كنت في مشوار وراكبة المترو. ميجو اتصل بيا لما رديت عليه قولتله: ايوة يا حبيبي
ميجو :انتي وصلتي
انا: لا انا في المترو
ميجو: انت بتسهبلي ايه حبيبي ديه؟!!!!!!!!! الناس تقول عليكي ايه؟
انا: هايقولوا واحدة بتحب جوزها
ميجو: واش عرفك انهم عارفين انك بتكلمي جوزك
انا: مانا لابسه دبله قد كدة
ميجو: مش لازم يكون معناها انك بتكلمي جوزك
انا: مش مهم. هايقولوا عليا بكلم واحد بحبه. الحب في حد ذاته حاجة كويسة
ميجو: بطلي فلسفه! -بزعيق - كلميني لما توصلي ومتتأخريش
يعني مش عيب لو التليفون رن وبصيت فيه وقولت ده سبع البرمبه. تلاقيه غرق لما نزلت في مشوار . مانا اصلي الخادمة بتاعته اللي خلفوه. لكن العيب اني اقول لجوزي ايوة يا حبيبي
طب انا بحب ميجووووووووووو بالعند فيكو وخصوصاً البت المحجبه اللي كانت واقفه جنبي وبصتلي بأرف ومشيت لما قولت ايوه يا حبيبي وبعدين قولت واحدة بتحب جوزها
حضرت انا وميجو مسرحيه "قاعد ولا ماشي" في مسرح الهناجر لطارق السعيد. جميله جميله القاعدة في الاوبرا بعيد عن عشوائية اللي بص لروحه فجأه لقى نفسه كبر فجأه قام اتخض
المسرحيه كانت بتتكلم عن حال البلد والناس اللي عايزة تهاجر
احلى حته موتتني من الضحك كانت واحدة ساكنه في حي راقي وخريجيه جامعه اميريكه وكانت عايزة تهاجر علشان شافت منظر خلالها قرفت من البلد وقررتسيبها ...............وبعد ما طلعت روحنا وهي بتتكلم عن جرح مشاعرها والمها النفسي ...............طلع في الاخر انها شافت واحد بيتف في الشارع
وكان في جزء من المسرحيه مشغلين اغنيه لأم كلثوم وبعدين فجأة تلاقي نفسك بتسمع في الاول خضرتك من خيبتك جرجرتك ........ جوجوجوجوجوجو
حسيت زي مايكون حد راح لازقني حته ألم
روحت مرور البساتين علشان الترخيص وبالمرة اكفر عن ما تقدم من ذنوبي وماتأخر - واللي بيروح هناك هيفهماخيراً بقى فيها نيابه يعني مش لازم نروح مرور البساتين ناخد منها ورقه نروح بيها نيابه المعادي نطلع ورقه بالمخالفات نرجع بيها مرور البساتين نحطها مع بقيه الورق
روحنا الساعه 9 الصبح ولفت نظري يفت مكتوب عليها "إذا استغرقت الاجراءات اكثر من 30 دقيقه اتجه الى رئيس الوحدة فوراُ" وخلصنا بسرعه الساعه 2 ظهراً
الحمدلله مكنش عندنا مصلحه مع مدام حنان اللي بتاخد رشوة حتى لو مش هتعملك حاجة كفايه انك واقف في طابور وحدة المرور اللي هي بتشتغل فيها وطظ في رئيس الوحدة
خناقات كتير بتكرر فيها نفس الجمله "انت عارف انت بتكلم مين؟" - مش عارفه طالما كل اللي بتخانقوا مع بعض مهمين امال واقفين ليه في الطابور مع بقيه الشعب اللي مش مهم
ا. خالد على عكس مدام حنان بيشتغل بضمير ومخدش ولا مليم
رخصه سيارة مكتوبة بخط ايد زي الزفت علشان كمبيوتر الحكومة الذكيه عطلان
عملت زي ما قولت في ردي على واحدة مفروسة في البوست اللي فات وطلبت واحدة صاحبتي كنا في المدرسة سوا من اعدادي لغايه لما اتخرجنا من الكليه سوا. وكنت بطلت اتكلم معاها لاني حسيت انها بقت سخيفه من ساعه مابتدت تروح جامع لطيف كدة عندنا ليه الفضل في تحويل المنطقة لقطعه من افغانستان
المهم المكالمة كانت لطيفه وقفلنا على اساس اننا نتقابل قريب
Love,
MishMish
10 comments:
هههههههههههههههه
و هو مال ميجو خايف من كلام الناس اوي كده؟؟
نصيحتي ليه يكبر دماغه من الناس و كلامهم على راي جورج وسوف لابيقدم ولا يأخر
بالنسبة لصاحبتك المسلمة اللى بقت تروح جامع أنا عاوز اقولك ان كل دي اشاعات على رأي سميرة سعيد و مفيش أضطهاد ولا حاجة انتي بس اللى بيتهيألك و انا على فكرة مسيحي مش مسلم
هى كلمة حبيبى دلوقتى بقت تثير القرف والاشمئزاز البنت اللى بصتلك بقرف تلاقيه بتتصبح بعلقة وبتنام بعلقة علشان كدا مستغربة ان فى ناس لسه بيقولوا يا حبيبى وبعدين انا بقولها كتير فى التليفون معرفش اقول غير يا حبيبى خلى واحدة كدا بقى تبص لى بقرف
كنت اضربها بالقلم
مبسوطة ان فى نقطة نظام اخيرا فى البلد بس ياترى لو مصلحتى مش خلصت فى خلال 30 دقيقة وتوجهت لرئيس بتاعهم هيعمل حاجه ولا هيقول بعد 30 دقيقة كمان
الست بتاعة المسجد دى الله يريحنا من العقول دى والناس اللى بتحشى لهم دماغهم بمتفجرات
مش تتاخرى تانى يا مشموشة بتوحشنى بوستاتك
مرور البساتين ده نموزجى بالنسبه لمرور السلام من اول الركنه لغاية مهندس المرور لغاية الشبابيك والموظفه
قالتلى فين الحنطور ومعرفتش وطلع فى الاخر الورقه ام عشرين جنيه وخلصت
الساعه 3 ..و
اماالصديقه بتاعة طالبان !!فهى سعيده !!
باسطووووووووووووو
ازيك يا عم
مش عارفه ليه ميجو مهتم بكلام الناس. انا عمري ماخدت بالي من الحاجات اللي هو بتكلم عنها ديه
اما بالنسبه لصاحبتي تصدق مش اشاعات
لان ده حصل وحصل وحصل
وعلى فكرة محدش قال انك مسلم
Love,
MishMish
قطوطة
انا مش عارفه ليه وشها اتقلب لما قولت واحدة بتحب جوزها
لولا كلام ميجو انا مكنتش خدت بالي منها
المهم انها ممكن تقف باهتمام تتباع خناقه في عربيه السيدات وماقوليكش على خناقات عربية السيدات
بيتقال فيها الفاظ يعاقب عليها القانون
وده بالنسبه لصاحبتنا منظر لطيف قوي
انا مش عارفه ايه المجتمع السخيف ده. بيتعمد يظهر اوسخ ما فيه في حين ان الحاجات الحلوة بيتكسف منها
بصي هو للامانه المرة اللي فاتت احنا خلصنا في المرور الساعه 4 والمرة ديه خلصنا الساعه 2 ففي تقدم
بس هي برضه مصيبه الورق
تقفي طابووووووووور طويييييييل علشان تاخدي ورقه تختيمها من شباك قدامه طابووووورررر طووووووووووييييييييل وبعدين ترجعي لطابور طووووويل فرعي جنب الطابوووووررر الطوييييل الاساسي بتقف فيه الناس اللي بتجيب طلبات
وهكذا دواليك
خمس شبابيك بطوابيررررررررر اساسيه وطوابير متفرعه طوووووووويله
تيجي على اخر اليوم تبقى نفسك تخشي بعربيتك في عمود نور وتبعيها بالكيلو
اما صاحبتي بتاعه المسجد صعابان عليا جداَ اني كنت بطلت اكلمها
مرة كان عندي واحدة صاحبتي تانيه بتذاكر معايا وقالت انها عايزة تصلي ومش عارفه القبله فين
قوتلها هي القبله شرق ولا غرب؟ قالتلي معرفش
خدتها البلكونة ووريتها الناس بيبقى وشها فين لما بتفرش في الشارع يوم الجمعه علشان الصلاة
وسيبتها في الاوضه وخرجت
فلما روحنا الجامعه تاني يوم كانت بتحكي على اللي حصل عندي
فصاحبتي بتاعه المسجد ديه قالتها - مع اننا صحاب من زمان - وانتي ايه اللي قعدك عندها. كنتي نزلتي
وانا واقفه
وكام موقف ساقع كدة. حسيت انها معندهاش دم. فبقيت اسقع لها متستاهلش اني اضيع وقتي معاها
بس بصي انا لاقيت اني بنصح الناس في البوست اللي فات. فقولت ابقى كدابه لو معملتش زي ما بقول
فاتصلت وكانت لطيفه وقعدنا نهزر ونضحك شوية وخلاص
بس انا كنت مبسوطة ان اديت الجزء اللي عليا في حل المشكله
Love,
MishMish
Soaad
ماهو اخويا قالي نفس الكلمة
مرور السلام ده نفحه من جهنم
مع ان مرور مصر الجديدة بقه بيقولوا الناس معاها ارقام ومفيش زحمة على الشبابيك والواحد بيستنى دوره
كلام كدة زي ما يكون في فيلم اجنبي
ما هي الناس ديه كلها متربية عالغالي
صاحبتي بتاعه المسجد والله كانت زي الفل ومثقفه ودمها كان زي العسل وكانت بتلبس حجاب شيك كدة
اما بعد ما راحت الجامع دمها تقل بقى زي السمنه الروابي وبقت بتلبس عبايات - جلابيه يعني - ووزنها زاااد وطباعها بقت زفت
انا مضايقه جداً منها وعشانها
يلا
نورتينا. اوعي تبطلي تيجي البلكونة
Love,
MishMish
أزيك يامشمش عاملة ايه؟ و ايه اخبار البت كرنبة؟
انا عارف طبعا ان موقف صاحبتك بتاعة التدين ده حصل انا بس بتتريق على الاقباط اللى بيقولوا ان مفيش اضطهاد زي واحد صاحبنا
غريبة صاحبتك اللى حبك معاها تصلي عندك دي و الاغرب التانية اللى المفروض الدين يخليها بشوشة و ودودة لكن خلاها عدوانية و غير جديرة بالاحترام
ايه الاخبار؟؟
وحشني كتير كتير
انا كمان بشوف اون تي في
وبرشحها لك الناس لانها قناة مصرية بجد وثقافية جدا
تحياتي والي الامام
بس عايزكوا تشربوا الشاي عندى المرا دى
مشمش
تصدقي انا بقيت اجي المدونة بس عشان اتفرج على صور ساندو؟؟
تجنن الجديدة بتاعت الكرتونة دي
باين عليكوا بتلعبوا بالبنت و فاكرين ان موارهاش رجالة يحاموا عنها
ههههههههههههه
بصي يا ستي انا مستغربة ميجو ليه اتخض لما قلتي له حبيبي
سواء لابسه دبلة او مش لابسه
طظ في الناس
الناس اتعلمت تخفي الحب فبقت وشوشها عكرة
قولي يا مشمش حبيبي و بحبك و بسوية كمان عالتلفون
و غيظي العزال من يومك
بس مش فاهمة لما صحبتك دي اتغيرت
كلمتيها ليه؟
يا خوفي يا بدران لحسن تقولك اتحجبي ولا حاجة
سلام
بنا يخليكي يا حفصفص
البت ساندو بقت زي العسل - بسم الصليب عليها
اما موضوع الكرتونة ده مش لعب. هي كتير بتقعد تعيط. قامت ماما مش عارفه تعملها ايه
لاقيتها معجبه بكرتونة فاضية عندهافي البيت راحت حطاها فيها
ومن ساعتها وهي معجبه بالكرتونة وبتقعد فيها على طول
اما بالنسوبة لمجاميجو فهو من النوع اللي بيركز في كلام الناس ونظراتهم
وعندك حق الناس لما خبت الحب وبقت تتعامل معاه على انه سر وعيب وحرام بقت وشوشها تقرف
اما صاحبتي فكلامي معاها جه من سبيل المبادرة. هي اتقلبت وبقت قليله الذوق قوم روحت بطلت اكلمها. قوم بعدنا عن بعض وخدي اللي حصل بينا ده مثال لعلاقات كتير ما بين مسيحين ومسلمين
وبعدين نصحى في يوم كل واحد فينا على جزيرتة
انا المسلمين ما يفرقوش عندي لاني قطعت علاقتي بيهم والمسلمين انا مبقتش افرق معاهم لانهم قطعوا علاقتهم بيا
وساعتها هيبقى وقوعنا في بعض اسهل من عمل كوبايه شاي
بس يا ستي
Love,
MihsMish
Post a Comment