Tuesday, June 17, 2008

الملك هايفضل ملك


الله عليك يامنير ياملك ..حسستنا بطعم البيوت .. تغيب تغيب وتطلع بتحفه جديده كل مرة ..كل مايجيلى يأس واحباط واحس ان ودانى اتوسخت من مطربى المراحيض ..ويجيلى تلوث سمعى وبصرى الاقيك تطلع بعد غياب وتقولى : انا هنا متخافش تعالى اعملك عمليه تنضيف فى ودانك ومشاعرك الى اتوسخت ..

بس يامنير لوسمحت المرة الجايه متغيبش كتير .. انا عارف انك بتدور على حاجه جديده كل مرة بس خلى بالك لو العمليه طولت اوى ممكن ترجع تلاقى العمليه بقت ميئوس منها ..ووداننا صعب انها تنضف تانى ..حتى مشاعرنا مش هاتحس بالى هاتغنيه ..لانها هاتكون خدت على القذارة .

لو سمحت يا ملك بلاش تتاخر وتسيبنا لشكمانات العربيات الى بتغنى من امثال : لوفه الاياط وامير ال(......) العربى ، انت عارف على ماعملت البومك كان فيه ناس استغلت عدم وجودك بالظبط زى الفيران وطلعت فجأة وافسدت ذوقنا وبوظت كل الى انت عملته، يعجبك يعنى نسمع واحد اسمه الليثى؟ ولا واحد تانى بيغنى يقولك بصيت لروحى فجأة لقيتنى كبرت فجأة ..تعبت من المفاجأه ...لا والادهى من كدا يقولك شريط ضربه معلم ..حاجه تقرف بصراحه ..تخيل يامنير الاغنيه الرسميه السنادى هى اغنيه العبد والشيطان؟ ..وواحد تانى يطلع يقولك اديك تقول مخدتش ؟ ينفع كدا شوفت غيبتك بتعمل ايه فينا؟ ..بس بصراحه جيت فى الوقت المناسب وخلتنى اعيش فى عالم تانى بعيد عن العالم دى ..وخاصه الواد المخنث الى عمل شريط اسمه( احضنى اوى) ..يانهار اسود كدا جهارا نهار؟ا والمعروف ان الواد توتو المخنث مزور وهربان من الجيش وجه طينها وعمل شريط اسمه احضنى اوى( الهى يحضنك عزرائيل ياشيخ

لو سمحت يا منير ماتتأخرش تانى لحسن لو اتأخرت تانى ممكن الواد توتو يفتحها على البحرى ويبهدل الدنيا ..المره دى بيدور على حد يحضنه اوى ..بعد كدا مش عارفين ممكن يعمل ايه ؟
ميجووووووووووووو
تحديث
معلش ياجماعه لسانى فلت منى المرة دى بس الهجمه بقت شرسه اوى من جماعه القبح والانحطاط وانعدام الذوق وبعتبر ان منير من اهم الناس الى بتحارب الديدان الى بتنخر فى ذوقنا ومشاعرنا .. ..المصرى الى علم الدنيا الذوق والجمال والفن وصل بيه الحال انه يتلوث كدا ويصدر زباله ؟ ياجماعه دا اللى بنى مصر كان فى الاصل حلوانى ..والذوق ما سابش مصر
انا مش ضد توتو انه يغنى هو حر طالما فيه ناس بتسمعه لكن انه يبقى رمز لجيلنا أسف.. عايز يغنى يغنى.. انما يبقى رمز يبقى عليه العوض فيكى يامصر

11 comments:

واحدة مفروسة said...

هههههههههههه
انت شقي يا ميجو و لسانك طويل حبتين ما كنت كويس و بتتكلم حلو على الملك
هههههههههههه
و بعدين محمد منير لو كان قاعد قدامك و سمعك كاان زعل ...اصله مش بيحب الشتيمه....و هوه نهذب جداااا
ههههههههههههههه
و ماتخفش الاغنيه اللي انت بتقول عليها حتقف لحد هنا...و لو حب يكمل ...حيروح السينما يكملها فيلم
هههههههههههه
سلام

Anonymous said...

محمد منير بجد هو الملك مش عارف الحياه من غيره تبقى عامله ازاى من اول علموني عنيكى لحد طعم البيوت كل اغنيه تحفه و بتقول حاجه الراجل ده مش بيغني و بس ده صاحب رساله اللي هي انه بيعتقنا باغانيه من الغجر اللي كرهونا فى حياتنا باغانيهم و انا نفسى الملك يقرا اللىميجو كاتبه وانا عايز اقول انالقصايد اللي بيكتبها ميجو و مش بينشرها هي نفس الخط بتاع منير و فيها روح اشعار سيد حجاب و وجيه عزيز و محمد منصور. بس يا ريت يا ميجو تعبر عنا و عن ارأنا بدون غلط في حد لاني عارف ان ده مش طبعك و انا حاسس قد ايه الناس دي قرفاك اخوك المخلص ميرووووووووو

Migo Mishmish said...

الاخت المفروسه دائما
اعمل ايه يا مفروسه ؟ انا بقيت مفروس اكتر منك .. يعنى يعجبك الى بيحصل دا ؟ وصلنا للدرجه دى من القبح واحد هربان من الجيش ومزور ومش مكفيه كدا كمان لأ وسبناه يغنى رايح يقولك احضنى اوى ..مش حاجه تحرق الدم؟سكتناله دخل بحماره ..بقى هو دا رمز الجيل..لأ وايه معرفش مين قال ان اغنيه (عيونه دار ) هى اغنيه القرن معرفش فى اى استفتاء ..غالبا استفتاء ام ترتر .. معرفش السافل دا مين الى حطه وصى على مشاعرنا واجبرنا على اننا نسمعه ..يمكن عشان يقولو اننا شباب تافه وان توتو هو رمز الجيل؟
دلوقتى بيقول احضنى اوى مش بعيد بعد كدا يقلع سلبوته وهو بيغنى
معلش على طوله اللسان اصل البوستر بتاع الالبوم اسمه مستفز اوى ..مش كفايه قوم اقف وانت بتكلمنى .. رايح يعمل احضنى اوى ؟
تحياتى لكى يامفروسه من ميجو المفروس

Migo Mishmish said...

الاخ ميرو
شكرا على البوءين الحلوين دول
معش انا طولت لسانى بس صدقنى انا دمى محروق من القرف الى حوالينا ..احنا وصلنا للدرجه دى من القبح؟
واوعدك انى مش هاغلط فى حد تانى
تحياتى ليك يا ميروووووووووو

Migo Mishmish said...

ياد النيله على طلاقي المستجعل. ميجو هيطلقني اونلين انا لسه معترضه على كلامه عند حسن الهلالي
المهم بقه انا شايفه ان ميجو متحامل بزيادة على تامر
انا مبحبش اسمع تامر ولا اشوفه بس ده ما يدنيش الحق اني اشتمه. طالما في ناس بيحبوه خلاص هو وهما حرين انا اللي ليا لو كان تامر اتقدملي كنت هرفضه وخلاص
انا بس مش بحترمة لانه زيه زي احمد الفيشاوي كداب وجبان. موضوع الجيش ده مضايقني جداً لانه مش احسن من حد. وده مش معناه ان الجيش حلو وجميل ده كله مجانين وناس عندها مش عقد نقص لا بلاوي نفص. بس تامر مش احسن من زمايلي اللي كانوا معايا في الكليه - كليه العلوم جامعه القاهرة - وكنا بندرس18 مادة في الترم ولما اتخرجنا كانت حياتهم واقفه علشان موضوع الجيش ده. فاقل واحد في دول احسن منه ميت مرة على الاقل هما متعلمين ولو كنا في بلد عدل كان المفروض الحكومة تستثمر فيهم
ثانياً هو ادروش شوية ومشي ورا عمرو خالد وده في حد ذاته مش مشكله لكن اللي بيمشي على حبلين ده بكرهه. يعني شوية يعمل متدين ويقولك انه هيعتزل الفن بعد فترة علشان الفن حرام. وبعدين يطلع في الافلام لبسلي قميص فاتحه لغايه نص بطنه وسلسله وهاتك يا حب وسهوكة. وبرضه ده مش مشكله لاني بحترم الفن والفنانين
تامر زيه زي غيرة من اللي عندهم ازدواج في الشخصية شايف ان الفن حرام.ليه هو بيقول ايه مش بيغني للحب هو في حاجة في الدنيا احلى من الحب. ده الله محبه ده عندي احسن ميت مرة من خطب الكراهيه والغم وإقصاء الاخر. مش موافق على البوس والاحضان في الافلام ما يمثلش لكن مش يقعد يحسسنانا بالذنب واحنا بنتفرج على الفليم
وعموماً طالما هو قرر يعتزل علشان ربنا هيهديه انا قررت اقاطع كل افلامة واغناية علشان يعجل بموضوع الهدايه ديه
Love,
MishMish

HafSSa said...

لوووووووووووول
معلش يا ميجو
متقهرش في روحك
كده انت على وش ابوة و حركات يعني
هي الدنيا كده
لكن منير
اه من منير
انا مش عارفة اقلك الالبوم الجديد عامل فيا ايه
كفاية كان فاضل
و لا يونس
و طعم البيوت نفسها
و معاكي؟؟
وابو الطاقية
الله
دول اغلب الاغاني خلاص

انا اكتر حاجة كنت خايفة منها ان طول انتظارنا يجيي على فاشوش او يطلع الالبوم مش قد المقام اوي
لكن بصراحة جاتلي حالة ازبهلال لما سمعته
و الى الان وحياتك


تحياتي
ليك و لمشمش
انا مبقتش عارفة انا بكلم مين

Abominatrix said...

يا نهار اسود .. هي الأغاني في مصر مستواها إنحدر كدة ليه؟

أنا معنديش فكرة عن الحاجات اللي طالعة جديد. أنا أخر حاجة سمعتها من مصر كانت أغنية لعمرو دياب بتاعة حبيبي ولا على باله. و بعدين تامر دة أنا مسمعتلوش غير أغنية واحدة بتاعة حبيبي و إنت بعيد. و بعد كدة مش عارف مين قال لي إنه بطل غناء عشان مطلوب في الجيش و مش عايز يروح الجيش. يظهر كدة إن أخباري قديمة أوي.

لما الأغاني مستواها يوصل للدرجة دي الناس بتسمع ليه؟

ميجو مشمش المدونة دمها خفيف جداً

Migo Mishmish said...

حفصه الجميله
كدة انتي بتكلمي مشمش علشان انا دايماً بمضي تحت باسمي. ميجو مابيمضيش مش عارفه ليه بس ممكن يكون علشان هو شخصية مشهورة وشاعر وحركات يمكن يطلع في التليفزيون ولا حاجة. وبعدين لو ميجو فكر مرة وقال حفصه او اي مدونه ست الحبية ولا العزيزة هيبقى نهاره مش فايت انا اصلاً مطلعه عينه والبيبي جوه من غير حاجة لكن كمان هيعاكس عالنت مش هايحصله كويس خالص
انا عايزة اقولك ان قبل معرفتي بميجو مكنتش بحب منير لان اغانيه بالنسبة لي مشفرة. انا بطبعي بحب الصراحة يعني عايز تغني في السياسية قول الحكومة بنت كلب وهيههههههه - زي شعبان عبد الرحيم - لكن تقعد تقول انا يونس الكلام ده مايكلش معايا وبتخنق بسرعه وانا كمان مشمش ومفيش حد احسن من حد
بس ميجو فهمني بقه ايه الوضع. وامبارح شوفته في البيت بيتك شخصية رائعه وجميله يستحق ان الواحد يحترمه ويقدرة
Love,
MishMish

Migo Mishmish said...

الاستاذ
abomintrix
اهلاً بيك معانا وياريت مكتنوش اخر مرة تخش فيها البلكونة
انت سبت مصر يا ابني ايام العظام -جمع عضمه بس باللغه العربية - فين ايام العندليب عمرو دياب
اللي انت متعرفوش ان تامر دلوقتي بقه شعار المرحلة. لما سيادته اتقبض عليه علشان هروبة من الجيش البنات اتهطلت وعملوا تيشرتات مكتوب عليها بالروح بالدم نفديك يا تامر
وبعدين انت مش خرجت من مصر انت كدة بقئت من الناجون من النار الف مبروك غيب كمان سنتين وتلاقي بعرور بتاع العنب العنب - جيه اغنيه كانت شعار مرحلة مهببه برضه - وزير الاعلام
مصر بتعرق
بق
بق
بق
بق
.
.
.
.
.
Have a nice day, Love,
MishMish

Abominatrix said...

مش مش

هما عملوا تشيرتات كمان.. بيفكرني بأيام عبدالحليم لما مات في بنات كتير انتحروا.. بس هو تامر دة يجي حاجة جنب عبدالحليم..

أنا أعتقد إن الثقافة في مصر عموماً مستواها إنحدر خالص معرفش بعد كدة هتوصل لإيه. لدرجة إن و أنا في مصر السنة دي كنت بدور على مكتبة و أنا في الغردقة و زوجي بالأخص كان بيدور على كتاب معين.. أولاً مكنش في مكاتب كتير والمكتبتين اللي لقناهم كانوا بيبيعوا كتب دينية فقط. الثقافة الدينية هي اللي ماشية الايام دي.. و لو انها ثقافة ارهابية أكتر من ما هي دينية.

و على فكرة أنا من معشر السيدات بس "أستاذ" لايقة علي بردو.. هههههة

اجندا حمرا said...

هاي ميجو

طبعا الملك حيفضل الملك و لا وجه للمقارنه بينه و بين بقيه الناس لأنه له استايله الخاص
الصراحه اول ماقريت عن موضوع توتو حسني و حكايه احضني قوي قلت ايه ده؟ليه كده يعني و بعد كده بدأوا يقولوا انه يمكن بيقلد هيثم لأن هيثم كان بيفكر يطلع علي البومه الجديد ببدي ستومك
شوفت المهزله
لأ و العبد و الشيطان دي كمان حدوته لوحدها
الكوميدي بقه ياميجو ان الأغاني الهابطه دي بتتغني في الموالد اللي بينتشر فيها شرب المخدرات و دي كانت ظاهره اتكلموا عنها في الجرايد يعني ازاي يكونوا بيوعظوا و هما محششين مثلا بس حنقول ايه زمن غريب اللي بنعيش فيه

تحياتي ليك ميجو علي الموضوع الجميل و تحياتي لمشمش و عقبال مانبارك بقدوم ولي العهد
:)

There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق