انا فاهم وانت فاهم !!!

كنت راكب الميكروباص من كام يوم ورايح الشغل بتاعى ، كان اليوم جميل والجو مشمس وكل شيئ يدعو الى التفاؤل ،كان الراكبين جميعا اشبه بالكومبارس الذين يمثلون فى الافلام والمسلسلات مقابل بضعه جنيهات ،اخرج كل منهم اجرة الميكروباص واعطاها للجالس فى الكرسى امامه وفجأه وعلى حين غرة فتح السائق علبه موجوده فى التابلوه وسحب احد شرائط الكاسيت ووضعها فى جهاز الكاسيت الرديئ ،وانطلق صوت غريب الشكل لاحد المغنيين المدعين ،حاولت ان اقنع نفسي بان اسمعه ولكن اذنى لم تستجب ، ،كان المغنى يسير على وتيرة واحده (انا عارف وانت عارف واحنا الاتنين عارفين ...انا فاهم وانت فاهم واحنا الاتنين فاهمين ..ان فاكر وانت فاكر واحنا الاتنين فاكرين ...انا شايف وانت شايف واحنا الاتنين شايفين ...الخ )كانت هذه هى كلمات الاغنيه الغامضه المبهمه حاولت ان افهم ما المعنى فى الاغنيه لكن احترت واحتار دليلى لكن الى فهمته ان المغنى يناجى حبيبته بكلمات لايفهمها غيرهما وطظ فى باقى الناس فهو يناجيها عن طريق السيم اى الشفرة والمفروض انه هناك موضوع خاص بينهم لا يصح ان ينطق به امام الناس والله اعلم فضلت طول اليوم اخمن ما الموضوع الذى لا يريد الحبيب ان يبوح به؟؟ انا كمان عايز افهم اشمعنى هما يعنى ؟؟؟ اكيد الحبيب كان عارف ان حبيبته عليها مراقبه ومسجله خطر فعشان كدا بيخوفها انه ممكن يبلغ عنها فى اى وقت ،او يمكن انه عرف ان مشيها بطال ومطنش او يمكن بيهددها عشان هى ماجابتش غير حاجه المطبخ بس وهو جاب الشقه وجهزها من اولها لاخرها ودفع دم قلبه فعشان كدا بيقولها احسنلك اتلمى بدل ما افضح الدنيا انا دفعت اخر مليم معايا؟؟؟ كلها تساؤلات ولكن اخذ تفكيرى ياخذ منعطف اخر وسألت نفسى ليه ياواد تظلم الراجل؟؟ يمكن الشاعر ده قصده يكتب شعر سياسي وكتب الاغنيه دى برموز مفهومه للطبقه المثقفه الراديكاليه الليبراليه وغير مفهومه للغوغاء والدهماء وعامه الشعب؟ ويمكن ياواد تكون من الطبقه دى الى مش بتفهم الرمز فى الفن ،فتخيلت ان هذا المطرب وجه هذه الاغنيه الى احد الوزراء او احد السياسيين الجالسين على كراسيهم منذ فترة طويله المدى وكاتم على انفاسنا فكتب هذه الاغنيه بيبلقح عليه الكلام ؟؟ او يمكن بيتكلم عن الغاء الدعم وانا مش فاهم فبيعبر عن راى المواطن المصرى فى مواجهة الحكومه وبيحذر من قيام ثورة ؟؟؟ الحقيقه شطح خيالى الى ابعاد كثيرة كل هذا وانا جالس فى الميكروباص فى الكرسي الاخير ، نزلت منه وابتعد الميكروباص ومازال الصوت ( !!خارجا من الكاسيت (انا فاهم وانت فاهم واحنا الاتنين فاهمين