Friday, March 14, 2008

رجلى بتاكلنى


مضى على زواجى انا ومشمش 45 يوم بالتمام والكمال وهذه الفتره اشبه بمركز التدريب فى الجيش ..قبل الترحيل الى الكتيبه وكل من يقابلنى يسألنى بصفتى عريس جديد ..ايه الاخبار؟؟.. الجواز حلو؟؟ فلا اعرف اجابه ارد بها عليهم فالسؤال صعب وعويص ..ويصعب الاجابه عليه ..وعشان ماحدش يفهم غلط ويحاول انه يوقع بينى وبين مشمش ويقول انك مش مبسوط من الجواز المشكله مش فى مشمش او فيا لكن المشكله فى الجواز كمؤسسه او منظومه اجتماعيه ..الحكايه انى عشت لمده 32 سنه بطريقه وباسلوب مختلف عن طريقه واسلوب مشمش ومطلوب مننا اننا نتاقلم مع بعض ونصل لنقطه اتفاق وطريقه معيشه مشتركه يعنى مثلا احنا الاتنين مختلفين تماما فى طريقه الاكل ..انا بحب الفواكه والخضروات جدا لدرجه ان مشمش معتقده انها متجوزة ارنب وهى بتحب اللحوم جدا لدرجه الافتراس وبتكره الفواكه كره العمى .. انا بحب ان الشبابيك تفضل مقفوله وهى بتحب الشبابيك تفضل مفتحه .ودى مشكله عويصه برضه يعنى كل يوم الصبح اصحى الاقى الشبابيك مفتوحه عالبحرى ازرجن واتعكنن واقوم اقفلهم كلهم ..تقوم هى ماشيه ورايا ومفتحاهم تانى وهكذا ..اهم نقطه لم نصل فيها لاتفاق هى نقطه الرفق بالحيوان ..فمحسوبكم ميجو يكره القطط كره العمى .واول ماشوف قطه فى اى مكان احس انى رجلى بتاكلنى وببقى عايز الفحها شلوت مش عارف ليه ..ممكن تقولو انى سيكوباتى ..وهى من المناهضين لتعذيب الحيوانات فاكرة نفسها برجيت باردو ومرة قفشتنى وانا نازل على السلم وبدرمغ قطه من على السلم ،كان يوم اسود عليا ،نيجى بقى لنقطه اختلاف تانيه هى انها مش اجتماعيه يعنى مش بتحب الزيارات والمناسبات الاجتماعيه والقعده وسط الناس يعنى ست انهزاميه انطوائيه انبطاحيه ..حلوة انبطاحيه دى .. وطبعا زى مانتو عارفين اول شهر من الجواز بيبقى كله عزومات عند ناس وناس بتيجى عندنا ودى بقى مشكله ..لانى راجل اجتماعى وبحب الناس انما هى براويه فطبعا بتيجى معايا مضطرة عشان منظرنا الاجتماعى مايبقاش وحش ..نيجى بقى لنقطه الاختلاف الجوهريه الى هى البرنامج الموسيقى الى بيشتغل فى الراديو 24 ساعه بصراحه انا بحب الموسيقى جدا بس مش لدرجه ان الموسيقى الكلاسيك تشتغل 24 ساعه لدرجه ان اعصابى رخرخت ومبقتش عارف اسيطر عليها انتو عارفين طبعا تاثير الموسيقى الهاديه بيبقى عامل ازاى.. حاجات كتير كتير لسه بنتعود عليها بس الشطارة بقى انك تحاول انك تسعد البنى ادم الى معاك يعنى لو انت بتحبه صحيح تحاول انك تعمل حاجات انت مش بتحبها علشان خاطره ..ولمانت تعمل كدا وهو يعمل كدا الحياه هاتبقى حلوة..يعنى مثلا دلوقتى بحاول انى اغسل رجلى قبل ما انام وبحاول انى احب الشبابيك المفتوحه ومشمش اتعلمت انها تاكل فاكهه واتعلمت شويه انها تبقى وسط الناس وانا برضه بحاول انى ماذيش الحيوانات ..على فكرة فيه قطه ماشيه هناك اهى ...نفسي اهبدها شلوت..رجلى بتاكلنى ..رجلى بتاكلنى !
ميجووووووووو

5 comments:

^ H@fSS@^ said...

مدونتك/كم
لذيذة
بس فعلا انتوا اتنين متجوزين جدي و لا انت مبتدع الحكاية دي
اصلا حلوة و تنم عن فكر خيالي و مبدع
المدونة حلوة وافكارها مش تقليدية

تحياتي

Migo Mishmish said...

اهلاً
hafssa
احنا فعلاَ لسه متجوزين يوم 26/1. انا بشكرك بالنيابه عني وعن زوجوجي ميجوووو لمرورك وعايزة اقولك اني بحب مدونتك جداً وبفتحها على طول. بس ما ببقاش عارفه اعلق اقول ايه كل حاجة حلوة وجميله. وارجو اننا نبقى صحاب
Love,
MishMish

Desert cat said...

يالهوووووى بتكره القطط
وبتخيطها برجلك اول ما تشوفها
طيب اقولك اسلوبك بسيط وجميل وربنا يخلى لك مشمش ويبارك لكوا فى بعض
اهرب انا بقى قبل ما اخد لى شلوط وادألج من على اسلم
ميااااااااااو
قصدى سلامو عليكو

Migo Mishmish said...

متخافيش يا قطة
من اول ماتعرفت على ميجو وانا الزمته انه يعترف بكل الافعال السودة اللي عملها في حق القطط ويتوب عنها. ودلوقتي بقى كويس وبيحب الحيوانات كمان. انتي عارفه انا عندي كلب اسمه تاتو - انا عارفه ان سيرتهم بتضايقك لكن صدقني ديه اول مرة اربي فيها كلب انا طول عمري قطيطة قديمة- من ساعه ما كنا مخطوبين لغايه دلقوتي لازم يجب لها لبان وشيكولاته
love,
MishMish

Desert cat said...

طيب الحمد لله يا مشمشه طمنتينى وبعدين ربى كلاب براحتك يا قلبى ما انا عارفه هتخافى عليا ومش هتخليهم يهوبوا ناحية القطط
انا عايزة بقى الشكولاتية بتاعتى

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق