Thursday, March 27, 2014

إيران


عارفين حكايه ايران؟ 

إيران بلد ليه حضارة من اقدم حضارات العالم وبلد غني بالموارد الطبيعية ... تملك ايران تاني احتياطي غاز ورابع احتياطي نفط على مستوى العالم


كان ملك ايران يسمى "شاه" وكانت سلطاته رمزية واما السلطات الفعليه فكانت في يد رئيس الوزراء ... 
وطبعا اي دولة تظهر فيها كميه النفط دي بتبقى فجاه محور اهتمام الدول العظمى 

ولان شاه ايران كان زيه زي اي حاكم متخيل ان البلد اللي بيحكمها هي العزبه اللي ورثها عن جده الباشا ... فكان سايب للشركات الامريكيه والبريطانيه حق استخراج النفط وتصديرة مقابل مساندته واحتفاظة بالعرش وتسليم جزء هزيل من الارباح لخزانه الدولة 

في سنه 1951 امم مصدق - رئيس الوزراء وقتها - صناعة النفط لتصبح صناعة وطنيه ربحها بالكامل مخصص لإيران وطبعاً ده معجبش الدول العظمى اللي لاقت نفسها طلعت من المولد بلا حمص ... فضلوا يسخنوا البلد بالاعتراضات والاعتصامات وتحريض عوام الشعب (اللي افقرهم الشاه بسياساته) على مصدق لغايه لما الاوضاع خرجت عن السيطرة وحصل انقلاب عسكري عليه تحت اشراف وتخطيط كرميت روزفلت - حفيد الرئيس الامريكي 

وطبعا لان مصدق مكنش المشكله ... فضلت المشاكل تزيد و الاعتراضات والاحتجاجات تزيد وفي وسط ده كله لازم ناخد بالنا ان الشعب الايراني شعب متدين بطبعه  فدخلت مزايدات رجال الدين على الخط ورددوا الخطاب الوحيد اللي حافظينه وهو ان انهيار البلاد والفساد سببه البعد عن الدين
و استمرت الاضطرابات من المعارضه ورجال الدين وخصوصاً (ايه الله الخميني) لغايه سنه 1978 لما الشعب لاقي ان مفيش قدامه غير الثورة

وانتفض الشباب الايراني فجأة وانتشرت الثورة في البلد كلها .... ثورة ضمت القوميين والعلمانيين والاشتراكيين والماركسيين ورجال الدين واللي كان صوتهم الاقوى نتيجه تحكمهم في شبكه المساجد في طول البلاد وعرضها
والغريب في الوقت ده ان الثورة اهدافها كانت الاصلاح السياسي والاقتصادي الا ان رجوع ايه الله الخميني من منفاه في فرنسا كان واحد من ضمن اهداف الثورة!

الحالة الثورية خدرت وعي الشعب والقادة السياسيين على حد سواء فمكنوش شايفين مشكله في قيادة رجل دين للدولة 

رحل الشاه عن ايران في 16 يناير 1979 وفي 1 فبراير 1979 ظهر من باب الطائرة (ايه الله الخميني) بوجهه العابس وحواجبه الكثيفه عائداً من منفاه 
وبما انه كان رمز من رموز الثورة وكان استقباله مذاع على قنوات التليفزيون فعندما سُئل: كيف تشعر اليوم بعد عودتك الى ايران ؟
كان رده: ما من شعور لدي!

وكان الجيش مازال على ولائه للشاه واوضح انه لن يسلم البلاد لاي تيار قد يؤدي الى انيهارها ... وكانت في نفس الوقت خطب الخوميني كلها تدور حول قيام الدولة الاسلامية ولم يذكر الثورة ولا اهدافها لا من قريب ولا من بعيد ... واستطاع تأليب الشعب على الجيش والشرطة فهاجم الناس مراكز الشرطة وانضم كثير من الجنود والضباط الى صفوف الثورة وفي نهايه الامر اضطر الجيش ان يعلن انه سيقف على الحياد وسيترك الحكم

ثم سقطت ايران في يد الخوميني فكانت اول دعوة اطلقت في البلاد بعد انتفاضه شعبيه عظيمة وثورة اشترك فيها الجميع ... ثورة استبدلت الملكيه بنظام جمهوري حديث ... هي إلزام النساء بوضع غطاء الرأس .... فاصبح الحديث عن اهمية تغطية الشعر هو الشغل الشاغل للجهمورية الحديثه 

وطبعاً حال جمهوريه ايران الاسلاميه معروف للجميع ... اما بالنسبه للاوضاع الاقتصاديه والسياسه اللي كانت سبب قيام الثورة بالاساس فهي كالاتي:
1- معدل تضخم وصل ل 40%
2- بطاله 14.6%
3- عزلة على مستوى السياسه الخارجيه ونظام قمعي داخلي
4- 8 سنين حرب مع العراق
اما بالنسبه للنفط فالمنتفع به حالياً الصين واليابان



على فكرة مش عيب اننا نعترف ان الثورة فشلت ... يعز عليا فعلا اقول كده لكن مش معقول نفضل ساجنين نفسنا في ذكرى الثورة وحالنا دلوقتي بقى ميفرقش كتير عنه قبل الثورة ان مكنش اسواء ... اهي بلد كانت زي الفل اهي والثورة حكمت فيها ايه اللي حصل يعني .... الوضع بقى اسواء 100 مرة على الاقل والجاز بدل ما كان بتاخده امريكيا خدته الصين ... اما المواطن الايراني فهو مازل متنيل من ساعتها

منقول بتصريف من كتاب - ايران تستيقظ ... مذكرات الثورة والامل

Love, 
MishMish

Saturday, January 18, 2014

فيلم : فيس فوخس


من كان بالامس كنبه ..اصبح اليوم ثائرا ..ومن كان ثائرا بالامس اصبح كنبه ..ومن كان يروج لنعم انها من الجنة ..اصبحت نعم تعتبر كفرا ..ومن كان يلعن فى الجيش ..اصبح الان يصفق له ..ومن كان يصفق للجيش اصبح يلعنه..والنخبه اصبحوا عملاء .والعملاء اصبحوا نخبه ..والثوار فلول ..والفلول ثوار ..ومن كان معى اصبح ضدى ومن كان ضدى اصبح معى ..تبدلت الادوار والمواقف والمبادئ فى الفترة بين 25 الى 30 اننا فى نهايه الفيلم يا سادة ..وقبل ان يموت الشرير سيشوه وجهه ..اقصد وجوهنا ..ليترك فى وجوهنا علامة غائرة ..تحتاج  الى  جراح تجميل ماهر ..قد ينجح او لاينجح
ميجووووووو 
ميجووووووو

Tuesday, April 30, 2013

احييييييييييييييييه .... لقد وقعنا في الفخ!!

وقع تحت ايدي كتاب اسمه "حفارو القبور" - الحضارة التي تحفر للإنسانيه قبرها - تاليف روجيه جارودي

الكتاب تقريباً اتكتب بعد حرب العراق 1992 واول طبعة عربي منه كانت 1995

الكتاب كله مهم بصراحه .... انا مش عارفه اطلع منه مقتطفات لان كل سطر فيه مرتبط باللي قبله واللي بعده فتحس انها حوسه واحدة واقعين فيها كلنا

اللي يخصنا منه بشكل مباشر الجزء ده
"لقد غدت مصر بإعتبارها كياناً مركزياً مجرد جثه هامدة، لا سيما إذا أخذنا في الاعتبار المواجهات التي تزداد حدة بين المسلمين والمسيحين وينبغي ان يكون تقسيم مصر الى دويلات منفصله جغرافياً هو هدفنا السياسي على الجبهه الغربيه خلال سنوات التسعينات
وبمجرد ان تتفكك اوصال مصر وتتلاشى سلطتها المركزية، فسوف تتفكك بالمثل بلدان اخرى مثل ليبيا والسودان وغيرهما من البلدان الابعد
ومن ثم فإن تشكيل دولة قبطية في صعيد مصر بالاضافه الى كيانات اقليمية اصغر واقل اهميه من شانه ان يفتح الباب لتطور تاريخي لا مناص من تحقيقه على المدى البعيد وان كانت معاهدة السلام قد اعاقته في الوقت الراهن
وبالرغم مما يبدو في الظاهر فان المشكلات في الجبهه الغربيه اقل من مثيلتها في الجبهه الشرقيه. وتعد تجزئه لبنان الى خمس دويلات ... بمثابة نموذج لما سيحدث في العالم العربي باسره.
وينبغي ان يكون تقسيم كل من العراق وسوريا الى مناطق منفصلة على اساس عرقي او ديني احد الاهداف الاساسية لاسرائيل على المدى البعيد. والخطوة الاولى لتحقيق هذا الهدف هي تحطيم القدرة العسكرية لهذين البلدين
فالبناء العرقي لسوريا يجعلها عرضه للتفكك .....
اما العراق ذلك البلد الغني بموارده النفطية والتي تتنازعه الصراعات الداخليه فهو يقع على خط المواجهه مع اسرائيل ويعد تفكيكه امراً مهماً بالنسبة لإسرائيل بل اكثر اهمية من سوريا"
جزء من مقالة
 : "خطط اسرائيل الاستراتيجيه في عقد الثمانينيات"
مجله كيفونيم (اتجاهات) وتنشرها المنظمة الصهيونية الدولية في القدس، نشرت في عددها رقم 14 فبراير 1982 عام غزو لبنان

لينك تحميل الكتاب: 
http://www.4shared.com/office/W7-9V3E7/___online.html

Wednesday, April 3, 2013

حصل بالفعل في مجتمع متدين بطبعه

صاحب عمارة "مسيحي" اتخانق مع ساكن "مسلم" علشان مابيدفعش الايجار .... قام طرده من الشقة ورفع عليه قضيه
الساكن سدد الإيجار المتأخر في المحكمة ورجع الشقة تاني
السكان مسكوه مرة وهو نازل مع واحدة - لا مؤاخذة - وكانوا هايقطعوهم
قام واخدهم على جنب وقالهم "ديه  ***** نصرانية" انا جايبها علشان احط راس صاحب العمارة في الطين
.... سكتوا شوية وبعدين قالوله غورها من هنا مش عايز ارف في العمارة وسابوهم يمشوا

* الحكاية ديه حصلت فعلاً في العمارة اللي انا ساكنه فيها
MishMish

Sunday, March 10, 2013

there is something fishy

there is something fishy about 
الوضع الان
اللي انا شايفاه دلوقتي ان الاخوان بيلعبوا في مصر بطريقتين على التوازي بحيث اللي  يفلت من الاولانيه بيقع في حجر التانيه

الطريقة الاولى: هي سياسة الارض المحروقة 
اللي هي "تدمير كل ما ينفع العدو قبل الانسحاب من الارض"
وطبعاً مش هتستغرب لما تعرف ان هتلر طبق السياسه دي في الحرب وزي مانت عارف ان هتلر كان ليه علاقه كلها مودة بالشيخ حسن البنا
فالاخوان بيخربوا في البلد بطريقه يستحيل معاها اي محاولة للإصلاح ... كفايه اننا مطالبين بعد ما يمشوا اننا نرجع البلد تاني لحالتها يوم ١١ فبراير ٢٠١١ وبعدين نبتدي نظبطها .... اما عن جهل وسوء إدارة او عن علم وتخطيط مسبق لمصلحه الضامن والكفيل
اللي بيحصل دلوقتي نسف لأساسات الدولة علشان تتطربق على دماغ اللي فيها ...... مش مجرد احلال وتبديل
لان شعارهم "الاسم هو الحل" اللي كانوا بيتاجروا بيه ثبت فشله .... لسبب وحيد بسيط انه الاسلام مكنش مشكله علشان يكون حلها
وانكشفوا اخيراً للعوام ... فطالما هما مش هايستفيدوا ... يبقى محدش تاني هايستفيد..... خالص!


الطريقه التانيه: هي طريقه تجار الحرب
ودول اعزك الله كائنات رُميه ... بتعيش على الجيف ... تلاقي الواحد منهم واقف يتفرج على الحيوان المفترس وهو بيجرى ورا الفريسة ويقتلها وياكل اللي ياكله ويسيب الباقى ... تجي بقه الرُميات ديه تاكل على الجاهز من غير ما تتعب في الصيد او التدوير   
وده بيحصل دلوقتي لكل المصانع والشركات الكبيرة .... خراب للبورصه بسبب قرارت ملهاش معنى غير ان اللي اصدرها عبيط وعقلة على اده وطبعاً محدش هيحط فلوسه تحت صرفه واحد عبيط ...
فتلاقيهم هبطوا فجأة على الشركة بعد ما تبقى اتكسعمت ياما يشتروا بتراب الفلوس ياما يشاركوا ياما ولو الموضوع كبير عليهم يجيبوا الكفيل القطري بتاعهم يشتري ولو صاحب الشركة معجبوش يبقى مصيره الطرد.

وبكدة يخلونا ندور في حلقات مفرغه من اللعب في البلد
علشان حتى لو سابوا السلطة ساعتها هايكونوا اشتروا الشركات والمصانع اللي قايم عليها اقتصاد البلد وبكدة يقدروا يحطوا السلطة في جيبهم

انا بصراحه مش شايفه اي بارقه امل ..... خالص!

MishMish

Tuesday, February 12, 2013

"اهلاً بكم في ارض الميعاد"

قال سائق العربة الميكروباص وهو يهدد الركاب انه قتل راكباً ولسه طالع من السجن، ثم طلب جنيهاً زيادة على الأجرة التي حددتها المواثيق الدولية، وادار في مسجل العربة شريطاً يحض على طاعة السائق وإن فسق. ولإن سرق فهو نعم الرفيق ومرشد الطريق، وكان الناس في داخل الشريط يصفقون وفي داخل العربة ذاهلين.

قابلنا كميناً فطلب منا السائق ان نربط الدعم، وبعد الكمين طلب منا ان نرفعه. 
قال احد الركاب - يبدو انه رئيس تحرير العربة - "لقد وهبنا الله هذا السائق ويجب ان نحافظ عليه" فرد عليه رجلاً عجوزاً يبدو انه لم يشاهد مسلسل الملك فاروق "حافظ عليه لوحدك".

فرد عليه شاب ملتح "استغفر ربك واطعم عشرة سائقين" وقالت سيدة على رأي المثل: "الدقيق الابيض يباع في السوق السوداء".
كانت العربة على وشك السقوط في النيل عندما قال السائق: "موافقين على الزيادة ام لا؟" ثم نظر الى الركاب وقال: "موافقة". قال الرجل الذي لم يشاهد مسلسل الملك فاروق: "انا مش موافق ومش دافع" فأسرع السائق بالعربة في اتجاه لوري فنطاس محمل بالغاز المدعم، واقسم انه سيرتطم به ويفجر العربة بمن فيها. ففرح الشاب الملتحي وهلل قائلاً: "استشهادي ورب الكعبة".

فقال شاب متأنق: "انا لست استشهادياً انا ح ادفع الجزية دعني انزل". بينما قال رئيس تحرير العربة "سر ونحن وراءك" فقال العجوز للسائق: "تقصد نسير ورائك في جنازتك".

غضب السائق واقسم انه سوف يرتطم بعربة الغاز المدعم لا محالة، وراح يبحث عنها حتى وجدها وسار وراءها من شارع الى شارع حتى خرجت الى الصحراء. ساعات طويلة وهو يطارد عربة الغاز المدعم في الصحراء وكاد يقترب منها عندما قرأ لافته على الطريق تقول "اهلاً بكم في ارض الميعاد"


بعد عام من رحيل الرائع جلال عامر يتحدث وكأنه بيننا اليوم
"مقالة بعنوان "الباص والفنطاس 
من كتاب مصر على كف عفريت

Sunday, February 3, 2013

يتهيألي ان ده تار بايت والله اعلم

بطلت اتفرج على اي حاجة وبطلت اتابع اي توك شو وبطلت اقرا جرايد علشان حاسه اني مش قادره احزن تاني ... حزنت حتى احترق الحزن 
كل اللي بقيت اسال عليه هو: في حد مات؟ صغير؟ الله يرحمه ... كام واحد اتفبض عليهم ... ربنا يتولاهم ... يا رب انت سندهم في وسط اللي ملومين عليهم
ومع ذلك مش قادرة افك دماغي من اللي بيحصل ... لما بقعد مع نفسي واحاول اوصل الخطوط ببعضها واركز في اللي ما بين السطور ... بلاقي اني اقدر اقول  وبمنتهى راحة الضمير ان مصر واقعه تحت ايد ناس بتخلص منها تار ...

بص كدة مثلاً عن لصوص الثورة اللي ماليين الدنيا كلام ومتاجره بيها ... اللي كانوا "قاعدين كلهم على حجر امن الدولة" .... بيجروا ثورة قامت تقول كفاية ظلم بقه كدة كتير. المصرى اكبر من انه ينذل ... الى كلام عبثي عن القصاص ودم الشهداء ... وكل يوم واحد يموت وتتشكل لجنه ويقولك هياخد تعوضيات زي شهداء الثورة ... وكانها مش ثورة للكرامة لا ده مشروع استثماري ... اعترض ... نقتلك ... تبقى شهيد ... نصرف لاهلك تعويض .. يشتروا بيه تلاجه ... يلزقوا عليها صفحه الجرنان اللي فيها صورة جثتك وتاريخ الوفاه
حولوا الثورة اللي قالت عنها النيويورك تايمز "مصر: الثورة الثقافيه" الى مصيبه سودا حطيت على البلد وطلعت اوسخ مافيها

كون ان الاخوان يتختاروا تمثال نهضه مصر من دون التماثيل والميادين يتظاهروا عنده لتأييد قررات المورسي والاعلان الدستوري مش ممكن تبقى صدفه خصوصاً لو عرفت ان التمثال ده اتعمل في الفتره اللي مصر كانت بتطالب فيها بالاستقلال (1918 - 1919) بأكتتاب عام للشعب علشان يلموا تكلفه التمثال والحكومة كملت الباقي ... التمثال اللي بيشبهه مصر ببنت فلاحه رافعه طرحتها وبتبص للمستقبل وايديها على راس ابو الهول رمز اصلها ومجدها ... التمثال ده هما شايفينه انه بيصور امراه في ملابس الفلاحة المصرية ترفع عن وجهها بيدها اليسرى (حجابها) - وهو احد رموز الاسلام - بينما يدها اليسرى مفردوة لتلمس باصابعها راس تمثال ابي الهول ......  وشايفين في النحت عموماً واستخدام الاثار الفرعونيه للفت انتباه المسلمين عامه والمصريين خاصه الى العناية بالاثار القديمة وحثهم على العناية بها والغيرة عليها بعد ان كانوا لا يكثرون بها

المحكمة الدستورية اللي هي الغرض من تاسيسها مراقبة تتطابق القوانين مع مواد الدستور ومهمتا إلغاء القوانين التي تخالف نصوص ومواد الدستور ... المحكمة ديه وجودها المفروض يضمن ان الكلمة الاولى والاخيرة في بلدنا للقانون ... الحاجة لوجود المحكمة الدستورية فكرة فضلت تراوض المصريين من العشرينيات لغايه لما صدر قرار من عبد الناصر بتشكيلها سنه 1970 وترتيبها التالت على مستوى العالم ... 

اعتصامات مدينه الانتاج الاعلامي ... سيبك من اسباب الاعتصام بص لقيمه الفن المصري عموماً ... اكيد سمعتعبارة " انا بعرف اتكلم مصري" من ضيف عربي لبرنامج فيه مجموعة من العرب من جنسيات مختلفه ... افتح اي قناه عربيه في اي وقت هتلاقيها بتعرض فيلم مصري او اغنيه مصريه او مستضيفه فنان مصري  ....مصر كانت جوه كل بيت في الشرق الاوسط بفنها ...  الفن المصري كان راقي وبيقدم قصص ليها معنى ساهمت في تشكيل وعي الجماهير وعاداتهم. لما وقع الفن المصري دخل التركي بسخافته واعتمادة على غباء الجمهور وصبره الطوووووووووووووويل في ان الواحد  يغيب عن المسلسل تلات سنين وميلاقيش حاجة جديدة حصلت ... ومع كدة اتفتحتله كل المحطات والبيوت
ومع كدة
تلاقي محطات زي الجزيزة مباشر مصر وام بي سي مصر وروتانا مصرية وغيرها من المحطات اللي ملاكها مش مصريين ومع ذلك فاتحين قنوات باسم مصر واكيد مش عاملين كدة لله

ده حتى شلل الاطفال بعد ما البلد خلصت منه رجع تاني مع العائدين من باكستان وافغانستان 

قيس بقه على كدة: الجيش والشرطة (مع تحفظي على اداهم)، المسيحيين، وسطية المصريين، المرأة، حقوق لطفل، السياحة، قناة السويس، الزراعة، الصناعات المحلية، ....

في حد قليل الاصل بينتقم من مصر ....
MishMish



المصادر
http://www.nytimes.com/2011/02/20/books/review/Creswell-t.html?_r=2&scp=4&sq=egypt&st=cse&

http://albayan.co.uk/article.aspx?id=1173

http://www.akhbarak.net/news/2012/12/01/1668283/articles/10347086/%D8%A7%D9%84%D8%B1%D8%A6%D9%8A%D8%B3_%D9%88%D8%A7%D9%84%D9%85%D8%AD%D9%83%D9%85%D8%A9_%D8%A7%D9%84%D8%AF%D8%B3%D8%AA%D9%88%D8%B1%D9%8A%D8%A9_%D9%88%D8%AC%D9%87%D8%A7%D9%8B_%D9%84%D9%88%D8%AC%D9%87

Sunday, January 20, 2013

انها الفوضى .... تقريباً

زي ما انتوا عارفين ان الاخوان عمرهم in their wildest dreams ما تخيلوا انهم يحكموا بلد بحجم مصر على الاقل في الحقبه الزمنيه اللي احنا فيها ديه .... 
فلما حصل اللي حصل واتقلبت الايه وبقوا هما السلطة وبطلوا يمثلوا معارضه .... الامور بهوقت وفرطت منهم عالاخر ...خصوصاً انهم استلموا البلد خربانه زي ماحنا وهما عارفين كويس وديه مش حاجة تحسب لهم بالعكس ده دليل على انعدام فكر ورؤيه ... هما كانوا نواب في مجلس الشعب وكانوا اعضاء في نقابات ورجال اعمال ... فمش معقوله انهم يكونوا اتفاجئوا بحجم الخراب ... لاني وفي اعتقادي الشخصي شايفه ان كل الخيوط (اللي احنا بنشوفها) داخله في بعضها على الارض من منظورنا احنا هي في الواقع خيوط مترتبه بمنتهى الدقه لو بصينلها من فوق بعين اللي في السلطة اياً كان هو مين
انا حاسه كمان انهم قلقانين اكتر مننا ... احنا قلقانين لا نضطر نتخلى عن الحاجات اللي قايمه عليها حياتنا وبتمثل وضعنا الاقتصادي ... انما هما قلقهم رهيب: قلق من ضياع حلمهم اياً كان اسمه ايه ......و انهم ممكن يكونوا اخر جيل في تنظيم فضل 80 سنه يحفر انفاق  وينخور في اساسات دول كتير لغايه لما فجأة بقى تنظيم دولي انفاقي

انا بجد وربنا مش عارفه هما ناويين يستمروا ازاي؟
البلد مش بتقع ... البلد بتنهار ... واياً كان تعدادهم المعلن على المستخبي على سلفينهم على المتعاطفين معاهم هيقفوا ازاي ضد شعب 40% تحت خط الفقر (اللي هو نصيب الفرد في اليوم اقل من دولار اللي بقى 6.605 في البنك اما في السوق السودا عدى الـ 7 جنيه) يعني بالصلاه عالنبي المفروض عيله مكونة من 5 افراد مثلاُ يكون دخلهم اليومي حوالي 33 جنيه علشان يعيشوا على خط الفقر اضرب في 30 يوم في الشهر يعني حوالي 990 جنيه ... حاول بقه وانت فرد .. مواطن مع نفسك تعيش الـ 990 جنيه دول طول الشهر مش هاقولك انت واسرتك وقولي شحت على يوم كام

اللي متغطي بالامريكان عرياااااااااااااااااااان ... يا عريان. امريكيا بلد انتهازي بامتياز و اي حد عنده تقاوي مخ لازم يكون فهم ان امريكيا بكل شبورة الديموقراطيه وحقوق الانسان والمساعدات والحوارات ديه هدفها الاول والاوحد انها تلاقي حليف (او بمعنى ادق غفير) يحرس لها مصالحها ويأمن لها احتياجاتها والا شبورة الديموقراطيه هتضرب في وشه ... ولازم الحليف او الغفير يفهم كويس انه طول ما اهو واقف امريكيا سنداه وفي ضهره انما اول ما يقطع هتكون جذمتها اول جذمة هتدوس على رقبته في رحلة بحثها عن حليف او غفير جديد
اما الصغيرة قطر (تعداد سكانها 1.7 مليون نسمه) معتقدش انها عندها استعداد تصرف على بلد الـ 90 مليون مصري الى الابد حتى ولو بمقابل 


انا بصراحه مش شايفه اي حلول ولا بصيص من الامل علاوة على خوفي من يوم 25 خايفه لا يمر عادي ولا كان في اي حاجة وده معناه ان اللي احنا فيه ده هيطول
ياما يبقى في دم والمرة دي الدم هايبقى للركب وكله هايضرب في كله ... الاسلاميين هاينزلوا يجاهدوا والالتراس هاينزلوا يجيبوا حق الشهداء الـ 74 والثوريين اللي بجد هاينزلوا يعلموا على الداخليه والغلابه اللي هاينزلوا من الجوع وعندهم حقد على اللي عملوا الثورة واللي جابتهم الثورة ده غير الضرب اللي هتضربه مؤسسات الدولة الرسمية للحفاظ على القانون 
MishMish

Monday, January 14, 2013

حدث فى التسعينات

كان محمود الجوهرى او (الجنرال )كما يلقبونه ...صاحب انجازات فى الكرة المصريه ...وايضا صاحب اخفاقات كبيرة وكان يعاب عليه اختيار اللاعبين بطريقه المحسوبيه والوساطه ...ومن جهه اخرى كان طه اسماعيل أو (الشيخ )كما يلقبونه..يملأ الفضائيات ضجيجا و يشكو من عدم وجود فرصه ليدرب المنتخب القومى وإنه لو درب المنتخب ستحدث نهضه غير مسبوقه فى الكرة المصريه ..وان الجنرال يحتكر تدريب المنتخب ...الى ان اخفق الجوهرى فى مرة ..ليحصل الشيخ طه على الفرصه ...ولأنه كان محللا نظريا فقط .ولأنه كان لا يهتم بالخطط او التدريبات بل كان يختار اللاعبين ذوى الميول الدينيه .. نال هزائم متواليه فى بطوله افريقيا ويضيع الفرصه من يديه .بالرغم من تبريراته السخيفه المعتادة التى تعتمد على نظريه المؤامرة ..لتصبح الجماهير مستعده نفسيا للهتاف مرة اخرى : جوهرى ..جوهرى برغم اخفاقاته ..ليعود محمولا على الاعناق
ميجوووووو

Wednesday, December 19, 2012

الايام دول ...وكله بيجي على حجر كله يا صاحبي


  • اللي كان زعلان قوي على مبارك ومكنش شايف انه بقاله 30 سنه بيخرب فيها وقال على الثورة مموله وقام بيها الخونه والعملاء وفضل حابس نفسه في نظرية المؤامرة ... لبس حكم الخونة والعملاء 
  • اللي زاط زي العبيط وفضى الميدان وخلص الثورة وروح بيتهم واداها للعكسر (زمايل المقلوع اللي كانوا قايمين نايمين مع بعض) بيضه مقشرة .... العسكر طلعوا تيت امه 
  • المسيحيين اللي في قطاع كبير منهم مدجن ومبيتكلمش غير في اللي يخصه ... كنيسه اتحرقت او حد مسيحي اتقتل وعايشين مدروشين ومختفيين ... زعلوا ليه لما طلعوا في ماسبيرو والجيش كان بيجري وراهم بالمدرعات في الشارع في مشهد عبثي اظنه محصلش في الحرب مع اسرائيل ومحدش اتعاطف معاهم وفي ناس منهم لسه مقبوض عليهم لغايه دلوقتي ... هو حد عارف انتوا مين ولا حد بيشوفكم في اي حته؟
  • الاخوة بتوع عجله الاستقرار وحزب الكنبه وخلونا نخلص اللي قالوا على ست البنات هي ايه اللي وداها هناك ... احب اقولهم الف مبروك على علقه الاتحادية وحكم الاخوان ومليشيات الجماعة . يمهل ولا يهمل
  • المسلمين اللي صدقوا ان الاقباط بيعتدوا على الجيش المصري وكانوا مصدقين ان الاقباط سرقوا فعلاً المدرعات وداسوا بيها على بعض علشان يورطوا الجيش وقاصري الفكر والعقل اللي فاكرين ان مفتايح الجنه معاهم وقالوا دول ما يتقالش عليهم شهداء علشان كفار ... احب اقولكم انتوا في عرف الاخوان والسلفين كفااااااااااااااااااااااااار في حين ان النصارى اهل ذمة هاهاهاهاههاهاها.
  • القنوات الفضائيه اللي تحت حصار الشيخ بيبسي واتباعه زعلانين ليه مش هما اللي طلعوه هو وكل معتوه وضيعوا وقتنا معاهم في حورارت بيزنطيه ملهاش اي معنى وساهموا في تلميعهم ونشر وساختهم الفكرية على الملاء؟ .... مش خدتوا فلوس الاعلانات ... ادفعوا التمن على ايدين حازئون.
  • السادة ظباط الداخليه اللي مبيتشطروش غير على النشطاء السياسين وبتوع الاعتصامات اللي اكيد مش غاويين مرمطة ونوم في الشوارع واللي كانوا  حاضرين وشايفين حفلات تعذيب معتصمين الاتحادية على ايدين مورسي وميليشياته ... جالكم اللي يحط السيف على رقبه مدير مباحث الجيزة علشان يفرج عن 4 ارهابين انتوا عارفين ومتاكدين انهم خطر على المجتمع بجد.
  • الاخوة في الجيش مش فضيتوا اعتصامات بالقوة وطرطروا وسحلتوا وعريتوا وقتلتوا ولاد بلدكم اللي مكانوش عارفين يدافعوا عن نفسهم قدامكم ... اديكم بتتقلوا من غير ديه ولا تمن على الحدود وانتوا مش قادرين تدافعوا عن نفسكم.
  • الاخوة اللي كانوا مقطعين نفسهم على غزة لمولها تبرعات وعملوا لها قوافل طبيه في حين ان الصعيد مهري فقر وامراض وجهل .... غزة كويسه كلموني عن مصر بقه؟
  • اللي طول الوقت بيتريقوا على الصعيد وبتعاملوا معاه على انه منفى .... الصعيد هو اللي بيدمر اي فرصه ليكم في التطور في كل استفتاء او انتخاب ... اتريقوا بقه.
  • اللي كانوا بيقولوا احنا عايزين حاكم مؤمن يراعي ربنا فينا ... اهو جالكم اللي بيقول على نفسه "انا ربكم الاعلى" ..... شخصياً.

MishMish

Monday, December 10, 2012

ملاحظات ...مقلقه

 (1) يوم الجمعة اللي فاتت مخرجتش وفي مناسبه زي ديه انا متعودة اسمع خطبة الجمعه من ميكرفون الجامع اللي بعدنا بعمارتين (بحكم علو الصوت علاوة على ألمعيه الخطيب ...راجل علمه واسع ومبهوق بطريقه تضايق)
المهم خطبه الجمعه كان فيها 3 مواضيع رئيسية
 1- حرمة دم المسلم على المسلم           2- طاعة الوالدين واهميتها ووجوبها على كل مسلم         3- معاداة الصلبيبن والعلمانين والليبرالين والشواذ للإسلام والرئيس المسلم 
طبعاً مع استخدام اسانيد من القران والسنه (ساعات مابيقاش ليها علاقه بالموضوع بس هو بيحب يستعرض علمه المبهوق)
والراجل قعد اكتر من ساعه يلف ويدور في المؤامرات اللي ضد الرئيس وان ازاي العالم كله عايز يوقع الاسلام بتعطيل الريس مورسي وخلصت الخطبه بفاصل طويل من الادعيه بالتوفيق للريس وجماعته وبالثبور وعجائب الامور لكل معارضيه
الخطيب ابو ذمة مبهوقه اساء استخدام ميكرفون الجامع ووقفته فيه بالكدب والتحرض بالقتل سواء الجسدي او المعنوي لكل معارض صليبي او موالي ليه .... تمييع شعور الناس وتحوليهم لجبلات وتهيف قيمة الحياة الانسانيه على اساس ان اللي الناس اللي ماتت او اتشلت او اتصابت دول من معسكر الاعداء .... وغير كدة كمان مقالش ولو حاجة واحدة كويسه عملها مورسي ...  ... يعني اللي راح يصلي يوم الجمعه اللي فات في الجامع ده سمع عن مورسي ساعه كامله بينما ذكر اسم الله وقرايه القران مخدتش اكتر من 15 دقيقه بالكتير قوي ...


(2) امبارح وانا مروحه على الساعه 6 م لاقيت واحدة منقبه بتعلق الورقه ديه على كوبري المشاه اللي بعدي من عليه ...كنت عايزة اقف اشكرها ...ساعتها حسيت ان ممكن يبقى في امل ...... النهاردة الصبح وانا معديه من على الكوبري لاقيت الورق ده متقطع ومرمي على ارضيه الكوبري .............


(3) فاكرين السلاح اللي طلع ايام اللجان الشعبيه .... اهو جه وقت استخدامه والمرة ديه اللي بيستخدمة بهيم معندوش عقل كلمه تلمه وكلمه تفرقه واحد منهم قال بالنص "لإننا شغالين عند ربنا، يتمكن الإخوان من حشد أعداد كثيرة فى أى وقت" - لينك المقال اهو 
بالنسبه لي اي كلام عن استفتاء او انتخابات تضيع وقت وهبل لان السلاح موجود والعدو بيحارب الاسلام والناس ديه بتشتغل عند ربنا ... الناس ديه غير بلطجيه الحزب الوطني اللي كانوا بيقفوا قدام لجان الانتخابات .... بتوع الحزب الوطني بياخدوا فلوس .... دول قاطعين وبيجاهدوا في سبيل الله ... 

(4) انا من مواليد التمانيات وعشت تسعينات ارهاب الجماعات الاسلامية وتفجيرات التحرير ومحاولة اغتيال نجيب محفوظ وبلاوي كتير كدة الله لا يعيدها ... كنت زمان وانا رايحه المدرسه اشوف واحد بدقن ولابس جلابيه بيضه قصيرة وشبب موقف شوية شباب يطلعوا تانيه ثانوي او اولى جامعه كدة وهاتك يا ودوده في اي وقت شتا .. صيف ... نهار ...ليل ... اي حاجة ...وبعدها بشوية عدد اللي بدقون في المنطقة يزيد والنقاب ينتشر وبعدها تسمع خطب الجمعه من الميكرفونات عن المجتمع الفاجر ... وبعدين علميات ارهابيه ... لحد مالجيش بنفسه هو اللي خلصنا من الهم ده ... لانهم كانوا بيصطادوا ظباط الداخليه زي العصافير 
المشهد ده رجع تاني ...كل يوم الصبح وانا نازلة اودي بنتي المدرسه الاقي واحد بدقن ولابس جلابيه بيضه وشبب موقف شباب يطلعوا تانيه ثانوي او اولى جامعه كدة وهاتك يا ودوده في اي وقت شتا .. صيف ... نهار ...ليل ... اي حاجة ..ربنا يستر

(5) اعتصام اتباع ابو اسمعين عند مدينه الانتاج الاعلامي ... ده يعتبر تدريب ومقدمات للمرحله اللي احنا داخلين عليها .... دول معندهومش منطق ولا عقل تماماً .... ممسوحي الدماغ بمعنى الكلمة... يعني الراجل ده بالذات كدب عليهم بخصوص جنسيه الحاجة وماشين وراه برضه ... راحوا اعتصموا في العباسيه واضربوا وباعهم على الهواء وماشين وراه برضه .... هما اللي دبحوا وسلحوا وضربوا متظاهرين سلمين ومع ذلك شحنهم وراه وطلعوا قال علشان تطهير الاعلام الفاسد ....... يا الله
مع ان ليهم قناه رسمية (مصر 25) والقنوات الدينيه تحت باطهم وجرنان الحريه والعداله ... بس لانهم انكشفوا وابتدوا يبانوا على حيقيتهم بجد ... فالحل هو الحجب والمنع وده اللي هايمشي على كل حاجة بعد كدة ...

الامل الوحيد في الرحيل
ارحل يا مورسي انت وجماعتك .....كفايه كدة ... خربتوا البلد
MishMish

Sunday, November 25, 2012

دانت جاي بـ 51.7% اومال لو كنت جايب 90% كنت عملت فينا ايه؟

 ألا تكون نسيت انت جيت إزاي؟ 
ألا تكون نسيت ان الناس عصرت على نفسها لمون علشان تنتخبك؟
ألا تكون نسيت ان اللي اعضاء جماعتك قالوا عليهم بلطجيه زي اليومين دول السنه اللي فاتت هما السبب في اللي انت فيه دلوقتي؟
ألا تكون فاكر انكوا اغلبيه ... طلعتوا ولا نزلتوا انتوا جماعه ... ديه بلد فيها شعب مرزوع فيها من قبل التاريخ ...من ايام ما كانت دولة عظمي يحكمها القانون والعالم كله بيتنطط على الشجر زي القرود.... دانت جاي بـ 51.7% اومال لو كنت جايب 90% كنت عملت فينا ايه؟
ألا تكون فاكر ان الهتيفه اللي لموهملك من الساعه 3 علشان يأيدوا قرارات مهماش عارفينها هاينفعوك ...... فاكر اخره الرئيس المؤمن كانت ايه ... خد بالك لان اللي بياع دماغه لغيرة عبيط وولائه مش مضمون
طب ماكنت تفضل رئيس للحزب وكنت طلعت انت واهلك وعشيرتك مظاهرات واعتصامات وكدة طالما انت مبتتكلمش غير معاهم
 فكرتني بواحدة صاحبتي - الله يمسيها بالخير - اول ما اتعلمت السواقه ... كانت بتسوق العربيه وكانها سايقه موتوسيكل ... مركزة مع الناحيه اللي هي قاعدة فيها ... اما الناحيه اللي جنبها فمتجهلاها تماماً ... طول ما هي ماشيه في الشارع تسمع صوت المرايه وهي بتخبط في - لا مؤاخذة - موخرات كل اللي ماشي جنب العربيه 
باااااك .... آآآآآآآآه .....باااااك .... آآآآآآآآه .....باااااك .... آآآآآآآآه.....باااااك .... آآآآآآآآه يلعن تيت ام اللي ركبك عربيه

وبعدين اعلان الديكتاتوريه ده علشان خفت لا التاسيسية تتحل فبتحصنها ... احيه على ديه تأسيسية لامه السوابق وقتالين القتلى والمتحرشين بالاطفال الا من رحم ربي
وخايف على مجلس الشورى ... اللي محدش نزل انتخاباته ... 

عايز تحاكم قتله الثوار ... محاكمة الثوار حلوة مفيش كلام
هل عندك تقرير رسمي عن عدد الثوار دول؟
تعرف اسماميهم؟ تعرف كام واحد اتصاب؟ عارف كام واحد اطفى نور عينه؟ 
وبتمن عليهم بالتعويضات ... يا سلام ... حاجة ظريفه والله ... واللي ابنه مات ياخد تعويض يشتري بيه تلاجه يحط عليها صورة الشهيد اهي تبقى حاجة من ريحه المرحوم ... التعويضات حلوة مفيش كلام 
اللي انت مش واخد بالك منه ان اهالي الشهداء (او اي اب وام في الدنيا) مش تجار مواشي ... لو حد موتله بهيمة ياخد ديتها
الام اللي دفنت ابنها ... دفنت حته منها معاه ... يمكن اللي ممكن يريحها شوية ان موته ابنها جات بفايدة ... مش راح فطيس ...وفر شوية الورق الملون ... انها اشياء لا تشترى يا عم الحاج
وبالمناسبه ... شهداء محمد محمود 2012 من اللي هيحاسب عليهم؟

لا وكله كوم وموضوع ابلج ولجلج ده كوم تاني؟ ... يعني ايه ابلج ولجلج ديه؟ .... حاجة كدة زي جوج وماجوج ولا ايه؟ مش فاهمة والنعمة

الاخوة في الداخليه (اللهم اجعل كلامنا خفيف عليهم) ... اوعوا تفتكروا انكم في امان فاكرين 8 اكتوبر 1981 ... لما دخلوا عليكوا في اسيوط وادبحتوا ... مانتوش كلاب حراسه ... انتوا بني ادمين ... انتوا منا مش منهم ... كفايه كدة ... 
اخواتنا في الجيش ... هايفضلوا يصطادوكم واحد واحد زي العصافير ... انتوا اللي هتدفعوا التمن ... انتوا اللي هتخشوا حروب بره وجوه ... كفايه كدة
كفايه كدة........
MishMish

Wednesday, November 14, 2012

سموا الاشياء بأسمائها ... يرحمكم الله

من كام يوم مسكت مانجايه ... لاقيت ملزوق عليها ورقه مكتوب عليها موز فاخر .... أتعكننت قوي
اتعكننت علشان الورقة اللي على المانجايه دي بتمثل سبب خراب البلد ... اللي كاتب على المانجه موز ياما فاكرنا بهايم لا مؤاخذه ... شبعه من بعد جوعه فمنعرفش الفرق ما بين الموز والمانجه .... ياما هو بني ادم ُمهمل شغلانته انه يحط اللزق على الفاكهه ومن الواضح انه شغال بالكرتونه ... ياما هو بهيم لا مؤاخذه "برضه" ومش عارف الفرق بين المانجه والموز بس حب يفتي. 

آفه بلدنا المسميات ... علشان نحل اي مشكله لازم نعرف هي ايه؟ وطول ما الاسم مش صح عمر الحل ما هيبقى صح
يعني مفيش حاجة اسمها نكسه .... في حاجة اسمها هزيمة
مفيش حاجة اسمها جماعات جهادية ... في حاجة اسمها مجموعات ارهابيه مسلحه خارجه عن القانون
ايون بالظبط كدة 
معظم المجرمين في كل حته في الدنيا ليهم مبررات نبيله "من وجهه نظرهم" لجرايمهم ... 
خد عندك مثل الحرب الاسرائيليه على لبنان تموز (يوليو) 2006
قامت مجموعة ارهابيه مسلحه خارجة عن القانون - مسمية نفسها "حزب الله" وبتقول ان هدفها المقاومة وان سلاحها موجهه للعدو الاسرائيلي
بأسر جنود إسرائيليين لتحرير بقية اللبنانيين وغيرهم من المعتقلات الإسرائيلية، وسماوها عملية "الوعد الصادق"، فما كان من اسرائيل الا انها في اليوم التالي شنت هجوما جويا على جنوب لبنان مستهدفا محطات الكهرباء ومطار بيروت وشبكة من الجسور والطرق مما أدى إلى مقتل العشرات، كما انضمت قوات بحرية إسرائيلية للهجوم، واستدعى الجيش الإسرائيلي فرقة احتياط مؤلفة من ستة آلاف جندي لنشرها سريعا شمال إسرائيل. تحت تعليق إعادة الأسيرين إلى إسرائيل واطلقت اسرائيل على هذه العمليه لقب "الثواب العادل" 
وده ملخص للخساير من الطرفين : http://www.10452lccc.com/hizbollah/Who.won2.8.06.htm
وبنظرة سريعه كدة على الارقام هتعرف مين اللي خسر ومين اللي كسب 

وطبعاً بعد خراب ملطة ونزوح نص مليون لبناني طلع حسن نصرالله امين حزب "الله" في تسجيل طبعاً - لانه استخبى من اسرائيل - وقال: "وأن العملية عملية فردية يتحمل مسؤوليتها الحزب وحده ولا علاقة للحكومة اللبنانية بها" ....... يا سلام (ايموشن ابراهيم عيسى)
وفي تصريح تاني قال: "أن الحرب التي تشنها إسرائيل على لبنان ليست بسبب قيام الحزب بأسر جنديين إسرائيليين بل هي "حرب شاملة يشنها الصهانية لتصفية حساب كامل مع لبنان وجيش لبنان انتقاما وثأراً لما تم إنجازه في 25 مايو/ أيار 2000" (تاريخ انسحاب الجيش الإسرائيلي من جنوب لبنان).
طب اما انت عارف يا منيل ان اسرائيل بتتلكك وانها مستنيه اي فرصه علشان تاخد اي حاجة تقدر تحط ايدها عليها ... تقوم تجر لبنان كلها للحرب وتسلمها لإسرائيل تسليم اهالي ... فكرني تاني كدة انت بتقاوم مين؟

ولان في فرق ما بين الاجرام الدولي المدروس والمنظم اللي بتمارسه اسرائيل وما بين خناقات الشوارع اللي بتمارسها الجماعات الارهابيه المسلحه الخارجة عن القانون اسرائيل فضلت تضرب في لبنان 34 يوم ... على ما قرار الامم المتحدة صدر وقررت اسرائيل انها تلتزم بيه

احنا بقى معرضين لنفس السيناريو ده بحذافيره 
عندنا جماعات ارهابيه مسلحه على الحدود ... خارج سيطرة الدولة ... بتنفذ حملات تصفيه لعناصر الجيش .... مسمية نفسها جماعات جهادية ... وده نفس الاسم اللي بيطلقه عليها الاعلام اما لانه فاكر اننا بهايم لا مؤاخذة يإما إهمال وقله تقدير لدوره او انه يرأسه شوية بهايم او ببساطة خايفين

السؤال بقه هنا 
هل عندك استعداد تتجند وتحارب حرب دخلك فيها مجموعة خارجه عن القانون وهربوا؟
هل عندك استعداد تستحمل ارتفاع جنوني في الاسعار نتيجه استهلاك جزء كبير من ميزانيه الدولة في تمويل الحرب؟
هل عندك استعداد لتحمل تبعات الحرب من قتل وتدمير وتشريد؟
هل عندك فكرة عن فرق السنين الضوئيه اللي بينا وبينهم في التسليح؟
هل عندك استعداد تضرب بالنووي (اسرائيل عندها نووي وربنا)؟
هل عندك امل ان المجتمع الدولي يقف معاك ضد اسرائيل؟
هما شايفين اسرائيل كده

ديه وجهه نظرهم في الجهاد
قبل ما تجاوب الاسئله:
 افتكر الاحتجاجات على الفيلم المسيء امام سفارات امريكيا وبعض سفارات الدول الاوربيه


فكر في الكلام اللي بيتقال عن جواز الاطفال
فكر في فتوى هدم ابو الهول والاهرامات
هما نجحوا يركزوا على اوسخ ما فينا ويظهرونا خطر على الحضارة الانسانيه كلها (المسلمين خاصه والعرب عموماً)

فسموا الاشياء بأسمائها  ... يرحمكم الله
MishMish

المصادر:

http://ar.wikipedia.org/wiki/%D8%AD%D8%B1%D8%A8_%D8%AA%D9%85%D9%88%D8%B2_2006

http://www.sodahead.com/united-states/secretary-of-state-hillary-rodham-clinton-criticizes-israeli-expanded-building-plan--calling-them-an/question-1326299/?link=ibaf&q=&imgurl=http://images.sodahead.com/profiles/0/0/1/9/4/7/5/0/9/Support-Israel-29479128182.jpeg

http://sheikyermami.com/2012/04/10/un-islamic-easter-bombs/

Tuesday, October 23, 2012

حصريا على مدونه البلكونه

اول صورة حصريه ل(سعد نبيهة ) رجل العيد الذى حير الجميع ..ليزيح الستار عن اكبر لغز فى الثلاثين سنه الماضيه ...
لاحظ الشخص على يمين صفاء ابو السعود الراكب عجله وملامحه مبهمه ..يقال انه عمر سليمان وفى اقوال اخرى يقال انه محمد البلتاجى ...والبعض يؤكد انه المخرج مجدى ابو عميرة ...فلننتظر الايام القادمه لتنكشف لنا اسرار اخرى ..
كل سنه وانتم طيبين واضحى سعيد 
ميجوووووو وزوجته مشمش

Thursday, October 11, 2012

نهضه نهضه نهضه

تبقى راكب واحد فقط ليكتمل عدد الركاب فى الميكروباص المتجه الى النهضه ..وفى تلك اللحظه ظهر الراكب المنتظر ...شاب وسيم يبدو من مظهره انه جامعى ...واثناء وضع قدمه على باب الميكروباص ...ظهر رجل فى اواخر الخمسينات من عمره وقاله : النبى يابنى انا مستعجل ورايح المستشفى خلينى اركب انا ...بكل احترام سمح الشاب للرجل بالركوب مع جمله : اتفضل يابويا ...ركب الرجل وقال للانسه الجالسه فى اول كنبه خلف السائق ...النبى يابنتى تقعدينى هنا اصل ركبى واجعانى ...جلس واخذ يتمتم ببعض الادعيه والكلمات ..الهى يستر طريقك يابنتى ...ربنا يفرح قلبك ..الهى ينور طريقك ...واثناء ذلك فتح محفظته وسأل الراكب بجواره : الاجرة كام يابنى ...جنيه وربع ؟ طب يابنى متشكرين ...بس مش معايا غير نص جنيه ...النبى ياسطى لو مافهاش زعل انا مش معايا غير دول مسامحنى فى الباقى ؟ ...طب يابنى ربنا يخليك ويستر طريقك ويرزقك برزق عيالك اللهم امين ..طب خد النص جنيه يابنى ..يعنى مش عاوز اجرة خالص ؟...روح يابنى ربنا ينور طريقك ....ظل الجميع فى الميكروباص يرسلون الاجرة للكنبه الاولى خلف السائق ..والتى تبرع فيها الرجل العجوز بلم الاجرة ...وكان يسأل الركاب : حد له باقى ياخواننا ...كده كله دفع ؟ اوعى يكون حد مادفعش .واثناء لم الاجرة ...ظل يحكى ويحكى للناس ويلقى خطبه عن الاخلاق وعن الزمن الجميل ..حتى هتف للسائق ...والنبى يابنى اقف هنا ...ربنا يستر طريقك ......بس هنا اوقف ...شكرا يابنى ...ربنا يديك على قد نيتك يابنى ...سار السائق منتشيا بدعوات الرجل ...وسأل الركاب عن الاجرة ...وانتبه الجميع ..الراجل العجوز لمها ...هو مادهالكش ؟؟
صرخ السائق .مصدرا صوتا قبيحا ..هو يوم مش باين من اوله ...عشان الواحد يحرم تانى يعمل خير فى حد ....اخرج رأسه من شباك الميكروباص وبصق
نهضه نهضه نهضه
ميجـــــووووووووووو

Share It

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق