Sunday, July 8, 2012

مش ده احتمال برضه

المجلس مش متأمر ولا حاجة وكل الاحداث اللي فاتت والتخبيط شمال ويمين نتيجه مباشرة لحاله الغباء العام وانعدام الرؤية اللي اصبحت صفه سايدة في مصر من اول هوجه العسكر لما اتحكمت في مفاصل الدولة من 60 سنه.

محدش ضغط في سبيل فوز الريس مورسي ولا امريكيا ولا قطر ولا حتى كفر ابو تشت لان الراجل ده فعلاً واحد مننا وشبهنا في كل حاجة .... استاذ في الجامعه مربي دقنه لزوم اللوك بتاع التدين .... بيتكلم انجليزي قرنص .... مسك شغلانه من غير ما يعرف ايه الـ Job Description بتاعها ..... فنجري بق ....بيقول اي كلام (راجع حديثه عن طائر النهضة) ..... في ناس ماشيه وراه مغمضه عنيها بتدافع عنه بس .... الفضل في وجوده بالاساس يعود لسواقين التوكتوك والبوابين.

انتشار البلطجه في الشوارع والانفلات الامني ما هو الا تطور طبيعي للجان الشعبيه وكسر هيبه حمل السلاح. وضياع الحق ما بين دفع ديه وجلسات العرفيه وعدم تطبيق القانون ... كل واحد فينا بيكسر في القانون على قده ... الطلبه بيبتكروا اساليب جهنميه في الغش علشان ما يذاكروش .... كسر الاشارة في الشارع .... ركن العربيه في اي حته .... صوت التليفزيون او السماعات العالي .... سرقه الكهربا من الشارع لغايه لما يجي الدور علينا في المقايسه .... صوان كبير يسد الشارع ودي جي كلب صوته يوصل للكواكب الاخرى علشان فلان مات او علان هيتجوز ... وفي ناس الموضوع بيتطور معاها للقتل ... كل واحد على قده

محدش بيحترم حد ومحدش بيحترم حاجة خناقه ما بين عيلين ممكن تقلب بحرب اهليه .... الشرطة زمان كانت مهتمه بتأمين السيد الرئيس وابن السيد الرئيس وحاشيه السيد الرئيس ودلوقتي مش مهتمين بحاجة خالص بايعنها

هيئه الامر بالمعروف نتاج طبيعي لفوز الاسلامين بالرئاسه مش لازم تبقى امن دوله ولا نيله احنا كان عندنا ارهاب مسلح وكانت الاشكال الضاله اللي بدقون وجلاليب قصيرة وبنطلونات بيلفوا الصعيد بجنازير ويجلدوا الناس في الشوارع وكانوا بيمعنوا الموسيقى في الافراح والمناسبات ديه ويفرضوا اتاوات على المسيحين في الصعيد الناس ديه ما تابتش الناس ديه كانت مستنيه الفرصه... 

ان مصر تكون فعلاً وبجد المرة معرضه للانقسام والحروب الاهليه واننا نوصل لاننا نقتل بعض علشان رغيف عيش

مفيش مؤامرات على مصر ولا نيله هي معدة للتدمير الذاتي والمؤامرة الوحيدة هي نشر فكرة المؤامرة لتمييع القضيه والانغماس في الخطأ على اساس ان مش احنا اللي غلطانين ما امريكيا هي السبب وقطر برضه ممكن تبقى السبب واسرائيل والعين الوحشه وكدة يعني ... مش ده احتمال برضه
MishNMish

1 comment:

لورنس العرب said...

النقطه الاولى: الامريكان بيقولوا على الانتخابات (او بيصفوا الانتخابات) بوصف dirty game
وفيه يمكنك استخدام كل انواع الاساليب المشروعه والغير مشروعه للوصول إلى الغرض- ليس معنى هذا ان مرسي نجح بغير حق- هو فعلا نجح بالصندوق الذي كان يتهمه من قبل بأنه مزور- لكن النجاح لا يعني بالضروره انه الافضل
النقطه الثانيه: هو دخل الانتخابات بالصدفه، ومن رشحه او انتخبه كان غرضه هو انتخاب الجماعه وليس مرسي كشخص لأن مرسي كشخص لا أحد يعلم عنه شيئا، الحقيقه انا ماسك نفسي عن انتقاده إلى أن يمر المائة يوم- لكن هو اللي قال انه هايعمل كذا وكذا في مائة يوم- ولو لم يفعل يبقى أكيد هو لا يدري الامور التي ذكرتيها من كسر قوانين واشارات وسائقي التوكتوك وغيره وغيره وغيره- وفاكر ان البلد جميله وحلوه لكن كان ينقصها بعض الرتوش التي سوف يضعها لتتحول مصر إلى أوربا- بس ده اسمه جهل- اللي مش عارف البلد فيها ايه ومش داري باللي فيها يبقى جاهل وخاصه لو كان صاحب منصب كبير
ثالثا: هيئة الامر بالمعروف كان لها مقدمات تحدثت عنها في البوست الاخير، هم لا يتحملون المسئوليه وحدهم، هناك غيرهم من دفعهم على التفكير في هذا الامر

عجبني اوي آخر 3 سطور

لخصوا الحقيقه المؤلمه التي نهرب منها في هذا البلد، بس لازم نقول امريكا واسرائيل- ومال هنداري الفشل ازاي؟

There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق