Monday, February 28, 2011

هو احنا فراخ يا جدعان؟


المادة 75 والخاصه بصفات رئيس الجمهوريه: يشترط فيمن ينتخب لرئاسه الجمهوريه ان يكون مصرياً من ابوين مصريين، وان يكون متمتعاً بحقوقه المدنيه والسياسيه والا يكون قد حصل او اي من والديه على جنسيه دولة اخرى، والا يكون متزوجاً من غير مصريه والايقل سنه عن اربعين سنه ميلاديه. لغايه هنا واللجنه ابدعت في فن التفصيل والخياطة

مش عارفه ليه اللف والدوران ما كانوا يكتبوا اسمه بالمرة ويبقى الاستفتاء على التعديلات الدستوريه وانتخابات الرئاسه مع بعضها قطعيه واحدة ويسموها استخابات او انتخفاءت


بيقولك اللواء محمود وجدي وزير الداخليه القى تحيه السلام الوطني للواء حبيب العادلي في زنزانته

الله! هو مش في ثورة قامت والعادلي ده مش محبوس لانه مجرم وايده غرقانه بدم كل فئات وطوائف الشعب. ولا العالم ديه حافظة مش فاهمة


اهالي المظلات "يستغثون" من البلطجيه ومدير امن القاهرة يرد: حقوق الانسان والحريه التي تريدونها تمنع ملاحقتهم. مدير امن القاهرة فاكر ان احترام حقوق الانسان يعني يقعد على مكتب مستنى المجرمين ضميرهم ينقح عليهم ويجوا يسلموا نفسهم. هو مش هايجبر حد على حاجة
اخر حاجة بقه الانتخابات والاستفتاءات بالرقم القومي ... لا الاستفاءات بالرقم القومي والانتخابات التشريعيه بالبطاقه الانتخابيه ....لا بالرقم القومي ... لا بوصل النور ومقاس جذمة الناخب
ومما سبق ذكره تبين لنا جميعاً ان الحكومة سواء قامت الثورة او قعدت مازالت تتعامل معنا وكأننا فراخ معدومي الفهم والذاكرة. نفس السيناريوهات القديمه واخرها ضرب الجيش للمعتقلين وبعدين يقولك ده من عشمي
كاك كاك ثورة ثورة كاك الى الامام الى الامام - مع الاعتذار للأخ العبيط معمر القذافي
MishMish

Sunday, February 20, 2011

استغاثه لمجلس قيادة الثورة - الاصلي

يا جدعان والنبي اللي يعرفهم يقولهم
يا ايها الثوار ... احنا ماشين وراكم وحبنكم وعايزنكم تكملوا
مش عايزين اللي يحصل يبقى هوجه وتخلص
حد منكم يقولي ازاي سبتوا القرضاوي ينزل ببراشوت على الميدان. إزاي وائل غنيم يتمنع من الكلام في الميدان ومين اللي يمنعه البودي جاردات بتوع القرضاوي ايه كينونته ده علشان يبقاله بودي جاردات؟
ازاي تكون مطالب الثورة الافراج عن المساجين السياسين يقوم اليوم السابع ينشر النهاردة الافراج عن 10 من معتقلي الجهاد بالوادي الجديد من رافضي المراجعات - يعني ارهابيبن ويفتخروا
يعني ايه النهاردة اول حزب ينشأ بعد الثورة وياخد تصريح يكون حزب الوسط ذو المرجعيه الاسلامية
يعني ايه ظهور الاخوان المسلمين في كل القنوات وكأن الثورة بتاعه ابوهم
يعني ايه الاهرام تعمل يوم السبت استفتاء على المادة التانيه في الدستور وايه الحرب اللي قامت وماقعدتش ما بين المسيحين والمسلمين في التصويت
ليه دلوقتي ثار الحديث عن المادة التانيه في الدستور مع انها مش مطروحه للتعديل
ليه بيتم اظهار المظاهر الاسلاميه بفجاجة دلوقتي في حين ان العالم كله بينظر لمصر نظرة اعجاب - النيويورك تايمز سمت الثورة بالثورة الثقافيه في مصر
لصالح مين يتم تغير اوجه الشباب المثقف بأوجه ملتحيه غاضبه
إزاي سايبين ثورة عظيمه زي ديه نهيبه لكل واحد يجي ينط عليها ويتكلم باسمها
سمعت عن مظاهرة ميلونيه يوم التلات هل لما ننزل المره دي هنلاقي ايمن الظواهري في ميدان التحرير؟
انتوا خاطرتوا وحطيتوا رقابيكو على كفوفكم ونزلتوا واحنا صدقناكو والعالم كله بيشجعكم اعلنوا عن نفسكم وامسكوا زمام الامور قبل ما المصريين يتفتتوا تاني. بقايا النظام القديم شغاله الله ينور وبتستخدم نفس الورقه اللي بتقش كل مرة والناس بقالها 30 سنه مفسيه دماغها والناس اللي ماسكه البلد هما هما نفس الوشوش
اي حد عنده اكتر من 45 سنه خطر على نفسه وعلى البلد لان مخه تبلد
فين دكتور احمد زويل مابدأش في تفعيل مبادرة نهضه التعليم ليه
حد يقولي عمر سليمان وزكريا عزمي بيشتغلوا ايه دلوقتي بالظبط
حاجة كمان من صفحه ميجو عالفيس بوك "إذا كان النائب العام يبقى ابن خالة وزير الداخليه الحالي محمود وجدي وزوجه احمد شفيق رئيس الوزرا تبقى عمة خديجه مرات جمال مبارك وابن الفريق احمد فاضل رئيس هيئه قناه السويس متجوز بنت عمر سليمان نائب رئيس الجمهوريه السابق ومرات حبيب العادلي وزير الداخليه السابق تبقى طليقه اشرف السعد حرامي الاموال المعروف وفي نفس الوقت تبقى بنت عمه سوزان مبارك السيدة الاولى سابقاً - زهير جرانه وزير السياحه السابق يبقى ابن خالة محمد منصور وزير النقل السابق والمغربي وزير الاسكان السابق واحمد عز امين التنظيم السابق... وابنته الزعيم عادل امام متجوزة حفيد المرشد العام" يبقي الموضوع كده فيه اشتغاله الحكومة بتشتغلنا ومش بعيد بعد شهر لو استمر الوضع على ما هو عليه تلاقي حسني مبارك رجع تاني وهو وبقيه العصابه ويطلعوا علينا في التليفزيون يقولوا الثورة اتصورت تحبوا نزيع
يا جدعان الموضوع كده هيفرط من فضلكم اعلموا حاجة
اعملوا على الاقل حزب او جهه واحده ليكم ناخد منها معلومات
يعني من كام يوم دخلت على صفحه وائل غنيم لاقيته عامل اعلان لصفحه البرادعي - انا مع كل اللي بيتقال لسه ورا ترشيحه رئيس جمهوريه - وبعدين النهاردة الاقي اعلان لترشيح عمرو موسى لرئاسه الجمهوريه وبرضه عليه صورة وائل غنيم
طيب هو وائل غنيم من قواد الثورة ولا المسأله مسأله حظ
طيب هنعمل ايه دلوقتي؟
تحيا مصر
MishMish

Tuesday, February 15, 2011

حتى لا تضيع الثورة

اللي كنت خايفه منه حصل وبدأ المعممون واتباعهم من المغيبين في التحرك لتفتيت الوحدة والركوب على ثورة لم يكونوا مؤيدين لها من البدايه
هو هو اللي كان بيحصل ايام الرئيس السابق. اي حديث او محاولة جديه للتغير تنتهي قبل بدايتها على ايدي المعممين
لجنه تعديل الدستور الحاليه رئيسها له توجهات اسلامية واحد اعضائها عضو من جماعه الاخوان المسلمين يعني هما 6 اتنين منهم املهم في الحياه تحويل مصر الى افغانستان او سودان او غزة او صومال تانيه -احنا وحظنا
وسمعت عن مظاهرة الاخوان في شارع الهرم وهم يهتفون "اسلامية .. اسلامية" وجماعات الفيس بوك اللي مش بس بتدعو الى الحفاظ على المادة التانيه وتفعليها لكن ايضاً تغير نصها من (الشريعه الاسلاميه هي المصدر الاساسي للتشريع إلى الشريعه الاسلاميه هي المصدر الوحيد للتشريع) يعني اسقطنا نظام سياسي بوليسي علشان نلاقي نفسنا محكومين بنظام ديني متعصب

هي الناس لغايه دلوقتي لسه مش عارفه ان المادة التانيه عضمه رماها السادات - الراعي الرسمي للفتنه الطائفيه في مصر - سنه 1971 لتمرير المادة 77 من الدستور واللي كان الغرض منها ان يفضل في الحكم الى النفس الاخير

ونفس اللعبه لعبها النظام السابق في تعديلات الدستور في 2007 وانا زي العبيطة روحت وقلت نعم للتعديلات اللي كانت متفصله على مقاس الرئيس الابن جمال مبارك خوفاً من الاسلاميين

هي مش الثورة قامت علشان ما يبقاش في ظلم وتبقى مصر لكل المصريين

هي مش الثورة قامت علشان ما يبقاش في حد احسن من حد قدام القانون

هي مش الناس اللي نزلت كانت بتهتف تحيا مصر


يا ناس قبل ما تولع

لازم نعرف ان القمع هو القمع سواء باسم الوطن او الدين

الدولة البوليسيه يكون فيها المعترض عدواً للدولة وخائن - اللي هما كانوا في ميدان التحرير قبل سقوط النظام وبالتالي كان واجب الشرطة القضاء عليهم لانهم اعداء النظام

اما في الدولة الدينيه فالمعترض عدواً للدوله وخائن وكافر - برضه زي اللي كانوا في الميدان بس ساعتها هيبقى واجب الشرطة والشعب المؤمن القضاء عليهم لانهم اعداء الدين

بس نفسي اقول لكل واحد بيدور على حشر الدين في السياسه

تخيل نفسك اقليه مختلفه وسط اكثريه مؤمنه وليس لديها اي نيه للتفاهم
فكر في جميع البلاد اللي ليها انتماء ديني وشوف قدمت ايه للبشريه

فكر في حال بلادنا واللي حصل في الـ 18 يوم اللي فاتوا لما الناس نسيت اي انتماء ليها وافتكروا بس انهم مصريين

فكر في الاساءة لمعتقدك لما تبقى وسيله الحفاظ عليه هو فرضه بالقوة الجبريه على الجميع

فكر في مصر

تحيا مصر

MishMish

Monday, February 14, 2011

الاستقرار في رأي الحمار

بعض الاشخاص الواقعيين او الفيس بوكيين يتحدثون عن المطالبين بالتغيير وكأنهم خونه واعداء للوطن.... الشيء الاكثر استفزازاً انهم يلبسون ثوب الحكمة والعقل والرزانه وهم اكثر جهلاً من اي شخص فتجدهم يتحدثون وكأنهم يعيشون في كوكب اخر ويتشدقون بكلمة الاستقرار
وكأننا لا نعيش معهم في نفس الظروف
اي استقرار يتحدثون عنه؟ ما هو مفهوم الاستقرار؟ هل الاستقرار هو العيش في نفس الظروف اطول فترة ممكنه؟
إذا اعتبرنا هذا هو مفهومهم فإننا بذلك نعتبر الصرصار مستقراً .... فهو يعيش في البلاعه مستقراً يرضى بالفضلات...... لكن عليه ان يتحمل ضرب إذا فكر في الخروج
ولنعتبر الحمار ايضاً مستقراً فهو ينال حصته اليوميه من البرسيم كما انه مستقر في طريقه اليومي من البيت للغيط ومن الغيط للبيت ... لكن عليه ايضاً ان يتحمل الضربات القاسيه من أولي الامر ويحمل ما على ظهره دون ادنى تذمر.... وعليه ان يتحمل لسعات السياط لو تجرأ واعترض على ثقل الحمولة .... عليه ان يتحمل سخريه وتهكم كل مخلوقات الارض عليه وعبارة "شي يا حمار" بدون اي امتعاض
فالحمار مستقر جداً بالفعل لك لذا فليس من حقه تغير العربجي وعليه ان يرضي بركوب اي شخص او إمساكه بالجام .... سيظل الحمار حماراً طالما لا يعرف امكانياته ... وطالما ليس لديه طموح في ان يكون ملك الغابه
لذا فعلى كل حمار متحذلق ينادي بالاستقرار ... ان يرضي بلسعات السياط المتتاليه حينما يعجز عن حمل الاعباء او حينما ينهق معترضاً.. وليرضى بدعم البرسيم ان وجد اصلاً ... عليه ان يتحمل اكل البرسيم المسرطن المروي بمياه المجاري ... عليه ان يتحمل اهانه الضباط في الكمائن المخصص للحمير ... عليه ان يدفع رشوه لكي يقضي حوائجه ... عليه ان يترك المنافقين والمرتزقه يعبثون في برسيمه ويحتكروه ... ولا ينسى ان ينادي العربجي بـ (بابا العربجي) فالسيد العربجي لن يجد احمر منه على الاطلاق ولن يجد عربه اكثر راحه من هذه العربه فالسيد حصاوي حمار لقطة لا يعترض ابداً.... ولا ينسى السيد حصاوي ان يعلم اولاده في مدرسه مجانيه ترسخ لديهم مبادئ ازهي عصور الحموريه فيكبرون هؤلاء الاولاد فيصبحون حميراً كباراً ناضجين ينادون بالاستقار مثل ابيهم الحمار الاصلي ويشاركون مع اخوانهم البغال والجمال في ترويع الخونه اعداء الوطن الذين اعتصموا في ميدان التحرير
تحياتي
ميجوووووووو

Friday, February 11, 2011

إلى الخائفين من الحريه

"الشعب غير مستعد للديموقراطيه"
جمله في منتهى الغباء اشعر عند سماعها بصداع رهيب وكأن مخي سينفجر من الغيظ

جمله الفها النظام واخذ يذيعها في كل محطاته وجرائده لنا في الداخل وللغرب متبوعه بصورة الرئيس ذات الابتسامه الباردة اللي اتذكرها الان موضوعه فوق السبورة في مدرستنا وكأنها تقول : مفيش فايدة

قائل هذ العبارة اما ديكتاتور يريد ان يطفي شرعيه لطغيانه او شخص تم العبث بعقله طوال سنين حياته وبرمج على انه مختل عقلياً غير قادر على الاختيار الصحيح ويحتاج الي واصي ليتصرف له في شؤنه

تخيل انك من يوم ولادتك والى اصبحت في الثلاثين من عمرك وانت لا تسمع سوى عبارة: انت الى الان لست مستعداً لتعلم القراءه

لا انكر رعبي الشديد من ان تتحول مصر الى افغانستان اخرى

ولكن لننظر للامور من هذه الزاويه

جماعه الاخوان موجوده في مصر منذ عام 1928 اي انهم اقدم حتى من النظام العسكري الذي قام الانقلاب العسكري عام 1952

لماذا لم يقوموا منذ ذلك التاريخ والى الان بعمل اي محاوله للتظاهر والتجمهر ولو بربع العدد الموجودة الان في ميدان التحرير فقط وليس في محافظات مصر كلها

هل تظنون من خرج للمطالبه بالحريه والكرامه والعداله سيرضي بحكم الفقيه

من كره النظام وخرج ليثور لم يكونوا من سكان العشوائيات او الاسلامين او الانفصالين بل المثقفين والفنانين وكل من اراد ان يحيا حياه كريمه في بلده وليس كمهاجر في بلد اخر ثلجي او قاحل

تعداد الشعب المصري 85 مليون

ما هو عدد الاخوان لنقل باحسن تقدير انهم 30 مليون

هناك 10% اقباط اي 8,5 مليون لن يعطي احدهم صوته لإخوانجي في الانتخابات

هناك على الاقل مليون مثقف وعلماني وملحد وبهائي وليبرالي و..و.. لن يصوتوا الى الاخوان

وهناك 45.5 مسلم معتدل لا يرغب في حكم ديني

يكرس جميع خططه واحلامه بحرب اسرائيل واقامه الدوله الفلسطينه كما جاء في خطاب يحي الهلباوي يوم الاحد 6 فبراير مع قناه البي بي سي عربي عن خطة الاخوان اذا ما توصلوا الحكم. فكان غباؤهم المعهود في الكلام عن القضيه الفسطينه والتي تعتبر هي الهدف الوحيد الذي يعيشون من اجله ومصر ليست سوى بوابه لهذه الحرب وسيتم استنزافها لحرب لا يريد احد دخولها بما في ذلك فرعهم حماس

عدد اللذين ادلوا بصوتهم في انتخابات الرئاسه السابقه 7 مليون
you do the math

التعديلات الدستوريه الحديدة ستضمن بقاء الرئيس لمدتين فقط وايضاً انتخابات حرة وليست هزيله وسيكون على كل مرشح اعلان اجندته السياسيه وسيكون الشعب هو الحكم وميدان التحرير موجود

ثم لماذا الان نصدق ابواق النظام التي ظلت تخدعنا لعقود

لماذا نصدق من ترك الجهل والغباء والطائفيه والفساد يستفحل وينهش في عقول الشعب واجسادهم

لماذا نصدق من جلبوا لنا المبيدات المسرطنه وبدلاً من محاسبه المسئولين عن سرطنه الشعب المصري كانوا يخططون لبناء معهد سرطان في كل محافظة
لماذا نصدق من اشاعوا في كل وسائل الاعلام ان الشباب المصري يعاني من حاله هياج دائم في حين انهم هم المتسببين في ذلك بعدم الاهتمام بأمان الشارع لحساب امان عائله السيد رئيس الجملوكيه

لماذا نصدق من يسرقنا ليل نهار ثم يخرجون علينا باعلانات كفاله ام الايتام ثم اسرة فقيره ثم قريه فقيره واعتقد ان اعلانات رمضان القادم كانت ستكون اكفل دوله فقيره وحث الاخوه العرب على الزكاه من اموالهم لشعب مصر وان تكون متبوعه بعبارة: ارحموا عزيز قوم ذل

لماذا نصدق من يعقدون اتفاقات مع السعوديه لتوريد خادمات مصريات . فبعد ما كان السعوديون يأكلون في التكيه المصريه مجاناً وبعدما ذهبنا مهندسين ومدرسين واطباء لتعليم السعوديين وبقيه العرب الان وبفضل سياسات الحكم الفاسدة اصبحت نساء مصر والتي منهن ام كلثوم وهدى شعراوي وسميرة موسى ونوال السعداوي خادمات في السعوديه
لماذا نصدق النظام الذي دق مسمار العداوه في بالمادة الثانيه من الدستور ليس تديناً ولكن تدليساً ليمرر المادة التي تتيح له ان يحكمنا إلى ان يخرج على ظهره من قصر الرئاسه

نفس الرئيس المؤمن الذي انشأ المصرف العربي ليكون مغاره على بابا له ولحاشيته وللقادمين من بعده

والتي حافظ عليها الرئيس الحالي المخلوع لغرض ما في نفسه

ونسى هؤلاء جميعاً ان الديانات السماويه والارضيه لا تهدف الى زرع الفرقه بين البشر وان المبشرين بها والتباعين لها لم يكونوا امراء حروب او وزراء داخليه بل بشر امنوا بالرساله والقضيه يحملونها في قلوبهم وليس في كتب القانون.


كلمه اقولها لكل من امن وروج لهذه المقوله لست افضل من احد لكي تفرض الوصايه على من يريد التحرر من الظلم والعبوديه



تحيا مصر ... تحيا الثورة

MishMish

Saturday, February 5, 2011

SMS's


السيد الرئيس: قلت هتسيب التاريخ يحكم عليك. واحنا موافقين

السيد حبيب العادلي: كانت اقصى امال اهالي شهداء الداخليه هي إقالتك. لكن ربك لما يريد مش بس اقاله لا ومحاكمه وفضحيه بجلال وبلاوي تانيه كتيرررررررررر

السيد احمد عز: ....قولوا للي أكل الحرام يخاف بكرة اللي كله يفسده ....يتهيألي انك مشفتش مسلسل العار في رمضان اللي فات ... معلش ملحوقه

السيد وزير الاعلام: وحيات عينك وعفيك واللي يا رب تعدمهم لو كنت كداب.. انت بتتفرج على قناه النيل للأخبار

قناه المحور: بعد ان توصلت الى الجاسوسه التي اخذت دورات في قلب نظام الحكم والبطل الشعبي اللي طلع النهاردة ومش فاكرة اسمه وكان من الارياف لكن يعرف مأمور قسم الدقي اللي بالامارة كان لابس جاكت ازرق هو والظباط بتوعه وكانوا في المظاهرات وكمان حامي الكنيسة من الاعتداء وفندق الكونراد واركديا مول وووكاله البلح ومترو الانفاق. مش وقت هزار دلوقتي ده موجه كوميدي معملتهاش

افراد الشرطة واقصد منهم المتجردين من انسانيتهم واللذين مدوا ايديهم بالايذاء لغيرهم: العظمة لله وحده. شوف انت دلوقتي لما تبقى داخل على لجنه شعبيه وتقول انا ظابط الناس بيبقى رد فعلهم عامل ازاي

تفجير كنيسه العائله المقدسه برفح: انتوا لسه فاكرين!!! طب من اخت مسيحيه ليكم جالها اكتئاب شديد بعد حادث الاسكندريه وكانت فاكرة انه مفيش فايدة لكن لما نزلت تحضر قداس العيد لاقيت المسلمين موجودين من قبلها في الكنيسة وساكنه جنب كنيسه حاول الايام اللي فاتت بعض البلطجيه الدخول الى شارعها فقط واتعمل معاهم احلى واجب من اهل المنطقه الكرام. بقول فجروا كنايس مصر كلها فدا تراب مصر علشان يبان مين اللي بيبني ومين اللي بيهد. والكنيسة ليها رب يدافع عنها

الاخوان المسلمين ابناء النظام البرره وصنعه يديه التي يعتز بها: منكم لله يا بعدا العالم كله متضامن مع حقنا في الحريه ولكن خايف من توليكم الحكم. حتى الثورة تم تشويهها وابعاد الناس عنها بإتهام اعضائها انهم ينتمون لجماعه الاخوان. بسبب افكاركم الظلاميه تطحن مصر بين حجري رحى

كل من غير صورته عالفيس بوك ووضع بدلاً منها صورة للريس ولا كانه داخل انتخابات: من الطبيعي بعد 30 عاماً من التعليم الحكومي واكثر ان يكون لكل داء دواء إلا الحماقه اعيت من يداويها

شباب 25 يناير وجميع من ساهموا في انجاح هذه الثورة: التراب اللي بدوسوا عليه كحل لعيني ودم الشهداء حنه ليوم الفرح


تعيشي يا مصر...تعيشي يا مصر
MishMish

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق