Tuesday, December 14, 2010

افغانستان اخرى في الطريق

اول مرة اتفرج على فديو جلد المرأة السودانيه كامل النهارده من غير الصوت طبعاً
الصور ديه متاخده من مقاطع الفديو على اليوتيوب
الصورة الاولى على الشمال للست وهي ماسكه الكرباج وبتتحايل على الجلاد يرحمها
الصورة اللي جنبها لواحد من منفذي الشريعه والحكم وهو مبسوط قوي
الثالثه من الشمال لما لاقها مسكت الكرباج دخل يكمل هو
الرابعه بعد ما اضربت بالكرباج على وشها

لكن اللي يفرح ان السلطه القضائية في السودان قررت فتح تحقيق في هذه الواقعه وهي تعرض فتاه للجلد على بعنف على ايدي رجال يرتدون زي الشرطة.... ومن ناحيه اخرى قال والي الخرطوم ...ان هذه المرأة عوقبت بموجب الشريعه ولكن الخطأ في طريقه تنفيذ العقوبه بحقها
لكن مفيش حد من اللي كتب الخبر قال اسمها ايه وتهمتها ايه المشكله تتلخص في خطأ في تنفيذ العقوبة
وتعيد هذه القضيه إلى الاذهان حادثه الصحافيه لبني احمد حسين التي تم القبض عليها في احد الاماكن العامة وقدمت للمحاكمه بتهمه ارتداء البنطال وهو مما تعتبره السلطات السودانيه زياً فاضحاً وقفاً للمادة 152 من القانون الجنائي لسنه 1991
احب اهنئ الشعب السوداني الشقيق بمستقبلهم الاسود. بالمناسبه اهدي لهم الصورة ديه
ديه صورة افغانستان الشقيقه في الخمسينات والستينات ايام ما كنت بلد عايش فيها بني ادمين

وديه صورة افغانستان اليوم بعد حكم الملالي


Love,
MishMish

Tuesday, November 30, 2010

يهوذا

فأخذت مريم مناً من طيب ناردين خالص كثير الثمن ودهنت قدمي يسوع .... فقال واحد من تلاميذه، وهو يهوذا سمعان الاسخريوطي، المزمع ان يسلمه: "لماذا لم يبع هذا الطيب بثلاثمئه دينار ويعط للفقراء؟" قال هذا ليس لانه كان يبالي بالفقراء، بل لانه كان سارقاً، وكان الصندوق عنده، وكان يحمل ما يلقى فيه
يو 12: 3 -6
في مكان ما في بيت عنيا قبل الفصح بسته ايام وقبل دخول المسيح اورشليم
بطرس: شفت صاحبك بيقول ايه؟ هو فاكرنا هبل؟
يوحنا: ماله بس؟ يمكن يكون فعلاً قلبه عالخدمة. انت بس اللي اتعودت تبص للوحش اللي فيه
بطرس: بص ما تضايقينش منك. انت عارف كويس انه حرامي
يوحنا: زي ما كل واحد فينا ليه ضعفات وسقطات والمسيح قابلنا كلنا. هو الفرق ما بينا وبينه انه اتكشف
بطرس: يا عم هو انت مش دريان باللي احنا فيه؟ البلد كلها ماشيه ورا المسيح وبكرة هيخش اورشليم مش بعيد يتوج ملك او حتى زعيم شعبي. واحنا الـ 12 هنبقى ممثلين ليه. واحد زي ده في وسطنا ممكن يخرب الدنيا. الموضوع كبير يا يوحنا. خدمة وبشارة والبلد محتل انت متعرفش المسيح في دماغه ايه وممكن يعمل ايه؟ في وقت زي ده لازم نبقى مساندين للمسيح مش سكاكين في ضهره
يوحنا: يعني انت عايز ايه بالظبط؟
بطرس: يهوذا يمشي
يوحنا: ازاي يعني؟
بطرس: هاجيبه واقعده قدام يسوع واقول على كل حاجة ولو انكر هافضحه قدام الكل وهاطلب شهادة الكل
يوحنا: تفتكر يسوع مش عارف
بطرس: اكيد والا مكنش سابه
يوحنا: يا سلام!! انت مش فاكر هو عمل ايه مع المرأة اللي امسكت في ذات الفعل
بطرس: بس احنا وضعنا مختلف. احنا صورته وممثلين ليه ما ينفعش يبقى فينا واحد حرامي
يوحنا: يا بطرس مش المسيح قال لا تدينوا لكي لا تدانوا. كلنا لينا اخطأ. هل انت مستعد انه يواجهك باخطائك؟
بطرس: اوووووووووووف .......انا مش حرامي يا يوحنا
يوحنا: كلها زي بعضها وانت عارف
بطرس: هاقوله يعني هاقوله وهو يتصرف براحته
يوحنا: هايقولك من منكم بلا خطيه فليرميه اولاً بحجر
بطرس: على فكرة انا غلطان اني اتكلمت معاك. ولعلمك بقه لو يهوذا فضل معانا انا هاسيبكم وامشي. انا بصراحه محبش يتقال عليا ان ان ليا واحد حرامي صاحبي. ولعلمك كلكم سمعتكم هتضر بما فيكم يسوع نفسه
يوحنا: استنى وشوف يسوع هيحلها ازاي
يقوم بطرس بغضب ويترك المكان وهو يقول
اه استنى ... لغايه لما نلاقيه بايعنا كلنا في سوق العبيد. يا عمي...ديه حاجة تطهق ... اقوله سمعتنا والخدمة ويسوع والزعامة والشعب كله ماشي وراه ... يقولي يسوع عارف... طب اما هو عارف ماتصرفش ليه؟
....................
Love,
MishMish

Thursday, November 25, 2010

خطاب من سجن برمنجهام

اني اظن انه من السهل على اولئك الذين لم يشعروا قط بحقائق العزل والفصل اللاذعه والمخزية ان يقولوا للمظلومين والمسحوقين: انـتــظـــــر

ولكن عندما تنظرون رعاعاً متوحشين افظاظاً يعدمون امهاتكم وأباءكم بدون محاكمه قانونيه ولكن بحسب مجرد رغبتهم في فعل هذا، ويغرقون أخواتكم وإخوانكم بسبب نزوة او هوى

وعندما ترون رجال البوليس الحانقون المملوئين كراهيه يلعنون ويرفسون ويعاملون بوحشيه او يقتلون إخواتكم وإخوانكم السود دون ان يفلتوا منهم


وعندما تجدون فجأة لسانكم وقد انعقد وتلعثم النطق على شفاهكم وانتم تبحثون عن وسيله لتشرحوا لابنتكم ذات الست سنوات لماذا لا تقدر ان تذهب الى المنتزه الشعبي العام المعلن عنه في التليفزيون وعندما ترون الدموع تسح مدراراً من عينيها عندما تخبر ان مدينة الملاهي موصدة امام الاطفال الملونين

........................

وعندما تجدون انفسكم دوماً تحاربون ضد معنى منحط ومنحل لتجاهل حقوق الغير، عندئذ فقط سوف تدركون وتعون لماذا نجد انه من الصعب ان نـنـتـظــر. انه يأتي وقت يمتلىء فيه كأس الاحتمال ويفيض، ولا يعود الناس يحتملون او يرغبون أكثر من هذا أن يغوصوا في لجه وهاوية عدم العداله، حيث يتجرعون كأس اليأس كاملة

د. مارتن لوثر كينج

كتاب: خطاب من سجن برمنجهام

Love,

MishMish

Sunday, September 19, 2010

حد الردة


انا: عمري ما فهمت الغرض من حد الردة
صديقي: حد الردة يحمي الامة من الفتنه. المرتد لازم يتقل
انا: ليه؟
صديقي: لانه قال انه اكتشف غلط في كتاب ربنا
انا: طيب ما المفروض يبقى في ناس مختصصين للتعامل مع الحالات ديه. ان كان فاهم غلط او مش فاهم خالص يرشدوه. ولو كان عنده حق يبقى حرام قتله وحرمان الناس من المعرفه. مش الساكت عن الحق شيطان اخرس
صديقي: ....اممممممممممم .بس لازم يتقل
انا: ليه؟
صديقي: لانه اكتشف غلط في كتاب ربنا

هذه التدوينه لا يقصد بها الاساءة لاي ديانه او معتقد ولكن الهدف منها كشف عقليه من يدعون احقيتهم في الوصايه على ارواح وعقولهم البشر
Love,
MishMish

Tuesday, September 14, 2010

الفرق بين البني ادمين الطبيعين وجبهه علماء الازهر

قالك في بيان قاطعوهم لجبهه علماء الازهر بتاريخ سبتمبر 2010
جبهه علماء الازهر: بعد ان اصبحت الكنيسة المصريه مصدر ارعاب وارهاب للدولة والامة، وبعد ان تأكد للقاصي والداني غطرسه تلك الكنيسة وتعاليها واحتقارها لجميع الاعراف والقوانين والضوابط العرفيه والاخلاقيه فضلاً عن الشرعيه والدينيه.....كلام كتير
البني ادم الطبيعي سهل عليه معرفه مين اللي مصدر للإرهاب لما يقرا في حوادث المصري اليوم بتاريخ 13 سبتمبر "اشعل مجموعة من الاشخاص النيران في مبني تحت الانشاء بمدينه الصف تردد انه مخصص لبناء كنيسة بجوار مقابر السلام" مع ان المكان ده لا قام فيه الارهابين مسيحين باي تفجيرات ولا قتل ولا اعتداء على الناس بحجه ان ربنا بتاعهم قالهم كدة او انهم مظلومين مثلاً وان الدولة والمسلمين هما اللي ابتدواء بالعدوان ويعددوا جرايم الاسلامين في حقهم بدايه من الجماعات الاسلاميه والاخوان وتطنيش الدولة
جبهه علماء الازهر: مما شجع الكنيسة على تماديها في طغيانها، قتوالت الاحداث تلو الاحداث وكان منها اعلان الكنيسة تحديها لأحكام الدولة ورفضها لما اصدرته محاكمها من احكام تساوي بها نصارها مع مسلميها في حق التطليق ...فأعلن كبيرهم بصلف ان الدولة لا سلطان لها على الكنيسة.....بلا بلا بلا
البني ادم الطبيعي يعرف ان الكنيسة ما تقدرش تلغي نص واضح من الكتاب المقدس بيقول "لا طلاق الا لعله الزني" لمجرد ان الشريعه الاسلاميه تبيح تعدد الزوجات وايضاً المادة الثانيه من الدستور والتي تنص على ان الاسلام دين الدولة ومبادئ الشريعه الاسلاميه هي المصدر الرئيسي للترشيع (والتي تتضمن للاقباط الاحتكام الى شريعتهم) يعني ده مش طغيان بس مين يفهم
في حين التنامي في اعداد اطفال الشوارع وحوادث القتل للاطفال الغير شرعيين على يد ابائهم لم تطالب الكنيسة الدولة بإصدار قانون يسمح لاتباعها بالتبني مع ان موقف الشريعه الاسلاميه من الظواهر ديه هي الدفاع المطلق عن الرجل وشهواته ورجم الام وعقاب طفل لم يفكر به احد وقت وقوع الجريمه
جبهه علماء الازهر: ثم ...سفينه المتفجرات الكنسية القادمة من اسرائيل لصالح ابن راعي احد الكنائس المصريه
النبي ادم الطبعي يتحرى الحقيقه قبل كتابه اي كلام وخلاص
جبهه علماء الازهر: ثم ملف الاخوات اللواتي تحولن الى بإرادتهمن من النصرانيه الى الاسلام
البني ادم الطبيعي يخش على اليوتيوب ويشوف فيديوهات المتحولات الى الاسلام بيتكلموا براحتهم ولكم في فريدة الشوباشي اسوة حسنه علاوة على انه ممكن يشغل مخه شوية ويفكر قبل ما يولع في البلد اشمعني المتحولين من النصرانيه الى الاسلام ياما بنات صغيرين في الجامعه ياما ستات متجوزين.
جبهه علماء الازهر: فإنه اصبح من الواجب خلقاً وعرفاً وقانوناً وشرعاً على الغيارى من ابناء مصر مسلمين ومسيحيين ان يفقوا صفاً واحداً ضد هذا الصلف الكهنوتي والعنف الكنسي والغرطسه البطريركيه التي تهدد الامة ....فإنه يجب
اولاً: المسارعه نحو اعلان الرفض لسياسه التخريب التي تتبناها الكنيسة المصرية وموقف الدولة السلبي منه وذلك بكل سبيل ممكن ووسيله مشروعة
البني ادم الطبيعي يقدم الشكر للناس دول علشان قالوا بالوسائل المشروعة ثانياً يجب التحرى عن سلبيه الدولة خصوصاً انها لا تظهر سلبيه بل بالعكس ايجابيه جداً - لاحظ انهم لغايه دلوقتي مش عارفين يحكموا على مرتكب مذبح نجع حمادي مع انهم ولسؤ حظهم مساكينه وعارفين من اللي وراه
ثانياً: التحرك القانوني برفع دعاوى قضائية على الكنيسة المصرية والمطالبه باخضاع تلك الكنيسة المتغطرسه لسلطان القانون ...وكذلك رد الدوائر التي بها قضاه من النصارى
البني ادم الطبيعي يقدر يفرق بين قاضيه المانيه ناقصه عقل واحتمال تكون ملحدة مش نصرانيه وحكمها على قاتل مروة الشربيني في جلستين اتنين والقضاه من المسلمين اللي مش عايزين يحكموا على الجاني في قضيه نجع حمادي بالاضافه الى من سبقوهم وحكموا بالبراءه على قاتلي شهداء الكشح الواحد وعشرين
ثالثاُ: وعلى جميع المسلمين من الان لزوم المقاطعه للمصالح المسيحيه خاصه المصالح الاقتصاديه التي تستقوي بها الكنيسة حتى يثوب النصارى الى رشدهم ويراجعوا مع المجرمين امرهم وياخذوا على ايديهم قبل ان تحترق به وبهم السفينه
البني ادم الطبيعي يعرف انها على الرب مش عالعبد - كما قال لي بائع متجول - ثانياً بحسب تصريحات عائشه عبد الهادي ان المسيحين يملكون 60% من مجموع رؤس الاموال في مصر يعني هتتقلب على دماغكم انتوا في الاخر وطبعاً لو فيهم بيفهم يعرف ان راس المال لا ليه وطن ولا دين والاقتصاد دلوقتي اقتصاد مؤسسي عابر للقارات مش اقتصاد سوق عكاز. ثالثاُ سؤال بقه مين اللي هيولع في السفينه؟
......................
فإن اصرت الكنيسة بعد ذلك على لزوم موقفها من الدولة والمله، فإننا ننذرها بالخطوة التانيه والتي ستكون ان شالله هي الدعوة الى المقاطعه الاجتماعيه للنصارى جميعاً في مصر والجائهم الى اضيق الطرق بمنع المساكنه وتجريم المعامله وعدم بدئهم بالسلام
البني ادم الطبيعي يقدم بلاغ عاجل لنائب العام بالقبض على كل من شارك في وضع هذا البيان واعدامه في ميدان عام حيث انه يدعو الى تكدير الامن العام والفرقه بين ابناء الوطن الواحد على اساس الدين والتحريض على افعال من شأنها تجعل حرق المصاحف اقل واجب - اذا كان رؤساء هذا الدين بهذه العقليه - وبعدها رفع الموضوع الى محكمة العدل الدوليه ومحاكمة كل متبني هذا الفكر كمجرمي حرب
تحديث: اشكر تيرز هي اللي نبهتني لحقيقه الكيان المسمى بجبهه علماء الازهر وعرفت فعلاً نقلاً عن موقع اسلام اون لين انها لا تتبع الازهر وانها كيان منحل. وحابه اعتذر عن اسلوب الكتابه في البوست ان ظهر انه عدواني شويه بس بجد يا جماعه لما تقروا نص البيان هتفهموا
MishMish

Sunday, September 5, 2010

الجزء التاني

مصر تنظم مونديال 2010 - الجزء التاني
كانت مشكله المشاكل هي اغنيه الافتتاح التي كتبها الشاعر الفحل المعطاء عبده حريقه الذي كتب كل اغاني الثورة والنكسه والاستنزاف وحرب اكتوبر ومعاهده السلام وافتتاح توشكى وتعديل 76...الخ، وقد اشرف رئيس قطاع الانتاج بنفسه على اخراج الاغنيه التي اختير لغنائها المطربين سعد الصغير وشعبان عبد الرحيم وبهاء سلطان وتقول كلماتها: مونديالنا حلو وقيافه ...وبلدنا مالها زي في اللطافه، وبلاتر قلبه بيوجعه عايز حد يدلعه....وهيييه
بدأ المونديال المصري اثناء انعقاد مؤتمر ثقافه قبول الاخر الذي انعقد لمناقشه الاحداث الطائفيه المؤسفه التي حدثت في الاسكندريه التي صار فيها الاخ لا يحتمل اخاه لمجرد انه يختلف عنه في الديانه
وكانت اولى المصادمات في ملعب اسمنت اسيوط وتليفونات بني سويف، فقد رفض الاول استقبال فريقي اسبانيا والارجنتين، بينما الثاني رفض استقبال فريقي سويسرا واليابان وكانت الحجة في اسيوط ان مشجعات الفريقين من صنف اخر غير صنف النساء المتدولات المعروفات، اما في بني سويف فقد تقدم اعضاء المجلس المحلي هناك بطلب استجواب عاجل حول دخول اهل البوذيه اليابانيين الى ارض المحافظة. وإتقاء للشبهات الغى المحافظ الماتش واعتقل الحكم الذي اثار الشغب بإصراره على لعب المباراة
واذا تركنا ما حدث من مناوشات ومعاكسات بريئه فلا نستطيع ان نترك ماحدث لرونالدينهو اللاعب رقم واحد في العالم، والذي تعرقل امام منطقه الجزاء فإنكسر صباع رجله الكبير، ولما علم عم برعي التمرجي الذي رافق رونالدينهو في الاسعاف قيمه صباعه الذي امن عليه بعشرين مليون دولار، صرخ باعلى صوته واقترح على الاسطى خليل سائق الاسعاف ان يحتفظا بهذا الصباع بعد بتره لان صباع رونالدينهو من الممكن ان يساهم في تزويج شباب الحي كله، ويطلع اباؤهم وامهاتهم وجدودهم كلهم رحلات عمرة بدلاً من اللجوء لبرامج الجائزة الكبرى والجري ورا جمال الشاعر
دخل رونالدينهو استقبال مستشفى التل الكبير المركزي ونزل لاستقابله مدير المستشفى بنفسه وامر بإحضار كرسي متحرك لللاعب الكبير، هو بالكاد شبح كرسي متحرك مكون من عجله واحدة وصامولتين ومسند متآكل وقاعدة عبارة عن مخدة كانت اسفل دماغ عيان لسه ميت طازة. المهم ان الكرسي ادي المهمه بشكل ما ووصل برونالدينهو الى غرفه الاشباح المسماه تجاوزاً غرفه الاشعه. حضر الطبيب النوبتجي وشد رونالدينهوا من قدمة للفحص بعنف وبقوه، فصرخ لاعب السامبا الذي اعتزل اللعب بعد العلاج. فقال الطبيب: لو سمحت اترذع على السرير واقلع هدومك علشان نشوف فيه كسر تاني في جتتك ولا لا، وعندما تساءل رونالدينهو: اين الرنين المغناطيسي او الاشعه المقطعيه؟ تدخل مدير المستشفى وهو يهز راسه بسخريه من سذاجه اللاعب البرازيلي وقال: رنين ايه؟ ومقطعيه ايه؟ وكلام فارغ ايه؟ انت بتاكل من الكلام ده، دي منظره ملهاش لازمة يا كابتن وفلحسه دكاترة لزوم ترويق الزبون وانت يا رونالدينهو بيه مش زبون...انت صاحب بيت ورضخ رونالدينهو للامر الواقع وكان القرار الحاسم الجبس بعد البتر، كشعار التظلم بعد الدفع
خرج لاعبوا فرنسا للتسوق في الشارع التجاري ببورسعيد اثناء الاجازة التي اعقبت الدور الاول، واصر الباعه على بيع شامبوهات ولبان وكوتشيات لللاعبين الفرنسين، فلما رفضوا خرج ابو العربي من كشكه وقال لزملائه سيبكم من الحاجات ديه. الحاجات ديه غاليه عليهم. هرول اللاعبون الى الفندق بعدما احسوا بنظرات الحقد والغل تملاء عيون الباعه لانهم ماشتروش حاجة ومع ان درجه الحرارة كانت 39 الا انهم فوجئوا بمن يعرض عليهم بلاطي باله بسعر واحد يورو للواحد والمدهش ان هنري اشترى بلطو، وعندما ساله زيدان مستنكراً قال له: ان هذا البالطو غالي عليه وله معه ذكريات قبل ان يستغني عنه ويلقيه في سله القمامه المجاورة لمتحف اللوفر وهاهو يعود اليه مثل مركوب ابو القاسم، بدا على زيدان عدم الفهم ولكنه كان مستعجلاً على النوم للإستعداد لزيارة تمثال ديليسبس مساء، فقال له هنري قبل ان يدخل غرفه نومه: على فكرة يا زيدان تمثال ديليسبس المصريين شالوه وكسروه ابقى فكرني لما نرجع فرنسا نبقى نكسر المسله
كان النقل التليفزيوني غايه في الروعه خاصه بعد الاعتماد على طاقم ماسبيرو في البث المونديالي، كانت هناك بعض الاخطاء البسيطة كتكرار ظهور قفا ابن مخرج الماتشات وخاصه عند دخول هدف او ضياع فرصه كبيرة وضياع صوت المذيع في نصف كل ماتش، اما النصف الثاني فكان يتكلم فيه المذيع عن امجادة الشخصيه ويقارن بين هؤلاء اللاعبين السكه بحباجه وعبد الكريم صقر والذي كان ظفر اي منهم برقبه هؤلاء المليونيرات، ثم يختم بشكر مدير الامن ومدير الاستاد وعم حكشه الذي يقدم له الينسون لزوم تسليك حنجرته الكريمه، وبالطبع كان الحذاء وهو شعار المرحله المسيطر على اغلب كادرات المقصورة، صورته وهو يتطاير بين كراسي عليه القوم ويصفع خدود رؤساء الانديه جعلت القطاع الاقتصادي بالتليفزيون يطالب بإلغاء نقل المبارايات لانها اعلانات غير مدفوعه الاجر عن احذيه من الهاي كلاس
والى هنا ادرك شهرزاد الصباح فسكتت عن سرد قصه المونديال الذي حمدأ للرب لم يباح
نقل بتصريف من مقال للدكتور خالد منتصر في جريدة ايلاف الالكترونيه بعنوان مصر تنظم مونديال 2010
Love,
MishMish

Monday, August 23, 2010

مصر تنظم مونديال 2010- الجزء الاول

طالما مفيش الف ليله وليله السنه دي فاسمحلي اكون شهرزاد
بلغني ايها الشعب السعيد ذو الحاكم الرشيد ان
ساعي مكتب مستر بلاتر كان مصري غلبان ومن حبه لمصر ورغبته في خدمة بلدة قام مغير الورق اللي موجود في الصندوق الزجاجي بتاع القرعه وحط ورق تاني كله مكتوب عليه مصر
EGYPT
ثم عرض مستر بلاتر الورقه على الجمهور والصحفين ومشاهدي التليفزيون في جميع انحاء العالم. فانطلقت بعدها الزغاريد في انحاء المحروسة وقامت جميع القنوات المملوكة للدولة والمملوكة للي تبع الدولة تعرض اغنتي "المصريين اهمه" و"مصر اليوم في عيد" على التوالي والتوازي لمدة 24 ساعه متواصله

بالطبع بدأ التخطيط للمونديال المصري بالتميمه او شعار المونديال الذي سيظهر في الاستادات والتلفيزيونات والاعلانات ويطبع على التي شيرتات ويرسم على العربيات والعمارات، تكونت لجنه لتصميم التميمة ومنها تفرعت لجان منبثقه ولجان متشعبه من المنبثقه ولجان اخرى بمسميات اخرى اتفقت جميعها على تكليف ا. شلبي عويس مفتش التربيه الفنيه بالمرحله الاعداديه لتصميم التميمة، وبالطبع كان امتحان الرسم في المرحلة الاعدادية في عام 2010 في التصميم الابتكاري عن تصميم التميمة. والحمدلله جاءت النتيجه مبشرة واستطاع من خلالها الحصول على تصور مذهل للشعار، فقد رسم فنانا العبقري كرة كبيرة وحشاها بمفتاحين انجليزي وترس رمزاً للصناعه ومحراث وفأس رمزاً للزراعه وسنبله قمح وغصن زيتون ونخلتين في العلالي وسونكي وخوذه.

كانت الخطوة التاليه هي خطوة بناء الاستادات وتشييدها بما يتناسب وسمعه الفراعنه في فن البناء، اقترح المعلم حنفي زلطة المقاول الشهير ان تكون مداخل الاستادات كمدخل معبد الكرنك وطريق الكباش وان يكون عدد الكباش على على كل جانب هو 11 كبش وهو نفس عدد لاعبي كل فريق، ولكن رئيس اللجنه المنظمة للمونديال اعترض لان المعلم زلطة اهمل في تصميمه الاحتياطي والمدرب والمدلك ومدرب حارس المرمى، ولكن التصميم قد تمت الموافقه عليه من جميع مجالس الشعب والشورى والمحليات

واتفق الجميع في تكاتف اصيل يكشف عن معدن المصري حين تشتد الشدائد على ان يكملوا طريق الكباش بكام جدي ومعزه حتى لا يحتج باقي طاقم عن الفيفا

بدأ العمل على قدم وساق في بناء الملاعب على اعلى مستوى، وبالرغم من وجود بعض الرتوش الخفيفه التي لا تؤثر على مسار العمل مثل رداءة انواع الكراسي وفرقعه لمبات الإضاءه الليليه - التي اثنى عليها رئيس اللجنه المنظمة ووصفها بالفانتاستيك الذي يخلق "سسبنس" في المدرجات وعندما سئل المعلم زلطة عن بعض اللذين يعالجون في اقسام الرمد بالقصر العيني نتيجه هذه الفرقعه، قال بصوت جهوري كله شجن: كله فدا عيون مصر. تحيا مصر وفي داهيه المواطن واللي خلفوه. - ومثل تواجد بقايا الزلط والرتش والطوب في المدرجات وثقوب مظلات الاستادات والتي حلها المقاول العبقري بتغطيه سقف الاستادات بملايات كاروهات صنع المحله وبعض الاجزاء الصلعاء في نجيله ارض الاستاد ومثل كراسي بعض الاستادات التي نسيت شركة المقاول ان تجعل ظهرها ومسندها للخلف وعلل رئيس مجلس ادارة الشركة هذا الوضع المريب ان مخه مش دفتر واللي عايز يتفرج على المونديال لازم يتعب نفسه شوية ويقعد عالكرسي بالشلقوب او زرع بصل واللي مش عاجبه يخبط دماغه في خرسانة المقصورة

وكان الشيخ عبد الفضيل الماضاوي هو رئيس لجنه اداب المونديال وهو المسئول الاول عن الافتاء الشرعي للمونديال. بدأت اللجنه بقرار ايقاف المباريات اثناء الآذان ولم يحسم الجدل هل الايقاف تبعاً لتوقييت الآذان في مصر او في بلدي الفريقين المشتركين في المباراة واستقر الرأي على الاخذ بالثلاثه توقيتات

وقد اعترضت اللجنه على شورتات لاعبى المنتخبات القصيرة التي تبين افخاذ اللاعبين، واصدر الشيخ عبد الفضيل فتوى تحريم ارتداء هذه الشورتات لانها انكار للمعلوم من الدين بالضرورة وكشف صريح للعورات. لذا ثم اصدار فرمان من فضيلته بفرض الزي الشرعي على جميع اللاعبين، والتشديد على للاجهزة الفنيه لهذة المتخبات بعرض شورتات على اعضاء اللجنه لقياس اطوالها وضمان تغطيتها للركبه وعدم دخول خيوط من الحرير المحرم شرعاً في نسيجها

وامتدت مظله الشيخ الشرعيه لتشمل الجماهير المصاحبه للمنتخبات وخاصه الحريم منهن وبالاخص فتيات البرازيل واسبانيا. وطالب بتشكيل جماعه الامر بالمعروف لمراقبه هؤلاء الكاسيات العاريات وتوزيع نقاب على كل مشجعه ورداً على اعتراضات العلمانين اللذين قالوا ان النقاب سيحدث لخبطه وسيختلط الحابل ولن تعرف مشجعات الفرق من بعضهن، فقال الشيخ الماضاوي لا فض فوه: بسيطة سنلصق علم كل دوله على ظهر نقاب كل مشجعه وشيفيدنا إلصاقه على الظهر في تمييز وتوضيح هل هذ المنقبه رايحه ولا جايه

وهنا ادرك شهرزاد الصباح فسكتت عن الكلام المباح

من آداب الكوميديا السوداء
مقاله للدكتور خالد منتصر من موقع ايلاف منقوله بتصريف

Love,
MishMish

Monday, August 16, 2010

مين ديه اللي هتضيع صيام الناس يا ولاد الجذمة

افهم لما يبقى واحد جاهل مربي دقنه مابيتكلمش غير في اداب دخول المراحيض والعورات وخصوصاً عورات النساء التي حيرت العلماء -زي ما بيحبوا يسموا نفسهم - يقول الكلمتين دول ماشي
انما يتنشر مرتين (مرة في الصفحه الاولى ومرة تانيه في صفحه الكارياتير تحت عنوان لا مؤاخذه) في جريدة الدستور اللي المفروض انها صحيفه معارضه وليها قراء محترمين اهي ديه تبقى مصيبة ومش كدة وبس لا وبتدل على انعدام مستوى التفكير والفهم عند كل ما تعامل مع هذا الكاركاتير من اول اللي رسمه لغايه رئيس التحرير ابو شنب وبنطلون بحمالات - معرفش بيحبهم منين
اولاً: ابسط حاجة تتفهم من الزباله ديه ان الفنانين زيهم زي الشياطين
ثانياً: هما الفنانات لوحدهم هما اللي مسئولين عن رداءه النصوص ومحتواها الاباحي - يعني الممثله من دول تيجي من بيتها ومعها بلطجيه يكتفوا فريق العمل وتقلع هدوهما وتتصور وهي بالملابس الداخليه لا مؤاخذه وتعرض المسلسل ومحدش يقدر يعترض
ثالثاً اذا كنتم متضايقين قوي من المسلسلات ومن محتواها على اي اساس اتصرف عليها 270مليون جنيه وطبعاً اللي صرف المبالغ ديه مش عبيط ولا هيتبرع بيهم ده عارف كويس ان الاعلانات واعادة عرض المسلسلات ديه هيجبله ضعف المبلغ ده على الاقل وعلى فكرة معظم اللي بيصرفوا على الدراما امراء مملكه الجاز
رابعاً اشمعنى الست بس هي اللي تشيل عار سعار الذكور الجنسي وتركيزهم ليس على محتوى المسلسل ولكن على عدد الزراير المفتوحه في بلوزة البطله
خامساً: بجد
seriously do u still believe that satan doesn't work in ramadan
طب انزلوا الشارع كدة
بلاش: على كدة التعامل مع الناس في مصر والشيطان مفكوك ومريح كدة احسن كتيييييييييير من التعامل معاهم وهو متسلسل؟ حيث انه من الواضح ان المصريين هما اللي بيغوا الشيطان مش العكس
سادساً: اذا كانوا اللي المفروض انهم مثقفين وبيفهموا شايفين ان الست سبب الغوايه يبقى نستنى ايه من الجهله اللي في الشارع
سابعاً: ارجوا الرجوع الى عنوان التدوينه
Love,
MishMish

Monday, August 2, 2010

رمضان المصرى

قبل الهنا بسنه قلت اكون اول واحد يكتب عن رمضان وذكريات رمضان ..رمضان له تاريخ معايا من وانا عيل صغير ..مش معايا انا بس ...مع كل الناس كمان .رمضان يعتبر تراثا مصريا خالصا بغض النظر عن كونه شهر مقدس عند المسلمين ..واى شخص يعتبر ان هذا الشهر هو خاص بالمسلمين فقط فهو مخطئ ..رمضان المصرى له مذاق خاص ومختلف عن اى بلد ..هنا له طقوسه ومزاجه وسحره ..وهذا هو سر الشخصيه المصريه التى تحول اى شئ على طريقتها ..مثل خلطه الحواوشي التى لا يستطيع احد ان يعطيه المذاق المصرى حتى لو جعل المقادير مظبوطه .
زمان وانا عيل صغير كان قدوم رمضان بالنسبه لنا معناه اننا سنقضي شهرا مختلفا عن باقى الشهور ..الروتين السنوى سيتغير فى هذا الشهر
كنا قبل رمضان باسبوع نتقابل جميعا فى الشارع لنجمع المال لنعلق الزينات التى نصنعها بايدينا الصغيرة البريئه ..كانت الزينه عبارة عن خيط طيارات ونشا وورق قديم او جلاد ملون ..وكنا نقص الورق الملون باشكال جميله ونلصقه فى الخيط بالنشا ونتركه يجف ..وبعد ان نعلق الزينه كنا نستعد بصناعه مدفع محلى الصنع ..وهو عبارة عن مسمار من مسامير السكه الحديد نذهب به للحداد ليثقبه ثم نضع مسمار اخر ك كباس ..ونملا الثقب بالكبريت المخلى وندفعه ناحيه الحائط فينتج عنه صوت انفجار ينطلق مع انطلاق المدفع ..لم يكن المدفع فقط من طقوس رمضان ..بل ايضا الفانوس القديم ابو شمعه ..كان له سحر غريب وخيال رهيب ..كنا نعتقد اننا سندعكه يوما ما فيخرج المارد ..وهو مختلف تماما عن فانوس كورومبو وابوتريكه الذى يباع الان الذى لا يحمل شكل فانوس اطلاقا .
كان رمضان يعنى لنا كأطفال : عمو فؤاد والفوازير والف ليله وليله وبرامج المسابقات ..اتذكر انى بكيت يوما كاملا لان النور قطع ساعه حلقه عمو فؤاد فى الوقت الذى لم يكن هناك اى فضائيات تعيد الحلقه التى تفوتك مثلما يحدث الان ..وايضا كان هناك فطوطه الشخصيه الاسطوريه التى عشنا معها سنوات طويله كأنها شخصيه حقيقيه ..وظهر بعدها موتوسيكل فطوطه واى شخص قصير اطلقنا عليه لقب فطوطه .لم انسي ايضا حلقات الاشكيف المخيف الى كان بينيمنا من المغرب ..كنت بخاف انزل اشترى اى حاجه بعد المغرب خوفا من هذا الاشكيف المخيف الى لو طلعلى هاياخد منى الطلبات الى اشتريتها دا غير انه هايرقعنى علقه موت يحرمنى انزل تانى .الاهم فى موضوع رمضان اننا واحنا عيال صغيرين مكناش نعرف ايه الفرق بين مسيحى ومسلم كنا بنلعب وخلاص كنا فرحانين وخلاص مكانش حد بيقولنا عيب تحتفلو مع المسلمين ومكانش حد بيعارضنا لما نطلب فانوس على اعتبار انه شيئ اسلامى كمان صحابنا مكانش حد بيقولهم متلعبوش مع اصحابكو المسيحيين ..الكل كان فرحان كبيروصغير ..الكل كان بيمشي على نفس الطقوس لانه تراث مصرى خالص بغض النظر عن كونه شهر اسلامى مقدس ..عمر ماحد من صحابى قالى متلعبش معانا عشان انت مسيحى ..يعنى ايه مسيحى ؟ مكنتش اعرف ولا هما كمان كانو يعرفو يعنى ايه مسلمين ..احنا كنا نعرف طعم الفرحه والسعاده ..كنا نعرف شكل لمعه الفرح فى عيوننا ..وشكل الفانوس ..وليل السهر يلمنا كلنا على شكل واحد قلب واحد ..مافيش فرق مين ده ولا مين ده ...دا كان زماااان .فى رمضان المصرى
تحياتى
وكل عام وانتم بخير
ميجوووووووو

Friday, July 30, 2010

اللي عنده معزة يلمها


مش غريب ان ذكور الشوارع يعتبرون كل إمرأة مشروع واحدة ... لا مؤاخذه


يعني علشان اقف في الشارع استنى حد او اوقف تاكسي لازم اروح للمجلس القومي للمرأة واطلع في برامج حواريه ويتكتب عني في الجرايد واعمل مظاهرات علشان ذكور الشوارع يلاقوا حد يقولهم لا


الحكايه ان اي واحدة واقفه في الشارع تلاقي العربيات تهدي جنبها وتضرب كلاكسات او عربيات تضرب كلاكسات بمعني شتيمة واي كلب راكب عجله او موتسكيل يقل ادبه


وتلاقي بقه التعليقات في التليفزيون والبرامج الحورايه عن التحرش لازم يبقى فيها تعليق من واحد مخه مسوس يقولك اصلنا بعدنا عن الدين


بعدنا عن الدين ...................دين............... -طبعاً المعنى وصلكم


دين ايه اللي بعدنا عنه اذا كنا اتخنقنا من مظاهر الصحوة المباركة بصوا للناس وروحوا اي مصلحه حكوميه او غير حكوميه وشوفوا الدين عامل ايه


تعليق تاني لا يقل غباء عن التعليق الاول يقولك اصل المرأة مكانها البيت


بيت...............بيت ..............-برضه فاهمين


ايه مكانها البيت وانت مين اللي اداك الحق انك تقرر مصيري مش من حقك تفرض على بني ادم تاني الوصايه


طب انت الستات اللي اتعاملت معاهم جواري رضيوا انهم يبقوا زي اي كنبه او كرسي .........انا مش جاريه ومش هاقعد في البيت ومن حقي امشي في الشارع من غير ما حد ينتهك وجودي ويسمعني كلام او يبصلي بطريقه تنم على التربيه اللي اترباها واللي كان بيشوف اهله بيعملوه


ثم في شويه اسئله بقه تحتاج الى اجابه:


هل كل الناس اللي بتهدي بعربتها ديه عندها اسعتداد لممارسه الرذيله في اي وقت كدة؟


هو مفيش حاجة بتقول لاي حد انك حتى لو شايف اللي قدامك غلطان ده مايبررش خطئك؟


طيب ليه اللوم بيقع على المرأة بس هو مش الفعل الفاضح بيحتاج اتنين؟ يعني عمرك شوفت واحدة اعتدت على واحد؟ طيب ما هو اللي بيقف بعربيته او يقول كلمه بايخه ما هو كمان لا مؤاخذه؟


مش غريب ان اخطاء المجتمع المنافق تتحملها كلها المرأة: يعني اصل الشباب تعبان والستات بتلبس مش عارفه ازاي طيب هو اللي بيقول الكلام ده يرضي ان العوام والشحاتين يتقتحموا بيته وياخدوا عربيته اللي جايب فلوسها من بتوع الجاز على اساس ان الناس تعبانين ومش لاقين ياكلوا وحضرته عايم على وش الفته


العيال لو سفله يقولك اصل الام مش عارف عامله ازاي. طيب والاب كان فين؟


لما جماعه ارهابيه فاشله زي حماس تمسك البلد بدل ما يوحدوا البلد علشان يحلوا مشكلتهم بيدوروا على ازاي يذلوا الستات. يعني مش كفايه الاسرائلين والفقر والعيشه الهم على الستات لا والحكومة كمان


واحد يقتل واحدة علشان غلطت مع حد يبقى اسمها جريمة شرف لكن الحد محدش يجي ناحيته او لما يبقالي قريب سافل مستبيح لا عنده شرف ولا انسانيه مش مسموحلي اجي ناحيته علشان هو راجل


في مثل مشهور ذكور الشوارع مش حافظين غيرة بيقول: اللي عنده معزة يلمها!!!!!!!!! وتحولت المرأة من انسان الى معزة لتبرير سفاله الذكر


اي فتوة دينيه تمس بشكل او بأخر المرأة؟ السلام حرام وشها حرام صوتها حرام لو تزينت حرام لو خرجت حرام ولو.............. علشان خاطر انها بتغوي الراجل


طيب مفيش فتوى واحدة منصفه تقول ان الراجله اللي مش قادرين يتحكموا في نفسهم وبيعانوا من خلل هرموني لازم يتحبسوا في البيت ودة ليه سواب كإمطاه الاذى عن الطريق


ثم اذا كانت الستات سبب المشاكل او ناقصات عقل ودين لماذا لا توجد اي نصوص تقول ان هناك استثنى في محاسبه المرأة على اساس انها خلقت على هذا الشكل غبيه ومحرضه على الشر. يبقى اللي غلطان في الموضوع ده اللي خلقها مش هي


يعني لما تجيب كمبيوتر بكرتونته وتلاقيه بايظ يبقى العيب مش عيب الكمبيوتر عيب الشركة المصنعه


مش معقوله الست تشيل غلط البني ادمين وغلط اللي خالقهم - على حسب الوضع السائد - ولا ايه


Love,


MishMish

Saturday, July 17, 2010

نغمه نشاز

تخيل نفسك جالسا فى الاوبرا او جالس فى حفله موسيقيه لعمر خيرت مثلا تستمتع بالموسيقى الراقيه والهارمونى الرائع وتنسجم مع ابداع العازفين وتعيش حاله من النشوة التى تشعر فيها بإنسانيتك .لتجد ان احد العازفين بدأ يعزف نشاز يمر الموقف بسلام بفضل المايسترو ليظهر عازف اخر يعزف نغم نشاز يزداد عازفو النشاز واحد تلو الاخر .لتجد بائع انابيب يخبط على الانابيب بعنف ليبيع بضاعته ..او سيده من بير ام سلطان او عزبه القرود ترمى جردل ميه وسخه من البلكون على الناس الجالسين فى الصاله لتبهدل ملابسهم الاسموكن ..تمادى معى فى التخيل لترى ان بائع الانابيب اصبح يسير معه بائع روبابيكيا ينده فى الميكروفون بيكياااا بيكيااااا..ثم تجد متسول حسنه قليله يابيه ..ثم تجد بائع فول ويليه بائع سميط وجبنه ثم تجد بائعين للملابس الداخليه ينادون باتنين ونص وتعالى بص ..وتفاجأ ب دى جى عالى الصوت عند بائع اللب والسودانى .ومما زاد الطين بله ان العازفين الوقورين بالبدل الاسموكن اصبحو تدريجيا يرتدون ملابس مشجرة ومرة تلو الاخرى اصبحو يتناولون المخدرات ويمسون على بعضهم البعض ..وقد تفاجأ بكابوس اكبر ان عمر خيرت تحول الى أوفه الأياط ممسكا الميكروفون ليقترب من ابتلاعه ليحيي الجمهور ويقول انه يهدى لهم اغنيه يانى يانى يانى مش هاعمل كده تانى ..ولا تكاد تفوق من صدمتك لترى ان الرجل الوقور الجالس بجوارك تحول بقدرة قادر الى سيد العفش يعزم عليك ب جوان بانجو من المعتبر وهو جالس على كرسي وارد فراشه الحاج على الالوسي تاركا شبشبه تحت الكرسي ليفرك بين اصابع قدمه المتعفنه التى تحتاج الى معجون وتترش دوكو من اول وجديد ..هل اهتزت معاييرك وشعرت بصدمه نفسيه ....نعم لقد حدثت لى صدمه نفسيه انا الاخر فهذا مايحدث الان فى مصر ..فكل يوم تزاداد مساحه العشوائيه والقبح والفذارة ..ليس فى الشارع او فى الفن او اوفقط بل تغلغل التعفن فى الفكر ..الله يرحمك يامصر وربنا يسامحك ياحسن ياهلالى يالى قلبت عليا المواجع ببوستك الاخير
تحياتى
ميجوووووووو

Sunday, July 11, 2010

المتحرش الفيلسوف

امبارح ركبت المترو رايحه وسط البلد. طبعاً ركبت في عربية السيدات علشان ابعد عن الشر بس ما حصلش نصيب. ركب من محطة مارجرجس 6 متحرشين صغار او حراميه من الواضح انهم لسه ماتخصصوش في العربية. من ساعه ماركبوا وهما هاتك يا تنطيط وتريقاه على الستات وشتيمه قذرة في بعض بصوت عالي وكل واحد فيهم بيوعد التاني انه هايعمل فيه افعال فاضحه يعقاب على مجرد التفكير فيها القانون. الغريب ان اكبرهم ممكن يكون في تالته ابتدائي ....عرفوا بقه الكلام ده منين؟
المهم مشي المترو والمتحرشين الصغار يعثون فساداً
لغايه لما الموضوع زاد قوي قامت بنت جنبي شكلها شيك وبنت ناس قالتهم يحترموا نفسهم شوية. الكلام ده كان لما دخلنا النفق بعد محطة السيدة وفي الطريق لسعد زغلول

قام الـ 6 متحرشين شتموها وفيهم واحد حب يقل ادبه عملي فمد ايديه عليها. فمسكت ايديه ووقعته على الارض. فشتمها وبقيه العيال اتلموا عليها قلت لا مبدهاش. قمت تخنت في صوتي واستعنت على الشقا بالله. لما المتحرشين الصغار لقوا الموضوع كبر 4 منهم جريوا وفضل الواد قليل الادب وهو بيعيط وانا مسكاه وفي اثناء ذلك بشتم البت بشاتيم قذرة وبيقلع جذمته علشان يضربها بيها ومتحرش تاني عمل دور فليسوف الغبرة

وفي خضم معركتي انا والبت في الدفاع عن حقنا في الرضا بالهم في عربيه السيدات قامت واحده قالتلي حرام عليكوا سيبوا الواد. هي قالت الكلمتين دول وانا الدم ضرب في سقف نافوخي من جوه

انا: حرام!؟..........وهي قله ادبهم علينا مش حرام

الست: يا بنتي خلاص انتوا هزقتوهم والعيال بتعمل كدة علشان يسرقوا حاجة ولا يخطفوا حاجة متديهمش فرصه يعملوا كدة

انا: طب اما انتي عارفه انهم حرميه صعبانين عليكي ليه؟

الست: انتوا اللي صعبانين عليا لحسن يقلوا ادبهم عليكوا

انا: قولتها يقلوا ادبهم ياخدوا بالجذمة او يغوروا يركبوا في عربيات الرجاله

المتحرش الفيلسوف: انتي بتضربيه علشان عيل صغير ولو كان راجل كبير كنتي اتخرستي

انا: اسكت علشان ماضربكش انت الاخر

المتحرش الفيلسوف: الحمدلله ماحدش يقدر يعملي حاجة

انا: طب انا هانزل اجيبلك الامن بتاع المحطة علشان تقضي بقيه عمرك في الاحداث

نزلت محطة جمال عبد الناصر ادور حتى على عامل نظافه ملقتش..... باب المترو قفل وفيلسوف الغبرة بصلي باستهزاء والمترو مشي والمتحرشين السته لسه في العربية

سبيت التيت في سري ومشيت

وايقنت ان

الشعب المصري متخلف عقلياً بالفطرة - راجع موقف الست بتاعه الحرام

حتى المنحرفين ليهم فلسفه - راجع موقف فيلسوف الغبرة

المتحرشين الصغار ركبوا من محطة مارجرجس - المفروض انها محطة سياحيه وفيها تواجد امني مكثف - وفضلوا يتنططوا بشكل مستفز طول السكه محدش من امن اي محطة حاول يتدخل. الخناقه فضلت مستمرة من قبل محطة سعد زغلول لغايه لما نزلت في جمال عبد الناصر وبرضه محدش من الامن اتدخل. الغريب ان الحكومة ضحت بالصحه والتعليم علشان الداخليه تعيش لكن من الواضح انه مفيش فايدة

في تقديري سب التيت لن تتم محاسبتنا عليه كخطيه \ سيئه لانه اقل واجب مع اللي بيحصل دلوقتي

اثبتت الايام ان حكمتي صحيحه وهي انك في مصر تأخذ حقك بقدر قله ادبك

Love,

MishMish

Wednesday, June 9, 2010

Because She Is A Woman

تكبر لتصبح مثل امها
تتزوج وتنجب الاطفال وتصون شرف العائله
تضيع شبابها وهي تغزل الصوف لاعنه اليوم الذي ولدت فيه إمراءه
وحينما تأتي ساعتها لتموت
ستتسأل ..... لماذا اضاعت عمرها في طاعه
كل قوانين الله والوطن
لانه لا يوجد جحيم اسواء من حالة التناقض الدائم التي تعيش فيها
She will grow up like her mother
She will marry, bear childern
& honor her family.
spend her youth in needlepoint and rue tha day she was born a girl
& when she dies
She will wonder why she obeyed
all the rules of God & country
beacuse no biblical hell could ever be worse than this state of perpetual inconsequence.
Dengrous Beauty
Love,
MishMish

Thursday, June 3, 2010

هل انت مصرى بجد؟

اذا اردت ان تعرف انك مصرى بجد ام لا ..حاول ان تجيب على الاسئله التاليه بصراحه شديده

هل عندك مشكله ان تحتفل بعيد الميلاد او القيامه مع اصدقاؤك وتهنئهم من قلبك اذا كنت مسلما ..او تحتفل بالمولد النبوى وتشترى حلويات او تشارك اصدقاءك المسلمين عيد الفطر او الاضحى وتهنئهم من قلبك اذا كنت مسيحيا ؟

اذا كان هناك مبارة لمنتخب مصر ضد امريكا ..هل تتمنى الفوز لمصر ام تتمنى الفوز لامريكا لانك مضطهد بصفتك قبطى ..واذا كنت مسلما هل تشجع مصر ليس لانها بلدك ..ولكن لنصرة الاسلام ؟
فى حاله هزيمه مصر امام امريكا ..هل تفرح وتقول (احسن) ماهو من عمايل المسلمين فينا ولو كنا كسبنا كانو هايقولو نصر للاسلام ..واذا كنت مسلما هل تحزن لهزيمتك امام الصليبيين الكفار ام انك تاخذ الموضوع بروح رياضيه فالرياضه فوز وهزيمه ؟
هل تحب منتخب مصر لانه منتخب الساجدين ام لانه منتخب مصر ؟
هل احيانا لا تشجع مصر لان ليس بها لاعب قبطى واحد ؟ ام انك تشجعها لانك بتحبها ؟
ايهما اهم فى نظرك من الشخصيات الاتيه ؟ بن لادن - احمد زويل - موريس صادق - ابوتريكه- مجدى يعقوب -محمد حسين يعقوب - فاروق الباز - نجيب محفوظ -مايكل منير
القناه المفضله لديك : الرحمه -اون تى فى - الحياه - الناس -سي تى فى - ناشيونال جيوجرافيك -روتانا سينما
هل تشترى من سوبر ماركت صاحبه مسيحى ..او من سوبر ماركت صاحبه مسلم ..او انك لاتهتم بمن هو صاحب المحل ..وما يهمك هو المعامله الجيده والامانه فى التعامل ؟
اى علم يبهرك من الاعلام الاتيه : علم مصر - علم امريكا - علم السعوديه ؟
ما هى الاغنيه التى تهز مشاعرك : اغنيه ياحبيبتى يامصر - انا شارب سيجارة بنى - اناشيد سامى يوسف -ام انك لا تحب الاغانى وتحب ان تسمع اناشيد دينيه ..او تسمع ترانيم مسيحيه... باعتبار ان الاغانى حرام ؟
حينما تذهب الى مكان جديد مثل شركه او مدرسه او كليه ..اول ماتبحث عنه هو : مكتبه الكليه - السي اتش ( المكان المخصص لتجمع المسيحيين )- تبحث عن المسجد لتقابل الاخوة
فى المترو حينما تجد سيده غير محجبه : هل تقوم لها باعتبارها كبيرة السن - ام انك ترفض ان تقوم لها لانها غير محجبه - تنادى على سيده محجبه لتجلس مكانك
اذا كنت مسيحى ومهمل فى عملك : تعترف انك مقصر وتحاول ان تصلح من نفسك - تقول ان المسلمين يضطهدونى
فى العمل : تلعب سوليتير وفيفا وتتحدث فى تليفون الشركه وتقوم بالشات مع اصدقاؤك وتتفرغ لفقع الزنب فى زمايلك - ام انك تتهرب من العمل بحجه الصلاه
اخر عمل جيد قمت به هو : المشاركه فى حمله خيريه لمساعده اطفال الشوارع - التبرع لبناء كنيسه - التبرع لبناء مسجد-مش لاقى تاكل اصلا ومحتاج حد يتبرعلك
اى بلد تفضل العيش فيها :امريكا -السعوديه - مصر
اى جمله تعجبك من الجمل الاتيه : ان مصر وطن لا نعيش فيه ...بل يعيش فينا - طظ فى مصر وابو مصر والى مش عاجبه يمشي -اضربو الرصاص على المتظاهرين - ماحنا لو دخلنا الجنه مش هانلاقى حد نعرفه (عادل ادهم )-اننا نعيش ازهى عصور الديمقراطيه -وطنى لو شغلت بالخلد عنه ..نازعتنى اليه فى الخلد نفسه-جمله مكتوبه على سيارة نقل :ماحدش فاهم حاجه
هل تعتبر نجيب محفوظ : كاتب عالمى - كاتب اباحى - كافر لانه لا يكتب فى الدين- مبفهمش منه حاجه
تاريخ مصر :الحقبه الفرعونيه -الحقبه القبطيه - الحقبه الاسلاميه-جميع ماسبق
تخب زيارة الاماكن الاتيه : المتحف القبطى - المتحف الاسلامى - المتحف المصرى - ساقيه الصاوى والاوبرا -جميع ماسبق؟
مارايك فى الاسماء الاتيه : نجيب الريحانى: ممثل رائع بس عيبه انه مسيحى
الشيخ النقشبندى : انا مالى ومال التراث الاسلامى ..مصر كانت قبطيه
النتيجه : طبعا انت هاتجاوب بينك وبين نفسك ومش من حقى ادخل جواك ..واكيد مش هاعرف النتيجه .بس لو طلعت مصرى بجد هارفعلك القبعه وانحنيلك وتبقى شرفتنى ..ولو انت مش مصرى وبتتمحك فى اى دوله تانيه لاى سبب من الاسباب فمالكش عندى اى قيمه او اعتبار اما بقى لو كنت مكبر دماغك وجواك مصرى نايم ومكسل .حاول انك تدور جواك على انسان مصرى صميم ..انسان معتدل بيحب الخير بفطرته - مش مهم تكون متدين ولا لا ..لان ده حريتك الشخصيه ومش من حق اى حد انه يحاسبك ..المهم انك تشارك بجد وتحلم بجد ..روح الجامع زى مانت عايز ..روح الكنيسه زى مانت عايز ...بس اهم شيئ ماتنساش انك مصرى .
مع تحياتى
ميجوووووو
من فوق كوبرى قصر النيل
باكل ترمس ودرة مشوي

Monday, May 31, 2010

اجب عن الاسئله التاليه

مصر هبة النيل - في ضوء هذه العبارة اذكر التحركات التي قامت بها القيادات المصريه للحيلوله دون ضياع حصتها من ماء النيل عندما علمت بالمدولات والاجتماعات التي تعقدها دول حوض النيل بداً من عام 1997 لتغير بنود هذه الاتفاقيات التي تحكم نصيب كل دوله؟
علماَ بان هذه الدول لا تعتمد على مياة النيل كمصدر اساسي للحياه حيث انها تقع في المنطقه المطيره بعكس السودان التي تعتمد على مياه النيل في 77% من استهلاكها للمياة ومصر تعتمد بنسبه 94% من استهلاكها للمياه على النيل


العدو الاول لمصر هو اسرائيل - ما مدى صحه هذه العبارة بالاخذ في الاعتبار التزام اسرائيل ببنود معاهدة كامب ديفيد بينما يعتدي على حدودنا يومياً الاخوة الفلسطنين وتصل احياناً الى استخدام اموال مزورة في عمليات الشراء من المصريين وفي احيان اخرى الى قتل حرس الحدود المصريين. اما بقيه الاخوة العرب فغيروا من تلقاء نفسهم اسم مصر إلى مصرائيل
هل مصر دولة اسلامية / دينيه ام دولة مدنيه / علمانيه؟ وضح اجابتك في ظل الاحداث التاليه
حكم المحكمة الإداريه العليا بإلزام البابا شنودة الثالث بابا الاسكندرية وبطريرك الكرازة المرقسيه بالتصريح لـ 2 من الاقباط المطلقين بالزواج مرة اخرى. مع ان المادة الثانيه من الدستور المصري والتي تنص على: الاسلام دين الدولة واللغه العربية لغتها الرسمية ومبادئ الشريعه اسلاميه هي المصدر الرئيسي للتشريع. علماً بان الشريعه الاسلاميه تكفل للاقباط الاحتكام إلى شريعتهم
ورفض محكمة القضاء الاداري بمجلس الدولة تغيير ديانة الطفلين اندرو وماريو إلى المسيحيه - حيث ان القانون ينص على انه في حاله إشهار احد الوالدين لإسلامه يجب ان يتبعه تغيير ديانه الابناء الى الاسلام بإعتباره خير الديانات" حتى يصلوا الى سن البلوغ وهو الخامسه عشر

من اسباب قيام ثورة يوليو
استمرار الملك فاروق في تجاهله للاغلبيه واعتماده على احزاب الاقليه
قيام اضطرابات داخليه
سوء الحالة الاقتصاديه في مصر
الظلم وفقدان العداله الاجتماعيه بين طبقات الشعب وسؤ توزيع الملكيه وثروات الوطن
سفاهه حكم الملك فاروق وحاشيته في الانفاق والبذخ على القصر وترك الشعب يعاني
طب ايه؟

وكم ذا بمصر من مضحكات ولكنه ضحك كالبكاء - المتنبي
هل تغير حال مصر في ايام المتنبي (915 - 965) عن حال مصر في 2010
Love,
MishMish

Friday, May 21, 2010

فلنحتسي العجه

كنت جالس على المقهى فى المساء مع صديقى الاستاذ ماجد و والاستاذ مراد ..هما اكبر منى ببضعه اعوام قليله ..ياتيان يوميا الى المقهى بعد يوم شاق لكسر الملل اليومى ..تجدهما يضعان مبسم الشيشه فى فمهما بدون ان ينطقا باى كلمه وتتشعلق حواجبهما مع كل نفس دخان ..ويصبان تركيزهما مع التليفزيون فى المقهى فهما من عشاق الافلام الاجنبى ..ويبدأن فترة التوحد والتعايش مع الفيلم ويخرجان من الواقع حتى انك تشعرهما بانهما تمثالان ولا تشعر بانهما حيان الا مع اصوات كركرة الشيشه ..الاستاذ ماجد يسأل سؤاله التقليدى مع بدايه الفيلم ..مين الكويسين ومين الاشرار ؟ مراد يرد بهدوء : اتفرج وانت تعرف وبعدين مانت اتفرجت على الفيلم ده خمسين مرة وكل مرة تسأل نفس السؤال .طبعا ماجد من نوعيه بسيطه من البشر الذين يتعاملون مع الناس على انهم ابيض او اسود ..استمرت احداث الفيلم وكان يراقبان الابطال وهم يحاربون الاشرار ..بينما انا كنت ارقب فيلما من نوع اخر ..كنت اراقبهما شخصيا
جاءت احدى الجمل على لسان بطل الفيلم لاحد الاشخاص فيقول له : انك صعب المراس ..سكت ماجد فترة وبعدها سال مراد : يعنى ايه؟
انزعج مراد : هو انت كل شويه تسألنى نفس السؤال ؟ ..صعب المراس يعنى مش سهل يعنى راجل صايع ويوديك البحر ويرجعك عطشان فهمت ؟ ابتسم ماجد ابتسامه خفيفه وانشكح واستمر فى متابعه الفيلم مع الرجل صعب المراس .
بصراحه صعب عليا ماجد لانه من الشخصيات البسيطه التى لا تتعب دماغها فهو انسان بسيط يريد ان يحدثه احد بلغه بسيطه ..فهناك الملايين مثله يحبون ان يحدثهم الناس بلغه الشارع لا ان يحدثهم بلغه صعبه الفهم ..فتجد ان الافلام الاجنبى المترجمه تحتوى على العديد من الالفاظ المعقده بالنسبه للرجل البسيط او الانسان العادى ..والمصرى عموما يحب البساطه ويحب ان يتكلم بلغه سهله فتجد مثلا الشعر العامى لصلاح جاهين والابنودى وبيرم ونجم هو الاقرب الى قلب الشارع المصرى .. فهذه هى اللغه التى يفهمها وتمس قلبه بسهوله وهذه هى عظمه الشخصيه المصريه التى تفرض نفسها من المحيط الى الخليج وهذا هو سر الاتجاه الى الفن المصرى وكان يقال سابقا انه لو تقابل مغربى مع خليجى لا يفهمان بعضهما فيتحدثا باللهجه المصريه الرائعه التى تصل بسهوله الى متلقيها .
اما السؤال هنا : لماذا لا تكون هناك ترجمه مصريه للافلام الاجنبى لماذا نستورد الترجمه من لبنان ؟ او من اماكن اخرى ؟ حتى الترجمه تستوردها بلد رفاعه الطهطاوى ؟ اعتقد انه لو اننا اسسنا معامل ترجمه مصريه صميمه للافلام الاجنبى فسيكون جزء من اعاده فرض شخصيتنا وهويتنا كما كانت من قبل حينما كان جمبع الناس يلتفون حول التليفزيون العربى الذى كان يستمد عظمته من الروح المصريه .
انظر الى ترجمه الافلام الاجنبى ..فتجد ان المصرى لا يستسيغ كلمه كيلو غرام او اسم مثل ماغى ..هو يريد ان يسمع كلمه كيلو جرام او ماجى ..ايه المشكله لو ان الترجمه تمت باللهجه المصريه التى نفهمها ؟ يعنى تخيل معى انك تشاهد فيلم اجنبى فيه عبارات مثل مكابح ..كام واحد عارف يعنى ايه مكابح؟ المكابح هى الفرامل .ماتقول فرامل وتخلصنى ..عمرك شفت عيل صغير راكب عجله وعمال يجرى بيها ويصوت ويقول ماعيش مكابح ماعيش مكابح ..ولا مثلا يقولك البرغى ..والله الى ترجم ده عايزله برغى فى عينه ماتقول مفك ..خلاص حبكت الثقافه ؟ دا غير كلمات كتيرة زى البندورة (الطماطم ) والركمجه (رياضه ركوب الامواج ) والجعه (البيرة )مالناس كلها عارفه ابو لالو بتاع البيرة ..المستذئبون..عمت صباحا ..نقانق ..صدقونى لو حد راح لمحل يطلب ساندوتش نقانق مش عارف صاحب المحل ممكن يعمل فيه ايه
خلاصه القول الشعب المصرى يحب من يخاطبه بلغته التى يفهمها ويحسها وتقترب من مشاعره والكلام هنا الى الساده الوزراء والساده المسئولين الذين يخاطبون الشعب بعبارات كبيرة عن الديمقراطيه والفعاليه المجتمعيه بينما الناس تفهم اكثر فى ساندوتش الفول والطعميه
لا يهمهم هذه العبارات المهم هو هو الواقع الملموس ..لذلك امام الساده المسئولين فرصه ذهبيه ان يقتربو اكثر من الناس ويخاطبوهم بعيدا عن ترجمه انيس عبيد ..فالوزراء يتحدثون بطريقه الافلام الاجنبى حينما يشرب البطل وصديقته البيرة ويرفعان الكؤوس عاليا : فلنحتسي الجعه
بينما المواطن البسيط يقول : فلنحتسي العجه ..الفرق كبير صح؟
تحياتى
ميجوو
من امام عم عطيه بتاع الفول

Tuesday, May 11, 2010

مستر حسين ..خذ فطيرك

كان الاستاذ حسين مدرس اول لغه عربيه ووكيل القسم الثانوى منهمكا فى الشرح فى فصل اولى تالت ..كان الدرس عن فعل الامر ..بالصدفه البحته كان يكتب فعل الامر من فعل اخذ ..فكتبه خذ ..فجأه علا صوت طالب من الطلاب يامستر ايه الفعل ده ؟ فاجابه المستر ببراءة :خذ ..فقال له الولد خذ فطيرك ..طبعا الايحاء واضح ..جن جنون مستر حسين ..فهو مدرس من 29 سنه وتخرج على يديه اجيال لم يجروء احد على ان يقول له هذه الكلمه ..سحب الطالب من قفاه على مكتب الناظرة ..وتم عمل تحقيق ..وكتب فى شكواه ان الطالب قال له خذ فطيرك وان هذه سفاله وانه طالب غير محترم ويجب اتخاذ اجراءات عقابيه معه ..لم تفهم الناظرة مغزى الكلمه فقالت لمستر حسين انا مش شايفه شتيمه فى الكلمه ..وكان الطالب يدافع عن نفسه بانه ادخل الفعل فى جمله مفيده وان مستر حسين هو الى نيته وحشه ..وان مستر حسين يضطهده لياخذ درس خصوصى معه ..وانه بدلا من ان يشكره على اجابته ويكافئه على نشاطه داخل الفصل يريد ان يعاقبه ..وجد المستر حسين نفسه فى موضع المتهم بدلا من المجنى عليه ..صعدالشكوى الى مديرة المدرسه وتم عمل تحقيق ..ولكن هذه المرة اتى والد الطالب المحامى الكبير ذو العلاقات والنفوذ ..والذى على علاقه وطيده بالمديرة ..وهدد المدرس بانه سوف يشكوه فى الوزارة لانه يجبر ابنه على اعطاء الدروس الخصوصيه مالم يسحب شكواه ..فوض المستر حسين امره لله ..وسحب شكواه...حتى لايتم اتهامه بالباطل ..لكن بعد يومين استدعاه مدير شئون العاملين ليبلغه انه تم خصم يومين من راتبه لانه يسيئ معامله التلاميذ وان هذا قرار مديرة المدرسه ...صدم المستر حسين واهتزت معاييره ..بقى الواد يقل ادبه وانا الى اخد يو مين خصم ؟؟..ايه البلد دى ؟ ...خرج من المكتب بعد ان وقع على الجزاء ذابل الوجه ..بعد ان اخذ فطيره ..وتباهى الطالب امام زملاؤه بما فعله فى استاذ حسين ..حتى انهم اطلقو عليه لقب ...استاذ حسين خد فطيرك
قصه حقيقيه من ملفات المخابرات المدرسيه المصريه
تحياتى
ميجوووووو

Tuesday, April 6, 2010

وده غسلوه إزاي بقه؟

مشمش: ازاي حضرتك يا فندم وعامله ايه؟

السيدة الاولى: الحمدلله نشكر ربنا

مشمش: انا بتصل علشان اسأل على صحه سيادة الريس يا ترى ايه اخباره؟

السيدة الاولى: الحمدلله العمليه مشيت كويس وهو بيتحسن

مشمش: طب الحمدلله. صدقيني انا كنت قلقانه عليه قوي وبدعيله من قلبي

السيدة الاولى: مرسي على ذوقك هو اتحسن دلوقتي الحمدلله

مشمش: اوكي. بلغيه سلامي وقوليله ربنا يخليه لينا ومايحرمناش منه ابداً

افتح عينى لاجد نفسي لست في غرفتي افكر في لا منطيقه المكالمه

يا نهار اسود! - على رأي حماتي

حتى في الحلم

طب غسيل العقل الواعي وعارفينه انما العقل الباطن غسلوة إزاي بقه؟

قصه حقيقيه
Love,
MishMish

Saturday, April 3, 2010

امسك حرامى

كنت جالسا فى منزلى مع حرمنا المصون وابنتنا العزيزة ساندو فى امان الله ..فجأه سمعت صوت خناقه ..الحق الحق ..جريت ابص من الشباك بدافع الفضول كما عادة الشعب المصرى الى يموت فى المصايب .لقيت ناس ماسكين شاب فى التلاتينات ومتجمعين حواليه زى الحاوى وهاتك ياضرب فيه ..وهو يصوت زى الستات ويعيط زى العيال الصغيرة ..يابن التيييييت ياحرامى ..انت الى سرقت الدكان بتاعى الاسبوع الى فات..هاتوه على القسم ..الناس تطوعت بكل ماتجود به الانفس ..وهاتك ياسيمفونيه عزف على قفاه والى ربنا يكرمه بشلوت والى يتطوع ويكيلله بونيه فى سنانه ..اتضح ان الحرامى سرق 2 جنيه من طفل صغير كان رايح يشترى حاجه ..ولما جريو وراه رماهم فى الشارع ...وحين حانت اللحظه الحاسمه فى جر هذا الحرامى الى القسم ..قعد يعيط ويقول : والله انا اول مرة اعملها فى حياتى والله العظيم جعان وماكلتش من يومين .ابوس ايديكوسيبونى اروح ..والله العظيم جعان ..انا لو كنت سرقت كنت سرقت محل ولا شقه مش اسرق اتنين جنيه ..حاله صمت بين الناس ..وتركه الرجل الضخم الذى كان معلقه من قفاه ..تطوع احد الرجال الكبار فى السن ..خلاص ياجماعه كله يروح لحاله ..سيبونا نتصرف معاه ...انصرف الجميع فى حاله صمت ..جلس الحرامى على الرصيف منهار فى البكاء وتطوعت احدى السيدات بطبق به ارز وقطعه لحمه ..وتطوع اخر بكوب شاي ...التهم الحرامى الطعام بنهم شديد وشرب كوب الشاى ..لكن قبل ان يتركوه يمشي ناداه الرجل الضخم واعطاه خمسه جنيهات ..سار الحرامى فى طريقه ..ونظر نظرة ذات مغزى للناس ومسح دمعه كانت تسربت على خده ......انتهى المشهد
تحيااااتى
ميجوووووو

Monday, March 29, 2010

كلام اخوك الكبير

كان فيه مسلسل بييجى زمان وكان فيه جمله معكننانى ..المسلسل اسمه غوايش وكان فيه جمله مشهورة : كلام اخوك الكبير لازم يصير ياولدى ...ليه يابوى ؟ ...عشان اخوك الكبير ..كان لازم فى الجمله دى يقولو : ليه يابوى ؟ رخامه ياولدى ..غتاته ياولدى .بنفس المنطق بيتعاملو بيه معانا .حاجات كتير كانو بيحشو دماغنا بيها .بس لازم نسمع كلامهم وخلاص ..ليه ؟ عشان هما الكبار وكلامهم مطلق ومافهوش نسبه خطأ.واحنا لاحول لينا ولا قوة ..تلاقى مثلا مذيعه تطلع فى برامج الاطفال . لازم تاكل جزر عشان يقوى النظر ..طب انا مش بحب الجزر ومش باكله ونظرى سته على سته ..والى تقولك كل سبانخ عشان فيه حديد ..مش تفهمنا يعنى ايه حديد .طفل صغير هايعرف ان فيه حديد يعنى فيه مسامير وشواكيش .. عملتلى عقده من السبانخ طول عمرى .. حطت لنا سكه واحده مافيش غيرها .يا السبانخ يا اما هايجيلك انيميا ..طب قوليلنا حاجات تانيه فيها حديد .عندك فى كتاب القراءة بلاوى تانيه ..يقولك ايه الصدق منجى ..ويجيبلك قصه هبله بتاعه عيل صغير كان واخد مبلغ كبير يوصله امانه لجدته (مش عارف جدته كانت هاتعمل بيهم ايه ..والعيله يعنى مفهاش رجاله عشان يدوها للعيل الصغير ) فطلع عليه اتنين حراميه وقالوله معاك فلوس؟ (حراميه جنتل ) فرد عليهم وقال ايوة ..قوم واحد من الحراميه المؤدبين قال للتانى ..يالا بينا ياعم ده شكله معهوش فلوس ده لسه عيل فسابوه ومشيو ..وبكدا الصدق منجى ..يعنى لو طلع عليك دلوقتى عيال صيع وثبتوك فى الشارع وخدو موبايلك وساعتك ..فانت تقولهم انا معايا فلوس كمان شايلهم فى الشراب ومخبيهم ..فيقولو عليك انك واد صادق ويرجعولك الفلوس والموبايل ويمكن يدولك جوز جنيهات ..ليه ؟ لان كتاب القرءة قال كدا ..والقصه التانيه الشهيرة بتاعه حمدان والذئب ..تمسكها تلاقى ان واحد اهبل ومتخلف عقليا مألفها وواحد تانى اهبل منه حطها فى مناهج الوزارة ..يقولك ايه ..حمدان كان كل شويه يقول للناس الحقونى فيه ذئب ..ولما ييجويلحقوه يقولك وضحكت عليكو مافيش ذئب ولا حاجه ..انا بصراحه كنت معجب جدا بحمدان وبحركاته ....تخيلو ان حمدان قاعد فى الصحرا وبيرعى غنم..ومكانش فيه تليفزيون ومكانش فيه نت ولا اى حاجه يسلى بيها نفسه ..كان هايعمل ايه يعنى ؟ فاضي وزهقان ..وكل شويه الناس تيجى تنقذه مايلاقوش ذئب ويطلع حمدان بيشتغلهم ..مش فاهم هما هبل؟ عملها فيهم كذا مرة ..غلطتهم انهم صدقوه ..مايسييبو الذئب ياكله ولا يتنيل على عينه ..عيل واطى صحيح ..والقصه دى بالذات انا حاولت افهم ايه المغزى فيها معرفتش ..يعنى ايه القيمه الى الانسان ممكن يطلع بيها ..يعنى الواحد مفروض يعمل ايه فى الاخر ؟ طب انا معنديش خرفان وساكن فى حته مفهاش ذئاب ..والقصه بتاعه الارنب الغضبان دى بقى حكايه تانيه ..ارنب مش عاجبه انه ياكل كل يوم خس وجزر ..ماهى حاجه تزهق صحيح ..واتجرأ بس وقال لامه .. الجمله الشهيرة بتاعت : كل يوم خس وجزر ..طبعا بقى انهالت عليه العقابات السماويه وانه هايخش النار وانه مش بيحافظ على النعمه وحظه انه مكانش عايش اليومين دول كان قالوله على عذاب القبر وكانو جابوله الثعبان الاقرع ياكله ..كل ده عشان نفسه هفته على حاجه تانيه غير الخس والجزر .طب بذمتكو فيه واحد فيكو يرضى ياكل طول حياته نوع واحد بس من الاكل ؟ كان يجرى ايه لو امه خدته على كنتاكى ولا مكدونالدز مرة كل اسبوع ولا كل شهر وتجيبله الوجبه المفرحه وكانت حلت المشكله وبلاش صداع ..هانعد نحل مشكله الارنب وامه؟ وبعدين اصلا ابوه فين ؟ مش له دور برضه ويعقل امه ويقولها كلمتين حلوين بدل ماهى معكننه عالواد؟ ..ولا هو شغال وطافح الكوته عشان فى الاخر يخش عليهم بحزمه خس وجزر؟ ..تحس ان الى عامل الموضوع ده واحد اقطاعى وبيشجع العيال بس فى صورة مستترة انهم كل يوم ياكلو فول وميتبتروش على اهاليهم ..نيجى بقى لقصه الاتحاد قوة بتاعت الفلاح الى جمع ولاده وجابلهم لبشه قصب وقعد يرخم عليهم ويخليهم يكسرو القصب لما ايديهم ورمت من الضرب ..طب ياعم الحاج ماتقولهم الكلمتين دول من الاول ..لازم تخلى ايديهم تورم عشان فى الاخر تقولهم الاتحاد قوة ؟ ماتقولهم الاتحاد قوة من الاول ولا هى رخامه يا ولدى؟ ...ومن القصص الغريبه برضه قصه الارنب والسلحفاه ..مش عارف كانو بيضحكو على مين ؟ يقولك ارنب بيسابق سلحفاه ؟ مش عارف ايه الى يخليهم يتسابقو اصلا؟بيلعبو فى الاولمبياد الشتوى ؟ ويقولك ايه الارنب قعد يضحك على السلحفاه عشان بطيئه قام خدله تعسيله قبل مايخلص السباق ..ماهو طبيعى انى لو بسابق سلحفاه كنت هاناملى يومين ..انا لو من الارنب كنت روحت عملت شوبنج وصيفت يومين فى اى حته ورجعت ..وفى الاخر تلاقى السلحفاه كسبت السباق ..هانستعبط؟ سباق قعد كام شهر ده ؟ وكله كوم وقصه الاسد والفأر الى قعد يقعد يقرض فى الشبكه ..ايه الى يخلى فار يروح يتكلم مع الاسد اصلا ؟ انا لما بشوفه فى جنينه الحيوانات ركبى بتسيب ..يقوم الفار يروح يتناقش معاه كدا بكل سهوله ؟ هو ده المنطق الى بيحاولو يعلموه لينا ..كلام اخوك الكبير لازم يصير ياولدى حتى لو غلط ..حتى لو مش منطقى او حتى يحمل فى طياته قيمه ..لكن هذه القيمه ساذجه وغير منطقيه ..نسي المؤلف ان العصر يتطور وان تعليم القيم ليس اهم من كيفيه تطبيقها
تحياااتى
ميجوووووو

Wednesday, March 24, 2010

انزل اعلانات على المدونة ولا مانزلش ..... تلك هي المسألة

الاعلانات
ذلك الوحش الذي صنعه سعينا المحموم وراء سراب إشباع رغباتنا
محاضرة "الانترنت مغارة الكنوز" - هكذا قال الباشمهندس
بقالنا كام سنه مديين معظم وقتنا للانترنت، دلوقتي جه الوقت اللي الانترنت تردلنا فيه الجميل. الموضوع بسيط
في مواقع بتدفعلك فلوس لو دخلتها واتفرجت على الاعلانات اللي فيها
في مواقع تانيه بتدفعلك فلوس لو حطيت الاعلانات بتاعتها على الموقع بتاعك
في عام 2006 تم صرف 391 بليون دولار في مجال الاعلانات على مستوى العالم
ترتبط الاعلانات بارتفاع معدلات التضخم ارتباط وثيق. لانها تهدف الى زيادة معدلات الاستهلاك وبالتالي تشبع المجتمعات بالثقافه الاستهلاكيه
شبيجيل - اون لين: اعلنت انه عام 2008 تفوقت اعلانات الانترنت (105.3 بليون دولار) على مثيلاتها في التليفزيون (98.5 بليون دولار) - لاول مرة
مع ذلك لا تعتبر هذه الارقام هي المبالغ الفعليه لتكلفه الاعلانات حيث انها لا تتضمن - على سبيل المثال - تكلفه العروض والتخفضيات
قليل من المستهلكين يدركون انهم هم الممولون الوحيدون لهذه الاعلانات حيث ان تكلفتها تكون متضمنه في ثمن السلعة
والسؤال هو
انزل اعلانات على المدونة ولا مانزلش؟
من وحي حوار مع عمو عصام
Love,
MishMish

Tuesday, March 16, 2010

حكام اجانب


انتشر العنف فى الدورى المحلى ..الملاعب فوق فوهه بركان ..الجماهير تقذف وتشعل الشماريخ فى اماكن مختلفه من الملعب ..انهم يشعرون بالظلم التحكيمى الفادح ..فتلك الفرق المهدده بالهبوط لا تملك المال والسلطه التى تجعلها فى قمه الدورى او حتى تتنافس منافسه شريفه مع باقى الانديه بالرغم من ان هذه الانديه انديه جماهيريه وعريقه تضرب جذورها فى اعماق الارض المصريه ..هذه الانديه على سبيل المثال : نادى الاقباط ونادى النوبه ونادى البدو الرياضي ونادى المثقفين مضطهددون ونادى المصريين الغلابه ..هذه الانديه ظلت تطالب بحقوقها المشروعه بطرق قانونيه داخل اطار محلى ..لكن رئيس لجنه الحكام الرئيسيه سرعان مايخرج امام الفضائيات ويؤكد : التحكيم المصرى بخير ..لا مساس بوحده الدورى المصرى ...الدورى المصرى نسيج واحد...وان جميع الافرق متساويه فى الحقوق والواجبات ..وان ما يحدث هو تنفيذ لاجنده خارجيه تستهدف ضرب الدورى المصرى .وانهاء دوره الريادى فى المنطقه ..لقد نفذ صبر هذه الانديه ..ولم تلجأ للاتحاد الدولى خوفا من اتهامهم بزعزعة استقرار الدورى المحلى والاساءة الى سمعه مصر فى المحافل الدوليه ... بعض هذه الفرق اوشك على الهبوط الى الدرجه الثانيه وبعضها هبط فعلا الى الدرجه الثالثه والرابعه وقد يختفى اسمها من الوجود ويصبح وجودها مجرد ذكرى تاريخيه تحكيها الاجيال ...هذه الفرق لم تجد من يحل لها مشاكلها بطريقه حاسمه ..كل الحلول عبارة عن مسكنات ...ولم يعد اى اختيار باق اما تلك الفرق حتى لا تنقرض الا اختيار واحد فقط .... وهو طلب حكام اجانب
تحيااااتى
ميجوووو
من مدرجات الدرجه الثالثه
دورى المظاليم

Friday, March 12, 2010

حـلــم

يا صاحبي ياللي راكن حلمك فوق الرفوف
بص لنفسك في المرايه! بالذمة مش مكسوف
تحقيق الحلم ملوش علاقة بأي خوف
ولا اصل اصلي انا عندي ظروف
ده عاوز قلب جامد وميعرفش خوف
خطوة بخطوة تتقدم كل الصفوف
عافر في الصخر ورا حلمك وطوف
تحقق بدل الحلم الف .. ميات .. الوف
هيفضل لحد امتى حلمك اسير
افتحله القفص علشان لفوق يطير
حلمك مش هيجي وانت قاعد في السرير
انفض من عليك التراب والكسل
دا اخر الطريق المر طعمة عسل
كلام موزون ومتجرب ... بس جرب
هتعلى وتعلى وينضرب بيك المثل
إهداء للبلكونة من اشرف ناسان

Wednesday, March 3, 2010

مركب المحروسة بتغرق ليه؟

الحكايه ان مركب المحروسه ده كان مركب ولا في الاحلام. نظام ونضافه وناس عايشه مع بعضها كافيه خيرها شرها وفي يوم نط عليهم جماعه كبار في العدد وقالولهم ارفعوا المراسي. الناس قالوا: خير ليه؟ ردوا الكبار مفيش وقت للرغي والكلام الكتير. نتحرك بس وبعدين نبقى نحكيلكم عن موضوع خطير. الناس سمعت الكلام، رفعوا المراسي وبعد شوية سمعوا صوت نفير. ده تنبيه وتحذير الجماعة قررت تغمي عينيكوا اصل البحر هيبقى عالى والمشوار زي مانتوا عارفين طويل. قالوا:طب والموضوع الخطير
اتغموا بس
دلوقتي بس نقدر نقولكم عالموضوع الخطير
الموضوع يا سيدي انت وهو "ان ربكم في خطر والتانين اعداء الدين بيدبروله مؤامرة. خدوا بالكم ده فيه كمان اجنده خارجيه وتربص دولي. هتعلموا ايه يا مؤمنين؟". يا نهار اسود مؤامرة على مين؟! محدهاش هيبات الليله دي سليم
قامت الناس على بعضها. ناس ماتت وناس اتعورت والمركب طبعاً اتأثرت
واتفتح تحقيق اسألته واحدة لكل التانين
عددكم كام؟
ايه اللي فاضلكم في المحروسة؟
مين واقف وراكم من برة؟
ليه بتلجأوا لمنظمات بره؟
سافرت ...... قبل كدة؟
عندك اقوال تانيه؟
ايوه يا بيه عايز اعرف كرهتونا في بعض ليه؟ ومركب المحروسه بتغرق ليه؟
هشششششششششششششششش
"خد بالك فيه اجندات خارجيه وتربص دولي"
انت نسيت ولا ايه؟
من وحي حوارات المصري اليوم مع رؤساء الطائفه اليهوديه في مصر (السيدة كارمن والسيد بن جدعون) والنوبين في الداخل والخارج - بتواريخ 16، 17 فبراير 2010

Love,
MishMish

Saturday, February 27, 2010

الوزير جاى

ناسف على فترة التاخير فى الفترة الماضيه..وذلك لدواعى بدايه الترم التانى وما يحمله من تبعيات خطيرة على المستوى الدولى ..من تحضير ودفاتر درجات وتكت وجلاد وطباشير والنوم مبكرا لمطارده العيال فى المدرسه النظيفه الجميله المتطورة التى بلغ التطور فيها الى اقصى درجه ..فمدرستى حائزة على الجوده التعليميه ودى شهاده زى شهاده الايزو ..يعنى من الاخر ميه ميه ..وبالمناسبه فيه بند فى الجوده احنا طبقناه فى المدرسه وهو سبب تقدمها واذدهارها.. البند ده اختلف عليه معظم الناس لانه بند قوى قد يسبب طفرة رهيبه فى العمليه التعليميه البند ده بيقول بالنص الواحد : الحوكمه فى اطار من المعلوماتيه ..الحقيقه انا ذهلت اول ماسمعته ..مش عن جهل والله لكن لانه اخيرا احنا عرفنا مشكلتنا فى التعليم ..المشكله ياساده هى اننا معندناش حوكمه ..اللفظ ده عاجبنى اوى بيفكرنى بالعولمه وبالقولبه وبالمعلمه والخلجنه والكوكبه والفشخره و اللهلبه والزفلطه بقى اى واحد عايز يبقى مثقف يروح راقع لفظ من دول..يقوم الناس علطول يعرفو انه مثقف ويخافو منه ويمكن يقولو عليه ليبرالى كمان .وكمان لفظ المعلوماتيه بيفكرنى بسنيه الكلوباتيه اشهر راقصه فى العشرينات .المهم ..الحوكمه فى اطار من المعلوماتيه بند رهيب وضعه الجهابزة من اساطين التعليم فى مصر لعلمهم بان المشكله فى الحوكمه وليس فى شيئ اخر ..انا مرة شفت واد سايب الحنفيه مفتوجه فى المدرسه قمت زعقتله وقلتله انت ياولد ..انت معندكش حوكمه ولا ايه ؟ مش لازم تبقى فى اطار من المعلوماتيه ؟ راح الواد معيط ومبربر لما سمع كلمه حوكمه وقالى : والله منا يا مستر دا الواد محمد فتحى بتاع تالته رابع هوالى عمل كدا ..طبعا فرحت وقلت الحوكمه دى كلمه رهيبه زى كلمه البلاللام ..كلمه سحريه تفتح الابواب المغلقه ..ياسلام عليك يا واد ياميجو يامفتح ..بعدها طلبنى المدير عشان فيه شكوى من الاولاد ان فيه درس مش فاهمينه ..دخلت بكل ثقه وقلتله : يااستاذى الفاضل انا بطبق الاساليب التربويه داخل الفصل وبحاول اطور منهم (تذكرت الكلمه ) وبعدين احنا بنطبق الحوكمه فى اطار من المعلوماتيه ..بصلى واتبرجل ..وقالى انا عارف انك بتشرح بضمير وان الحوكمه شيئ مهم (خاف لا كلمه الحوكمه تكون حاجه وحشه ) بس حاول انك تطبقها فى اطار من المعلوماتيه عشان متجيش مشاكل .. خرجت بعدها قابلت عم عادل الفراش كان عايز يقبض حساب الشهر بتاع الشاى والقهوة ..قلت لما اجرب عليه تاثير الكلمه
حسابك كام ياعم عادل ؟ 15 جنيه يا استاذ
ايه ده ؟ انا مشربتش كل ده ..انت كدا عندك حوكمه فى اطار من المعلوماتيه
عمل صوت قبيح من مناخيره وقال لفظ على وزن حوكمه بس بالبلدى
معلوماتيه ايه ..انا عايز المعلوم ..والا مش هاتشوف شاى ولا قهوة تانى
الحوكمه يا افاضل كلمه رهيبه ..فضلت استخدمها مع اى واحد يقابلنى فى المدرسه ..واكتشفت انها اعادت الفصول الى نظافتها وانها جددت الكراسي التى يجلس عليها التلاميذ ..وطورت المناهج وطبقت الكادر وطبقت تأمين صحى سليم على التلاميذ ..وطبقت انشطه وحدثت معامل الكومبيوتر واخرجت تلاميذ نابغين هايبقو زى زويل ومحفوظ فى المستقبل ووووووو..عرفنا المشكله فين ؟
الحوكمه فى اطار من المعلوماتيه
ركبت ميكروباص كان زحمه اوى والركاب فوق بعض وقلت اجرب على السواق الكلمه : بقولك ايه ياسطى هى العربيه مافيهاش حوكمه؟
بصلى شذرا على انغام اغنيه يانى يانى يانى الى كان مشغلها ..حضرتك عايز تنزل عند الحوكمه الدستوريه العليا ؟
قلتله لا ..انا بسالك على الحوكمه
قالى : ااه فهمت ..الحوكمه الصبح كانت عامله كمين عالطريق برة وخدت رخص زمايلى ..بس انا طلعت ناصح ومشيت من جوة
روحت البيت وقلت لما اشوف مشمش هاتتاثر بالكلمه ولا لا ؟
دخلت وسالتنى السؤال المعتاد: اتاخرت ليه ؟
استجمعت شجاعتى وقلت فى سري انا معايا سلاح خطير : كان عندنا حوكمه فى اطار من المعلوماتيه
متخضتش وفضلت زى ماهى ..قمت قايلها تانى ...كان عندنا حوكمااااااااااه
سكتت وبرقت
انت مش عارف ان البيت هنا فيه قولبه فى اطار من الامبرياليه؟
خفت وسكت
انا اسف مش هاتاخر تانى
تحياتى
ميجوووو
من امام الحوكمه

Thursday, February 18, 2010

الضربه القاضيه

يلتف الجمهور حول حلبه الملاكمه ..الصيحات تتعالى والهتافات تتوالى ..الجميع متعطش للفوز ..تصفيق حاد ..لقد دخل الملاكمان وهما يستعرضان عضلاتهما المفتوله وينظران الى بعضهما نظرة تحدى ووعيد ..يخلعان ملابسهما المطرزة بالالوان الفاقعه .ينتفضان مثل الطاووس ..ويعلن المذيع عن بدايه الصراع

الجوله الاولى

صاحب شركه خاصه يذل عماله وموظفيه ويمتص دماؤهم ..ينهكهم فى العمل ويهددهم بان الباب يفوت جمل وان لو حد عايز يمشي هايلاقى الف غيره وبنص المرتب والى مش عاجبه يضرب دماغه فى الحيط ..بينما الموظفون فى جلساتهم السريه يشتموه ويتهموه انه حرامى وانه مبيفهمش حاجه ولولاهم ماكانت الشركه وقفت على رجليها وانه مايقدرش يستغنى عنهم ولو مشيو الشركه هاتقع .يتفقون فيما بينهم اتفاق غير معلن ان ينتقمو منه بطريقه لا اراديه ..استهلاك التليفونات فى المكالمات الخاصه ..تصوير اوراقهم الخاصه على ماكينه التصوير الخاصه بالشركه .. بذل اقل مجهود فى العمل ..بذل اكبر مجهود فى لعب سوليتير وفيفا والتشات على الفيس بوك ..ومن جهه اخرى قرر هو ان يستغل ادنى فرصه فى عقابهم ..تاخير = خصم ..عدم الاهتمام بالمظهر ..يعنى مش لابس الكرافت او مش حالق دقنك ....العكننه على الموظفين ب ميييتنج كل شويه بشويه كلام فاضي ...وهكذا يستمر الخصمان فى تسديد الضربات للاخر ..لكن تنتهى الجوله الاولى بدون ضربه قاضيه

الجوله الثانيه

تتهم الزوجه زوجها بانه انانى ولا يفكرالا فى نفسه ..لا يهمه غير رغباته الشخصيه ..كل مايهمه هو العوده للمنزل فيجدها فى انتظاره والطعام مجهز ليلتهمه ..ويدير مفتاح التليفزيون ليشاهد مباراه الكرة ..ثم تنتظره فى غرفه النوم مرتديه الملابس الساخنه وتشعره بانه هارون الرشيد ..ليعطيها بعد ذلك ظهره ويغط فى نوم عميق ..بينما هو يتهمها بانها انانيه وانها لاتعرف كيف ياتى لها بالمال ..وانه طالع عين اهله فى الشغل عشان يجيب القرش وهى مش حاسه بيه ..وانه ضحى بكل حاجه عشانها ومش مخليها محتاجه حاجه هى وعيالها ..هى تشكوه فى جلساتها السريه لصديقاتها وتنتقم انتقام غير معلن ..فقد تتعمد ان تسمع كاظم الساهر امامه او ان تقرأ كتاب لاشعار نزار قبانى ..وهو يتعمد الذهاب للمقهى او قضاء اكبر وقت خارج المنزل ..هى تفكر فى الخلع ..وهو يفكر فى الطلاق

والاولاد يفكرون فى الرسوب فى المدرسه ..وتتوالى الضربات الساخنه ..لكن لم تأتى الضربه القاضيه بعد

الجوله الثالثه

تقف الحكومه امام الجماعه المحظورة بكل قوتها ..ترى الحكومه ان الاخوان جماعه غير شرعيه وانهم انتشروا بصورة كبيرة داخل الشارع المصرى ولذلك يجب تقليم اظافرهم لانهم يسعون للسلطه عن طريق الدين ..بينما يرى الاخوان انهم الاحق بالسلطه لانهم يقدمون خدمات حقيقيه للشارع المصرى وانهم يريدون ان يعيدون الخلافه الى عصرها الذهبى بتطبيق الشريعه ..ويقف الاقباط بين الجماعتين فهم يرتمون فى احضان النظام حتى ولو كان ظالما فعلى الاقل افضل من الاخوان بينما البدو ساخطون على الحكومه بسبب ممارساتها معهم ..وعلى جانب اخر يطالب النوبيون بالعداله معهم ..فهم فاض بهم الكيل بسبب تهجيرهم المستمر واقصاؤهم من المشهد نهائيا ..قامت الحكومه بتقليم اظافر الاخوان بعده طرق عن طريق الاعتقال وتجميد الثروات والمشاريع والتزوير احيانا ..بينما اكتفى الاخوان بالنزول الى الشارع واكتساب ارضيه واسعه من اجل توجيه ضربات قاسيه وموجعه للنظام .. اما الاقباط فيحاولون استغلال اى فرصه ضد النظام عن طريق اقباط المهجر او تدويل قضاياهم لكن بصورة غير معلنه .. والبدو يقومون بطرق انتقاميه نتيجه للمعامله السيئه ضدهم ..فيساعدون على تهريب المخدرات والاسلحه وكل العمليات الغير مشروعه كانتقام خفى من النظام ..والنوبيون حالهم حال الاقباط فهم يحاولون تدويل قضيتهم ..لواثارة القضيه النوبيه ...ومازالت الضربات متتاليه ومتلاحقه بين اللاعبين على حلبه الملاكمه لكن تنتهى الجوله بدون ضربه قاضيه فنيه
الجوله الرابعه
الشيخ يعظ فى برنامجه ويتهم الكتاب المقدس بانه محرف وان الاقباط هم سبب الفتنه الطائفيه وشيخ اخر يتهم البابا بانه راس الافعى وان المسيحيون مشركين وسيدخلون النار فى اسفل السافلين ..ولم ينس ان يلعن اليهود والنصارى وييذكر المشاهدين بقضيه غزة واخواننا فى الشيشيان وافغانستان والعراق وفى اخر البرنامج لم يفته ان ينبه الى ان اهل السنه هم الفرقه الناجيه وان المذاهب الاخرى بدع وضلالات ..وفى تليفزيون اخر يتبع ايران اخذ الشيخ يسب اهل السنه وانهم على ضلاله وانهم هم الاحق بالخلافه وانهم الاحق عند الله وهم على باطل ...لم يسكت احد القساوسه على احدى الفضائيات الاوربيه ونبه الى ان المسلمين يتقاتلون فيما بينهم وان دينهم على باطل ويدعو الى العنف واخذ يفند براهينه على ذلك ..رد عليه شيخ على احدى الفضائيات المصريه بانه لن يرد عليه لانه اكبر من ذلك وانه سيفتح النار على المسيحيين واقباط المهجر وشنوده المخادع فلن يسكت وسيفضح الكنيسه ..واستضاف مكسيموس فى الحلقه التاليه الذى انتهز الفرصه ليكتسب ارضيه عند المسلمين ويكيل عبارات المدح لهم ولدينهم باعتبار عدو عدوى صديقى ..واخذ يكيل الاتهامات للكنيسه القبطيه والبابا شنوده وهدد بانه يلقى مسانده دوليه ..وان الحكومه تساند الكنيسه القبطيه ضده ولم ينس ان يقول ان ظهور العذراء ماهو الاخدعه نال هذا الراى اعجاب الشيخ الجالس معه فى الحلقه ..واثناء ذلك تلقى اتصال من قس انجيلى يؤكد كلامه لتنتهى الحلقه بأن يرد احد قساوسه الكنيسه فى برنامج على القناه القبطيه انه يملك الف دليل على ظهور العذراء وان الانجيليين لن يدخلو الملكوت ( الجنه ) وانهم لايؤمنون بالعذراء وقداستها وان المسلمين افضل من الانجيليين لانهم يقدرون العذراء اكثر منهم ..لكن رد شيخ اخر على قناه فضائيه خاصه ان المسلمين يقدرون العذراء لكن ظهورها خدعه ..ليظهر نفس القسيس على فضائيه خاصه اخرى ليقول انه يملك الف دليل على ظهورها وان الانجيل غير محرف ..لياتى بعدها قس على الفضائيه الاوروبيه ليتهم الاسلام بالعنف ويفند شبهات حول الاسلام
وتستمر الضربات بين اللاعبين على حلبه الملاكمه ..لكن بدون ضربه قاضيه فنيه
الى اللقاء فى باقى الجولات
تحيااااتى
ميجوووووووووووو

Tuesday, February 16, 2010

قاتل توت عنخ امون



اسباب وفاة توت عنخ امون فى مؤتمر صحفى عالمى

........من سبعه الاف سنه واحنا منعرفش مين الى قتل توت عنخ امون ..

اعتقد ان الفراعنه خايبين ..لو كانوا عايشين فى مصر الحديثه

كانو عرفو ان الجانى ....مختل عقليا

تحيااااتى

ميجوووووووو عنخ امون

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق