت الثورة ما لم تستطع كل الجلسات العرفيه والبرامج الحواريه والاغاني والافلام جمعه لعقود

ماذا ستنتفعون يا من تسوقون البلد الى حتفها في مقابل حنفه من الاوراق القذرة الملونة

ماذا ستنتفعون يا من تخنقون حلم الحريه.

MishMish

بجوار النافذه ..اى نافذه

2011-06-02T12:59:00.000+02:00

. كان جالسا فى احد المطاعم المعروفه يتناول البيتزا فى فترة الراحه من العمل ..كعادته دائما يحب الجلوس بجوار النافذه ..اى نافذه ...واثناء التهامه قطع البيتزا ..شاهد احد زملاء الدراسه القدامى ..والذى كان محدود الذكاء باعترافه هو نفسه ..كان زميله يركب سيارة فارهه من النوع الذى يفضله رجال الاعمال ..نظر اليه نظرة عميقه وطويله بطول نافذه المطعم .دارت رأسه مع السيارة .ودار فى رأسه حوار : ياترى جابها ازى دى وهو خريج معهد متوسط ..وانا اللى مهندس قد الدنيا راكب 128 بالعافيه ومبهدلانى معاها ..يمكن خد ورث من ابوه ولا يمكن ربنا فتحها عليه من تجارة ..ماهو الناس دى بتبقى مرزقه ..ربنا ياخد من مخهم ويديهم فى حظهم ..بس اكيد ده حرامى انا عارفه من واحنا صغيرين ..من ايام ماكان بياخد فلوس الدروس من ابوه ومايروحش الدرس ويروح يقعد عالقهوة ..دى عربيه تركبها يابن اللذين مرة واحده ؟ ايه البلد اللى ماشيه بالمقلوب دى .. ماشي يادنيا

هذا الحوار دار لحظه مرور زميله بالسيارة لبضعه ثوان ..هنا التفت الى الناحيه الاخرى وهو ممسكا بقطعه اخرى ليلتهمها وقبل ان يضعها فى فمه ..رأى طفلا صغيرا ممسكا بيد امه ذات الملابس البسيطه وفى يدها الاخرى كيس فلافل وحزمه جرجير ..هذا الطفل ظلت عيناه محدقه فى قطعه البيتزا بطول نافذه المطعم ..وكلما كانت سرعته تبطئ ..كانت تسحبه امه بصورة تلقائيه ..واستمرا فى طريقهما

ميجووووووووووووووو

لا تعايرني ولا اعايرك

2011-05-30T16:44:00.000+02:00

في البدايه كنت على صفحه خبيثة على الفيس اسمها "إسرائيل بدون رقابه" كحب استطلاع يعني

المهم لاقيت عنوان بيقول: جديد في الشرق الاوسط – مسبحة مرئية الخبر بإختصار هو: المبرمج الإسرائيلي، افيف هيلفيل، فكر بتطوير تطبيق المسبحة (للأجهزة الخلوية الذكية) خلال ساعتين ونصف من الهدوء وهو جالس بمقهى في تل أبيب. " الفكرة بسيطة، اردت ان اجد شيئا صغيرا يشغل أصابعي ولا يتطلب التركيز العميق. عندها تذكرت انني زرت سيناء وهنالك راءيت الرجال يحملون المسابح التي تشغل اصابعهم فحاولت نسخ فكرة آلية المسابح."

في الوقت الحالي، يمكن تحميل التطبيق على الهواتف الذكية مجانا. وبعد اسبوعين منذ عرض هذا التطبيق، قام ما لا يقل عن 2500 مستخدم بتحميله ويعد هذا الرقم قياسي بالنسبة لتطبيق مجهول لم يتم الإعلان عنه او تسويقه. ثلث التحميلات كان في المملكة العربية السعودية، والتي تموضعت في المرتبة الاولى من بين باقي الدول العربية

.....

يقول أفيف. ويضيف: "احب ايضا إلقاء النظر من حين الى آخر على التعليقات على التطبيق. ادهشتني بالذات التعليقات الايجابية لل"مسبحة" حيث تبين أن غالبية من قام بتحميلها على هاتفه يحبها. تدريجها الان 4،5 من أصل 5 نجوم (27 صوتا). أولئك الذين لم تعجبهم المسبحة, كتبوا أنها بِدعة. تلقيت ايضا بعض التعليقات المضحكة كمثل "حفظ الله مبرمج هذا التطبيق... تلقيت تعليقات جميلة باللغتين العربية والفرنسية

الخبر كان ممكن يعدي كدة لولا انه ذكر ان تلت التحميلات كانت من السعودية والتعليقات اللي بيتقول "حفظ الله مبرمج هذا التطبيق" وده طبعاً مش ممكن يحصل لو الناس عرفت انه اسرائيلي علاوة على ان الاسرائيليين بيكرهوا العرب قد ما العرب بيكرهو الاسرائيلين ....المهم قعدت ادور في كل مكان عن اصل الخبر او حتى اي إشاره ليه من بعيد او من قريب سواء بالعربي او بالانجليزي ومعرفتش ابداً .

طبعاً كمان لما شوقت الخبر بصورته ده قولت العالم اللي فرحوا بان الهاتف بتاعهم بقى اسلامي ما يعرفوش ان اللي عامل البرنامج ده واحد اسرائيلي وهما زي الهبل عاملين يشتروا ويدفعوا فلوس لعدوهم. وبعدين ما طبعاً الواحد هايمسك في ايده التليفون والسبحه ومفاتيح العربيه كتير كدة. انما شوف انت لما السبحه تبقى على التليفون شوف توفر مساحه قد ايه وطول الوقت هتبقى في ايديك ومش ممكن تنساها وبرضه التكنولوجيا مطلوبه علشان ساعات الواحد بيتلخبط. فسبحه الاي فون تخلي حساب الثواب يبقى بالظبط بدل ما تغلط وبدل ما تتحسبلك تتحسب عليك وانت مش عارف.

الحلو بقه ايه اني لاقيت ان المسيحيين طلعوا سابقين المسلمين بمراحل لان الموضوع قديم عندهم وفيه اجهزة بقه كامله مش مجرد برنامج يتحمل على الاي فون

نفس الموقع اللي بيبيع برنامج المسبحه - بتاع المسلمين

بيبيع برنامج الورديه المقدسه - او السبحه للمسيحيين

وشعار المنتج للاتنين بما معناه : اجعل اوقات الانتظار ...اوقات ذكر لله واستغفار

لا تعايرني ولا اعايرك ...ما الهم طايلني وطايلك

MishMish

من المقرر

2011-05-26T00:13:00.002+02:00

بدأ الامتحان ..الطلبه يجلسون فى اماكنهم بعد ان القى كل منهم نظرة سريعه فى ملزمه ليله الامتحان ..بمجرد توزيع ورق الاسئله الا وبدأت الهمهمات والنظرات بين الطلبه ..محاولات للغش بالاشارات ..هكذا من أول سؤال ..لخص يابنى ..هات من الاخر ....التوقعات المرئيه ..كل مايهم الطلبه هو الاجابه النموذجيه الموجوده فى المقرر ..حتى انى اثناء الحصص حينما اتناول موضوع معين كثقافه عامه ..يبدأ الطلبه فى الهمهمه الى ان يتجرأ احدهم ويقول : يعنى يامستر ده عندنا فى المنهج ..يعنى م الاخر هاييجى فى الامتحان ؟ ..ارد عليه : يابنى دى معلومات عامه ليك انت ...ينظر لى نظرة ذات مغزى عميق (ياعم فكك بقى )...واتذكر انى حينما كنت طالبا فى الجامعه كنا نكره الاستاذ الذى يقول لنا اننا يجب ان نبحث فى مراجع كذا وكذا ..المهم فين المنهج ..شاورلى على المنهج وانا احبك ..وكنا دائما نبحث عن الطالب المجتهد(من وجهه نظرنا ) الذى يلبد فى المحاضرات لكى يقول لنا ان من صفحه كذا الى كذا ملغى كنا نفرح بمقدار عدد الصفحات الملغيه ..كنا نكره المواد التى ليس لها مقرر مثل ماده الترجمه فنقع فى حيص بيص وتكثر الاقاويل والشائعات بين الطلبه ..ومن المضحكات مثلا ان هناك طالب فتك جمع كام ورقه بها كلمات متعدده ويقول ان الامتحان لن يخرج من هذه الملزمه .. ويسير الجميع وراءه ويشربوا المقلب ..كيف لامتحان ترجمه ان يكون له منهج ؟؟ ..كنا فى الجامعه دائما مانبحث عن راى الدكتور وماذكره فى الكتاب وليس المهم راينا ..الدكتور بيقول ايييه ؟ ..المهم ننجح .مع ان هذا ليس نجاحا بل فشلا ..هذه الثقافه ليست موجوده فى التعليم فقط بل متأصله لدينا كمصريين فى كل مناحى الحياه .. ..فنحن شعب يخاف من الحريه ويخاف من المسئوليه ودائما مانبحث عن اخر ليتحملها بدلا منه ..انه شعب لم يتجاوز الفطام النفسي بعد ..وهذا ما وضح بعد ثورة يناير ..فالشعب لم يكن مصدقا انه بدون مقرر او منهج .لذلك حدثت البلبله والشائعات والفوضي ..مثلما حدث فى امتحان الترجمه بالظبط ..فتجد اراء كثيرة مختلفه وتجد من يبيع ملخصات ومن يفتى ..الكل فى حاله تخبط وعدم اتزان فى غياب المقرر ..ومن الوقائع التاريخيه المعروفه واقعه تولى محمد على الحكم ..فالمصريين حاربوا اربع قوى كبرى : الانجليز والفرنسيين والمماليك والعثمانيين وهى معجزة بكل المقاييس ان تصد كل هؤلاء ..لكن المفاجأة الكبرى ان السادة الافاضل من الثوار والمناضلين ..خافوا من عدم وجود مقرر ..فحدثت نفس بلبله امتحان الترجمه بتاعه الواد الفتك اياه ..وقرر هؤلاء الزعماء ان يجعلوا محمد على القائد الالبانى هو من يضع المقرر ويتولى الحكم ..لذلك رد لهم الجميل وحذفهم من المناهج (مع كل الاحترام لكل مافعله محمد على من نهضه مصر الحديثه ) ...انظر حولك فى الشارع المصري ..كم الفتاوى الرهيبه التى تصدر يوميا ..وكم طلب الفتاوى فى مواضيع بديهيه وسهله ولا تحتاج الى مقرر اصلا ..ارجع الى عظه يوم الاربعاء للبابا شنوده وكم الاسئله الغبيه التى يسألها الناس ..كم الاسئله التى يسألها الناس فى رمضان للشيوخ .كلنا نبحث عن شخص يفكر لنا ...كلنا نبحث عن المحذوف والموجود فى المنهج ..مع ان المنهج واضح وبين ..الحلال بين والحرام بين فنحن نخاف من المسئوليه..اننا نسير بطريقه اربط الحمار مطرح مايعوز صاحبه ..لكن العلاقه بين الانسان وبين الله اسمي بكثير مما نتصوره ..فتجد مثلا ان انسان يهتم بالصلاه لكنه لا يهتم مثلا ان يعامل الناس جيدا ..هو يريد ان يجيب على الاسئله التى تمنحه درجه النجاح فقط ..الاسئله الاجباريه ..بينما الاسئله الاختياريه تجعله يقع فى ورطه ..معظمنا ينتظر الفرصه لكى يتوب فى اخر لحظه ..يعتمد على مراجعه ليله الامتحان ..بينما ينسي ان هناك تقويم شامل واعمال سنه قد تجعله يرسب ...وفى حياتنا الاجتماعيه تجد مفهوم المقرر ايضا موجود ..فيوم الخميس مثلا هو يوم تأديه الواجبات الزوجيه ..لماذا يوم الخميس فقط ؟ احسن نسقط ياعم ..اصبحنا نختزل العلاقات الانسانيه فى المقرر ..وكثيرا ماتسمع كلمه انا رايح لفلان عشان والده اتوفى ..هاروح اعمل الواجب ..فنذهب لمجرد الواجب وحتى لا يصبح شكلنا بايخ او وحش ..لكن لا نذهب الى المناسبات الاجتماعيه بدافع المشاركه الانسانيه ..ومع اولادنا نضع لهم مقررا ومنهج يسيرون عليه حتى لو كان فى اعتقادنا انه خاطئ ..المهم يسمع الكلام ويعمل اللى قلتله عليه ..تدخل كليه فنون جميله ياغبى ؟ انا شايف ان كليه الهندسه احسن لك ..لو ماسمعتش كلامى لا انت ابنى ولا انا اعرفك ..وانتى يابنت لو ماتجوزتيش العريس ده هاتندمى ده عريس لقطه ..مابحبوش يابابا ...حب ايه وكلام فارغ ايه ..فيصبح الولد مهندس فاشل ..وتعيش البنت فى سجن مع عريسها اللقطه ..لان الاب وضع لها المقرر بنفسه ولم يسمح لها بجزء من الحريه ..وعلى رأى سعيد صالح : شوف المقررات هناك سهله ازاى ؟

الله منحنا حريه كبيرة ونحن من يرفضها

حل ازمة ماسبيرو في دفع الجزية

2011-05-16T15:04:00.001+02:00

اه بجد .... هو ده الحل .... ماحنا علشان نعرف نحل مشكله لازم نسمي الاشياء بأسمائها الصحيحة.

اولاً: العالم كله يعرف إننا في مصر بندفع تمن حقنا الطبيعي في الوجود وحرية العقيدة. علشان الاسطوانة المشروخة بتاعة أننا قاعدين هنا علشان سماحة الاغلبيه واللي لولا كرمهم العظيم مكنش بقى ولا واحد مسيحي في مصر. المسحيين المصريين بيدفعوا الجزية من يوم دخول الاسلام مصر إلى عام 1855م في عهد محمد علي

ثانياً: "في مقابل دراهم معدودة يدفعها الرجال القادرون على القتال من اهل الذمة فإنهم ينعمون بالعيش الآمن والحماية المطلقه لهم من قبل المسلمين علاوة على امنهم على كنائسهم ودينهم" . واهو بدل ما كل واحد وواحدة مش مظبوطين يتعمل علشانهم حرب اهليه. ندفع تمن حمايه الكنايس وتكون ساعتها الحكومة ملزمة انها تقبض على الجناه -علشان ديه ناس تخاف متختشيش - مش كل مرة تنتهي بصلح او بمختل عقلياً او بماس كهربائي ودلوقتي زاد عليهم الثورة المضادة والفلول والايدي الخارجيه

ثالثاً: إننا نبقى قدام العالم كله ليس لنا ناقه ولا جمل في اللي رايحين على القدس شهداء بالملايين - او اي حته تانيه لاني سمعت كلام عن تحرير الاندلس من الصلبيين. لان الدولة الاسلامية لها حدود وثغرات وتحتاج الى مقاتلين يدافعون عنها ويحافظوا على حدودها ويؤمنون أهلها والذي يقوم بهذا الدور انما هم المسلمون لانهم مؤمنون بمبدأ دولتهم ويعلمون ان الجهاد فرض عليهم ... وليس ثمه شيء من هذا لدى اهل الكتاب. يعني تبقى قاعد في بلدك بأمان الله فتتحول بقدرة قادر لدولة اسلامية وتتحول انت من مواطن الى ممول للحروب المقدسه .... وده كان واضح يوم الجمعه اللي فاتت بدل ما المصريين يتلموا علشان يعملوا جمعه وحدة وطنيه ويحلوا مشاكل بلدهم .... طلعوا باعلام فلسطين والسعودية ورايحيين يحرروا فلسطين مشي

رابعاً: لتبرير موقف الجيش والحكومة المتخاذل امام الاعتداءات المتكررة على الاقباط - بسبب ديانتهم وليس لأي سبب اخر - فكانوا كلهم في قنا نعام ولكن في ماسبيرو اسود

إن كان لديك فؤائد اخرى لدفع الجزية فارجو ذكرها حتى يتم تجميعها وتقديمها للمجلس العسكري. والله الموفق والمستعان

MishMish

عاوز اختى كاميليا

2011-05-10T07:29:00.002+02:00

ولما قفشت الحرامى داخل سيارتى بيفك الكاسيت ..قلتله بتعمل ايه جوة .راح مزعق بصوت عالى ومسك فيا ...وقالى عاوز اختى كاميليا..رجعت الى منزلى بعد ان راضيت الحرامى بقرشين وتركته ياخذ الكاسيت ومفاتيح السيارة عشان ياخد لفتين بيها مع المزة بتاعته ويطلع بيها على المقطم .....فى الطريق حاولت ان اشترى اتنين كيلو طماطم ..ولما وجدت ان سعرالكيلو مبالغ فيه سألت المعلم هى الطماطم سعرها غالى كده ليه ..برق وزعق فيا وقالى عاااااوز اختى كاميلياااااااا....اصابنى صوته بانفصام فى الشخصيه ..وطلعت اجرى عالبيت طوالى ..عملت كوبايه شاى عشان اروق دماغى من الصداع الى اصابها ..وفتحت الجريده كان فى الصفحه الاولى بعض العناوين : ورفض حسنى مبارك الخروج من مستشفى شرم الشيخ والذهاب الى سجن طرة ..لانه كان بيدور على كاميليا جوة المستشفى

اثناء محاكمه العادلى ..اعترف فى التحقيقات انه الذى امر بقتل المتظاهرين وليس حسنى مبارك ...ولما سأله القاضي ..لماذا قتلتهم ..رد بصوت عالى : عاااوز اختى كاميليا...وفتحى سرور كان يفصل القوانين .وفى مجلس الشعب كان يسأل الاعضاء
الموافق على قانون البحث عن كاميليا..يتفضل برفع يده ...موافقه......هشام طلعت: قتلت سوزان تميم لانها كانت مخبيه اختى كاميليا

جمال مبارك : نعم كان هناك توريث ..لكن ليس لمصلحتى ..ولكن لمصلحه كاميليا ...بينما غير صفوت الشريف عنوان مؤتمر الحزب الوطنى الى : من اجلك انتى ..با كاميليا ..ومن جهه اخرى صرح الراجل ابو جلابيه انه لم ينزل استاد القاهرة ليبوس عبد الواحد السيد من بقه فقط ...بل بحثا عن كاميليا ..اما سائقى الميكروباص فقد رفعوا الاجرة مع نفسهم ..وكان مبررهم انهم سيستفيدون بفارق الاجرة من اجل جمع مبلغ كبير يساهمون به فى البحث عن كاميليا ...توته توته خلصت الحدوته ...قالوا للحرامى احلف ...قال : جالك كاميليا
ميجووووووووو

في رثاء المجحوم - امير الارهابيين

2011-05-04T12:36:00.002+02:00

طبعاً في حياتي ما كنت متخيله اني هاكتب بوست عن زعيم الارهابيين اسامة بن لادن

انما اللي خلاني اعمل كدة ردود افعال غريبه من ناس عميت عينها بالحقد والكراهيه والجهل

واحد زي ياسر برهامي

الحمد لله، والصلاة والسلام على رسول الله، أما بعد؛

فالعالم كله يهنئ "أوباما والأمريكان".. أما أنا فأهنئ أسامة -إن صح الخبر-.. فقد نلتَ ما أردتَ. ما خرجتَ مِن قصورك وأموالك إلى شعف الجبال وأعماق الكهوف إلا لهذا المصير.. وهنيئًا للمجاهدين.. أن صاحبكم قتل "مرفوع الرأس لم يسلمه الله لأعدائه"؛ مات عزيزًا في زمن الدوران في فلك الأمريكان. أسأل الله أن يتقبله في الشهداء.

وبقيه الافكار المسمومة موجودة عاللينك ده: http://www.anasalafy.com/play.php?catsmktba=25906

غريب قوي منطق الناس ديه ... عم ياسر بيقول لم يسلمه الله لاعدائه ...امال اتقتل ازاي يا عم ... ناس تانيه تقول رحم الله قائدا عظيما شهيدا من المسلمين ...إزاي يعني مش فاهمه .... واللي يقول الله يرحمه كان راعب امريكيا واسرائيل ...هو ده حصل امتى؟

في حين ان نفس الناس ديه لا تطلق لقب شهيد على مات في ثورات التحرير ليه بقه:

الذي يظهر - والله أعلم - أنه لايصح ولا يجوز إطلاق وصف ( شهيد ) على من مات في المظاهرات والاعتصامات , لما يلي :

أولا : أن الشهادة الحقيقية هي الموت في معركة بين الكفار والمسلمين , بينما القاتل والمقتول في المظاهرات والاعتصامات مسلمان .

ثانيا : حتى من مات على أيدي الكفار لا تكتب له الشهادة إلا إذا كان هدفه إعلاء كلمة الله تعالى , جاء في الحديث : ( قال أعرابي للنبي صلى الله عليه وسلم: الرجل يقاتل للمغنم، والرجل يقاتل ليذكر، ويقاتل ليرى مكانه، من في سبيل الله؟ فقال: من قاتل لتكون كلمة الله هي العليا فهو في سبيل الله) والمتظاهرون هدفهم الدنيا فقط وهم يعلنون ذلك بشكل واضح

ثالثا : أن خروج المتظاهرين من الاصل غير جائز لأنه :

إذا كان الحاكم مسلما ولكن حصل منه ظلم فلا يجوز الخروج عليه أصلا .

إن كان كافرا كفرا واضحا فلا يجوز الخروج عليه إلا بشرطين: 1- القدرة على إزالته بأقل الخسائر في الأرواح والأموال. 2- أن يكون البديل المسلم جاهزا لتولي الحكم .

والمتظاهرون يخرجون وهم لا يدرون لمن تكون الغلبة , وليس لديهم بديل جاهز !!! بل إن بعضهم لا مانع عنده من أن يتولى الحكم كافر ما دام سيعطيه من الدنيا ما يريد !

رابعا : أن الشهادة الحكمية التي حكم بها النبي صلى الله عليه وسلم لبعض الأصناف كالغريق والحرق والمبطون .... ليس منها من مات متظاهرا أو معتصما !

خامسا : أن المتظاهرين والمعتصمين يتسببون في أحيان كثيرة بإيذاء للناس وتعطيل مصالحهم بل والتخريب !!! , فكيف يكون مثل هؤلاء شهداء !

سادسا : أن كثيرا من المتظاهرين والمعتصمين تجد عندهم مظاهر البعد عن الدين ومن ذلك التهاون بالصلاة !!!

http://www.alsahanet.com/showthread.php?t=6723

اما ده قائد عظيم؟؟؟؟؟؟؟؟؟؟؟

امال ده يبقى ايه؟

MishMish

الذبح الحلال وقنا و جماعه الاخوان

2011-04-28T22:52:00.000+02:00

في حلقه من حلقات اوبرا عرضت شركة كارجيل - اكبر مصانع اللحوم في امريكيا والعالم - الطريقه المتبعه في الذبح: وهي تبدأ بإطلاق طلقه سهميه تدمر مركز الاحساس لدي الحيوان لكي لا يشعر بألالام الذبح

افتكرت ساعتها اللي ما بيفكروش في حاجة غير في اتمام الذبح بطريقه حلال ام لا

لا اعرف ما هو الاسواء في موضوع قنا: الاختيار الخاطيء للمحافظ ام ضياع هيبه الدولة ام رفض المحافظ بسبب ديانته ام التعليقات التي كانت تنشر على هذا الخبر ومن ضمنها: يجب على الحكومة احترام القناويه فإن كان يجب تعيين محافظ قبطي فليتم تعيينه في اي محافظة اخرى - وكأنهم عملوا اللي عليهم مش معقوله هيفضلوا الهفيه بتاعه البلد

تصريحات الاخوان بخصوص الدولة الدينيه ... قال المهندس سعد الحسيني: إن لجنه التخطيط بالجماعه من اقوى مؤسسات الاخوان ويأتي التخطيط من التكليف الرباني (واعدوا) واللجنه تسير على خطة بدأها سيدنا محمد

ثم بعدها بايام جاء تعليق صبحي صالح: لا اعتقد ان اي شخص مسلم يعترض على تطبيق القرآن والحدود شرع الله عز وجل بنص القرآن واي مسلم مش عاجبه كلام ربنا فمشكلته هو

نفهم من الكلام ده ايه : ان لجنه التخطيط منها لربنا على طول .ونص التكليف الكامل هو: وَأَعِدُّواْ لَهُم مَّا اسْتَطَعْتُم مِّن قُوَّةٍ وَمِن رِّبَاطِ الْخَيْلِ تُرْهِبُونَ بِهِ عَدْوَّ اللّهِ وَعَدُوَّكُمْ

وان اللي بيعترض على اراء الجماعه يبقى مش عاجبه كلام ربنا ومش بعيد يتحاكم بتهمه إزدراء الاديان

MishMish

رؤيه نقديه فى قصيده البوس البوس ..الحضن الحضن

2011-04-09T00:54:00.002+02:00

نبذه عن الشاعر

ولد اللمبى فى ظروف غامضه فى احد الاحياء العشوائيه فى مصر ..اللمبى هو نموذج للمواطن المصرى الصميم بكل مميزاته وعيوبه ..حاول اللمبى الوصول الى محبوبته نوسه لكن الظروف تكاتفت عليه من فقر وجهل بالاضافه الى الانتهازيين مثل والدها عم تمام ومدرس الرياضيات الثرى ويحاصره نعيم بالديون ممايهدده بفقدان منزله ..حاول اللمبى بشتى الطرق ان يخرج من الظروف الطاحنه لكنه لم ينجح الى ان وجد الحل السحرى ..الكراسه الصفراء ..اكتشف اللمبى انه لم يكن مدينا لاحد ..بل دائنا للكل ..وفى احدى اللحظات النادرة كتب اللمبى عصيده (مستوحاه من جاره الذى يغازل حبيبته ايضا) الى محبوبته نوسه تجلت فيها اروع معانى الحب ..انه يلخص مشكلته وحلها كأنه نوستراداموس العصر الحديث .

مواطن الجمال

البوس البوس :هناك توكيد فى هذا الشطر فقد كرر الكلمه مرتين فهو يؤكد على اهميه البوس فى حياة الانسان ..البوس الحقيقى وليس من نوعيه البوس الذى نراه فى مؤتمرات الوحده الوطنيه ..هو يقصد البوس النابع من القلب ..ان اللمبى ينبه محبوبته ان البوسه ملكه هو فقط فهو الحبيب الحقيقى وليس مدرس الرياضيات الثرى

الحضن الحضن : انها دعوة للتلاحم فالحضن هو قمه التعبير عنه قوة اللمبى دائما تاتى من الحضن الحقيقى انه الشعور بالاخر

مشتاق مشتاق :اللمبى مشتاق الى الحريه والى قهر الظروف ويتطلع الى محبوبته بشده ..انه قد يفعل اى شيئ فى سبيلها

بلوبيف بلوبيف :انه يقرر ماذا سيحدث اذا لم يصل اى محبوبته نوسه ..سيفعل اى شيئ حتى ولو تحول الامر الى بلوبيف

ول يا ول :انها مرحله الانفراجه مرحله الفرح والسعاده بما حققه اللمبى من انجازات وانتصارات على عم تمام وغريمه مدرس الرياضيات وايضا نعيم الانتهازى ..وقد استخدم تعبير ول يا ول هنا الذى ليس له اى وجود فى معجم لغوى غير معجمه فقط ..انها حاله لمباويه حقيقيه

من طرف اخوكى اللمبى : تتجلى هنا مشاعر العشق والهيام بينه وبين محبوبته انه يختم عصيدته برساله خفيه الى نوسه :انا قد لا استطيع الوصول اليكى يوما ما بسبب الظروف ..لكنى احبك مهما حدث ..وقد عبر عن هذا الحب العذرى باستخدام كلمه اخوكى ..كانه يقول حتى لو لم تكونى لى فانى ساحافظ عليكى مهما كان وكانى اخوكى بالظبط ..انه الحب الخالى من اى غرض

فى النهايه ..هذه المرة يسترق جاره السمع ويقول لمحبوبته نفس عصيده اللمبى مع انه كان ملهمه فى البدايه..ومن العجيب ان بعض الاصوات تلوم اللمبى على صحوته المفاجأه ..انهم يريدونه ان يحصل على حريته بدون بلوبيف بلوبيف ..مجانا ...مما جعل اللمبى يصرخ قائلا : ولعى فى نفسك يانوسه عشان عم تمام ينبسط ..هذا مايطلبه المنافقون الذين يعتبرون عمتمام (بابا تمام ) لا يهمهم ان كانت نوسه تحترق ام لا المهم عم تمام ينبسط

توييته

2011-03-28T13:50:00.005+02:00

من وحي الترقيعات الدستوريه - المادة 75 الخاصه بإختيار الرئيس

دائماً ما يُتهم المهاجرين المصريين بأنهم عملاء وخونه ويستقوون بالخارج مع انهم اكثر الناس عشقاً لمصر

لانهم عرفوا قيمتها عند البعد عنها

كما انهم في مجملهم لا يقلون ان لم يتفوقوا على المصريين المقييمن في مصر ثقافةً وعلماً وتنويراً

لكن للاسف النظام لا يتحمس لأفكارهم ... بل يتحمس لافكار القادمين من الخليج فقط

القادمون اللذين ... أُخذ منهم العلم والحلم والفيلم .... ورجعوا بالزبيبه

ميجوووووووووووووووو

استفتاء مصر

2011-03-17T14:23:00.004+02:00

مزق دفاترك القديمه كلها ... واكتب لمصر اليوم شعراَ مثلها

لا صمت بعد اليوم يفرض خوفه ... فأكتب سلام النيل مصر واهلها
احفظ بلادنا يا رب

MishMish

لا للتعديلات الدستوريه ... علشان كدة

2011-03-14T12:59:00.003+02:00

علشان ما نقعدش نزيد ونعيد في النصوص المقترحه في التعديل

التعديلات اهيه للي عايز يقراها

هما 8 مواد اتعدلوا وحذفوا المادة 179 اللي بتيح للحكومة انها تنتهك حريتك الشخصيه إذا شكوا لاقدر الله انك خطر على الامن العام

المواد بالترتيب هي

المادة 75: اللي معناها ان الرئيس الجديد لازم يكون مصري هو وابوه وامه ومراته ومايكنش حد منهم قد حمل جنسيه اجنبيه

الاعتراض هنا: زي مانتوا عارفين ان مصر كانت طاردة لكل الكفاءات منذ ثورة العسكر 52 وطبعاً اخر 30 سنه كانوا خراب تام وكامل في البلد فبقى اللي قاعد في مصر قاعدة لواحد من تلاته ياما مابيفهمش وعاجبه الحال ومبسوط بيه ياما علشان متنيل على عينه وبيحبها وعنده ظروف تمنعه من انه يهاجر ياما مستني جواب الهجرة او اي عقد عمل في اي مصيبه بره الحدود

المادة ماطلبش حد معين من التعليم او المعرفه او العمل الميداني

يعني بمنتهى البساطة المادة ديه بتقفل على دكتور احمد زويل باب الترشيح وتفتحه قدام واحد زي عصام العريان او عبود الزمر

المادة 76: بتقول ينتخب الرئيس عن طريق الاقتراع المباشر ويلزم ان يكون حاصلاً على ما لا يقل عن 30000 صوت موزعه على 15 محافظة إذا كان مستقل ويجب مراعاه عدم تكرار الاصوات - يعني لو في اتنين مستقلين ما ينفعش ادي صوتي للاتنين هو واحد بس ولو غيرت رأيي في النص يبقى الصوت راح عليا

اما اذا كان ليه كرسي في مجلس الشعب او الشورى فيمكنه الترشيح.

وغير كدة كمان قرارات اللجنه المنظمه نهائيه لا يجوز الطعن فيها - يعني لو شكينا في نتايج الانتخابات مش حقنا رفع قضيه

الاعتراض هنا: اولاً عدم المساواه بين اعضاء المجالس والمستقلين

ثانياً ان القوانين المنظمة للاحزاب لسه ماتنظمتش وان الاحزاب الوحيده اللي ممكن تخش انتخابات دلوقتي هي بقايا الحزب الوطني والاخواااان وسواء دول ولا دول فهم حريفة انتخابات. وخصوصاً ان بقايا الوطني والاخوان والسلفيين طالبوا كلهم بالتصويت بنعم للتعديلات الدستوريه !!! وده في حد ذاته يخوف

الوطني يدعو اعضاؤه للتصويت بـ "نعم" على التعديلات الدستوريه

الاخوان سنبذل جهودنا لتكون نتيجه الاستفتاء على التعديلات الدستوريه نعم

السلفيين بيدعوا بالتصويت بنعم برضه

المادة 77: بتقول مدة الرئاسه 4 سنين تجدد مرة واحده - وديه معندناش مانع عليها

المادة 93: تختص المحكمة الدستوريه العليا- يعني لا يمكن نقض حكمها - بالفصل في صحه عضويات مجلس الشعب وتعتبر العضوية باطله من تاريخ ابلاغ المجلس - وده حلو برضه علشان ما يطلعش علينا واحد ويقول المجلس سيد قراراة

المادة 139: يعين رئيس الجمهوريه في خلال 60 يوم من توليه الحكم نائب للرئيس تنطبق عليه نفس صفات الترشيح للرئاسه

نفس الحدوته مش مهم هو دارس ايه او عمل ايه المهم انه يكون مصري هو واللي خلفوه وغير كدة ده بقه هايتعين يعني ممكن الرئيس الجديد يجب اخوه ...ابنه ..جوز خالته ... محمد حسان ...او اي حد من الحلوين اللي ماليين التليفزيون المصري دلوقتي

المادة 148: يعلن رئيس الجمهوريه حاله الطوارئ وتعرض على المجلس في خلال 7 ايام ... وفي كل الاحوال لا تزيد عن 6 اشهر ولا يجوز تمديدها الا باستفتاء عام

وطبعاً لو وافقنا على السرعه في الانتخابات هيجي رئيس مايختلفش كتير عن اللي قبله يخطط حادث ارهابي او طائفي ويعمل شويه اصلاحات ومن ضمنها تمديد الطوارئ زي ما عمل الرئيس المخلوع وعلشان نصوت لازم نصوت عالحزمة كلها بما فيها تمديد الطوارئ لغايه لما تفرج

المادة 189 فقرة مضافه - وديه اللي عثل عثل عثل: بتقول بقه لكل من رئيس الجمهوريه بعد موافقه مجلس الوزراء ولنصف اعضاء مجلسي الشعب والشورى طلب إصدار دستور جديد

وتتولى جمعيه من 100 عضو ينتخبهم اغلبيه اعضا مجلس الشعب من غير المعينين اعداد الدستور في مدة 6 اشهر ويعرض على الرئيس ثم للاستفتاء العام

المشكله هنا فين بقه

اولاً قانوناً مجلس الشعب لازم يحتوى على 50% عمال وفلاحين (يعين جهله او انصاف متعلمين) وديه مش لعيب فيهم لا ده لعيب من النظام حتى بعد هوجه العسكر بتاعه 52 لما خلت التعليم مجاني فضل عندنا برضه 50% من المصريين غير متعلمين

ثانياً زي ما اتفقنا ان اللي مستعد لدخول المجلس هما بقايا الوطني والاخوان وشويه ناس تانيه اللي هايلحقوا ينظموا نفسهم قبل انتخابات المجلس

يعني ببساطة اللجنه اللي هتعمل دستور مصر واللي هاتخرجها بيه من المستنقع ده للعالميه هتكون منتخبه من مجموعه نصها من الجهله وانصاف المتعلمين والاخوان والسلفيين ونسبه قليله من الناس اللي فعلاً بتمثل التيارات السياسيه الجديدة بعد الثورة

امبارح في اون تي في واحد من اللجنه اللي عملت التعديلات ديه قال لو كانت اغلبيه الاصوات بالرفض يبقى هنعمل دستور جديد

الناس اللي بتقول احنا عايزين استقرار ... احنا معاهم بس دي بلد وبلد حلوة كمان وكل واحد فيها طمعان في حته

مش كل 30 سنه هانعمل ثورة

اللي حصل ده عظيم بكل المقاييس بلاش نضيعه

وبعدين احنا متضايقين من ايه ؟ من البلطجه؟ هما مش قالوا ان البلد كانت داخله على ثورة جياع

متضايقين من اللخبطه اللي احنا فيها؟ طيب ما هو ده كان متوقع لان السنه ديه نهايه حكم الرئيس المخلوع يا كان هيرشح نفسه تاني ياما ابنه كان هايترشح وفي الحالتين مكنش حد هايوافق والعادلي كان لازم هايتصرف

زعلانين على وقف السياحه ما السياحه كانت بتقف لما العادلي كان بيدبر تفجيرات ارهابيه علشان خاطر جمال مبارك ما يزعلش

زعلانين ان مفيش فلوس طب استنوا لما فضيحه تصدير الغاز تكمل وتبان معالم اللغوصه اللي كانت فيها

حد يصدق ان بلد فيها 1/4 اثار العالم وعندها بدل الساحل اتنين وفيها بترول وغاز ومعادن ودهب ونهر النيل وشمس وهوا وقمر وناس زي الفل يبقى اكتر من 40% من سكانها يعيشون تحت خط الفقر

انا هاروح واقول لا

علشان احنا نستحق اكتر من كدة ومصر تستحق اكتر من كدة

if we have nothing we have nothing to lose

ان شالله هتبقى احسن

MishMish

أرجوك لا تتحسس انفي

2011-03-11T22:10:00.006+02:00

يتجمعون حولي في دائرة انا مركزها ...يخافون ان يقتربوا الي .... هل انا كائن من المريخ ...هل هناك ما يلفت النظر إلي ...هل ملامحي ليست اداميه ... ينظرون الى بدهشه...منهم من يلمس ملابسي ومنهم من يتحسس انفي ووجهي ....ومنهم من يخاف ان يقترب مني كي لا تصيبه عدوى او تسرب اشعاعي ... فربما وصلته معلومة اننا في كوكب المريخ لا نستحم ... يفعلون بي هذا مع انهم يمنحوني لقب ابن البلد ...وبالرغم من اننا نقتسم سندوتشات الفول والطعميه وعلب الكشري ونتقاسم النكات اللاذعه ونتجرع همومنا حين نتبادل الجرائد اليومية ... نتجادل في مباريات الاهلي والزمالك ...لم اعرف السبب بعد

في الصباح نتبادل التحيه ... اقول السلام عليكم ... يرد على البعض صباح النور ... والبعض الاخر وعليكم السلام وهناك من لا يرد اصلاً ... السلام لله ... السلام بتاع ربنا ... في منتصف النهار وفي وقت الراحه تبدأ الدائرة المريخيه ... يبدأ الجميع في نصب الدائرة من حولي ... يبدأون في تحسس انفي ووجهي وملابسي ... يتشجع احدهم ويسألني ... انتوا بتصلوا زينا؟ ... طب هو انتا بتصلوا لمين؟ ... طب وهو الشيطان يحاربكم ليه؟ ... يتشجع الاخرون ويسألون انتو طبعاً عندكو الخمرة حلال ... صحيح! هو انتوا يوم رأس السنه بتطفوا النور وتعملوا حاجات وحشه؟ ... طبعاً القسيس بيبارك عروستك في ليله الزواج ويدخل معاها اوضه لوحدهم قبل الفرح ...تتوالى الاسئله من حولي في الدائرة المريخيه ... هناك من يسأل بحب استطلاع وهناك من يسأل بتهكم دفين ... وهناك من يسأل على أساس ان سؤاله حقيقه مؤكدة ... بينما كنت ارد على البعض ... واصمت في بعض الاحيان ... لان الصمت افضل من الرد على سؤال لا يستحق مجرد الرد عليه

أذهب الى منزلي ... اتناول غدائي ... اشاهد التليفزيون ... الفيلم بطله مسيحي يتكلم بخنف على طريقه كوهين ... بناته عوانس وابنه معقد نفسياً ...بينما زوجته تكره نفسها ... وجارهم اهبل ومتطفل ... جميع الشخصيات ترسم الصليب كل ثانيه ... وتقول فلنشكر الرب ... القسيس يظهر بشكله المعهود ليتكلم باللغه العربيه الفصحى ويقرص اذن الشاب ويقول له: هاااااااااااااا هاتتجوز بولين ولا لا؟ في العزاء يقف نفس القسيس ليعظ باللغه الفصحى ... ويظهر رجل مرتدياً بذله قديمة الطراز ليحكي عن تاريخ المرحوم ... بعض الشخصيات الاخرى متقوقعه او انتهازيه وصدرها محروق من الزيت الذي اكلوه في الصيام ... نفس الدائرة المريخيه تحاصرني ...انهم يتحسسون انفي ووجهي وجلدي

عزيزي ساكن كوكب الارض ... اقسم لك اني لست مريخياً ... انا اعيش معك منذ قديم الازل على هذه الارض ... لكنك تصر على اني كائن مريخياً ... انا لي نفس ملامحك ونفس لونك ... نتقاسم الشمس فوق رؤوسنا ... اشرب من نفس المياه ... اتنفس ايضاً ... احب واكره وانفعل ... عاداتي هي نفس عاداتك ... اخلاقي نفس اخلاقك ... تاريخي هو تاريخك ... لماذا لا تعرفني؟ ... اقسم لك انك لم اتزوج بولين كما اجبرني القسيس ... واقول الحمدلله ولم اقل ابداً فلنشكر الرب ... صدقني انا استحم ونظيف ... ولدي نخوه على عروستي كسائر الارضيين ... هناك على المريخ لا نطفيء النور ونفعل الفاحشه ... فإله المريخ هو إلهك ... هو الله

عزيزي الارضي ... الم تراني من قبل اشتري علبه حلوى المولد؟ الم تراني على المقهي ليله عيد الاضحى او عيد الفطر؟ ... لم أكن اجلس جانبك في المدرسه ومدرج الجامعه وفي مدرجات الاستاذ لتشجيع مصر سوياً؟ ... هل نسيت اخر مرة كنا فيها في الاسكندريه نحكي همومنا للبحر؟ ... عزيزي الارضي ... لماذا تضعني في الدائرة المريخيه ... ارجوك لا تتحسس انفي مرة اخرى

ميجووووووووووووووووووووووو

هو احنا فراخ يا جدعان؟

2011-02-28T13:36:00.005+02:00

المادة 75 والخاصه بصفات رئيس الجمهوريه: يشترط فيمن ينتخب لرئاسه الجمهوريه ان يكون مصرياً من ابوين مصريين، وان يكون متمتعاً بحقوقه المدنيه والسياسيه والا يكون قد حصل او اي من والديه على جنسيه دولة اخرى، والا يكون متزوجاً من غير مصريه والايقل سنه عن اربعين سنه ميلاديه. لغايه هنا واللجنه ابدعت في فن التفصيل والخياطة

مش عارفه ليه اللف والدوران ما كانوا يكتبوا اسمه بالمرة ويبقى الاستفتاء على التعديلات الدستوريه وانتخابات الرئاسه مع بعضها قطعيه واحدة ويسموها استخابات او انتخفاءت

بيقولك اللواء محمود وجدي وزير الداخليه القى تحيه السلام الوطني للواء حبيب العادلي في زنزانته

الله! هو مش في ثورة قامت والعادلي ده مش محبوس لانه مجرم وايده غرقانه بدم كل فئات وطوائف الشعب. ولا العالم ديه حافظة مش فاهمة

اهالي المظلات "يستغثون" من البلطجيه ومدير امن القاهرة يرد: حقوق الانسان والحريه التي تريدونها تمنع ملاحقتهم. مدير امن القاهرة فاكر ان احترام حقوق الانسان يعني يقعد على مكتب مستنى المجرمين ضميرهم ينقح عليهم ويجوا يسلموا نفسهم. هو مش هايجبر حد على حاجة

اخر حاجة بقه الانتخابات والاستفتاءات بالرقم القومي ... لا الاستفاءات بالرقم القومي والانتخابات التشريعيه بالبطاقه الانتخابيه ....لا بالرقم القومي ... لا بوصل النور ومقاس جذمة الناخب

ومما سبق ذكره تبين لنا جميعاً ان الحكومة سواء قامت الثورة او قعدت مازالت تتعامل معنا وكأننا فراخ معدومي الفهم والذاكرة. نفس السيناريوهات القديمه واخرها ضرب الجيش للمعتقلين وبعدين يقولك ده من عشمي

كاك كاك ثورة ثورة كاك الى الامام الى الامام - مع الاعتذار للأخ العبيط معمر القذافي

MishMish

استغاثه لمجلس قيادة الثورة - الاصلي

2011-02-20T21:47:00.002+02:00

يا جدعان والنبي اللي يعرفهم يقولهم

يا ايها الثوار ... احنا ماشين وراكم وحبنكم وعايزنكم تكملوا

مش عايزين اللي يحصل يبقى هوجه وتخلص

حد منكم يقولي ازاي سبتوا القرضاوي ينزل ببراشوت على الميدان. إزاي وائل غنيم يتمنع من الكلام في الميدان ومين اللي يمنعه البودي جاردات بتوع القرضاوي ايه كينونته ده علشان يبقاله بودي جاردات؟

ازاي تكون مطالب الثورة الافراج عن المساجين السياسين يقوم اليوم السابع ينشر النهاردة الافراج عن 10 من معتقلي الجهاد بالوادي الجديد من رافضي المراجعات - يعني ارهابيبن ويفتخروا

يعني ايه النهاردة اول حزب ينشأ بعد الثورة وياخد تصريح يكون حزب الوسط ذو المرجعيه الاسلامية

يعني ايه ظهور الاخوان المسلمين في كل القنوات وكأن الثورة بتاعه ابوهم

يعني ايه الاهرام تعمل يوم السبت استفتاء على المادة التانيه في الدستور وايه الحرب اللي قامت وماقعدتش ما بين المسيحين والمسلمين في التصويت

ليه دلوقتي ثار الحديث عن المادة التانيه في الدستور مع انها مش مطروحه للتعديل

ليه بيتم اظهار المظاهر الاسلاميه بفجاجة دلوقتي في حين ان العالم كله بينظر لمصر نظرة اعجاب - النيويورك تايمز سمت الثورة بالثورة الثقافيه في مصر

Egypt - The Cultural Revolution

لصالح مين يتم تغير اوجه الشباب المثقف بأوجه ملتحيه غاضبه

إزاي سايبين ثورة عظيمه زي ديه نهيبه لكل واحد يجي ينط عليها ويتكلم باسمها

سمعت عن مظاهرة ميلونيه يوم التلات هل لما ننزل المره دي هنلاقي ايمن الظواهري في ميدان التحرير؟

انتوا خاطرتوا وحطيتوا رقابيكو على كفوفكم ونزلتوا واحنا صدقناكو والعالم كله بيشجعكم اعلنوا عن نفسكم وامسكوا زمام الامور قبل ما المصريين يتفتتوا تاني. بقايا النظام القديم شغاله الله ينور وبتستخدم نفس الورقه اللي بتقش كل مرة والناس بقالها 30 سنه مفسيه دماغها والناس اللي ماسكه البلد هما هما نفس الوشوش

اي حد عنده اكتر من 45 سنه خطر على نفسه وعلى البلد لان مخه تبلد

فين دكتور احمد زويل مابدأش في تفعيل مبادرة نهضه التعليم ليه

حد يقولي عمر سليمان وزكريا عزمي بيشتغلوا ايه دلوقتي بالظبط

حاجة كمان من صفحه ميجو عالفيس بوك "إذا كان النائب العام يبقى ابن خالة وزير الداخليه الحالي محمود وجدي وزوجه احمد شفيق رئيس الوزرا تبقى عمة خديجه مرات جمال مبارك وابن الفريق احمد فاضل رئيس هيئه قناه السويس متجوز بنت عمر سليمان نائب رئيس الجمهوريه السابق ومرات حبيب العادلي وزير الداخليه السابق تبقى طليقه اشرف السعد حرامي الاموال المعروف وفي نفس الوقت تبقى بنت عمه سوزان مبارك السيدة الاولى سابقاً - زهير جرانه وزير السياحه السابق يبقى ابن خالة محمد منصور وزير النقل السابق والمغربي وزير الاسكان السابق واحمد عز امين التنظيم السابق... وابنته الزعيم عادل امام متجوزة حفيد المرشد العام" يبقي الموضوع كده فيه اشتغاله الحكومة بتشتغلنا ومش بعيد بعد شهر لو استمر الوضع على ما هو عليه تلاقي حسني مبارك رجع تاني وهو وبقيه العصابه ويطلعوا علينا في التليفزيون يقولوا الثورة اتصورت تحبوا نزيع

يا جدعان الموضوع كده هيفرط من فضلكم اعلموا حاجة

اعملوا على الاقل حزب او جهه واحده ليكم ناخد منها معلومات

يعني من كام يوم دخلت على صفحه وائل غنيم لاقيته عامل اعلان لصفحه البرادعي - انا مع كل اللي بيتقال لسه ورا ترشيحه رئيس جمهوريه - وبعدين النهاردة الاقي اعلان لترشيح عمرو موسى لرئاسه الجمهوريه وبرضه عليه صورة وائل غنيم

طيب هو وائل غنيم من قواد الثورة ولا المسأله مسأله حظ

طيب هنعمل ايه دلوقتي؟

تحيا مصر

MishMish

حتى لا تضيع الثورة

2011-02-15T23:03:00.004+02:00

اللي كنت خايفه منه حصل وبدأ المعممون واتباعهم من المغيبين في التحرك لتفتيت الوحدة والركوب على ثورة لم يكونوا مؤيدين لها من البدايه

هو هو اللي كان بيحصل ايام الرئيس السابق. اي حديث او محاولة جديه للتغير تنتهي قبل بدايتها على ايدي المعممين

لجنه تعديل الدستور الحاليه رئيسها له توجهات اسلامية واحد اعضائها عضو من جماعه الاخوان المسلمين يعني هما 6 اتنين منهم املهم في الحياه تحويل مصر الى افغانستان او سودان او غزة او صومال تانيه -احنا وحظنا

وسمعت عن مظاهرة الاخوان في شارع الهرم وهم يهتفون "اسلامية .. اسلامية" وجماعات الفيس بوك اللي مش بس بتدعو الى الحفاظ على المادة التانيه وتفعليها لكن ايضاً تغير نصها من (الشريعه الاسلاميه هي المصدر الاساسي للتشريع إلى الشريعه الاسلاميه هي المصدر الوحيد للتشريع) يعني اسقطنا نظام سياسي بوليسي علشان نلاقي نفسنا محكومين بنظام ديني متعصب

هي الناس لغايه دلوقتي لسه مش عارفه ان المادة التانيه عضمه رماها السادات - الراعي الرسمي للفتنه الطائفيه في مصر - سنه 1971 لتمرير المادة 77 من الدستور واللي كان الغرض منها ان يفضل في الحكم الى النفس الاخير

ونفس اللعبه لعبها النظام السابق في تعديلات الدستور في 2007 وانا زي العبيطة روحت وقلت نعم للتعديلات اللي كانت متفصله على مقاس الرئيس الابن جمال مبارك خوفاً من الاسلاميين

هي مش الثورة قامت علشان ما يبقاش في ظلم وتبقى مصر لكل المصريين

هي مش الثورة قامت علشان ما يبقاش في حد احسن من حد قدام القانون

هي مش الناس اللي نزلت كانت بتهتف تحيا مصر

يا ناس قبل ما تولع

لازم نعرف ان القمع هو القمع سواء باسم الوطن او الدين

الدولة البوليسيه يكون فيها المعترض عدواً للدولة وخائن - اللي هما كانوا في ميدان التحرير قبل سقوط النظام وبالتالي كان واجب الشرطة القضاء عليهم لانهم اعداء النظام

اما في الدولة الدينيه فالمعترض عدواً للدوله وخائن وكافر - برضه زي اللي كانوا في الميدان بس ساعتها هيبقى واجب الشرطة والشعب المؤمن القضاء عليهم لانهم اعداء الدين

بس نفسي اقول لكل واحد بيدور على حشر الدين في السياسه

تخيل نفسك اقليه مختلفه وسط اكثريه مؤمنه وليس لديها اي نيه للتفاهم

فكر في جميع البلاد اللي ليها انتماء ديني وشوف قدمت ايه للبشريه

فكر في حال بلادنا واللي حصل في الـ 18 يوم اللي فاتوا لما الناس نسيت اي انتماء ليها وافتكروا بس انهم مصريين

فكر في الاساءة لمعتقدك لما تبقى وسيله الحفاظ عليه هو فرضه بالقوة الجبريه على الجميع

فكر في مصر

تحيا مصر

MishMish

الاستقرار في رأي الحمار

2011-02-14T15:38:00.004+02:00

بعض الاشخاص الواقعيين او الفيس بوكيين يتحدثون عن المطالبين بالتغيير وكأنهم خونه واعداء للوطن.... الشيء الاكثر استفزازاً انهم يلبسون ثوب الحكمة والعقل والرزانه وهم اكثر جهلاً من اي شخص فتجدهم يتحدثون وكأنهم يعيشون في كوكب اخر ويتشدقون بكلمة الاستقرار

وكأننا لا نعيش معهم في نفس الظروف

اي استقرار يتحدثون عنه؟ ما هو مفهوم الاستقرار؟ هل الاستقرار هو العيش في نفس الظروف اطول فترة ممكنه؟

إذا اعتبرنا هذا هو مفهومهم فإننا بذلك نعتبر الصرصار مستقراً .... فهو يعيش في البلاعه مستقراً يرضى بالفضلات...... لكن عليه ان يتحمل ضرب إذا فكر في الخروج

ولنعتبر الحمار ايضاً مستقراً فهو ينال حصته اليوميه من البرسيم كما انه مستقر في طريقه اليومي من البيت للغيط ومن الغيط للبيت ... لكن عليه ايضاً ان يتحمل الضربات القاسيه من أولي الامر ويحمل ما على ظهره دون ادنى تذمر.... وعليه ان يتحمل لسعات السياط لو تجرأ واعترض على ثقل الحمولة .... عليه ان يتحمل سخريه وتهكم كل مخلوقات الارض عليه وعبارة "شي يا حمار" بدون اي امتعاض

فالحمار مستقر جداً بالفعل لك لذا فليس من حقه تغير العربجي وعليه ان يرضي بركوب اي شخص او إمساكه بالجام .... سيظل الحمار حماراً طالما لا يعرف امكانياته ... وطالما ليس لديه طموح في ان يكون ملك الغابه

لذا فعلى كل حمار متحذلق ينادي بالاستقرار ... ان يرضي بلسعات السياط المتتاليه حينما يعجز عن حمل الاعباء او حينما ينهق معترضاً.. وليرضى بدعم البرسيم ان وجد اصلاً ... عليه ان يتحمل اكل البرسيم المسرطن المروي بمياه المجاري ... عليه ان يتحمل اهانه الضباط في الكمائن المخصص للحمير ... عليه ان يدفع رشوه لكي يقضي حوائجه ... عليه ان يترك المنافقين والمرتزقه يعبثون في برسيمه ويحتكروه ... ولا ينسى ان ينادي العربجي بـ (بابا العربجي) فالسيد العربجي لن يجد احمر منه على الاطلاق ولن يجد عربه اكثر راحه من هذه العربه فالسيد حصاوي حمار لقطة لا يعترض ابداً.... ولا ينسى السيد حصاوي ان يعلم اولاده في مدرسه مجانيه ترسخ لديهم مبادئ ازهي عصور الحموريه فيكبرون هؤلاء الاولاد فيصبحون حميراً كباراً ناضجين ينادون بالاستقار مثل ابيهم الحمار الاصلي ويشاركون مع اخوانهم البغال والجمال في ترويع الخونه اعداء الوطن الذين اعتصموا في ميدان التحرير

تحياتي

ميجوووووووو

إلى الخائفين من الحريه

2011-02-11T13:44:00.005+02:00

"الشعب غير مستعد للديموقراطيه"

جمله في منتهى الغباء اشعر عند سماعها بصداع رهيب وكأن مخي سينفجر من الغيظ

جمله الفها النظام واخذ يذيعها في كل محطاته وجرائده لنا في الداخل وللغرب متبوعه بصورة الرئيس ذات الابتسامه الباردة اللي اتذكرها الان موضوعه فوق السبورة في مدرستنا وكأنها تقول : مفيش فايدة

قائل هذ العبارة اما ديكتاتور يريد ان يطفي شرعيه لطغيانه او شخص تم العبث بعقله طوال سنين حياته وبرمج على انه مختل عقلياً غير قادر على الاختيار الصحيح ويحتاج الي واصي ليتصرف له في شؤنه

تخيل انك من يوم ولادتك والى اصبحت في الثلاثين من عمرك وانت لا تسمع سوى عبارة: انت الى الان لست مستعداً لتعلم القراءه

لا انكر رعبي الشديد من ان تتحول مصر الى افغانستان اخرى

ولكن لننظر للامور من هذه الزاويه

جماعه الاخوان موجوده في مصر منذ عام 1928 اي انهم اقدم حتى من النظام العسكري الذي قام الانقلاب العسكري عام 1952

لماذا لم يقوموا منذ ذلك التاريخ والى الان بعمل اي محاوله للتظاهر والتجمهر ولو بربع العدد الموجودة الان في ميدان التحرير فقط وليس في محافظات مصر كلها

هل تظنون من خرج للمطالبه بالحريه والكرامه والعداله سيرضي بحكم الفقيه

من كره النظام وخرج ليثور لم يكونوا من سكان العشوائيات او الاسلامين او الانفصالين بل المثقفين والفنانين وكل من اراد ان يحيا حياه كريمه في بلده وليس كمهاجر في بلد اخر ثلجي او قاحل

تعداد الشعب المصري 85 مليون

ما هو عدد الاخوان لنقل باحسن تقدير انهم 30 مليون

هناك 10% اقباط اي 8,5 مليون لن يعطي احدهم صوته لإخوانجي في الانتخابات

هناك على الاقل مليون مثقف وعلماني وملحد وبهائي وليبرالي و..و.. لن يصوتوا الى الاخوان

وهناك 45.5 مسلم معتدل لا يرغب في حكم ديني

يكرس جميع خططه واحلامه بحرب اسرائيل واقامه الدوله الفلسطينه كما جاء في خطاب يحي الهلباوي يوم الاحد 6 فبراير مع قناه البي بي سي عربي عن خطة الاخوان اذا ما توصلوا الحكم. فكان غباؤهم المعهود في الكلام عن القضيه الفسطينه والتي تعتبر هي الهدف الوحيد الذي يعيشون من اجله ومصر ليست سوى بوابه لهذه الحرب وسيتم استنزافها لحرب لا يريد احد دخولها بما في ذلك فرعهم حماس

عدد اللذين ادلوا بصوتهم في انتخابات الرئاسه السابقه 7 مليون

you do the math

التعديلات الدستوريه الحديدة ستضمن بقاء الرئيس لمدتين فقط وايضاً انتخابات حرة وليست هزيله وسيكون على كل مرشح اعلان اجندته السياسيه وسيكون الشعب هو الحكم وميدان التحرير موجود

ثم لماذا الان نصدق ابواق النظام التي ظلت تخدعنا لعقود

لماذا نصدق من ترك الجهل والغباء والطائفيه والفساد يستفحل وينهش في عقول الشعب واجسادهم

لماذا نصدق من جلبوا لنا المبيدات المسرطنه وبدلاً من محاسبه المسئولين عن سرطنه الشعب المصري كانوا يخططون لبناء معهد سرطان في كل محافظة

لماذا نصدق من اشاعوا في كل وسائل الاعلام ان الشباب المصري يعاني من حاله هياج دائم في حين انهم هم المتسببين في ذلك بعدم الاهتمام بأمان الشارع لحساب امان عائله السيد رئيس الجملوكيه

لماذا نصدق من يسرقنا ليل نهار ثم يخرجون علينا باعلانات كفاله ام الايتام ثم اسرة فقيره ثم قريه فقيره واعتقد ان اعلانات رمضان القادم كانت ستكون اكفل دوله فقيره وحث الاخوه العرب على الزكاه من اموالهم لشعب مصر وان تكون متبوعه بعبارة: ارحموا عزيز قوم ذل

لماذا نصدق من يعقدون اتفاقات مع السعوديه لتوريد خادمات مصريات . فبعد ما كان السعوديون يأكلون في التكيه المصريه مجاناً وبعدما ذهبنا مهندسين ومدرسين واطباء لتعليم السعوديين وبقيه العرب الان وبفضل سياسات الحكم الفاسدة اصبحت نساء مصر والتي منهن ام كلثوم وهدى شعراوي وسميرة موسى ونوال السعداوي خادمات في السعوديه

لماذا نصدق النظام الذي دق مسمار العداوه في بالمادة الثانيه من الدستور ليس تديناً ولكن تدليساً ليمرر المادة التي تتيح له ان يحكمنا إلى ان يخرج على ظهره من قصر الرئاسه

نفس الرئيس المؤمن الذي انشأ المصرف العربي ليكون مغاره على بابا له ولحاشيته وللقادمين من بعده

والتي حافظ عليها الرئيس الحالي المخلوع لغرض ما في نفسه

ونسى هؤلاء جميعاً ان الديانات السماويه والارضيه لا تهدف الى زرع الفرقه بين البشر وان المبشرين بها والتباعين لها لم يكونوا امراء حروب او وزراء داخليه بل بشر امنوا بالرساله والقضيه يحملونها في قلوبهم وليس في كتب القانون.

كلمه اقولها لكل من امن وروج لهذه المقوله لست افضل من احد لكي تفرض الوصايه على من يريد التحرر من الظلم والعبوديه

تحيا مصر ... تحيا الثورة

MishMish

SMS's

2011-02-05T18:00:00.003+02:00

السيد الرئيس: قلت هتسيب التاريخ يحكم عليك. واحنا موافقين

السيد حبيب العادلي: كانت اقصى امال اهالي شهداء الداخليه هي إقالتك. لكن ربك لما يريد مش بس اقاله لا ومحاكمه وفضحيه بجلال وبلاوي تانيه كتيرررررررررر

السيد احمد عز: ....قولوا للي أكل الحرام يخاف بكرة اللي كله يفسده ....يتهيألي انك مشفتش مسلسل العار في رمضان اللي فات ... معلش ملحوقه

السيد وزير الاعلام: وحيات عينك وعفيك واللي يا رب تعدمهم لو كنت كداب.. انت بتتفرج على قناه النيل للأخبار

قناه المحور: بعد ان توصلت الى الجاسوسه التي اخذت دورات في قلب نظام الحكم والبطل الشعبي اللي طلع النهاردة ومش فاكرة اسمه وكان من الارياف لكن يعرف مأمور قسم الدقي اللي بالامارة كان لابس جاكت ازرق هو والظباط بتوعه وكانوا في المظاهرات وكمان حامي الكنيسة من الاعتداء وفندق الكونراد واركديا مول وووكاله البلح ومترو الانفاق. مش وقت هزار دلوقتي ده موجه كوميدي معملتهاش

افراد الشرطة واقصد منهم المتجردين من انسانيتهم واللذين مدوا ايديهم بالايذاء لغيرهم: العظمة لله وحده. شوف انت دلوقتي لما تبقى داخل على لجنه شعبيه وتقول انا ظابط الناس بيبقى رد فعلهم عامل ازاي

تفجير كنيسه العائله المقدسه برفح: انتوا لسه فاكرين!!! طب من اخت مسيحيه ليكم جالها اكتئاب شديد بعد حادث الاسكندريه وكانت فاكرة انه مفيش فايدة لكن لما نزلت تحضر قداس العيد لاقيت المسلمين موجودين من قبلها في الكنيسة وساكنه جنب كنيسه حاول الايام اللي فاتت بعض البلطجيه الدخول الى شارعها فقط واتعمل معاهم احلى واجب من اهل المنطقه الكرام. بقول فجروا كنايس مصر كلها فدا تراب مصر علشان يبان مين اللي بيبني ومين اللي بيهد. والكنيسة ليها رب يدافع عنها

الاخوان المسلمين ابناء النظام البرره وصنعه يديه التي يعتز بها: منكم لله يا بعدا العالم كله متضامن مع حقنا في الحريه ولكن خايف من توليكم الحكم. حتى الثورة تم تشويهها وابعاد الناس عنها بإتهام اعضائها انهم ينتمون لجماعه الاخوان. بسبب افكاركم الظلاميه تطحن مصر بين حجري رحى

كل من غير صورته عالفيس بوك ووضع بدلاً منها صورة للريس ولا كانه داخل انتخابات: من الطبيعي بعد 30 عاماً من التعليم الحكومي واكثر ان يكون لكل داء دواء إلا الحماقه اعيت من يداويها

شباب 25 يناير وجميع من ساهموا في انجاح هذه الثورة: التراب اللي بدوسوا عليه كحل لعيني ودم الشهداء حنه ليوم الفرح

تعيشي يا مصر...تعيشي يا مصر

MishMish

الموضوع في مصر فيه فيل

2011-01-12T15:10:00.005+02:00

قالك كان في ست هنود عمي عايشين مع بعض بيسمعوا عن الفيله لكن عمرهم ما شافوا واحد . قام واحد ابن حلال خدهم يفرجهم على الفيل

مشيوا الهنود في صف واحد وهما ماسكين ايدين بعض لغايه لما وصلوا عن الفيل وقفوا وسابوا ايدين بعض وحطوها على الفيل علشان يتعرفوا عليه

الاول : مسك سن الفيل وقال الفيل ده عامل زي الحربه

التاني: مسك زلومة الفيل وقال الفيل ده عامل زي التعبان

التالت: مسك ودانه وقال الفيل ده عامل زي المروحه

الرابع: حط ايده على بطنه وقال الفيل ده عامل زي الحيطة

الخامس: مسك رجليه وقال الفيل ده عامل زي الشجرة

السادس: مسك ديله وقال الفيل ده عامل زي الحبل

كل واحد من السته متأكد من رأيه وكأنه الحقيقه محدش من السته لا شاف الحقيقه ولا حتى قرب منها

اللي بيحصل في مصر اساسه اسرائيل / فتنه طائفيه / المسيحين اصحاب مصلحه والموضوع ده من تدبيرهم / المسلمين ارهابيين وده طبعهم مش هايشتروه / الموضوع كله سياسي وهيسيبوا الدنيا تولع وينزل الجيش وساعتها الحكومة هتقضي على اي واحد يفتح بقه لغايه انتخابات الرئاسه اما تعدي زي ما هما عايزين

/......................................../............................................/.....................................

ايه بقه
حداداً على مصر

MishMish

الدعوى على طريقه بلاها سوسو خد ناديه

2011-01-10T11:34:00.004+02:00

وفي خضم احداث مذبحه الاسكندريه من بين دماء واشلاء الشهداء
في وسط عاصفه المشاعر المتباينه من بين خوف من القادم والاخر وصحوة اننا لا نكره بعضنا لهذه الدرجه وشماته شيطانيه خفيه
ولاثبات حسن النيه والمحبه قررت اعداد ليست بقليله من المسلمين مشاركتنا قداسات العيد لم يخشوا التهديدات بالتفجيرات او عدم سماح الامن لهم بدخول الكنائس او حتى الفتاوى التي تحرم تواجدهم في الكنائس قائلين كأي مصري اصيل " يا نعيش سوا يا نموت سوا". وقد قدم لهم راعي الكنيسه - الكاهن - الشكر في بدايه الوعظة ونزل ليصافحهم ويطلب ممن اراد من شعب الكنيسه ان يعبر عن امتنانه لهم بالتقدم وشكرهم وتم وضع صورهم على شاشات العرض والتليفزيونات داخل الكنيسة حتى يستطيع الكل رؤيتهم وشكرهم

ثم سلم الميكروفون للوعاظ المشهور

الذي من بين جميع الموضوعات على الارض ..... لم يختار سوى موضوع واحد وهو الفرق العقائدي بين عقيدتنا وعقيدة المسلمين فيما يخص الايمان بالسيد المسيح
ولم ينتهى الوضع عند هذا الحد بل سمعت تعليق سيدتين - لم يكفا عن الكلام ونقد الناس وطريقه الصلاه من بدايه القداس - تقول احداهما للاخرى: اه اهو ........... ابتدى ردت الاخرى دول على اخر الوعظه لو مبقوش نصارى يبقى معندهومش دم
........................................................................
يا الله ..................الا توجد نهايه لهذا الغباء

حداداً على مصر

MishMish

دم اخيك صارخ إليّ من الارض

2011-01-02T11:49:00.004+02:00

وكلم قايين هابيل اخاه. وحدث إذ كانا في الحقل ان قايين قام على هابيل اخيه وقتله
فقال الرب لقايين: اين هابيل اخوك؟
فقال: لا أعلم. أحارس انا لأخي؟
فقال: ماذا فعلت صوت دم اخيك صارخ إلىّ من الارض. فالان ملعون انت من الارض التي فتحت فاها لتقبل دم اخيك من يدك. متى عملت الارض لا تعود تعطيك قوتها. تائهاً وهارباً تكون في الارض
سفر التكوين اصحاح 4 الايات من 8 الى 12

افغانستان اخرى في الطريق

2010-12-14T12:48:00.006+02:00

اول مرة اتفرج على فديو جلد المرأة السودانيه كامل النهارده من غير الصوت طبعاً

الصور ديه متاخده من مقاطع الفديو على اليوتيوب

الصورة الاولى على الشمال للست وهي ماسكه الكرباج وبتتحايل على الجلاد يرحمها

الصورة اللي جنبها لواحد من منفذي الشريعه والحكم وهو مبسوط قوي

الثالثه من الشمال لما لاقها مسكت الكرباج دخل يكمل هو

الرابعه بعد ما اضربت بالكرباج على وشها

لكن اللي يفرح ان السلطه القضائية في السودان قررت فتح تحقيق في هذه الواقعه وهي تعرض فتاه للجلد على بعنف على ايدي رجال يرتدون زي الشرطة.... ومن ناحيه اخرى قال والي الخرطوم ...ان هذه المرأة عوقبت بموجب الشريعه ولكن الخطأ في طريقه تنفيذ العقوبه بحقها

لكن مفيش حد من اللي كتب الخبر قال اسمها ايه وتهمتها ايه المشكله تتلخص في خطأ في تنفيذ العقوبة

وتعيد هذه القضيه إلى الاذهان حادثه الصحافيه لبني احمد حسين التي تم القبض عليها في احد الاماكن العامة وقدمت للمحاكمه بتهمه ارتداء البنطال وهو مما تعتبره السلطات السودانيه زياً فاضحاً وقفاً للمادة 152 من القانون الجنائي لسنه 1991

احب اهنئ الشعب السوداني الشقيق بمستقبلهم الاسود. بالمناسبه اهدي لهم الصورة ديه

ديه صورة افغانستان الشقيقه في الخمسينات والستينات ايام ما كنت بلد عايش فيها بني ادمين

وديه صورة افغانستان اليوم بعد حكم الملالي

Love,
MishMish

يهوذا

2010-11-30T10:12:00.009+02:00

فأخذت مريم مناً من طيب ناردين خالص كثير الثمن ودهنت قدمي يسوع .... فقال واحد من تلاميذه، وهو يهوذا سمعان الاسخريوطي، المزمع ان يسلمه: "لماذا لم يبع هذا الطيب بثلاثمئه دينار ويعط للفقراء؟" قال هذا ليس لانه كان يبالي بالفقراء، بل لانه كان سارقاً، وكان الصندوق عنده، وكان يحمل ما يلقى فيه

يو 12: 3 -6

في مكان ما في بيت عنيا قبل الفصح بسته ايام وقبل دخول المسيح اورشليم

بطرس: شفت صاحبك بيقول ايه؟ هو فاكرنا هبل؟

يوحنا: ماله بس؟ يمكن يكون فعلاً قلبه عالخدمة. انت بس اللي اتعودت تبص للوحش اللي فيه

بطرس: بص ما تضايقينش منك. انت عارف كويس انه حرامي

يوحنا: زي ما كل واحد فينا ليه ضعفات وسقطات والمسيح قابلنا كلنا. هو الفرق ما بينا وبينه انه اتكشف

بطرس: يا عم هو انت مش دريان باللي احنا فيه؟ البلد كلها ماشيه ورا المسيح وبكرة هيخش اورشليم مش بعيد يتوج ملك او حتى زعيم شعبي. واحنا الـ 12 هنبقى ممثلين ليه. واحد زي ده في وسطنا ممكن يخرب الدنيا. الموضوع كبير يا يوحنا. خدمة وبشارة والبلد محتل انت متعرفش المسيح في دماغه ايه وممكن يعمل ايه؟ في وقت زي ده لازم نبقى مساندين للمسيح مش سكاكين في ضهره

يوحنا: يعني انت عايز ايه بالظبط؟

بطرس: يهوذا يمشي

يوحنا: ازاي يعني؟

بطرس: هاجيبه واقعده قدام يسوع واقول على كل حاجة ولو انكر هافضحه قدام الكل وهاطلب شهادة الكل

يوحنا: تفتكر يسوع مش عارف

بطرس: اكيد والا مكنش سابه

يوحنا: يا سلام!! انت مش فاكر هو عمل ايه مع المرأة اللي امسكت في ذات الفعل

بطرس: بس احنا وضعنا مختلف. احنا صورته وممثلين ليه ما ينفعش يبقى فينا واحد حرامي

يوحنا: يا بطرس مش المسيح قال لا تدينوا لكي لا تدانوا. كلنا لينا اخطأ. هل انت مستعد انه يواجهك باخطائك؟

بطرس: اوووووووووووف .......انا مش حرامي يا يوحنا

يوحنا: كلها زي بعضها وانت عارف

بطرس: هاقوله يعني هاقوله وهو يتصرف براحته

يوحنا: هايقولك من منكم بلا خطيه فليرميه اولاً بحجر

بطرس: على فكرة انا غلطان اني اتكلمت معاك. ولعلمك بقه لو يهوذا فضل معانا انا هاسيبكم وامشي. انا بصراحه محبش يتقال عليا ان ان ليا واحد حرامي صاحبي. ولعلمك كلكم سمعتكم هتضر بما فيكم يسوع نفسه

يوحنا: استنى وشوف يسوع هيحلها ازاي

يقوم بطرس بغضب ويترك المكان وهو يقول

اه استنى ... لغايه لما نلاقيه بايعنا كلنا في سوق العبيد. يا عمي...ديه حاجة تطهق ... اقوله سمعتنا والخدمة ويسوع والزعامة والشعب كله ماشي وراه ... يقولي يسوع عارف... طب اما هو عارف ماتصرفش ليه؟

....................

Love,

MishMish

خطاب من سجن برمنجهام

2010-11-25T12:14:00.006+02:00

اني اظن انه من السهل على اولئك الذين لم يشعروا قط بحقائق العزل والفصل اللاذعه والمخزية ان يقولوا للمظلومين والمسحوقين: انـتــظـــــر

ولكن عندما تنظرون رعاعاً متوحشين افظاظاً يعدمون امهاتكم وأباءكم بدون محاكمه قانونيه ولكن بحسب مجرد رغبتهم في فعل هذا، ويغرقون أخواتكم وإخوانكم بسبب نزوة او هوى

وعندما ترون رجال البوليس الحانقون المملوئين كراهيه يلعنون ويرفسون ويعاملون بوحشيه او يقتلون إخواتكم وإخوانكم السود دون ان يفلتوا منهم

وعندما تجدون فجأة لسانكم وقد انعقد وتلعثم النطق على شفاهكم وانتم تبحثون عن وسيله لتشرحوا لابنتكم ذات الست سنوات لماذا لا تقدر ان تذهب الى المنتزه الشعبي العام المعلن عنه في التليفزيون وعندما ترون الدموع تسح مدراراً من عينيها عندما تخبر ان مدينة الملاهي موصدة امام الاطفال الملونين

........................

وعندما تجدون انفسكم دوماً تحاربون ضد معنى منحط ومنحل لتجاهل حقوق الغير، عندئذ فقط سوف تدركون وتعون لماذا نجد انه من الصعب ان نـنـتـظــر. انه يأتي وقت يمتلىء فيه كأس الاحتمال ويفيض، ولا يعود الناس يحتملون او يرغبون أكثر من هذا أن يغوصوا في لجه وهاوية عدم العداله، حيث يتجرعون كأس اليأس كاملة

د. مارتن لوثر كينج

كتاب: خطاب من سجن برمنجهام

Love,

MishMish

حد الردة

2010-09-19T11:52:00.004+03:00

انا: عمري ما فهمت الغرض من حد الردة
صديقي: حد الردة يحمي الامة من الفتنه. المرتد لازم يتقل
انا: ليه؟
صديقي: لانه قال انه اكتشف غلط في كتاب ربنا
انا: طيب ما المفروض يبقى في ناس مختصصين للتعامل مع الحالات ديه. ان كان فاهم غلط او مش فاهم خالص يرشدوه. ولو كان عنده حق يبقى حرام قتله وحرمان الناس من المعرفه. مش الساكت عن الحق شيطان اخرس
صديقي: ....اممممممممممم .بس لازم يتقل
انا: ليه؟
صديقي: لانه اكتشف غلط في كتاب ربنا

هذه التدوينه لا يقصد بها الاساءة لاي ديانه او معتقد ولكن الهدف منها كشف عقليه من يدعون احقيتهم في الوصايه على ارواح وعقولهم البشر

Love,

MishMish

الفرق بين البني ادمين الطبيعين وجبهه علماء الازهر

2010-09-14T13:34:00.004+03:00

قالك في بيان قاطعوهم لجبهه علماء الازهر بتاريخ سبتمبر 2010

جبهه علماء الازهر: بعد ان اصبحت الكنيسة المصريه مصدر ارعاب وارهاب للدولة والامة، وبعد ان تأكد للقاصي والداني غطرسه تلك الكنيسة وتعاليها واحتقارها لجميع الاعراف والقوانين والضوابط العرفيه والاخلاقيه فضلاً عن الشرعيه والدينيه.....كلام كتير

البني ادم الطبيعي سهل عليه معرفه مين اللي مصدر للإرهاب لما يقرا في حوادث المصري اليوم بتاريخ 13 سبتمبر "اشعل مجموعة من الاشخاص النيران في مبني تحت الانشاء بمدينه الصف تردد انه مخصص لبناء كنيسة بجوار مقابر السلام" مع ان المكان ده لا قام فيه الارهابين مسيحين باي تفجيرات ولا قتل ولا اعتداء على الناس بحجه ان ربنا بتاعهم قالهم كدة او انهم مظلومين مثلاً وان الدولة والمسلمين هما اللي ابتدواء بالعدوان ويعددوا جرايم الاسلامين في حقهم بدايه من الجماعات الاسلاميه والاخوان وتطنيش الدولة

جبهه علماء الازهر: مما شجع الكنيسة على تماديها في طغيانها، قتوالت الاحداث تلو الاحداث وكان منها اعلان الكنيسة تحديها لأحكام الدولة ورفضها لما اصدرته محاكمها من احكام تساوي بها نصارها مع مسلميها في حق التطليق ...فأعلن كبيرهم بصلف ان الدولة لا سلطان لها على الكنيسة.....بلا بلا بلا

البني ادم الطبيعي يعرف ان الكنيسة ما تقدرش تلغي نص واضح من الكتاب المقدس بيقول "لا طلاق الا لعله الزني" لمجرد ان الشريعه الاسلاميه تبيح تعدد الزوجات وايضاً المادة الثانيه من الدستور والتي تنص على ان الاسلام دين الدولة ومبادئ الشريعه الاسلاميه هي المصدر الرئيسي للترشيع (والتي تتضمن للاقباط الاحتكام الى شريعتهم) يعني ده مش طغيان بس مين يفهم

في حين التنامي في اعداد اطفال الشوارع وحوادث القتل للاطفال الغير شرعيين على يد ابائهم لم تطالب الكنيسة الدولة بإصدار قانون يسمح لاتباعها بالتبني مع ان موقف الشريعه الاسلاميه من الظواهر ديه هي الدفاع المطلق عن الرجل وشهواته ورجم الام وعقاب طفل لم يفكر به احد وقت وقوع الجريمه

جبهه علماء الازهر: ثم ...سفينه المتفجرات الكنسية القادمة من اسرائيل لصالح ابن راعي احد الكنائس المصريه

النبي ادم الطبعي يتحرى الحقيقه قبل كتابه اي كلام وخلاص

جبهه علماء الازهر: ثم ملف الاخوات اللواتي تحولن الى بإرادتهمن من النصرانيه الى الاسلام

البني ادم الطبيعي يخش على اليوتيوب ويشوف فيديوهات المتحولات الى الاسلام بيتكلموا براحتهم ولكم في فريدة الشوباشي اسوة حسنه علاوة على انه ممكن يشغل مخه شوية ويفكر قبل ما يولع في البلد اشمعني المتحولين من النصرانيه الى الاسلام ياما بنات صغيرين في الجامعه ياما ستات متجوزين.

جبهه علماء الازهر: فإنه اصبح من الواجب خلقاً وعرفاً وقانوناً وشرعاً على الغيارى من ابناء مصر مسلمين ومسيحيين ان يفقوا صفاً واحداً ضد هذا الصلف الكهنوتي والعنف الكنسي والغرطسه البطريركيه التي تهدد الامة ....فإنه يجب

اولاً: المسارعه نحو اعلان الرفض لسياسه التخريب التي تتبناها الكنيسة المصرية وموقف الدولة السلبي منه وذلك بكل سبيل ممكن ووسيله مشروعة

البني ادم الطبيعي يقدم الشكر للناس دول علشان قالوا بالوسائل المشروعة ثانياً يجب التحرى عن سلبيه الدولة خصوصاً انها لا تظهر سلبيه بل بالعكس ايجابيه جداً - لاحظ انهم لغايه دلوقتي مش عارفين يحكموا على مرتكب مذبح نجع حمادي مع انهم ولسؤ حظهم مساكينه وعارفين من اللي وراه

ثانياً: التحرك القانوني برفع دعاوى قضائية على الكنيسة المصرية والمطالبه باخضاع تلك الكنيسة المتغطرسه لسلطان القانون ...وكذلك رد الدوائر التي بها قضاه من النصارى

البني ادم الطبيعي يقدر يفرق بين قاضيه المانيه ناقصه عقل واحتمال تكون ملحدة مش نصرانيه وحكمها على قاتل مروة الشربيني في جلستين اتنين والقضاه من المسلمين اللي مش عايزين يحكموا على الجاني في قضيه نجع حمادي بالاضافه الى من سبقوهم وحكموا بالبراءه على قاتلي شهداء الكشح الواحد وعشرين

ثالثاُ: وعلى جميع المسلمين من الان لزوم المقاطعه للمصالح المسيحيه خاصه المصالح الاقتصاديه التي تستقوي بها الكنيسة حتى يثوب النصارى الى رشدهم ويراجعوا مع المجرمين امرهم وياخذوا على ايديهم قبل ان تحترق به وبهم السفينه

البني ادم الطبيعي يعرف انها على الرب مش عالعبد - كما قال لي بائع متجول - ثانياً بحسب تصريحات عائشه عبد الهادي ان المسيحين يملكون 60% من مجموع رؤس الاموال في مصر يعني هتتقلب على دماغكم انتوا في الاخر وطبعاً لو فيهم بيفهم يعرف ان راس المال لا ليه وطن ولا دين والاقتصاد دلوقتي اقتصاد مؤسسي عابر للقارات مش اقتصاد سوق عكاز. ثالثاُ سؤال بقه مين اللي هيولع في السفينه؟

......................

فإن اصرت الكنيسة بعد ذلك على لزوم موقفها من الدولة والمله، فإننا ننذرها بالخطوة التانيه والتي ستكون ان شالله هي الدعوة الى المقاطعه الاجتماعيه للنصارى جميعاً في مصر والجائهم الى اضيق الطرق بمنع المساكنه وتجريم المعامله وعدم بدئهم بالسلام

البني ادم الطبيعي يقدم بلاغ عاجل لنائب العام بالقبض على كل من شارك في وضع هذا البيان واعدامه في ميدان عام حيث انه يدعو الى تكدير الامن العام والفرقه بين ابناء الوطن الواحد على اساس الدين والتحريض على افعال من شأنها تجعل حرق المصاحف اقل واجب - اذا كان رؤساء هذا الدين بهذه العقليه - وبعدها رفع الموضوع الى محكمة العدل الدوليه ومحاكمة كل متبني هذا الفكر كمجرمي حرب

تحديث: اشكر تيرز هي اللي نبهتني لحقيقه الكيان المسمى بجبهه علماء الازهر وعرفت فعلاً نقلاً عن موقع اسلام اون لين انها لا تتبع الازهر وانها كيان منحل. وحابه اعتذر عن اسلوب الكتابه في البوست ان ظهر انه عدواني شويه بس بجد يا جماعه لما تقروا نص البيان هتفهموا

MishMish

الجزء التاني

2010-09-05T14:49:00.002+02:00

مصر تنظم مونديال 2010 - الجزء التاني

كانت مشكله المشاكل هي اغنيه الافتتاح التي كتبها الشاعر الفحل المعطاء عبده حريقه الذي كتب كل اغاني الثورة والنكسه والاستنزاف وحرب اكتوبر ومعاهده السلام وافتتاح توشكى وتعديل 76...الخ، وقد اشرف رئيس قطاع الانتاج بنفسه على اخراج الاغنيه التي اختير لغنائها المطربين سعد الصغير وشعبان عبد الرحيم وبهاء سلطان وتقول كلماتها: مونديالنا حلو وقيافه ...وبلدنا مالها زي في اللطافه، وبلاتر قلبه بيوجعه عايز حد يدلعه....وهيييه

بدأ المونديال المصري اثناء انعقاد مؤتمر ثقافه قبول الاخر الذي انعقد لمناقشه الاحداث الطائفيه المؤسفه التي حدثت في الاسكندريه التي صار فيها الاخ لا يحتمل اخاه لمجرد انه يختلف عنه في الديانه

وكانت اولى المصادمات في ملعب اسمنت اسيوط وتليفونات بني سويف، فقد رفض الاول استقبال فريقي اسبانيا والارجنتين، بينما الثاني رفض استقبال فريقي سويسرا واليابان وكانت الحجة في اسيوط ان مشجعات الفريقين من صنف اخر غير صنف النساء المتدولات المعروفات، اما في بني سويف فقد تقدم اعضاء المجلس المحلي هناك بطلب استجواب عاجل حول دخول اهل البوذيه اليابانيين الى ارض المحافظة. وإتقاء للشبهات الغى المحافظ الماتش واعتقل الحكم الذي اثار الشغب بإصراره على لعب المباراة

واذا تركنا ما حدث من مناوشات ومعاكسات بريئه فلا نستطيع ان نترك ماحدث لرونالدينهو اللاعب رقم واحد في العالم، والذي تعرقل امام منطقه الجزاء فإنكسر صباع رجله الكبير، ولما علم عم برعي التمرجي الذي رافق رونالدينهو في الاسعاف قيمه صباعه الذي امن عليه بعشرين مليون دولار، صرخ باعلى صوته واقترح على الاسطى خليل سائق الاسعاف ان يحتفظا بهذا الصباع بعد بتره لان صباع رونالدينهو من الممكن ان يساهم في تزويج شباب الحي كله، ويطلع اباؤهم وامهاتهم وجدودهم كلهم رحلات عمرة بدلاً من اللجوء لبرامج الجائزة الكبرى والجري ورا جمال الشاعر

دخل رونالدينهو استقبال مستشفى التل الكبير المركزي ونزل لاستقابله مدير المستشفى بنفسه وامر بإحضار كرسي متحرك لللاعب الكبير، هو بالكاد شبح كرسي متحرك مكون من عجله واحدة وصامولتين ومسند متآكل وقاعدة عبارة عن مخدة كانت اسفل دماغ عيان لسه ميت طازة. المهم ان الكرسي ادي المهمه بشكل ما ووصل برونالدينهو الى غرفه الاشباح المسماه تجاوزاً غرفه الاشعه. حضر الطبيب النوبتجي وشد رونالدينهوا من قدمة للفحص بعنف وبقوه، فصرخ لاعب السامبا الذي اعتزل اللعب بعد العلاج. فقال الطبيب: لو سمحت اترذع على السرير واقلع هدومك علشان نشوف فيه كسر تاني في جتتك ولا لا، وعندما تساءل رونالدينهو: اين الرنين المغناطيسي او الاشعه المقطعيه؟ تدخل مدير المستشفى وهو يهز راسه بسخريه من سذاجه اللاعب البرازيلي وقال: رنين ايه؟ ومقطعيه ايه؟ وكلام فارغ ايه؟ انت بتاكل من الكلام ده، دي منظره ملهاش لازمة يا كابتن وفلحسه دكاترة لزوم ترويق الزبون وانت يا رونالدينهو بيه مش زبون...انت صاحب بيت ورضخ رونالدينهو للامر الواقع وكان القرار الحاسم الجبس بعد البتر، كشعار التظلم بعد الدفع

خرج لاعبوا فرنسا للتسوق في الشارع التجاري ببورسعيد اثناء الاجازة التي اعقبت الدور الاول، واصر الباعه على بيع شامبوهات ولبان وكوتشيات لللاعبين الفرنسين، فلما رفضوا خرج ابو العربي من كشكه وقال لزملائه سيبكم من الحاجات ديه. الحاجات ديه غاليه عليهم. هرول اللاعبون الى الفندق بعدما احسوا بنظرات الحقد والغل تملاء عيون الباعه لانهم ماشتروش حاجة ومع ان درجه الحرارة كانت 39 الا انهم فوجئوا بمن يعرض عليهم بلاطي باله بسعر واحد يورو للواحد والمدهش ان هنري اشترى بلطو، وعندما ساله زيدان مستنكراً قال له: ان هذا البالطو غالي عليه وله معه ذكريات قبل ان يستغني عنه ويلقيه في سله القمامه المجاورة لمتحف اللوفر وهاهو يعود اليه مثل مركوب ابو القاسم، بدا على زيدان عدم الفهم ولكنه كان مستعجلاً على النوم للإستعداد لزيارة تمثال ديليسبس مساء، فقال له هنري قبل ان يدخل غرفه نومه: على فكرة يا زيدان تمثال ديليسبس المصريين شالوه وكسروه ابقى فكرني لما نرجع فرنسا نبقى نكسر المسله

كان النقل التليفزيوني غايه في الروعه خاصه بعد الاعتماد على طاقم ماسبيرو في البث المونديالي، كانت هناك بعض الاخطاء البسيطة كتكرار ظهور قفا ابن مخرج الماتشات وخاصه عند دخول هدف او ضياع فرصه كبيرة وضياع صوت المذيع في نصف كل ماتش، اما النصف الثاني فكان يتكلم فيه المذيع عن امجادة الشخصيه ويقارن بين هؤلاء اللاعبين السكه بحباجه وعبد الكريم صقر والذي كان ظفر اي منهم برقبه هؤلاء المليونيرات، ثم يختم بشكر مدير الامن ومدير الاستاد وعم حكشه الذي يقدم له الينسون لزوم تسليك حنجرته الكريمه، وبالطبع كان الحذاء وهو شعار المرحله المسيطر على اغلب كادرات المقصورة، صورته وهو يتطاير بين كراسي عليه القوم ويصفع خدود رؤساء الانديه جعلت القطاع الاقتصادي بالتليفزيون يطالب بإلغاء نقل المبارايات لانها اعلانات غير مدفوعه الاجر عن احذيه من الهاي كلاس

والى هنا ادرك شهرزاد الصباح فسكتت عن سرد قصه المونديال الذي حمدأ للرب لم يباح

نقل بتصريف من مقال للدكتور خالد منتصر في جريدة ايلاف الالكترونيه بعنوان مصر تنظم مونديال 2010

Love,

MishMish

مصر تنظم مونديال 2010- الجزء الاول

2010-08-23T14:19:00.005+02:00

طالما مفيش الف ليله وليله السنه دي فاسمحلي اكون شهرزاد

بلغني ايها الشعب السعيد ذو الحاكم الرشيد ان

ساعي مكتب مستر بلاتر كان مصري غلبان ومن حبه لمصر ورغبته في خدمة بلدة قام مغير الورق اللي موجود في الصندوق الزجاجي بتاع القرعه وحط ورق تاني كله مكتوب عليه مصر

EGYPT

ثم عرض مستر بلاتر الورقه على الجمهور والصحفين ومشاهدي التليفزيون في جميع انحاء العالم. فانطلقت بعدها الزغاريد في انحاء المحروسة وقامت جميع القنوات المملوكة للدولة والمملوكة للي تبع الدولة تعرض اغنتي "المصريين اهمه" و"مصر اليوم في عيد" على التوالي والتوازي لمدة 24 ساعه متواصله

بالطبع بدأ التخطيط للمونديال المصري بالتميمه او شعار المونديال الذي سيظهر في الاستادات والتلفيزيونات والاعلانات ويطبع على التي شيرتات ويرسم على العربيات والعمارات، تكونت لجنه لتصميم التميمة ومنها تفرعت لجان منبثقه ولجان متشعبه من المنبثقه ولجان اخرى بمسميات اخرى اتفقت جميعها على تكليف ا. شلبي عويس مفتش التربيه الفنيه بالمرحله الاعداديه لتصميم التميمة، وبالطبع كان امتحان الرسم في المرحلة الاعدادية في عام 2010 في التصميم الابتكاري عن تصميم التميمة. والحمدلله جاءت النتيجه مبشرة واستطاع من خلالها الحصول على تصور مذهل للشعار، فقد رسم فنانا العبقري كرة كبيرة وحشاها بمفتاحين انجليزي وترس رمزاً للصناعه ومحراث وفأس رمزاً للزراعه وسنبله قمح وغصن زيتون ونخلتين في العلالي وسونكي وخوذه.

كانت الخطوة التاليه هي خطوة بناء الاستادات وتشييدها بما يتناسب وسمعه الفراعنه في فن البناء، اقترح المعلم حنفي زلطة المقاول الشهير ان تكون مداخل الاستادات كمدخل معبد الكرنك وطريق الكباش وان يكون عدد الكباش على على كل جانب هو 11 كبش وهو نفس عدد لاعبي كل فريق، ولكن رئيس اللجنه المنظمة للمونديال اعترض لان المعلم زلطة اهمل في تصميمه الاحتياطي والمدرب والمدلك ومدرب حارس المرمى، ولكن التصميم قد تمت الموافقه عليه من جميع مجالس الشعب والشورى والمحليات

واتفق الجميع في تكاتف اصيل يكشف عن معدن المصري حين تشتد الشدائد على ان يكملوا طريق الكباش بكام جدي ومعزه حتى لا يحتج باقي طاقم عن الفيفا

بدأ العمل على قدم وساق في بناء الملاعب على اعلى مستوى، وبالرغم من وجود بعض الرتوش الخفيفه التي لا تؤثر على مسار العمل مثل رداءة انواع الكراسي وفرقعه لمبات الإضاءه الليليه - التي اثنى عليها رئيس اللجنه المنظمة ووصفها بالفانتاستيك الذي يخلق "سسبنس" في المدرجات وعندما سئل المعلم زلطة عن بعض اللذين يعالجون في اقسام الرمد بالقصر العيني نتيجه هذه الفرقعه، قال بصوت جهوري كله شجن: كله فدا عيون مصر. تحيا مصر وفي داهيه المواطن واللي خلفوه. - ومثل تواجد بقايا الزلط والرتش والطوب في المدرجات وثقوب مظلات الاستادات والتي حلها المقاول العبقري بتغطيه سقف الاستادات بملايات كاروهات صنع المحله وبعض الاجزاء الصلعاء في نجيله ارض الاستاد ومثل كراسي بعض الاستادات التي نسيت شركة المقاول ان تجعل ظهرها ومسندها للخلف وعلل رئيس مجلس ادارة الشركة هذا الوضع المريب ان مخه مش دفتر واللي عايز يتفرج على المونديال لازم يتعب نفسه شوية ويقعد عالكرسي بالشلقوب او زرع بصل واللي مش عاجبه يخبط دماغه في خرسانة المقصورة

وكان الشيخ عبد الفضيل الماضاوي هو رئيس لجنه اداب المونديال وهو المسئول الاول عن الافتاء الشرعي للمونديال. بدأت اللجنه بقرار ايقاف المباريات اثناء الآذان ولم يحسم الجدل هل الايقاف تبعاً لتوقييت الآذان في مصر او في بلدي الفريقين المشتركين في المباراة واستقر الرأي على الاخذ بالثلاثه توقيتات

وقد اعترضت اللجنه على شورتات لاعبى المنتخبات القصيرة التي تبين افخاذ اللاعبين، واصدر الشيخ عبد الفضيل فتوى تحريم ارتداء هذه الشورتات لانها انكار للمعلوم من الدين بالضرورة وكشف صريح للعورات. لذا ثم اصدار فرمان من فضيلته بفرض الزي الشرعي على جميع اللاعبين، والتشديد على للاجهزة الفنيه لهذة المتخبات بعرض شورتات على اعضاء اللجنه لقياس اطوالها وضمان تغطيتها للركبه وعدم دخول خيوط من الحرير المحرم شرعاً في نسيجها

وامتدت مظله الشيخ الشرعيه لتشمل الجماهير المصاحبه للمنتخبات وخاصه الحريم منهن وبالاخص فتيات البرازيل واسبانيا. وطالب بتشكيل جماعه الامر بالمعروف لمراقبه هؤلاء الكاسيات العاريات وتوزيع نقاب على كل مشجعه ورداً على اعتراضات العلمانين اللذين قالوا ان النقاب سيحدث لخبطه وسيختلط الحابل ولن تعرف مشجعات الفرق من بعضهن، فقال الشيخ الماضاوي لا فض فوه: بسيطة سنلصق علم كل دوله على ظهر نقاب كل مشجعه وشيفيدنا إلصاقه على الظهر في تمييز وتوضيح هل هذ المنقبه رايحه ولا جايه

وهنا ادرك شهرزاد الصباح فسكتت عن الكلام المباح

من آداب الكوميديا السوداء

مقاله للدكتور خالد منتصر من موقع ايلاف منقوله بتصريف

Love,
MishMish

مين ديه اللي هتضيع صيام الناس يا ولاد الجذمة

2010-08-16T11:49:00.008+02:00

افهم لما يبقى واحد جاهل مربي دقنه مابيتكلمش غير في اداب دخول المراحيض والعورات وخصوصاً عورات النساء التي حيرت العلماء -زي ما بيحبوا يسموا نفسهم - يقول الكلمتين دول ماشي

انما يتنشر مرتين (مرة في الصفحه الاولى ومرة تانيه في صفحه الكارياتير تحت عنوان لا مؤاخذه) في جريدة الدستور اللي المفروض انها صحيفه معارضه وليها قراء محترمين اهي ديه تبقى مصيبة ومش كدة وبس لا وبتدل على انعدام مستوى التفكير والفهم عند كل ما تعامل مع هذا الكاركاتير من اول اللي رسمه لغايه رئيس التحرير ابو شنب وبنطلون بحمالات - معرفش بيحبهم منين

اولاً: ابسط حاجة تتفهم من الزباله ديه ان الفنانين زيهم زي الشياطين

ثانياً: هما الفنانات لوحدهم هما اللي مسئولين عن رداءه النصوص ومحتواها الاباحي - يعني الممثله من دول تيجي من بيتها ومعها بلطجيه يكتفوا فريق العمل وتقلع هدوهما وتتصور وهي بالملابس الداخليه لا مؤاخذه وتعرض المسلسل ومحدش يقدر يعترض

ثالثاً اذا كنتم متضايقين قوي من المسلسلات ومن محتواها على اي اساس اتصرف عليها 270مليون جنيه وطبعاً اللي صرف المبالغ ديه مش عبيط ولا هيتبرع بيهم ده عارف كويس ان الاعلانات واعادة عرض المسلسلات ديه هيجبله ضعف المبلغ ده على الاقل وعلى فكرة معظم اللي بيصرفوا على الدراما امراء مملكه الجاز

رابعاً اشمعنى الست بس هي اللي تشيل عار سعار الذكور الجنسي وتركيزهم ليس على محتوى المسلسل ولكن على عدد الزراير المفتوحه في بلوزة البطله

خامساً: بجد

seriously do u still believe that satan doesn't work in ramadan
طب انزلوا الشارع كدة

بلاش: على كدة التعامل مع الناس في مصر والشيطان مفكوك ومريح كدة احسن كتيييييييييير من التعامل معاهم وهو متسلسل؟ حيث انه من الواضح ان المصريين هما اللي بيغوا الشيطان مش العكس

سادساً: اذا كانوا اللي المفروض انهم مثقفين وبيفهموا شايفين ان الست سبب الغوايه يبقى نستنى ايه من الجهله اللي في الشارع

سابعاً: ارجوا الرجوع الى عنوان التدوينه

Love,

MishMish

رمضان المصرى

2010-08-02T11:41:00.003+03:00

قبل الهنا بسنه قلت اكون اول واحد يكتب عن رمضان وذكريات رمضان ..رمضان له تاريخ معايا من وانا عيل صغير ..مش معايا انا بس ...مع كل الناس كمان .رمضان يعتبر تراثا مصريا خالصا بغض النظر عن كونه شهر مقدس عند المسلمين ..واى شخص يعتبر ان هذا الشهر هو خاص بالمسلمين فقط فهو مخطئ ..رمضان المصرى له مذاق خاص ومختلف عن اى بلد ..هنا له طقوسه ومزاجه وسحره ..وهذا هو سر الشخصيه المصريه التى تحول اى شئ على طريقتها ..مثل خلطه الحواوشي التى لا يستطيع احد ان يعطيه المذاق المصرى حتى لو جعل المقادير مظبوطه .

زمان وانا عيل صغير كان قدوم رمضان بالنسبه لنا معناه اننا سنقضي شهرا مختلفا عن باقى الشهور ..الروتين السنوى سيتغير فى هذا الشهر

كنا قبل رمضان باسبوع نتقابل جميعا فى الشارع لنجمع المال لنعلق الزينات التى نصنعها بايدينا الصغيرة البريئه ..كانت الزينه عبارة عن خيط طيارات ونشا وورق قديم او جلاد ملون ..وكنا نقص الورق الملون باشكال جميله ونلصقه فى الخيط بالنشا ونتركه يجف ..وبعد ان نعلق الزينه كنا نستعد بصناعه مدفع محلى الصنع ..وهو عبارة عن مسمار من مسامير السكه الحديد نذهب به للحداد ليثقبه ثم نضع مسمار اخر ك كباس ..ونملا الثقب بالكبريت المخلى وندفعه ناحيه الحائط فينتج عنه صوت انفجار ينطلق مع انطلاق المدفع ..لم يكن المدفع فقط من طقوس رمضان ..بل ايضا الفانوس القديم ابو شمعه ..كان له سحر غريب وخيال رهيب ..كنا نعتقد اننا سندعكه يوما ما فيخرج المارد ..وهو مختلف تماما عن فانوس كورومبو وابوتريكه الذى يباع الان الذى لا يحمل شكل فانوس اطلاقا .

كان رمضان يعنى لنا كأطفال : عمو فؤاد والفوازير والف ليله وليله وبرامج المسابقات ..اتذكر انى بكيت يوما كاملا لان النور قطع ساعه حلقه عمو فؤاد فى الوقت الذى لم يكن هناك اى فضائيات تعيد الحلقه التى تفوتك مثلما يحدث الان ..وايضا كان هناك فطوطه الشخصيه الاسطوريه التى عشنا معها سنوات طويله كأنها شخصيه حقيقيه ..وظهر بعدها موتوسيكل فطوطه واى شخص قصير اطلقنا عليه لقب فطوطه .لم انسي ايضا حلقات الاشكيف المخيف الى كان بينيمنا من المغرب ..كنت بخاف انزل اشترى اى حاجه بعد المغرب خوفا من هذا الاشكيف المخيف الى لو طلعلى هاياخد منى الطلبات الى اشتريتها دا غير انه هايرقعنى علقه موت يحرمنى انزل تانى .الاهم فى موضوع رمضان اننا واحنا عيال صغيرين مكناش نعرف ايه الفرق بين مسيحى ومسلم كنا بنلعب وخلاص كنا فرحانين وخلاص مكانش حد بيقولنا عيب تحتفلو مع المسلمين ومكانش حد بيعارضنا لما نطلب فانوس على اعتبار انه شيئ اسلامى كمان صحابنا مكانش حد بيقولهم متلعبوش مع اصحابكو المسيحيين ..الكل كان فرحان كبيروصغير ..الكل كان بيمشي على نفس الطقوس لانه تراث مصرى خالص بغض النظر عن كونه شهر اسلامى مقدس ..عمر ماحد من صحابى قالى متلعبش معانا عشان انت مسيحى ..يعنى ايه مسيحى ؟ مكنتش اعرف ولا هما كمان كانو يعرفو يعنى ايه مسلمين ..احنا كنا نعرف طعم الفرحه والسعاده ..كنا نعرف شكل لمعه الفرح فى عيوننا ..وشكل الفانوس ..وليل السهر يلمنا كلنا على شكل واحد قلب واحد ..مافيش فرق مين ده ولا مين ده ...دا كان زماااان .فى رمضان المصرى

تحياتى

وكل عام وانتم بخير

ميجوووووووو

اللي عنده معزة يلمها

2010-07-30T10:54:00.004+03:00

مش غريب ان ذكور الشوارع يعتبرون كل إمرأة مشروع واحدة ... لا مؤاخذه

يعني علشان اقف في الشارع استنى حد او اوقف تاكسي لازم اروح للمجلس القومي للمرأة واطلع في برامج حواريه ويتكتب عني في الجرايد واعمل مظاهرات علشان ذكور الشوارع يلاقوا حد يقولهم لا

الحكايه ان اي واحدة واقفه في الشارع تلاقي العربيات تهدي جنبها وتضرب كلاكسات او عربيات تضرب كلاكسات بمعني شتيمة واي كلب راكب عجله او موتسكيل يقل ادبه

وتلاقي بقه التعليقات في التليفزيون والبرامج الحورايه عن التحرش لازم يبقى فيها تعليق من واحد مخه مسوس يقولك اصلنا بعدنا عن الدين

بعدنا عن الدين ...................دين............... -طبعاً المعنى وصلكم

دين ايه اللي بعدنا عنه اذا كنا اتخنقنا من مظاهر الصحوة المباركة بصوا للناس وروحوا اي مصلحه حكوميه او غير حكوميه وشوفوا الدين عامل ايه

تعليق تاني لا يقل غباء عن التعليق الاول يقولك اصل المرأة مكانها البيت

بيت...............بيت ..............-برضه فاهمين

ايه مكانها البيت وانت مين اللي اداك الحق انك تقرر مصيري مش من حقك تفرض على بني ادم تاني الوصايه

طب انت الستات اللي اتعاملت معاهم جواري رضيوا انهم يبقوا زي اي كنبه او كرسي .........انا مش جاريه ومش هاقعد في البيت ومن حقي امشي في الشارع من غير ما حد ينتهك وجودي ويسمعني كلام او يبصلي بطريقه تنم على التربيه اللي اترباها واللي كان بيشوف اهله بيعملوه

ثم في شويه اسئله بقه تحتاج الى اجابه:

هل كل الناس اللي بتهدي بعربتها ديه عندها اسعتداد لممارسه الرذيله في اي وقت كدة؟

هو مفيش حاجة بتقول لاي حد انك حتى لو شايف اللي قدامك غلطان ده مايبررش خطئك؟

طيب ليه اللوم بيقع على المرأة بس هو مش الفعل الفاضح بيحتاج اتنين؟ يعني عمرك شوفت واحدة اعتدت على واحد؟ طيب ما هو اللي بيقف بعربيته او يقول كلمه بايخه ما هو كمان لا مؤاخذه؟

مش غريب ان اخطاء المجتمع المنافق تتحملها كلها المرأة: يعني اصل الشباب تعبان والستات بتلبس مش عارفه ازاي طيب هو اللي بيقول الكلام ده يرضي ان العوام والشحاتين يتقتحموا بيته وياخدوا عربيته اللي جايب فلوسها من بتوع الجاز على اساس ان الناس تعبانين ومش لاقين ياكلوا وحضرته عايم على وش الفته

العيال لو سفله يقولك اصل الام مش عارف عامله ازاي. طيب والاب كان فين؟

لما جماعه ارهابيه فاشله زي حماس تمسك البلد بدل ما يوحدوا البلد علشان يحلوا مشكلتهم بيدوروا على ازاي يذلوا الستات. يعني مش كفايه الاسرائلين والفقر والعيشه الهم على الستات لا والحكومة كمان

واحد يقتل واحدة علشان غلطت مع حد يبقى اسمها جريمة شرف لكن الحد محدش يجي ناحيته او لما يبقالي قريب سافل مستبيح لا عنده شرف ولا انسانيه مش مسموحلي اجي ناحيته علشان هو راجل

في مثل مشهور ذكور الشوارع مش حافظين غيرة بيقول: اللي عنده معزة يلمها!!!!!!!!! وتحولت المرأة من انسان الى معزة لتبرير سفاله الذكر

اي فتوة دينيه تمس بشكل او بأخر المرأة؟ السلام حرام وشها حرام صوتها حرام لو تزينت حرام لو خرجت حرام ولو.............. علشان خاطر انها بتغوي الراجل

طيب مفيش فتوى واحدة منصفه تقول ان الراجله اللي مش قادرين يتحكموا في نفسهم وبيعانوا من خلل هرموني لازم يتحبسوا في البيت ودة ليه سواب كإمطاه الاذى عن الطريق

ثم اذا كانت الستات سبب المشاكل او ناقصات عقل ودين لماذا لا توجد اي نصوص تقول ان هناك استثنى في محاسبه المرأة على اساس انها خلقت على هذا الشكل غبيه ومحرضه على الشر. يبقى اللي غلطان في الموضوع ده اللي خلقها مش هي

يعني لما تجيب كمبيوتر بكرتونته وتلاقيه بايظ يبقى العيب مش عيب الكمبيوتر عيب الشركة المصنعه

مش معقوله الست تشيل غلط البني ادمين وغلط اللي خالقهم - على حسب الوضع السائد - ولا ايه

Love,

MishMish

نغمه نشاز

2010-07-17T00:02:00.004+03:00

تخيل نفسك جالسا فى الاوبرا او جالس فى حفله موسيقيه لعمر خيرت مثلا تستمتع بالموسيقى الراقيه والهارمونى الرائع وتنسجم مع ابداع العازفين وتعيش حاله من النشوة التى تشعر فيها بإنسانيتك .لتجد ان احد العازفين بدأ يعزف نشاز يمر الموقف بسلام بفضل المايسترو ليظهر عازف اخر يعزف نغم نشاز يزداد عازفو النشاز واحد تلو الاخر .لتجد بائع انابيب يخبط على الانابيب بعنف ليبيع بضاعته ..او سيده من بير ام سلطان او عزبه القرود ترمى جردل ميه وسخه من البلكون على الناس الجالسين فى الصاله لتبهدل ملابسهم الاسموكن ..تمادى معى فى التخيل لترى ان بائع الانابيب اصبح يسير معه بائع روبابيكيا ينده فى الميكروفون بيكياااا بيكيااااا..ثم تجد متسول حسنه قليله يابيه ..ثم تجد بائع فول ويليه بائع سميط وجبنه ثم تجد بائعين للملابس الداخليه ينادون باتنين ونص وتعالى بص ..وتفاجأ ب دى جى عالى الصوت عند بائع اللب والسودانى .ومما زاد الطين بله ان العازفين الوقورين بالبدل الاسموكن اصبحو تدريجيا يرتدون ملابس مشجرة ومرة تلو الاخرى اصبحو يتناولون المخدرات ويمسون على بعضهم البعض ..وقد تفاجأ بكابوس اكبر ان عمر خيرت تحول الى أوفه الأياط ممسكا الميكروفون ليقترب من ابتلاعه ليحيي الجمهور ويقول انه يهدى لهم اغنيه يانى يانى يانى مش هاعمل كده تانى ..ولا تكاد تفوق من صدمتك لترى ان الرجل الوقور الجالس بجوارك تحول بقدرة قادر الى سيد العفش يعزم عليك ب جوان بانجو من المعتبر وهو جالس على كرسي وارد فراشه الحاج على الالوسي تاركا شبشبه تحت الكرسي ليفرك بين اصابع قدمه المتعفنه التى تحتاج الى معجون وتترش دوكو من اول وجديد ..هل اهتزت معاييرك وشعرت بصدمه نفسيه ....نعم لقد حدثت لى صدمه نفسيه انا الاخر فهذا مايحدث الان فى مصر ..فكل يوم تزاداد مساحه العشوائيه والقبح والفذارة ..ليس فى الشارع او فى الفن او اوفقط بل تغلغل التعفن فى الفكر ..الله يرحمك يامصر وربنا يسامحك ياحسن ياهلالى يالى قلبت عليا المواجع ببوستك الاخير

تحياتى

ميجوووووووو

المتحرش الفيلسوف

2010-07-11T10:26:00.006+03:00

امبارح ركبت المترو رايحه وسط البلد. طبعاً ركبت في عربية السيدات علشان ابعد عن الشر بس ما حصلش نصيب. ركب من محطة مارجرجس 6 متحرشين صغار او حراميه من الواضح انهم لسه ماتخصصوش في العربية. من ساعه ماركبوا وهما هاتك يا تنطيط وتريقاه على الستات وشتيمه قذرة في بعض بصوت عالي وكل واحد فيهم بيوعد التاني انه هايعمل فيه افعال فاضحه يعقاب على مجرد التفكير فيها القانون. الغريب ان اكبرهم ممكن يكون في تالته ابتدائي ....عرفوا بقه الكلام ده منين؟

المهم مشي المترو والمتحرشين الصغار يعثون فساداً

لغايه لما الموضوع زاد قوي قامت بنت جنبي شكلها شيك وبنت ناس قالتهم يحترموا نفسهم شوية. الكلام ده كان لما دخلنا النفق بعد محطة السيدة وفي الطريق لسعد زغلول

قام الـ 6 متحرشين شتموها وفيهم واحد حب يقل ادبه عملي فمد ايديه عليها. فمسكت ايديه ووقعته على الارض. فشتمها وبقيه العيال اتلموا عليها قلت لا مبدهاش. قمت تخنت في صوتي واستعنت على الشقا بالله. لما المتحرشين الصغار لقوا الموضوع كبر 4 منهم جريوا وفضل الواد قليل الادب وهو بيعيط وانا مسكاه وفي اثناء ذلك بشتم البت بشاتيم قذرة وبيقلع جذمته علشان يضربها بيها ومتحرش تاني عمل دور فليسوف الغبرة

وفي خضم معركتي انا والبت في الدفاع عن حقنا في الرضا بالهم في عربيه السيدات قامت واحده قالتلي حرام عليكوا سيبوا الواد. هي قالت الكلمتين دول وانا الدم ضرب في سقف نافوخي من جوه

انا: حرام!؟..........وهي قله ادبهم علينا مش حرام

الست: يا بنتي خلاص انتوا هزقتوهم والعيال بتعمل كدة علشان يسرقوا حاجة ولا يخطفوا حاجة متديهمش فرصه يعملوا كدة

انا: طب اما انتي عارفه انهم حرميه صعبانين عليكي ليه؟

الست: انتوا اللي صعبانين عليا لحسن يقلوا ادبهم عليكوا

انا: قولتها يقلوا ادبهم ياخدوا بالجذمة او يغوروا يركبوا في عربيات الرجاله

المتحرش الفيلسوف: انتي بتضربيه علشان عيل صغير ولو كان راجل كبير كنتي اتخرستي

انا: اسكت علشان ماضربكش انت الاخر

المتحرش الفيلسوف: الحمدلله ماحدش يقدر يعملي حاجة

انا: طب انا هانزل اجيبلك الامن بتاع المحطة علشان تقضي بقيه عمرك في الاحداث

نزلت محطة جمال عبد الناصر ادور حتى على عامل نظافه ملقتش..... باب المترو قفل وفيلسوف الغبرة بصلي باستهزاء والمترو مشي والمتحرشين السته لسه في العربية

سبيت التيت في سري ومشيت

وايقنت ان

الشعب المصري متخلف عقلياً بالفطرة - راجع موقف الست بتاعه الحرام

حتى المنحرفين ليهم فلسفه - راجع موقف فيلسوف الغبرة

المتحرشين الصغار ركبوا من محطة مارجرجس - المفروض انها محطة سياحيه وفيها تواجد امني مكثف - وفضلوا يتنططوا بشكل مستفز طول السكه محدش من امن اي محطة حاول يتدخل. الخناقه فضلت مستمرة من قبل محطة سعد زغلول لغايه لما نزلت في جمال عبد الناصر وبرضه محدش من الامن اتدخل. الغريب ان الحكومة ضحت بالصحه والتعليم علشان الداخليه تعيش لكن من الواضح انه مفيش فايدة

في تقديري سب التيت لن تتم محاسبتنا عليه كخطيه \ سيئه لانه اقل واجب مع اللي بيحصل دلوقتي

اثبتت الايام ان حكمتي صحيحه وهي انك في مصر تأخذ حقك بقدر قله ادبك

Love,

MishMish

Because She Is A Woman

2010-06-09T12:29:00.002+03:00

تكبر لتصبح مثل امها

تتزوج وتنجب الاطفال وتصون شرف العائله

تضيع شبابها وهي تغزل الصوف لاعنه اليوم الذي ولدت فيه إمراءه

وحينما تأتي ساعتها لتموت

ستتسأل ..... لماذا اضاعت عمرها في طاعه

كل قوانين الله والوطن

لانه لا يوجد جحيم اسواء من حالة التناقض الدائم التي تعيش فيها

She will grow up like her mother

She will marry, bear childern

& honor her family.

spend her youth in needlepoint and rue tha day she was born a girl

& when she dies

She will wonder why she obeyed

all the rules of God & country

beacuse no biblical hell could ever be worse than this state of perpetual inconsequence.

Dengrous Beauty
Love,
MishMish

هل انت مصرى بجد؟

2010-06-03T18:41:00.006+03:00

اذا اردت ان تعرف انك مصرى بجد ام لا ..حاول ان تجيب على الاسئله التاليه بصراحه شديده

هل عندك مشكله ان تحتفل بعيد الميلاد او القيامه مع اصدقاؤك وتهنئهم من قلبك اذا كنت مسلما ..او تحتفل بالمولد النبوى وتشترى حلويات او تشارك اصدقاءك المسلمين عيد الفطر او الاضحى وتهنئهم من قلبك اذا كنت مسيحيا ؟

اذا كان هناك مبارة لمنتخب مصر ضد امريكا ..هل تتمنى الفوز لمصر ام تتمنى الفوز لامريكا لانك مضطهد بصفتك قبطى ..واذا كنت مسلما هل تشجع مصر ليس لانها بلدك ..ولكن لنصرة الاسلام ؟

فى حاله هزيمه مصر امام امريكا ..هل تفرح وتقول (احسن) ماهو من عمايل المسلمين فينا ولو كنا كسبنا كانو هايقولو نصر للاسلام ..واذا كنت مسلما هل تحزن لهزيمتك امام الصليبيين الكفار ام انك تاخذ الموضوع بروح رياضيه فالرياضه فوز وهزيمه ؟

هل تحب منتخب مصر لانه منتخب الساجدين ام لانه منتخب مصر ؟

هل احيانا لا تشجع مصر لان ليس بها لاعب قبطى واحد ؟ ام انك تشجعها لانك بتحبها ؟

ايهما اهم فى نظرك من الشخصيات الاتيه ؟ بن لادن - احمد زويل - موريس صادق - ابوتريكه- مجدى يعقوب -محمد حسين يعقوب - فاروق الباز - نجيب محفوظ -مايكل منير

القناه المفضله لديك : الرحمه -اون تى فى - الحياه - الناس -سي تى فى - ناشيونال جيوجرافيك -روتانا سينما

هل تشترى من سوبر ماركت صاحبه مسيحى ..او من سوبر ماركت صاحبه مسلم ..او انك لاتهتم بمن هو صاحب المحل ..وما يهمك هو المعامله الجيده والامانه فى التعامل ؟

اى علم يبهرك من الاعلام الاتيه : علم مصر - علم امريكا - علم السعوديه ؟

ما هى الاغنيه التى تهز مشاعرك : اغنيه ياحبيبتى يامصر - انا شارب سيجارة بنى - اناشيد سامى يوسف -ام انك لا تحب الاغانى وتحب ان تسمع اناشيد دينيه ..او تسمع ترانيم مسيحيه... باعتبار ان الاغانى حرام ؟

حينما تذهب الى مكان جديد مثل شركه او مدرسه او كليه ..اول ماتبحث عنه هو : مكتبه الكليه - السي اتش ( المكان المخصص لتجمع المسيحيين )- تبحث عن المسجد لتقابل الاخوة

فى المترو حينما تجد سيده غير محجبه : هل تقوم لها باعتبارها كبيرة السن - ام انك ترفض ان تقوم لها لانها غير محجبه - تنادى على سيده محجبه لتجلس مكانك

اذا كنت مسيحى ومهمل فى عملك : تعترف انك مقصر وتحاول ان تصلح من نفسك - تقول ان المسلمين يضطهدونى

فى العمل : تلعب سوليتير وفيفا وتتحدث فى تليفون الشركه وتقوم بالشات مع اصدقاؤك وتتفرغ لفقع الزنب فى زمايلك - ام انك تتهرب من العمل بحجه الصلاه

اخر عمل جيد قمت به هو : المشاركه فى حمله خيريه لمساعده اطفال الشوارع - التبرع لبناء كنيسه - التبرع لبناء مسجد-مش لاقى تاكل اصلا ومحتاج حد يتبرعلك

اى بلد تفضل العيش فيها :امريكا -السعوديه - مصر

اى جمله تعجبك من الجمل الاتيه : ان مصر وطن لا نعيش فيه ...بل يعيش فينا - طظ فى مصر وابو مصر والى مش عاجبه يمشي -اضربو الرصاص على المتظاهرين - ماحنا لو دخلنا الجنه مش هانلاقى حد نعرفه (عادل ادهم )-اننا نعيش ازهى عصور الديمقراطيه -وطنى لو شغلت بالخلد عنه ..نازعتنى اليه فى الخلد نفسه-جمله مكتوبه على سيارة نقل :ماحدش فاهم حاجه

هل تعتبر نجيب محفوظ : كاتب عالمى - كاتب اباحى - كافر لانه لا يكتب فى الدين- مبفهمش منه حاجه

تاريخ مصر :الحقبه الفرعونيه -الحقبه القبطيه - الحقبه الاسلاميه-جميع ماسبق

تخب زيارة الاماكن الاتيه : المتحف القبطى - المتحف الاسلامى - المتحف المصرى - ساقيه الصاوى والاوبرا -جميع ماسبق؟

مارايك فى الاسماء الاتيه : نجيب الريحانى: ممثل رائع بس عيبه انه مسيحى

الشيخ النقشبندى : انا مالى ومال التراث الاسلامى ..مصر كانت قبطيه

النتيجه : طبعا انت هاتجاوب بينك وبين نفسك ومش من حقى ادخل جواك ..واكيد مش هاعرف النتيجه .بس لو طلعت مصرى بجد هارفعلك القبعه وانحنيلك وتبقى شرفتنى ..ولو انت مش مصرى وبتتمحك فى اى دوله تانيه لاى سبب من الاسباب فمالكش عندى اى قيمه او اعتبار اما بقى لو كنت مكبر دماغك وجواك مصرى نايم ومكسل .حاول انك تدور جواك على انسان مصرى صميم ..انسان معتدل بيحب الخير بفطرته - مش مهم تكون متدين ولا لا ..لان ده حريتك الشخصيه ومش من حق اى حد انه يحاسبك ..المهم انك تشارك بجد وتحلم بجد ..روح الجامع زى مانت عايز ..روح الكنيسه زى مانت عايز ...بس اهم شيئ ماتنساش انك مصرى .

مع تحياتى

ميجوووووو

من فوق كوبرى قصر النيل

باكل ترمس ودرة مشوي

اجب عن الاسئله التاليه

2010-05-31T13:06:00.006+03:00

مصر هبة النيل - في ضوء هذه العبارة اذكر التحركات التي قامت بها القيادات المصريه للحيلوله دون ضياع حصتها من ماء النيل عندما علمت بالمدولات والاجتماعات التي تعقدها دول حوض النيل بداً من عام 1997 لتغير بنود هذه الاتفاقيات التي تحكم نصيب كل دوله؟

علماَ بان هذه الدول لا تعتمد على مياة النيل كمصدر اساسي للحياه حيث انها تقع في المنطقه المطيره بعكس السودان التي تعتمد على مياه النيل في 77% من استهلاكها للمياة ومصر تعتمد بنسبه 94% من استهلاكها للمياه على النيل

العدو الاول لمصر هو اسرائيل - ما مدى صحه هذه العبارة بالاخذ في الاعتبار التزام اسرائيل ببنود معاهدة كامب ديفيد بينما يعتدي على حدودنا يومياً الاخوة الفلسطنين وتصل احياناً الى استخدام اموال مزورة في عمليات الشراء من المصريين وفي احيان اخرى الى قتل حرس الحدود المصريين. اما بقيه الاخوة العرب فغيروا من تلقاء نفسهم اسم مصر إلى مصرائيل

هل مصر دولة اسلامية / دينيه ام دولة مدنيه / علمانيه؟ وضح اجابتك في ظل الاحداث التاليه

حكم المحكمة الإداريه العليا بإلزام البابا شنودة الثالث بابا الاسكندرية وبطريرك الكرازة المرقسيه بالتصريح لـ 2 من الاقباط المطلقين بالزواج مرة اخرى. مع ان المادة الثانيه من الدستور المصري والتي تنص على: الاسلام دين الدولة واللغه العربية لغتها الرسمية ومبادئ الشريعه اسلاميه هي المصدر الرئيسي للتشريع. علماً بان الشريعه الاسلاميه تكفل للاقباط الاحتكام إلى شريعتهم

ورفض محكمة القضاء الاداري بمجلس الدولة تغيير ديانة الطفلين اندرو وماريو إلى المسيحيه - حيث ان القانون ينص على انه في حاله إشهار احد الوالدين لإسلامه يجب ان يتبعه تغيير ديانه الابناء الى الاسلام بإعتباره خير الديانات" حتى يصلوا الى سن البلوغ وهو الخامسه عشر

من اسباب قيام ثورة يوليو

استمرار الملك فاروق في تجاهله للاغلبيه واعتماده على احزاب الاقليه

قيام اضطرابات داخليه

سوء الحالة الاقتصاديه في مصر

الظلم وفقدان العداله الاجتماعيه بين طبقات الشعب وسؤ توزيع الملكيه وثروات الوطن

سفاهه حكم الملك فاروق وحاشيته في الانفاق والبذخ على القصر وترك الشعب يعاني

طب ايه؟

وكم ذا بمصر من مضحكات ولكنه ضحك كالبكاء - المتنبي

هل تغير حال مصر في ايام المتنبي (915 - 965) عن حال مصر في 2010

Love,

MishMish

فلنحتسي العجه

2010-05-21T13:59:00.006+03:00

كنت جالس على المقهى فى المساء مع صديقى الاستاذ ماجد و والاستاذ مراد ..هما اكبر منى ببضعه اعوام قليله ..ياتيان يوميا الى المقهى بعد يوم شاق لكسر الملل اليومى ..تجدهما يضعان مبسم الشيشه فى فمهما بدون ان ينطقا باى كلمه وتتشعلق حواجبهما مع كل نفس دخان ..ويصبان تركيزهما مع التليفزيون فى المقهى فهما من عشاق الافلام الاجنبى ..ويبدأن فترة التوحد والتعايش مع الفيلم ويخرجان من الواقع حتى انك تشعرهما بانهما تمثالان ولا تشعر بانهما حيان الا مع اصوات كركرة الشيشه ..الاستاذ ماجد يسأل سؤاله التقليدى مع بدايه الفيلم ..مين الكويسين ومين الاشرار ؟ مراد يرد بهدوء : اتفرج وانت تعرف وبعدين مانت اتفرجت على الفيلم ده خمسين مرة وكل مرة تسأل نفس السؤال .طبعا ماجد من نوعيه بسيطه من البشر الذين يتعاملون مع الناس على انهم ابيض او اسود ..استمرت احداث الفيلم وكان يراقبان الابطال وهم يحاربون الاشرار ..بينما انا كنت ارقب فيلما من نوع اخر ..كنت اراقبهما شخصيا

جاءت احدى الجمل على لسان بطل الفيلم لاحد الاشخاص فيقول له : انك صعب المراس ..سكت ماجد فترة وبعدها سال مراد : يعنى ايه؟

انزعج مراد : هو انت كل شويه تسألنى نفس السؤال ؟ ..صعب المراس يعنى مش سهل يعنى راجل صايع ويوديك البحر ويرجعك عطشان فهمت ؟ ابتسم ماجد ابتسامه خفيفه وانشكح واستمر فى متابعه الفيلم مع الرجل صعب المراس .

بصراحه صعب عليا ماجد لانه من الشخصيات البسيطه التى لا تتعب دماغها فهو انسان بسيط يريد ان يحدثه احد بلغه بسيطه ..فهناك الملايين مثله يحبون ان يحدثهم الناس بلغه الشارع لا ان يحدثهم بلغه صعبه الفهم ..فتجد ان الافلام الاجنبى المترجمه تحتوى على العديد من الالفاظ المعقده بالنسبه للرجل البسيط او الانسان العادى ..والمصرى عموما يحب البساطه ويحب ان يتكلم بلغه سهله فتجد مثلا الشعر العامى لصلاح جاهين والابنودى وبيرم ونجم هو الاقرب الى قلب الشارع المصرى .. فهذه هى اللغه التى يفهمها وتمس قلبه بسهوله وهذه هى عظمه الشخصيه المصريه التى تفرض نفسها من المحيط الى الخليج وهذا هو سر الاتجاه الى الفن المصرى وكان يقال سابقا انه لو تقابل مغربى مع خليجى لا يفهمان بعضهما فيتحدثا باللهجه المصريه الرائعه التى تصل بسهوله الى متلقيها .

اما السؤال هنا : لماذا لا تكون هناك ترجمه مصريه للافلام الاجنبى لماذا نستورد الترجمه من لبنان ؟ او من اماكن اخرى ؟ حتى الترجمه تستوردها بلد رفاعه الطهطاوى ؟ اعتقد انه لو اننا اسسنا معامل ترجمه مصريه صميمه للافلام الاجنبى فسيكون جزء من اعاده فرض شخصيتنا وهويتنا كما كانت من قبل حينما كان جمبع الناس يلتفون حول التليفزيون العربى الذى كان يستمد عظمته من الروح المصريه .

انظر الى ترجمه الافلام الاجنبى ..فتجد ان المصرى لا يستسيغ كلمه كيلو غرام او اسم مثل ماغى ..هو يريد ان يسمع كلمه كيلو جرام او ماجى ..ايه المشكله لو ان الترجمه تمت باللهجه المصريه التى نفهمها ؟ يعنى تخيل معى انك تشاهد فيلم اجنبى فيه عبارات مثل مكابح ..كام واحد عارف يعنى ايه مكابح؟ المكابح هى الفرامل .ماتقول فرامل وتخلصنى ..عمرك شفت عيل صغير راكب عجله وعمال يجرى بيها ويصوت ويقول ماعيش مكابح ماعيش مكابح ..ولا مثلا يقولك البرغى ..والله الى ترجم ده عايزله برغى فى عينه ماتقول مفك ..خلاص حبكت الثقافه ؟ دا غير كلمات كتيرة زى البندورة (الطماطم ) والركمجه (رياضه ركوب الامواج ) والجعه (البيرة )مالناس كلها عارفه ابو لالو بتاع البيرة ..المستذئبون..عمت صباحا ..نقانق ..صدقونى لو حد راح لمحل يطلب ساندوتش نقانق مش عارف صاحب المحل ممكن يعمل فيه ايه

خلاصه القول الشعب المصرى يحب من يخاطبه بلغته التى يفهمها ويحسها وتقترب من مشاعره والكلام هنا الى الساده الوزراء والساده المسئولين الذين يخاطبون الشعب بعبارات كبيرة عن الديمقراطيه والفعاليه المجتمعيه بينما الناس تفهم اكثر فى ساندوتش الفول والطعميه

لا يهمهم هذه العبارات المهم هو هو الواقع الملموس ..لذلك امام الساده المسئولين فرصه ذهبيه ان يقتربو اكثر من الناس ويخاطبوهم بعيدا عن ترجمه انيس عبيد ..فالوزراء يتحدثون بطريقه الافلام الاجنبى حينما يشرب البطل وصديقته البيرة ويرفعان الكؤوس عاليا : فلنحتسي الجعه

بينما المواطن البسيط يقول : فلنحتسي العجه ..الفرق كبير صح؟

تحياتى

ميجوو

من امام عم عطيه بتاع الفول

مستر حسين ..خذ فطيرك

2010-05-11T20:32:00.002+03:00

كان الاستاذ حسين مدرس اول لغه عربيه ووكيل القسم الثانوى منهمكا فى الشرح فى فصل اولى تالت ..كان الدرس عن فعل الامر ..بالصدفه البحته كان يكتب فعل الامر من فعل اخذ ..فكتبه خذ ..فجأه علا صوت طالب من الطلاب يامستر ايه الفعل ده ؟ فاجابه المستر ببراءة :خذ ..فقال له الولد خذ فطيرك ..طبعا الايحاء واضح ..جن جنون مستر حسين ..فهو مدرس من 29 سنه وتخرج على يديه اجيال لم يجروء احد على ان يقول له هذه الكلمه ..سحب الطالب من قفاه على مكتب الناظرة ..وتم عمل تحقيق ..وكتب فى شكواه ان الطالب قال له خذ فطيرك وان هذه سفاله وانه طالب غير محترم ويجب اتخاذ اجراءات عقابيه معه ..لم تفهم الناظرة مغزى الكلمه فقالت لمستر حسين انا مش شايفه شتيمه فى الكلمه ..وكان الطالب يدافع عن نفسه بانه ادخل الفعل فى جمله مفيده وان مستر حسين هو الى نيته وحشه ..وان مستر حسين يضطهده لياخذ درس خصوصى معه ..وانه بدلا من ان يشكره على اجابته ويكافئه على نشاطه داخل الفصل يريد ان يعاقبه ..وجد المستر حسين نفسه فى موضع المتهم بدلا من المجنى عليه ..صعدالشكوى الى مديرة المدرسه وتم عمل تحقيق ..ولكن هذه المرة اتى والد الطالب المحامى الكبير ذو العلاقات والنفوذ ..والذى على علاقه وطيده بالمديرة ..وهدد المدرس بانه سوف يشكوه فى الوزارة لانه يجبر ابنه على اعطاء الدروس الخصوصيه مالم يسحب شكواه ..فوض المستر حسين امره لله ..وسحب شكواه...حتى لايتم اتهامه بالباطل ..لكن بعد يومين استدعاه مدير شئون العاملين ليبلغه انه تم خصم يومين من راتبه لانه يسيئ معامله التلاميذ وان هذا قرار مديرة المدرسه ...صدم المستر حسين واهتزت معاييره ..بقى الواد يقل ادبه وانا الى اخد يو مين خصم ؟؟..ايه البلد دى ؟ ...خرج من المكتب بعد ان وقع على الجزاء ذابل الوجه ..بعد ان اخذ فطيره ..وتباهى الطالب امام زملاؤه بما فعله فى استاذ حسين ..حتى انهم اطلقو عليه لقب ...استاذ حسين خد فطيرك

قصه حقيقيه من ملفات المخابرات المدرسيه المصريه

تحياتى

ميجوووووو

وده غسلوه إزاي بقه؟

2010-04-06T19:19:00.004+02:00

مشمش: ازاي حضرتك يا فندم وعامله ايه؟

السيدة الاولى: الحمدلله نشكر ربنا

مشمش: انا بتصل علشان اسأل على صحه سيادة الريس يا ترى ايه اخباره؟

السيدة الاولى: الحمدلله العمليه مشيت كويس وهو بيتحسن

مشمش: طب الحمدلله. صدقيني انا كنت قلقانه عليه قوي وبدعيله من قلبي

السيدة الاولى: مرسي على ذوقك هو اتحسن دلوقتي الحمدلله

مشمش: اوكي. بلغيه سلامي وقوليله ربنا يخليه لينا ومايحرمناش منه ابداً

افتح عينى لاجد نفسي لست في غرفتي افكر في لا منطيقه المكالمه

يا نهار اسود! - على رأي حماتي

حتى في الحلم

طب غسيل العقل الواعي وعارفينه انما العقل الباطن غسلوة إزاي بقه؟

قصه حقيقيه

Love,

MishMish

امسك حرامى

2010-04-03T15:06:00.003+02:00

كنت جالسا فى منزلى مع حرمنا المصون وابنتنا العزيزة ساندو فى امان الله ..فجأه سمعت صوت خناقه ..الحق الحق ..جريت ابص من الشباك بدافع الفضول كما عادة الشعب المصرى الى يموت فى المصايب .لقيت ناس ماسكين شاب فى التلاتينات ومتجمعين حواليه زى الحاوى وهاتك ياضرب فيه ..وهو يصوت زى الستات ويعيط زى العيال الصغيرة ..يابن التيييييت ياحرامى ..انت الى سرقت الدكان بتاعى الاسبوع الى فات..هاتوه على القسم ..الناس تطوعت بكل ماتجود به الانفس ..وهاتك ياسيمفونيه عزف على قفاه والى ربنا يكرمه بشلوت والى يتطوع ويكيلله بونيه فى سنانه ..اتضح ان الحرامى سرق 2 جنيه من طفل صغير كان رايح يشترى حاجه ..ولما جريو وراه رماهم فى الشارع ...وحين حانت اللحظه الحاسمه فى جر هذا الحرامى الى القسم ..قعد يعيط ويقول : والله انا اول مرة اعملها فى حياتى والله العظيم جعان وماكلتش من يومين .ابوس ايديكوسيبونى اروح ..والله العظيم جعان ..انا لو كنت سرقت كنت سرقت محل ولا شقه مش اسرق اتنين جنيه ..حاله صمت بين الناس ..وتركه الرجل الضخم الذى كان معلقه من قفاه ..تطوع احد الرجال الكبار فى السن ..خلاص ياجماعه كله يروح لحاله ..سيبونا نتصرف معاه ...انصرف الجميع فى حاله صمت ..جلس الحرامى على الرصيف منهار فى البكاء وتطوعت احدى السيدات بطبق به ارز وقطعه لحمه ..وتطوع اخر بكوب شاي ...التهم الحرامى الطعام بنهم شديد وشرب كوب الشاى ..لكن قبل ان يتركوه يمشي ناداه الرجل الضخم واعطاه خمسه جنيهات ..سار الحرامى فى طريقه ..ونظر نظرة ذات مغزى للناس ومسح دمعه كانت تسربت على خده ......انتهى المشهد

تحيااااتى

ميجوووووو