Wednesday, March 24, 2010

انزل اعلانات على المدونة ولا مانزلش ..... تلك هي المسألة

الاعلانات
ذلك الوحش الذي صنعه سعينا المحموم وراء سراب إشباع رغباتنا
محاضرة "الانترنت مغارة الكنوز" - هكذا قال الباشمهندس
بقالنا كام سنه مديين معظم وقتنا للانترنت، دلوقتي جه الوقت اللي الانترنت تردلنا فيه الجميل. الموضوع بسيط
في مواقع بتدفعلك فلوس لو دخلتها واتفرجت على الاعلانات اللي فيها
في مواقع تانيه بتدفعلك فلوس لو حطيت الاعلانات بتاعتها على الموقع بتاعك
في عام 2006 تم صرف 391 بليون دولار في مجال الاعلانات على مستوى العالم
ترتبط الاعلانات بارتفاع معدلات التضخم ارتباط وثيق. لانها تهدف الى زيادة معدلات الاستهلاك وبالتالي تشبع المجتمعات بالثقافه الاستهلاكيه
شبيجيل - اون لين: اعلنت انه عام 2008 تفوقت اعلانات الانترنت (105.3 بليون دولار) على مثيلاتها في التليفزيون (98.5 بليون دولار) - لاول مرة
مع ذلك لا تعتبر هذه الارقام هي المبالغ الفعليه لتكلفه الاعلانات حيث انها لا تتضمن - على سبيل المثال - تكلفه العروض والتخفضيات
قليل من المستهلكين يدركون انهم هم الممولون الوحيدون لهذه الاعلانات حيث ان تكلفتها تكون متضمنه في ثمن السلعة
والسؤال هو
انزل اعلانات على المدونة ولا مانزلش؟
من وحي حوار مع عمو عصام
Love,
MishMish

16 comments:

على باب الله said...

إنزل بالإعلانات يا معلم .. بس نرجوك بلاش الإعلانات اللي بتفتح لوحدها في
pop up window
علشان بتبقى مستفزة جداً
---

strategicalone said...

طبعاً نزل اعلانات ودة موش ها يأثر فى حاجة طول ما محتوى التدوينة لسة كلمات نابعة من القلب . لانك لو فكرت انك تكتب لمجرد انك حاسس انك موظف يبقى انصحك تجيب ضرفها وانت متالق احسن
تحياتى

لاسع افندى said...

وماله بس بلاش اعلانات وديييييييييع


تحياتى

Ms Venus said...

وايه المشكلة ؟

براحتك طبعا

ELVIRA said...

أعمل الاعلانات اللى تريحك المهم ماتكونش اللى بتهب فى وش الواحد دى و الأهم ماتأثرش على المدونة لأنى بحبها جدا

Tears said...

لا ارى مشكلة فى وضع اعلانات و لكن بجد مش فاهمه كيف ستستفيد المدونة او بمعنى اخر هل العائد المادى مناسب و الاهم كيف ستحصل عليه المدونة ...اكيد مش كاش:))

Migo Mishmish said...

على باب الله
Strategicalone
لاسع افندي
Ms Venus
Elvira
Tears
شكراً على تعليقاتكم
لكن انا ببص للموضوع بصورة مختلفه
يعني على حسب ماقال الباشمهندس ان الفلوس مش وحشه وبعدين انت بتتفق مع المعلن على طريقه الدفع

لكن انا ببص للاعلانات على انها بتدمر كل حاجة حوالينا
بصوا للقيم الاستهلاكية اللي ملت المجتمع - اي حاجة بقت قابله للاستبدال حتى المشاعر الانسانيه لو اللي معاك مش مريحيك سيبك منه ودور على حاجة تانيه احسن بمميزات اكتر (والجمل ديه بتتقال على البني ادمين مش على الموبيلات والكمبيوترات)

انسف حمامك القديم هو شعار المرحله

الاعلانات بتقنعنا اننا لو مسمعناش كلام المعلن حياتنا هتبقى جحيم

كل اما بقف قدام تلاجه بيبسي في الشارع ببقى نفسي اشتري ازازة مشبرة واشربها واحس بالانتعاش اللي بيبقى على وش العيال بتوع الاعلانات
حتى السفن مع اني مش بطيقه لكن الاعلانات بتاعته بتخليني هاموت واجرب اشرب مع اني عارفه ان طعمة زي ما هو

وبعدين لان الاعلان لازم يبقى شكله حلو وجذاب لازم يكون الموديلز اللي بيعملوا الاعلانات قمرات وطبعاً يجي الدور الرائد للمرأة ويجوا بنات زي القمر يرقصوا جنب السلعه. يعني الشيء يبقى واقف محترم في مكانه والبنات نازلين رقص حواليه ولا طقوس رقصات استهلال المطر في قبائل افريقيا. وبعدين بنضايق ان المجتمع بيبص للمراه على انها متاع او ملكيه خاصه

وبعدين الحاجة عماله تغلى والدنيا بتضيق ومع ذلك السعر الحقيقي للمنتج اقل بكتير من السعر اللي بنشتريه بيه. طب انا بحب بيبسي لكن لما يجيبوا مطرب الجيل شعر الصدر حسين يسخف عاللي جابونا ويدوله اجرته من تمن ازازة البيبسي بتاعتي مش تبقى حاجة تضايق. يعني مابحبوش لكن بشجعه على الاستمرار

فلوس الاعلانات طبعاً هتفرق مع اي حد. لكن هل ده سبب كافي اني اكون سبب في الحاجات اللي فاتتت ديه؟
Love,
MishMish

عصام said...

لقد جعلونا نتصرف ونحن نقع تحت طائلة الشعور بعار الفقر(كوستى بندلى فى كتابه الإيمان ومجتمع الإستهلاك قاصدا آلة الدعايه العملاقه)وربنا يرحمنا

Anonymous said...

السؤال اللى بيطرح نفسه هل لو نزلتو اعلان عن شيكولاته مثلآ هتقدر تكلم عن صاحب الاعلان لو كان عامل حاجه غلط ولا هتقولا بلاش دا احنا لسه جايبين فستان لسندو من فلوس الاعلان

انا متاكد ان فلوس الاعلان مش هتغير حاجه ومتاكد كمان ان رايكو مش هيتغير بسبب الفستان بتاع سندو
بس هل الناس هاتفهم ده ولا الناس هتقول دول بيشكرو فى فلان علشان كدا ساندو لبسه فستان جديد

رايي حرية الرأى لا تتوافق مع المال


George USA

Migo Mishmish said...

حبيبي عمو عصام
زي ما قوتلك انا كاتبه البوست كله علشان تكتب انت العبارة ديه: لقد جعلونا نتصرف ونحن نقع تحت طائلة الشعور بعار الفقر
اجمل واكتر عبارة عبقريه سمعتها في حياتي
love,
MishMish

Migo Mishmish said...

وديه وجهه نظر تانيه صح ميه في المية
طالما قبلنا نحط اعلانات بيبقى قبلنا كل توجهات المعلن
وديه مسئوليه محبش اشيلها

love,
MishMish

Sahran said...

من حيث المبدأ فما فيش مشكلة من وضع إعلانات ,,

بس وحياتك ما تحطوا إعلانات زي أجهزة تخسيس , واتصل بينا وإحنا هنرد عليك , وما شابهها من الدعايات التي تنصب على المواطن ,,

هاد رأيي الشخصي , بس أخشى بكرة أدخل البلكونة ألقى مائة ألف دعاية , وأقعد أفحص المدونة علشان أشوف البوست الجديد


تحياااااااااااااااتي لك


ودمت سالمة يا مدام

Migo Mishmish said...

Sahran
متخافش
مع ان كل التعليقات كانت بترجح وتؤيد وضع الاعلانات ماعدا تعليق عمو عصام وجورج
الا اني قررت اني مش هاحط اعلانات ومش عايزة فلوس
مش كل حاجة للبيع
مش هشارك في انتصار القيم الاستهلاكيه
حابه المدونة تبقى مكان نستريح فيه من رغي والحاح الاعلانات
love,
MishMish

عصام said...

تعمدت عدم إبداء رأيى فى وضع إعلانات من عدمه لأنها مسأله تخص أصحاب البلكونه والآن أقول لمشمش:ينصر دينك

Migo Mishmish said...

هاهاهاهاهاه
ليه كدة يا عمو
ميجو هيمسكهالي. كل ما هايشوف وشي هايقولي ينصر دينك يا استاذ نفيسه
ده لسه امبارح مبهدلني تريقاه وقايلي انا مكنش ليا الجوازة ديه
Love,
MishMish

العميد عصام said...

ميجو عارف بينه وبين نفسه ان عمره ماكان يحلم بجوازه زى دى ومستعد اواجهه باعترافاته بكده وهيعترف هيعترف ولو بالقوه

There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق