بعد سلسله من الاحداث الكويسة والاحداث اللي مش، حضرت انا وميجو ندوة للفنان محمود ياسين عن المسرح وجات سيرة الثقافه في البلد قام محمود ياسين خدها فرصه وقعد يشكر في وزير الثقافه ولا كأنه بيتكلم عنه في برنامج في القناه الاولى المهم بعد الندوة واحنا مروحين قعدت اتناقش انا وميجو في موضوع الندوة وقولتله انا معجبنيش ابداً الكلام اللي قاله على وزير الثقافه الندوة مكنتش متسجله يعني. حتى لو متسجله المفروض فنان بالحجم ده لازم يقول رايه بصراحه
ميجو: ما وزير الثقافه بتاعنا كويس فعلاً
مشمش: ياااااااااااااااالهوي هو انت بقالك قد ايه بره مصرميجو: لا بره مصر ولا جوه مصر. ده راجل فنان ومثقف
مشمش: هو انا قولت انه معاه دبلون، ما هو لازم يبقي مثقف مش وزير ثقافه وبعدين ده موضوع شخصي ماليش دعوة بيه، انا بتكلم على شغله. تقدر تشاور على اي حاجة حلوة في البلد وتقول الفضل في الموضوع ده يرجع لوزير الثقافه الفنان المثقف
ميجو: الوزير شغله انه يحط الخطوط العريضه والموظفين في الوزارة المفروض ينفذوا توجيهاته
مشمش:خطوط عريضه ايه ورفيعه ايه. انا مش هاقولك فين تأثير الوزارة على رجل الشارع. سيبك من ان القاهرة هي اللي واخده نصيب الاسد في العروض الفنيه والمتاحف ويا ريت بيتعملها دعايه كويسة. إلا الواحد لما بيدور على حدث ثقافي بيبقى عامل زي ما يكون بيدور 
على سر حربي. وبعد القاهرة تيجي اسكندرية وبعدين الاقصر واسوان علشان السياحه -يعني الكلام مش لينا - وبقيه المحافظات ولاد كلب مبيفهموش لا في الفن ولا في الثقافه. ويوم ما راحوا يا عيني مركز ثقافه يتفرجوا على مسرحيه قام المسرح ولع بيهم.
على سر حربي. وبعد القاهرة تيجي اسكندرية وبعدين الاقصر واسوان علشان السياحه -يعني الكلام مش لينا - وبقيه المحافظات ولاد كلب مبيفهموش لا في الفن ولا في الثقافه. ويوم ما راحوا يا عيني مركز ثقافه يتفرجوا على مسرحيه قام المسرح ولع بيهم.بلاش.....شوف معرض الكتاب اللي المفروض انه من اكبر الاحداث على المستوى الداخلي والخارجي. اكتر الكتب اللي بتتباع فيه كتب الدين والطبيخ. على اساس ان بفضل مجهوداته بقينا زي تور الله في برسيمه
فاكر حادثه الحجاب؟
ميجو: طبعاً
مشمش: واحد في مكانه لازم يبقى يفكر الاول قبل ما يتكلم. ولما الكلام يخرج من بقه لازم يتحمل مسئوليته كامله ويدافع عن وجهه نظره. لكن لما الدنيا قامت ومقعدتش. جاب ورا وانتصر الحجاب بالصوت العالي والتهديدات بالقتل والحرق وإقامة الحد على الوزير المثقف الفنان. اليونسكو
ميجو: اشمعنى
مشمش: مش لما واحد من بتوع المحظورة - كل قرياته عن عذاب القبر والثعبان الاقرع والجدل الفقهي حول النقاب ابو عين واحدة ولا عنتين - وقف يزعق في مجلس الشعب ومقدم استجواب لوزير الثقافه علشان انه سمع ان في مكتبه الاسكندريه 3 كتب إسرائيليه من اصل ملايين الكتب - زي ما مكتوب عالسيت بتاعهم- قام بدل ما الوزير يقوله عيب يا جاهل يا ظلامي الكلام ده. مكتبة الإسكندرية الجديدة هدفها استعادة روح الانفتاح والبحث التي ميزت المكتبة القديمة؛ فهي ليست مجرد مكتبة وإنما هي مجمع ثقافي.
لا رد برد بنفس المستوى الفكري للأخ بتاع المحظورة وقال : ان الكلام ده مش مظبوط ولو في كتب زي كدة في مكتبه الاسكندريه هيحرقهم بنفسه. ولما بدأ الكلام عن ترشيحه لليونسكو سمعنا العبارة المشهورة بتاعته: انتبه من فضلك الوزير يرجع إلى الخلف!!!!!!!!!!!! اللهاللي كان هيحرق الكتب قعد يتكلم عن الاثار اليهوديه في مصر ودور اليهود الفعال في بناء الحضارة المصريه وحاجات جامدة جداً عن اسرائيل. طب مش اللي يقول كلمه يبقى قدها يا عم
ميجو: يا بنتي التيار اقوى منه. البلد بتتعرض لهجمه وهابيه شديدة قضت على كل مظاهر الجمال فيها. اركبي ميكروباص ولا انزلي امشي في بير ام سلطان. الجهل والقبح هما اسياد الموقف
مشمش: اما الجهل والقبح هما اسياد الموقف يبقى هو بيشتغل ايه؟!. لو مش عارف يعمل حاجة يسيب مكانه لحد غيرة يعمل. لو مفيش فايدة في البلد يبقى الحكومة تلغي الوزارة ديه من اساسه وتعمل مكانها موقف ميكروباصات افيد واوفر
على فكرة الصور الرائعه ديه من ابداعات الوزير الفنان المثقف
Love,
MishMish
10 comments:
Hi Migo and Mishmish, Actually, I agree with Migo, what happen in egypt and how many people think there will make it hard for the minister to do any...But in the same time, Mishmish is right, when you say, if he can't do his job..so leave it..that's true..But Mishmish "Do you think most of ministers do their job in the right way..!!?" By the way, I don't remember what was his name!! I mean the minister..lol
اهلا يا مشموشة
نورتى الدنيا
يا كالثو على ساندو بالزبادو بسم الله ما شاء الله زى القمر
ربنا يخليها لك يا قلبى
بالنسبة للسيد الوزير الفنان المثقف
ففى عهده ما شاء الله المد الوهابى ينتشر ويتوغل ويكفى انك تنزلى معرض الكتاب تلاقى كتاب كيف تشرب بول الابل بالطريقة الشرعية
وروحى رضعى الشحط زميلك يا شابه تدخلى الجنة من اوسع ابوابها
ادى الثقافة ولا بلاش
تحياتى يا جميل
هو بلاشك وزير جبان يامشمش بس انتي لو مكانه هاتبقى جبانة و اكتر منه كمان
مفيش داعي نزايد على الراجل و خلونا عادلين و بلاش رومانسية التفكير المتطرفة دي
بالمناسبة هي البت الصغيرة بتتمدد بسرعة كده ليه؟
Micheal
ازيك يا باشا وايه اخبار الحياة في الناحيه التانيه من الكرة الارضيه
بص يا ميشو الوضع يزهق لما تلاقي الناس اللي ماسكة البلد بتتعامل معاها كأنهم ليهم هدف واحد هو انهم يخربوها ويقلوا قيمتها باسرع وقت ممكن. انا بس مضايقني جداً الانحطاط الفكري للناس في الشارع مش ممكن ده البهايم بقه عندها منطقيه في التفكير عن عوام الناس
حاول كدة تفتكر من ساعه ما وعيت عالدنيا هو وزير ثقافه واحد ماتغيرش: فاروق حسني
Love,
MishMish
قطوطة
عقبال ما يبقى عندك بنوته امورة ذي ساندووووووووو
عارفه بمناسبه معرض الكتاب زمان كنت بقعد من الجامعه او اخد اجازة من الشغل علشان اروح معرض الكتاب. كنت بقعد هناك من 10 الصبح لغايه 6 او 7 بالليل. وطول الوقت عماله ادور عالقاعه اللي بيصور الريس وسعادة الوزير وهما ماشين فيها. لان زي مانتي عارفه بقيه المعرض عامل زي ما تكوني واقفه في سوق الخضار. المهم لاقيت القاعه ديه ودخلتها عارفه الكتب اللي عالرفوف ايه. سلاح التلميذ والاضواء والمعاصر وكتب المكتبه الخضراء وحاجات تكسف. دخلت اسأل عن مواعيد الندوات. الموظفين قالولنا خشوا عالسايت فيه كل حاجة. جيت اخش عالسايت اللي قالوا عنه لاقيت العبارة اللي بتقول الدومين ده مادفعش الاشتراك بتاعه علشان كدة اتقفل
شوفتي المسخرة الريس بيتفرج على سلاح التلميذ والوزارة مافيهاش دعم بتاع 200جنيه يدفعوهم لبتوع السايت. دلوقتي ولا بقيت اخشه قولت بدل البهدله ادور عالنت عالكتب اللي انا عايزاها واشوفها موجودة فين وانزل اجيبها على طول
Love,
MishMish
Bastawisi
مين قالك اني هابقي جبانه.مين قالك ان الصوت العالي بياكل معايا. مين قالك اني بوطي للريح علشان تعدي. حياتنا قصيرة جداً وانا واحدة من الناس اللي معندهاش استعداد تقضي حياتها تجامل ده وتخاف على زعل ده
وده مش معناه ان الدنيا سايبه لكن في غلط وفي صح. وبعدين لو انا مكانه ولاقيت اني مش قادرة اعمل حاجة هامشي واسيبها. علشان حتى لو فقدت احترام الناس مفقدش احترامي لنفسي
البت الصغيرة مش بتتمدد ولا حاجة ديه عندها دلوقتي 4 شهور وبسم الصليب بقت زس السكر
Love,
MishMish
مشمش معاها حق
والأخ ده اللي بيشخبط علي الحيط ويقول تجردي من أبو ميت ألف دورار الحته هو سبب المصيبه اللي احنا فيها من غزو فكري وحضاري عراعيري متمثل في الحجاب والذي منه
لو كان عامل شغله صح كان الكلام ده كله ما حصلش
لكن طبعا ما ينفعش... أمال يبيع لوحاته ازاي في الخليج؟
تصدق يا حسن فكرتك عمرها ما جات في بالي
وانا عماله اقول دانا في ابتدائي كانت رسوماتي احلى من كدة بمراحل
بس هو الكلام اللي بتقوله جايز علشان الاخوة بتوع الجاز الرسم عندهم حرام. فهو بيشخبط اي شخوبطين ويبيعهالهم
Love,
MishMish
الفنانين الكبار بحس انهم بيبقوا مع الوقن نفس عينة الموظفين الكبار ، يعني لازم يشكروا فى الرئيس والحكومة والحزب الوطني الخ
محمود ياسين، عادل امام ، حسين فهمي..الخ رغم انهم ناس مسنودين على شعبية تخليهم ممكن يقولوا رأيهم بصراحة ومن غير خوف ولا حاجة للنفاق حتى ولو قالوه بشكل معتدل من غير تشنج ولا تطرف ومع ذلك تلاقيهم نسخة من جرايد الحكومة، يعني اذا كان الموظف الكبير خايف على اكل عيشه فبيقعد يشكر فى الوزير وخلافه، الفنان الكبير حجته ايه؟
مجرد برهان جديد ان النفاق والكلام غير المسنود على رأي موضوعي بقى للاسف في دمنا ومش مجرد وسيلة لعدم قطع الرزق
Black Cairo rose
هنا !!!!!!!!!!!!! يا مرحبا يا مرحبا نورك غطى على الكهربة
انا مبسوطة قوي انك بتجي عندنا ويا رب تكرري الزيارة دايماً
عندك حق طبعاً في اللي انتي بتقوليه. انا استغربت جداً من طريقه كلامة. مع انه وصل لمكانه مش محتاج معاها انه ينافق او يخاف يقول حاجة. عارفه كنت هاحترمه قوي لو سكت. على اساس اني لو مقدرتش اقول حاجة حلوة عن انسان معين مش لازم ازم فيه. خليني ساكته وخلاص
انا شايفه ان البلد خربت والسبب الرئيسي في ده انعدام الثقافه. مصر بقت عاملة زي الزريبه مفيش ذوق ومفيش فهم
إذا كان دلوقتي في مشروع عمل فيلم عن قصه حياه وكفاح شعبولا - بجد والله - تخيلي بعد ام كلثوم وعبد الحليم وعبد الوهاب وعبد المطلب. شعبولا بقه رمز المرحلة
Love,
MishMish
Post a Comment