Monday, December 17, 2007

الا ربع

فى فترة من فترات العمر ..تتوقف الساعه عند الا ربع



الساعه تمانيه الا ربع

صحيت..

ولعت سيجارة

شربت شاى

وكمان سيجارة

والساعه لسه الا ربع

نزلت الشارع

ولعت سيجارة ومشيت بسابق خطوتى

اشتريت الجرايد

قعدت فى الكافيه

طلبت قهوة

والساعه لسه الا ربع

قريت الجرايد

قريت فى السياسه والحوادث

قلبت فى الرياضه

حتى الوفيات

قريتها

بصيت فى تليفونى على اى نمرة

كلمتها

ومع كل كلمه كنت بولع سيجارة

بصيت فى ساعتى

لقيتها لسه الا ربع

جالى واحد صاحبى

كلمنى ..كلمته

طلبت فنجان قهوة

شربته

والساعه لسه الا ربع

مشيت فى اى شارع

والجرنان تحت باطى

وف كل خطوة بولع سيجارة

خلص الطريق

والساعه لسه الا ربع

فتحت علبه السجاير

مالقتش ولا سيجارة

ياخسارة !
ميجوووو

Wednesday, December 12, 2007

شعب لامؤاخذه !!!!

من اكثر الكلمات كراهيه الى قلبى ،كلمه نتداولها فى حياتنا اليوميه ولا اعرف من اول من استخدم هذه الكلمه الرديئه المحليه الصنع هذه الكلمه هى كلمه((لامؤاخذه)) هذه الكلمه تحتوى فى ظاهرها على الادب والاحترام بينما فى باطنها تحتوى على النطاعه والاستهبال ..ازاى يعنى؟

فى مرة من المرات كنت باسمع الراديو وكان حوارا شيقا حول من يستحق لقب ممثل وممثله القرن على الشاشه العربيه واستضافت المذيعه احد رجال الشارع العاديين وسألته عما يستحق لقب ممثله القرن فى مصر؟ فإذا بالمواطن يقول :فى الحقيقه بصراحه هو فيه ممثلات كتير بس انا برشح الفنانه الكبيرة فاتن ..(لامؤاخذه) حمامه....!!!!

خارت قوايا من الضحك فلماذا لامؤاخذه؟ هل العيب فى فاتن ام فى حمامه؟حتى يقول لامؤاخذه؟ والله كله حسب نيته !

وهكذا اصبحت كلمه (لامؤاخذه ) فى حياتنا اليوميه رمزا للنطاعه والتناحه وقله الادب وقله الذوق والجليطه ،قد تجد نفسك فى احد الايام واقفا فى احد الطوابير مثل المترو مثلا وتجد شخصا عريض القفا يستحق شهاده (الايزو) فى التناحه يزيحك من طريقه ليقف اول واحد امام الشباك واثناء ذلك يقول الكلمه الشهيرة (لامؤاخذه)..لأ بقى مش لامؤاخذه

واحيانا تكون راكب سياره وترى احد اللامؤاخذين يكاد يصطدم بسيارتك ليسبقك فى المرور واسهل شيئ هو ان يرفع يده ملوحا بكلمه (لامؤاخذه ).وهكذا اصبحت حياتنا اليوميه مجموعه من (اللامؤاخذات) ..ومشى حالك ماتدقش عالواحده وبقيت لامؤاخذه رمز للاستهبال وتغيرت مصر الى جمهوريه لامؤاخذه العربيه وقد لخص عميد المسرح العربى يوسف بك وهبى الوضع فى مقولته ( وما الدنيا الا لامؤاخذه كبيرة ) وقد سبق امير الشعراء شوقى زمنه وقال : (وطنى (لامؤاخذه) لو شغلت بالخلد عنه ...نازعتنى اليه( لامؤاخذه) فى الخلد نفسى )..فقد اصبحنا شعب مؤدب وراقى وحساس جدا لنقول بعد كل كلمه ( لامؤاخذه) حتى اصبحنا ....شعب لامؤاخذه

Monday, December 10, 2007

قال على رأي المثل

اللي ليه ضهر ما يضربش على بطنه

يحيي الفخراني ويسرا رفضا الفضية.. فقرر مهرجان الإعلام العربي منحهما - الذهبية مكرر

والنبي كنت فاكرة ان الحاجات ديه ليها تنظيمات ولجان وحكام واسس للتقييم. ومكنتش اعرف قبل النهاردة انك ينفع تقول لا مش عجباني النتيجه فيعدلوهالك ويدوك واحدة تانيه

طيب انا هنا ومن موقف احمد حلمي بأعلن رفضي لشهادتي الجامعيه وبأطالب بتغيرها من بكالريوس علوم قسم كيميا حيوية الى بكالريوس طب قسم جراحة عامة مكرر.

مقدرش عالحمار بتشطر عالبردعه
جامعة الأزهر تتحول إلي ثكنة عسكرية لمحاصرة ٢٠٠٠ طالب

أصل الحكايه انهم قبضوا على شوية عيال منتمين للجماعه المحظورة والعياذ بالله. طيب هو في سؤال بيطرح نفسه ويلح ألا وهو - السؤال يعني

مش اعضاء المحظورة دول ليهم 88 كرسي حاطينهم قدام وقاعدين عليهم جنب بعض في مجلس الشعب وليهم مرشد عام بيطلع في التليفزيون والجرايد حتى بالامارة اسمه مهدي عاكف والحكومة بتلم فيهم طيب ماقبضوش علي كبرات المحظورة ليه بقه؟ ولا علشان مقدروش على ..... فاتشطروا عالبردعه


شحات وانا سيدك

تأجيل دعوي فرض الحراسة علي مركز ابن خلدون إلي ١٧ يناير

"كان عبدالحي خلاف، المحامي رئيس الحزب، أقام الدعوي، وقال فيها إن الذي يترأسه سعد الدين إبراهيم استعدي مجلس النواب الأمريكي إلي مصر، مما أدي إلي استقطاع ٤٠ مليون جنيه من الأموال المخصصة لمعونة الشعب المصري"

طيب اما تقليل المعونة وجعكم قوي كدة بتشتموا في امريكا وبتدعوا عالامريكان ليل ونهار ليه؟ مش الاحسن اننا نبقي مطعيين وكويسيين علشان احنا شحاتين

يا ناكرني وناكر خيري بكرة تشوف زمني من زمن غيري

بالإضافة إلي سعي رئيس المركز الدائم إلي الاجتماع مع ممثلي دول أجنبية، وتشويه صورة مصر وحكوماتها في الخارج، مما أدي إلي زعزعة الاستقرار الاقتصادي والسياسي"

طب يا ريت يكون كل التشوية زي تشويه سعد الدين إبراهيم يكشف العنصرية والتعصب والهبل اللي بيحاولوا يخبوه باي تمن وفاكرين ان العالم مش واخد باله. طيب والمسئولين عن المبيدات المسرطنة وغرق العبارات وتصادمات قطارات السكة الحديد وهروب شباب البلد واملها في رحلة البحث عن لقمة العيش ولملمه اللي باقي من جثثهم من شواطئ ايطاليا واليونان وغيرة وغيرة دول ما بيشوهوش برضه ولا زعلانين علشان فاكرين ماما امريكا بتموله وقافله الحنفيه عليكوا



هم يضحك وهم يبكي

مدونون يطلقون حملة ضد «أبو حصيرة» لـرفع الحرج عن النظام
السادة المدونين زعلانين علشان الاسرائليين بيجوا هنا علشان يحضروا مولد "ابو حصيرة" وهما شايفين الحكومة محرجه من انه تقولهم لا متجوش وهما وشهم مكشوف فقالوا احنا اللي هنقولهم لا

يا سلام يا سلام على الشباب الهمام. يا اخويا انت وهو طالما هتعلموا حملات عالحكومة ومضايقين منها معملتوش حملات ليه للمطالبه بتحسين مستوي التعليم ولا القطاع الطبي ولا قاعدتك انت هو من غير شغل واللي بيشتغل بياخد مرتب يسد النفس ويجيب القهر.

الحرب اللي بينا وبنهم خلصت خلاص من زمان واللي باقي دلوقتي صباح الخير يا جاري انت في حالك وانا في حالي. العدو الحقيقي هو اللي قال طز في مصر وابو مصر. العدو الحقيقي لما سالوه عن المعارضه قال اي حد هيعارض هياخد بالجذمة واخد بالك يا معارض منك ليه مش هيبقى في غير الجذمة


ضربني وبكى وسبقني واشتكى

قضية المعلمة البريطانية.. تشويه غربي لصورة الإسلام


هاهاهاهاهاهاهاهاهاهاه......الغرب هما اللي بيشوه برضه. طب انا هاسكت خالص هاهاهاهاهاهاهاهاهاهاه...... بجد بجد خلاص. بس انا من ساعه ما ابتداء الموضوع ده مفكرتش غير في حاجة واحدة الدبدوب يا ترى حصله ايه؟ هيتفبض عليه ولا عمل لجوء سياسي ولا هيعتبر من المقدسات الدينيه؟


Love,


MishMish

العناوين باللون البرتقالي من جريدة المصري اليوم عدد الجمعه 7ديسمبر والباقي طبعاً بتاعي

Thursday, December 6, 2007

انــا

انا ....
وقت الكلام باسكت
ووقت السكوت بتكلم
ساعات فى حزنى بافرح
وساعات فى فرحى بتألم
انا غير كل البشر ..انا غير كل الناس
يمكن يكون دا جنون ؟!!!!
بس انا مش شايف نفسى نقطه تلاقى الكون
انا نقطه فى وسط محيط
واحب اكون بسيط
وبساطتى نابعه مني
لانى
مش منهم ..ولا نفسى اكون زيهم
انا احب ابقى نفسى
بقوانينى الخاصه بيا
بطريقتى الداروينيه
وهاعيش كل الحالات
ولا بصش فى الساعات لانى باختصار ...
بكره الحسابات
كره العمى ......
ميجوووووووو

Thursday, November 29, 2007

ورق التوت

الدنيا قامت ولسه ماقعدتش علشان كلمتين قالهم ساويرس. وحملات مقاطعه والناس هتخش حرب على عدو الله. سابوا نصاب الجيزة وحال البلد اللي بقى لا يسر عدو ولا حبيب وضحايا العبارة والشباب اللي مش لاقي شغل و....و... ومسكوا في كلمتين قالهم الراجل ومش هيسيبوا بقه.
طيب ما هو عنده حق ما الناس بقيت غير الناس والوشوش غير الوشوش. كل حاجة اتمسخت وكل حاجة اتلوثت. فقدنا الهويه وبقينا عاملين زي الغراب اللي حب يعمل طاووس

عشقنا الضلمة وحبناها فبقى كل ما حد يحاول يمسك كشاف ويشوف حل في اللي احنا فيه نصرخ ونصوت ونقوله هي احسن كدة اطفي النورررررررررررررررررررررررر. كل حاجة عندنا مغطينها بورق توت كتير قوي لدرجة اننا من كتير الورق بقينا مش فاكرين هو اللي تحتيه كان ايه


اقتصادنا ميت اكلينيكياً وبعدين تلاقي عناوين الجرايد تقولك البنك الدولي بيشيد بجهود مصر لتحسين وضعها الاقتصادي - هيهيهيهيهيهيهيه

البلد في حاله غليان وكل حاجة عندنا بايظة والسياسه الداخليه طين ومفيش احترام للقانون وتعذيب في السجون وانتشار الامراض بين البشر والحيوانات على حد سواء وبطاله وبلاوي تانيه كتير. في وسط كل ده تلاقي في التليفزيون تقرير من الست امريكا ربنا يسترها معاها تقولك مصر شريك اساسي في عمليه السلام وعضو مؤثر في سياسات الشرق الاوسط - هيهيهيهيهيهيهيه تاني

عندنا اكبر نهر في العالم والناس بتموت من العطش وهما بيتوتهم على النيل من الناحيتين وفي نفس الوقت تلاقي اعلان في التليفزيون يحرق دمك عن مدينه سكنيه جديدة تبعد عن مصر الجديدة بـ 75سم والقبلي بتاعها بيطل على راس سدر والبحري بتاعها عالغردقه وحمامات سباحة بالعبيط وملاعب جولف بالهبل - هيهيهيهيهيهيهيه مش قادرة هافطس من الضحك

حتى علاقتنا بربنا بيحددها الزي الرسمي واللوك ومش مهم بقه اختنا / اخونا بتاع ربنا ده اخلاقه عامله ايه ولا ضميرة فين اهم حاجة انه يلتزم بالزي. هيهيهيهيهيهيهيه هيهيهيهيهيهيهيه هيهيهيهيهيهيهيه


كل ده ورق توت، كل ده تزوير تقارير البنك الدولي مش هتفيد اللي مش لاقي ياكل ولا العاطل اللي المتسقبل قدامه مقفول قفله الضمنه. ورق التوت مش هيغير في سياسيه البلد الداخليه ناحيه مواطنيها اللي بتعاملهم على انهم لاجئين. ورق التوت مش هيرحم الناس من حر الصيف ولا العطش حتى لو عندنا ميت مدينه على 100. ورق التوت مش هيتحط في ميزان حسناتك لو افعالك سودا.

ورق التوت مش هيحل المشكله

ربنا يخليلك ما ترجعش ورا يا ساويرس والنبي يا جدعان اللي بيحب البلد ديه يمد ايديه في اي حاجة يعمل لها اي حاجة شيلوا ورق التوت يعني هيحصل ايه انيل من اللي احنا فيه؟

Love,
MishMish

Thursday, November 22, 2007

تلاتين قرش

ده التمن اللي بتعمله حياة طالبه في المدرسه الثانوي اللي كنت فيها. والتسعيرة ديه مش من تأليفي. ديه اللي حطها المهندس المسئول في الحي. والحكايه حصلت كدة



مدرستي الثانوي كانت قصر من ضمن القصور اللي اتأممت وقلبوها مدرسة. وطالما اتقلبت مدرسه كان لازم يبقى في فصول فكانوا بيجوا جنب اي حيطة ويبنوا حيطة وحيطة وحيطة ويعملوه معكبات نندس فيها جنب بعض والسلام. وطبعاً لان مجرد التفكير في المرح واللعب رجس من عمل الشيطان فتحولت جنيه القصر بفضل مجموعه كبيرة من الحيطان الى مباني تانيه. وربنا كرمنا ورحمنا فسابوا طرقه صغيرة ما بين المباني قالولنا ان اسمها حوش. وبعدين طلعوا على سطح القصر وراحوا بنوا 4 فصول خشب والفصل بشيل 40 طالبه


وما ادراك ما هي الفصول الخشب؟ في الصيف بتبقى ولا اجدع صوبه وفي الشتا ماكنتش بتخبي عننا حاجة المطرة اللي برة الفصل كانت زي المطرة اللي جوه الفصل لا نقطة زادت ولا نقطة نقصت. المهم السنه كانت بتعدي وكنا بتنقل منها لفصول تانيه. اصل الفصول ديه كانت فصول سنه اولى علشان اللي خايف يروح. ان كنت عايز تتعلم هو نظام ...... ابونا كدة


المهم الفصول ديه كانت موجودة من زمان وانا كمان ربنا فتحها عليا وخلصت ثانوي من زمان - بس مش زمان قوي يعني - ونسيت المدرسة والفصول الخشب لغايه اول امبارح. لقليت ماما - مدرسه بنفس المدرسة - جاييه تقولي :

انت فاكرة الفصول الخشب؟

اه طبعاً. مالها

كانوا هيهدوها النهاردة

ليه كدة؟. هي صدر منها حاجة غلط

لا خالص. بس النهاردة لقينا مهندس من الحي معاه امر إزاله وجاي يهد

ليه طيب؟ هي أيله للسقوط ولا حاجة

لا خالص هو جه وقال لأن الفصول ديه خشب والخشب قابل للإشتعال فوجودها خطر على ارواح الطالبات وأمن المدرسه والمنطقة المجاورة

طيب يا ماما ما الفصول من عمر المدرسه هما لسه واخدين بالهم دلوقتي. ثم مانا كنت هناك من عشر سنين محدش جه يقوله الكلام ده ليه؟ ولا انا مش ارواح

اهو

طب وعلمتوا ايه؟

إديناله 50 جنيه

ده ليه ده إن شالله؟

دول 4 فصول بـ 160 طالبه لو اتهدت الفصول ديه هنودي البنات فين؟

طب ومين اللي دفع الفلوس

محدش ديه من ميزانيه المدرسة

إزاي يعني وديه هتتقيد تحت بند ايه في الحسابات - إكراميات ورشاوي

تتقيد زي ما تتقيد بقه المهم اننا مشيناه

طب والمديرة ماطلبتش البوليس ليه ان شالله - محرمتش من بتاع السجاجيد

هيعملها ايه البوليس يعني. المهندس المسئول جاي ومعاه امر الإزاله. يعني يهد الاول وبعدين نعمل احنا اثبات حاله ونشتكي

بلاش البوليس طالما مش هيتحركوا غير بعد خراب مالطة. طيب تطلب الابنيه التعليميه

ما الابنيه التعليميه هما اللي بنوها

طيب حلو.

ماهم لو جم هيبقى هما اللي غلطانين ويتهموا بإهدار المال العام

والمهندس المسئول لما خد الـ 50 جنيه عمل ايه

خلاص مش هيهد

يا سلالالالالالالالالالالالالالالالام. الله طب والارواح! والامن العام

لا ما خلاص وبعدين ربنا بيستر



مدرسه كامله وبالتحديد 160 طالبه في الفصول الخشب ومربع سكني كامل جنب المدرسه ضمانه الوحيد ان ربنا يستر. يعني مثلاً لو حد من الحراس بتوع الباب طلع يشيش فوق في الهوا ورمى الفحم والع في اي حته جنب الفصول. مش ممكن الفصول تولع ليه؟ علشان ربنا هيستر


او عيل ابن مؤذيه هيشتري بـ 5 جنيه بمب وصورايخ ويفرقعها في الحيطان الخشب فميحصلهاش حاجة ليه برضه؟ علشان ربنا هيستر


وبعدين ماما عندها حق. ما طالما حياه انسان ما جبتش اكتر من 30 قرش لازم ربنا يستر
Love,
MishMish
طالما هنكتب بأمانه وضمير
لسه ماما قايللي امبارح ان الراجل ده طلع نصاب
سألوا في الحي عن المهندس ده علشان يخلصوا الموضوع
كان رد الحي ان مفيش حد هنا بالاسم ده
يعني موضوع التلاتين قرش ده طلع ذكاء نصاب

Tuesday, November 20, 2007

عيال المدرسة

بصفتى احد المشاركين فى الجريمه المسماه بالتعليم فى مصر ..كتبت هذه القصيده من اجل تلاميذ مصر..الذين شوهنا عقولهم ومسخنا شخصياتهم ..
(عيال المدرسه )

عيال المدرسه ..خارجين من المدرسه ..بيجرو ويلعبو
فى وشوشهم البريئه ..وعيونهم الرقيقه ..حالفين مايتعبو
شايلين شنطه كتب ..تقيله على ضهرهم
سابوها على الرصيف.. وبدأو فى لعبهم
وكان منهم ولد
مارضيش يلعب معاهم
ويبقى كماله عدد
مسك بايديه قلم ..وشخبط عالحيطان
رسم قلب وعلم ..وقمحه فى الغيطان
وشمس منورة ..على بيت مافهوش بيبان
لملم حاجته ومشى ..فى هدومه المشمشى
وتاه وسط الزحام
يا هل ترى هايعود ؟...يشخبط عالحيطان؟؟؟؟!!!

ميجووووووو

Saturday, November 17, 2007

مطلوب منك

مطلوب منك ..انك
تهرب منك ..وانك
ترمى حاجات جواك من سنك
وانك تدبح فنك
وانك تسرق دمع البوح من ننك
وانك تطرح عنك ..كل معانى الحلم لانك
عايش وحدك وسط الناس ..
مشكلتك عندك احساس
(محمود رضوان )

بدون مناسبه

ان ماقدرتش تضحك ..ماتدمعش ولا تبكيش
وان مافضلش معاك غير قلبك ..اوعى تخاف مش هاتموت هاتعيش
وإن سألوك الناس عن ضى ..جوه عيونك مابيلمعش
قلهم العيب مش فيا ..العيب فى الضى
وانا مش عاشق ضلمه ..ولا زعلت الضى
مسير الضى لوحده هايلمع... مسير الضحك لوحده هايطلع
مابيجرحش ولا يئذيش
( فيلم هيستريا )

Tuesday, November 13, 2007

روحتوا وسبتنوا لمين يا غاليين؟


الموضوع بتاع النهاردة ده بقالو كتير قوي في دماغي بس مكنتش عارفه اجمع افكاره. بس مرة واحدة الوحي جه وروحت لحقاه وقعدت اكتب.
من الصور اظن فهمتوا اني هتكلم عن مصر. النهاردة كنت راكبه مع سواقه التاكسي وقالتي كدة بالحرف الواحد "مصر دي انا بقيت بكرهها عمى" الكلمه كانت تقيله قوي عليا كنت عايزة اقولها لما تتكلمي عن مصر تحترمي نفسك وتخلي بالك من كلامك علشان انتي مش بتتكلمي على اي بلد والسلام. وطبعاً معرفتش غير اني اسكت وابص من الشباك وبعدين قولتها وانا نازله على فكرة مصر مش وحشه المصريين هما الللي وحشين.

عارفين المقوله اللي بتقول "مصر هبه المصريين" . الارض طيبه وجميله والبلد حلوة بس الناس هما اللي خربوها. مصر كانت عظيمة لما المصريين كانوا عظماء الارض لكن لما خابوا بقيت "خيبه مصر من خيبة المصريين". في ايه حلوة قوي في الكتاب المقدس بتقول "تغيروا عن شكلكم بتجديد اذهانكم" جامدة جداً صح. علشان تغيير الشكل لازم تغير الفكر الاول، تعالوا نتفرج على حال الفكر في مصر دلوقتي. مصر دلوقتي عايشه في حالة من الدروشه والهلوسه الفكرية والعلميه والاخلاقيه وفوق الكل وسبب الكل الهلوسه الدينيه. خلينا نشوف حاله العقل المصري دلوقتي بقت عامله ازاي
البدايه كانت في إيلاف. إيلاف من الجرائد الالكترونيه اللي بتحترم عقول الناس وبتعرض بحياديه تامه معظم وجهات النظر والتيارات الفكرية. وعلشان ما يبقاش الموضوع ماشي في سكة واحدة فهما كمان بيهمهم معرفة تعليقات القراء على كل حاجة وطبيعي اللي المعلقين يكونوا من الناطقين باللغه العربية. ومنهم طبعاً المصريين والغريب انك تعرف تعليقات المصريين من حاجتين اساستين: اولاً بعد التعليق كلياً وجزئياً عن موضوع المقاله. ثانياً: احتوائه على فكر دعوي / تبشري للديانتين الاساسيتين في مصر
مثلاً حينما اصدر مفتي مصر فتوى بأن الشباب الغارق على سواحل ايطاليا ليسوا شهداء كتب رجاء النقاش موضوع اسمه لا يا شيخنا العزيز وكان بنقض كلام شيخ الازهر. وكان هذا رد الاخ برسوم كما يحلو له ان يسمي نفسه
الأسم: برسوم الايلافي
يبدو ان صبية الكراهية لم يغفروا للكاتب ابطاله لاباطيلهم حول هولوكست المسيحيين في مصر ؟!! وكما يقولون كل اناء بما فيه ينضح او من ثمارهم تعرفونهم
ولا اعرف الى الان ما علاقه المسيحيين بفتوى يصدرها شيخ الازهر ويؤيدها البعض ويعترض عليها البعض. ولكنها العقليه المصرية الحديثه زي ما قولتلكم.
مثال اخر وهو المدونات ولنأخد على سبيل المثال مدونتان لهما نفس التوجه هما مدونه ارض الرمال لصاحبها بن كريشان - إماراتي الجنسية - ومدونه اخرى اسمها ارض اخرى للرمال لصاحبها فري مايند - مصري الجنسية- والفرق بنهم زي الفرق ما بين السما من العمى
المدونتين لمسلمين سابقين وملحدين حاليين والمصري صاحب المدونة التانيه في اول بوست ليه بيتعرف بالفضل كله لبن اللي فتح عينه على حاجات كتير .
بن كتاباته كلها منطقيه لما تقراها تلاقيه بيطرح فكرة وينقضها بطريقه علميه وليه نظرة فلسفيه في كل حاجة واسلوبة سهل ومع ذلك مش مبتذل ومبتحسش انه بيهينك وهو بيتكلم. هو معظم نقضه كان للاسلام - بطبيعه ان كان مسلم سابق - ولما نقض الاديان الاخري زي المسيحيه او اليهوديه مثلاً كان بنقض على اساس ملاحظاته الشخصية اللي كونها بمنتهى الحياديه وعن طريق استنتاجاته . ومعتمدش على اللي فاضل في دماغه من النقض الاسلامي للديانتين. لما بقرا حاجة لبن ما بحسش اني اتشتمت بالعكس هو بيفتح عنيا على حاجات مكنتش شايفاها وبيخليني ادور على اجابه منطقيه عقليه ليها. ومش مهم اقنعه بيها بس المهم اقتنع انا
اخونا ابو فري مايند عكس كدة تماماً هو قال انه ملحد وبيحاول ينشر فكره علشان يصحى الناس من الغيبوبة لغايه كدة وملناش دعوة والمفروض وبطبيعه الحال ان الدين الاسلامي يكون ليه نصيب الاسد في النقض على اساس خلفية اخونا فري. لكن ومع احتفاله بانه بقاله سنه في النور معظم البلوج بتاعه شتيمه منقوله من جهابذه االحقبه الملخبطة اللي احنا فيها زي زغلول والعوا وعمارة وغيرهم في المسيحيه وطبعاً كلها بتعتمد على ان لا حد بيقرا ولا حد بيراجع وراهم فبيألفوا اي كلام - كله عند العرب صابون زي مانتوا عارفين - فبعد ما تقرا تلاقي دمك غلي وتكرهه نفسك علشان ضيعت من وقتك في قرايه كلام مالوش معنى واي عيل صغير من عندنا في مدارس الاحد يرد عليه.
بس ديه برضه مش مشكلتي انا مش بحس ان ربنا محتاج عن حد يدافع عنه. فطالما ربنا قال انه موجود اظن انه لازم يثبت وجودة ودة مش شغلي
طيب المشكله فين؟! المشكله في ان الناس ديه عددهم في مصركتر قوي. كل حاجة في مصر بقت مسعورة وخلاص. على رأي ميجو احنا اتربينا على ان 1 + 1 =2 فلما يجي واحد يقول 1 + 1 = 3 وتيجي تسأله تيجي ازاي ديه يا عم اثبتهالي يقولك هي كدة من زمان وبعدين انت ابن كلب
طيب لو فرضنا جدلاً ان كلنا ولاد كلاب ده برضه موضحش 1+1 بقت 3 إزاي
ولا ايه؟
Love,
MishMish

Sunday, November 11, 2007

مغامرات ميجو ومشمش

3
قصيدة مهداة من كوكو اخو ميجو
عتريس هايموت ويتجوزفؤاده
فاكر انه وياها هيعيش ف سعاده
يا عم عتريس اصحي وفوق
لابدل الشربات تشربها سادة
فؤاده هتموت وتتجوزعتريس
البطل اللي للغلابه هايفتح الهويس
مفهماه انه فارس احلامها الهمام
وهي كانت بتحلم باي عريس
كـوكـو

Wednesday, November 7, 2007

مغامرات ميجو ومشمش

2
نـيـــش و كـرانـيــش



الحكايه ياجماعه انا ومشمش اليومين دول مسحولين جدا فى حاجات كتير لاننا بنوضب الشقه بتاعتنا ،انا كنت فاكر ان الحكايه سهله والخطوبه هانقضيها رومانسيه كلام غرامى ،لكن اكتشفت ان الكلام ده زى السم فى العسل وعلى راى عمنا برنارد شو لما بيقول ان الجواز عامل زى الوردة تجذبك بأريجها لكى تلسعك باشواكها ..انا ماكنتش عامل حساب الاشواك دى ،لا ومش اى اشواك دى من النوع المفتخر ،اشواك من النوع المستورد،واكتشفت ان الخطوبه مافهاش اى شيئ من الرومانسيه، رومانسيه ايه الى بنقضيها عند النجار والسباك والنقاش والمبلط وبتاع الكرانيش ؟ الله يسامحهم المتجوزين قبلنا ..مش يقولولنا ؟ بدل ماتقضى الخطوبه فى الخروجات والكلام الرومانسي تلاقيك نازل على الرويعى والموسكى والمناصرة وحاجات غريبه اول مرة اسمعها وكله كوم الا الرويعى دا بذمتكم دا اسم ؟ جاى من الترويع هههههه بايخه مش كدا؟ والله احنا ناس معقدين ومكلكعين هو لازم يعنى نجيب الحاجات دى كلها ؟ ليه مش بسيطين فى تعاملنا مع الحياة؟ احنا الجواز فى مصر بقى عبارة عن توافق ظروف شخصين ليس الا انما فى اوروبا والدول المتقدمه غير انهم بياكلو مع الكباب طحينه بيتعاملو مع الجواز بمبدا انه اتنين بيبدأو حياتهم مع بعض وبيبنو بيتهم طوبه طوبه عشان كدا كل حاجه بيجيبوها فى بيتهم بيبقى ليها ذكرى وليها معنى لانهم اختاروها مع بعض ...انما هنا فى مصر الجواز عبارة عن مين هايجيب ايه ؟ ومين عليه ايه؟ مش بقولكم احنا بقينا معقدين؟ بقى بالذمه فيه اتنين مخطوبين يقضوها فى ستاير ونجف وسباكه ونجارة ونيش وكرانيش؟

ميـجــــــو

Monday, November 5, 2007

عم فتحى بتاع البليله

عم فتحى بتاع البليله ..راضى باللقمه القليله
لا تعرفله اخ.. ولا تعرفله صاحب ...ولا تعرفله عيله
بالليل يحب ينقى قمحه ..بحكمه سنين باينه فى ملامحه
وتفرح لما تشوفه الصبح ماشى...بابتسامته الجميله
بيلم فى الجلابيه ..ويزق فى العربيه
والايام السئيله ...
وعلى نفس الرصيف ..فى نفس المكان
ينده بصوت كروان ..عالبليله اللى زى اللوز
يتلمو العيال من حواليه ..
معاهم كازرونات ...لونها من لون الحارات
يتوصى بيهم حبتين
مش كبشه واحده ..لأ كبشتين
م البليله اللى زى اللوز
وف اخر النهار يمشى فى نفس المعاد
ولا يبصش فى الايراد
ياخسارة ياعم فتحى ..
لا كنت يوم فنان ولا كنت يوم اراجوز
وكفايه عليك نقولك ...
بليلتك دى زى اللوز !
ميـجــــــو

Tuesday, October 30, 2007

جواز عتريس من فؤادة باطل

عتريس عايز يتجوز فؤادة..... وابوها بيماطل

عشان عتريس قاعد في بيتهم ....... جنب امه عاطل

عــشـــان كـــدة جـــواز عــتـريـس من فـــؤادة بـــاطل

عتريس راح لابوها وكلمه برقه

عايز اتجوز فؤادة.....بس بقى اديني زقه

ضحك ابوها بصوت عال

هأوأوأوهأهأة العب بعيد يا شاطر..... روح الاول اشتري شقه

ولف عتريس في الشوارع.....حتى الحواري والازقه
تايه يا ولداه.....بيدور على اي شقه
بس الزمن غدار.....ماعندوش غير كلمه لأ
ساعتها حس انه مسمار.....فوق رأسه مليون دقه ودقه
عتريس صحته اتدهورت وسنينه منه اتبعترت
وفضل مستنى على القهوة..... عمره اللي راح منه في سهوة
وغليت الاسعار والحاجة ولعت نار
ولسه الحكومة بتماطل وابوها لسه بيماطل
وعتريس في بيتهم عاطل
عــشـــان كـــدة جـــواز عــتـريـس من فـــؤادة بـــاطل
ميـجــــــو

Sunday, October 28, 2007

مغامرات ميجو ومشمش

1
إعقلي يا مشمش
لمؤاخذة عيب بقى اللي بيحصل ده ..... مشمش ماسكة المدونة ونازلة كتابه فيها وكأني مش موجود.... هو حد قالها إني كيس جوافه؟!!! وبعدين هنبدأ كدة مع بعض؟ داحنا لسه بنقول يا هادي ..... كل شوية اخش عالمدونة الاقيها كاتبه حاجة جديدة. ومش مدياني فرصة أكتب حاجة. طبعاً عايزة تعمل شعبية ليها..... لكني قررت ادبح القطة وأشوط فيها وأكتب بعض من اشعاري وأفكاري الثمينه علشان اضربها في مقتل لأنها معندهاش اي موهبه شعرية ولا حتى مكرونه
وطبعاً هيبقى ليا جمهوري الذواق اللي بيقدر المواهب المغمورة.... وانا من داخل هذه المدونة الموقرة بقول لمشمش عيب وإعقلي الدنيا مش كدة لازم يبقى في تعاون وإلا والله مهاغسلك المواعين ولا حتى هطبق البطانيه.... وده اخر انذار ليكي. وإن كان حبك يا مشمش هاينسيني حب مصر
.
.
.
.
.
.
.
مش فاكر الباقي كان ايه. بس اهو مش حيصل كويس وخلاص
ميـجــــــو

Wednesday, October 24, 2007

Have a nice day!!

النهاردة وانا جايه المكتب الصبح متأخرة كالعادة وداخله مش مركزة غير في الاساسنير - قال يعني لو لحقته هوفر دقتيتن فابقى متاخرة 30دقيقه بدل ما يبقوا 32 - المهم خدت بالي ان في راجل كدة يطلع بتاع50 وشوية واقف مستني الاساسنير.
انتوا عارفين الألاطه المصري طبعاً ما بصتش ناحيته وبعدين بطلع ميداليه المفاتيح فوقعت من ايدي قريب من رجله فبيوطي علشان يجبها نزلت انا بسرعه البرق وخطفتها قبل ما يلمسها ليفتكر انه هيصاحبني علشان جابلي الميداليه وبعدين قال حاجة كدة بصوت واطي مفسرتهاش ومبصتش ناحيته

كل ده والاساسنير نازل على مهله زي ما يكون نازل عالسلم. وبعدين اخيراً وصل فتقدم صاحبنا ابو 50 وشوية يفتحلي الباب وطبعاً ما نولتهالوش فتحت الباب ودخلت ومسكته علشان يخش ورايا

دوست على رقم الدور اللي انا نازله فيه وقولت في عقلي الحمدلله اني نازلة قريب
وبعدين راح استنى لغايه لما خصلت وراح دايس على رقم الدور بتاعه وقال الرقم بالانجليزي - قلت في عقلي والله لو اتكلمت بالصيني. ماشي يا عم الاقطاعي عرفنا ان اهلك صرفوا عليك احنا بقه بتوع مجانيه التعليم وعلشان تعرف انا بتكلم انجليزي احسن منك. وبعدين اديته ظهري وبصيت في المرايه اللي كانت في الاساسنير جه الدور بتاعي وانا نازله قالي ابو بتاع50 وشوية

Have a nice day

HAVE A NICE DAY!!!!!!!!!!!!!!!!!!!!!!!!

روحت بصيتله طلع صاحبنا راجل اجنبي وشه جميل مع انه قد السيد الوالد الله يرحمه ولا كان بيعاكس ولا بيستظرف ولا الهوا. الراجل كان بيعبر عن ثقافته اللي اتربى عليها احترام الناس حتى لو كانوا اصغر منه وراسمين الالاطه. وطبعاً اتلخبت ومعرفتش ارد عليه الحاجة الوحيد اللي جات في دماغي هي
Thank you
وخلاص كدة. الحمد لله اصلاً اني قولتها صح

وبعدين فكرت امتى قله الذوق بقت جزء من ثقافتنا اليومية؟ امتى بقه العادي انك تعامل الناس اللي حواليك على انهم شجر او جزء من ديكور المكان؟

ليه اتخضيت لما الراجل طلع محترم

He was just trying to be nice to me

يمكن بسبب بواخه معظم الشباب المصري اللي بقوا عاملين زي الدبان الصحراوي ولا علشان مجتمعنا اتشبع بثقافه البدو اللي مبعرفوش حاجة غير انهم يشتروا كل حاجة بالفلوس حتى البني ادمين وطالما البني ادم اتحول من قيمه لسلعه هنحترمة ليه ان شالله. ولا علشان الناس اصبحت كئيبة وحافظة تحيه واحدة لو قولت حاجة غيرها ياما مابيردوش عليك او يكملوا باللي هما حافظينه حتى لو ملوش علاقة باللي انت بتقوله

مش عارفه بالظبط بس النهاردة خدت بالي ازاي في حاجات جميله صغيرة ضاعت مننا . ومع انها حاجات صغيرة لكنها ممكن تغير مزاجك ونظرتك للحياه طول اليوم

Love,

MishMish

Monday, October 22, 2007

القطيع


إمبارح كنت رايحه مشوار بياخد ساعه في المترو رايح وزيها راجع وشوية ساعات كتير في النص كدة مبعملش فيهم حاجة تذكر. ولاني بيضايق من البحلقه في البني ادمين في المترو فباخد معايا كتاب اقعد اقرا فيه شوية الساعات ديه.

بحث الإنسان عن ذاته - تأليف رولو ماي كان كتاب امبارح. الكتاب حلو قوي مع ان طريقه ترجمه صعبه محسساني انه مكتوب بالصيني. المهم الكتاب بيتكلم عن حاله الخواء اللي اصابت بني وبنات ادم كلهم. وبينقد حالة الانعزاليه اللي اصحبت السمه الاساسيه لعصرنا. فكل الاختراعات والاكتشافات اللي الغرض الاصلي منها كان مساعدتنا ان حياتنا تبقى اسهل استخدمناها احنا علشان نبعد بيها عن بعض وبحسب تقديري المتواضع الكتاب ده كتبه السيد ماي في الخمسينيات. امال لو كان موجود دلوقتي وشاف مواقع الحياة التانيه ولا الشات ولا ...ولا... يتهيالي الراجل كان جاله انيهار عصبي. الحمدلله اهو مات واستريح

المهم الراجل ده وصل لاستنتاج جامد بيقول كدة "إن فقدان النفس وصعود الحركات الشموليه.... وجهان لعمله واحدة.... ومن ثم علينا ان نحارب على الجبهتين، ان نعارض الشموليه وغيرها من نزاعات إلغاء إنسانيه الفرد في جانب ونستعيد خبرتنا وإيماننا بقيمة وكرامة الشخص على الجانب الآخر" - مش قولتلكم عامل زي ما يكون مكتوب بالصيني
بالعربي الكلام ده معناه لما الانسان يفضى من جواه يكون من السهل ان اي حد يملاه اي حاجة وبعد ما يتملي يتم قبول عضويته في قطيع من القطعان الكتيرة اللي حوالينا.
وبعدين لما بصيت لوشوش الناس في العربية لقيت فعلاً الموضوع ده واضح وضوح الشمس في اوناصه السماء (لا مواخذه اصلي مش بحب الكبدة)

يعني مثلاً القطيع المصري بلدلاً ولكن متهم بالاخت فلسطين حاطين صورة احمد يس وبيقولوا ان ده كان راجل قعيد وطلع عين الاسرائيلين وانت ماذا تفعل لو كنت مكانه؟ يتهيالي اهتم بالناتج المحلي ونزرع القمح اللي بناكله ونصنع الهدوم اللي بنلبسها ونلاقي شغل للشباب المرمي على القهاوي وبعدين لما نبقى دوله بتعرف تصرف على نفسها نبقى نشوف الست فلسطين


ثم هناك مصلقات ماذا اقول لربي عن حجابي؟ في الحقيقة السؤال مبهم فهل معني الحجاب هو قطعه من القماش طولها متر وربع وعرضها 30 سم ولبسها بطريقه معينه سجيعل ربها يرضى عنها. ام يقصدون بالحجاب هو الاحتجاب عن الشر واحترام الآخرين واحترام الفرد لشخصه والبعد عن التحزبات والانشقاقات والسعي دائماً لإيجاد ارض مشتركة للتفاهم واحترام الاختلاف


ثم القطيع العشوائي وهؤلاء ليس لهم ملصقات ولما يستخدموا ملصقات وقد احتلوا البلد بطولها وعرضها. تعرفهم من شكلهم ولون بشرتهم. الغريب ان القطيع ده لونه كله لون الصدا يعني تلاقي شعرهم بني مصدي ولا هو عسلي ولا هو اصفر ولا هو بني غامق هو لون واحد مفيش غيرة لون الصدا. وعينهم مصديه وهدومهم مع انها جديدة الا انها مصديه برضه. ساعات الواحد بيبقى عايز يمسك حته قماش وينزل فيهم تنفيض. القصد دول دايماً صوتهم عااااااااااالي بطريقه غريبه والالفاظ اللي بيستخدموها في كل جمله يعاقب عليها القانون حتى اغانيهم بتضر البيئة


وافراد اخرى لقطعان اخرى بس مش ممثله بشكل كبير بس ليها وجود. طيب وانا مالي ولا هو لوك لوك لوك وخلاص؟

مالي هو اني لاقيت انك دلوقتي علشان الناس تعترف بيك لازم تكون فرد في قطيع معين. يعنى كون ان واحد خياله المريض صور له انه يبقى زي ما يبقى من غير ما حد يخنق عليه فهو واهم.

حتى علاقه الانسان بربه متنفعش تبقى فطريه ولا بالسجيه حطنالها قواعد ورياح- والكلام ده ماشي عالكل احنا وانتوا- ليه محدش قادر يقتنع ان ربنا بيحب الروح الحلوة وهيبقلها ويعرفها بيه سواء ان كانت من عندنا او من عندكم

ليه بقينا عاملين زي ام 44 لما قعدت تفكر لما تيجي تمشي هتحرك انهي رجل الاول فتكعبلت في بعضها وفضلت تلف حوالين نفسها في مكانها

ليه كل واحد فينا عنده وجهه نظر معينه وتعريف للحق وبيفرضه على الناس. هو مش من بتاع سنين كتيرة كدة من زمان كانت الناس متخيله ان الارض مسطحه ومش كروية

ليه عايزين نحفظ ومش عايزين نفهم. ليه بندور على اي قطيع ننضم له علشان نلغي عقلنا لما حد يسألنا نقول اسأل قائد القطيع هو اللي قال.

مابقى زي مابقى صح و لا غلط حلوة ولا وحشه مؤمنه ولا كافرة مابقى إنسانه وبس


Love,


MishMish

Tuesday, October 16, 2007

الجزء الثاني من بتاع الساجيد

انا كنت قولت اول ما نشرت الموضوع ده اني هاتصل بالبوليس لما اروح البيت وفعلاً ده حصل واديتهم اسمي وعنواني وعنوان بتاع السجاجيد وكان عندي استعداد اديهم الرقم القومي كمان علشان يعرفوا ان الكلام بجد.

الكلام ده حصل الساعه كام؟ حصل الساعه 7:20 م بعد طبعاً ما رجعت من الشغل الساعه 5 واتغديت عالسريع وقولت اريح شوية ونمت مكملتش ساعه وصحيت على صوت المسخوط بتاع السجاجيد اللي على 100. حلفت بكل حاجة ممكن يتحلف بيها وقولت يانا يا انت وكلمت البوليس

أنا: مساء الخير

حظابط: مساء النور

أنا: عايزة اقدم بلاغ عن محل قدامنا جايب سماعات كبيرة وامبارح قعد للساعه 2 بالليل والنهاردة اهو مكمل وهنفضل كدة لفايه العيد

حظابط: يعني "معلي الدي جيه" - قالها على طريقه سعد الصغير

انا: بالظبط يا افندم - واديته عنوانه واسم صاحب العمارة وعنواني وكل حاجة

حظابط : هنبعت عربية دورية حالاً


حسيت بفرحه عارمة وليه لا انا استعملت حقي الطبيعي فالاتصال بالبوليس وكلمته وجايين ان شالله في السكة. وانا مش هاسيب الموضوع كده دانا كمان ناويه اقولكم علي الموضوع ده علشان بس يبقى في حاجة واحدة كويسة وان الصورة مش كلها سودا وافهم اهلي وحبايبي (ميجو) والمجتمع والناس انه لسه في امل وعمر وحاجات كتير كدة

وزي ماقولتكم ولان الناس بتقول عليا ثورجيه اتصلت بواحد جاري قرفان برضه من الشارع والعمارة والبلد واللي فيها قولته اني اتصلت بالبوليس والمفروض هو كمان يعمل زي ماتفقنا وبعدين قالي حاضر وقالي كمان ان والدته ( ست فاضله من عندنا من العمارة) نزلتلهم وكلمتهم وقالتهم انه ما يصحش الدوشه ديه لغايه الساعه 2 بالليل فرد عليها بتاع السجاجيد وقالها كل سنه وانتي طيبه يا مداد دول يومين عيد (ربنا يهده البعيد وينكد عليه زي ما هو دوشنا كدة لاسبوع كامل) وعدت ساعه قولت مش مهم هما عندهم شغل برضه والدنيا زحمة وعدت ساعتين وقولت لا بقه يمكن يكون حظباط كتب العنوان غلط ولا تاه لا قدر الله. قمت تاني واتصلت بيهم وقولتلهم انا كنت عملت بلاغ من شوية رد حظابط وقال مش مدام مشمش قولت في بالي (يسمع من بقوك ربنا يا راجل يا بركة) لا يا افندم انسه مشمش قالي عارف يا افندم والعربيه جايه استنيها.
المهم طبعاً العربية مجتش وبتاع السجاجيد فضل مشغل الدي جي على اخرة لغايه ليله العيد. الغريب بقه اني ليلتها كنت بكلم ميجو في التليفون وكان متضايق جداً اني اتصلت بالبوليس مرتين قالي ايه القدر ده وحلف عليّ بالطلاق (مع اننا لسه مخطوبين واحنا اساساً معندناش طلاق) اني لو دخلت القسم ما هينفع اننا نكمل مع تاني.
طبعاً اتهمته بالسلبيه والانهزاميه والتراخي واديته خطبه طويله عريضه عن اهميه العمل الفردي في تقدم المجتمع وقولتله اني عندي مبدأ وهاعمل الصح حتى لو دخلت السجن مش القسم بس وإن كان مش عاجبه يبقى نسيب بعض من دلوقتي احسن.
بس هو فهمني وجهه نظره قالي ان المنطقه اساساً كلها عشوائية. قالي افرضي بتاع السجاجيد عرف اسمك (طبعاً بعد ما يظبط البيه الامين) حلو لما يخلي واحد ممن اللي شغاليين في المحل يمد ايديه عليك ولا يشتمك في الرايحه
والجايه. هتخربي المنطقه كلها لان اخوكي مش هايسكت وانا مش هاسكت وانتي بتتهزئي في الشارع
بيني وبنكم حسيت ان عنده حق انا عمري ما فكرت فيها كدة. البوليس مكنش هيعمل حاجة وكان الراجل هيظبطهم بخمسين جنيه ولا حاجة ويعلى الدي جي على الاخر بالعند في الحته كلها وطبعاً هايطلع عيني وايدي ورجلي بالخمسين جنيه. ما الراجل عامل اوكازيونات على 100 يا مدام يعني المعلم بيضحي وبيبيع بالخسارة كمان.
فلما لاقيت انه عنده حق ولاني دايماً على حق ومبقولش اي حاجة غلط قولتله على الاقل اديني عرفت انه لو شغل الدي جي قبل عيد الاضحى مش هاتصل بالبوليس
أديني بقولكم اهو لو بتاع السجاجيد على الدي جي قبل عيد الاضحي محدش يتصل بالبوليس علشان مفيش فايدة محدش هيجي الاحسن اننا نشوف حد بيبع سدادت ودان وناخد منه عرض كويس علشان احنا هنشتري جمله. او كل انسان يمسك بنسه شعر ويفردها ويدبها في ودن اخوه الانسان علشان يخرم له الطبلتين ومتبقاش في مشكله.
Love,
MishMish

Tuesday, October 9, 2007

بتاع السجاجيد

كنت فاكرة ان اول مدونه ليا هتكون عن تحرر الفكر وانظلاق الروح وحاجات من ديه وقاعدة بقالي اسبوع عامله اقدح زناد فكري لما جاب جاز علشان اكتب كلمتين كويسين ومش لاقيه حاجة فيها فكر جديد نحاول بيه على الاقل نغير واقعنا في مصرنا الحبيبه.


المهم كنت بكلم ميجو امبارح في التليفون حوالي الساعه 1 بالليل (بتكلم لما المحلات اللي تحتينا تقفل علشان اسمع اللي بتكلم معاه) وفجأة وبدون مقدمات لقيت صوت صرخ مرة واحدة ومبقتش عارفه لغايه دلوقتي اوصفه بايه. ليه الصوت العالي ده الساعه 1 باليل وبعدين الناس بتقفل مش بتفتح. ايه اللي حصل يستاهل ان الناس تجيب دي جي تشغله بدايه من الساعه 1 بالليل امال هيخلصوا امتى.


سيبت ميجو على التليفون وقمت اجري اشوف ايه اللي حصل اتاري بتاعالسجاجيد اللي قدام البيت (خير اللهم اجعله خير)بعد ان رفع السجاجيد عاليه في الهواء زي ماترفع علم مصر على ارض سيناء في حرب اكتوبر بالظبط ليعلن ان الشارع ملكيته الخاصة فبعد ماحتله وخد نصه علشان يحط السجاجيد في الشارع علشان حتى الاعمي لما يتكعبل في السكة يعرف انه قدام بتاع السجاجيد ويشتري سجادة


بيعمل بورفه للايام اللي جايه واللي مش هتكون بقه جحيم تحت الماء لكن هتكون حجيم تحت السجاجيد. بتاع السجاجيد هيفضل يشغل الهباب ده لغايه العيد علشان اللي مش عارف واللي مش شايف واللي ساكن في الشارع اللي ورانا يعرف ان حضرته بيبع سجاجيد

والبرنامج اليومي عبارة عن مرشات عسكريه وقرأن (ابن الناصحه عامل كدة علشان اللي يتصل بالبوليس يبقى كافر وعدو الله هو مين يطول ان القرأن يفضل شغال بصوت عالي تسمعه الكائنات الفضائية طول اليوم وان شالله عن عين ابونا مانام المهم مزاج بتاع السجاجيد) وبعد فترة من التلاوة يأخذ مسخوط صغير مموس (اعتقد انه ابن صاحب المحل) ويصرخ في الميكروفون ويقول "اوكازيونات على 100 يا مدام" "قربي يا مدام" وحيات كل الكتب السماوية والارضيه انا على استعداد كامل وتام اني اجيب المدام ديه من قفاها واخليها تشتري غصب عن عنيها الاتنين سجادة ولا الاتنين والملها الفلوس من سكان الشارع بالعافيه علشان بتاع السجاجيد يرحمنا

رجعت اكمل المكالمه:

مشمش: ميجو اقفل علشان اتصل باللبوليس حالاً وهارجع اكمل

ميجو: مش هيجوا علاوة على انك هتعملي مشاكل لاهلك وممكن الراجل يعند وميطفهوش وتبقي نكدتي على المنطقة كلها العيد مش بعيد فاضل عليه بتاع 4 ايام يعدوا بالطول ولا بالعرض
وبعدين المكالمه خدت منحني انهزامي وملخصها ان مفيش فايدة
بس الكلام ده ماقنعنيش علاوة على ان الدي جي فضل شغال لغايه الساعه 2 بالليل

فصليت بالليل وطلبت من ربنا انه يساعدني في اللي انا هاعمله. انا قررت استعمل حقي الدستوري في اني اطلب البوليس وطلبت معونه ربنا انتوا عارفين طبعاً لحسن نروح في ابو نكله. المهم جيت النهاردة الشغل طلبت البوليس ودار بينا هذا الحوار الشيق:

انا: انا عايزة اعمل بلاغ عن بتاع السجاجيد اللي قدمنا
حظابط: انتي نمرة تليقونك كذا والعنوان اللي بتتكلمي منه كذا
انا: (في نفسي ما شالله طب مانتوا عارفين كل حاجة اهو امال بيقولوا ليه في حالة فلاتان امني)بالظبط بس انا هبلغ بعنوان بيتي لان الراجل ده قدامه وهادي لحضرتك كل البيانات حتى الرقم القومي (كنت هاعمل كدة بجد علشان يبقى عداني العيب)
حظابط: ايه المشكله؟
انا: حكيتله الحكايه وقولته حضرته مش كفايه احتل الشارع لا كمان قرر ان محدش ينام
حظابط: هو مشغل الدي جي دلوقتي
انا: انا في شغلي هاعرف منين انه مشغله بس هو حاطة في المحل
حظابط: قالي لازم نعمل اثبات حاله لازم يبقى متلبس لازم يشغله
انا: حاضر انا هتصل بحضرتك واسعمهولك اول ماروح البيت

ومكتدبتش خبر اتصلت بواحد جارنا وقولته اجنا مش هانسكت على كدة لازم نتصرف قولته انا هاتصل النهاردة وانت كمان ان شالله كل 1/2 ساعه

طيب انا بوجع دماغكوا ليه؟

اولاً: الناس في البيت قاللولي ان البوليس مش هايعمل حاجة زيهم زي البلديه اللي سابت الشارع يبقى مزبله. ريجي دماغك

ثانياً: انا عارفه ان البوليس مش هايجي نظراً لخبرتي السابقه معاه. كان في خناقه في الشارع وواحد من اللي بتخنقوا طلع على شقته وكانت الخناقه في عز الضهر وعايز يرمي انبوبه بوتجاز على اللي بتخانق معاه وفي الوقت ده كانت الناس مروحه من اشغالها علاوة وطبعاً الشارع مسدود بسبب بقيه البياعين اللي من فصيله بتاع السجاجيد وكمان عندنا مدرستين ليهم اتوبيسات وكل ده كان في الشارع ساعه الخناقة. فاتصلت بالبوليس وواحد حظابط برضه قالي مش الخناقه اللي موجودة في شارع كذا اللي فيها فلان وفلان قولتله اه. قالي اطمني ماحنا عارفين وجايين وفعلاً جم بعد الخناقه بـ 6 ساعات كامله والنعمه كلامي صحيح. جم وخدوا المعلوم وسألوا عالواد البلطجي قالولهم ده مش هنا فصدقوا اهله وراحوا ماشين. فالمفروض اني اكبر دماغي اذا كان مجوش علشان انبوبه بتوجاز هيجوا علشان واحد معلي التسجيل

ثالثاً: ميجو قالي البوليس ممكن يجي في حاله اذا كان الدي جي بقول كلام في السياسه او ضد التوريث غير كدة مش هايجوا. كبري دماغك

طيب انا بقه لا هاريح ولا اهاشتري ولا هكبر دماغي انا من حقي اريح في بتننننننننننننننننننننننننا علشان اعرف اصحى تاني يوم اروح الشغل. انا من حقي اقعد اسمع قناه المزيكا عالراديو واقعد ارسم او اقرا. مش هاسمح لبتاع السجاجيد انه ياخد حقي مني

هفضل اتصل بالبوليس كل يوم وهاصلي كمان ان ربنا يجب العواقب سليمه لغايه لما يشيلوا الدي جي

انا هتصل بالبوليس النهاردة وهاقولكم بكرة ايه اللي حصل. سلام مؤقتاً

Love,
Mish Mish

Wednesday, October 3, 2007

Introduction





Writing is not a thing that I can excel in but I use it as a way to spread out my thoughts. I heard before someone says "thoughts are like brides you can't prevent them from flying"



I write away from any religion belief, away from politics, my main concern is the human being. I write to those who have a free sprit & feeling that they are trapped. I write to those who are pursuing their freedom



Your comments & thoughts are welcomed as long as they don't offend anybody. There is no point of judging each others; instead we should celebrate our diversity as humans.




الكتابه ليست من الاشياء التي اجيدها ولكنها وسيله لنقل الافكار. فقد سمعت من قبل ان "الافكار كالطيور لا يمكن ان تمنعها من الطيران.



لذا سأكتب بعيداً عن اي معتقد ديني، وبعيداً عن اي موقف سياسي. سأكتب عن الانسان هذا هو هدفي الاساسي. سأكتب عن ذوي الارواح الحرة ومع ذلك فإنهم يشعرون انهم محاصرون وسأكتب عن هؤلاء الذين يسعون وراء الحرية.



ارحب بتعليقاتكم وافكاركم طالما انها لاتسئ لأحد. فليس هناك نفع من إدانه بعضنا لبعض من الاولى ان نقدر اختلاقتنا عن بعضنا فتكل الاختلافات هي التي تكون ملامح الإنسانيه
Love,
Mish Mish
There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق