Tuesday, January 27, 2009

ابو رجل مسلوخه

واحنا صغيرين كانو دايما يخوفونا عشان مانعملش شقاوة او نعمل الى هما عايزينه ..مش عارف ليه الكبار كانو بيخوفونا من اى حاجه وفى اى حاجه ..متهيألى انهم كانو وارثين الخوف من الى قبليهم ودا راجع لظروف اقتصاديه وتاريخيه وسياسيه من ايام الفراعنه الى الان ..بمعنى ادق ممكن نسميه الخوف التوارثى ..انا فاكر وانا صغير كانو دايما يخوفونا بالدكتور الى هايدينا حقنه او العسكرى الى هاييجى يحط الكلابشات فى ايديا ..او يقولولى لوكدبت ربنا هايوديك النار ويعذبك ..وساعات كانو يقولو لما ابوك ييجى هاياكلك علقه موت على الى عملته ..يعنى الناس دول خوفونا من اهم رموز الرحمه من غير مايحسو : الله - الطبيب - العسكرى - الاب وكلها رموز الحمايه والاحتواء بدل ماكانو يخلونا نحب الرموز دى ،وكان كل واحد من الكبار له اسلوبه وشخصياته المميزة فى التخويف زى : البوبع - العفريت - ام فرج- سعاد المحروقه- ابو زبعبع -ابو رجل مسلوخه ...وكل واحد يتفنن فى رسم شخصيته التخويفيه ، الناس الكبار بقى زى جدتى ليهم اسلوب خاص ودا راجع لان الناس دول مكانش على ايامهم انترنت او دش او تليفزيون ..كان ربنا مديهم خيال واسع الواحد فيهم كان ينخع النخعه من دول يطلعلك بشخصيه تجيب هبوط فى الكابوت لا تقولى هيتشكوك ولا دياولو ..فاكر وانا صغير ان جدتى طلبت منى انى املالها البرطمان الى بتحط فيه طقم اسنانها ..دخلت الحمام ومليتلها البرطمان بس مش من الحنفيه طبعا انتو فاهمين انا عملت ايه ..المهم هى حطت الطقم فى البرطمان وبعد شويه على بقها وعملتهالها مفاجأة وقلتلها ..طبعا الطقم كان طاير فى وشي وجه والدى ادانى علقه موت ..لكن جدتى لم تكتفى بعقاب والدى فقررت ان تحكيلى قصه ابو رجل مسلوخه ..هذا الرجل كان كفيل انه ينيمنى من المغرب بمجرد سماع اسمه ،كان يكفينى تخيل شكله فقط فيغمى على ..ومرة ثانيه القيت كلب صغير من فوق السطوح لكى اعرف ماذا سيحدث له وليس بدافع التعذيب ..فتبرعت جدتى بحكايه الجزء الثانى من قصه ابو رجل مسلوخه لينتابنى الرعب الشديد مما سيحدث لى فابو رجل مسلوخه سوف يعلقنى من ذيلى مثل الكلب الذى القيت به من فوق السطوح ..هذا الرجل : ابو رجل مسلوخه ساهم بشكل كبير فى تحديد مستقبلى الى حد كبير فنجحت فى الثانويه العامه وتخرجت من الكليه خوفا منه ومن شبحه المرعب ثم انتقلت الى مرحله العمل والكفاح ..فكنت اطيع رؤسائى حتى وانا اعلم انهم بهايم خوفا من ابو رجل مسلوخه ..اصبحت مسالما مع جيرانى والناس فى الشارع وفى المواصلات وفى كل مكان حتى لو كان معى حق ..خوفا من ذلك الرجل ..وفى المنزل متعاون الى اقصى درجه واقوم بواجباتى الزوجيه بمثاليه حتى لايغضب منى ابو رجل مسلوخه فيعلقنى من ذيلى ..لم انضم الى اى حزب ولم انتخب ولا مرة وليست لدى اى ميول سياسيه ولم انضم الى اى مظاهرة حتى ولو كانت سلميه تهتف للنظام ..وذلك لان ابو رجل مسلوخه قد ينتظرنى هناك ويفعل بى مايحلو له ..اشجع الاهلى لانى لو شجعت الزمالك فقد يفعل بى ابو رجل مسلوخه مايفعله ابوتريكه بعبد المنصف فى لحظه انفراده بالمرمى ..
مازال هاجس ابو رجل مسلوخه يطاردنى فى كل مكان وفى كل وقت ..ارى صورته معلقه على لوحات الاعلانات فوق الكبارى اراه فى مانشيتات الصفحه الاولى فى الجرائد ..فى غرفه نومى ..يجلس بجوارى فى المكتب المجاور لى فى العمل ..يدخن السيجار فى الشارع ويرمقنى بنظرة مرعبه وابتسامه باهته تحمل الكثير من الوعيد ..افتح التليفزيون فاجده امامى
مازال مخزون ابو رجل مسلوخه الموجود بداخلى مستمر..ولا استطيع التخلص منه ..فهل تخلصت منه انت ايضا ؟..
ميجوووووووو

Saturday, January 24, 2009

انت لقيط ..فاهم يعنى ايه لقيط؟

الناس زعلانه اوى اليومين دول من عصابه الدكاترة والممرضات الى بيبيعو العيال للامريكان ..انا مش عارف الناس دى زعلانه ليه ؟ حزب اعداء النجاح دايما كدا مش عاجبه حاجه ..ولان الناس دول نظرهم مش بعيد كانو عرفو يعنى ايه خطط طويله واستراتيجيات طويله المدى ..هما كدا دايما بيبصو تحت رجليهم ..انا بقى هافهمهم : اولا العصابه دى اصلا من تدبير المخابرات عشان تبيع العيال لامريكا ومش بس امريكا ..لأ دى خطه مدروسه اننا نبيع العيال لمختلف انحاء العالم لاهداف استراتيجيه لا يفهمها الغوغاء والدهماء وعامه الشعب بل يفهمها المتخصصين من امثالى ..اول هدف استراتيجى هو القضاء على ظاهرة التشرد الاطفالى وتصديرها الى الدول المختلفه ..بدل ما العيال دول يشدو كله تحت كوبرى الملك الصالح يروحو يشدوها تحت برج ايفل او تمثال الحريه او جنب نفق ابو تشارلز فى جنوب ايرلندا ..وساعتها بقى وكالات الانباء مش هاتسكت وهاتفضح البلاد دى ..ولا تلاقى واحد متخلف زى خالد يوسف يعملك فيلم زى حين ميسرة ويشوه صورتنا قصاد الاجانب ..لا تعايرنى ولا اعيرك الهم طيالنى وطايلك ..يبقى بكدا قضينا على التشرد الاطفالى وبعتناه على الدول التانيه ...الهدف الاسمى بقى هو ان ممكن حد من العيال دول الى سافرو امريكا وخدو الجنسيه حظه يضرب ويكسب انتخابات الرئاسه ويبقى الرجل الاول فى العالم ..وساعتها بقى يبقى احنا امنا داعيالنا ..لاننا هانبقى عارفين حقيقه الرئيس دا ..يعنى مثلا هايبقى اسمه جون تيرى مارك ..احنا بقى عارفين انه مش ابن تيرى مارك وانه ابن عبده بزازة سواق التوكتوك الى كان ساكن فى الدويقه الى ضحك على البت عواطف بياعه الفجل واغتصبها فى التوك توك ...وساعتها لو حب يلعب معانا نقوم نفتحله الملفات القديمه ..يعنى لو حب يقطع المعونه عن مصر نقوم نهدده بفضحه امام العالم ..فيطاطي راسه ويعمل الى احنا عايزينه ونعمل زى عماد حمدى فى الخطايا : انت لقيط.. فاهم يعنى ايه لقيط؟ ..احنا لميناك من الشوارع ..بس العيب الوحيد ان ممكن عبده بزازة تكبر فى دماغه ويطلب انه يروح يعيش فى البيت الابيض مع ضناه الى هو الرئيس الامريكى ونبقى وقعنا فى مشكله ..فهمنا بقى ياعالم ان الموضوع مش زى مانتم فاكرين ؟ بطلو حقد بقى وتفكير سطحى ساذج... سيبو الناس تشتغل فى صمت
دى ناس مش بتلعب دى بتخطط جامد اوى .. دى عمليه سريه باسم : انت لقيط فاهم يعنى ايه لقيط؟
ميجوووووووو

Monday, January 19, 2009

الميت ...مات

خلاص ياخواننا

الميت مات

ومافيش ميت بيقوم من الاموات

خدوه عالانعاش

وابقوا تفوا على قبرى

ان عاش

لو خد الف صدمه كهربا

المخ واقف

والنبض واقف

باختصار

مافيش حياه

ادولو جلوكوز

اعملولو فرقع لوز

بصو على عنيه المفتوحه

مبحلقه فى اى اتجاه

حتى لو قلتو دا بيبتسم

دى ابتسامته الهبله

مش ابتسامه سعاده

دى صبحت عنده عاده

ابتسامه اللامبالاه

جربو كدا

اضربوه

احرقوه

بالكرباج لسوعوه

ادولو على قفاه

اتحداكو لو نطق نص كلمه

او صرخ

او اشتكى

او حتى قال كلمه اه

حطو فى بقه لقمه

وخدوها تانى

بصو نظره عينيه

بتقول رضا

الحمدلله

برضه مش مصدقيننى؟

طب ارمو عليه زباله

غطوه بالقذارة

هايفرح

مع ان جده كان صاحب حضارة

ومن فات قديمه تاه

خدوه عالكنايس

خدوه عالجوامع

لفوه بيه فى الشوارع

انصبوا الف صوان للعزا

الميت خلاص مات

وناقصه بس

شهاده وفاه

ميجووووووووووووو

Sunday, January 18, 2009

يعملوها الصغار

ميجو قالي الموضوع ده قتل بحثاً مفيش داعي تكتبي عنه، قولتله لو ماقوتلش اللي في نفسي هطق
ايه الخيبة اللي المصريين بقوا فيها ديه. ايه المظاهرات اللي ضاربه في البلد طولها وعرضها بتندد بموقف الحكومة والتخاذل المصري واستجوبات في مجلس الشعب مقدمة من الغربان طبعاً - اللي هو المفروض يحل مشاكل الشعب المصري -عن غزة. طب والحكومة المصريه مالها؟
بتوع حماس عملوا زي حزب الله وخطفوا القضيه ووقعوا في الحفرة اللي حفرتهالهم اسرائيل نقوم احنا اللي نحتمل مسئوليه افعالهم الطايشة. وكل واحد قاعد فاضي مش عارف يعمل حاجة يقولك موقف الحكومة المصرية المساند للسياسه الاسرائيليه على اساس ان تشغيل العقل عار عند الاخوة العرب.
اللبنانيين يعلموا مظاهرات ضد مصر قدام السفارة بتاعتنا في لبنان ليه ان شالله؟ ما تخدوهم عندكوا؟ علشان يكملوا تجهيز الجماهير لرفع راية الإسلام، وتطبيق الشريعة في المخيمات الفلسطينية اللبنانية، ثم فتح القدس وتحريرها من اليهود
وطبعاً علشان يرفعوا الرايه عملوا معسكرات تدريب للمسحلين وعمليات سطو المسلح على البنوك علشان التمويل وتفجير المطاعم الامريكية لزوم الجهاد الفلسطيني والمقاومة اه وعلى فكرة عادتاً المطعم بيبقى مليان بناس من اهل البلد- اللي هما لا اسرائيلين ولا اميركان- ودول ناس لا ليهم في الطور ولا في الطحين.
والسيد حسن اللي تجيله خيبة والله بيتكلم في الزحمة هو كمان وبيدعوا لعصيان شعبي. طب يا شيخنا راجل قوي كدة ما تطلع من الجحر اللي انت مستخبي فيه. ده صدام في عز ما كان الحرب دايرة في العراق طلع ومشي في الشارع وانت خربت بلدك ودخلتها حرب راح ضحيتها المدنيين اللبنانيين والبنيه التحتيه للبلد ولولا الامم المتحدة كانت اسرائيل خدت لبنان بوضع اليد وحتى ماعتذرتش للبنان عالخراب اللي حصل
او سوريا تاخدهم عندها واهو برضه يشتغلوا بلقمتهم ويحاولوا يحررو ا الجولان بالمرة في السكة وهما طالعين عالقدس اللي هيحرروها بالبمب بتاع حماس. او احمدي نجاد بتاع ايران اللي بيقول انه هيشيل اسرائيل من عالخريطة. حد يتصل بيه ولا يرنله يا جدعان ويقوله يتفضل يشيل
حتى لو فتحتنا المعابر للفلسطنيين طب ماحنا بكدة يبقى حلينا مشكله اسرائيل وساعدناهم في اخد غزة وطبعاً الاخوة العرب هيخدوها فرصه وكل واحد حاسس بصغر نفس هيشتم في مصر متخيل بكدة ان مقامه علي زي ما قعدوا يقولوا مصر باعت فلسطين علشان تحرر سينا. على اساس اننا واحنا طالعين الحرب كان المفروض نتصل بيهم واحد واحد نشوفه عايز ايه علشان نجيبه في ايدينا واحنا هناك بالمرة. ثم الفلسطنين هيجوا يقعدوا عندنا هنا لأمتى ان شالله؟ وإذا قعدناهم يا ترى هياخدوا سينا قاعدة لضرب اسرائيل ويحققوا رغبه اسرائيل في انها ترجع لسينا تاني لانها مش هتسكت. وطبعاً اذا مشيناهم هيدوروا يلولوا في الدنيا كلها ان مصر طردتهم وانها اسواء من اسرائيل
بيتهيألي كفايه كده. الرجاله بتعترف بغلطها وبتعتذر وتتحمل مسئوليه افعالها زي ما عمل عبد الناصر. انما اللي بيعك بلده ومعندوش مخ يفكر بيه ومش مهتم بقضيته وبيدورعلى منافع شخصية ما يستحقش اني اقف جنبه حتى لو كان اخويا
اسرائيل بقالها في المنطقة 60 سنه اظن ديه فتره كافيه جداً اننا نفهم ان الحرب مش هتجيب نتيجه معاها. وحرب اكتوبر اكبر دليل على كدة. الحرب مهدت لمفاوضات السلام. السادات فهمهم انه عنده جيش قوي ومع ذلك مستعد للتفاهم. مابقالكم 60 سنه عمالين تغنوا وتصوتوا وتضربوا الدبابات بالحجارة وخوتوا دماغنا ماتجربوا مرة المفاوضات. اسرائيل استغلت القضية صح مع انها كيان محتل الا انها نجحت في انها تصور نفسها قدام العالم على انهم اصحاب الارض الاصليين والفلسطنيين هما اللي غلط. نجحت في بروزة صورة العرب والفلسطنيين كارهابين وبصراحه انا شايفه ان وجود كيان ممكن التفاهم معاه وملتزم باتفاقياته معانا - حتى لو كان كيان محتل- على حدودنا احسن ميت مرة من وجود كيان زي حماس اول ما مسك السلطه بدل ما يشوف هيضيف ايه للقضية عمل حرب داخليه مع بتوع فتح وبعدين اعلن غزة إمارة اسلامية وابتدوا يقفلوا نوادي الانترنت ويفرضوا الحجاب على الستات وبقيه الخبلان بتاع التيارات الاسلامية السياسية. وسابوا اسرائيل تنعم باحسن فترات الامن والامان وادوها عزر تديهم على دماغهم في دفاعها عن نفسها
والدليل ان الانتقادات اللي بتتوجه لاسرائيل هى انتقادات لاستخدام القوة المفرطة وليس رد الاعتداء. يمكن انا مش من المؤيدين قوي لسياسات الحكومة لكن الموقف ده بالذات انا فيه ورا الحكومة 100% مش يعملوها الضغار ويقعوا فيها الكبار
Love,
MishMish
There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق