Monday, April 21, 2008

كنت ادون والان بطلت

ما هو مش قادرة اسكت هتكلم واللي يحصل يحصل مفيش انيل من اللي احنا فيه. قالوليلي في البيت بطلي فلسفه وهبل انتي مش هتغيري الكون كل اللي هيحصل انهم هيسحوبكي عالقسم ومش هتلاقي نفسك انتي عارفه ايه اللي بيحصل علاوة على انهم هيبوزوا مستقبلك مش هتعرفي تشتغلي في اي حته. وطبعاً السيد ميجو مفوتش الفرصه ولانه ما يقدرش يحلف عليا بالطلاق -وديه طبعاً حاجة هايله- قالي علشان خاطر اللي في بطنك بطلي رغي لا هيودي ولا هيجيب مفيش حاجة هتتغير الناس ديه في دماغها خطة ماشية عليها وهيكسروا دماغ اللي يعترض

ما خبيش عليكوا انا كشيت شوية بس مقدرتش اكش اكتر من كدة حاسه اني دماغي هتفرع هاقول اللي انا عايزه وهاعرضها قوييييييييييييييي وإلا هيبقى سجن اسراء مالوش لازمة وتدوينا مالوش لازمة وحتى اللي في بطني مالوش لازمة


سته ابريل واحداثه هتفضل محفورة في التاريخ غصب عن عين الكل. وان الامور ما مشيتش عدل هيبقى في سته وسبعه وتسعه مش ابريل بس لا مايو ويونية ويوليه لغايه لما ناخد حقنا


بالامانه انا ما عارفه اللي حصل في المحلة وغيرها كانت ابطاله الناس بتوع الاضراب والمظاهرات بس ولا في ناس تانيه من اخوانا البعدا دخلوا في الزحمة علشان يبرروا التعامل العنيف مع المتظاهرين. طيب حتى ولو كانوا اخوانا البعدا ابرياء براءة الذئب من دم ابن يعقوب محدش ليه فكر ايه اللي خلا افراد شعبنا الجميل الطيب المهاود تركبها كل شياطين الغيظ ويعملوا اللي عملوه ده. يا بشر اللي حصل في المحله ده يبقى اقل واجب لما

يبقى في قتلى وجرحي في طابور العيش
سعر الزيت والسمنه -الله يرحم ايامها- يرتفع 4 مرات من اول السنه
الحديد يغلى بالميات ومحدش عارف يوقف السيد امين التنظيم - هي مش الحكومة بتلم بتوع التنظيمات دول مخدوش اخينا
ليه

كل ما تسال عن اي حاجة تلاقيها غليت ويقولك اصل الدولارغلى يا بيه ولما ينزل الدولار وتلاقي الحاجة غليت برضه يقوم اخينا يقولك اصل الجنيه مالوش دعوة بالدولار علشان عوموا الجنيه يا بيه - امال لو كانوا غرقوة كان حصل؟ ربنا يرحمنا ويتراف علينا

اشتري شكولاته -لازوم الوحم وسنيه- من محل بـ 4 جنيه واخدها من محل جنبه بـ 4 ونص واقول للبياع ليه مانا لسه
جيباها امبارح من عند فلان بـ 4 يقولي اصلها غليت

الناس تموت من الاهمال في المستشفيات
انفولونزا الطيور من انتشارها بدأت تتحور في مصر وماتستجيبش للتطعيمات والحكومة مصرة على ان السبب تربيه
الفراخ في البيوت- متهيألي الموضوع وسع منهم شوية ما هي فراخ البيوت بتاكل من اكل الناس اللي ساكنين في البيوت ديه يبقى جالتهم الانفلونزا منين
اكون انا وميجو مرتباتنا بتخلص على الاسبوع التالت من الشهر ونضطر نعيش على اعانات ماما ديه وماما ديه الاسبوع
الاخير مع اننا ساكنين جنب اشغالنا ومخرجناش من يوم ماتجوزنا في اي مكان تزيد فيه تكاليف المشاريب عن 20 جنيه ومرة واحدة في الشهر لزوم الترفيه - ربنا يترأف علينا ويخلينا نبطل العادة الشريرة ديه

اعضاء مجلش الشعب المنتخبين - معلش هنمشيها راس القرد هي اللي حمرا - كل اللي يهمهم في المجلس الموقر هو استجواب وزير الثقافه عن التصريحات المسئية للحجاب - ربنا يجعل كلامنا خفيف عليه - وبدله فيفي عبدة وكليبات روبي والعياذ بالله مع ان هناك سؤال لاوذعي في الحته ديه هما ازاي عرفوا ان بدله فيفي عبدة بتخدش الحياء وكليبات روبي مثيرة والعياذ بالله من غير ولا مؤاخذه في دي الكلمه من غير ما يتفرجوا عليها؟ وطبعاً ازمة مصر الكبرى نصرة اخوانا بتوع فلسطين ومش عارفه اخوانا في مصر مش لاقين حد ينصرهم ليه يعني هما ولاد البطة السودا؟

النقابات تبقى حكر على الاخوان ويكون نشاطها الوحيد تكوين لجنات إغاثه اخوانهم يتوع غزة برضه - ليه يا رب مخلقتنيش من اخوان غزة ليه؟ ليه؟ ليه؟ -ورحلات الحج والعمرة وده سبب اني مش منتميه لاي نقابه

اروح المرور علشان ارخص عريبة - ماتفهمونيش غلط ديه بتاعه اخويا لكن حصلت ظروف كدة اضطرني اني اكون المالك بالاسم - وتكون تكاليف الترخيص 250 جنيه ادفعهم وادفع عليهم 300 جنيه رشوة وسبحان الله كل المتعاملين مع الجمهور كانوا ياما رجاله مختومين - يعني عندهم زبيبة الصلاة - والستات محجبات ومؤمنات والحمدلله. وعلشان محدش يفهمني غلط انا لقيت واحدة مسيحيه فقعدت اتكلم معاها لغايه لما الورق يخلص قالتلي بتضطهدونا هنا ومطلعين عينا فقولتلها ازاي يعني قالتلي رمينا بعيد عن الجمهور علشان الموضوع ده فيه سبوبه حلوة وهما بيقسومها سوا - اشي خيال يا ناس

الحكومة تخنق اي حركة معارضه بدعوى انهم هما اللي بيفهموا والشعب والمعارضين فاقدين الاهليه ومش عارفين مصلحتهم علاوة على انهم خونه وبيعلموا على تكدير الامن العام وزعزعه الاستقرار وحاجات جامدة جداً - طيب انتوا نازلين فينا عزق سيبونا نقول آآآآآي حتى
تلاقي الجرايد كل يوم جيبالنا صور من بتوع مجاعات افريقيا وعايزين يقولوا الناس كلها جعانه اشمعنا انتوا اللي زعلانين - بس اللي غايب عن السادة بتوع الجرايد اننا عندنا ارض خصبه ونهر نيل ومشروع توشكي العظيم اللي اختفى الكلام عنه في ظروف غامضه والعياذ بالله - يبقى مش المفروض اننا نجوع ده زي ما يكون ربنا عامل حسابه على الهم اللي احنا فيه مش ده الكلام اللي حشرتوه في دماغنا في كتب الدرسات الهبابيه من ابتدائي لغايه ثانوي

اللي خربوا الدنيا واصحاب اعمال الشغب في المحلة بلطجيه - طب اما انتوا عارفين انهم بلطجيه سايبنهم ليه؟ ما
بتقبضش عليهم ليه؟ ولا عرفتوا بس تصطادوا اسراء ؟

وحاجات تانيه كتير ممكن اقعد اكتب عنها لبكرة وعلى فكرة المكان مفتوح لكل اللي عنده حاجة يكتبها مش هما بيقروا كل حاجة وبتجسسوا على كل حاجة طب هي ديه الحاجات اللي خلتني اشترك في اضراب 6 ابريل وبإذن ربنا هشترك في إضراب 4 مايو

وان كانوا شايفين اني فاهمه غلط يتفضلوا يشرحولنا وجهه نظرهم ايه وان كان عندهم حق وانا مبفهمش هبطل تدوين
وهبطل كلام في السياسه وهاعمل بانر كبير قوي احطة على باب المدونة واكتب عليه

كنت ادون والان بطلت

Love,

MishMish

8 comments:

Anonymous said...

باراحة على نفسك

المشكلة بصراحة ان الشعب مش فاهم الرئيس بتاعة

الرئيس العبقرى اللى بقالة 25 سنة بيحاول ينفذ البرنامج الانتخابى بتاعه ومش عارف عشان الشعب مافهوش حد بيفهم عشان ينفذله البرنامج

المشكلة فيكو ياشعب فوقوا بأه

يحيى حسنى مبارك العظيم اللى محدش فاهمه فى الشعب الغبى ده

Migo Mishmish said...

يا سلام يا سلام بايني هبطل تدوين يا جدعان
والحل جه من عند الاخ انونومس
تصدق عمري ما فكرت فيها كدة الرئيس عبقري عندة برنامج انتخابي لاوذعي بس احنا شعب بقر مش فاهمين
والنبي وما ليك عليا حلفان لاحط تعليقك في موضوع لوحدة علشان الناس تفوق
الحل طلع موجود مع ايقاف التنفيذ من 25سنه يا بقر
شكراً على مرورك يا انو. واهلاً بيك
love,
MishMish

Anonymous said...

انا كنت بتريق عليه

معلش بقى هزار مهندسين

ارجوا انك تكونى فهمتينى صح وانى ضد حسنى مبارك

تحياتى

HafSSa said...

بس خلاص
حلاوتك و عيشك عليا يا مشمش
بس اجيبهوملك فين؟؟

بصي كلام جد يعني
الواحد مبقاش عارف يعمل ايه
لعلمك الكبت اللي بتتكلمي عنه من اول البيت لغاية الحكومة
يعني لا في البيت الواحد عارف يتكلم
و لا في النت و لا في الشارع
و طبعا مش في الشغل
انا مش عارفة نحكي فين و امتى نفك عن نفسنا شوية
و في الاخر يقولولنا انتوا جيل صعب اوي و مخنوقين اوي و غضبانين على طول و يطلعوا فينا القطط الفطسانة
طيب ما هو اصل كبت على كبت مايلفش
يعني نخبط راسنا في الحيط؟؟
ولا نعمل ايه بالظبط
عن نفسي انا محبطة
و من كل حاجة
و لعلمك غلو الاسعار في كل مكان
عارفة هنا في قطر
كرتونة البيض كانت بحداشر ريال
فجاءة بقت بخمسة و اربعين و فوق
طيب ليه؟
متعرفيش
الشقة بقى ايجارها من الفين نط في خلال تلات سنين بقى بعشرة تلاف
طيب ادفع انامنين دلوقتي العشرة دول
يعني بقت اصلا نكتة لما قالوا ان الدوحة من اكتر خمس عواصم في العالم غلوا في الايجارات و نيويورك قبلها بشوية
طيب حد يسفرني نيويورك على الاقل
مش كده برضو و لا ايه؟؟

تحياتي و متشيليش في نفسك اوي كده
مش كويس على الجونين

Migo Mishmish said...

مانا فاهمه كلامك يا باشمهندس انو
بس هاعمل ايه هاقول انا ضد....لا يا عم انا دلوقتي اتنين مش واحد وفي جونين جاي في السكة
بيقولوا امبارح في جامعه حلوان قبضوا على شوية عيال ليهم مدونات وحاجات كدة
طيب انت عامل لنا زورو ومتخفي انما انا وميجو عرسان جداد وبنخش من بيوتنا عالنت
اذا كان ميجو لغايه دلوقتي ماقراش الموضوع وقالي لو الكلام طلع في السياسه هاحرمك دخول البلكونة تاني
Love,
MishMish

Migo Mishmish said...

مبحبش الحلاوة يا حفصه
ممكن جنيه رومي قديم او اسطنبولي ويا سلام بقه لو جبتلي بتاع 100 جرام جبنه فلامنك
اصلي بصراحة مدوقتهاش من بتاع 5 سنين او اكتر من ساعه ما كان سعرها 38 جنيه الكيلو
وبعدين انتي اش عرفك بموضوع الجونين ده. ديه كلمه ميجو
بصي بقه يا ستي انا اؤمن اننا لازم نعمل حاجة. اي حاجة، المدونة ديه محاولة مني اني اقول لا الكلام ده ما يكلش معانا. لما الناس تفضل تتكلم هنكون رأي عام يمكن ميحصلش التغيير واحنا موجودين يمكن يحصل بعدينا بس انا حاسه اننا زي ما نكون بنزع نخل احنا بنحط البذرة وحد تاني هيجني البلح لكن انا واثقه ان هيكون في بلح
انتي عارفه اني بدعي ربنا ليلل ونهار اني اجيب بنت مش ولد. البنت وضعها ساهل اتجوزت خير وبركة ماتجوزتش اهي قاعدة في بيت ابوها لكن الولد مصيبته تقيله لازم يكون شغال ولازم يكون عنده شقه ولازم يكون معاه امكانيات هم كبير قوي. يا بنتي دانا وميجو نص الحاجات اللي جاتلنا في الشقه ياما هدايا ياما حاجات خدنها من بيوتنا بحجه اننا بنفضي بيت ماماديه وماماديه علشان ما يبقاش عندهم كراكيب. مع اننا طول عمرنا بنعتبر من الطبقه اللي هي شبه متوسطة يعني متعلمين كويس وبنلبس كويس وبنخرج - زمان ايام ما كنا بنخرج إهي إهي إهي- يعني اهلينا مكنوش فقرا ولا عمرنا عرفنا طعم العيش ابو شلن ده ايه
love,
MishMish

مفقوعة مرارتي من حماتــــــــــــي said...

ده انتي عاوزة مراقبة مشددة
بصي لو اتقبض عليكي إيميل صغير كدة لأختك مفقوعة وليكي عليا آجي أونسك في الزنزانة إللي جارك
ربنا يقومك بالسلامة وييجي عتريس أو عتريسة وتكون الدنيا بقت أحسن

Migo Mishmish said...

الي العزيزة المفقوعه
انا كنت فاكراكي هاتقولي تليفون صغير واجيب فيفي معايا واجي
وتخش القسم تنكد عليهم واحد واحد من اول العسكري البواب بتاع القسم لغايه مدير الامن شخصياً. عارفه والنعمه لو خديتها لبتوع التعذيب وسيبتها عليهم كان هيبقى انتقام عادل وشامل وهيكونوا عبرة لمن يعتبر. بس اقول ايه ناس مش عارفه قيمة اللي معاها
ولعلمك فيفي ديه ممكن تبقى زعيمة وطنيه من اكتشافك انتي وساعتها تقولي دانا من حظي انها حماتي دانا اتجوزت ابنها مخصوص علشانها هي وتطلعي في العاشرة مساء وصباح الخير يا مصر وبرامج الاطفال كلها وكل حاجة كل حاجة
فكري كدة في اللي بقوله ولو هتعملي كدة هاقول انا كمان اني بخش مدونتك علشان اعرف اخبارها وانجازتها الوطنية
have a nice day :-D
love,
MishMish

There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق