Tuesday, April 29, 2008

إن كنت فاضي احنا مش فاضين

شفت سخافه كتير وقليل انما ان واحد يفتح مدونة علشان يشتم في القطة ده اللي جديد ومشفتوش قبل كدة

انا وميجو امبارح كنا بنبص عالمدونة ولقيت تعليق غريب من واحد مسمي نفسه "مش موافق" فكرني بكتاب دافنشي كود اللي كشف الخديعه اللي بعمر التاريخ وزعم صاحبنا مش انه هيوريني حقيقه القطة المؤلمة

روحت عند الاخ مش وانا مش فاهمة هو عايز ايه بالظبط. نازل ردح وشرشحه للقطة في بوست طووووووووووووووويل ضيع وقت وجهد وكهربا قلت مش مهم يمكن القطة ضايقته صحيح. وبعدين بصيت عالمدونة لقيت انه فاتحها من من شهر مارس اللي فات واول بوست حاطة كان صورة واحد مخيطين بقه - واضح انه يستاهل علشان لما بقه اتفتح خرج زباله - وكاتب استعنا عالشقا بالله وبعدين في البوست التاني ابدت وصله الردح للقطة ومش كدة وبس لا ده كمان مش عاجبه الناس اللي بيعلقوا عندها يعني عليها وعلى صحابها. وطبعاً لان الاخ مش شتم في الكل فحقق نسبه تعليقات عاليه معظمها ناس بتدافع عن القطة او عن نفسها والمجموعه المفقوعه من القطة اللي زاطوا مع الزيطة ولاقوا جنازة يشبعوا فيها لطم. بس وهي ديه محتويات المدونة 80% منها بس مخصص لشتيمة القطة والباقي مواضيع هو كاتبها وتخيل لو كانت القطة كتبتها كانت هتقول ايه علشان يشتم فيها برضه


الاخ مش عايز يعرفنا ان القطة بتكتب كلام قبيح لا مؤاخذة طيب هو انت مال سعاتك هي قيبحة ولا مش قبيحه؟ ان كنت بتكسف تقرا الكلام ما تخشش عندها. ان كانت بتقبح عليك ما تخشش عندها. ان كانت افكارها ما بتعجبكش ما تخشش عندها. ان ماكنتش بتنشر تعليقك ما تخشش عندها. لكن تلف وراها في المدونات وتكتب الكلمتين بتوعك دول ده اسمه هبل ولا مؤاخذة يا اخ مش


في سؤال عايزة اطرحه عليك هو انك كان طموحك ايه لما فتحت المدونة بتاعتك؟

يعني في ناس بتكتب في الدين وفي ناس بتسب الدين وناس بتكتب في السياسه وناس بتكتب شعر وناس بتكتب قصص و..و..و..وكدة يعني لا مؤاخذه بقه حضرتك بتكتب في ايه بالظبط. وطبعاً انا متوقعه إجابه لاوذعيه من حضرتك وهي انك بتكشف الحقيقه هيهيهيهيهيهيهيهيه طيب هتعمل ايه لو القطة قفلت المدونة بتاعتها؟ هتعيش ازاي يا مسكين؟! بص يا ابني علشان الناس تحترمك لازم تبقى انت محترم مش هيحترموك علشان القطة بتشتم وانت لا


طبعاً انت ملاحظ اني مش حاطة لينك للمدونة بتاعتك علشان انا مش مسمحاك في الوقت اللي ضاع عندك وماحبش ان حد يضيع وقته في كلام فاضي لا هيودي ولا هجيب
Love,
MishMish

Friday, April 25, 2008

ريحه الجوافه



فى شهر سبتمبر من كل عام
لما السما تبدأ تغيم
والصيف يشد الرحال
اشم ريحه الجوافه
واشوف شنط المدرسه
متعلقين فى الفاترينات
جنب الكوتشيات
افتكر لما كنت لسه بحلم
وحلمى لسه نونو
لسه بيفتح عيونه
ايام التلمذه
والمريله ..ام زراير من ورا
وافتكر كتاب القراءة وكتاب الحساب
والبت رحاب
لما كنت بمسك ايديها
ونروح المدرسه
والتكت والجلاد
وعمو فؤاد
وطبق البليله
وانا باسمع ابله فضيله
ولما نلبس لبس جديد
من بنزايون وصيدناوى
والفرحه جوة عيوننا
وياسلام لما نطلع رحله
ولا نخرج يوم العيد
نجيب صواريخ وبمب
ولما تيتا تعمل محشي كرنب
وتلم العيال حواليها
................
اشم ريحه الجوافه
افتكر الصحاب والحبايب
وافتكر الى غايب
ايام ما كنا شله
ايام ماكنا لمه
اصل الحياه روايح
ودلوقتى حتى الورد
ماعدش له ريحه
مجرد منظر جميل
حتى شوف النيل
زعلان متضايق
لانه معادش فيه حبيبه
يرمو همومهم فى حضنه
وكل شيئ بقى صينى
سهل يتكسر
حتى مشاعرنا برضه صينى
وما عادش باقى منها
غير ريحه الجوافه
ميجووووووووووووووو

Tuesday, April 22, 2008

المرايه ..


فى يوم مكانش حد معايا

دخلت اوضه نومى

ابص فى المرايا

ولما قربت منها

ملقتش حد خالص

معرفش ايه الحكايه

استنيت شويه

يمكن دا عيب مرايا

وبعد ييجى نص ساعه

ليقت فيه حد شبهى

بس لابس مقلم

وانا لابس كاروه

تمام شبه الملايه

بصلى باستغراب

كان بيشبه عليا

قرب ايديه وسلم

وقال واحشنى ياراجل

ماتيجى تقعد معايا

دققت فى ملامحه جامد

يخلق م الشبه اربعين

احمد زى محمد

وعلى شبه اسماعين

بس انت شبهى خالص

لالالالا مش اوى كدا

انت عندك شعرة بيضه

غير الى عندى فى افايا

وايه الى انت ماسكه فى ايدك ؟

كتاب ؟

ولا نص كيلو كباب ؟

قالى اسكت شويه

بطل تتريق عليا

والا مش هاتشوفنى تانى

وتبقى دى النهايه !!
ميجوووووووووو

Monday, April 21, 2008

كنت ادون والان بطلت

ما هو مش قادرة اسكت هتكلم واللي يحصل يحصل مفيش انيل من اللي احنا فيه. قالوليلي في البيت بطلي فلسفه وهبل انتي مش هتغيري الكون كل اللي هيحصل انهم هيسحوبكي عالقسم ومش هتلاقي نفسك انتي عارفه ايه اللي بيحصل علاوة على انهم هيبوزوا مستقبلك مش هتعرفي تشتغلي في اي حته. وطبعاً السيد ميجو مفوتش الفرصه ولانه ما يقدرش يحلف عليا بالطلاق -وديه طبعاً حاجة هايله- قالي علشان خاطر اللي في بطنك بطلي رغي لا هيودي ولا هيجيب مفيش حاجة هتتغير الناس ديه في دماغها خطة ماشية عليها وهيكسروا دماغ اللي يعترض

ما خبيش عليكوا انا كشيت شوية بس مقدرتش اكش اكتر من كدة حاسه اني دماغي هتفرع هاقول اللي انا عايزه وهاعرضها قوييييييييييييييي وإلا هيبقى سجن اسراء مالوش لازمة وتدوينا مالوش لازمة وحتى اللي في بطني مالوش لازمة


سته ابريل واحداثه هتفضل محفورة في التاريخ غصب عن عين الكل. وان الامور ما مشيتش عدل هيبقى في سته وسبعه وتسعه مش ابريل بس لا مايو ويونية ويوليه لغايه لما ناخد حقنا


بالامانه انا ما عارفه اللي حصل في المحلة وغيرها كانت ابطاله الناس بتوع الاضراب والمظاهرات بس ولا في ناس تانيه من اخوانا البعدا دخلوا في الزحمة علشان يبرروا التعامل العنيف مع المتظاهرين. طيب حتى ولو كانوا اخوانا البعدا ابرياء براءة الذئب من دم ابن يعقوب محدش ليه فكر ايه اللي خلا افراد شعبنا الجميل الطيب المهاود تركبها كل شياطين الغيظ ويعملوا اللي عملوه ده. يا بشر اللي حصل في المحله ده يبقى اقل واجب لما

يبقى في قتلى وجرحي في طابور العيش
سعر الزيت والسمنه -الله يرحم ايامها- يرتفع 4 مرات من اول السنه
الحديد يغلى بالميات ومحدش عارف يوقف السيد امين التنظيم - هي مش الحكومة بتلم بتوع التنظيمات دول مخدوش اخينا
ليه

كل ما تسال عن اي حاجة تلاقيها غليت ويقولك اصل الدولارغلى يا بيه ولما ينزل الدولار وتلاقي الحاجة غليت برضه يقوم اخينا يقولك اصل الجنيه مالوش دعوة بالدولار علشان عوموا الجنيه يا بيه - امال لو كانوا غرقوة كان حصل؟ ربنا يرحمنا ويتراف علينا

اشتري شكولاته -لازوم الوحم وسنيه- من محل بـ 4 جنيه واخدها من محل جنبه بـ 4 ونص واقول للبياع ليه مانا لسه
جيباها امبارح من عند فلان بـ 4 يقولي اصلها غليت

الناس تموت من الاهمال في المستشفيات
انفولونزا الطيور من انتشارها بدأت تتحور في مصر وماتستجيبش للتطعيمات والحكومة مصرة على ان السبب تربيه
الفراخ في البيوت- متهيألي الموضوع وسع منهم شوية ما هي فراخ البيوت بتاكل من اكل الناس اللي ساكنين في البيوت ديه يبقى جالتهم الانفلونزا منين
اكون انا وميجو مرتباتنا بتخلص على الاسبوع التالت من الشهر ونضطر نعيش على اعانات ماما ديه وماما ديه الاسبوع
الاخير مع اننا ساكنين جنب اشغالنا ومخرجناش من يوم ماتجوزنا في اي مكان تزيد فيه تكاليف المشاريب عن 20 جنيه ومرة واحدة في الشهر لزوم الترفيه - ربنا يترأف علينا ويخلينا نبطل العادة الشريرة ديه

اعضاء مجلش الشعب المنتخبين - معلش هنمشيها راس القرد هي اللي حمرا - كل اللي يهمهم في المجلس الموقر هو استجواب وزير الثقافه عن التصريحات المسئية للحجاب - ربنا يجعل كلامنا خفيف عليه - وبدله فيفي عبدة وكليبات روبي والعياذ بالله مع ان هناك سؤال لاوذعي في الحته ديه هما ازاي عرفوا ان بدله فيفي عبدة بتخدش الحياء وكليبات روبي مثيرة والعياذ بالله من غير ولا مؤاخذه في دي الكلمه من غير ما يتفرجوا عليها؟ وطبعاً ازمة مصر الكبرى نصرة اخوانا بتوع فلسطين ومش عارفه اخوانا في مصر مش لاقين حد ينصرهم ليه يعني هما ولاد البطة السودا؟

النقابات تبقى حكر على الاخوان ويكون نشاطها الوحيد تكوين لجنات إغاثه اخوانهم يتوع غزة برضه - ليه يا رب مخلقتنيش من اخوان غزة ليه؟ ليه؟ ليه؟ -ورحلات الحج والعمرة وده سبب اني مش منتميه لاي نقابه

اروح المرور علشان ارخص عريبة - ماتفهمونيش غلط ديه بتاعه اخويا لكن حصلت ظروف كدة اضطرني اني اكون المالك بالاسم - وتكون تكاليف الترخيص 250 جنيه ادفعهم وادفع عليهم 300 جنيه رشوة وسبحان الله كل المتعاملين مع الجمهور كانوا ياما رجاله مختومين - يعني عندهم زبيبة الصلاة - والستات محجبات ومؤمنات والحمدلله. وعلشان محدش يفهمني غلط انا لقيت واحدة مسيحيه فقعدت اتكلم معاها لغايه لما الورق يخلص قالتلي بتضطهدونا هنا ومطلعين عينا فقولتلها ازاي يعني قالتلي رمينا بعيد عن الجمهور علشان الموضوع ده فيه سبوبه حلوة وهما بيقسومها سوا - اشي خيال يا ناس

الحكومة تخنق اي حركة معارضه بدعوى انهم هما اللي بيفهموا والشعب والمعارضين فاقدين الاهليه ومش عارفين مصلحتهم علاوة على انهم خونه وبيعلموا على تكدير الامن العام وزعزعه الاستقرار وحاجات جامدة جداً - طيب انتوا نازلين فينا عزق سيبونا نقول آآآآآي حتى
تلاقي الجرايد كل يوم جيبالنا صور من بتوع مجاعات افريقيا وعايزين يقولوا الناس كلها جعانه اشمعنا انتوا اللي زعلانين - بس اللي غايب عن السادة بتوع الجرايد اننا عندنا ارض خصبه ونهر نيل ومشروع توشكي العظيم اللي اختفى الكلام عنه في ظروف غامضه والعياذ بالله - يبقى مش المفروض اننا نجوع ده زي ما يكون ربنا عامل حسابه على الهم اللي احنا فيه مش ده الكلام اللي حشرتوه في دماغنا في كتب الدرسات الهبابيه من ابتدائي لغايه ثانوي

اللي خربوا الدنيا واصحاب اعمال الشغب في المحلة بلطجيه - طب اما انتوا عارفين انهم بلطجيه سايبنهم ليه؟ ما
بتقبضش عليهم ليه؟ ولا عرفتوا بس تصطادوا اسراء ؟

وحاجات تانيه كتير ممكن اقعد اكتب عنها لبكرة وعلى فكرة المكان مفتوح لكل اللي عنده حاجة يكتبها مش هما بيقروا كل حاجة وبتجسسوا على كل حاجة طب هي ديه الحاجات اللي خلتني اشترك في اضراب 6 ابريل وبإذن ربنا هشترك في إضراب 4 مايو

وان كانوا شايفين اني فاهمه غلط يتفضلوا يشرحولنا وجهه نظرهم ايه وان كان عندهم حق وانا مبفهمش هبطل تدوين
وهبطل كلام في السياسه وهاعمل بانر كبير قوي احطة على باب المدونة واكتب عليه

كنت ادون والان بطلت

Love,

MishMish

Wednesday, April 16, 2008

بيان من الحكومه

حيث ان الحكومة قامت بقراءة هذا البيان السابق الذي يحتوي على معلومات مضلله من قله مندسه تحاول زعزعه الاستقرار الداخلي وتعوق مسيرة الاصلاح الاقتصادي الذي تنتهجها الحكومة. لذا وجدت الحكومة ان الضرب بيد من حديد على ايدي مثيري الشغب ومكدري الامن العام هو الحل الوحيد لضمان رفع مستوى معيشه الشعب وإستكمال مسيرة الاصلاح نحو غذ افضل واتخذت الحكومة القرارات التاليه:
اولاً: يجب على افراد الشعب التواجد اما في اعمالهم او في بيوتهم ويحذر تماماً التواجد على المقاهي ولو لنصف ساعه يوم الخميس للترفيه عن النفس
ثانياً: نظراً لإضطرار الحكومة لترشيد النفقات لإستخدامها لمصلحة الشعب تقرر تخفيض المصروف / المرتب الى الحد الادني حيث اننا في مرحله محورية سيتبعها خير وفير - مش عارفين هايجي امتي - وتصادر فوراً اي كماليات ترفيهيه
ثالثاً: نظراً لان الحكومة حامل ونفسها غامه عليها طول الوقت ولانها مشغولة في البحث عن اسم ولي العهد لذا من دافع الواجب لازم على الشعب القيام بجميع اعمال النظافه والاكل والشرب والغسيل واحضار الشكولاته يومياً علشان نفس الحكومة تتعدل
رابعاً: ولان الحكومة في انتظار ولي العهد قرار رئيس الجمهورية بتأميم جميع موراد وممتلكات الشعب لاستخدامها فيما يهم الامة
خامساً: نشكر الزعماءالذين يتفهمون موقفنا وحمايتنا لشعبنا العزيز ونحص بالذكر فخامة السيدة قطة الصحراء والتي تدعمنا دائماً.ونحن نثق في المواطنين الشرفاء وفي امتثالهم لقرارات الحكومة التي ثبت بالدليل انها دائماً الاصح
love,
MishMish

Tuesday, April 15, 2008

!!! تسقط الحكومه

حد يقدر يقول غير كدا ؟؟ تسقط الحكومه.. تسقط الحكومه.. خلاص مابقاش حد قادر عليها ..افترت وبقت جبارة انتقدها زى مانت عايز بس هى هاتعمل الى هى عايزاه ..دايما تتدعى الفقر وان الميزانيه لاتسمح بأى علاوات او اضافات مع ان الفلوس فلوسك وانك تعبت على ماجبت القرش ،الفلوس دى هاتاخدها منك باى وسيله ، بالكلام الناعم ، بالخنصرة من ورا ضهرك ،باى وسيله مشروعه او غير مشروعه ..المهم انها هاتاخدها هاتاخدها بحجه انها وراها مشاريع كتير ووراها بلاوى محتاجه فلوس وان كله لمصلحتك ، ومش من مصلحتك انك تسأل الفلوس دى رايحه فين ولا جايه منين اسكت وخلاص والا هايكون مصيرك الرجم كالساحرات ..مش مهم انها تصرف الفلوس على الحاجات الهايفه والحاجات المهمه تتأجل ، دايما تصريحاتها مضروبه ماتفهمش منها حاجه ،هى حكومه كوارث، ودائما تلقى باللوم عليك وانك السبب فى الكارثه مع انك حذرتها مئات المرات، هى حكومه لاتعرفك فانت من طبقات الشعب الكادحه ،دائما تخدعك بالكلام المعسول من اجل ان تصل الى غرضها فقد تريد مثلا ان تضمن صوتك فى شيئ ما وتضمن انك لن تعارضها ،لكن المشكله مش فيها المشكله فيك انك طيب وبتصدقها وتمشي وراها لانك غلبان وهاتفضل طول عمرك كدا ..وتفضل تعيش على امل التغيير لكن انسي ياعمرو مافيش تغيير، التغيير هايكون فى شكلها بس انما فى سياستهاعمرها ماهتتغير ،دمك هو الى هايتغير انما هى استحاله دا قدرك ونصيبك ..فتعامل معها على هذا الاساس لانها ودن من طين وودن من عجين ...
ملحوظه : هذا المقال ليس له اى مدلول سياسي ..هذا المقال موجه للمتزوجين فقط بس ابقو خدو بالكو لا الحكومه تشوفكو وانتو بتقروا المقال دا
ميجووووووو المتزوج حديثا

Friday, April 11, 2008

!!!!اوبرا فى الميكروباص


اول امبارح كنت رايح المقطم كان عندى شغل هناك ، وطبعا عشان اروح المقطم لازم اعدى على احد اهم ميادين مصر الا وهو ميدان السيده عائشه الذى يعتبر في حكم موسوعه جينيس للارقام القياسيه من اسوأ ثلاثه ميادين على مستوى الكرة الارضيه بعد ميدان اكوزومبو فى كينيا وميدان نيخاو فى اقليم التبت (هى التبت فيها ميدان ؟ ) طبعا انا عبرت سكه طويله مرورا ببير ام سلطان الى عزبه خيرالله الى المدبح وترب الغفير و الامام الشافعى تخيل ياصديقى نوعيه الركاب التى تركب هذا الميكروباص ،هم يشبهون نفس المناطق التى ركبو منها ، اشكال من البشر وجوهها شاحبه ومبانى اشبه بالقبور وميكروباص متهالك اشبه بالمساكن الصفيح ومقابر كثيرة ، مش عارف ليه كل ما اعدى على المنطقه دى احس ان المقابر مش بتخلص؟ بتدينى احساس ان مصر كلها مقابر ،تخيلو ان منطقه المقابر او زى مابيسموها الترب مليانه بياعين ؟ الى بيبيع حمام والى بيبيع بضاعه مسروقه او مستعمله لا والاغرب ان بنى ادمين عايشين هناك فى الترب هما خدوها من قصيرها وقالو احنا كدا كدا ميتين فنروح نسكن هناك يعنى عايشين ومش عايشين على راى عمرو دياب ، المنطقه دى نموذج للقبح والقرف وفى النهايه تكلل رحلتك بالنجاح الى ميدان السيده عائشه الى تحس انه نموذج مصغر لمصر.. فوضى ليس لها مثيل لدرجه تنسيك انت رايح فين اصلا ، وفى الميكروباص دايما بحط سماعه الموبايل فى ودنى واشغل الراديو على قناه الموسيقى او الاغانى المتخصصه، بالظبط زى النعامه الى دافنه راسها فى الرمل عشان ماتشوفش حواليها ، وقبل مادوس على زرار التشغيل سمعت صوت موسيقى كلاسيك عالميه افتكرت ان الراديو اشتغل لوحده ، قلت يمكن حد تانى فى الميكروباص بيعمل زييى ، بس بصيت حواليا مالقتش حد شكله يدل على انه عنده استعداد يسمع موسيقى كلاسيك ، يمكن الست الى جنبى الى شايله شنطه فيها فراخ وكتاكيت؟ولا الراجل ابوجلابيه بيقرا فى كتاب عذاب القبر؟ولا البنات بتوع المدرسه الصناعى الى قاعدين فى اخر كنبه؟ اخيرا عرفت الى مشغل الموسيقى الكلاسيك، تخيلو مين ؟؟؟ سواق الميكروباص !!! دماغى كانت هاتضرب بصراحه فلأول مرة فى حياتى اشوف سواق ميكروباص بيسمع اوبرا ،لو عمنا صلاح جاهين كان عايش كان انبسط جدا وعرف ان اغنيته بتاعه ( تماثيل رخام على كل ترعه .. واوبرا فى كل قريه ) اتحققت بس بدل من اوبرا فى كل قريه يبقى اوبرا فى كل ميكروباص !!! شلت السماعت بتاعه الموبايل من ودانى وقعدت اضرب كف على كف.. مصر دى بلد العجايب والمتناقضات وبلد الطفرات ماتستغربش لما تلاقى توك توك ماشي جنب مرسيدس،مصر بلد الزمالك وبولاق ، المعادى وعزبه الصفيح ، ام كلثوم وسعد الصغير، نجيب محفوظ وسمير رجب( بتاع الكبسولات )،مصر الى ممكن تشوف فيها واحده منقبه ماشيه مع واحده لابسه ميكرو جيب، كل شيئ ممكن وجايز ماينفعش انك تتوقع حاجه فيها وعلى رأى الاستاذ جمال حمدان فى كتابه( شخصيه مصر) لما قال:مصر عامله زى السمكه الى لما تقرب من القاع تلاقيها غيرت اتجاها فجأه للسطح ، مصر ممكن فى وسط خرابه تلاقى ورده،وزى الجمله العبقريه اللى مكتوبه على عربيه نص نقل(ماحدش فاهم حاجه ) بس ياترى ممكن نتخلص من القبح دا؟ بينى وبينكم الراجل دا ادانى امل كبير جدا ان مصر ممكن تتخلص من القبح والتشويه وترجع تانى بتاعه زمان ايام ام كلثوم وعبد الحليم ونجيب محفوظ ...تفتكرو ممكن ؟؟؟؟

ميجوووووووووووو

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق