Thursday, February 12, 2009

ربنا مايقطعلنا عاده

اخيرا بعد عامين من الرعب تم القبض على سفاح المعادى ...اخوكم ميجو اتأذى جدا من هذا الوقح ..طبعا عشان محدش يفهم غلط ..الاخ ده تخصص ضرب مؤخرات الفتيات ..واخوكم ليس فى مؤخرته اى شيئ مغرى بالنسبه للسفاح ..انا بقى اتأذيت منه لان الاخوة الافاضل بتوع المباحث وزعو صورة مرسومه وتخيليه للسفاح المجرم الشنقيط ..شاب رفيع يرتدى كوفيه ....شكله يشبهنى ..وطبعا كل ما امشي نص متر الاقى المخبرين يوقفونى وفين بطاقتك ورايح فين وجاى منين ؟ دا غير انى كل ما امشي فى الشارع الاقى البنات تعدى الناحيه التانيه ..مايمكن اكون السفاح ..ماهو اى واحد رفيع لابس كوفيه ممكن يبقى هو ...المهم ربنا ستر ومحدش من الساده الافاضل بتوع المباحث حب يعملنى كبش فداء عشان يظهر هو ويشتهر انه قبض على السفاح ..وانا بقى على ماثبت انى مش السفاح هاتكون وكالات الانباء ظاطت والعاشرة مساءا و 90 دقيقه والكورة مع شوبير ويطلع مرتضى منصور يقول : الواد ميجو السفاح عندى ملفات ليه وصور قليله الادب ..وان ممدوح عباس هو الى مموله.. كله هايظيط فى الزحمه وتبقى قضيه راى عام ..وما ادراكم بقضايا الراى العام ..الى خلا هشام طلعت مصطفى ماعرفش يفلفص لغايه دلوقتى يبقى انا هاعرف ؟ ..
المهم بقى... اللى لفت نظرى فى الموضوع كما ذكر فى المصرى اليوم : القبض على سفاح المعادى بعد سنتين .. اثبتت تحريات المفتش كرومبو ان السفاح يمارس العاده السريه بكثرة ويدخن بشراهه ..وتم القبض عليه اثناء ممارسه العاده السريه فى منزل تحت الانشاء ..انا بقى عايز اعرف اثبتت التحريات ازاى انه كان بيعمل الموضوع دا بكثرة ؟؟؟ على طريقه عبد المنعم مدبولى : ايوة ليه هما نايمين لحد دلوقتى؟؟ يعنى مثلا المخبر الى كان قاعد تحت بيتهم فضل مستنى على القهوة لحد مانور الحمام يولع؟ويفضل يعد فى النوته بتاعته ؟ ولا اتشعبط على المواسير لحد ماوصل لشباك الحمام وعرف واتاكد بنفسه؟ يانهار اسود طب ماهو نسبه كبيرةمن شباب مصر بيعملو الموضوع دا وبيشربو سجاير ..طب و لما هما كانو عارفين انه السفاح ..سابوه الفتره دى كلها ليه ؟ يمكن عشان يعدو وراه هو عمل الموضوع كام مرة؟ ولا عشان يظبطوه متلبس بممارسه العاده السريه؟ ولا يمكن عشان تنهار قواه فيسهل القبض عليه؟ ..او يمكن مستنيينه انه يتخطى العدد القانونى للمارسه فيتاكدو فعلا انه السفاح ويتم تقفيل قضيه مظبوطه مافهاش ثغرات؟؟ ... انا بجد هاتجنن ..يا اما الى قال الكلام دا عبيط ..يا اما الناشر عبيط ..يا اما انا بقى اللى اعبط من الاتنين ...
اعتقد ان الحكومه زهقت من موضوع المختل عقليا ده ..فاكرينه ؟؟..بتاع بنى مزار و بتاع اسكندريه الى بيقتل الناس فى الكنايس والمختل بتاع بورسعيد الى حاول يعتدى على الريس ..وو....فحست الحكومه ان الموضوع دا موضه قديمه والصحافه مش هاتسكت..وقالت نخترع موضوع جديد ..
.تخيل بقى لما تغيرالصحف مانشيتاتها حسب توجهات الموجة الجديده : اثبتت التحريات ان هشام طلعت كان مدمن ممارسه العاده السريه مما تسبب فى مقتل سوزان تميم
نبيل البوشي انفق اموال المودعين على ممارسه العاده السريه
ممدوح اسماعيل بريئ من تهمه ممارسه العاده السريه ..وان القبطان هو الذى كان يمارسها وكان قد نسي الحنفيه مفتوحه مما اغرق العبارة
اسرائيل : لن نتوقف عن ضرب غزة مالم يتوقف الفلسطينيون عن ممارسه هذه العاده "بحماس
ركبه ابو تريكه المصابه بريئه من هذه العاده
اثبتت الابحاث ان انفلونزا الطيور انتشرت بسبب ممارسه الطيور لهذه العاده
هزيمه نادى الزمالك من فريق بنى عبيد وشيكابالا "يتلاعب" "باعضاء" المجلس
ماهذا الاستمناء الصحفى والحكومى ؟؟ هل لاننا شعب مازال فى طور المراهقه..يعشق النميمه والجلسات السريه لنستمتع بحكايات جنسيه رخيصه ونظهر فى العلن لنقول ..استغفر الله العظيم دا من غضب ربنا علينا ؟ ..لقد كشف هذا الشاب لنا اننا شعبا وحكومه مازلنا مراهقين فكريا وسياسيا ..نعشق روبى وهيفاء وهبى فى السر ..لكن فى الجلسات العامه نقول فين الاخلاق ؟ هما البنات دول مالهمش اهل؟ بينما نحن نتلذذ بمشاهدتهم ونلهث وراؤهم فى القنوات الفضائيه ..ايضا الحكومه تفعل ماتفعل فى جلساتها السريه لكن تصريحاتها مختلفه على صفحات الجرائد ووسائل الاعلام ...فتجد الوزير يستورد اغذيه فاسده فى السر ..لكن يصرح للصحف ان هذه شائعات مغرضه ..اليس هذا استمناء وزارى ؟ فلتحاكمو هذا الوزير ايضا ..وايضا الوزير الذى يشترك مع نصاب فى السرفى خداع الضحايا ويحاول ان يبرئ نفسه
مثل المراهق الذى ينفى عن نفسه تهمه تدخين السجائر امام والده ..والوزير الذى يبيع اراضى الدوله للمعارف والمحاسيب فى السر ..والوزير الذى يستورد مبيدات مسرطنه برضه فى السر
قبل ان نحاكم هذا الشاب فلنحاكم انفسنا ...لاننا شعب ادمن العاده السريه ....وربنا مايقطعلنا عاده

Wednesday, February 11, 2009

امال لو كانت دولة دينيه كان حصل ايه؟

شدني قوي تعليق كن جميلا على البوست بتاع اول دير اسلامي في مصر
تعليقه كان بيحتوي على العبارة ديه "ميجوو أعتقد لو الإسلام حكم فعدل فكون مجتمع حر العقيدة فلن تكون أنت حزين لذلك بل أعتقد شخص مثلك فاهم سيكون أول المؤيديين للنظام الإسلام في هذا الوقت"

لا...........لا خالص يا اخ جميل محدش هيفرح لو مصر بقت دولة دينيه (اياً كان الدين ده) يعني انا مسيحيه واول واحدة هارقع بالصوت لو مصر بقت دولة مسيحيه. اي دولة لو اتحولت لدولة دينيه لازم مواطنيها ينقسموا لمواطنين درجه اولى ومواطنين درجه تانيه وش كدة..ومش ممكن هيبقى في مجتمع حر العقيدة ابداً لان في واحد هيبقى مؤمن بدين الدولة وده اللي هيبقى المواطن المثالي وفي مواطن تاني اتجرأ وامن بدين تاني غير دين الدولة وده مواطن مشكوك في انتماءه وحبه للوطن وفي مواطن تاني مؤمن بدين دولة عدوه زي اسرائيل مثلاً وده هيقى مواطن ابن كلب خاين وهيطلع تلاته تيتتتتتتتتتتتتتتتتتتت اهله
اما القانون المصري المفروض انه قانون مدني ومفهوش اي حاجة تشير الي الدين غير المادة التانيه اللي بتقول ان الاسلام دين الدولة وهو المصدر الرئيسي للتشريع ومع كدة طالع دينا بالكلمتين دول. خد عندك عل سبيل المثال لا الحصر
قانون زراعه الاعضاء مش عارفين نوصل فيه لبر مش علشان احنا معندناش الكفاءه الطبيه اللازمة ولا التقنيات لا ده علشان اللي بيناقشه مجموعه من الجهله طول الوقت عمالين يقولوا قال الله وقال الرسول وهما لا دكاترة ولا بيفهموا بس عايزين يحرموا الدنيا عالناس واي حد فيهم لو جراله حاجة عنده استعداد تتعمله عمليه زرع اعضاء من خنزير حتى بس المهم يعيش. واللي محتاجين زراعه اعضاء اللي منهم معهوش بيموت واللي معاه بيروح يعملها بره عند اناس معندهومش نفس الكفاءة الطبيه والنتيجه بتبقى مواطن مريض مرض مزمن وفلوس خرجت بره مصر في عمليات فاشله وعلى مصر انها توفر علاج بملايين لعلاج الاثار الجانبيه للعمليات ديه

قوانين الطفل وخاصه الجزء الخاص بنسب الطفل الناتج عن علاقه زنى موقفينها وحجتهم غبيه زيهم ملخصها انك لو حلت ليهم المشكله ديه يبقى انت بتشجع الزنى. يعني واحد وواحدة يغلطوا والاجهاض ممنوع يقوم طفل برئ مالوش ذنب في حاجة يفضل شايل عار اهله طول عمره ومتطلعلهوش شهادة ميلاد وبالتالي ما يطعمش وما يخشش مدرسة ويستنوا البيه اللي اشترك في نص الجريمة اما يعترف بيه علشان يتعاملوا معاه على انه انسان مش حاله. واظن انت فاكر كويس الست اللي قتلت ابنها او بنتها اللي كان عنده 6 شهور بايدها لانها مش عارفه تطلعله شهادة ميلاد ولا تطعمه. ايه رايك في الطفل ده لو يكبر وبقى راجل كبير وهو اتربى على انه شخص غير مرغوب فيه. مش هاقولك هيبقى زويل ومجدي يعقوب هاقولك هل تضمن انه ما يلفش نفسه بشوية ديناميت ويفجر نفسه في مكان ممكن انت تبقى موجود فيه بمحض الصدفه. لرغبه منه في انه يتقرب من ربنا اللي فهموه المسئولين عن شريعته انه غضبان عليه او رغبه منه في انه ينتقم من المجمتع اللي مارحمهوش. ببصراحه انا اخر واحده احب ابقى موجودة مع شخص زي ده في بلد واحدة. والست دايماً بتسيل معظم اللوم لوحدها والراجل اقل واحد ممكن يقع عليه الضرر وده لو اتمسك في حاله تلبس
. وعلشان اوفر وقتك ووقت الناس علشان ما نقعدش نسفسط في موضوع اصل لو كان حد الزني كان بيطبق مكنش ده حصل هاقولك خد اتوبيس واطلع عالسعودية اللي بطبق الحدود بحذافيرها وزيادة شوية والغريب يا اخي انك مش هتلاقي مجمتع ملائكي ولا حال البلد معدول وكل اللي هتلاقيه اشخاص عاديين الكويس منهم كويس والغلطان منهم غلطان لكن الحاجة الزيادة اللي هتلاقيها هي الازدواجيه اللي عايش فيها الشعب كله



قضايا الحسبه اللي بيرفعها شيوخ بيعانوا من صعوبه في التعليم وضعف في الادراك على كل واحد بيحاول يستخدم دماغه او يبدع

وقوف الدولة بكل اجهزتها ضد اي شخص عايز يغير دينه من دين الدولة الي دين تاني حس انه لاقي نفسه فيه اكتر.يعني ايه الدوله بكل اجهزتها عايزة تجبر الطفلين اندرو وماريوlو بالعافيه على انهم علشان يكملوا تعليمهم يمتحنوا امتحان لدين تاني مالهومش اي علاقه بيه غير ان ابوهم اتبعه وحس ان هو الطريق المناسب بالنسبه له. ولا عملت وزن لحرية معتقد ولا قوانين الطفولة ولا الهوا لا وحجه الدولة هابله تقولك الاطفال يتبعوا الدين الاقوى. يعني ايه دين اقوى مش فاهمه
بلاش كل ده بص لعناوين المصري اليوم امبارح

مبارك يتوقع عقد «التهدئة» الأسبوع المقبل وغارات إسرائيلية على غزة تسفر عن شهيدين
نائب إخوانى يطالب بتوجيه اللوم لعدلى حسين بسبب «الأنفاق».. و«الفقى» يتساءل: «لا مؤاخذة يعنى الإخوة فى غزة كانوا بيحاربوا بسلاح من فين»
تصريحات وزير الثقافة لـ«المصرى اليوم» حول الديانات الأرضية تثير أزمة فى مجلس الشعب
واخد بالك السادة النواب والسيد الرئيس مشغولين بإيه. شوف بقه نفس العدد والمشاكل الداخليه اللي محدش بدايه من السيد الرئيس الى الساده النواب سألين عنها

ارتفاع عدد وفيات «العناية المركزة» بمستشفى الفيوم إلى ٥٥ خلال يناير وفبراير
وزير الزراعة: نقص المواد الغذائية فى مصر بلغ ٤٠٪ - وفي داخل الخبر جمله بتقول: وأكد أن نقص المياه اللازمة للزراعة هو العائق الوحيد أمام التوسع فى زراعة القطن، خاصة أن استهلاك مياه الشرب زاد إلى ٩ مليارات متر مكعب عام ٢٠٠٩ بعد أن كان ٥ مليارات منذ ٥ سنوات، مشيراً إلى أن إنتاج ٤٠٠ كيلو قطن شهرياً يحتاج إلى ٦ آلاف متر مكعب من المياه - مصر هبه النيل فيها نقص في المياه.
البورصة تعاود الهبوط.. والمؤشر يخسر ١.٨٪خ
ض
شوفت بقه السيد الرئيس والسادة النواب مشغولين بإيه والبلد فيها ايه وكل ده واكتر بسبب لخبطة الدين في الدولة بمادة واحدة في الدستور امال مصر لما تبقى دوله دينه هيحصل ايه؟؟؟؟؟؟؟؟؟؟؟؟

Love,

MishMish

Sunday, February 8, 2009

ارزاق

..خرجت فى البريك اجيب اكل من عند مطعم اسمه ارزاق لان مافيش اى محل تانى جنبنا غيره دخلت وطلبت الاوردر ..لقيت جه موعد الصلاه ..شيئ كويس انهم يبقو متدينين ويواظبو على الصلاة ..دى حريتهم الشخصيه ..وشيئ مايخصنيش فى حاجه ..طبعا ساعه الصلاه بيقفلو باب المحل وبيمنعو اى حد يدخل ..برضه كويس الى عاجبه عاجبه والى مش عاجبه ياكل من محل تانى ..دا نظام المحل ..لكن لما جيت اخرج فوجئت بحاجه عجيبه : الاخ المسئول قالى ماينفعش تخرج يا استاذ الباب مقفول ودا وقت الصلاه ...استنى لما الصلاه تخلص...لحد كدا وستوب كدا تعدو على حريتى ..طبعا وشي زنهر ودماغى قفلت واستعديت للمعركه ..وعليت صوتى ووصلت معايا انى لو هامسك كرسي واهبده فى القزاز بتاع المحل عشان اخرج كنت هاعمل كدا.. المهم صوتى على لحد مافتحولى الباب ..وطبعا خدت قرار انى مادخلش المحل دا لو هاموت من الجوع ...... بس خلاص

Friday, February 6, 2009

اول دير اسلامى فى مصر !

البشر انواع ..وكل انسان له طريقته الشخصيه فى الحياه ..اى شخص منا يحب ان يعيش بطريقته الخاصه به وحسب مايؤمن به بدون اى ضغوط خارجيه عليه ..هذا هو مبدا الحريه ..
اكتب هذا البوست بعد ان قرأت بوست جديد لقطه الصحراء عن اللثام ومشاكله ..وطرأت فى دماغى فكرة قد تكون مجنونه ..واعلم انه هناك من سيكفرنى وينتقدنى ..لكن فى النهايه اريد ان اصل الى مفهوم معين ..فى المسيحيه هناك مبدأ الرهبنه اى ان الانسان حينما يريد ان يكرس حياته لله فقط فهو يذهب بمحض ارادته الى اى دير ويعيش حياه التقشف والزهد والجهاد الروحى ..هى حياة من نوع خاص ..حياه قاسيه لايستطيع كل البشر ان يطبقوها لذلك فهى لاشخاص معينين يستطيعو ان يعيشو حياه الزهد ..هذا شيئ جميل ..قد يكون هذا الراهب افضل منى ..هو يريد ان يعيش بطريقه خاصه ..فهو مثلا يريد ان ياكل اقل الطعام ..ويعكف على الصلاه يوميا بلا كلل او تعب ..يحرم نفسه من اى شهوة ترضى جسده ..يلبس اردأ الملابس ..هذه هى طريقته فى الحياه ..هو ذهب بمحض ارادته ..فهل له الحق ان يكفرنى او يجبرنى ان البس نفس لبسه؟ واصوم مثله لعده ايام متواصله؟او ان اعيش نفس حياته القاسيه ؟ ..انت ذهبت بمحض ارادتك وانا باقى وسط المجتمع بمحض ارادتى ...فلايحق لك ان تجبرنى على العيش بطريقتك ..حينما اريد ان اعيش بطريقتك فساذهب بنفسي الى اى دير واصبح راهبا ..
لذلك طرا فى دماغى سؤال : هو لماذا لا تكون هناك اديرة اسلاميه خاصه بالمسلمين ..اى ان الحكومه تساعد هؤلاء المتدينين على بناء اول دير اسلامى لهم فى الصحراء مثلا فيعيشون سويا يرددون اذكارهم ويقيمون صلواتهم فى حريه تامه ..يرتدون النقاب ام لايرتدون يربون اللحى او يحلقوها ..طالما هما يريدون ان نسير على منهجهم وطريقتهم فالافضل ان يعيشو وحدهم ويطبقون قوانينهم الخاصه بهم داخل الدير الاسلامى ..واى شخص يريد ان يذهب اليهم فليذهب هو حر ..طالما هو اختار بمحض ارادته ..طالما هم يكفرونا ..ونحن لانحب ان نعيش مثلهم ..فالانفصال هو الحل ..ولنبدأ مثلا بدير (معاويه ) ويكون مخصص لراغبى العيش فيه من الاخوه الذين يرفضون المجتمع الذى نعيش فيه ويعتبرونه فاسد..ويتركو مجتمعنا فاذا ارادو ان يحرمو الفن او الموسيقى او او ...فليطبقو ذلك عندهم فى ديرهم الخاص بهم ..فيكون داخل الدير قوانين خاصه بهؤلاء الذين يرغبون فى السير على منهج الدين القويم ..اما اذا رأى احد المسلمين ان المجتمع كافر وان الفن حرام وان حياتنا لاتناسبه فيذهب الى الدير الاسلامى ويعيش فيه مع من يتفق مع افكاره ..ايضا المسيحيين حينما يرون ان المجتمع فاسد فليذهبو الى الدير الخاص بهم ..وهكذا فيصبح لدينا دائرتين وللناس حريه الانتقال من هنا الى هناك ..
لكن ما اخشاه هو ان تصبح مصر دير كبيييييير
ميجووووووووووووو

Tuesday, February 3, 2009

بسكو مصر


مافيش فى الدنيا صاحب

يتصاحب

(زى (الشمعدان

كل مابتحبه

بيحبك كمان وكمان

اصل الصحاب انواع

(صحاب نوعها ( نايتى

(و(مولتو

لا تشبعك..

ولا تخليك جعان

وصحاب تانيين

محنطين...

منشييين

(زى( بسكو مصر

تاكل قطمه واحده

يلزق فى بقك

وتبقى عطشان

(وصحاب زى( بيمبو

مافيش منها فى السوق

ولو لقيتها ...

تقول ..

مش دا الطعم بتاع زمان


ميجوووووووو

There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق