Tuesday, October 23, 2012

حصريا على مدونه البلكونه

اول صورة حصريه ل(سعد نبيهة ) رجل العيد الذى حير الجميع ..ليزيح الستار عن اكبر لغز فى الثلاثين سنه الماضيه ...
لاحظ الشخص على يمين صفاء ابو السعود الراكب عجله وملامحه مبهمه ..يقال انه عمر سليمان وفى اقوال اخرى يقال انه محمد البلتاجى ...والبعض يؤكد انه المخرج مجدى ابو عميرة ...فلننتظر الايام القادمه لتنكشف لنا اسرار اخرى ..
كل سنه وانتم طيبين واضحى سعيد 
ميجوووووو وزوجته مشمش

Thursday, October 11, 2012

نهضه نهضه نهضه

تبقى راكب واحد فقط ليكتمل عدد الركاب فى الميكروباص المتجه الى النهضه ..وفى تلك اللحظه ظهر الراكب المنتظر ...شاب وسيم يبدو من مظهره انه جامعى ...واثناء وضع قدمه على باب الميكروباص ...ظهر رجل فى اواخر الخمسينات من عمره وقاله : النبى يابنى انا مستعجل ورايح المستشفى خلينى اركب انا ...بكل احترام سمح الشاب للرجل بالركوب مع جمله : اتفضل يابويا ...ركب الرجل وقال للانسه الجالسه فى اول كنبه خلف السائق ...النبى يابنتى تقعدينى هنا اصل ركبى واجعانى ...جلس واخذ يتمتم ببعض الادعيه والكلمات ..الهى يستر طريقك يابنتى ...ربنا يفرح قلبك ..الهى ينور طريقك ...واثناء ذلك فتح محفظته وسأل الراكب بجواره : الاجرة كام يابنى ...جنيه وربع ؟ طب يابنى متشكرين ...بس مش معايا غير نص جنيه ...النبى ياسطى لو مافهاش زعل انا مش معايا غير دول مسامحنى فى الباقى ؟ ...طب يابنى ربنا يخليك ويستر طريقك ويرزقك برزق عيالك اللهم امين ..طب خد النص جنيه يابنى ..يعنى مش عاوز اجرة خالص ؟...روح يابنى ربنا ينور طريقك ....ظل الجميع فى الميكروباص يرسلون الاجرة للكنبه الاولى خلف السائق ..والتى تبرع فيها الرجل العجوز بلم الاجرة ...وكان يسأل الركاب : حد له باقى ياخواننا ...كده كله دفع ؟ اوعى يكون حد مادفعش .واثناء لم الاجرة ...ظل يحكى ويحكى للناس ويلقى خطبه عن الاخلاق وعن الزمن الجميل ..حتى هتف للسائق ...والنبى يابنى اقف هنا ...ربنا يستر طريقك ......بس هنا اوقف ...شكرا يابنى ...ربنا يديك على قد نيتك يابنى ...سار السائق منتشيا بدعوات الرجل ...وسأل الركاب عن الاجرة ...وانتبه الجميع ..الراجل العجوز لمها ...هو مادهالكش ؟؟
صرخ السائق .مصدرا صوتا قبيحا ..هو يوم مش باين من اوله ...عشان الواحد يحرم تانى يعمل خير فى حد ....اخرج رأسه من شباك الميكروباص وبصق
نهضه نهضه نهضه
ميجـــــووووووووووو

Tuesday, October 2, 2012

الجهل ........... يقتل

يوم الخميس 27 سبتمبر اتنشر خبر في المصري اليوم والشروق عن انعقاد لجنه حقوق الإنسان لمناقشه "مشروعية ختان الإناث"

بالنسبه لي الخبر في مجمله تجسيد حي لواقعنا المأساوي الجديد

في تفاصيل الخبر شرح د. اشرف قرطام اضرار عمليه الختان من الناحيه العلميه فاعترض عليه النايب احمد سيد رمضان ... وقال "إن الجزء الذي يتم استئصاله من الجهاز التناسلي للمرأة من اكثر المناطق الحساسه وعدم إجراء الختان يزيد نسبه الشهوة لديها" وطبعاً حضرته مقالش ايه هو المصدر اللي استقى منه المعلومة العظيمة اللي عدت على الدكتور اشرف قرطام استاذ امراض النساء- طب عين شمس.

ولم تتوقف المأساه الى هذا الحد بل فقد تفتق ذهنه عن استنتاج سريالي عالمي الا وهو "إن كنا نريد المساواه بين الرجل والمرأة يجب إجراء الختان لهما"

اقتراح سيادة النايب مكنش حاله فرديه لا ده جزء من منظومة هدفها الوحيد تقنين تحويل المرأة الى Sex Slave ملهاش معنى غير كدة


محمد سعد الازهري وهو عضو في اللجنه التأسيسه للدستور صاحب الاعتراض على لفظة في مادة مقترحة فى الدستور الجديد تجرَّم الاتجار بالنساء وقال أن هذه الجملة بالذات معناها فى مواثيق الأمم المتحدة وحقوق الانسان منع زواج من كانت عمرها أقل من ثمانية عشر عاماً ولو بيوم واحد ويسهب سيادة العضو في تبرير اعتراضه بقوله بان الدستور المصري يجب عليه ان يراعي القيم المصريه بتنوعها

وقال في اتصال مع جابر القرموطي ان الزواج في سيوة وسينا والنوبه غير الزواج في القاهرة والجيزة فكل مكان تلقائياً سيحدد سن الزواج الخاص بيه والبنت ممكن تلاقي عندها 14 او 15 سنه وتلاقيها ممكن تتجوز وبنت تانيه تلاقيها عندها 20 ومتنفعش تتجوز لان الحاله الضعيفه بتاعهتا لا تطيق الزواج ... وبعدين استشهد بان في الولايات المتحدة الامريكيه سنه 1885 كان سن الرشد 7 سنين 

بس هو بصراحه مجابش سيرة سن العريس وهل المفروض يبقى طفل برضه ولا راجل كبير (من اللي بيحبوا العيال - لا مؤاخذه)

سيادة العضو شايف ان طالما في ناس لسه بترتكب الجرم ده في اماكن وقعت من حسابات الريس المقلوع وتكالب عليها دعاه الجهل فأحنا نكأفئهم بإننا نخلي الوضع قانوني ... 
وبعدين برضه علشان يبين علمه استشهد بامريكا في القرن الـ 18 

                يعني باختصار هايبقى عندنا مراهقات بيربوا اطفال 

اللي انا مستغرباله انه ليه مقدمش اقتراح بتقنين جرايم التار في الصعيد مثلاً ما برضه الخلافات في القاهرة والجيزة غير الخلافات في الصعيد ... الناس في القاهرة والجيزة ممكن يشتموا بعض او يشتكوا بعض في القسم انما الوضع في الصعيد ممكن يوصل ان التار تورثه اجيال لا عمرها شافت القاتل ولا القتيل

سيادة النايب اللي فوق عايز يبتر اعضاء النساء علشان يحد من شهوتهم وسيادة العضو اللي تحت بيقول عايز يجوز البنت عندها 14 سنه لو تستحمل


مناقشه الافكار ديه في اللجنه التاسيسيه للدستور  ... انتصار للجهل
تقنين بتر الاعضاء بحجه الفضيله .... انتصار للجهل
تقنين زواج القاصرات ... انتصار للجهل


الجهل .......... يقتل
MishMish

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق