Tuesday, November 30, 2010

يهوذا

فأخذت مريم مناً من طيب ناردين خالص كثير الثمن ودهنت قدمي يسوع .... فقال واحد من تلاميذه، وهو يهوذا سمعان الاسخريوطي، المزمع ان يسلمه: "لماذا لم يبع هذا الطيب بثلاثمئه دينار ويعط للفقراء؟" قال هذا ليس لانه كان يبالي بالفقراء، بل لانه كان سارقاً، وكان الصندوق عنده، وكان يحمل ما يلقى فيه
يو 12: 3 -6
في مكان ما في بيت عنيا قبل الفصح بسته ايام وقبل دخول المسيح اورشليم
بطرس: شفت صاحبك بيقول ايه؟ هو فاكرنا هبل؟
يوحنا: ماله بس؟ يمكن يكون فعلاً قلبه عالخدمة. انت بس اللي اتعودت تبص للوحش اللي فيه
بطرس: بص ما تضايقينش منك. انت عارف كويس انه حرامي
يوحنا: زي ما كل واحد فينا ليه ضعفات وسقطات والمسيح قابلنا كلنا. هو الفرق ما بينا وبينه انه اتكشف
بطرس: يا عم هو انت مش دريان باللي احنا فيه؟ البلد كلها ماشيه ورا المسيح وبكرة هيخش اورشليم مش بعيد يتوج ملك او حتى زعيم شعبي. واحنا الـ 12 هنبقى ممثلين ليه. واحد زي ده في وسطنا ممكن يخرب الدنيا. الموضوع كبير يا يوحنا. خدمة وبشارة والبلد محتل انت متعرفش المسيح في دماغه ايه وممكن يعمل ايه؟ في وقت زي ده لازم نبقى مساندين للمسيح مش سكاكين في ضهره
يوحنا: يعني انت عايز ايه بالظبط؟
بطرس: يهوذا يمشي
يوحنا: ازاي يعني؟
بطرس: هاجيبه واقعده قدام يسوع واقول على كل حاجة ولو انكر هافضحه قدام الكل وهاطلب شهادة الكل
يوحنا: تفتكر يسوع مش عارف
بطرس: اكيد والا مكنش سابه
يوحنا: يا سلام!! انت مش فاكر هو عمل ايه مع المرأة اللي امسكت في ذات الفعل
بطرس: بس احنا وضعنا مختلف. احنا صورته وممثلين ليه ما ينفعش يبقى فينا واحد حرامي
يوحنا: يا بطرس مش المسيح قال لا تدينوا لكي لا تدانوا. كلنا لينا اخطأ. هل انت مستعد انه يواجهك باخطائك؟
بطرس: اوووووووووووف .......انا مش حرامي يا يوحنا
يوحنا: كلها زي بعضها وانت عارف
بطرس: هاقوله يعني هاقوله وهو يتصرف براحته
يوحنا: هايقولك من منكم بلا خطيه فليرميه اولاً بحجر
بطرس: على فكرة انا غلطان اني اتكلمت معاك. ولعلمك بقه لو يهوذا فضل معانا انا هاسيبكم وامشي. انا بصراحه محبش يتقال عليا ان ان ليا واحد حرامي صاحبي. ولعلمك كلكم سمعتكم هتضر بما فيكم يسوع نفسه
يوحنا: استنى وشوف يسوع هيحلها ازاي
يقوم بطرس بغضب ويترك المكان وهو يقول
اه استنى ... لغايه لما نلاقيه بايعنا كلنا في سوق العبيد. يا عمي...ديه حاجة تطهق ... اقوله سمعتنا والخدمة ويسوع والزعامة والشعب كله ماشي وراه ... يقولي يسوع عارف... طب اما هو عارف ماتصرفش ليه؟
....................
Love,
MishMish

11 comments:

strategicalone said...

هاى يا جماعة انتم واحشينا والله
لكن اية حكاية اليهوذيات اللى بيتكلموا عنها المسيحيين اليومين دول
متهيالى تساوى تهمة عميل للصهاينة والصليبيين عند اخواتنا
واية لازمة الكلام دة دلوقت ؟ هو فية حد مسيحى خان القضية واشتغل مع الامن
على العموم بكرة نعرف
وتحياتى

Ms Venus said...

اسلوب البوست لا يليق

اسفة ولكن دى الحقيقة

Migo Mishmish said...

strategicalone
زي مانت قولت كدة يا صديقي يهوذات: هما اللي بينكروا ايمانهم ويجرحوا في الايمان والكنيسة علشان منافع شخصيه وليس رغبه في التغير
زي جمال اسعد مثلاً. ده واحد معهوش غير دبلوم زراعه وكان عضو في مجلس الشعب ومايطلعش في حته الا اما يشتم في البابا ويقول انه هو سبب الفتنه
والمسيحين غلطانين مع انهم هما الضحايا سواء ان كان بالقتل او حرق الممتلكات او التهجير او التضيق او..او... علشان الحكومة تحبه وتقولك اهو شهد شاهد من اهلها
وتمسكه سلطات كبيرة


Ms. Venus
طبعاً عمري ما هاقصد إساءة
بس انا فعلاً بتعرض لموقف زي ده في حياتي
ويمكن كتبت كلامي على لسان بطرس
وخليت يوحنا يمثل دور الايمان والعقل
بصي اللي اقصده من البوست ده ان الواحد ساعات بيبقى مهتم وخايف بزيادة لدرجه ينسى ان الامور كلها في ايد ربنا وان كان ربنا يبان ساكت في بعض الاحيان لكن هو بيدي فرصه للشرير علشان يتوب
وساعات قد يكون في حته انانيه صغيرة وحب للظهور
وبعدين انتي عارفه ان التلاميذ لغايه اخر وقت مكنش عندهم فكر المسيح الكامل بدليل ان بعد صلب المسيح في اتنين من التلاميذ رجعوا بلدهم - تلميذي عمواس - ومنهم اللي رجع للصيد تاني
انا كمان ضد تصوير الشهداء والقديسين على انهم شخصيات رخاميه بتتكلم بالراحه وباللغه العربية ولا يسقطون ابداً
بالعكس دول ناس زيهم زينا بتقابلهم نفس العقبات اللي بتقابلنا
بس الفرق ان العقبات ديه بنشليها فوق راسنا فتكسر رقيبنا تحتها انما هما بيحطوها تحت رجليهم علشان يطلعوا عليها للسما
اتمنى يكون المعنى وضح
Love,
MishMish

mony said...

ربنا بيصبر على الخاطىء ونفسه يتوب
لانه بيحب وبيعطف على كل البشر ومستنيهم

mony said...

حتى بهوذا كان مستنيه يتوب

رشا ابو السعود said...

هايل...مخك هايل واسلوبك هايل

Migo Mishmish said...

Mony
فعلاً ده الفرق ما بين ربنا والناس. الناس عايزة تشتغل. حتى لو انهم رجال دين. مهتمين بالقوانين والشكل والتبعيات. محدش يفرق معاه الانسان
ربنا بس اللي خلق الانسان هو اللي بيهتم بيه


رشا
اول مرة تشرفينا
ربنا يكرمك. انا طول عمري بقرا الانجيل من الجلدة للجلد عمري ما حسيت بمدى تقل وجود يهوذا في وسط تلاميذ المسيح غير دلوقتي لما اتحطيت في نفس الموقف
عارفه لما تتعاملي مع واحد عارفه انه كداب وقلبه مش صافي وانتي حيرانه تفضحيه علشان تخلصي نفسك واللي حواليكي من كدبه ولا تستري عليه وتسيبي ربنا يتصرف
وغير كدة تلاقيه ليه عين زي يهوذا ينتقد اللي حواليه وعامل نفسه بني ادم كويس
Love,
MishMish

م/ الحسيني لزومي said...

كل عام وأنتم بخير
عام هجري سعيد

Kontiki said...

:) ربنا صبور و غفور وزى ما قلتى هو اللى خلق الانسان وهو بس اللى بيسامحة و يقدر يفهمة

Andrew said...

تصدق اول مرة اشوفها من الناحية دي

Migo Mishmish said...

م. الحسيني
وانت طيب يا باشمهندس وربنا يعيد عيلنا الايام بخير


Kontiki
العزيزة
اه لو البني ادمين يبطلوا ينكشوا حوالين ربنا. ويختلقوا الاعذار علشان يدسوا على روس بعض
كانت الدنيا هتبقى اجمل كتير
لكن يمكن السبب في ده ان الناس فعلا؟ً تتوجه بقلبها ورغبتها في البحث عن اله حقيقي وليس من تأليف حزب رجال الدين

اندرو بحاله صاحب النوته الزرقة
نورت البلكونة
تصدق وانا كمان عمري ماش فتها كدة غير لما اتحطيت في نفس الموقف
بس على فكرة ده موقف وحش قوي اتمنى ان محدش يقع فيه
Love,
MishMish

There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق