Monday, March 29, 2010

كلام اخوك الكبير

كان فيه مسلسل بييجى زمان وكان فيه جمله معكننانى ..المسلسل اسمه غوايش وكان فيه جمله مشهورة : كلام اخوك الكبير لازم يصير ياولدى ...ليه يابوى ؟ ...عشان اخوك الكبير ..كان لازم فى الجمله دى يقولو : ليه يابوى ؟ رخامه ياولدى ..غتاته ياولدى .بنفس المنطق بيتعاملو بيه معانا .حاجات كتير كانو بيحشو دماغنا بيها .بس لازم نسمع كلامهم وخلاص ..ليه ؟ عشان هما الكبار وكلامهم مطلق ومافهوش نسبه خطأ.واحنا لاحول لينا ولا قوة ..تلاقى مثلا مذيعه تطلع فى برامج الاطفال . لازم تاكل جزر عشان يقوى النظر ..طب انا مش بحب الجزر ومش باكله ونظرى سته على سته ..والى تقولك كل سبانخ عشان فيه حديد ..مش تفهمنا يعنى ايه حديد .طفل صغير هايعرف ان فيه حديد يعنى فيه مسامير وشواكيش .. عملتلى عقده من السبانخ طول عمرى .. حطت لنا سكه واحده مافيش غيرها .يا السبانخ يا اما هايجيلك انيميا ..طب قوليلنا حاجات تانيه فيها حديد .عندك فى كتاب القراءة بلاوى تانيه ..يقولك ايه الصدق منجى ..ويجيبلك قصه هبله بتاعه عيل صغير كان واخد مبلغ كبير يوصله امانه لجدته (مش عارف جدته كانت هاتعمل بيهم ايه ..والعيله يعنى مفهاش رجاله عشان يدوها للعيل الصغير ) فطلع عليه اتنين حراميه وقالوله معاك فلوس؟ (حراميه جنتل ) فرد عليهم وقال ايوة ..قوم واحد من الحراميه المؤدبين قال للتانى ..يالا بينا ياعم ده شكله معهوش فلوس ده لسه عيل فسابوه ومشيو ..وبكدا الصدق منجى ..يعنى لو طلع عليك دلوقتى عيال صيع وثبتوك فى الشارع وخدو موبايلك وساعتك ..فانت تقولهم انا معايا فلوس كمان شايلهم فى الشراب ومخبيهم ..فيقولو عليك انك واد صادق ويرجعولك الفلوس والموبايل ويمكن يدولك جوز جنيهات ..ليه ؟ لان كتاب القرءة قال كدا ..والقصه التانيه الشهيرة بتاعه حمدان والذئب ..تمسكها تلاقى ان واحد اهبل ومتخلف عقليا مألفها وواحد تانى اهبل منه حطها فى مناهج الوزارة ..يقولك ايه ..حمدان كان كل شويه يقول للناس الحقونى فيه ذئب ..ولما ييجويلحقوه يقولك وضحكت عليكو مافيش ذئب ولا حاجه ..انا بصراحه كنت معجب جدا بحمدان وبحركاته ....تخيلو ان حمدان قاعد فى الصحرا وبيرعى غنم..ومكانش فيه تليفزيون ومكانش فيه نت ولا اى حاجه يسلى بيها نفسه ..كان هايعمل ايه يعنى ؟ فاضي وزهقان ..وكل شويه الناس تيجى تنقذه مايلاقوش ذئب ويطلع حمدان بيشتغلهم ..مش فاهم هما هبل؟ عملها فيهم كذا مرة ..غلطتهم انهم صدقوه ..مايسييبو الذئب ياكله ولا يتنيل على عينه ..عيل واطى صحيح ..والقصه دى بالذات انا حاولت افهم ايه المغزى فيها معرفتش ..يعنى ايه القيمه الى الانسان ممكن يطلع بيها ..يعنى الواحد مفروض يعمل ايه فى الاخر ؟ طب انا معنديش خرفان وساكن فى حته مفهاش ذئاب ..والقصه بتاعه الارنب الغضبان دى بقى حكايه تانيه ..ارنب مش عاجبه انه ياكل كل يوم خس وجزر ..ماهى حاجه تزهق صحيح ..واتجرأ بس وقال لامه .. الجمله الشهيرة بتاعت : كل يوم خس وجزر ..طبعا بقى انهالت عليه العقابات السماويه وانه هايخش النار وانه مش بيحافظ على النعمه وحظه انه مكانش عايش اليومين دول كان قالوله على عذاب القبر وكانو جابوله الثعبان الاقرع ياكله ..كل ده عشان نفسه هفته على حاجه تانيه غير الخس والجزر .طب بذمتكو فيه واحد فيكو يرضى ياكل طول حياته نوع واحد بس من الاكل ؟ كان يجرى ايه لو امه خدته على كنتاكى ولا مكدونالدز مرة كل اسبوع ولا كل شهر وتجيبله الوجبه المفرحه وكانت حلت المشكله وبلاش صداع ..هانعد نحل مشكله الارنب وامه؟ وبعدين اصلا ابوه فين ؟ مش له دور برضه ويعقل امه ويقولها كلمتين حلوين بدل ماهى معكننه عالواد؟ ..ولا هو شغال وطافح الكوته عشان فى الاخر يخش عليهم بحزمه خس وجزر؟ ..تحس ان الى عامل الموضوع ده واحد اقطاعى وبيشجع العيال بس فى صورة مستترة انهم كل يوم ياكلو فول وميتبتروش على اهاليهم ..نيجى بقى لقصه الاتحاد قوة بتاعت الفلاح الى جمع ولاده وجابلهم لبشه قصب وقعد يرخم عليهم ويخليهم يكسرو القصب لما ايديهم ورمت من الضرب ..طب ياعم الحاج ماتقولهم الكلمتين دول من الاول ..لازم تخلى ايديهم تورم عشان فى الاخر تقولهم الاتحاد قوة ؟ ماتقولهم الاتحاد قوة من الاول ولا هى رخامه يا ولدى؟ ...ومن القصص الغريبه برضه قصه الارنب والسلحفاه ..مش عارف كانو بيضحكو على مين ؟ يقولك ارنب بيسابق سلحفاه ؟ مش عارف ايه الى يخليهم يتسابقو اصلا؟بيلعبو فى الاولمبياد الشتوى ؟ ويقولك ايه الارنب قعد يضحك على السلحفاه عشان بطيئه قام خدله تعسيله قبل مايخلص السباق ..ماهو طبيعى انى لو بسابق سلحفاه كنت هاناملى يومين ..انا لو من الارنب كنت روحت عملت شوبنج وصيفت يومين فى اى حته ورجعت ..وفى الاخر تلاقى السلحفاه كسبت السباق ..هانستعبط؟ سباق قعد كام شهر ده ؟ وكله كوم وقصه الاسد والفأر الى قعد يقعد يقرض فى الشبكه ..ايه الى يخلى فار يروح يتكلم مع الاسد اصلا ؟ انا لما بشوفه فى جنينه الحيوانات ركبى بتسيب ..يقوم الفار يروح يتناقش معاه كدا بكل سهوله ؟ هو ده المنطق الى بيحاولو يعلموه لينا ..كلام اخوك الكبير لازم يصير ياولدى حتى لو غلط ..حتى لو مش منطقى او حتى يحمل فى طياته قيمه ..لكن هذه القيمه ساذجه وغير منطقيه ..نسي المؤلف ان العصر يتطور وان تعليم القيم ليس اهم من كيفيه تطبيقها
تحياااتى
ميجوووووو

Wednesday, March 24, 2010

انزل اعلانات على المدونة ولا مانزلش ..... تلك هي المسألة

الاعلانات
ذلك الوحش الذي صنعه سعينا المحموم وراء سراب إشباع رغباتنا
محاضرة "الانترنت مغارة الكنوز" - هكذا قال الباشمهندس
بقالنا كام سنه مديين معظم وقتنا للانترنت، دلوقتي جه الوقت اللي الانترنت تردلنا فيه الجميل. الموضوع بسيط
في مواقع بتدفعلك فلوس لو دخلتها واتفرجت على الاعلانات اللي فيها
في مواقع تانيه بتدفعلك فلوس لو حطيت الاعلانات بتاعتها على الموقع بتاعك
في عام 2006 تم صرف 391 بليون دولار في مجال الاعلانات على مستوى العالم
ترتبط الاعلانات بارتفاع معدلات التضخم ارتباط وثيق. لانها تهدف الى زيادة معدلات الاستهلاك وبالتالي تشبع المجتمعات بالثقافه الاستهلاكيه
شبيجيل - اون لين: اعلنت انه عام 2008 تفوقت اعلانات الانترنت (105.3 بليون دولار) على مثيلاتها في التليفزيون (98.5 بليون دولار) - لاول مرة
مع ذلك لا تعتبر هذه الارقام هي المبالغ الفعليه لتكلفه الاعلانات حيث انها لا تتضمن - على سبيل المثال - تكلفه العروض والتخفضيات
قليل من المستهلكين يدركون انهم هم الممولون الوحيدون لهذه الاعلانات حيث ان تكلفتها تكون متضمنه في ثمن السلعة
والسؤال هو
انزل اعلانات على المدونة ولا مانزلش؟
من وحي حوار مع عمو عصام
Love,
MishMish

Tuesday, March 16, 2010

حكام اجانب


انتشر العنف فى الدورى المحلى ..الملاعب فوق فوهه بركان ..الجماهير تقذف وتشعل الشماريخ فى اماكن مختلفه من الملعب ..انهم يشعرون بالظلم التحكيمى الفادح ..فتلك الفرق المهدده بالهبوط لا تملك المال والسلطه التى تجعلها فى قمه الدورى او حتى تتنافس منافسه شريفه مع باقى الانديه بالرغم من ان هذه الانديه انديه جماهيريه وعريقه تضرب جذورها فى اعماق الارض المصريه ..هذه الانديه على سبيل المثال : نادى الاقباط ونادى النوبه ونادى البدو الرياضي ونادى المثقفين مضطهددون ونادى المصريين الغلابه ..هذه الانديه ظلت تطالب بحقوقها المشروعه بطرق قانونيه داخل اطار محلى ..لكن رئيس لجنه الحكام الرئيسيه سرعان مايخرج امام الفضائيات ويؤكد : التحكيم المصرى بخير ..لا مساس بوحده الدورى المصرى ...الدورى المصرى نسيج واحد...وان جميع الافرق متساويه فى الحقوق والواجبات ..وان ما يحدث هو تنفيذ لاجنده خارجيه تستهدف ضرب الدورى المصرى .وانهاء دوره الريادى فى المنطقه ..لقد نفذ صبر هذه الانديه ..ولم تلجأ للاتحاد الدولى خوفا من اتهامهم بزعزعة استقرار الدورى المحلى والاساءة الى سمعه مصر فى المحافل الدوليه ... بعض هذه الفرق اوشك على الهبوط الى الدرجه الثانيه وبعضها هبط فعلا الى الدرجه الثالثه والرابعه وقد يختفى اسمها من الوجود ويصبح وجودها مجرد ذكرى تاريخيه تحكيها الاجيال ...هذه الفرق لم تجد من يحل لها مشاكلها بطريقه حاسمه ..كل الحلول عبارة عن مسكنات ...ولم يعد اى اختيار باق اما تلك الفرق حتى لا تنقرض الا اختيار واحد فقط .... وهو طلب حكام اجانب
تحيااااتى
ميجوووو
من مدرجات الدرجه الثالثه
دورى المظاليم

Friday, March 12, 2010

حـلــم

يا صاحبي ياللي راكن حلمك فوق الرفوف
بص لنفسك في المرايه! بالذمة مش مكسوف
تحقيق الحلم ملوش علاقة بأي خوف
ولا اصل اصلي انا عندي ظروف
ده عاوز قلب جامد وميعرفش خوف
خطوة بخطوة تتقدم كل الصفوف
عافر في الصخر ورا حلمك وطوف
تحقق بدل الحلم الف .. ميات .. الوف
هيفضل لحد امتى حلمك اسير
افتحله القفص علشان لفوق يطير
حلمك مش هيجي وانت قاعد في السرير
انفض من عليك التراب والكسل
دا اخر الطريق المر طعمة عسل
كلام موزون ومتجرب ... بس جرب
هتعلى وتعلى وينضرب بيك المثل
إهداء للبلكونة من اشرف ناسان

Wednesday, March 3, 2010

مركب المحروسة بتغرق ليه؟

الحكايه ان مركب المحروسه ده كان مركب ولا في الاحلام. نظام ونضافه وناس عايشه مع بعضها كافيه خيرها شرها وفي يوم نط عليهم جماعه كبار في العدد وقالولهم ارفعوا المراسي. الناس قالوا: خير ليه؟ ردوا الكبار مفيش وقت للرغي والكلام الكتير. نتحرك بس وبعدين نبقى نحكيلكم عن موضوع خطير. الناس سمعت الكلام، رفعوا المراسي وبعد شوية سمعوا صوت نفير. ده تنبيه وتحذير الجماعة قررت تغمي عينيكوا اصل البحر هيبقى عالى والمشوار زي مانتوا عارفين طويل. قالوا:طب والموضوع الخطير
اتغموا بس
دلوقتي بس نقدر نقولكم عالموضوع الخطير
الموضوع يا سيدي انت وهو "ان ربكم في خطر والتانين اعداء الدين بيدبروله مؤامرة. خدوا بالكم ده فيه كمان اجنده خارجيه وتربص دولي. هتعلموا ايه يا مؤمنين؟". يا نهار اسود مؤامرة على مين؟! محدهاش هيبات الليله دي سليم
قامت الناس على بعضها. ناس ماتت وناس اتعورت والمركب طبعاً اتأثرت
واتفتح تحقيق اسألته واحدة لكل التانين
عددكم كام؟
ايه اللي فاضلكم في المحروسة؟
مين واقف وراكم من برة؟
ليه بتلجأوا لمنظمات بره؟
سافرت ...... قبل كدة؟
عندك اقوال تانيه؟
ايوه يا بيه عايز اعرف كرهتونا في بعض ليه؟ ومركب المحروسه بتغرق ليه؟
هشششششششششششششششش
"خد بالك فيه اجندات خارجيه وتربص دولي"
انت نسيت ولا ايه؟
من وحي حوارات المصري اليوم مع رؤساء الطائفه اليهوديه في مصر (السيدة كارمن والسيد بن جدعون) والنوبين في الداخل والخارج - بتواريخ 16، 17 فبراير 2010

Love,
MishMish
There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق