Sunday, December 27, 2009

مين الحمار ؟


الأجهزة الأمنية استطاعت مصادرة جميع الموبايلات التى صورت الحمار..
كتابة لفظ الجلالة على حمار يتسبب فى فتنة بأسيوط


مسابقه اليوم : من هو الحمــــــــــــــــــار ؟

1- اللى نشر الخبر

2- اللى كتب على ظهر الحمار

3- الامن

4- اللى صدق الخبر وخدته الحماسه وعلق عليه

5- اللى حاول ينتقم من الاقباط ومن الحمار

6- اللى دخل على اللينك ليقرأ المقال

7- الحمارنفسه

8- جميع ماسبق

اتصل الان على رقم : زيرو تلات رفسات تسعميه ..لتحصل على بردعه هديه وحملين برسيم
تحديث : اتضح ان الشاب عمره 16 سنه وكتب على الحمار ( الله محبه ) والمعروف ان هذه الجمله معتاده عند المسيحيين ..لكن بعض الناس اعتقدو ان كلمه محبه (محمد ) مما اثار الفتنه ..يعنى واد حمار راكب على حمار فقام قابل جماعه حمير مش بيعرفو يقروا ..فقامت الفتنه ..شفتو الهنا الى احنا فيه؟ معلش ياحمار ظلمناك والله اننا شبهناك بناس زى دى على رأى عمو عصام
تحيااتى

ميجو الحصاوى

Friday, December 25, 2009

استغاثه


الى السيد المحافظ والسيد رئيس الوزراء والاب الحنون رئيس الجمهوريه والى جمعيات حقوق الانسان و ذوى القلوب الرحيمه ..استغيث بكم من السيده مشمش زوجتى التى يطلق عليها الناس (المرأة الحديديه ) فهذه السيده استغلت نفوذها وسلطاتها فى تدمير حياتى وتفننت فى الايقاع بى وبايذائى جسديا ومعنويا ..فهذه السيده انعدم من قلبها الرحمه والضمير فمنذ ان تزوجتها من عامين بالتمام والكمال وهى تحاربنى اشد الحروب ضراوة واستغلت طيبتى وسذاجتى لتحطمنى وتكسر كبريائى .ففوجئت بان القلب الطيب والوجه الملائكى الذى خدعتنى به ايام الخطوبه ماهو الا قناع زائف استغلته فى الايقاع بى فى براثنها ..لقد استولت على اموالى وجففت منابع الدخل مثلما فعلت الحكومه فى الجماعه المحظورة ..وبعد ان استولت على اموالى التى جمعتها من كل قطرة عرق وجهد ..اخذت تنفق هذه الاموال على ادمانها ...ادمانها للمنظفات ..فما ان تحصل على مرتبى ..الا وتتجه الى تاجر الصنف بتاع المنظفات وهاتك يا شراء ..اشي بامبرز واشي ايريال واشي صابون وشاور جيل واشي معرفش ايه ..هذه السيده مدمنه للمنظفات اكثر من مدام نظيفه ...وفى احدى المرات كنت قادما من عملى فوجئت بها ممسكه بلاب توب جديد ..فاعتقدت بسبب سذاجتى وطيبتى انه يخص شخص اخر ..وما ان سألتها الا واكدت انها اشترته اليوم فاعتقدت على الفور ان بابا بعت فلوس ..لكن لانى طيب وساذج نسيت ان باباها الله يرحمه ..ونزل عليا الخبر كالصاعقه لما علمت انه من حر مالى ..ولم تكتفى تلك المرأة الفولاذيه بنظام الكفيل الذى تتبعه معى وانها جردتنى من اموالى بل جعلتنى اقوم باعمال سخرة فى المنزل ..فاقوم بغسل المواعين وتنظيف السجاد وتنزيل الستاير وغيره من الاعمال الشاقه المرهقه وتكتفى هى بالجلوس امام اللاب توب ..ولا يكفيها ذلك فقط بل تراجع ورائى فتقول ان المواعين مش مغسوله كويس او انك سايب حراميه لما كنست ..ووصل الامر بتلك السيده انها تسلط عليا ابنتها المفعوصه وتستغلها فى ايذائى فتخيفها وترعبها حتى تجبرها على ان تذهب اليا واحملها واحكى لها حكايات او اغنى لها اغنيتها المفضله (ياصلاة الزين ياصلاة الزين ) فتجد هذه السيده معدوومه الضمير تنكش شعرها وتبرق للبت الغلبانه عشان تجرى تقول بابا بابا وتصبح هى متفرغه لشرب النسكافيه وقراءة الجريده ..اسألو الناس التى تأتى الى منزلنا من يقوم بتقديم المشروبات ؟ من يشترى الطلبات ..من يتم تفتيش جيوبه يوميا ..ارجوكم ياحضرات ..انا لا استطيع مشاهده شوبير او ماتشات الكورة ..لا استطيع حتى الذهاب الى المقهى لمشاهده المبارايات..اصبت بحاله نفسيه سيئه نتيجه للجحيم الذى اعيشه ..ان فروة رأسي اصيبت بقراع عسلى وتعلبه نتيجه هذا الضغط النفسي الرهيب الذى اتعرض له ..هذه السيده تسأل اسئله مستفزة وسخيفه تجعلنى اخرج عن شعورى ..ارجوكم ياحضرات لقد ضاق بى الحال ولم اجد مخرجا حتى الان .فتقدمت بحوالى 120 بلاغ للنائب العام اى انى سبقت مرتضى منصور فى بلاغاته ضد شوبير ..وفى كل مرة يحفظ التحقيق لاسباب مجهوله ..تقدمت بطلبات للاب الحنون بنيامين نتنياهو من اجل التدخل ويعتبرنى مثل جلعاد شاليط ..لكنى فوجئت به يرفض التدخل خوفا من احيائها لمحرقه جديده لليهود ..طلبت اللجوء السياسي والدينى لحوالى 240 دوله واخرها دوله جزر القمرودوله اوزبكستان فرفضو جميعا..اخيرا وليس اخيرا ..انتظر استجابتكم وانتظر قلوبكم الرحيمه لتخرجنى من هذا المعتقل الاسوأ من سجن ابوغريب ..هذا المعتقل يسمى (ابو مشمش ) فى مكان مجهول لا اعلم مكانه بالتحديد ..ارجوكم حاولو ان تنقذونى فأنا اكتب الان بعد ان نظفت الشقه واستغليت انها نائمه هى وابنتها فقد تقوم باعمال انتقاميه ضد مصالحى فى الشرق الاوسط
يانهار اسود ..دى جايه ...اناااااا اتقفــــــــــــشــــــــــــت ..


مع تحياتى
ميجووووووو

Wednesday, December 16, 2009

عم نعيم

كان نعيم هو الابن البكر من بين سبعه ابناء للشيخ الجوهرى .اتى مع والده من اقصى الصعيد الى القاهرة هربا من الصراعات على الارض.استقر الشيخ الجوهرى فى المدينه وأسس بيته الجديد واشتغل بالتجارة .فكان يعيش من دخل محل العطارة .كان نعيم نعم السند لابيه فكان مثل عموده الفقرى .وحمل نعيم على عاتقه دكان العطارة .بالاضافه الى انه كان بمثابه الاب بالنسبه لاخوته الاصاغر .فهيبه الاخ الاكبر فى الاعراف والتقاليد المصريه تكاد تقترب من هيبه الاب . كان نعيم مثقفا ثقافه غير محدوده بالرغم من انه نال قسطا محدودا من التعليم .هذه الثقافه اكتسبها بنفسه من خلال القراءة .ومن خلا تجاربه الحياتيه .وبحكم عمله فى دكان العطارة ولانه امين ومخلص فكان الناس يستأمنونه على ادق اسرارهم فكان هو كاتم اسرار الحى الشعبى الذى يسكنون فيه .كانت رؤيته ثاقبه وحكمته غير عاديه مما جعله علما من اعلام الحى الشعبى . كان نعيم بمثابه تاريخ للمنطقه الشعبيه وكان اعلى الناس ثقافه .كانت تصل الخطابات الى دكان الشيخ الجوهرى ليتسلمها نعيم ويعطيها لاصحابها ويقرأها لهم كما انه كان يكتب الخطابات لهم باسلوبه الخاص حتى انه فى بعض الاحيان يكتب جمل اضافيه من تلقاء نفسه .كان يعبر عما يجيش بصدورهم .
كانت افضل لحظات نعيم هى الجلوس فى الدكان ليلا ليستمع الى اغانى ام كلثوم التى يعشقها .او ليستمع الى الاغانى الوطنيه فهو وطنى حتى النخاع وكان يرى فى عبد الناصر شبه اله . .وبالاضافه الى ذلك يعشق محمد لطيف مؤسس التعليق على المباريات فكان يحب خفه ظله وتعليقاته الساخره . كان نعيم يدير مؤشر الراديو بدقه مثل الجواهرجى وكان يحب ان يمسك بكتاب قديم او مجله قديمه من التى تأتى للمحل لتستخدم فى لف البضائع فيقرأ بنهم شديد. لذك فقد تربى على يد اساتذه الادب والفكر فكانو اصدقاؤه الليليين يأتون اليه حينما تهدأ عمليه البيع والشراء .
وبينما كان نعيم تلميذا نجيبا للنابغين من المفكرين كان ايضا استاذا ومعلما لاخوته الاصغر .كان يشجع عصمت على القراءة فيقوم بعمليه فرز للكتب القديمه والمجلات ويهديها له بالاضافه الى انه كان يشرح له اغوار الكتاب و ينمى فيه روح الناقد والمحلل .فى الوقت نفسه كان يعلم عادل كيفيه ادارة محل العطارة وادارة حساباته فعادل مشروع ادارى ناجح .اما ناصر فتشرب على يديه كيفيه شرح المناهج التعليميه وتوصيل المعلومه باقصر الطرق ليصبح فيما بعد من امهر المدرسين فكان ناصر يذاكر لاخوته الاصغر متقمصا شخصيه نعيم .وتعلم وفيق من نعيم كيفيه التسويق والتعامل مع الزبائن ومتابعه حركات الركود والرواج وكيفيه التعامل مع السوق حتى فى وقت الازمات ليصبح بعدها من انجح رجال المبيعات .اما ناجى ومجدى المتمردين دائما ويحملون افكارا جديده تقدميه تجلعهم فى بعض الاحيان يجنحون بعيدا فكان نعيم يهذب افكارهم ويسشجعهم على التطوير لكن بالتدريج وبحسابات تبعد دكان العطارة عن المغامرة .فدكان العطارة هو العائل الوحيد لهذه الاسرة الكبيرة .وكان نعيم هو نعم الربان الماهر الذى يقود السفينه بمهارة .
استمر الحال على ماهو عليه حتى كبر الاخوة واصبحو من اصحاب الشهادات العليا وتولوا مناصب مرموقه .لكن بدات المشاكل بعد وفاه الشيخ الجوهرى .فلا نعيم يعترف بان طريقته لم تعد تناسب العصر وان اخوته قد كبرو وتعلمو اضعاف ماتعلموه على يده .وفى نفس الوقت يرفض الاخوة اسلوب نعيم فى ادارة الدكان فهم يرون ان اسلوب نعيم عفى عليه الزمن وأن مايصلح للامس قد لايصلح لليوم .مع الاعتراف الكامل بفضل نعيم عليهم .فبدأ الاخوة ينسحبون واحد تلو الاخر وتفرغوا لاعمالهم الخاصه مما جعل نعيم يشعر بانهم ناكرين للجميل فحاول معهم حتى يعودو مرة اخرى للدكان لكنهم كانو يرون ان الدكان مجرد تراث ورمز للكفاح وانه كان مرحله لا تصلح للالفيه الجديده .
الان يرقد نعيم فى البيت بساق مبتورة نتيجه لداء السكرى .ينتظر من يزوره ليحكى له عن تاريخه العريق وعن تاريخ الحى الشعبى وعن افضاله على اخوته وحينما ياتى الليل يمسك كتابه ويدير مؤشر الراديو بحثا عن صوت ام كلثوم او خطاب لعبد الناصر أو حتى مباراة يعلق
عليها محمد لطيف .
ميجووووووو

Monday, December 7, 2009

انفخ الكورة ..فضى الكورة


علاء مبارك مبارك يدلى بتصريحات تهاجم الجزائر





مبارك يطالب وسائل الإعلام بالتوقف عن الإثارة حفاظا على العلاقات مع الجزائر


طب نعمل ايه نفتح الشباك ولا نقفله ؟


تحياااتى

ميجوووووو

Friday, December 4, 2009

شفت العصفورة ؟

بعد معركه ام درمان وبعد الهزيمه ..روحت على البيت مكتئب واجر اذيال الخيبه ..قابلت عم يوسف البرنس صاحب العمارة قاعد جنب باب العمارة بيشرب شاى مع ناس معرفهمش ..قالى ازيك ياخويا ياحبيبى عامل ايه ياميجو ..ايه اخبارك ..معلش ياخويا ياحبيبى على الماتش ..والله كلنا زعلانين ..يالا معلش خيرها فى غيرها ..تتعوض فى البطوله الجايه ..صعدت الى شقتى ولم اخذ بالى من يافطه معلقه فى مدخل العمارة
تانى يوم دارت المعركه الاعلاميه عن الضرب الى حصل فى السودان ...قابلت عم يوسف البرنس عند مدخل العمارة بيشرب شاى مع ناس تانيين برضه معرفهمش ..ازيك ياميجوياخويا عامل ايه ؟ شفت ولاد الكلب عملو ايه فينا ..اتبهدلنا والله ..معلش ياخويا ياحبيبى تتعوض المرة الجايه ..صعدت الى شقتى ولم اخذ بالى من اليافطه المعلقه فى المدخل
تالت يوم ..لقيت البرنس قاعد مع ناس تانيين خالص وبيشرب شاى ..ازيك ياميجو ياخويا ..على فكرة انت حبيبى والله ..ونعم الاخوات ..انا بحبك لله فى الله ..شفت الناس الى ماتت بسبب الانفلونزا ؟ ربنا يستر علينا والله ..المرض ده شكله خطير وومش هايجيبها لبر ..انتهى الحوار ..وصعدت الى شقتى ولم انتبه لمحتوى اليافطه المعلقه فى المدخل ..لكنها كانت مختزنه فى اللاشعور ..وبعد ان خلعت ملابسي ..تذكر عقلى الواعى امر اليافطه ..فنزلت بالبيجامه الى المدخل ..وقرأت المكتوب
نرجو من الساده السكان دفع مبلغ وقدره 500 جنيه رسوم تجديد الاسانسير ..مع ان الاسانسير متركب من سنه واحده بس
رحت لقيته قاعد فى المدخل ..عم يوسف حبيبى ..انا بحبك والله ..شفت العصفورة ؟ ....مش دافع
تحيااتى
ميجوووو

Saturday, November 21, 2009

ارهاصات على هامش المأساة

مستغربين ليه من مشاعر الاخوة العرب نحيتنا. ماهم زينا اتجروا للقومية العربية غصب عنهم. ولما انقضت المصلحة هما فاقوا واحنا لسه عايشين في الحلم العربي
ن
امال فين جماعة الغربان المحظورة الا ماشوفنالهم مظاهرة سخنه على استباحة الكرامة المصرية ولا كان لازم يبقى اسمها غزة علشان نسمع صوتهم. عموماً ممكن بعد مايمسكوا الحكم يسموها غزة الصغيرة زي نجاة الصغيرة علشان عروقهم تنفر ويتخنوا في صوتهم ويعملوا مظاهرات للدفاع عن كرامتها
ن
تعامل الحكومة المصرية مع الموقف لا يختلف عن الطريقة التي تحل بيها المشاكل في عيلتنا: تليفونات كتير ومقابلات في بيوت الاشقاء وبعدين محدش بياخد موقف ويقولك هو احنا هنقطع في بعض وبيفضل اللي في القلب في القلب
ن
هل لو ولاد الريس مكانوش هناك كان رد الفعل هيبقى كدة برضه ولا كنا سمعنا اغاني عن القومية والعربية والشقيقة الكبري و اخوك الكبير يا ولد....و....ووو
ن
نفس الكلام اللي اتقال عن هزيمة 67 -إننا ماتهزمناش علشان احنا ماحاربناش مع ان الحكومة كان عندها خبر ان اسرائيل محضرلنا مصيبة زي ما كان في اخبار عن ان الاخوة الجزائرين خلصوا على سكاكين الاخوة السودانين وبعتوا يستوردوا من الصين علشان يغطوا عجز السوق المحلي عن توفير الاعداد المطلوبة - اتقال عن اللي حصل في السودان. هو احنا كنا مستنين الاخوة الجزائرين انهم لو هيضربوا كدة وكدة يبعتولنا "كلمني شكراً" ويدنوا ميزد كول لو الضرب هيبقى بجد
ن
زعلانين من قناة الجزيرة علشان ما جبتش ولا كلمة عن اللي حصل. هو ايه اللي حوجنا للجزيرة ؟ مش علشان اتعودنا ان النيل للأخبار زي قلتها
ن
تامر حسني بيتكلم عن الوطنية وهو هربان من الجيش
ن
شوبير! في ناس تانيه غيرك على كوكب الارض. كلنا سمعنا مكالمة التليفون يا بيرو - على رأي ميرو: يا عم انت هتمثل
ن
يعني الجزائرين معندهومش غير كام جرنان ومحطة تليفزيون او معندهومش محدش عارف لهم عايشين ازاي وضربونا ومسحوا بكرامتنا ارضية السودان الشقيق امال لو كان عندهم وزير إعلام ووزارة إعلام وقمر صناعي ومحطات فضائية ومحطات ارضيه وجرايد معارضة وحكومية وصفرا ومجلات بالعربي وبالانجليزي والفرنساوي وريادة أعلامية كانوا علموا فينا اية؟
ن
قالك في كتاب العادة الثامنة لستيفن كوفي: لا يستطيع احد ان يمتهن كرامك إلا بإذن منك - ان تعتقد ان المشكلة سببها الاخرين تلك هي المشكلة
Love,
MishMish

Thursday, November 19, 2009

ربنا يسامحك ياشيخ


اتبسطت يابتاع القوميه ...عاجبك الى حصل فينا من (الاشقاء ) ربنا يسامحك بجد ضيعت فلوسنا وجيشنا وولادنا وكرامتنا ..بهدلت شعبك على ناس ناكرة للجميل ..ربنا يسامحك على افكارك واحلامك الساذجه ..ماتش كورة بين اد ايه انك كنت غلبان وساذج ومش فاهم حاجه ..ولو كنت عارف وساكت تبقى مصيبه اكبر ..روح يا شيخ ربنا يسامحك على الى
عملته فينا
تحديث : كتبغا... بلغ البربر الهمج لو حد فيهم اتجرأ على اسم مصر ..او لمس شعرة من واحد مصرى

هاينضرب بالجزمه



ميجووو حفيد قطز

Saturday, October 17, 2009

نظريه ميجو فى التوازن البيئى


زمان لما كنا فى المدرسه درسنا نظريه التوازن البيئى كلنا طبعا فاكرينها ..دى من الدروس المهمه الى درسناها واحنا صغيرين ..النظريه دى بتشرحلنا ازاى الكائنات بتعيش فى توازن طبيعى مع بعض بما لا يجعل الميزان يختل ..فمع كثرة اصطياد الصقوروالقضاء على البوم اتنتشر القوارض وتنتشر الامراض لان الميزان اختل ..ربنا عامل التوازن ده فى حياتنا بما يسمح لكل الفئات ان تعيش بما فيهم الكائنات التى تبدو مضرة لنا ..واذا طغى اى عنصر على باقى العناصر فهنا يحدث اختلال بيئى وتحدث الكوارث وتنتشر الامراض .وكلما زاد التنوع داخل النظام البيئى كلما كان النظام اكثر تماسكا ..واحد يسألنى يقولى وده ايه علاقته بينا ياعم الحاج انت جاى تدينا حصه علوم بيئيه ..فكك من الكلام ده

لو قارنا موضوع التوازن البيئى باللى بيحصل فى مجتمعنا هاتلاقى ان المجتمع المصرى بقى مختل وان اللى بيحصل فيه نوع من انواع عدم التوازن البيئى ..ازاى ؟ اقولك ...المجتمع المصرى طول عمره متوازن يعنى بيستوعب كل الثقافات وبيستوعب كل الافكار وبيفرض شخصيته وكان له كيان ..طب ليه ؟ عشان المجتمع بيقبل وبيحتوى اى حد يدخله فكان المجتمع متنوع ..كنت تلاقى اليهودى والمسيحى والمسلم والارمن والروم والطلاينه واليونانيين ولبنانيين ودروز ووسوريين واتراك (راجع الافلام العربيه القديمه )..لان المجتمع كان متوازن ..فكل العناصر كانت عامله مزيج جميل فى هارمونى رائع .. مكانش فيه مشكله انك تروح محل صيدناوى او بنزايون او انك تسمع فريد الاطرش الدروزى او تغنى مع صباح اللبنانيه ..محدش يفرق معاه ان ليلى مراد يهوديه او مسلمه ..نجيب الريحانى مسيحى ولا مسلم ..المهم فنه كان عامل ايه ..فى الوقت ده كان المجتمع غنى بكل الثقافات الى فيه وكان التوازن البيئى مكتمل فليس هناك اى عنصر طاغى على الاخر ...فكلما زادت وتماسكت العناصر كلما كان التوازن البيئى اكثر تماسكا

لكن مع ثورة يوليو ومع حركات التأميم ومع هجرة اليهود والاجانب فقد المجتمع المصرى جزء من توازنه ...فاختفى كوهين وبقى حسن ومرقص ..لم يعد هناك الخواجه مانولى او يانى

ومع بدايه حكم السادات بدأ الميزن يختل ..فزرع الفتنه بين حسن ومرقص بغباء سياسي لايحسد عليه .وظهر الاختلال بصورة كبيرة (راجع احداث الزاويه والخانكه وتحديد اقامه البابا شنوده وخطابه فى مجلس الشعب واعتقال النخبه )..واستمرت الفتنه حتى الان ...واستمر الاختلال مع انقراض الطبقى الوسطى ...ومع مطارده المثقفين وهجرة العلماء الى الخارج امثال زويل وفاروق الباز والمئات غيرهم فى ايام الهجرة الكبرى الى كندا والولايات المتحده واستراليا ..اصبح الميزان يختل اكثر واكثر ...وزاد نفوذ طبقه الرأسمالين المتزاوجين من السلطه ..ومع انتشار الفضائيات والانترنت وظهور البترول ..زاد نفوذ طبقه المدعوذين الجدد المدعومين من الدول البترودولاريه وانتشر التدين السلفى الظاهرى..تم نقل الكائنات الصحراويه الى البيئه المصريه النهريه ...فحدث الاختلال التام فى التوازن البيئى فانتشرت فى مصر الكائنات الصحراويه ..انتشر بكثافه تزيد عن الحد المطلوب لحفظ التوازن ...وظهرت انواع من الكائنات لا تظهر الا فى وجود المستنقعات والقمامه ( الان فهمت لماذا طالب المتأسلمين بذبح الخنازير..لان الخنازير تاكل القمامه ) .كما ظهرت انواع من الكائنات الطفيليه من معدومى المواهب تظهر فى ذلك المناخ القذر وتظهر وسط المستنقعات (راجع اغانى سعد الصغير وتامر حسنى وبعرور ومصطفى كامل ومذيعين مثل احمد عبدون وتامر امين )..والان مطلوب ان يستعيد المصريين توازنهم البيئى بان تعود الطيور المهاجرة الى بيئات اخرى وان تستعيد الطبقى الوسطى عافيتها ..وان ياخذ المثقفين دورهم ...ليحاربو الكائنات الصحراويه من الزواحف والقورض التى تلتهم الزرع الاخضر فمكانها ليس فى البيئه النهريه المبنيه على ضفاف النيل ..طبيعى ان يقف المثقفين مثل الصقور مفتوحى الأعين يراقبون تلك الزواحف عن بعد ليقضى عليهم ..نحن لا نطالب الصقور بان تقضى عليهم تماما بل تعطيهم حجمهم الطبيعى بما يعيد التوازن البيئى الى مجتمعنا المصرى فلكل واحد دوره فتستمر الحلقه الغذائيه ... لانه كلما كانت العناصر داخل النظام البيئى متنوعه كلما اذداد تماسكا

مجتمع متوازن بيئيا


مجتمع مختل بيئيا

ميجوووووووو

Wednesday, September 23, 2009

تستاهل يافاروق ياحسنى

خسر الوزير فاروق حسنى معركه اليونسكو ..تابعت معظم التعليقات على الخبر ..وجدت حاله فرحه غير عاديه من المعلقين ..الكل شمتان فى الوزير ..تباينت الاسباب ..لكن للاسف معظمها للاسباب التاليه ..اولا بسبب منح القمنى جائزة الدوله التقديريه ..وبسبب هجومه على الحجاب ..ومن الاسباب ايضا انه هادن اليهود حتى ينال المنصب ...ولانه رجل بوليسي لدوله بوليسيه ..اما اعجب الاسباب فاتهمه احد المعلقين انه عمل تمثيليه لاسقاط انف ابو الهول ليسقط عبد الحليم نورالدين ..كما شمتو فى هزيمته لانه قام بترميم كنائس المسيحيين المتهالكه ومعابد اليهود ..وتراوحت التعليقات لكنها تتفق على اساس دينى ..واليكم نماذج من التعليقات فى موقع اليوم السابع
الحقيقه حزنت جدا بعد قراءة الخبر والتعليقات عليه لاسباب عديده
  • حزنت على تعليقات الناس الغريبه وعلى سياسه القطيع التى نتبعها فالكل شمت فى فاروق حسنى لاسباب دينيه
  • حزنت على موقع مصر وثقلها الذى اصبح اخف من الريشه فلم يصبح لنا وزنا اقليميا وعالميا
  • حزنت على ثقافه الناس التى اصبحت فى الحضيض وارجاع فرحتهم فى عدم فوز الوزير الى اسباب سطحيه ..فكل الذى يهمهم هو الحجاب وسيد القمنى ومهادنته لليهود
  • حزنت على وزير لا طال بلح الشام ولا عنب اليمن ..فلا هو ارضى المتطرفين المصريين ..ولا نال رضا اليهود ولا حاز على رضا العالم ..فقد ظن انه من الممكن ان يخدع الناس كلها مثلما يفعل فى مصر ..فهؤلاء الذين ينتخبوه ليسو مثل اعضاء مجلس الشعب الموقر ..فيلقى ببيان يهادن فيه القطيع. ثم تصفيق حاد ..هؤلاء تقدمو علينا بمراحل فلا نستطيع خداعهم بالكلام المعسول او بالبيانات المضلله
  • حزنت على وزير يبحث عن الكرسي الثقافى الاول فى العالم ..وترك ثقافه بلده فى الحضيض ..هادن الاصوليين والوهابيين وتركهم يعبثون بعقول وثقافه هذا الشعب ..ترك يعقوب والحوينى وعمرو خالد وخالد الجندى يشكلون عقول المصرييين ..ترك اللمبى ودبور وتامر حسنى وسعد الصغير يلعبون دورا ثقافيا مهما فى تشكيل وجدان الشعب ..المكتبات اصبحت على يده مملوءة بكتب من نوعيه : عذاب القبر والثعبان الاقرع ..الفتاوى الذهبية في الرقى الشرعية
  • حزنت على وزير لم يكن له موقف واضح فلاهو كسب اليهود ولا هو كسب الاصوليين ولا كسب احترام العالم ..كان الاولى به ان يتخذ موقف ثابت ..لكنه كان يقول كلاما ويتراجع فيه : راجع تصريحاته عن الحجاب وتراجعه عن مواجهه الاصوليين فى ازمه روايه وليمه على اعشاب البحر ثم تصريحاته عن حرق الكتب اليهوديه وتراجعه عنها حتى يرضى اليهود وينال المنصب فقد حاول ان يقنعهم ان الكلام للاستهلاك المحلى فقط ..فكيف لوزير ليس له موقف واضح ان يصبح المسئول الاول عن ثقافه العالم
  • حزنت على مكتبه القنصليه الانجليزيه فى القاهرة وكيف تم اغلاقها بعد تصريحات لمديرها ان الشعب المصرى غير صديق للقراءة ..طبعا لان الرجل مهذب ولم يقل اكثر من ذلك ..فكيف طاوعه قلبه ان يرشح نفسه بعد هذا التصريح
  • حزنت لبقاء الوزير على كرسيه حتى الان مع انه مسئول عن محرقه بنى سويف
  • حزنت لان هناك وزير ثقافه حقيقى فى مصر وهو محمد الصاوى صاحب ساقيه الصاوى التى تعتبر بحق ساقيه للثقافه ..كيف لا يتم ترشيح مثل هذا الرجل حتى الان لمنصب وزير الثقافه

ختاما اقول للوزيرهذا جزاءك وهذه هى خاتمتك ..انت المسئول عن هؤلاء الوهابيين الاصوليين ..انت الذى صنعت هذا المارد بنفسك ..فلو كنت تهتم بثقافه شعبك لما وجدت هؤلاء الوهابيين الاصوليين ولما وجدتهم يشمتون فيك عند خسارتك ..للاسف لم تتعلم الدرس من السادات

تحيااااااااااااااااتى

ميجووووووووووو

Monday, September 21, 2009

على اي حال

الناس عادة ما يكونون غير منطقيين، وغير مدركين لبواطن الامور ومتهمون بما لأنفسهم فقط........ فسامحهم على اي حال

إذا كنت عطوف وطيب القلب، قد يتهمك الناس بالأنانيه وحب الظهور......... فكن عطوفاً على اي حال

إذا كنت ناجحاً، فستكتسب بعض الاصدقاء الطالحين كما ستكتسب اصدقاء صالحين.......... فإنجح على اي حال

إذا كنت أميناً وصادقاً، قد يغشك الناس......... فكن أميناً وصادقاً على اي حال

الذي قد يستغرق منك سنيناً في بناؤه، قد يدمرة لك شخص في لحظة.......... فإبني على اي حال

إذا وجدت السكينه والسعادة. قد يغارون منك.......... فكن سعيداً على اي حال

العمل الصالح الذي تفعله اليوم عادة ما تنساه الناس غداً........... فأعمل الصلاح على اي حال

اعطي للناس افضل ما عندك

لان ذلك في النهاية بينك وبين الله ولم يكن يوماً بينك وبين الناس





People are often unreasonable, illogical, and self centered ............... forgive them anyway

If you are kind, people may accuse you of selish ulteriar motives ................ be kind anyway

If you are successful, you will win some false friends & some true friends.......... succed anyway

If you ar honest and frank, people may cheat you ............ be honest & frank anyway

What you spend years building, someone could destroy over night ............ build anyway

If you find serenity & happiness, they may be jealous ............... be happy anyway

The good you do today, people will often forget tomorrow ............. do good anyway

Give thw world your best anyway

you see, in the end, it's between you & God it was never between you & them anyway



منقول بتصريف من كتاب العادة الثامنة من الثأثير للعظمة - ستيفن كوفي
love,

MishMish

Thursday, September 10, 2009

وصف مصر

انهيارات ارضيه فى باب الشعريه واسيوط ..مياه جوفيه ومياه مجارى طافحه فى كل شبر ..القمامه تغطى الجيزة والاهرامات ومصر باكملها ..انهيارات الدويقه على روؤس الغلابه .. نشرب مياه ملوثه بجميع انواع الملوثات العضويه والكيماويه ..نروى الخضروات والفاكهه بالمجارى ..كوارث يوميه وقتلى على الطرق السريعه والبطيئه تعادل قتلى الحرب العالميه الثانيه ..مقطورات تدهس الغلابه والابرياء كانها دبابات العدو وتكاتك (جمع توك توك ) مثل النمل او الذباب ..رشوة فى كل مكان وفساد منتشر فى كل الجهات الحكوميه والغيرحكوميه ...انفلونزا الطيور توطنت ..انفلونزا الخنازير تحاصرنا من جهه اخرى ..التيفود عاد الينا من جديد مع صديقته الكوليرا لكن الطاعون غار واتى معهم وفايروس سي وامراض القلب والاورام السرطانيه والفشل الكلوى اصبحت امراض مميزة للشعب المصرى ..فئران اكثر من البشر ..قطط وكلاب مسعورة ضاله منتشرة فى كل شبر ...السلعوة لم ترحل بعد ..تأكل فرخه كبيرة الحجم فتكتشف انها كتكوت محقونه بهرمونات وحبوب منع الحمل ..البان ملوثه بالفورمالين ..واصبحنا نشرب بودرة السيراميك ..والبان الاطفال الرضع المدعمه تذهب الى اصحاب محال الحلويات والى اصحاب النصيب .لانشون وبسطرمه مخلوطه بالفئران والقطط والكلاب الضاله ..زيتون لميع ورنيشي اصلى ..علب الزبادى والكشرى تصنع من مخلفات المستشفيات ولو تبرعت بدمك لانقاذ قريب لك تجد المستشفى تضيف سعر الدم على الفاتورة مع انك متبرع بيه .شباب ضائع مغيب يدخن البانجو والحشيش تائه يبحث عن امل فى الحياه غارق يبحث عن طوق نجاه فى مياه البحر المتوسط... مدارس اشبه بالكتاتيب تكتفى بلافته مدرستى نظيفه وجميله ومتطورة وتحيا الوحده العربيه وجو مصر جاف حار صيفا دفيئ ممطر شتاءالمهم تكون حاطط تكت وجلاد على الكشكول .واصبح التلاميذ تائهين بين التاريخ الميلادى والتاريخ الهجرى والتاريخ القبطى .عمليات بيع الاعضاء على ودنه والكل اصبح يبيع كلاويه وكبده وقوانصه من اجل العيش ولو ينفع نبيع اعضاء مجلس الشعب عشان مالهمش لازمه ..طوابير لانهائيه فى كل مكان طابور عيش وطابور فى جميع المصالح الحكوميه طابور معاشات وطابور السنترال وطابور الغاز وطابورالانابيب والطابور الخامس والتجمع الخامس والتجمع الاول ..بلد يصدر الغاز وبه ازمه انابيب بوتجاز ..بلد يستورد فوانيس رمضان وسجاجيد الصلاه والسبح من الصين ويصدر الخادمات وفكر يوما ما ان يصدر الجثث الى ليبيا ..إعلام يحتفى بزغلول النجار وعمرو خالد والحوينى والجوينى والعوا وماهر الجندى وهشام طلعت والشاب تامر وسعد الصغير ودينا الراقصه ويستضيف علماء امثال عبد العال المدلكاتى خبير طب الاعشاب والشيخ سيد مفسر الاحلام الاول فى العالم ..ويحاوره امثال تامر امين واحمد عبدون ..الصحفيون الافذاذ هم ممتاز القط وسمير رجب ومصطفى بكرى وعبدالله كمال .. اصبحنا نصنع تماثيل للمفتش كورومبو و نتجاهل الدكتور احمد زويل مع اننا نتابع تامر وشوقيه .نحتفى بالكابتن ميدو والكابتن زيدان ونهاجم سيد القمنى .لاعبى كرة يتقاضون الملايين من اجل ساعه ونصف من اللعب ويخرج يقول لك انه يضحى من اجل مصر كأن الاطباء او المدرسين او المهندسين او حتى الزبالين خونه وعملاء لاسرائيل ولاتضحك حينما تجد لاعب يقول لك (انما الاعمال بالنيات ).اصبح بعرور هو صوت الشعب ..ونشيدنا الوطنى تحول الى : انا شارب سيجارة بنى ودماغى عماله بتاكلنى .اللمبى ودبور والسبكى وممدوح فرج تاريخهم افضل من سعد زغلول .اغلقت مكتبه المعهد البريطانى بالضبه والمفتاح بعد ان صرح مديرها : اننا شعب غير صديق للقراءة ..واصبحنا شعب صديق للفلاح مثل ابو قردان الذى انقرض ..انقسم الشعب الى فئات وقسائم وفرق وشيع ويتم تصنيف الفرد على اساس فرقته ..بدو ونوبه واقباط داخل واقباط مهجر ومسلمى المهجر وشيعه وسنه وسلفيين وارثوذكس وكاثوليك وبهائيين وبدون ومعلمو الكادر و اطباء بلا حدود وبنى ادمين بلا وجود وفى ملابسنا نرتدى القميص والبنطلون والجلباب الافغانى والعبايه السعودى والبدله الافرنجى والجلابيه الصعيدى والجلابيه البدوى والشادور الايرانى والنقاب والحجاب والبكينى والبوركينى ولاقينى ولا تغدينى ..الكل اصبح يعلن هويته وفئته بوضوح على السيارات وفى المنازل وعلى الرقاب .الاخ يقتل اخيه من اجل 50 قرش واب يقتل اسرته وينتحر لانه خسر فلوسه فى البورصه ..ام تلقى بابنها فى صفيحه الزباله لانها لاتجد قوت يومها ..اطفال شوارع منتشرين فى كل مكان ومتسولين على كل لون ياباتستا يتفننو فى الرزاله حتى يحصلو على المعلوم ..خطاب دينى يكفر كل من هو مختلف معه فى العقيده .يتحدث عن عذاب القبر و الجحيم المخصص للمذنبين .ويهاجم الاخر .شعب يستفتى كهنته ومشايخه فى كل خطوة يخطوها حتى فى تزغيط البط او دخول الحمام بالرجل اليمين او الشمال ..شعب يعتبر النصب فهلوة والرشوة اكراميه ..يسرق ويقتل ويزنى ثم يذهب ليغسل ذنوبه من جديد .اسرق اقتل انهب بس اياك تقرب من الحجاب .شعب يعيش على البقشيش ..وفتح مخك وكل سنه وانت طيب ..احنا شعب 7 الاف سنه حضارة ..النيل ..العراقه ..الاصاله ..خوفو خفرع منقرع والاقصر بلدنا بلد سواح فيها الاجانب تتنفض وتحرم ترجع تانى وتحولت مصر من هبه النيل الى هبه بنت الجيران اللى ماشيه مع طوب الارض مع اننا حصلنا على صفر المونديال وصفر الجامعات ..اصبحنا لانكتفى بقمامتنا بل بدأنا نستورد قمامه الاخرين ..لم نرضي العرب فنحن فى نظرهم خونه لاننا لم نفتح معبر غزة ولو فتحنا برضو خونه مع اننا خضنا حروب وحدنا من اجل العرب ..و لم نتوغل افريقيا مع اننا افارقه ايضا وتركنا دول تلعب فى امننا الداخلى وتعبث بمنابع النيل وباعضاءنا الحساسه ..النيل الذى لم نعد نستحقه ...فلا نحن عرب ولا نحن اقباط ولا نحن مسلمين ولا نحن اغريق ولا نحن افارقه ولا طولونيين ولا مماليك ولا رومان ولا اخشيديين ولا فاطميين ولا بدو ولا صعايده ولامدنيين ولا انجليز ولا فرنسيين ولاعثمانيين ..كوكتيل ..فخفخينا من بتاعه فرغلى
عزيزى ..بعد هذا الوصف المختصر .. فكر قليلا واسأل نفسك ..هل نستحق الحياه ؟
ميجوووووووووو

Tuesday, September 1, 2009

هو انتوا هتفضلوا في مصر لحد امتى؟

زي اليومين دول من كل سنة يجي حد من صحابنا اللي برة سواء إن كان مهاجر او شغال في بلد عربي. وطبعاً نقعد نعد الايام على ما يجي ونوفق مواعيدنا سوا علشان نعرف نقعد ونخرج معاه
كنت ببقى قاعدة مبسوطة قوي وانا بسمع حكاياتهم عن البلاد اللي هما فيها. بس كان دايماً جوايا شعور بإن اللي بيسيب مصر هو الخسران. مرة ورا مرة وسنه ورا سنه الشعور ده ابتدى يبههههههههههت. كل مرة احس فيها ان مصر رجعت حبه لورا وبعدين لورا حبه كمان وورا حبه كمان لغايه لما مبقاش في ورا تاني


اخر حكاية مثلاً قالتها واحدة صحبتنا شغاله في قطر. الحكاية بتقول ايه: بتقول ان مدرسين الفنون (الموسيقى والرسم) مرتبهم الشهري ما يعادل 9000 جنيه مصري. وبيتعاملوا هناك معامله الملوك والرؤساء لان قطر مفهاش كليات فنون ومع كدة ابتدوا يهتموا بتدريس الفنون في المدارس كجزء من نهضه المجتمع


في حين ان ميجو بالصدفه كام من كام يوم كان بيحكيلي انه كان رايح يقعد مع مدرس موسيقى صاحبه فلما دخل لاقى مدرس عربي وهابي ظلامي من اهل الكهف ماسك ودانه وعمال يقنعه ان شغلته حرام لان تدريس الموسيقى تحريض على الفجور. . وعامل يقوله على عذاب اللي بيسمعوا الموسيقى واللي بيعزفوا الموسيقى . فلما مدرس الموسيقى الغلبان قاله انا معرفش اعمل اي حاجة في حياتي غير الموسيقى وإن لاقى اي شغلانه تانيه غير الموسيقى هيسيب التدريس من بكرة
قام صاحبنا مدرس اللغه العربية قاله طالما مش لاقي حاجة حلال يبقى على الاقل ماتدرسهاش يا اخي

وراح باصص لميجو مرة واحدة وقاله مش كدة ولا ايه يا مستر مش الموسيقى عندكم حرام برضه. قام مستر ميجو قاله والله كل حاجة ممكن نستخدمها في الكويس وفي الوحش. وراح قاطم قالي حسيت ان الراجل دماغه مصمته. فيها صبه رصاص
يعني العرب اللي الواحد كان بيقول عليهم همج نضفوا واحنا بقينا نلم زبالات اللي حوالينا والحاجات اللي بطلوها وهانموت علشان نطبقها عندنا وتلاقي الناس فرحانه: هيه هيه هيه هيه هننبقى زي البدو الهمج

تخيلوا دلوقتي مدارس قطر تخرج واحد زي اندريا بوتشلي

ومدارس مصر تخرج الهباب ده



و كل زيارة من صحابنا تنتهي بنفس السؤال: هو انتوا هتفضلوا في مصر لحد امتى؟

Love,
MishMish


Sunday, August 23, 2009

جردل الاسبوع



فيه 3 ماشيين فى الشارع تحت البلكونه بصراحه محتار ادلق على مين فيهم الجردل ...عشان كدا محتاجين تصويتكم على الموضوع دا بسرعه قبل مايهربو



الجردل من نصيب مين ؟


مبررات الجائزه اشتراكه فى الدفاع عن تنظيم الزيتون وتصريحاته الغريبه عنهم

لهروبه من المنتخب

فضيحه الرى بمياه المجارى


ميجو وزوجته مشمش من البلكونه

Tuesday, August 11, 2009

جردل ميه وسخه

قررت ان استغل موقعى المميز فى البلكونه وارجع الى ايام الطفوله لما كنت برمى ميه وسخه على الناس اللى مش بتعجبنى واجرى استخبى ..صحيح كنت بسمع شتايم محترمه بس مش مشكله ...الشتيمه تلف تلف وترجع لصاحبها ..وساعات كنت بتعكش من ابويا لما كان حد بيشتكيله ..برضه مش مشكله .. المهم اريح ضميرى وافش غلبى فى الناس الى كل المنطقه مبتحبهاش ..هانتقم منهم بس اهم حاجه مش عايز نداله وحد يروح يقول لابويا او يروح يقول الراجل اللى دلقت عليه الجردل
واحد اتنين تلاته ...هووووووب ادلق ...اجرى يالااااااااااا


جردل على راس :


حيثيات الجائزة :

وصف شعب مصر بالفاسق والفاجر مع انه هو الذى فسق فى الارض وفجر واستغل الدين فى الدجل والشعوذه

لهذا منحناه الجائزة الاولــــــــــــــــــى لهذا الاسبوع وهى عبارة عن جــــــــــردل ميه وسخه على راسه مهداه من البـــــــــلكـــــــونه ... والبلكونه ترحب بالتبرعــــــات من جميع البلكونات المجاورة ولن نرفض اى جردل ميه وسخه من الجيران

مع تحيااات ميجوووو وزوجته مشمش
ملحوظه : نقبل ترشيحاتكم لجائزة الجردل الاسبوعيه

Friday, August 7, 2009

دكر بط


رن الهاتف المحمول الخاص بالدكتور زويل فى وقت متاخر من الليل ..استيقظ الدكتور الحائز على جائزة نوبل ونظر فى الموبايل فوجد رقم خاص بالرئيس الاميريكى اوباما ..خير اللهم اجعله خير ..الوه ايوة ياريس فيه حاجه ؟ رد عليه اوباما تعالى بسرعه دلوقتى فى البيت الابيض فيه اجتماع مهم ..لازم تحضره بصفتك مستشارى العلمى ..خير ياريس ماينفعش الموضوع يتاجل لبكرة ..بقولك تعالى دلوقتى حالا احنا مش بنهزر ...الموضوع لايحتمل التأجيل ...حاضر ياريس مسافه السكه

انطلق الدكتور زويل الى البيت الابيض لابسا بيجامته واخذ يفكر فى الطريق عن اهميه هذا الاجتماع فمعنى ان الرئيس الاميريكى استدعاه فى هذا الوقت المتاخر ان هناك مصيبه لا تقل عن احداث 11 سبتمبر ...الى ان وصل البيت الابيض ووجد الرئيس ومعه رجال الدوله الكبار منتظرين حضوره شخصيا ..اندهش الدكتور زويل وجلس على مقعده وسأله الرئيس

اوباما : ازاى يافندى يبقى عندكو فى مصر حدث مهم زى دا ومتبلغناش بيه ؟ احنا بنلعب ولا ايه ..انت ناسي انك مستشار البيت الابيض العلمى ؟ وناسي اننا حققنالك كل الى تتمناه شهرة ومجد علمى وسلطه دا غير انك عايش من خيرنا فلوس وفيلا ورصيد فى البنك ..بعد كل دا تهمل فى اداء وظيفتك ؟؟

الدكتور زويل : خير ياريس ليه الكلام دا؟ انا لاسمح الله قصرت فى حاجه ؟ انا شايف شغلى بما يبرضى الله وبعدين انا لولا دماغى برضه مكنتوش وصلتو للفمتو ثانيه مش كدا ولا ايه ؟
اوباما : الظاهر ان ولاءك لمصر مش لينا .
زويل : وايه الى خلاكو تقولو كدا ؟ انا فعلا بحب مصر لكن انا بخدم العلم والبشريه وشايف شغلى معاكو كويس
اوباما : خد اقرا يافندى ..ازاى معلومه زى دى تعدى عليك ؟ طبعا مانت نايم على ودانك
يقرأ الدكتور زويل خبر فى جريده الشروق عن اخر فتوى : http://www.shorouknews.com/ContentData.aspx?id=85452
تزغيط البط حلال ام حرام ؟
اوباما : ها قريت الكلام ؟ ازاى مصر تصنع اليورانيوم المخصب وانت ماتقولناش ؟يبقى عندهم سلاح نووى وانت نايم فى العسل ؟ امال احنا معينينك ليه؟
زويل : الحقيقه يافندم انا مش شايف اى خبر عن الكلام دا ومتهيألى ان لو مصر حبت تعمل برنامج نووى كانت عملته فى السر
اوباما : احنا جهاز المخابرات وجهاز الاف بى اى ..قدرو يحللو الخبر المنشور عن تظغيط البط وفكو الشفرة ..تظغيط البط يعنى تخصيب اليورانيوم ياجاهل ...
زويل : شفرة ايه ياباشا ..دول ناس هبل ..مش لما يحلو مشكله المجارى الاول ..دى فتوة دينيه من واحد فاضي
اوباما : انت بتستهبل ؟ فيه ناس فى الدنيا كدا ؟ انت بتبرر موقفك وبتكذب التقارير الى قدامى ؟
زويل : اقسم بالله ان دى الحقيقه
اوباما : احنا فتحنا القاموس العربى وملقيناش كلمه يظغط ..يعنى ايه يظغط يازويل؟
زويل : عندنا فى الفلاحين(فارمرز ) وفى الصعيد بحطو الفول(بيينز) فى منقار البط ويأكلوه بالعافيه عشان يتخن ويربرب ويرمى لحم
اوباما : دا عدم احترام لحقوق الحيوان .. ابقى فكرنى صحيح ازغط ايهود اولمرت عشان يربرب عشان صحته مش عجبانى اليومين دول
بس انا برضه مش مصدقك ..يعنى كل الاجهزة بتاعتنا كدابه وانت الى صادق
زويل : ورحمه خالى حسن الى مات بالبلهارسيا هى دى الحقيقه ..انا مصرى وعارف الى بيحصل ..انت عارف انى بعد ماخدت جايزة نوبل .حبيت اعمل مشروع اخدم بلدى بيه مشروع علمى يخلى مصر تدخل القرن الواحد والعشرين ..حطينا حجر الاساس ومن ساعتها ولا طوبه اتبنت عليه ..هو انا طفشت من شويه ..كل الى عملوه معايا انهم عملولى موضوعين فى كتاب القراءة بتاع ابتدائى وشكرا على كدا
اوباما : لالالالا اكيد هما حبو يعملو الموضوع دا فى السر
زويل : الناس هناك فى مصر مستنيين ياخدو فتوى على اقل حاجه ..يعنى لما ياكلو لازم فتوى ولما يشربو فتوى وهكذا ...هى دى طبيعتهم
اوباما : يعنى المشروع دا مالهوش علاقه بالنووى ؟ وحياه ابوك يازويل ماتكون بتكدب
زويل : نووى مين ياريس دول عالم عايشه فى الغيبوبه ..دى البيوت بتقع فوق الناس الغلابه والميه بتجيب فشل كلوى والخضار مليان مبيدات والفاكهه فيها هرمونات والزتون بالورنيش والجبنه بالفورمالين والقمح مسرطن وعندهم طاعون وانفاونزا وتيفود ونصهم عنده فايروس سي والنص التانى عنده فشل كلوى ووووو

اوباما : بااااااس خلاص ايه دا فيه بنى ادمين بالشكل دا؟ قطعت قلبى ياشيخ ...مش عارف ليه مصدقك بس لازم نتاكد من الموضوع دا ..معلش الموضوع خطير لان اجهزة مخابرات تانيه بتدعبس فى الموضوع ..اليابان وروسيا والصين عايزين يعرفو ايه النظام ..انت هاتخضع لجهاز كشف الكذب ..هاتو دكر بط بلدى حالا وشويه فول بسرعه

هنا احضر المساعدين دكر بط وفول واعطوه للدكتور وأدارو موسيقى واغانى وطنيه حتى يضغطو على اعصاب الدكتور ..وانطلق صوت شاديه ..ياحبيبتى يامصر يامصر ..ماشافش العناد فى عيون الولاد السمر الشداد ..مع موسيقى رافت الهجان وجمعه الشوان ..كان كوكتيل اغانى تجعل اى مصرى ينهار فى البكاء ...دمعت عين الدكتور وامسك دكر البط من منقاره وفتحه وكبش حبه فول ووضعها فى المنقار وكان دكر البط يفلفص ..كان الجميع ينتظر الدكر ..اذا مات فدكتور زويل خائن ..واذا عاش فكلام الكتور صحيح فمصر البلد الوحيده فى العالم التى تظغط البط ...انتهى دكتور زويل من مهمته وانتظر حتى يكرمه دكر البط ويثبت الحقيقه التى تنتظرها اعتى المخابرات فى العالم وينتظرها اقوى رجل فى العالم
انتظر الجميع لمده 5 دقائق ..الوجوم والصمت يخيم على المكان ..كانت عمليه التظغيط اقسي على دكتور زويل من انتظاره لاكتشاف الفيمتوثانيه ...رجال الامن منتظرين اشارة من الرئيس لكى يعتقلو الدكتور فهم يعتقدون انه يماطل ويكذب عليهم فلم يسمع احد ابدا عن تظغيط البط ..وان مانشر فى الجرائد هو شفرة عن تخصيب اليورانيوم ..وكانت المفاجاه دكر البط مال الى جانبه . ظن الجميع انه سيموت لا محاله ومر شريط مرعب امامه ..لقد تخيل منظر الجنود الامريكان فى ميدان التحرير يعتقلون الناس عشوائيا ..والدبابات الامريكيه تسير بحريه والعلم الامريكى مرفوع على مجمع التحرير لقد تذكر الدكتور منظر اسقاط تمثال صدام حسين ..لكن الدكتور زويل بدهاؤه الشديد تذكر انه نسي ان يجعلدكر البط يشرب وهتف قائلا ...المسقاه بتاع البط يابهااااايم ..اتو بالمسقاه سريعا وشرب دكر البط ...ووقف على قدميه من جديد ..هتف الدكتور ..اهو عايش اهو اهو عاااايش ..كانت فرحته اكبر من فرحه حصوله على نوبل ...هناؤه اوباما على صدقه ..ووبخ رجال سي اى ايه والمباحث الفيدراليه ..وقالهم ابقو اتأكدومن الكلام قبل ماتقولوه ونظلم الراجل ..حسابى معاكم بعدين ..معلش يادكتور احنا مكناش نعرف ان الموضوع كدا ..وتعويضا ليك ...هانديك دكر البط تعمل عليه شوربه وملوخيه ..سلااام
نظر دكر البط الى دكتور زويل مذكرا اياه انه انقذ حياته وانه يجب ان يحفظ الجميل ونظر الدكتور الى دكر البط
واحتضنه على انغام اغنيه شاديه ...ياحبيبتى يامصر يامصر ودمعت اعينهما
ميجوووووووو
من البلكونه

Monday, August 3, 2009

ربنا بيحب عطيات

كانت وصيه صاحب المقهى الحاج عادل رحمه الله الى ابنه بلبل الا يرد عطيات المسكينه ابدا ..كلما تاتى الى المقهى عليه ان يجيب طلبها ..كوب من الشاى بالحليب ..هذا اقصى ما تتمناه عطيات ..كان بلبل لا يزال طالب فى الجامعه ...كان المقهى مزدحما دائما بالزبائن فبركه الحاج عادل موجوده فى المكان فهو يتعامل مع الناس ببساطه وحب ..ولخص عم عادل بساطته فى لافته كبيرة فوق المقهى : فى السماء رزقكم وما توعدون ..


كان عم عادل يبنى مكان لابنه بلبل ليكون مصدر رزق له هو وامه واخته الصغيرة ..ربما لانه كان يعلم ان اجله قريب فهو مريض بمرض مزمن صعب علاجه ..كانت عطيات ذات الملابس الرثه تاتى الى المقهى وتجلس على الرصيف المجاور للمقهى تنتظر كوب الشاى بالحليب ..وبمجرد ظهورها تجد احد العاملين بالمقهى يلبى طلبها فى الحال احيانا قبل بعض الزبائن الذين يدفعون مقابل المشروبات ..كان عم عادل يعرف ان عطيات وامثالها هم سبب الرزق الذى يحل على المكان لذلك كانت وصيته لابنه بلبل ان لا يردها ابداً


مات عم عادل وهو مطمئن على ابنه بلبل فهو قد ترك رجل مسئول عن امه واخته الصغيرة ..وبدأ بلبل فى ادارة المقهى وهو يشعر انه الرجل الاول ..وكان اول اختبار له ..فقد اتت عطيات المسكينه الى المقهى لتنال حظها من الشاى بالحليب ..لكنها نالت مالايرضيها فكان العاملين يهينونها ويسبونها باقذع الالفاظ .. لدرجه ان احد العاملين ساومها ان تذهب معه الى منزله ..حتى الزبائن كانو يشمئزون منها ويسخرون منها ..وكان بلبل ينهال عليها بابشع الالفاظ قبل ان يمنحها المشروب الذى اوصاه عليه الحاج عادل ...كنت اشعر بمدى المرارة التى تشعر بها عطيات ..لماذا نتعامل معها على انها مجرد شيئ .. هل لانها لاترد الاهانه ؟ ام لاننا نشعر باننا افضل منها فقد منحنا الله كل المميزات بينما هى لا ؟ الحقيقه ااننا نشعر فى داخلنا ان الله يحبنا نحن فقط لاننا مخلوقات راقيه بينما عطيات مجرد كائن وليست انسان له نفس مشاعرنا واحاسيسنا ..لم يفكر احد في عطيات ابدا وكيف يمتزج طعم المرارة بطعم الشاى بالحليب ..كل منا يهمه ان يدخن السجائر المستورده ..ويشرب القهوة ويرمق عطيات بنظرة لامبالاة ..نظرة انانيه ونرجسيه ..فلم لا فالله يحبنا نحن فقط ولا يحب عطيات


اختفت عطيات ولم يعرف احد الى اين ذهبت ..هل ذهبت تشكو الى الله قسوة الناس ام ذهبت الى مقهى اخر لتشرب الشاى بالحليب الغير مخلوط بالذل ..ووجد بلبل ان عدد الزبائن قل جدا ..وكان يوميا يتعرض لمشاكل كبيرة من الحى ومن الشرطه وانهالت المصائب عليه من كل صوب وحدب حتى انه فكر فى اغلاق المقهى ..والى الان لايعرف بلبل السبب فى كل هذه المشاكل المتتاليه لانه لم يفهم الى الان ..ان الله كما يحبنا ...يحب ايضا عطيات


ميجووووووووو

Wednesday, July 22, 2009

ايه ده هي البلد ديه رايحه فين



منه لله بلال فضل خلاني اكتب وانا مش عايزة. حد قرا الاصطباحة بتاعته يوم الخميس اللي فات. عموماً هي باختصار عن اتنين مفتيشين جايين من الصحه لكشك بيبع مكسرات في مول -وللعلم المكسرات ديه زيها زي الدهب بتتباع بالجرام - علشان يحققوا في شكوي قدمتها واحدة بتقول انها اشترت منهم كميات ياميش ولما روحت لقت فيه ديدان وأجسام متحركة، وقدمت مع شكواها عينات تأكد كلامها. وطبعاً كان كلامهم مع صاحب الكشك من عينه: "وبعدين على فكرة العينات اللى إنت عارضها أصلاً فيها روايح مش كويسة.. وكمان مش محطوط عليها تواريخ صلاحية.. يابيه مافيش حاجة اسمها فتارين.. المفروض إنك تحط على كل حاجة تاريخ صلاحيتها.. أنا مضطر آخد عينات وأوديها الفحص واشمع المكان وأعمل محضر بالشكوى.." قام صاحب الكشك لما فتح مخه معاهم ووعدهم باللي فيه النصيب. اتغير الكلام لـ "يابيه أنا تحت أمرك.. أنا هاعمل معاك واجب جامد عشان خاطر الحاج بس.. بس أنا معايا زمايلى إن شاء الله.. ولا يهمك يابيه.. ماتشغلش بالك" خلاص كدة
يعني لو كانت الشكوى صحيحه تبقى المسكرات غير صالحة للاستخدام الادمي لو كانت الشكوى كيدية يبقى الست ديه لازم تتعاقب علشان ما ينفعش اي واحد كدة من الشارع يرمي بلاه عالناس
ههههههههههههههههههششششششششششششششششششششششش
بس ده سر زي سر شويبس هايخدة معاه مفتش الصحة اللي معاه زمايله إن شا الله والحج صاحب الكشك للقبر ومنه الى جهنم من غير مقاطعه ان شا الله برضه
طب ما هو ممكن يقول قائل اليامش ولا المكسرات مش مهمه ماله الفول السوداني ياميش الشعب. اقول للأستاذ قائل ده. ان التصرف ده يتقاس عليه كل حاجة تانيه في البلد من اول استيطان انفلونزا الطيور عندنا علشان موظفين الصحه بيجوا ياخدوا المعلوم ويسيبوا ديابها على كلابها ويمشوا. للشركة اللي استوردت القمح الفاسد ومفرقش معاها انها تدفع المعلوم لبتوع الحجر الصحي علشان يقولوا ان القمح سليم لا ده القمح اتقال انه غير صالح للاستخدام الادامي وخرج عادي من المينا واتوزع عالمحافظات لا ومش كدة وبس ده وصلت شحنه تانيه فاسدة من نفس البلد لنفس الشركة في نفس الاسبوع ودخلت البلد برضه من غير اي مشاكل تذكر. للموظفين اللي بيتفننوا في تضيع الوقت من ساعه ما يوصلوا شغلهم الصبح لغايه معاد الانصراف في اي حاجة غير الشغل. لكليات الطب الخاصه اللي بتعمل اعلانات عن انها بتقبل من مجموع 75%. يعني الطالب من دول يبقى متنكد ووشه عليه غضب ربنا ولما تسأله ليه يقولك انا كنت عايز تجارة انتساب لكن مجموعي دخلني طب اسنان. شوفت الارف بتاع البلد ديه ربنا يتوب علينا من مكتب التنسيق وسنينه
تخيل انت لما تروح لدكتور مجموعه ما دخلوش تجارة انتساب
ايه ده هي البلد ديه رايحه فين؟
Love,
MishMish

Tuesday, June 30, 2009

ربنا يديم المعروف

اسف على التاخير ..كنت فى اجازة من كل حاجه ..من المدونه والشغل والحياه ...بفصل دماغى شويه بعد ان كادت ان تنفجر ..فمهنه التدريس من المهن الشاقه التى تستنفذ جميع القوى الممكنه فى الانسان ..المهم ..من حوالى اسبوعين رحت انا ومشمش نزور والد واحد زميلى عشان كان عامل عمليه قسطرة فى القلب ..زيارة المريض واجبه طبعا ..المهم خدت معايا واجب الزيارة ورحت انا والمدام وساندو ..بصراحه زميلى دا طيب جدا ومحترم ووالده كمان ..كانت القعده زى الفل وكل شيئ تمام ..الى ان جاءت نقطه اللاعودة فوجئت بوالد زميلى يتحدث بطيبه عن العلاقه الجميله بين المسيحيين والمسلمين وان جارتهم الست ام بلبل كانت بتعملهم الكحك و ان زمان مكانش فيه اى مشاكل وووو.....كل دا كويس وانا اقوله طبعا داحنا طول عمرنا عايشين مع بعض فى امان وان اعز صحابى مسلمين وان لو فيه فتنه او مشاكل مكناش قاعدين مع بعض دلوقتى وربنا يديم المعروف احنا اهل ..فوجئت بوالد زميلى الطيب بيقولى بس بصراحه فيه عندكو ناس متعصبين اكتر من عندنا وان الكنايس حاطين فيها اسلحه عشان تموتونا ودخل فى سكه ان الاناجيل محرفه وانتو بتقولو ان ربنا تلاته ..الالالالالاه ايه الى بيحصل ياعم منتا كنت ماشي كويس ..طبعا انا مكنتش برد وبسمع بس احتراما لانه مريض واحتراما لانه فى بيته ..تانى حاجه انا مش متعود انى ارد على اى واحد جاهل ودماغه على اده ..طبعا زميلى حاول انه يغلوش على الموضوع وانتهت الزيارة على خير بالاحضان والقبلات وربنا يديم المعروف احنا اهل ..وربنا يشفى كل مريض ومنجيلكوش فى حاجه وحشه ..نزلت مع زميلى الطيب ووصلت مشمش الى البيت واتصلنا بصديق طيب اخر وذهبنا الى احد الكافيهات ..تحدثنا فى كل شيئ وضحكنا للركب ..الى ان جاءت نقطه اللاعودة ..بدأ زميلنا الطيب يفتح معى سكه مش ولا بد بسؤال : انت حاسس بالاضطهاد ياميجو ..طبعا انا رديت ..ربنا يديم المعروف احنا اهل ..لو فيه اضطهاد مكناش قعدنا مع بعض دلوقتى وانا اعز صحابى مسلمين ومصر فى رباط الى يوم الدين ..وهكذا قالى امال انتو ليه بتقولو ان فيه اضطهاد؟ قلتله هو مافيش بالمعنى المفهوم ممكن تقول فيه تمييز يعنى الاقباط بيتعاملو على انهم مواطنين من الدرجه التانيه ...قالى ازاى مانتو واخدين حقكم فى البلد ..قلتله المقصود بالتمييز انه موجه الى فئه معينه زى التمييز ضد البدو وضد المرأة وضد الصعيد وضدك شخصيا كمواطن مطحون واحنا كفئه من فئات المجتمع معرضين للتمييز ..قالى ازاى يعنى ؟ قلتله حاجه بسيطه مثلا : عندك كام نادى فى مصر ؟ قالى حوالى 16 فى الدورى الممتاز ..قلتله فيهم كام لاعب مسيحى ؟ قالى مانت كان عندك هانى رمزى لاعب الاهلى ..قلتله دا من 20 سنه ..دلوقتى بقى فيه كام واحد ..قالى اللعب دا موهبه و ومالهوش علاقه بالدين ..اتحرق دمى وقلت : بذمتك ال 8 مليون ولا ال10 مليون مافهمش واحد عنده موهبه كرة القدم ؟ قلتله بلاش دى : احنا حسب الكلام الى بيتقال اننا حوالى 10 فى الميه من سكان البلد ..مش مفروض ان يبقى لينا برامج مخصصه لينا فى التليفزيون ؟ مش احنا بندفع ضرايب زى بعض؟ قالى بس احنا اغلبيه ..قلت منا مش معترض على انه يبقى اغلبيه البرامج موجهه للمسلمين طب احنا فين ؟ بلاش دى مش عايزين برامج فى التليفزيون ..هانعمل قناه على حسابنا طب ادونا مكان على النايل سات ..لا ممنوع شوفو الاوروبى ..قالى برضه فين التمييز انا مش شايف اى تمييز ..قلتله طب خد عندك دى ..تقبل ان البابا شنوده يطلع فى مقاله الاسبوعى فى الاهرام يقول ان القرأن محرف ؟ دى كانت البلد ولعت وماقعدتش تانى ..تخيل لما الاهرام العريق يدى مساحه للاستاذ زغلول النجار عشان يكتب عن الاعجاز العلمى ..رد عليا : وانت مضايقك فى ايه الاعجاز ..قلت : ياعم حلو يتكلم على اى حاجه تخص دينه انما ايه دخل الانجيل والتوراة بالاعجاز ..يعنى لازم يحبش الموضوع بكلمتين عن التحريف وان الاديان الاخرى مزيفه ؟ ايه علاقه دا بالعجاز العلمى ..رد عليا بحرقه : بس دى حاجات عقائديه ...قلتله انا معاك ان فيه اختلافات عقائديه بس مش مكانها الاهرام او الاخبار او اى جريده قوميه ..طب الناس زعلت ليه من موضوع الكاريكاتير بتاع الدانمارك ؟ والناس زعلت ليه من فرنسا انها منعت الحجاب ماهم برضه عندهم عقيده ..واليهود برضه عندهم عقيده ما عندهم نصوص عقائديه تخص ارض الميعاد ..وامريكا بالمبدا بتاعك احتلت العراق لاعلاء رايه الصليب ..والبوذيين شويه يشتمو فينا ويقولك المسيحيين والمسلمين واليهود مش عارف ايه ...المهم انتهى الحوار على خير ..وربنا يديم المعروف احنا اهل واوعى تزعل ياميجو ...
تانى يوم ..ماتش مصر وايطاليا الكل فرحان بالفوز ..الكل فرحان لان فيه حاجه بننتصر فيها حتى لو انتصار وهمى الناس مبسوطه لان مصر كسبت ايطاليا بطل العالم ..ياحلاوة ياولاد احنا متقدمين فى حاجه اهو ...سيل من التصريحات المقابلات الحصريه ..الكل يتابع اصداء الفوز ..ياتى الكابتن ابو تريكه ليضرب كرسي فى الكلوب : الفوز هو انتصار للاسلام !!!! بتقول ايه ؟ انتصار لمين ؟ يعنى انا كان مفروض اشجع ايطاليا عشان فيها الفاتيكان ؟ ؟؟؟؟ بتقولى يابو تريكه متشجعش مصر ياميجو عشان دا نصر للمسلمين انما انت لا ..انت مسيحى ومالكش دعوة بينا ..طب ياعم ابو تريكه لما اتغلبنا من السعوديه خمسه واحد ..كان نصر لمين ؟ للاسلام بتاعهم ؟ ولا الاسلام بتاعنا ؟ يعنى هما اسلامهم صح واحنا غلط ؟ طب لما البرازيل بتلاعب ايطاليا هل مسيحيه البرازيل احسن من مسيحيه ايطاليا فعشان كدا ربنا اداهم نصرا مبينا ؟ طب لما البرازيل تكسب كاس العالم يبقى انتصار للمسيحيه وقهر للاسلام ؟ ..على العموم ربنا يديم المعروف احنا اهل

Wednesday, June 3, 2009

انا والبطيخ




ما اعظم هذه الفاكهه ..لقد خلقها الله من اجلنا نحن البشر لترطب قلوبنا فى الصيف ..ما اعظمك يارب لانك خلقت لنا هذه الفاكهه الرائعه
........................
انتهت الامتحانات واعمال الكونترول وانا الان فى فترة نقاهه من تعب الدراسه والجرى ورا لقمه العيش ..اعيش احلى ايام حياتى مع البطيخ حيث الانتخه والرحرحه ..مافيش احلى من انك تنام ساعه القيلوله ..وتصحى تجرى على التلاجه وتاخد حبيبتك البطيخه بالحضن ..ترطب جوفك وتروى عطشك ..يجلى الصدر ويعطر الفم كله بربع جنيه ..يالها من منحه الهيه عظيمه للبشر .. وياسلام بقى لما تصحى بالليل مش لاقى حاجه تعملها وتفتح التلاجه مش عارف ليه مع انك مش جعان او مش عطشان .. ..الحل هو البطيخه.. تاخدلك شقفتين على بق واحد وتخش تكمل نومك ..انا من عشاق البطيخ ولى طقوس فى اكله ..وشروط يجب توافرها :


لابد ان تاكل البطيخ وانت لابس الفانله الحمالات مش عارف ليه ؟ بس دا شيئ مهم جدا حتى تكتمل متعه اكل البطيخ

لازم تكون متلجه

لا يحبذ اكل البطيخ على هيئه مكعبات ..لازم يكون على شكل شقق

لازم طرفي الشقه بتاعه البطيخ تكون داخله فى ودانك ..برضه مش عارف ليه

البطيخ يجب ان ياخذ اثره على الفانله الحمالات ..يعنى لازم تبقعلك مالايقل عن 2 سم مكعب من الفانله ..غير كدا فانت لست من اكله البطيخ

اذا اكلت البطيخ من غير صوت ..فانت مش من البطيخيين المحترفين ..يجب ان يصدر صوت بعد كل قطمه هوووووووشت

- من اداب البذر انك لازم ترمى البذر ببقك وتظروط المكان ولا تهتم بكلام نوعيه ان البذر هايلم الصراصير

بعد ان تاكل البطيخ وتدخل تاخد تعسيله ..لازم تصحى تلاقى بذرة بطيخ مابين صوابع رجليك ..وتعد تفرك فيها عشان تنزل وبعد محاولات مضنيه تنزل من بين صوابعك ..هنا تكون متعتك البطيخيه قد اكتملت

بعد كل مافعلته مع معشوقتك البطيخه تحمل نتيجه ما فعلته من زوجتك او والدتك ..وستسمع مالا يرضيك ..و فى هذه الحاله اثبت على موقفك ولا تهتز ..فالبطيخ يستحق ان نفعل الكثير من اجله ..فعندما يقابلك اقرب بائع بطيخ ..اشترى بطيخه جديده ..وحط فى بطنك بطيخه صيفى

ميجووووومن امام احدى شقق البطيخ

هوووووووووووشت

Wednesday, May 27, 2009

Status Update


كنت في مشوار وراكبة المترو. ميجو اتصل بيا لما رديت عليه قولتله: ايوة يا حبيبي
ميجو :انتي وصلتي
انا: لا انا في المترو
ميجو: انت بتسهبلي ايه حبيبي ديه؟!!!!!!!!! الناس تقول عليكي ايه؟
انا: هايقولوا واحدة بتحب جوزها
ميجو: واش عرفك انهم عارفين انك بتكلمي جوزك
انا: مانا لابسه دبله قد كدة
ميجو: مش لازم يكون معناها انك بتكلمي جوزك
انا: مش مهم. هايقولوا عليا بكلم واحد بحبه. الحب في حد ذاته حاجة كويسة
ميجو: بطلي فلسفه! -بزعيق - كلميني لما توصلي ومتتأخريش
يعني مش عيب لو التليفون رن وبصيت فيه وقولت ده سبع البرمبه. تلاقيه غرق لما نزلت في مشوار . مانا اصلي الخادمة بتاعته اللي خلفوه. لكن العيب اني اقول لجوزي ايوة يا حبيبي

طب انا بحب ميجووووووووووو بالعند فيكو وخصوصاً البت المحجبه اللي كانت واقفه جنبي وبصتلي بأرف ومشيت لما قولت ايوه يا حبيبي وبعدين قولت واحدة بتحب جوزها
حضرت انا وميجو مسرحيه "قاعد ولا ماشي" في مسرح الهناجر لطارق السعيد. جميله جميله القاعدة في الاوبرا بعيد عن عشوائية اللي بص لروحه فجأه لقى نفسه كبر فجأه قام اتخض
المسرحيه كانت بتتكلم عن حال البلد والناس اللي عايزة تهاجر
احلى حته موتتني من الضحك كانت واحدة ساكنه في حي راقي وخريجيه جامعه اميريكه وكانت عايزة تهاجر علشان شافت منظر خلالها قرفت من البلد وقررتسيبها ...............وبعد ما طلعت روحنا وهي بتتكلم عن جرح مشاعرها والمها النفسي ...............طلع في الاخر انها شافت واحد بيتف في الشارع
وكان في جزء من المسرحيه مشغلين اغنيه لأم كلثوم وبعدين فجأة تلاقي نفسك بتسمع في الاول خضرتك من خيبتك جرجرتك ........ جوجوجوجوجوجو
حسيت زي مايكون حد راح لازقني حته ألم


روحت مرور البساتين علشان الترخيص وبالمرة اكفر عن ما تقدم من ذنوبي وماتأخر - واللي بيروح هناك هيفهم
اخيراً بقى فيها نيابه يعني مش لازم نروح مرور البساتين ناخد منها ورقه نروح بيها نيابه المعادي نطلع ورقه بالمخالفات نرجع بيها مرور البساتين نحطها مع بقيه الورق

روحنا الساعه 9 الصبح ولفت نظري يفت مكتوب عليها "إذا استغرقت الاجراءات اكثر من 30 دقيقه اتجه الى رئيس الوحدة فوراُ" وخلصنا بسرعه الساعه 2 ظهراً
الحمدلله مكنش عندنا مصلحه مع مدام حنان اللي بتاخد رشوة حتى لو مش هتعملك حاجة كفايه انك واقف في طابور وحدة المرور اللي هي بتشتغل فيها وطظ في رئيس الوحدة
خناقات كتير بتكرر فيها نفس الجمله "انت عارف انت بتكلم مين؟" - مش عارفه طالما كل اللي بتخانقوا مع بعض مهمين امال واقفين ليه في الطابور مع بقيه الشعب اللي مش مهم
ا. خالد على عكس مدام حنان بيشتغل بضمير ومخدش ولا مليم
رخصه سيارة مكتوبة بخط ايد زي الزفت علشان كمبيوتر الحكومة الذكيه عطلان


عملت زي ما قولت في ردي على واحدة مفروسة في البوست اللي فات وطلبت واحدة صاحبتي كنا في المدرسة سوا من اعدادي لغايه لما اتخرجنا من الكليه سوا. وكنت بطلت اتكلم معاها لاني حسيت انها بقت سخيفه من ساعه مابتدت تروح جامع لطيف كدة عندنا ليه الفضل في تحويل المنطقة لقطعه من افغانستان
المهم المكالمة كانت لطيفه وقفلنا على اساس اننا نتقابل قريب
Love,

MishMish

Wednesday, May 13, 2009

اللي ما يشوفش من الغربال يبقى اعمى


لطيف قوي تفسير الداخليه الاوذعيه لتتفجير اللي حصل قدام كنيسة العدرا الزيتون

هايل بصراحة اول ما جم بتوع الداخليه وشافوا التفجير قالك بس اللي علموا كده من المسيحين المتشددين - الاسم الحركي للدهاشنه - علشان يصغروا رقبه الريس ويخلوها زي السمسمه لما يزور امريكا


المسيحين المتشددين - اي الدهاشنة - عملوا زي كوته والست حلويات في فيلم بوحه . حطوا عبوات ناسفه قدام اهم واغلى كنيسة على قلوب المسيحين في مصر علشان يرموا بلاهم عالحكومة مع ان اللي بيقول ان اقباط مصر مضطهدين يبقى كداب كدب الابل

وبعدين بتوع الداخليه دول ماقالولناش المتشددين المسيحين دول ظهروا امتى؟ تنظيم يعني ولا خليه تحت التدريب وده كان اول يوم في العملي عندهم؟ وبعدين مش الاوقع ان المسيحيين المتشددين دول يبقلهم علميات ضد المسلمين بالاولى؟ او ياخدوا منطقه ويعلنوا سيطرتهم عليها زي ما كان حاصل في امبابه زمان؟ ولا هما حبوا يشتغلوا على المستوى المجتمعي الاول - يعني في المجمتع المسيحي - وبعدين لو ربنا وفقهم ينقلوا نشاطهم لبقيه انجاء الجمهورية؟

وبعدين لما اعلنوا الاستنتاج الرهيب ده ورفضته الكنيسة

قالك بس تاهت ولقينها مفيش حاجة اسمها متشددين اقباط يبقى الماس الكهربائي ابن الكلب ده هو السبب. ولانه افتراض على قدر من الهبل محدش رضي يكتب عنه غيرالاهرام

وبعدين لما لاقوها واسعه شوية قالك النهاردة في المصري اليوم: بس ...بس..........بس احنا عرفنا مين اللي عمل كدة الخليه بتاعه حزب الله. هما السبب في كل البلاوي اللي حاصله

مع ان في احتمال ان اللي حصل ده نتيجه طبيعيه إلى إن نسيج الامه الواحد داب وبقى باله و مبقاش ينفع معاه ترقيع ومحدش بقى بياكل من لقاءات البوس العالمي واغنيه اجيال ورا اجيال هتعيش على حلمنا
الوضع كده وصل لمرحلة خطييييييييييييييييييييييرة واللي ما يشفش من الغربال يبقى اعمي يا حكومة
Love,
MishMish

Thursday, April 30, 2009

حرقه دم

اغتصاب سيده عجوز سنها 97 سنه : كان معجب بالطقم ولا ايه؟..الدهن فى العتاقى ...وانا اقول صباح عماله تتجوز عمال على بطال ليه ؟ لا حول ولا قوة الا بالله
حادثه القطاميه بتاعه التريلا : البانجو سيد الموقف
تفويت الزمالك للاسماعيلى : عادى ...واحده وعشيقها متوقعين ايه يعنى ؟؟
استهبال الحكام : بتكلم عن حكام الكورة مش حاجه تانيه ..ماحدش يفهمنى غلط
لا علاوة سنويه ولا اجازة للعمال : الحمدلله مافيش علاوة ..ماهو كانو بيغلو الاسعار بعدها
اعدام الخنازير: ..مع ان الخنازير مبرطعه فى البلد ..لا والى يضحك بقى ان فيه ناس خدتها من ناحيه الدين برضه ..يعنى بعض المسلمين قالت شفتو حكمه ربنا فى تحريم اكل الخنزير ؟ ..طب مالفراخ برضه جالها ..وبعض المسيحيين قالو ازاى يموتو الخنازير .. دا اضطهاد ..
الجزمه الجديده بتاعه مشمش اتقطعت مع ان بقالها اسبوع بس ..
خصم يومين من مرتبى لان طالب عندى زقنى وقالى هاجيب بابا ينفخك ..وانا بقول لكل شاب وكل فتاه ..لو طالب عندك شتمك وضربك ..بوس ايدك شعر ودقن ..وقوله انا اسف حقك عليا عشان ميتخصمش منك يومين
فيلم دكتور سيليكون ..وفيلم علقه موت ...رجعنا تانى للايام دى ؟؟
قضيه حزب الله وتوابعها : ياعم نصر هو احنا ناقصينك؟ روح جاهد فى حته تانيه سيبنا فى الهم الى احنا فيه
الغاء برنامج حمدى قنديل ( قلم رصاص ) : الظاهر خدوا منه البرايه
للمرة الالف فيلم الطريق الى ايلات فى عيد تحرير سينا : ياريتنى كنت معاهم
بتاع السجاد الى تحت بيتنا مصمم برضه ياخد الشارع لحسابه
الراجل صاحب العمارة : كل شهر يلهف مننا فلوس جديده للاسانسير ..قمه الابتزاز
تقليل ميزانيه الزراعه والرى : قال يعنى احنا كنا بنزرع اوى
الداخليه طلبت زياده الميزانيه لمواجه الاضرابات : معاهم حق الاضرابات كترت اوى فى البلد
البامبرز بتاع ساندو بقى مكلف جداااااا ..بفكر اقعدها عالبوووتى من دلوقتى
احمد زويل مستشار لاوباما : احنا مش كرمناه بقى وحطينا موضوع عنه فى كتاب القراءة؟
اتقلبت انا وساندو فى الشارع وايديا ورجلى اتبهدلو من الوقعه بس الحمدلله ربنا ستر... وكله من واحده غبيه ماشيه فى الشارع بتتفرج على المحلات
سعيد البواب فى العمارة الى قصادنا ساب العمارة ومشي بعد ماسرق ممسحه وشرشوبه وجردل تمنهم 45 جنيه
وضرب خمسه جنيه كمان من ساكن كان مفروض يديهم للزبال ..
جارنا الرخم بييجى كل شويه يسأل على الجرنال بتاع النهارده ..طب مايشترى
ميجوووو المحروق دمه

Tuesday, April 14, 2009

امن دوله


بعد ان ابتلع الظابط الشاب حبوب الضغط ..سالته .. يافندم هو مش مفروض تسألو المدرسه وتسألو المدرسين والطلبه الى فى الفصل وتتحققو من الواقعه ..دى تهمه كيديه ياباشا ..رد عليا الظابط الشاب : احنا مش فاضيين للحاجات دى ..احنا بنتعامل مع المستندات والورق الرسمي ..يعنى الولد عمل محضر رسمي ..وحظك انه معملش شهاده طبيه ..دا لو عملها وجاب تقرير فيه اصابه اكتر من 21 يوم علاج يبقى انت رحت فى داهيه ياحلو .....انا عايز اساعدك عشان انت شكلك ابن حلال ..والواد بيفترى عليك ..اصله لما جالى هو وامه حسيت انه بيكدب لانه مكانش فيه اى اصابه وحسيت من كلامهم انهم كدابين وعايزين يقرفوك وخلاص..اصل انا اعرف الاشكال دى من وسط ميت مليون واحد ..الخبرة بقى ...بقولك ايه سؤال بصراحه .. انت مسيحى؟
انا: ودى هاتفرق فى ايه يافندم؟
الظابط :لا تفرق كتييييير ياحلو
انا : قصدك انك ضربته عشان انا مسيحى وهو مسلم؟ .. بس انا ماضربتوش اصلا ولو ضربته هاضربه عشان واد قليل الادب ومش متربى مش عشان هو مسلم ..انا عمر فى حياتى ماتكلمت فى الموضوع دا او اتعاملت على اساس الدين
الظابط : انا مصدقك انك ماضربتوش ..بس لما ييجو تانى هاظبطهملك
انا : ازاى ياباشا؟
الظابط : اول ماييجو تانى هاقولهم ان طرفيى المشكله هايتحولو لامن دوله عشان القضيه خدت بعد تانى ..المدرس مسيحى وانتم مسلمين ..وكدا لازم تتحول لامن دوله ..ودا مش فى مصلحه ابنك
انا : وفعلا الكلام دا؟
الظابط : طبعا ..لو فيه اى مشكله بين مسيحى ومسلم علطول بتتحول لامن دوله حتى لو كانت عاديه
انا : بس انا مش عايز العب بالكارت القذر دا ..دا غير ان الست نفسها ممكن تلعب على الوتر دا وتقول انى ضربت ابنها عشان انا متعصب
الظابط : الغايه تبرر الوسيله ..انت شكلك ابن ناس ..ودول عالم لبط مش هاتسلك معاهم ..يعنى ممكن يتبلو عليك ويقرفوك ..وانت الخسران ..واضح ان ام الواد هى الى سايقه الدنيا وجوزها فى الطراوة ..ممكن تقولك دا المدرس اتحرش بابنى فى الحمام ولا عمل معاه مصيبه ..وساعتها يبقى انت مستقبلك ضااااع ..وحلنى بقى على ماتثبت ..ولو اثبت انك بريئ ..هاتكون سمعتك باظت ..هنا الناس مابتصدق تشبط فى اى قصه ..
انا : يانهار اسود ..دنا مكنتش شايفها كدا خالص ..اعمل الى شايفه ياباشا
الظابط : عليك نوور انت كدا فى السليم ..سبنى اخوفهملك و هاجبرهم على الصلح ..وهاخليهم كمان يبوسو ايدك عشان تتنازل انت عن المحضر ..انا متغاظ من الواد ابن الكلب دا انه قالك ابويا هاينفخك ..امال احنا بنعمل ايه؟ احنا الى بننفخ بس
انا : ولو انى مكنتش احب انى العب بحته الدين دى لكن طالما هايبقى كدا وكدا يعنى ..خلاص
الظابط خلاص روح انت وتعالى بكرة وهاكون ظبطلك المسأله ... بقولك ايه صحيح .. انا عايزك تدى درس للواد ابن اختى هو فى اولى ثانوى ..اصل المدرس بتاعه مش بيشرح كويس ماشي ؟
انا اوكيه ياباشا ..ومتشكرين على المساعده ..
الظابط : لاشكر على واجب ..بس ماتنساش بقى موضوع الواد ابن اختى
خرجت من القسم وقد تغيرت نظرتى الى المتهمين فقد كنت اتعامل معهم بنظرة مسطحه تصدرها لنا وسائل الاعلام ..وتعلمت الا اصدر اى احكام مسبقه على اى متهم ..فلم اكن اعلم ان مشاهده الممثلين على المسرح من وسط المتفرجين مختلفه تماما عن مشاهدتهم من الكواليس ..

Sunday, April 12, 2009

فى القسم -2


انتهى الظابط الشاب من النشال وفتحيه بتاعه الدائرى ..استعديت ان انهض من مكانى ..لكنه اشارلى باصبعه ان اظل جالسا مكانى ..امسك الموبايل وتحدث مع شخص اخر فهمت انها زوجته ...

الظابط : ايوة ياستى عامله ايه؟ ..اه انا لسه فى القسم ..اشكال زباله وشغلانه تقرف ( نظر لى نظرة ذات مغزى ) لا ماتعمليش حسابى على الغدا هاخلص النوبتجيه متأخر ....الواد ميدو ابن الكلب عامل ايه؟ بيذاكر ؟ قوليله ابوك لو جه ولاقاك مش مذاكر وعامل واجباتك هاينفخك ..طيب .......ايه فلوس ايه؟ هو المدرس بتاع الساينس دا مابيشبعش ( حمدت ربنا انى مش مدرس ساينس) هو مش لسه قابض الحصه الى فاتت الهى عزرائيل يقبض روحه ..انا هالاحق على ايه ولا ايه ..اسرق يعنى ؟ طب وحياه امه لاسحبه عالقسم بس لما الامتحانات تخلص ...طيب خلاص بقى ورايا شغل سلام سلام ..اشار لى بالقيام ...وجلس هو على المكتب

الظابط: ايوة ياسيدى

انا : حضرتك انا جالى استدعا عشان فيه محضر معمول ضدى

الظابط : محضر ايه ؟ سرقه ولا قتل ؟

انا : لا ضرب تلميذ

الظابط : هو انت بقى الى ضربت الواد بتاع سنه سادسه؟ اهلا وسهلا

انا : الله يسلمك ياباشا

الظابط : وضربته ليه بقى ؟ مش حرام عليك ؟ كل يوم تموتو عيل دانتو افتريتو قوى

انا : ياباشا انا عمرى فى حياتى ماضربت تلميذ ..بذمتك دا منظر واحد مفترى ؟

الظابط : يعنى هو هايتبلى عليك ؟تلاقيك ضربته عشان ياخد معاك درس

انا : طب اشمعنى هو يعنى ؟ ما فيه غيره كتير فى الفصل

الظابط :طب ماتقول لنفسك ..هو هايقول كدا ليه يعنى ؟

انا : الحكايه كلها انى كنت عندهم فى حصه ..والحصه كان فيها امتحان شهر ..الواد دا بقى كان عاملى زى الفرقعلوز ..عمال يتنطط ويغش من زمايله ..ويغششهم ويستظرف ..كان مبوظ الحصه ..حذرته كذا مره وقلتله يابنى اسكت بدل ماخد ورقتك ..هعمل اكس على ورقه الامتحان ..مافيش فايده

الظابط : تقوم تضربه وتبهدله ..دا عيل يا اخى ..انت ماعندكش عيال ؟

انا :صدقنى ماضربته ..انا نبهته كذا مرة وهو مش عايز يسكت

الظابط : ماتسقطه فى السلوك ..مش عندك اعمال سنه

انا : اعمال سنه ايه بس ياباشا ..دى اتلغت من زماااان

الظابط : مافيش اى عقاب تانى ؟ احرمه من الفسحه او احرمه من الالعاب

انا : لو حرمته من الفسحه هاضطر اقعد معاه دا غير ان ممكن يكون عندى حصه ساعه الفسحه ..ولو قعدت معاه هايطلع عينى عشان يقرفنى ويخلينى احرم اعاقبه تانى ..يبقى انا عاقبت نفسي قبل ما اعاقبه

تقوم برضه تضربه ؟

انا : برضه بتقولى ضربته ؟

الظابط : امال انتو بتعاقبو العيال ازاى ؟

انا : اعاقب مين يافندم ..احنا الى بنتعاقب مش هما ..

الظابط :والله عندك حق ..الواد ميدو ابنى مطلع عينى ومغلبنى معاه مش عارف اعمل معاه ايه

انا : ربنا يخليهولك يافندم

بس برضه تضرب الواد ليه مش حرام عليك ؟

انا : برضه تانى بتقولى ضربته ؟ انا بقول للواد هات بقى ورقتك كفايه عليك كدا ..لقيت الواد بيقولى لا مش هاديهالك ..قمت خدتها منه بالعافيه ..راح قايلى انا هاجيب بابا ينفخك ..انا سمعت كلمه بابا هاينفخك دى واتجننت

الظابط : دا واد مش متربى صحيح ..ازاى يقول للمدرس بتاعه كدا ..جيل اخر زمن ..دا الواحد زمان لما كان يشوف المدرس بتاعه جاى من الشارع دا يعدى من شارع تانى احتراما ليه ..بس مكانش مفروض انك تضربه

انا ::احلفلك بايه عشان تصدقنى ؟ انا كل الى فيها مسكته من دراعه وسحبته على الناظرة وقلتلها انا عايز اشوف ولى امر الطالب دا بكرة

تشده من دراعه ولا تسحله ؟ زى فيلم الارض ..حرام عليك يا اخى ..الاطفال احباب الله ..دا بيقول انك ضربته بالجزمه فى جنبه ..وانك هبدته على الارض سوبر سوفليكس ..داغير انك شتمته وبهدلته واهانت كرامته قصاد التلاميذ

انا : صح يافندم ..ومسكت المطوة وغزيته بيها ..وجبت جاز وولعت فيه ..وبعدين هبدته سوبر سوفليكس ازاى هو انا ممدوح فرج بتاع المصارعه ؟

الظابط : (ينادى على فرج ) الذى اتى مسرعا ..وهنا ارتعدت فرائصى ...وعرفت ان مكانى محجوز فى العنبوكه ..لكن الظابط قال لفرج.. ابعتلى ازازة ميه عشان اخد برشامه الضغط بتاعتى ..وهنا بدا على فرج الاحباط ..وتنفست الصعداء لانى لم اذهب الى العنبوكه

للحديث بقيه

ميجوووووووو

Friday, April 10, 2009

فى القسم


رحت عالقسم ..كان الظابط الشاب الذى يشبه شكرى سرحان فى رد قلبى مشغولا مع احد المتهمين ..قلتله لوسمحت ..لم اكمل الكلمه واشار لى ان انتظر ...كان هناك شخص ممسوكا من قفاه مثل الفار المسلوخ والذى يمسكه على ما اعتقد هو احد المخبرين الذين يشبهون فرج الى اغتصب سعاد حسنى فى فيلم الكرنك ..كان هذا الشخص على مايبدو ..احد اللصوص المبتدئين ..
جلست على المصطبه الاسمنتيه حتى ينتهى الظابط من مهمته ..وكانت تجلس بجوارى احدى الفتيات التى تضع ماكياج صارخ وفهمت من نظراتها انها فتاه ليل ...وجلست اتابع الحوار
الظابط: يعنى مش هاتتكلم ياد يابن التيييييت ؟ وتقول مين الى سرق محل الكهربائى؟
المتهم : والمصحف ياباشا ما انا ..(يصفعه فرج على قفاه صفعه مدويه ..ماتحلفش ياد ياتيييييت)
الظابط طب وحياه امك لاوريك ..بتنكر ياد يابن التيييييت ؟
المتهم :ياباشا لو انا هاقول ..انت عارف انى راجل صريح
(فرج يفاجئه بصفعه على قفاه ...رد عدل يا تييييييت )
الظابط : مانا عارف انه مش انت ياد يابن التيييييت ..قلنا مين الى عمل كدا واحنا نسيبك .. بقى انتو يا شويه تييييييت تسرقو واحنا نشيل قرفكم ؟ طب قولى مين الى سرق الوليه بتاعه المعادى الجديده .. الوليه قالبه علينا الدنيا ..وعايزين نقفل المحضر ..ياتقولنا ياتلبسها انت يا تييييييت ..عشان تعمل فيها راجل
المتهم : والمصحف ماعرف ياباشا ..(فرج يفاجئه بصفعه اخرى على قفاه برضه بتحلف يا تييييييت ؟
المتهم : مانت عارف ياباشا انى لو عرفت مين الى عمل كدا هاقولك علطول ..
الظابط : طيب ..انا هاعرف اخليك تفتكر كويس .. خده يافرج على العنبوكه وخليه يفتكر ..بس اتوصي بيه حبتين
ابتسم فرج ابتسامه تنم عن سعاده داخليه ..وسحب المتهم على العنبوكه) )
قلت فى بالى ..اكيد هو بيعمل معاه كدا عشان مجرم ..انما انا راجل مدرس وهو حرامى
اشار الظابط الى الفتاه الجالسه بجوارى .. وعلى الفور قامت من مكانها واخذت تمشي بطريقه فتيات الليل المعروفه وتلوك لبانه بطريقه
مستفزة


الظابط : ايه يافتحيه ؟ مش هاتلمى نفسك بقى؟
فتحيه : مانا ملمومه اهو ياباشا
الظابط : ردى عدل يا تييييييييت ..هو احنا ماوراناش غيرك ؟كل يوم تشرفى عندنا؟
فتحيه : ياباشا هو ان ذنبى ايه ؟ ولاد الحرام ماخلوش لولاد الحلال حاجه ..انتو الى حاطينى فى دماغكو
الظابط : كنتى بتعملى ايه فى الطريق الدائرى مع الراجل ؟
فتحيه : دا ختيبى ياباشا ..كنا زهقانين وركبنا العربيه وقلنا نتمشي بيها
الظابط : تتمشي بيها على الدائرى الساعه 2 بالليل ياتيييت ؟ وكنتو واقفين بتعملو ايه بقى فى نص الليل ؟
فتحيه : كنا بنسمع نجوم اف ام ياباشا ..اصل البرنامج بتاع اسامه منير كان شغال ..وانا بابا مانعنى اسمع الحاجات دى فى البيت
الظابط: نجوم اف ام يا تيييييييت ؟ ..طب انا هاوريكى النجوم فى عز الضهر .. اتى فرج وحده دون ان يناديه الظابط .. يبدو ان غريزته نادته الى ضحيته الجديده .
الظابط : خد بنت التيييييييت دى لحد مانشوف قصتها ايه
سحبها فرج الى العنبوكه ...
ظللت جالسا على المصطبه الاسمنتيه ..مستعدا ان اعترف على زميلى محمد ابراهيم مدرس اللغه العربيه انه ضرب تلميذا بظهر المسطرة على مؤخرته الشهر الماضي ..حتى لا اذهب مع فرج الى العنبوكه
للحديث بقيه
ميجووووووو

Wednesday, April 8, 2009

ابقى قلهم الكلام دا فى القسم


الساعه 10 وربع صباحا .. الحصه الرابعه فى اولى تانى .. ياااه الجدول زحمه اوى النهارده ..مافيش وقت الواحد يشرب شاى ...دا حتى البريك عندى اشراف فى الملعب ...فجأه جانى عم محمود الفراش : الحق يامستر المديرة عايزاك بسرعه ..استاذ حسين هايقف مكانك فى الحصه وانت روح على المديرة ...خير ياعم محمود فيه ايه ؟ ..والله مش عارف يامستر بس الموضوع شكله كبير دا فيه امين شرطه عندها هناك فى المكتب ..خرجت من الفصل وفضلت افتكر ايه الى عملته ؟ يمكن صاحب البيت عملى محضر عشان مادفعتلوش فلوس الاسانسير؟ ماهو راجل حرامى ومستفز وكل شويه يلم فلوس للاسانسير ..دا لو بيبنى عمارة جديده كان لم فلوسها من زمان... ولا يمكن ضربت عيل من غير ماخد بالى ؟ بس انا طول عمرى مش عصبى وماحدش بيستفزنى بسهوله ..دا غير انى ماضربتش تلميذ ابدا طوال مشوارى التدريسى ..انا بصراحه خفت على العده لا يشيلوها ..مع انى ماعنديش تليفون ؟! ....خدت نفس عميق واستجمعت شجاعتى وقلت انت خايف ليه ياواد ..هو انت غلطت؟ اكيد الموضوع فيه سوء تفاهم ...
دخلت مكتب المديرة ولقيت امين الشرطه ماسك فى ايده ورق وبيكتب فيه حاجات ..قلتله خير ان شاء الله ..قالى لو سمحت امضى على الاستدعاء ده ..قلت استدعاء ايه؟ انا مادخلتش الجيش اصلا عشان تعملولى استدعاء ..قالى حضرتك مطلوب فى القسم ..فيه محضر ضدك انك ضربت الطالب مازن مصطفى فى سنه سادسه اول اثناء حصه اللغه الالمانيه ..اتفضل امضي ..ضربت مين حضرتك ؟ انا عمرى ماضربت طالب ابدا ..! ماتقوليله ياسياده المديرة هو انا عمرى جت شكوى منى ؟!!!! رد عليا الامين : ابقى قلهم الكلام دا فى القسم


للحديث بقيه
ميجوووووو

Tuesday, March 31, 2009

صاحب رأس المال

مقالة بلال فضل الجمعه اللي فاتت هي اللي خلتني اكتب في الموضوع ده
بيتهيألي اكيد عدد كبير مننا اتعرض لمواقف زي ديه. مثلاً
محل ارزاق الموجود في المعادي جراند مول - المكتوب عنه في إيلاف تحت اسم مطعم الارهاب المصري - المحل ده محل وجبات سريعه ومايفرقش اي حاجة عن اي حته تانيه غير انه لما تيجي ساعه الصلاة مش مهم انت وراك ايه ولا واقف من امتى. كل واحد يرمي اللي في إيده ويبطلوا يأخدوا اوردرات ويشيلوا التربيزات بالناس اللي عليها ويقفلوا البيبان لا حد يطلع ولا حد يخش ويوطوا النور ويفرشوا الحصر ويصلوا كلهم. الموضوع ده بياخد اد ايه يا عم. يأخد نص ساعه نقل وتتضليم وفرش حصر وصلاة ولم حصر ورجوع تاني لأماكنهم
لا ومش كفايه كدة لا دانت لو طلبت بيبسي او كوكا في الاورد تلاقي الراجل بصلك بصه تحسسك بجرمك وكفرك البين ويقولك بصوت جهوري حجنوري مفيش غير شوبس او مكه كولا
فرعهم الجديد اللي في مصر حلوان بقه مختلف شوية. كنت ماشية ناحيته انا وامي واصرت انها تعزمني على الفطار هناك. قولتلها كوك دور وبتزا بلس مفيش بينا وبينهم خطوتين والتاكسي على حسابي
امي: ما خلاص ماحنا جنبه
انا: انا عندي مبدأ ومبحبش اتعامل مع العالم ديه
امي: بلا مبدأ بلا نيله. وبعدين مفيش دلوقتي وقت صلاة
انا: يعني انتي عارفه هي الصلاة امتي
امي: يعني انتي طارشه. انتي سامعه صوت ادان
انا: لا
امي: يبقى مفيش صلاة
انا: براحتك
ودخلنا لاقيناهم مشغلين قناه المجد ومفيش حد يأخد اوردرات ولما سألت قالوا علشان الصلاة. وبعدين رجعت الترابيزة
امي: إيه؟
انا: بعد الصلاة
أمي: صلاة ايه؟
انا: أساليهم
شوية والادان ادن قولنا يا فرج الله. وبعدين لاقيتهم واقفين مكانهم مفرشوش زي فرع المول. قولت ياد النيله لسه هنستنى لما يفرشوا
انا: ماتيلا نمشي ده سكتهم لسه طويله. ده احتمال يبقى غدا مش فطار
امي: خلاص قربوا يخلصوا
انا: هما لسه ابتدوا
امي: انتي زنانه قوي
انا: طيب
بعد نص الساعه من كلام العمال مع بعض وخروج اتنين تلاته من المحل ورجوعهم تاني. لاقيت الراجل ابتدى ياخد اوردرات. أمال الصلاة فين؟ الا ما حد ساب مكانه. وطول الوقت عمالين يرغوا
انا: يعني معلمين اللي جابونا الادب ومحدش منهم حتى راح غسل وشة
وموت من الضحك وقولت لأمي احسن. قاتلي خلاص مش هانجي هنا تاني. وبعدين بعد ماجه الاوردر قالتي ده حتى اكلهم زي الزفت وفضلت تبرطم طول القعدة. قولتلها ما كان من الاول
وده نفس اللي بيعلموه التابعي شارع 9 ساعه صلاة الجمعه يقفلوا المحل ويقفوا قدامة لا بيصلوا ولا هما فاتحينه
موقف تاني حصل مع واحد قريبي. كان داخل سوبر ماركت عادي فاتح ساعه الصلاة وفيه واحدة محجبه بتشتري حاجات. قام قريبي ده منزل اللي هو عاوزة -حاجات قيمتها اكتر من 100 جنيه - وجه يحاسب
البياع: بعد الصلاة يا بيه
قريبي: هو انت مش شايفني عمال اشيل واحط من الصبح ماقولتش كدة من الاول ليه؟
البياع: والله ديه تعلميات صاحب المحل
قريبي: طب والست اللي كانت بتشتري حاجات من شوية
البياع: ديه كانت بتشتري شيبسي وحاجات بجنيه ولا اتنين
قريبي: طب هو انت مشكلتك في قيمه الحاجات اللي بتتاع يعني الجنيه مش حرام والـ 100 جنيه هي اللي حرام. ولا في مبدأ الببيع نفسه. ما هو جنيه زي ميه!!!!!!!!!؟
البياع: والله ديه تعليمات صاحب المحل يا بيه
قريبي: طب قول لصاحب المحل اني انا ومراتي كنا بناخد حاجتنا كلها من عندك وبطلنا خلاص
البياع: يا بيه ما يصحش. طب قول انت عايز ايه وانا اوصلك الحاجة لغايه العربية
قريبي سابه بيرغي ومشي وراح اشترى من محل تاني
حادثه تانيه حصلت معايا. كنت نازلة اشتري هديه: صليب دهب. دخلت محل صاحبه مسلم ومش حاطط صلبان في الفاترينه فقولت اكيد مش عنده. بس اخويا - كان معايا ساعتها - قال لا ده عنده حاجات حلوة جوة. دخلت الراجل كان في منتهى الذوق واعتذر لأخويا وقاله انت عارف انك زبون المحل لكن الصلبان كلها خلصت في الكريسماس وراس السنه والعيد فاضل عليه يومين زي مانت عارف. بس انا جيالي تشكيله كويسة كمان يومين. مكنش عندي وقت اجي كمان يومين فقولت لآخويا لا اكيد هنلاقي
دخلنا عند واحد مسيحي عندك صلبان يا عم قال اه. قولناله طب عايزين نتفرج. قال من عيني بس عن اذنكم ده وقت غدا، اتفضلوا معانا، 5 دقايق واكون خلصت. قولت يمكن جايب علبه كشري ولا سندوتش اي حاجة
قلت لاخويا خلينا قاعدين الخمس دقايق. لاقيناه طلع شنط شنط شنط اشي شورية سي فود وجمبري ورز بالسمك وايه بوفيه مفتوح يا معلم
طبعاً لطع اللي جابونا بتاع 15 دقيقه فوق الـ 5 دقايق الاصليين وبعد ما خلص وشرب الشاي. طلع الصلبان فالحاجة اللي عنده مكنتش قد كدة. وقعد يقول انا بيبع الصلبان خدمة!!!!!!!!!!!!!؟ ومبكسبش فيها. اصل انت لما تخش عند اي محل هنا وتسأله تلاقيه بيقولك انا مبشتغلش في الحاجات ديه. ومضيقين عليا وبيحاربوني
طبعاً انا فصلت منه من ساعه ما قال انه بيبيع الصلبان خدمة. اصل خدم ديه معناها عندنا انه بيعملها مجاناً. وقولتله هو مفيش حاجات ذوقها احسن من كدة؟ قالي لا الحاجة معظمها خلصت في الكريسماس لكن في حاجات كويسة جايه كمان يومين
قولتله ولا يومين ولا تلاته هات الصليب ده. قولت في عقل بالي الصليب في الاول وفي الاخر دهب لو عجب الناس يبقى كويس معجبهمش يرحوا يبعوه ولا يغيروه
خرجت عنده وانا مضايقه من اللي بيحصل. اخش محل تلاقي اللي فيه مربي دقنه لغايه نص بطنه اقوله صباح الخير يا ميردش يا يقول وعليكم السلام. ده غير طبعاً اللطعه بتاعه الصلاة ده موضوع تاني كبير
اخش عند واحد مسيحي يكون دمه تقيل عامل زي الطحينه وكل اما اسال عن حاجة مالاقيهاش والحاجة عنده تبقى اغلى من برة ربع جنيه ولا نص جنيه.وطبعاً لما يشوف الصليب يقعد يشتكيلي همه من ان محدش بيشتري منه وان المحلات اللي حواليه عايزه يقفل
هي الناس ديه مبتفهمش. صاحب راس المال الفعلي هو اللي بيشتري مش صاحب المحل. انا لو عايزة باكو شاي هشتريه ان مكنش من فلان يبقى من علان. انما الفكرة فلوسي راحت لمين
مش المفروض اني اشتري من محل صاحبه بيعاملني باستحقار ولا يلوي وشه في وشي حتى لو اللي عنده مش موجود في اي حته تانيه.
ولا المفروض لاني مسيحيه اشتري من محل مسيحي معظم الحاجة اللي فيه اسعارها زايده علشان هو مضطهد. في حين ان الحقيقه انه جشع.
انا مقدرش اعمل حمله شعبيه لمقاطعه الهبل ومحلات القتنه الطائفيه. انا عن نفسي مبشتريش من اي محل برفض يشغل ناس بسبب انتمائهم الديني اياً كان مش بسبب عدم كفائتهم.
اللي مش عايز يبع ساعه الصلاة يقفل مش يبقى فاتح لكن مش بيبيع. او ما يفتحش حاجة خدميه. محل اكل يعني الناس داخله عايزة تأكل دلوقتي مش بعد الصلاة
اللي حاسس انه مضطهد - لو كان صحيح - يحاول يجذب الزبون بأي طريقه. انا عن نفسي عندي استعداد امشي 100 متر لمحل بيبع الحاجة ارخص من المحل اللي تحت بيتنا لانها بتجمل ده علم اسمه التسويق مش يقعد يندب
بلاش ندي فرصه للعالم ديه انها تزيد. مش من مصلحتنا ان المسيحين يشغلوا مسيحين والمسلمين يشغلوا مسلمين
علشان انا قلبي حاسس باللي هايحصل: الغرض الاساسي من البوست ده محاربه سلوكيات خاطئة ستكنا عليها بدافع الخوف او الاسحتسان الغير المعلن او العيب لغايه لما الموضوع خرج من ايدنا
لا اقصد الإساءة لأي دين على حساب اي دين واروجو مرعاه ذلك في التعليقات
Love,
MishMish

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق