Tuesday, June 30, 2009

ربنا يديم المعروف

اسف على التاخير ..كنت فى اجازة من كل حاجه ..من المدونه والشغل والحياه ...بفصل دماغى شويه بعد ان كادت ان تنفجر ..فمهنه التدريس من المهن الشاقه التى تستنفذ جميع القوى الممكنه فى الانسان ..المهم ..من حوالى اسبوعين رحت انا ومشمش نزور والد واحد زميلى عشان كان عامل عمليه قسطرة فى القلب ..زيارة المريض واجبه طبعا ..المهم خدت معايا واجب الزيارة ورحت انا والمدام وساندو ..بصراحه زميلى دا طيب جدا ومحترم ووالده كمان ..كانت القعده زى الفل وكل شيئ تمام ..الى ان جاءت نقطه اللاعودة فوجئت بوالد زميلى يتحدث بطيبه عن العلاقه الجميله بين المسيحيين والمسلمين وان جارتهم الست ام بلبل كانت بتعملهم الكحك و ان زمان مكانش فيه اى مشاكل وووو.....كل دا كويس وانا اقوله طبعا داحنا طول عمرنا عايشين مع بعض فى امان وان اعز صحابى مسلمين وان لو فيه فتنه او مشاكل مكناش قاعدين مع بعض دلوقتى وربنا يديم المعروف احنا اهل ..فوجئت بوالد زميلى الطيب بيقولى بس بصراحه فيه عندكو ناس متعصبين اكتر من عندنا وان الكنايس حاطين فيها اسلحه عشان تموتونا ودخل فى سكه ان الاناجيل محرفه وانتو بتقولو ان ربنا تلاته ..الالالالالاه ايه الى بيحصل ياعم منتا كنت ماشي كويس ..طبعا انا مكنتش برد وبسمع بس احتراما لانه مريض واحتراما لانه فى بيته ..تانى حاجه انا مش متعود انى ارد على اى واحد جاهل ودماغه على اده ..طبعا زميلى حاول انه يغلوش على الموضوع وانتهت الزيارة على خير بالاحضان والقبلات وربنا يديم المعروف احنا اهل ..وربنا يشفى كل مريض ومنجيلكوش فى حاجه وحشه ..نزلت مع زميلى الطيب ووصلت مشمش الى البيت واتصلنا بصديق طيب اخر وذهبنا الى احد الكافيهات ..تحدثنا فى كل شيئ وضحكنا للركب ..الى ان جاءت نقطه اللاعودة ..بدأ زميلنا الطيب يفتح معى سكه مش ولا بد بسؤال : انت حاسس بالاضطهاد ياميجو ..طبعا انا رديت ..ربنا يديم المعروف احنا اهل ..لو فيه اضطهاد مكناش قعدنا مع بعض دلوقتى وانا اعز صحابى مسلمين ومصر فى رباط الى يوم الدين ..وهكذا قالى امال انتو ليه بتقولو ان فيه اضطهاد؟ قلتله هو مافيش بالمعنى المفهوم ممكن تقول فيه تمييز يعنى الاقباط بيتعاملو على انهم مواطنين من الدرجه التانيه ...قالى ازاى مانتو واخدين حقكم فى البلد ..قلتله المقصود بالتمييز انه موجه الى فئه معينه زى التمييز ضد البدو وضد المرأة وضد الصعيد وضدك شخصيا كمواطن مطحون واحنا كفئه من فئات المجتمع معرضين للتمييز ..قالى ازاى يعنى ؟ قلتله حاجه بسيطه مثلا : عندك كام نادى فى مصر ؟ قالى حوالى 16 فى الدورى الممتاز ..قلتله فيهم كام لاعب مسيحى ؟ قالى مانت كان عندك هانى رمزى لاعب الاهلى ..قلتله دا من 20 سنه ..دلوقتى بقى فيه كام واحد ..قالى اللعب دا موهبه و ومالهوش علاقه بالدين ..اتحرق دمى وقلت : بذمتك ال 8 مليون ولا ال10 مليون مافهمش واحد عنده موهبه كرة القدم ؟ قلتله بلاش دى : احنا حسب الكلام الى بيتقال اننا حوالى 10 فى الميه من سكان البلد ..مش مفروض ان يبقى لينا برامج مخصصه لينا فى التليفزيون ؟ مش احنا بندفع ضرايب زى بعض؟ قالى بس احنا اغلبيه ..قلت منا مش معترض على انه يبقى اغلبيه البرامج موجهه للمسلمين طب احنا فين ؟ بلاش دى مش عايزين برامج فى التليفزيون ..هانعمل قناه على حسابنا طب ادونا مكان على النايل سات ..لا ممنوع شوفو الاوروبى ..قالى برضه فين التمييز انا مش شايف اى تمييز ..قلتله طب خد عندك دى ..تقبل ان البابا شنوده يطلع فى مقاله الاسبوعى فى الاهرام يقول ان القرأن محرف ؟ دى كانت البلد ولعت وماقعدتش تانى ..تخيل لما الاهرام العريق يدى مساحه للاستاذ زغلول النجار عشان يكتب عن الاعجاز العلمى ..رد عليا : وانت مضايقك فى ايه الاعجاز ..قلت : ياعم حلو يتكلم على اى حاجه تخص دينه انما ايه دخل الانجيل والتوراة بالاعجاز ..يعنى لازم يحبش الموضوع بكلمتين عن التحريف وان الاديان الاخرى مزيفه ؟ ايه علاقه دا بالعجاز العلمى ..رد عليا بحرقه : بس دى حاجات عقائديه ...قلتله انا معاك ان فيه اختلافات عقائديه بس مش مكانها الاهرام او الاخبار او اى جريده قوميه ..طب الناس زعلت ليه من موضوع الكاريكاتير بتاع الدانمارك ؟ والناس زعلت ليه من فرنسا انها منعت الحجاب ماهم برضه عندهم عقيده ..واليهود برضه عندهم عقيده ما عندهم نصوص عقائديه تخص ارض الميعاد ..وامريكا بالمبدا بتاعك احتلت العراق لاعلاء رايه الصليب ..والبوذيين شويه يشتمو فينا ويقولك المسيحيين والمسلمين واليهود مش عارف ايه ...المهم انتهى الحوار على خير ..وربنا يديم المعروف احنا اهل واوعى تزعل ياميجو ...
تانى يوم ..ماتش مصر وايطاليا الكل فرحان بالفوز ..الكل فرحان لان فيه حاجه بننتصر فيها حتى لو انتصار وهمى الناس مبسوطه لان مصر كسبت ايطاليا بطل العالم ..ياحلاوة ياولاد احنا متقدمين فى حاجه اهو ...سيل من التصريحات المقابلات الحصريه ..الكل يتابع اصداء الفوز ..ياتى الكابتن ابو تريكه ليضرب كرسي فى الكلوب : الفوز هو انتصار للاسلام !!!! بتقول ايه ؟ انتصار لمين ؟ يعنى انا كان مفروض اشجع ايطاليا عشان فيها الفاتيكان ؟ ؟؟؟؟ بتقولى يابو تريكه متشجعش مصر ياميجو عشان دا نصر للمسلمين انما انت لا ..انت مسيحى ومالكش دعوة بينا ..طب ياعم ابو تريكه لما اتغلبنا من السعوديه خمسه واحد ..كان نصر لمين ؟ للاسلام بتاعهم ؟ ولا الاسلام بتاعنا ؟ يعنى هما اسلامهم صح واحنا غلط ؟ طب لما البرازيل بتلاعب ايطاليا هل مسيحيه البرازيل احسن من مسيحيه ايطاليا فعشان كدا ربنا اداهم نصرا مبينا ؟ طب لما البرازيل تكسب كاس العالم يبقى انتصار للمسيحيه وقهر للاسلام ؟ ..على العموم ربنا يديم المعروف احنا اهل

Wednesday, June 3, 2009

انا والبطيخ




ما اعظم هذه الفاكهه ..لقد خلقها الله من اجلنا نحن البشر لترطب قلوبنا فى الصيف ..ما اعظمك يارب لانك خلقت لنا هذه الفاكهه الرائعه
........................
انتهت الامتحانات واعمال الكونترول وانا الان فى فترة نقاهه من تعب الدراسه والجرى ورا لقمه العيش ..اعيش احلى ايام حياتى مع البطيخ حيث الانتخه والرحرحه ..مافيش احلى من انك تنام ساعه القيلوله ..وتصحى تجرى على التلاجه وتاخد حبيبتك البطيخه بالحضن ..ترطب جوفك وتروى عطشك ..يجلى الصدر ويعطر الفم كله بربع جنيه ..يالها من منحه الهيه عظيمه للبشر .. وياسلام بقى لما تصحى بالليل مش لاقى حاجه تعملها وتفتح التلاجه مش عارف ليه مع انك مش جعان او مش عطشان .. ..الحل هو البطيخه.. تاخدلك شقفتين على بق واحد وتخش تكمل نومك ..انا من عشاق البطيخ ولى طقوس فى اكله ..وشروط يجب توافرها :


لابد ان تاكل البطيخ وانت لابس الفانله الحمالات مش عارف ليه ؟ بس دا شيئ مهم جدا حتى تكتمل متعه اكل البطيخ

لازم تكون متلجه

لا يحبذ اكل البطيخ على هيئه مكعبات ..لازم يكون على شكل شقق

لازم طرفي الشقه بتاعه البطيخ تكون داخله فى ودانك ..برضه مش عارف ليه

البطيخ يجب ان ياخذ اثره على الفانله الحمالات ..يعنى لازم تبقعلك مالايقل عن 2 سم مكعب من الفانله ..غير كدا فانت لست من اكله البطيخ

اذا اكلت البطيخ من غير صوت ..فانت مش من البطيخيين المحترفين ..يجب ان يصدر صوت بعد كل قطمه هوووووووشت

- من اداب البذر انك لازم ترمى البذر ببقك وتظروط المكان ولا تهتم بكلام نوعيه ان البذر هايلم الصراصير

بعد ان تاكل البطيخ وتدخل تاخد تعسيله ..لازم تصحى تلاقى بذرة بطيخ مابين صوابع رجليك ..وتعد تفرك فيها عشان تنزل وبعد محاولات مضنيه تنزل من بين صوابعك ..هنا تكون متعتك البطيخيه قد اكتملت

بعد كل مافعلته مع معشوقتك البطيخه تحمل نتيجه ما فعلته من زوجتك او والدتك ..وستسمع مالا يرضيك ..و فى هذه الحاله اثبت على موقفك ولا تهتز ..فالبطيخ يستحق ان نفعل الكثير من اجله ..فعندما يقابلك اقرب بائع بطيخ ..اشترى بطيخه جديده ..وحط فى بطنك بطيخه صيفى

ميجووووومن امام احدى شقق البطيخ

هوووووووووووشت

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق