Wednesday, June 3, 2009

انا والبطيخ




ما اعظم هذه الفاكهه ..لقد خلقها الله من اجلنا نحن البشر لترطب قلوبنا فى الصيف ..ما اعظمك يارب لانك خلقت لنا هذه الفاكهه الرائعه
........................
انتهت الامتحانات واعمال الكونترول وانا الان فى فترة نقاهه من تعب الدراسه والجرى ورا لقمه العيش ..اعيش احلى ايام حياتى مع البطيخ حيث الانتخه والرحرحه ..مافيش احلى من انك تنام ساعه القيلوله ..وتصحى تجرى على التلاجه وتاخد حبيبتك البطيخه بالحضن ..ترطب جوفك وتروى عطشك ..يجلى الصدر ويعطر الفم كله بربع جنيه ..يالها من منحه الهيه عظيمه للبشر .. وياسلام بقى لما تصحى بالليل مش لاقى حاجه تعملها وتفتح التلاجه مش عارف ليه مع انك مش جعان او مش عطشان .. ..الحل هو البطيخه.. تاخدلك شقفتين على بق واحد وتخش تكمل نومك ..انا من عشاق البطيخ ولى طقوس فى اكله ..وشروط يجب توافرها :


لابد ان تاكل البطيخ وانت لابس الفانله الحمالات مش عارف ليه ؟ بس دا شيئ مهم جدا حتى تكتمل متعه اكل البطيخ

لازم تكون متلجه

لا يحبذ اكل البطيخ على هيئه مكعبات ..لازم يكون على شكل شقق

لازم طرفي الشقه بتاعه البطيخ تكون داخله فى ودانك ..برضه مش عارف ليه

البطيخ يجب ان ياخذ اثره على الفانله الحمالات ..يعنى لازم تبقعلك مالايقل عن 2 سم مكعب من الفانله ..غير كدا فانت لست من اكله البطيخ

اذا اكلت البطيخ من غير صوت ..فانت مش من البطيخيين المحترفين ..يجب ان يصدر صوت بعد كل قطمه هوووووووشت

- من اداب البذر انك لازم ترمى البذر ببقك وتظروط المكان ولا تهتم بكلام نوعيه ان البذر هايلم الصراصير

بعد ان تاكل البطيخ وتدخل تاخد تعسيله ..لازم تصحى تلاقى بذرة بطيخ مابين صوابع رجليك ..وتعد تفرك فيها عشان تنزل وبعد محاولات مضنيه تنزل من بين صوابعك ..هنا تكون متعتك البطيخيه قد اكتملت

بعد كل مافعلته مع معشوقتك البطيخه تحمل نتيجه ما فعلته من زوجتك او والدتك ..وستسمع مالا يرضيك ..و فى هذه الحاله اثبت على موقفك ولا تهتز ..فالبطيخ يستحق ان نفعل الكثير من اجله ..فعندما يقابلك اقرب بائع بطيخ ..اشترى بطيخه جديده ..وحط فى بطنك بطيخه صيفى

ميجووووومن امام احدى شقق البطيخ

هوووووووووووشت

8 comments:

Desert cat said...

يا سلام علي البطيخة بقى وهى متقطعه ومتلجه وانت لسه راجع من مشوار فى عز الحر يا خراشى ايديها مش ترحم وهات حتتك بتتك
وااااااااو بيبقى احساس ولا اروع

نبراس العتمة said...

دعني أيضا أنضم إلى حزب البطيخيين
فاكهة الصيف بامتياز
البلكونة أصبحت ثلاجة
فتحتها لأجد أشهى بطيخ
أو الدلاح بالمغربي
مودتي

على باب الله said...

هههههههههههههه
موتني من الضحك
--
في صحتك

هوووووووشت

: )

Anonymous said...

3aref ya Migo ana ha2olak 3la 7aga te7azen el Mexican bey7oto mal7 3la el batee7' aywa mal7 (salt) we a7ynan shatah. we 7asby ya Allah wa ne3m el wakeel

Migo Mishmish said...

anonymous
ليه كدة
بيحطوا ملح وشطة عالبطيخ
طب مفيش حد يقولوهم ان اللي بيعلموه ده غلط
طب بالذمة الناس ديه معندهاش دم
Love,
MishMish

Medus said...

عزيزي ميجو شكلك بطخاوي كبير وفعلا مشكور كتبت الوصف الصريح في كيفية اكل البطيخ بس انا بقى مش بحب البطيخ من اصلة ولا بطيق اكلة للاسباب اللي انت ذكرتها
دمت بخير تحياتي وللامام

Anonymous said...

el zaher ya Mishmish en da kef w elkef 3'alaaaaaaaaaaab. ta7eyaty le Migo. i'd like to see more photos of abu kartuna 3la el facebook.
sa7ebkom we sa7eb el mobal3' feh.
U.S.A

جريدة الصباح العربي said...

انتهينا من اختيار الفائزين في مجالي الشعر والقصة القصيرة وذلك لعددنا الأول ولكن مازلنا نرحب بكل الأعمال لأن المسابقة دورية , من يريد أن تصل أعماله من مدّونته الى جمهور القراء فى مصر والوطن العربي , ارسل لنا أعمالك من قصة وشعر وخواطر الى البريد الألكتروني التالي
arabicsabah@yahoo.com
كما نرحب بمقالاتكم التي ستنشر فور ارسالها على جروب الجريدة وستصبح مفتوحة لمناقشتها بين القراء ... تابعونا على جروب الجريدة
http://www.facebook.com/group.php?gid=78080770039
انتظرونا قريباً في الاسواق
تحياتي
الصباح العربي

There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق