Friday, March 28, 2008

الواد ذكى بس لعبى


من ساعه ما اشتغلت مدرس وانا قابلت مواقف كتير جدا حبيت انقلكم خبرتى فى التدريس ..وتعرفو التعليم ماشي فين فى مصر ..اول خبرة اتعلمتها فى التدريس هى انك لما تقابل ولى امر تلميذ عندك ويسألك عن مستواه الدراسي والاخلاقى وتقوله ان ابنك غبى او قدراته العقليه تعبانه كدا تبقى وديت نفسك فى داهيه .. لازم ولى الامر يحس ان ابنه اذكى ولد فى العالم لانه طبعا طالعله ولو قلت ان الولد مستوى ذكاؤه ضعيف كأنك بتقول لابوه ان انت كمان غبى فيتجنن عليك ويطلعك مدرس حمار ..هنا بقى الجمله السحريه الى تقولها لاى ولى امر وبيكون ليها مفعول السحر (ابنك ذكى بس لعبى وبيتشاقى شويه ) فيقوم يرد عليك اه والله الواد ذكى جدا بس مش بيذاكر خد بالك منه بقى يامستر ..وبكدا يبقى امتصيت غضبه وهايقول عليك انك احسن مدرس فى العالم ..يعنى مرة فيه ولد عندى فى الفصل المشرفه بتقول ان عنده كهربا زياده على المخ .. الواد ده كان مجننى قمت عملت استدعاء ولى امر وقابلت والدته وبعد ماكلمتها عرفت الواد جايب الكهربا منين ؟ اتاريه واخد من الكابل العمومى بتاع مامته ..اقوم اقولها ان ابنك متخلف عقليا وعايزله سرايه المجانين ؟؟؟ اهم حاجه فى الزمن دا انك تبقى مجنون مع المجنون ومحترم مع المحترم وغبى مع الغبى لازم تلعب كل الادوار ببراعه شديده على راى استاذنا عادل ادهم

تانى حاجه لازم المدرس يعملها انه يبين للناس انه عبقريه علميه معمليه فذه وانه فاهم فى مادته وماحدش زييه وانك بتشرح بذمه وضمير والباقى وحشين ومش فاهمين ولما النتيجه تطلع وحشه تقدر تقول ببجاحه زى الدكاترة بتوع الافلام العربى القديمه (احنا عملنا الى علينا والباقى على ربنا ) يعنى المدرس مغسل وضامن جنه ؟؟ وساعتها ولى الامر هايجيب العيب على واضع الامتحان او هايبتدى يدور على ان ابنه مكنش بيذاكر كويس ..باختصار المدرس لازم يعمل لنفسه برستيج ويعمل لنفسه هيبه مع ولى الامر يعنى لما حد يتصل بيه عشان يتفق على درس خصوصى لازم المدرس يقوله انا معنديش وقت خالص ومش فاضى هاحاول ادور على ساعه فاضيه بالعافيه لابنك واكبر غلط ان المدرس يقول ان عنده وقت كذا وكذا فاضى فيعرف ولى الامر علطول انك مدرس كفته وماحدش بياخد عندك ، اهم حاجه انك تقوله دقيقه واحده اشوف الجدول بتاعى وتطلع اى حاجه تبص فيها قال يعنى جدولك مليان وتقوله ماعنديش غير يوم الفلانى فاضى ..البرستيج اهم حاجه فى الزمن دا، انا مرة كنت بدى ولد وجت مامته قدمتلى مشروب غريب الشكل معرفش لغايه دلوقتى هو ايه ولقتها حاطه الفلوس تحت الكوبايه فى الصينيه ساعتها حسيت بالاهانه قمت مارحتش للولد دا تانى تقوم مامته تتصل بيا وتتحايل عليا وانا لايمكن ارجع فى كلامى بس علطول جه فى دماغى مبدأ ( الواد ذكى بس لعبى ) ورحت الحصه الى بعدها ...وللحديث بقيه فى البوست الى جاى

ميجوووووووو

Thursday, March 27, 2008

6 ابريل


كان نفسي يبقى في موضوع ظريف نتكلم فيه سوا لكن الوقت ضيق والكلام ده مهم

كنت قرايت في المصري اليوم عن حمله اسمها "ابدا بنفسك والناس هتمشي وراك" على الفيس بوك فاشتركت فيها ولما فتحتها النهاردة لاقيت فيها موضع اضراب 6إبريل ولاني مؤمنه اننا لازم نعمل حاجة ما ينفعش نفضل واقفين نتفرج هانقل الموضوع من على الفيس بوك

http://www.facebook.com/group.php?gid=9973986703

انا قريت على النت وجتلى رسائل على الموبيل ان فى اضراب عام يوم 6 ابريل للاعتراض عن الغلاء المفرط والارتفاع الجنونى فى الاسعار ومن ناحية اخرى المرتبات والدخل لا يتأثران نهائيا بهذا الارتفاع فى الاسعار وكأن الحكومة والبلد عايزنا نضرب دمغنا فى الحيط ......... عجبتنى الفكرة وفكرت ان احنا ممكن ندعم الفكرة باضراب عام عن الشراء نعمل اضراب عن شراء اى سلع فى اليوم ده وياريت منكنش سلبين ونشارك كلنا فى الاضراب ....... مفيش حاجة فى البلد ممكن تتغيير واحنا واقفين نتفرج ونقول حسبى الله ونعم الوكيل ..... ومش هتتغير لو 10 او عشرين او الف او حتى مليون واحد هو اللى عارض هو اللى احتاج هو اللى قال للظلم لا ............ لو مكناش 70 مليون ضد حكومة فاسدة وظالمة ومرتشية مفيش اى حاجة هتتغير وساعتها اياك تقول ان الحكومة بس هى السبب فى انك مش لاقى تاكل لازم تعترف انك ساعدت الحكومة بانك واقف تتفرج عليها وهى بتتدبح فيك وفى اهلك وفينا كلنا . 6 ابريل ............ اضراب عام للشعب المصرىو بالنسبه لهذا الجروب و هو يعتبر الأن اقوى و اكبر و انشط التجمعات الداعيه للإضراب فقد تم الاتفاق حتى الان على الاتى

الاجماع على تعليق علم مصر فى البلكونات

الاجماع على ارتداء ملابس سوداء و يفضل مطبوع عليها اى شعار للإضراب لوامكن مع حمل شاره او اى اعلان عن "إنى مضرب إحتجاجا على الأسعار

تم بالإجماع الاتفاق على الإضراب عن شراء أى سلعه لتمثل وسيلة تهديد للحكومه التى لا تعيرنا اى انتباه و لا تحترم وجودنا ولا تحس بمعاناتنا و كذلك الاضراب عن شراء السلع يعتبر تهديد لاى تاجر يرفع الاسعار اننا يمكن ان نتحد لمواجهتهعند حدوث حالة شلل فى هذا اليوم سيفكر الجشعون الاف المرات امام هذا الشعب الواعى

تم الاتفاق على ان يحاول الجميع قدر استطاعته بكل السبل على الاضراب عن العمل و الغياب عن العمل هذا اليوم و اعلان ذلك قبلها و اعلان الاضراب

اجمع جميع الطلبه على الاضراب عن الدراسه فى ذلك اليوم و اعلان ذلك مسبقا

لإصحاب المهن الحرجه كالطبيب مثلا أو ما شابه و كذلك لمن لن يستطيع ابدا ابدا ان يمتنع عن العمل و كذلك بالنسبه للطلبه الذى يتوافق 6 ابريل مع امتحاناتهم فإنهم سيضطرون للذهاب لمصالحهم مع اعلان الاضراب لبعض أو كل الوقت و كذلك الاعتصام السلمى فى مجموعات إن امكن

على من يستطيع النزول للتظاهرات التى ستكون فى الميادين الرئيسيه بالمحافظات يمكنه ذلك و لكن بعد الاتفاق مع القوى السياسيه و منظمات المجتمع المدنى على ميعاد و مكان التظاهرات

على الجميع العمل بجد منذ اليوم حتى الان على نشر كل تلك الافكار بين الشعب المصرى و هم اهلنا و اصحابنا و اقاربنا و زملائنا فى العمل مستخدمين فى ذلك كل الوسائل المشروعه من دعوات صريحه عامه او فرديه او ارسال رسائل محمول او مكالمات هاتفيه او البريد الالكترونى و المنتديات و المدونات و المواقع الاعلانيه و الجرائد و الصحف و المجلات و الاتصال بالفضائيات .. و كذلك تعليق الالافتات و ارتداء تى شيرت أو شاره يحمل الدعوه للإضراب من الان حتى ميعاد الاضرابو الله الموفقالله .... الوطن

بتهيألي مفيش كلام يتقال بعد كدة مش هنخسر حاجة لما نعمل كدة لكن الحكومة هي اللي هتفهم انه كفايه كدة

ارجو من اصحاب المدونات نشر هذا الموضوع للاهمية

love,

MishMish

Friday, March 21, 2008

اغانى مضروبه


ايه رايكم فى الاغنيه دى ؟؟ مع احترمى الشديد للملك منير بس انا كان ليه تصور تانى والى عنده اى تصور هو كمان

يكتب ويقول رايه

الفقر حبيبى وشريانى ..اهدانى بطاقه شخصيه

الاسم الكامل خريج ..من اى جامعه مصريه

المهنه عاطل وبدور ..على اى شغلانه وهميه

والشغلانه فاتحه على الشارع ..والشارع هايرحب بيا

......

الفقر حبيبى وشريانى ..اهدانى بطاقه شخصيه

ولسه باخد مصروفى ..الهى يخليلى والديا

عالقهوة بناضل بتعلم ..وصحابى عالم فقريه

استاذ فى الدومينو وفى الطاوله ..وخلاص بقى فاض الكيل بيا

......

Monday, March 17, 2008

الامن مستبد !!!!!!


النهارده الصبح كنت مزوغ من المدرسه عشان كان عندنا حفله وطبعا انتو عارفين الحفلات المدرسيه بتبقى عامله ازاى ..شويه عيال قعدو يعذبو فيهم طول السنه عشان تيجى لجنه من الوزارة تتفرج عليهم وتقيمهم اخر السنه .. الحفله بدات بعد ما اللجنه فطرت وكلت الجاتوه وشربت الشاى وطبعا التقييم هايكون ميه ميه بعد الحلويات والذى منه ..بدات الحفله بالكلمات المعروفه فى تلك المناسبات ..بدءا من كلمه السيد مدير المدرسه والسيد وكيل الوزارة والسيد فراش الوزارة والسيد نائب فراش الوزارة ..كلام من عينه (قف للمعلم وفه التبجيلا ..كاد المعلم ان يكون رسولا ) والعمليه التربويه التنمويه على محاور افقيه ..كلام كبير جدا ماحدش فاهمه ولا بيطبقه ..بصراحه مرارتى اتفقعت من الحفله ..حتى العروض الى عملوها كانت تقليديه وعبارة عن مجموعه من الاستعراضات على اغنيه (الاقصر بلدنا بلد سواح ) واغنيه حلاوة شمسنا الخ الخ الخ ..ومجموعه الاغانى الى ماتغيرتش من ايام ماكنت فى حضانه ..والعيال يرقصو واللجنه تاكل جاتوه وتسقف والعيال تهيص ..المهم خدت بعضى ومشيت من الباب الخلفى عشان ماحدش يشوفنى وقلت اروح اقعد عالقهوة اقرا الجرايد واشرب فنجان القهوة بتاع الصبح ..وف عز منا مندمج فى القراءه جه عم جمال مدير القهوة الى هو صديقى وسال محمد بتاع الشيشه (ايه اخبار القهوة ..فيه حاجه حصلت ونا مش موجود؟ ) رد محمد بعفويه شديده (كله تمام ياريس الامن مستبد !!) قالها محمد وهو غير مدرك انه بتلك الكلمه حلل الموقف تحليل كامل يفوق اساتذه السياسه والاقتصاد ولخص وضع نعيشه وهو المركزيه فى كل شيئ كله مستنى ياخد قراره من الى فوقه وكله بيدارى على الى فوقه وهكذا الى ان نصل لقمه الهرم ..كله بيدوس على الى تحته عشان يرضى الى فوقه..يعنى مثلا عندنا فى المدرسه مديرة المدرسه يهمها انها تفضل على كرسيها فتضغط على الناظرين بتوع ابتدائى واعدادى وثانوى ..يقوم الناظرين يضغطو على الوكلاء والوكلاء يضغطو على المشرفين والمشرفين يضغطو على المدرسين . اهم حاجه ان المنظر العام يبقى ان كله شغال وكله شايف شغله والشعارات بقى تشتغل لكن ايه الى تم وايه الى اتغير فى الواقع ؟ مش مهم .. المهم (كله تمام ياريس ..الامن مستبد )

Friday, March 14, 2008

رجلى بتاكلنى


مضى على زواجى انا ومشمش 45 يوم بالتمام والكمال وهذه الفتره اشبه بمركز التدريب فى الجيش ..قبل الترحيل الى الكتيبه وكل من يقابلنى يسألنى بصفتى عريس جديد ..ايه الاخبار؟؟.. الجواز حلو؟؟ فلا اعرف اجابه ارد بها عليهم فالسؤال صعب وعويص ..ويصعب الاجابه عليه ..وعشان ماحدش يفهم غلط ويحاول انه يوقع بينى وبين مشمش ويقول انك مش مبسوط من الجواز المشكله مش فى مشمش او فيا لكن المشكله فى الجواز كمؤسسه او منظومه اجتماعيه ..الحكايه انى عشت لمده 32 سنه بطريقه وباسلوب مختلف عن طريقه واسلوب مشمش ومطلوب مننا اننا نتاقلم مع بعض ونصل لنقطه اتفاق وطريقه معيشه مشتركه يعنى مثلا احنا الاتنين مختلفين تماما فى طريقه الاكل ..انا بحب الفواكه والخضروات جدا لدرجه ان مشمش معتقده انها متجوزة ارنب وهى بتحب اللحوم جدا لدرجه الافتراس وبتكره الفواكه كره العمى .. انا بحب ان الشبابيك تفضل مقفوله وهى بتحب الشبابيك تفضل مفتحه .ودى مشكله عويصه برضه يعنى كل يوم الصبح اصحى الاقى الشبابيك مفتوحه عالبحرى ازرجن واتعكنن واقوم اقفلهم كلهم ..تقوم هى ماشيه ورايا ومفتحاهم تانى وهكذا ..اهم نقطه لم نصل فيها لاتفاق هى نقطه الرفق بالحيوان ..فمحسوبكم ميجو يكره القطط كره العمى .واول ماشوف قطه فى اى مكان احس انى رجلى بتاكلنى وببقى عايز الفحها شلوت مش عارف ليه ..ممكن تقولو انى سيكوباتى ..وهى من المناهضين لتعذيب الحيوانات فاكرة نفسها برجيت باردو ومرة قفشتنى وانا نازل على السلم وبدرمغ قطه من على السلم ،كان يوم اسود عليا ،نيجى بقى لنقطه اختلاف تانيه هى انها مش اجتماعيه يعنى مش بتحب الزيارات والمناسبات الاجتماعيه والقعده وسط الناس يعنى ست انهزاميه انطوائيه انبطاحيه ..حلوة انبطاحيه دى .. وطبعا زى مانتو عارفين اول شهر من الجواز بيبقى كله عزومات عند ناس وناس بتيجى عندنا ودى بقى مشكله ..لانى راجل اجتماعى وبحب الناس انما هى براويه فطبعا بتيجى معايا مضطرة عشان منظرنا الاجتماعى مايبقاش وحش ..نيجى بقى لنقطه الاختلاف الجوهريه الى هى البرنامج الموسيقى الى بيشتغل فى الراديو 24 ساعه بصراحه انا بحب الموسيقى جدا بس مش لدرجه ان الموسيقى الكلاسيك تشتغل 24 ساعه لدرجه ان اعصابى رخرخت ومبقتش عارف اسيطر عليها انتو عارفين طبعا تاثير الموسيقى الهاديه بيبقى عامل ازاى.. حاجات كتير كتير لسه بنتعود عليها بس الشطارة بقى انك تحاول انك تسعد البنى ادم الى معاك يعنى لو انت بتحبه صحيح تحاول انك تعمل حاجات انت مش بتحبها علشان خاطره ..ولمانت تعمل كدا وهو يعمل كدا الحياه هاتبقى حلوة..يعنى مثلا دلوقتى بحاول انى اغسل رجلى قبل ما انام وبحاول انى احب الشبابيك المفتوحه ومشمش اتعلمت انها تاكل فاكهه واتعلمت شويه انها تبقى وسط الناس وانا برضه بحاول انى ماذيش الحيوانات ..على فكرة فيه قطه ماشيه هناك اهى ...نفسي اهبدها شلوت..رجلى بتاكلنى ..رجلى بتاكلنى !
ميجووووووووو

Tuesday, March 4, 2008

حزمة بقدونس وجزمة صيني

من كام يوم كدة وبعد قحت طويل جه اليوم اللي كنت مستنياه من ساعه ما دخلت الجمعيه، يوم القبض!. كان يوم جميل قوي كل حاجة فيه حلوة والاحلى ان الفلوس كانت جايه. قضبت على الفلوس وكأني لاقيت احلامي الضايعه اخيراً هاشتري الحاجات اللي كانت ناقصه من الشقة وكمان هاشتري هديا عيد الام من غير ماتزنق وشوية حاجات كدة ليا انا وميجو. ماقبضنا الجمعيه بقه

طول السكة وانا رايحه البيت مش بفكر غير في اني هاشترى ايه الاول. وبعدين لاقيت الست بتاعه الخضرة قولت كويس ميجو بيحب الكفته وبما اننا في مناسبه سعيدة جداً يبقى لازم اعمله الاكل اللي بيحبه. قوم روحت اجيب حزمة بقدونس لازوم الكفته خدت حزمة وسألت الست بكام - على اساس اننا كل يوم بنشتري نفس الحاجة من نفس المحل بأسعار مختلفه - قالت ربع جنيه يا عروسة. كلامها عمل زي واحد غلس بيصحيك من حلم جميل قولتلها هو ايه اللي بربع قالت الحزمة يا عروسة - قولت في بالي بلا عروسة بلا نيله بقه حزمة البقدونس بربع جنيه ده العروسة اللي قدامك ديه كانت بتشتري الحزمتين بشلن - المهم سكت واديتها الربع جنيه ومشيت مش خسارة في ميجو ان شالله تكون الحزمة بجنيه حتى. وبعدين انا معايا فلوس الجمعيه.

بس ساعتها كدة حسيت بان في حاجة مش تمام هتحصل. شوية ونزلت انا وميجو علشان نشتري ليا جزمة وشنطة. دخلت محل - في منطقتنا العشوائية الفاخرة - واختارت جزمة بسيطة مفيهاش اي حوارات زحافي قولت هادفع فيها بتاع60 وخلاص مش مهم ماقبضنا الجمعيه. طلبت مقاس37 وسألت اللي بتشتغل في المحل هي بكام قالتي بـ120 جنيه

-جزمة مفيهاش ربع متر جلد مش طبيييييييييييعي ونعل زحافي طوله21 سم بـ120 جنيه -. قولتها اقولك حاجة ما تتعيبهاش شوفيلي حاجة تانيه من بتاعه معدومي الدخل. قالتي عندي حاجة بـ70 قولت ماشي ساعتها اتنازلت عن الموديل قولت اهي طلعت ولا نزلت جزمة. ثم انا بمشي بسرعه محدش هياخد باله

جابتلي جزمة مقاسها38 مستريح قولتها انا عايزها37 قالت ما دي37 قولتها لا ديه واسعه جداً هاتي 6 طيب قالت مفيش اصل الجزم ديه مستوردة، صيني. ما تستغربش لو ده لسه ماحصلش معاك اصل ديه مش اول مرة اخش محل ويقولي اصل الجزم ديه صيني ومقاسك مش موجود بس انا في الاول كنت فاكرة صاحب المحل بستظرف وعايز يحلي بضاعه. قولتها طيب شكراً فميجو قالي طب شوفي الشنطة سألتها على واحدة قالتلي بـ100 قولتله يلا. قالي هاتيها قولتله لا مش عايزة . قالي هتحطي حاجتك فين قولته هاحطها في شنطة نايلو يلا. خدته وخرجت وانا مفش فاهمه ايه اللي بيحصل ده

طيب البقدونس وفهمنا انه بسبب انحصار الرقعه الزراعية وسوء الاحوال الجوية وارتفاع اسعار الاسمدة بقى بربع جنيه طيب جزمجيه مصر راحوا فين. حتى الجزمة يا ربي هالبسها صيني وبـ 120 جنيه. حد يقولي يا جدعان لما الجزمة اللي في رجلي تدوب هالبس ايه؟ مفيش غير الصيني. اشكي لمين يا مصر هامشي حافيه فيكي يا مصر . مابقتش الاقي اللي ليا فيكي يا مصر


Love,

MishMish

Monday, March 3, 2008

انت الى هاتغنى يا منعم


انت الى هاتغنى يا منعم

بعد موجه الاغانى المنتشره هذه الايام ..قررت ان اخوض المجال الفنى بعد ان وجدت العمليه سلطه ..فوجدت ان الحكايه بسيطه خالص ومش محتاجه اى كلكعه ..لقد قررت ان اخوض سلم الفن بباكورة اعمالى الفنيه التى سوف تنافس اغنيه الاطلال وسوف تصبح على نفس مستوى اعمال خالد الذكر سيد درويش لاصبح فنان الشعب بدلا منه ..جاء قرارى هذا بعد ان اكتشفت فى نفسى قدرات فائقه على كتابه الشعر الغنائى الملحمى ،وبالذات الملحمى فهو يحتاج الى فنان ذو قدرات شعريه خاصه والان يبقى ان انتظر حسين رياض او عم جاديليو بعد ان يقابل المايسترو عزيز البريمو كمانجا ليقول لى انت الى هاتغنى يا منعم ..وكلمات هذه الاغنيه عميقه جدا تعبر عن المستوى البؤرى للطبقه من طبقات الشعب الراديكاليه الليبراليه

إدى فى الكلاكس ..يابتاع التاكس

دايب فى غرام حبيبى ..وهو ماشي عكس

سايق عليا دلاله ..ولا جيت فى يوم على باله

وكل كلمه اقولهاله ..يرد عليا ب فاكس

اديله النور العالى ..وقله ان انت ف بالى

ليه تسهرنى الليالى وتخليك انت ريلاكس

اديله اشارة يمين ..ابو قلب فى التليين

خايف يدوس بنزين ..بقساوته كسرلى الاكس

والان اترك لكم التعليقات على هذه الاغنيه التاكسويه المنفصله لانها ذات مرجعيه منفصله من خلال ثلاثه محاور على مستوى افقى يبعد عن القوميه البحته لتعبر عن الغوغاء والدهماء وطبقات الشعب الكادحه ...حد فاهم حاجه ؟؟؟؟


ميجووووو
There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق