رمضان المصرى

قبل الهنا بسنه قلت اكون اول واحد يكتب عن رمضان وذكريات رمضان ..رمضان له تاريخ معايا من وانا عيل صغير ..مش معايا انا بس ...مع كل الناس كمان .رمضان يعتبر تراثا مصريا خالصا بغض النظر عن كونه شهر مقدس عند المسلمين ..واى شخص يعتبر ان هذا الشهر هو خاص بالمسلمين فقط فهو مخطئ ..رمضان المصرى له مذاق خاص ومختلف عن اى بلد ..هنا له طقوسه ومزاجه وسحره ..وهذا هو سر الشخصيه المصريه التى تحول اى شئ على طريقتها ..مثل خلطه الحواوشي التى لا يستطيع احد ان يعطيه المذاق المصرى حتى لو جعل المقادير مظبوطه .

زمان وانا عيل صغير كان قدوم رمضان بالنسبه لنا معناه اننا سنقضي شهرا مختلفا عن باقى الشهور ..الروتين السنوى سيتغير فى هذا الشهر

كنا قبل رمضان باسبوع نتقابل جميعا فى الشارع لنجمع المال لنعلق الزينات التى نصنعها بايدينا الصغيرة البريئه ..كانت الزينه عبارة عن خيط طيارات ونشا وورق قديم او جلاد ملون ..وكنا نقص الورق الملون باشكال جميله ونلصقه فى الخيط بالنشا ونتركه يجف ..وبعد ان نعلق الزينه كنا نستعد بصناعه مدفع محلى الصنع ..وهو عبارة عن مسمار من مسامير السكه الحديد نذهب به للحداد ليثقبه ثم نضع مسمار اخر ك كباس ..ونملا الثقب بالكبريت المخلى وندفعه ناحيه الحائط فينتج عنه صوت انفجار ينطلق مع انطلاق المدفع ..لم يكن المدفع فقط من طقوس رمضان ..بل ايضا الفانوس القديم ابو شمعه ..كان له سحر غريب وخيال رهيب ..كنا نعتقد اننا سندعكه يوما ما فيخرج المارد ..وهو مختلف تماما عن فانوس كورومبو وابوتريكه الذى يباع الان الذى لا يحمل شكل فانوس اطلاقا .

كان رمضان يعنى لنا كأطفال : عمو فؤاد والفوازير والف ليله وليله وبرامج المسابقات ..اتذكر انى بكيت يوما كاملا لان النور قطع ساعه حلقه عمو فؤاد فى الوقت الذى لم يكن هناك اى فضائيات تعيد الحلقه التى تفوتك مثلما يحدث الان ..وايضا كان هناك فطوطه الشخصيه الاسطوريه التى عشنا معها سنوات طويله كأنها شخصيه حقيقيه ..وظهر بعدها موتوسيكل فطوطه واى شخص قصير اطلقنا عليه لقب فطوطه .لم انسي ايضا حلقات الاشكيف المخيف الى كان بينيمنا من المغرب ..كنت بخاف انزل اشترى اى حاجه بعد المغرب خوفا من هذا الاشكيف المخيف الى لو طلعلى هاياخد منى الطلبات الى اشتريتها دا غير انه هايرقعنى علقه موت يحرمنى انزل تانى .الاهم فى موضوع رمضان اننا واحنا عيال صغيرين مكناش نعرف ايه الفرق بين مسيحى ومسلم كنا بنلعب وخلاص كنا فرحانين وخلاص مكانش حد بيقولنا عيب تحتفلو مع المسلمين ومكانش حد بيعارضنا لما نطلب فانوس على اعتبار انه شيئ اسلامى كمان صحابنا مكانش حد بيقولهم متلعبوش مع اصحابكو المسيحيين ..الكل كان فرحان كبيروصغير ..الكل كان بيمشي على نفس الطقوس لانه تراث مصرى خالص بغض النظر عن كونه شهر اسلامى مقدس ..عمر ماحد من صحابى قالى متلعبش معانا عشان انت مسيحى ..يعنى ايه مسيحى ؟ مكنتش اعرف ولا هما كمان كانو يعرفو يعنى ايه مسلمين ..احنا كنا نعرف طعم الفرحه والسعاده ..كنا نعرف شكل لمعه الفرح فى عيوننا ..وشكل الفانوس ..وليل السهر يلمنا كلنا على شكل واحد قلب واحد ..مافيش فرق مين ده ولا مين ده ...دا كان زماااان .فى رمضان المصرى

تحياتى

وكل عام وانتم بخير

ميجوووووووو