Friday, June 20, 2008

امل وعمر والكلبه لاسي

هل تتذكرون الشخصيات التاليه؟ السؤال ده جه على دماغى بقاله كام يوم وقعدت اتخيل هما راحو فين ؟
فاكرين كتاب القراءة والشخصيتين المشهورين امل وعمر؟ متهيألى جيلى بس هو اللى يعرفهم ..كانو بصراحه مرتبطين بينا وبطفولتنا ولغايه دلوقتى فاكر العبارات بتاعتهم ..وكمان كان فيه بنت عمهم نرجس الى كانت ساكنه فى الارياف ..طب حد فاكر الدرس بتاع قلم من؟ ..احمد عثمان تانيه اول ؟ ولحد مالكتاب خلص وهما بيدورو على احمد عثمان عشان يدولو القلم بتاعه بس ملاقهوش ..مش عارف الشخصيات دى اختفت راحت فين ؟
انا اقولكو :عمر سافر لدوله عربيه خليجيه عشان يشتغل ويعمله سبوبه من فلوس البترول وربى دقنه وبقى رجل تقى ومش بعيد انه بيشتغل فى قناه من القنوات الدينيه زى المجد والناس ..اما امل الى كانت املنا كلنا.. لبست النقاب وقعدت فى البيت وبتربى عيالها على الطريق القويم ..اما احمد عثمان اعتقد انه من ساعه لما فهم الفوله وان مصر هاتبقى كدا فقرر انه يسيب كتاب القراءه يمكن كان عنده نظر لانه كان غاوى كتابه وطفش على اى دوله اوروبيه عشان يعرف يكتب براحته وماحدش يبقى رقيب عليه ..لانه لقى الى يقوله الى بتكتبه دا حرام ..امل وعمر واحمد عثمان كانو التلاته فى كتاب واحد ، كتاب القراءة ..كانو عايشين حياتهم بلا عقد بلا مشاكل ، لم نكن نتخيل ابدا فى طفولتنا ان امل بنت مزة فهى لم تكن محجبه او منقبه كانت بتلبس مريله فوق الركبه ..امل لم تثير غريزتنا ابدا ..وعمر كان خير صديق،، كنا نلعب معهم وكنا نعيش مغامراتهم ،اما احمد عثمان فكلنا كنا نبحث عنه من اجل القلم ،كنا نشجعه على الكتابه لكنه فضل ان يتنازل عن قلمه ويلقى به بعيدا بعد ان استبد به الياس ...
ياترى اين ذهب امل وعمر ومعهم احمد عثمان ؟ وباقى الشخصيات زى الكلبه لاسي؟ اعتقد انها ذهبت الى بلاد اخرى لانهم هنا يعتقدون فى نجاستها.. لاسي التى علمتنا الوفاء والصدق والشجاعه نجسه
اين ذهب هؤلاء؟
السؤال مازال يبحث عن اجابه

Thursday, June 19, 2008

أن تكون إنساناً


لا تظن بأن الدين الذي تعتنقه يمكنك من معرفة الحقيقة المطلقة والخير المطلق ويعطيك الحق في الحكم بأن كل البشر المختلفين في العقيدة في هذا العالم الواسع لا يملكون أي حقيقة وأن مصيرهم جميعا إلي الجحيم.


منقول بتصريف من باولو كويليو - أن تكون إنساناً
Love,
MishMish

Tuesday, June 17, 2008

الملك هايفضل ملك


الله عليك يامنير ياملك ..حسستنا بطعم البيوت .. تغيب تغيب وتطلع بتحفه جديده كل مرة ..كل مايجيلى يأس واحباط واحس ان ودانى اتوسخت من مطربى المراحيض ..ويجيلى تلوث سمعى وبصرى الاقيك تطلع بعد غياب وتقولى : انا هنا متخافش تعالى اعملك عمليه تنضيف فى ودانك ومشاعرك الى اتوسخت ..

بس يامنير لوسمحت المرة الجايه متغيبش كتير .. انا عارف انك بتدور على حاجه جديده كل مرة بس خلى بالك لو العمليه طولت اوى ممكن ترجع تلاقى العمليه بقت ميئوس منها ..ووداننا صعب انها تنضف تانى ..حتى مشاعرنا مش هاتحس بالى هاتغنيه ..لانها هاتكون خدت على القذارة .

لو سمحت يا ملك بلاش تتاخر وتسيبنا لشكمانات العربيات الى بتغنى من امثال : لوفه الاياط وامير ال(......) العربى ، انت عارف على ماعملت البومك كان فيه ناس استغلت عدم وجودك بالظبط زى الفيران وطلعت فجأة وافسدت ذوقنا وبوظت كل الى انت عملته، يعجبك يعنى نسمع واحد اسمه الليثى؟ ولا واحد تانى بيغنى يقولك بصيت لروحى فجأة لقيتنى كبرت فجأة ..تعبت من المفاجأه ...لا والادهى من كدا يقولك شريط ضربه معلم ..حاجه تقرف بصراحه ..تخيل يامنير الاغنيه الرسميه السنادى هى اغنيه العبد والشيطان؟ ..وواحد تانى يطلع يقولك اديك تقول مخدتش ؟ ينفع كدا شوفت غيبتك بتعمل ايه فينا؟ ..بس بصراحه جيت فى الوقت المناسب وخلتنى اعيش فى عالم تانى بعيد عن العالم دى ..وخاصه الواد المخنث الى عمل شريط اسمه( احضنى اوى) ..يانهار اسود كدا جهارا نهار؟ا والمعروف ان الواد توتو المخنث مزور وهربان من الجيش وجه طينها وعمل شريط اسمه احضنى اوى( الهى يحضنك عزرائيل ياشيخ

لو سمحت يا منير ماتتأخرش تانى لحسن لو اتأخرت تانى ممكن الواد توتو يفتحها على البحرى ويبهدل الدنيا ..المره دى بيدور على حد يحضنه اوى ..بعد كدا مش عارفين ممكن يعمل ايه ؟
ميجووووووووووووو
تحديث
معلش ياجماعه لسانى فلت منى المرة دى بس الهجمه بقت شرسه اوى من جماعه القبح والانحطاط وانعدام الذوق وبعتبر ان منير من اهم الناس الى بتحارب الديدان الى بتنخر فى ذوقنا ومشاعرنا .. ..المصرى الى علم الدنيا الذوق والجمال والفن وصل بيه الحال انه يتلوث كدا ويصدر زباله ؟ ياجماعه دا اللى بنى مصر كان فى الاصل حلوانى ..والذوق ما سابش مصر
انا مش ضد توتو انه يغنى هو حر طالما فيه ناس بتسمعه لكن انه يبقى رمز لجيلنا أسف.. عايز يغنى يغنى.. انما يبقى رمز يبقى عليه العوض فيكى يامصر

Tuesday, June 10, 2008

البلكونــة


إهداء من أشرف أخو ميجو


بصيت من البلكونة.........اشوف احوال الدنيا
لقيتها دنيا عجيبة.........دنيا غير الدنيا
وشوش الناس غريبة.........إشي جبس وإشي المونيا
والضحكة فوق الشفايف.........مش م القلب علشان حاجات تانيه
وكأن الناس تماثيل.........والمتحف هو الدنيا

Thursday, June 5, 2008

حاجة تقرف

بقالي كتير مابكتبش ولا بطلع البلكونة علشان العيشه بقئت تقرف مفيش حاجة واحدة عدلة بتحصل. مش مصدقين؟ عدوا ورايا

واحد: قانون الطوارئ اللي صوتوا عليه ساعه وسكتوا في مجلس الشعب وبقه امر واقع وقالوا اللي يخاف منه الارهابين وتجار المخدرات ومثيري الشغب. طيب ماشي هاحط جذمة في بقي ومش هتكلم طالما هيخوف الارهابين وتجار المخدرات ومثيري الشغب. بعد تطبيقه بـ 48 ساعه مش اكتر حصلت حادثه الزيتون في عز الضهر في ازحم شارع فيكي يا مصر. عمل ايه قانون الطوارئ للعالم اللي اتقتلت ولاالهوا ازاي حاجة زي كدة تحصل في عز الضهر محدش عارف. بالزمة حاجة تقرف ولا لا؟


اتنين: بعد حادثة الزتيون بـ 24 ساعه اتكرر نفس السيناريو تاني في عز الضهر في ازحم منطقة فيكي يا اسكندرية. عمل ايه بقه قانون الطوارئ محدش خاف اهو. ولا يمكن محدش قال في اسكندرية ان القانون اتطبق تاني. طب كان حد من الحكومة بعت رساله من موبياله لبتوع اسكندريه علشان يخوفوا بيها الارهابين وتجار المخدرات ومثيري الشغب. بالزمة حاجة تقرف ولا لا؟


تلاته: احداث دير ابوفانا ازاي يعني يبقى في ضرب نار وقتلى وجرحى واسرى والناس تتصل بالبوليس ويجي بعد البلاغ باربع ساعات ايه مكنوش لاقين مواصلات ولا العربية عطلت في الشارع فنزلوا يزقوا. وسيبكم من الهم ده كله بيقولوا ان المشكله اساسها ان في نزاع ما بين الدير والعرب- ايه اللي جاب دول يا اخويا عندنا احنا اللي عايش عندنا في مصر بنقول عليهم مصريين-على حته ارض هي المفروض من اراضي الدولة. وبعدين المحافظ يقول لبتوع الدير لو عايزين الارض لازم تراضوا العرب. يا سلام يا سلام


يراضوا العرب؟! ........-مش عارفه اكتب الكلمة علشان ميجو بيزعل لما بقبح- تبقى الارض ملك للدولة ولما نحب نشتريها نراضي العرب مش الدولة يا اخي ...... تاني. العرب دول ايه كينونتهم؟ وفين قانون النيله الطوارئ ولا ده بيمشي عالغلابة بس. هما محدش فيهم بيفكر ليه قبل ما يتنيل يفتح بقه ويخرج زباله. اللي فهمته من تصريحات الحكومة الذكية هو كالتالي:


اولاً: لو انت بني ادم مسالم وعايز تمشي بالقانون وماليكش في البلطجة هتاخد على دماغ امك ويوم ما تحب تعترض هتاخد بقانون الطوارئ على دماغ ابوك وبقيه عليتك


ثانياً: لو انت بلطجي او تنتمي للعرب وعايش على قفا الخلق وبتفرض اتاوات عليهم وتاخد من ارض الدولة زي مانت عايز. الدولة هتجيبلك حقك وتلملك الاتاوة من الناس وتقولهم راضوا العرب وقانون الطوارئ (يمسحوا بيه .....) -بلاش علشان ميجو بتضايق- تنتهي صلاحيته عند بدايه بواظان اهلك. بالزمة حاجة تقرف ولا لا؟


اربعة: كنت ماشية انا وميجو من كام يوم جنب جامع ليه الفضل من تحويل منطقتنا من منطقه عادية جداً الى قطعة من افغانستان كلها من الملتحين والمنقبات والاطفال الصغار في عمر 5 او 6 سنوات بعباءات سودا. وبغض النظر عن رائي في العالم ديه - شفت واحد ملتحي ماسك مفاتيح الجامع وافش عليها زي ما تكون مفاتيح الجنه وتلات ستات منقبات وواحدة منهم معاها عيلين صغيرين عايزين يصلوا في الجامع- وساعتها كان في صلاة بس طبعاً انا مش عارفه كانت ايه- المهم الدنيا كانت حر موت ودول كل واحدة فيهم لابسه اتواب من السواد وسايبين بيوتهم وعيالهم ونازلين الجامع علشان يصلوا وصاحبنا بكل تناحة واقف ماسك المفاتيح في ايد والباب في ايد تاني وراح قاليهم- وبرضه معرفش ده حديث ولا قران- خير صلاة المراة في بيتها. يا سلام يعني كل واحدة سايبه وراها اللي وراها علشان تنزل تأدي الفرض وتقابل ربنا في الدقتيتن بتوع الصلاة بعيد عن الدوشة والتشتت يقوم البهيم ده يقفل باب بيت ربنا في وشها


ليه ان شالله بتاع ايه يعني. هو ماله هي تصلي في بتها ولا في الشارع هو يفتح الباب ويحط لسانه في بقه علشان ده مش بيت ابوه

طيب والعيال الصغريين اللي شافوا امهم بتتعامل بقله الادب ديه تفتكروا هيبصوا ازاي لاي واحد ملتحي بعد كدة. ولا لما يحسوا ان الستات ربنا خلقهم وقرفان منهم يعني لولا العوزة بس لا ومش كدة وبس عليهم فروض زيهم زي الرجالة بس بس بشرط ربنا مايشوفش خلقهم في الجامع. بزمتكم حاجة تقرف ولا لا؟

تحديث
العزيزة حفصة بعتت تعليق تقول فيه الحل اننا ننضم الى البدو العرب علشان نعرف ناخد حقنا وانا عايزة اقولها نروح بعيد ليه . ما الجيزة قريبة الناس زهقت من تطنيش الحكومة عملوا لشارعهم سايت عالنت
http://giza.7p.com
يا سلام لما تنتصر العشوائية والغوغائية على النظام المتهالك

Love,

MishMish
There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق