Monday, February 28, 2011

هو احنا فراخ يا جدعان؟


المادة 75 والخاصه بصفات رئيس الجمهوريه: يشترط فيمن ينتخب لرئاسه الجمهوريه ان يكون مصرياً من ابوين مصريين، وان يكون متمتعاً بحقوقه المدنيه والسياسيه والا يكون قد حصل او اي من والديه على جنسيه دولة اخرى، والا يكون متزوجاً من غير مصريه والايقل سنه عن اربعين سنه ميلاديه. لغايه هنا واللجنه ابدعت في فن التفصيل والخياطة

مش عارفه ليه اللف والدوران ما كانوا يكتبوا اسمه بالمرة ويبقى الاستفتاء على التعديلات الدستوريه وانتخابات الرئاسه مع بعضها قطعيه واحدة ويسموها استخابات او انتخفاءت


بيقولك اللواء محمود وجدي وزير الداخليه القى تحيه السلام الوطني للواء حبيب العادلي في زنزانته

الله! هو مش في ثورة قامت والعادلي ده مش محبوس لانه مجرم وايده غرقانه بدم كل فئات وطوائف الشعب. ولا العالم ديه حافظة مش فاهمة


اهالي المظلات "يستغثون" من البلطجيه ومدير امن القاهرة يرد: حقوق الانسان والحريه التي تريدونها تمنع ملاحقتهم. مدير امن القاهرة فاكر ان احترام حقوق الانسان يعني يقعد على مكتب مستنى المجرمين ضميرهم ينقح عليهم ويجوا يسلموا نفسهم. هو مش هايجبر حد على حاجة
اخر حاجة بقه الانتخابات والاستفتاءات بالرقم القومي ... لا الاستفاءات بالرقم القومي والانتخابات التشريعيه بالبطاقه الانتخابيه ....لا بالرقم القومي ... لا بوصل النور ومقاس جذمة الناخب
ومما سبق ذكره تبين لنا جميعاً ان الحكومة سواء قامت الثورة او قعدت مازالت تتعامل معنا وكأننا فراخ معدومي الفهم والذاكرة. نفس السيناريوهات القديمه واخرها ضرب الجيش للمعتقلين وبعدين يقولك ده من عشمي
كاك كاك ثورة ثورة كاك الى الامام الى الامام - مع الاعتذار للأخ العبيط معمر القذافي
MishMish

11 comments:

لورنس العرب said...

بالنسبه للمجرمين والبلطجيه الذين أراهم بعيني يوميا وسأحكي عنهم في الميكروباص الحلقه القادمه
الآن لا يمكن القبض على أحد دون شهود أو الضبط متلبسا
زمان كانوا بيروحوا يجيبوه من البيت مباشره،دلوقت الامر مش هاينفع

شوفي

في كل وقت في الزمان هناك من يستفيد من القانون وتعديله
وهناك من يسرق بالقانون
وهناك من يبلطج بالقانون
وهذا ما سنراه قريبا
والضابط إن كان عليه فهو لن ينزل من قسم البوليس ويوجع دماغه لأنه يعلم علم اليقين ان الناس لا تقبله وهو يرتدي بدلة الشرطه
ولهذا الامر في المستقبل صعب جدا علينا جميعا

Kontiki said...

اجننتى يا مشمش هاها
بطلى تشوفى الاخبار و ربى عيالك :)انا شخصيا يئست ومبقتش فاهمة اى حاجة

mony said...

مع الاعتذار للدجاج...الذ الذ الذ

Boneta said...

الفراخ ليها ناس بتدافع عن حقوقهم الحيوانيه في الدول المحترمه
اما امثالنا فا لا حصلنا حيوانات ولا بني ادمين
زي اللي رقصوا علي السلم كده
تعبنا بجد من السخافه اللي بيعملونا بيها وكاننا كائنات لا تدرك ولا تحس ولا تفكر ولا تتنفس حتي

ELVIRA said...

يا جماعة حد يتأكد من الموضوع دة هو الانتخابات بعد كدة هتبقى زى ما بيقولوا بالرقم القومى لكن للمسجلين فى جداول الإنتخابات فى أقسام الشرطة كل واحد حسب منطقته و لا أى كلام

صوت من مصر said...

اقولك سر
دى سياسه وقحة بيعملوها
بس للعلم
على مين

Tears said...

شوفوا السرطان اللى كان عايش وسطينا و بقتل فى شعب مصر بفلوس شعب مصر

اليوم السابع تنشر وثيقة تثبت ان الداخلية هى من قامت بتفجير القديسيين

http://www.youm7.com/News.asp?NewsID=362418&SecID=12

Migo Mishmish said...

لورنس العرب
هو كان قانون الطوارئ متطبق من 30 سنه على كل واحد بيفهم او صاحب رأي
ودلوقتي لما بقاله لازمة بيقولوا ما ينفعش

Kontiki
طالما لسه في وقت يبقى لسه في امل
خلينا نعمل اللي علينا علشان مانبقاش قصرنا
والبت بربيها على البرامج السياسيه وللترفيه بشغلها ناشونال جيوجرافك


Mony
اه صحيح لحسن الدجاج يزعلوا ولا حاجة


Boneta
ما هي دي فرصتنا بقه يا ديموقراطيه حقيقه يا نفضل في ميدان التحرير لحد السنه الجايه

Elvira
الحكومة كعادتها دائماً بتفخخنا
اهو التسجيل مهم برضه اعملي اللي عليكي


صوت من مصر
منور يا باشا
والنبي يا اخويا كل الناس هرشه الموضوع وهما بس اللي اغبيا فاكرنا بناكل من الكلام ده
حد يقولهم ..قديمة


Tears
الا هو انتي يا اخوتشي مكنتش عارفه من زمان ولا ايه
ديه كانت باينه زي عين الشمس
حظابط اللي واقف قدام الكنيسة هدومة حتى ماتوسختش والناس اللي كانت بتصلي جوة الكنيسه جابو بقيه لحمهم من عالشجر اللي قدام الكنيسة

Love,
MishMish

ABO JOSEF said...

وإيه لزمته العيب في الفراخ....بالمناسبة هيا فراخ بلدي والا غبية زي الحقيد الجدافي

لورنس العرب said...

لا يوجد مواضيع جديده من فتره
ايه سر الاختفاء
لعل المانع خير

Migo Mishmish said...

Abo Josef
معلش انا عارفه اانا غلطانين في حق الفراخ لكن هما لازم يكون عندهم سعه صدر اكتر من كدة
وانا بعتذر للفراخ مرة اخرى

لورنس
مفيش مانع غير اني متضايقه من اللي بيحصل
ومتضايقه ان في ناس معندهاش دم ولا انتماء ولا دين بتحرق في البلد علشان عصابه كانت ماسكه البلد
متضايقه من الحرب الاعلاميه على الثورة واللي بيقودهه التليفزيون المصري
متضايقه من التعديلات الدستوريه
متضايقه من تهاون الناس بالثورة وتحول شعور ناس كتيره بالغضب والكره ناحيه الثورة
بس هاكتب تاني اكيد
شكراً لسؤالك

Love,
MishMish

There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق