Thursday, August 28, 2008

الله!....هو الحب بالعافيه يا عم

السيد المسئول قال :الشعب المصري بطبعه طيب - يقصد سلبي - ويتحلى بالايمان - يقصد ان الناس ادروشت بعد مافقدت اي امل في تغيير الواقع - خاصة وقت الازمات تجده لا يفرق بين الظالم والمظلوم - ما هو من الحشيش يا سعاد - ولم تقل صدمته في حريق مجلسه النيابي - يا ترى ضمير الغايب في كلمة "مجلسه" عايد على مين؟؟؟؟؟؟؟ -عن صدمتنا جميعاً ولكن هناك بعض الفضائيات تروج لعكس ذلك - رجعنا تاني لنظرية المؤامرة واننا محسودين على الآمله اللي احنا فيها والمحروسة معمول لها عمل على ارموط اهبل ومرمي في النيل - وما اسهل إجراء محادثات تليفونيه مخططه - او مقلمه لسه نتائج التحقيق ما ظهرتش - في برامج فضائية تبحث عن الاثارة دون النظر للمضمون - هيهيهيهيهيهيهيهيهيهيه ايش ياخد الريح من البلاط يا راجل

بس انا عايزة اقول للسيد المسئول انا عن نفسي ومعايا عدد لا بأس بيه من المعلقين في المواقع الاخبارية والمدونين واعضاء المجموعات عالفيس بوك ومعظم فئات الشعب شمتنا في الحكومة. اه والنعمة شمتنا ورحمة ابويا شمتنا في الحكومة وفي المجلس لا وغير كدة كمان بقيت ماسكة الريموت زي الهابله ادورعلى بيان الثورة بين المحطات. اصلي افتكرت ان في ثورة قامت لكن للاسف الثورة لسه نايمة ومش عايزة ازعاج

وكانت تعليقات الناس مابتخرجش عن واحد من تلاته: ياما ناس كانت شايفه ان ده انتقام ربنا لضحايا العبارة والمركز الثقافي وغرق الشباب في عرض البحر و...و...وكل الحاجات اللي انت عارفها ومطنش

ياما كانت ناس شايفه ان قليل البخت يلاقي العضم في الكرشه. يعني حتى يوم مالحريقه حصلت كانوا- اللهم احفظنا - الاسياد اللي ساكنين المبني في اجازة وبكدة نبقى لسه محتاجين حريق تاني

واخر مجموعه كانت مضايقه من الحريق علشان قيمة المجلس - المبني يعني - التاريخيه والجماليه وبس كدة

وبرضه سيادة المسئول ٌمصر ان الشعب دايب في داباديب الحكومة موت وبيحبها زي ما بيحب بنت خالته واللي عاجبه عاجبه واللي مش عاجبه يشد في حواجبه

Love,

MishMish

Wednesday, August 20, 2008

شعب اولمبيكي

مش عارف إزاي ماجبناش ميدليات اوليمبية في اولمبيات بكين؟


حاجة تحير...... بصراحة منظرنا كان فضحيه.... اللاعب من دول تلاقيه شحط طويل عريض وينزل الماتش من هنا ...... ياخد حته علقه ويخسر الماتش باقل مجهود من اللاعب المنافس لدرجه ان مستشفى أم المصريين واحمد ماهر شغالين على ضحايا الاولمبياد من اللاعيبه المصريين


دا حتى كرم جابر....قلنا هيجيب دهب اتغلب في اقل من دقيقتين وخد الطريحه التمام من لاعب غلبان من البانيا


وده بيفكرني بموقف تاريخي ساعه لما المصريين كافحوا وحاربوا وخرجوا الانجليز و الفرنسيين والمماليك من مصر قام الحاج عمر مكرم وصحابه راحوا لعسكري الباني اسمه محمد على وقالوله ورحمه ابوك يا شيخ لا تحكمنا


من سنه 84 واحنا عايشين على ذكرى فضيه محمد رشوان في الجودو والاسطوانه المشروخه بتاعه انه ملعبش عالاصابة بتاعه اللاعب الياباني .... بالظبط زي حكايه خط بارليف الذي لايقهر واسطورة الجيش الاسرائيلي وانا على الربابه بغني


اصلنا شعب غاوي يقف عند كل خطوة ويقعد يطبلها ويرقصلها لغايه اما يتعب وينام جنبها . احنا شعب .....مصر هبه النيل ...... وهبه بنت الجيران وحضارة السبع تلاف سنه..... وفي كل مناسبه لازم يبقى الشعار والتميمه الاهرامات وابو الهول وتوت عنخ امون واللاعب اللي ربنا ينفخ في صورته يبقى الفرعون الصغير....ابن النيل....إلخ


احنا شعب عايش على قفا الفراعنه وهما اللي بيصرفوا علينا وعاملين لنا سمعه لا عندنا تخطيط ولا فكر منظم وكل حاجة ماشيه بالفهلوة والشعارات والدجل والشعوذه. كل شوية يحضرولنا روح...ايشي روح اكتوبر .....وروح الفانله الحمرا.... وروح كاس العالم سنه 90 ..وروح طنط..... وروح يا شيخ... لحد ما طلعت روحنا


بالذمة واحد زي مايكل فيلبس جاب شأله مدليات دهب تحس انه شاريها من الموسكي مش واخدها لوحدة في مسابقه من المسابقات الاولمبية معرفناش نجيب ربعهم بكل الجيش اللي احنا بعتينه. ومع كدة ماطلعش عالتلفزيون يقول انا بهدي الميداليات لراعي الرياضه الامريكية (سيادة الرئيس جورج بوش) و لا قال انا كنت بلعب بروح حرب الاستقلال ولا الصحف قالت عليه ابن المسيسبي

وبما انها وعلى رأى مغني الجيل - اللي معرفش اسمه - الدنيا خربانه يا عم خربانه. انا عندي خطه جهنميه يمكن تحل المصيبة اللي احنا فيها ونلحق اي حاجة قبل الاولمبياد ما تخلص
اول حاجة نبعت نجيب العيال اللي عرتنا دول من الصين ونبعت بعثه تانيه يكون التشكيل فيها كدة


مثلاً في سباق الجري: احنا مش عايزين لاعيبة فرافير بيدربوا في النوادي احنا عندنا اجدع عدائيين في العالم في الجري ورا لقمه العيش وورا الاتوبيسات. الناس ديه تتلم وتطلع على بكين


السباحة الايقاعيه: واعضاء الفريق ده ساهل انك تلاقيهم في الاحياء الراقيه زي ما تلاقيهم موجودين بنفس الكثافه في العشوائيات من التطنيط على الطوب وعجل العربيات القديم علشان يعرفوا يخرجوا من بيوتهم ويرحوا على مصالحهم لما المجاري عادة تكون ضاربة


الغطس: اهو ده ملهوش حق انهم ما يلاقوش حد يمثلنا فيه. يا ناس داحنا عندنا في كل شارع بلاعه او اتنين من غير غطا وبمزاجك او غصب عنك هيجيلك يوم تاخدلك غطس في واحدة منهم. بلاش دول ناخد من بتوع العبارة اللي قعدوا في المية 18 ساعه لغايه لما جم بتوع الانفاذ لا تقولي مكنش فيه سترات نجاه ولاسمك قرش ولا ميه ساقعه. الكلام ده مايكلش معانا


سباق السيارات: ننزل نلم العيال بتوع الميكروباصات اللي بيمشوا من غير نمر ولا رخص ولا اشارات وعكس الاتجاه ونعملهم تصفيات في موقف عبود ونطلع بيهم على الاولمبيكيات ويبقى يقابلني شوماخر لو عرف يعدي من واحد فيهم او يكسر عليه. ده يبقى نهار اللي جابوه مش فايت


رمي الجله والقرص : انزل في اي حته في مصر فيها حته ارض فاضيه بتاع 2 متر * 2 مترتلاقي الحي كله عملها هدف وكله بينشن بكياس الزباله وناس بتنشن من البلكونات وناس تانيه من العربيات يعني كمان يبكون اللاعب متحرك وديه مش اي حد يعملها على فكره


المصارعه: ابطالها بنشوفهم كل يوم واقفين من الساعه 5 الفجر في طوابير العيش ودول معندهومش تفاهم. ننقى اتنين تلاته من كل طابور ونعملهم تصفيات واللي يكسب ياخد بجنيه عيش ويطلع عالاولمبيكيات عدل


التايكندو والكاراتيه: نجيب فرق الكارتيه اللي بطلعهم الحكومة من العلب في المظاهرات ونقولهم على المنافسين ان العيال دول من حركة كفايه. عليا النعمه دول يكسروا عضم اللعيبة على المتفرجين كمان

رفع الاثقال: يعني اي موظف حكومة بياخد مرتب 200 جنيه في الشهر يجبهم بصباع رجله الصغير. احكموا انتوا واحد شايل حمل مصاريف المدارس والدروس وفواتير الغاز والكهربا والميه والايجار و....و....و.....هايعجز يعني عن شيل
150 كيلو
الجمباز : احنا نلم كل الناس اللى بتزوغ فى المترو وبتنط من فوق ماكينات التذاكر وبدل مانعملهم غرامات ..ناخدهم ندربهم على الجمباز لانهم مشروع ابطال اوليمبيين
بعد مانجمع الابطال الاوليمبيكيين دول نطلع بيهم على مصنع اوليبمبيك اليكتريك ونخللي اللمبي رئيس البعثه

وانا متأكد انه بفريق زي ده هنحتكر الاولمبيكيات زي احتكار عز للحديد ومحدش هيعرف يتحصل على مفتاح حتى مش ميداليه

مش بقولكم شعب اولمبيكي


ميجوووووووووووووووو

Thursday, August 14, 2008

جاف حار صيفا ..دفيئ ممطر شتاء !!!!!

بدات اشم ريحه الجوافه ..يعنى خلاص المدرسه قربت ..وبحكم انى مدرس لغه المانيه ..شعرت بانقباض لانى راجع للغم والهم والنكد من تانى ..بعد انتخه فى البيت ونوم وراحه نفسيه ..هرجع للكشاكيل ودفاتر الدرجات والتحضير واستدعاء ولى الامر واعمال السنه وحاجات كتييييير مقرفه ومزعجه لاى بنى ادم طبيعى ..
بدات اعيد ترتيب اوراقى من جديد واطلع الكتب عشان اظبط التحضير واعمل لوحات للسنه الدراسيه الجديده ..اكتر شيئ مضايقنى هو انى حاسس انى مش بفيد العيال فى المدرسه ..مش عشان انا ماعنديش ضمير ..لأ عشان حاسس انى بنفخ فى قربه مقطوعه ..العيال مش همهم انهم يتعلمو لغه كل همهم انهم ياخدو كلمتين يرصوهم فى الامتحان وخلاص على كدا ..بصراحه مصر رايحه فى داهيه ونازله فى القاع بسرعه الصاروخ ..لان العيال دول هما مستقبل مصر ..امسك اى حد منهم واساله عن اى حاجه فى اى حاجه تلاقيه تنح قصادك وبرق عينيه وبصلك باشمئزاز ..بلاش تساله فى اى ثقافه عامه اسأله فى الكورة ..تلاقيه برضه بلاص مش ..العيال اليومين دول كل همهم انهم يضربو شعرهم سبايكى ويسمعو تامر حسنى ومحمد حماقى ويقعدو عالنت ياريت بيقرو حاجه مفيده او يعملو حاجه تنفعهم ..لا تلاقيهم قاعدين عالنت بيعملو شات وبينزلو جيمز واغانى وافلام ..الى يشوفهم قاعدين على النت يقول بيحضرو الذرة وطبعا الاهالى مغفله سايبينهم عالنت فاكرينهم بيتعلمو كمبيوتر ..وكل عيل من دول تلاقيه ماسك موبايل احدث موديل وماليه افلام جنسيه وكليبات لنانسي عجرم وهيفا ..
... صدقونى ..عندنا العيال الصغيرة فى ابتدائى حاطين افلام جنسيه على الموبايل وبيبدلوها مع بعض مش حاجه تحزن ؟
الحاجه الاهم بقى هى انى بعلم العيال النفاق ..اى والله النفاق بحس انى كداب اوى ومفقوس قصاد العيال ..يعنى الصبح اول مانروح المدرسه لازم يبقى فيه طابور ..ليه طابور؟ هو احنا هانحارب ؟ وليه كله لابس يونيفورم واحد؟ دى حاجه قديمه من ايام الاشتراكيه والملوخيه ..فين شخصيه العيل ؟ انه ازاى يختار حتى لبسه ونوجهه نقوله ان دا لبس غير لائق ودا لبس لائق يبقى استفاد حاجه وبقى عنده شخصيه ..نيجى بقى للكارثه الى اسمها الاذاعه المدرسيه الى اصلا ماحدش بيسمعها ..كلمتين فارغين، بس لازم يتقالو حسب تعليمات الوزارة وخلاص ومش مهم المضمون المهم يبقى فيه اذاعه .. فقرات تقليديه عفا عليها الزمن .من نوعيه لاتؤجل عمل اليوم الى الغد ..ومن حفر حفرة لاخيه ..وكلام اهبل العيال مش سامعاه اصلا ..ولما تيجى تحيه العلم تلاقى كله مشدود.. مع ان الطالب عارف ان المدرس بتاعه بيشتم فى سره ويلعن فى سنسفيل البلد ..لان قميصه مقطع ومش عارف يجيب قميص جديد ..او لسه مافطرش ..هو دا الانتماء؟ انا مرة كنت براقب فى امتحان عربى والعيال عندهم املاء ...الموضوع كان عن مصر.. جمال مصر وحلاوة مصر وانها هبه النيل وجوها الخلاب وترابها الزعفرانى ..تحس ان القطعه بتتكلم على هاواى مثلا او سويسرا .مع ان العيل قاعد على دسك مكسر والفصل معفن ..والعيال نفسهم عندهم انيميا حاده لا نافع معاها بسكوت خشبسكو مصر بتاع الوزارة ولا اى حاجه ..احنا بنعلم العيال اكلاشيهات محفوظه فارغه بلا معنى ولو كتب غيرها فى الامتحان ..يبقى غلط ،يعنى لازم يقول ان فصل الربيع فيه تتفتح الزهور وانه اجمل فصول السنه طقسا حتى لو شاف من حواليه ان فصل الربيع فصل التقلبات الجويه وعدم استقرار الطقس وكله تراب بسبب رياح الخماسين ..المهم ان التلميذ لازم يكتب دا فى الامتحان ولو كتب غير كدا يبقى سااااااقط ..يعنى لازم يبقى كداب ومنافق عشان ينجح
انا بصراحه محبط جداا ..ودا السبب الى خلانى فترة طويله ماكتبش اى بوست جديد ..حاسس ان الكلام ماعدش له فايده وحاسس ان البلد بقت حاله ميئوس منها ولا امل فى اصلاحها .طالما ان الجو فيها استمر..(جاف حار صيفا .. دفيئ ممطر شتاءا !!!!
ميجووووووووووووو

Monday, August 11, 2008

في عيد خطوبتنا الاولاني

هديه ميجو ليا في عيد خطوبتنا


زي النهاردة

من سنه

مكنتش عارف

مين انا

ولا انا

في الدنيا ايه

قابلتك في الطريق

من غير معاد

بعد مالفيت بلاد

قابلت قلبك البرئ

خطفني من غير مأسأله

انت مين؟

واخدني فين؟

قلتي إمشي من سكات

أرمي الماضي اللي فات

دانا ..... جايه اخدك للهنا

4/8/2008

ميجو حبيبك



I Love Migo,

MishMish

Sunday, August 3, 2008

نبتدي منين الحكاية

لو انتوا ملاحظين....انا وميجو بقالنا كتير مش بنكتب حاجة خالص ولا حتى بنعلق عند اي حد مع اننا متابعين لكل اللي بيتكب وبيتقال. ومعتقدش اننا لوحدنا عايشيين الحالة ديه. حالة الارف العام من كل حد ومن كل حاجة. بس لاقيت اني لازم اتكلم حتى لو مش هاضيف جديد لكن اهو. البلد ملوم عليها ناس من مختلف الاتجاهات والخلفيات لا تجمعهم ببعضهم غير الغباوة المفرطة. ركزوا كدة في اللي هاقوله وعايزاكم بس تتخيلوا على اي اساس الناس ديه اتكلمت ولا خدت رد فعل. يعني عقلهم كان حاضر ولا ضرابين حاجة مضروبة

بداية الارف كان خبر في المصري اليوم بتاريخ 20 / 7

تصريحات الانبا توماس في معهد معرفش ايه في امريكا
سيدنا لا فض فوه قال ايه "القبطي يشعر بالاهانه إذا قلت له أنك عربي" ومسلمين مصر بيقول عليهم "إن هؤلاء لم يعودوا اقباطاً، ولكن شيء آخر" وبعدين قدح زناد فكره وقال "لا يمكن تدريس اللغه القبطية التي وصفها باللغه الام لمصر في المدارس العامة في الوقت الذي يمكن فيه تدريس اي لغه اجنبيه"........حد يقدر يقولي ايه لازمة الكلام ده وكان طموح سيدنا ايه لما قال كدة؟
اقولكم انا

اولاً اي واحد مصري بيشغل دماغه منتمي للبلد بيحس بالاهانه لو اتوصف على انه عربي لسبب واحد بسيط احنا جدودنا كانوا الفراعنه اللي علموا الدنيا كلها الحضارة وعمرهم ماكانوا رعاه غنم رحل تاريخهم كله حروب على الميه والعشب. فنيافه الاسقف خسر بكلامة ده تأيد المصريين الحقيقين بغض النظر عن انتمائهم الديني

ثانياً تهمة التخوين او عدم الانتماء ديه اسخف واسواء تهمة ممكن انسان يوصف بيها انسان. يا سيدنا مشاكل الاقباط او المسحيين في مصر مش هايحلها المسيحيين بس لاننا لو تجاهلنا دور المسلمين في حل مشاكلنا يبقى كاننا بنكلم نفسنا. وبعدين احتياجنا للمسلمين زي احتياجهم لينا بالظبط. يعني ببساطة مها عملوا ندوات ومؤتمرات ومواقع النت تتكلم عن سماحة الاسلام وتيجي تدور في البلاد الاسلامية على مواطنين من اديان تانيه ومتلاقيش يبقى ده معناه ان كل الحورات ديه كدب وإلا يكون التسامح اللي بيقصوده معناه انك تتخلص من المختلف عنك علشان ما يبقاش في مشاكل. يبقى اللي اتقال ده مالوش لازمة حتى لو ده اعتقاد شخصي. كل واحد حر يعتقد او يفكر بالطريقة اللي تريحه لكن في كلام يتقال وكلام ما يتقالش
ثالثاً لغه ايه يافندم اللي عايز تدرسها في المدارس. هنعمل بيها ايه في الخراشوف اللي احنا فيه ده. ده الهنود اللي احنا
بنتريقا عليهم بقوا احسن مننا. طب اتكلم على انخفاض المستوى العملي للبلد نتيجه تقييد البحث العملي لارتفاع موجه الوهابيه. يعني انا افتكر لما كنت في كليه العلوم كان عندنا جزء بيتكلم عن التطور ودخل الدكتور معلم الاجيال وفتح اول محاضرة بان الكلام ده حرام بس ديه سياسه دوله اننا ندرس منهج مستورد من بلاد الكفرة. وادنا محاضرتين بالظبط وادانا اسئلة الامتحان وخلاص على كدة. علشان الكلام في التطور حرام. مع ان الطور من غير دك نسي اهم قاعدة علمية ان العلم بيتكون من بعض اراء النهاردة ممكن تبقى صح وممكن بكرة تطلع خطأ علاوة على ان التطور نظرية موجودة وعلم قائم بذاته وبتصرف عليه ملايين يبقى على الاقل لازم يبقى عندنا فكرة عنه. محدش سأله عن رايه. مش بيدور على تدريس القبطي في المدارس
المصري اليوم 24/7

علماء أزهريون يرفضون تهديدات "السياحة" لصاحب "جراند حياة" بسبب رفض بيع الخمور
الاخ بتاع الجاز جاي من بلدهم اشترى فندق كبير وعمله تجديدات وسماه جراند حياة وهو عارف كويس ان الفنادق جزء اساسي من الخدمة فيها تقديم الخمور. يعني محدش ضحك عليه. يقوم يجي هو هنا فاكرلي نفسه من بتوع الهيئة وهو اللي هينضف اليساحة من المنكر

يا بهوات التقدير بتاع الفندق وعدد النجوم بتحكمه قوانين قياسية دوليه. يعني طالما اشتغلت في حاجة لازم تتلزم بقوانينها مش هتمشي الكون على مزاجك بفلوسك اللي غرقانه جاز. وبعدين بتوع الازهر وغيرهم من اصحاب العمائم ايأ كان انتمائهم لازم يعرفوا انهم من ساعه مابقى لهم صوت والبلد خربت. بتاع الجاز زعلان من الخمرة محدش قاله يشرب منها. عايز فندق طاهر يروح على السيدة زينب او الحسين ويعمل لوكاندة يمسيها اهل البيت ويشرب الناس فيها تمر هندي وعصير قصب

وبعدين توالت الاحداث الكئيبة ورا بعضها
ازمة البنزين: وديه طبعاً مش مشكله لاننا من ساعه ما مسكتنا الحكومة الذكية واحنا نخرج من ازمة نقع في واحدة تانيه.
بس احلى حاجة بقه في الموضوع هي تصريحات«مسؤول البترول»: الطوابير تعني وجود المنتج!!!!!!!!!!!!!!!!!!!!!!مع احترامي لكلام سيادتك وليكن ما يكون إزاي يعني يا باشمهندس
اعتقال شباب 6 ابريل: العيال دول كانوا ماسكين علم مصر -اللي هي البلد اللي احنا فيها والسيد وزير الداخليه بيشتغل فيها - وبيغنوا اغاني وطنيه في ذكرى انقلاب العسكر او زي ما بيقولوا عليها في التليفزيون - ثورة يوليو- ايه بقه الازمة مش فاهمها. طب ما هو محطات التليفزيون اللي مملوكة للحكومة ومحدش بتفرج عليها -ولا حتى الحكومة بس هما مش قايلين - كانت مليانه اغاني وطنيه وافلام وطنيه من نوعيه على ابن الجنايني اللي عايز يتجوز انجي بنت البرنس ويقعدها في البيت مع امه تخبز عيش وتحلب الجاموسة وتزغط البط وتلبس جلابيه وطرحة وتقعد في البيت تستنى حالظابط لغاية لما يجي من الشغل
يعني الشباب يدوروا على شغل ما يلاقوش تقولوا عليهم عاطلين. يشتغلوا تدوهم مرتبات هزيله ماتكفيش تمن المواصلات وخصوصاً بعد الزيادة المباركة في تمن البنزين ما يبقاش قدامهم غير الرشوة والاكرميات علشان يمشوا حالهم تقولوا الفساد انتشر بشكل كبير كأنه مش تطور طبيعي للحاله الساقعه. يتحطوا في مركب صيد ويعدوا بيها البحر ويتنيلوا يموتوا وبعد ما يتكرموا اصحاب البلاد التانين ويلموا اللي فاضل من الشباب في علب ويبوعتوها تقوموا حتى في موتهم مش عايزين تدوهم لقب شهداء وسمتوهم طماعين. يبعوا نفسهم لليشتري ويعملوا جواسيس تمسكوهم بتهمة التخابر ومحدش حاول يعترف ان فشل الدولة والحكومة فإنها تلبى احتياجات شعبها الاساسية هي الخيانه بعينها. يقولوا طب نصلح بلدنا علشان نعيش فيها ويحاولوا يشاركوا في الحياة السياسية تقبضوا عليهم. يسبوهم من الدنيا كلها وينضموا للجماعات الدينيه علي اساس طالما ملناش في الدنيا نبقى نحاول نظبط الاخره تقبضوا عليهم. حتى لما رفعوا علم بلدهم وعنولها اتقبض عليهم بالذمة مش مكسوفين من نفسكم

السلام98
وطبعاً قضية الساعه وكل الساعه واللي الفساد فيها ظهر بشكله وعنوان بيته ورقم تليفونه واسماء جميع المتعاملين معه مش محتاج تعليق وما ينفعش نقول عليه حاجة. يعني لما الواحد تتسحب منه الرحضه مرتين ياخد سنه سجن - قانون المرور الجديد- لكن لما يتسبب في موت1034 بني ادم ما ياخدش حاجة خالص
يبقى مينفعش الواحد يقول اي حاجة
كنت من كام يوم كنت في قصر الرياسه عند سيادة رئيس الجمهوريه وقال احنا محتاجين "شوية إيجابيه" وانا هنا انطلاقاً من توجيهات السيد الرئيس شايفه ان الحل هو


Love,


MishMish

There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق