Wednesday, December 19, 2012

الايام دول ...وكله بيجي على حجر كله يا صاحبي


  • اللي كان زعلان قوي على مبارك ومكنش شايف انه بقاله 30 سنه بيخرب فيها وقال على الثورة مموله وقام بيها الخونه والعملاء وفضل حابس نفسه في نظرية المؤامرة ... لبس حكم الخونة والعملاء 
  • اللي زاط زي العبيط وفضى الميدان وخلص الثورة وروح بيتهم واداها للعكسر (زمايل المقلوع اللي كانوا قايمين نايمين مع بعض) بيضه مقشرة .... العسكر طلعوا تيت امه 
  • المسيحيين اللي في قطاع كبير منهم مدجن ومبيتكلمش غير في اللي يخصه ... كنيسه اتحرقت او حد مسيحي اتقتل وعايشين مدروشين ومختفيين ... زعلوا ليه لما طلعوا في ماسبيرو والجيش كان بيجري وراهم بالمدرعات في الشارع في مشهد عبثي اظنه محصلش في الحرب مع اسرائيل ومحدش اتعاطف معاهم وفي ناس منهم لسه مقبوض عليهم لغايه دلوقتي ... هو حد عارف انتوا مين ولا حد بيشوفكم في اي حته؟
  • الاخوة بتوع عجله الاستقرار وحزب الكنبه وخلونا نخلص اللي قالوا على ست البنات هي ايه اللي وداها هناك ... احب اقولهم الف مبروك على علقه الاتحادية وحكم الاخوان ومليشيات الجماعة . يمهل ولا يهمل
  • المسلمين اللي صدقوا ان الاقباط بيعتدوا على الجيش المصري وكانوا مصدقين ان الاقباط سرقوا فعلاً المدرعات وداسوا بيها على بعض علشان يورطوا الجيش وقاصري الفكر والعقل اللي فاكرين ان مفتايح الجنه معاهم وقالوا دول ما يتقالش عليهم شهداء علشان كفار ... احب اقولكم انتوا في عرف الاخوان والسلفين كفااااااااااااااااااااااااار في حين ان النصارى اهل ذمة هاهاهاهاههاهاها.
  • القنوات الفضائيه اللي تحت حصار الشيخ بيبسي واتباعه زعلانين ليه مش هما اللي طلعوه هو وكل معتوه وضيعوا وقتنا معاهم في حورارت بيزنطيه ملهاش اي معنى وساهموا في تلميعهم ونشر وساختهم الفكرية على الملاء؟ .... مش خدتوا فلوس الاعلانات ... ادفعوا التمن على ايدين حازئون.
  • السادة ظباط الداخليه اللي مبيتشطروش غير على النشطاء السياسين وبتوع الاعتصامات اللي اكيد مش غاويين مرمطة ونوم في الشوارع واللي كانوا  حاضرين وشايفين حفلات تعذيب معتصمين الاتحادية على ايدين مورسي وميليشياته ... جالكم اللي يحط السيف على رقبه مدير مباحث الجيزة علشان يفرج عن 4 ارهابين انتوا عارفين ومتاكدين انهم خطر على المجتمع بجد.
  • الاخوة في الجيش مش فضيتوا اعتصامات بالقوة وطرطروا وسحلتوا وعريتوا وقتلتوا ولاد بلدكم اللي مكانوش عارفين يدافعوا عن نفسهم قدامكم ... اديكم بتتقلوا من غير ديه ولا تمن على الحدود وانتوا مش قادرين تدافعوا عن نفسكم.
  • الاخوة اللي كانوا مقطعين نفسهم على غزة لمولها تبرعات وعملوا لها قوافل طبيه في حين ان الصعيد مهري فقر وامراض وجهل .... غزة كويسه كلموني عن مصر بقه؟
  • اللي طول الوقت بيتريقوا على الصعيد وبتعاملوا معاه على انه منفى .... الصعيد هو اللي بيدمر اي فرصه ليكم في التطور في كل استفتاء او انتخاب ... اتريقوا بقه.
  • اللي كانوا بيقولوا احنا عايزين حاكم مؤمن يراعي ربنا فينا ... اهو جالكم اللي بيقول على نفسه "انا ربكم الاعلى" ..... شخصياً.

MishMish

Monday, December 10, 2012

ملاحظات ...مقلقه

 (1) يوم الجمعة اللي فاتت مخرجتش وفي مناسبه زي ديه انا متعودة اسمع خطبة الجمعه من ميكرفون الجامع اللي بعدنا بعمارتين (بحكم علو الصوت علاوة على ألمعيه الخطيب ...راجل علمه واسع ومبهوق بطريقه تضايق)
المهم خطبه الجمعه كان فيها 3 مواضيع رئيسية
 1- حرمة دم المسلم على المسلم           2- طاعة الوالدين واهميتها ووجوبها على كل مسلم         3- معاداة الصلبيبن والعلمانين والليبرالين والشواذ للإسلام والرئيس المسلم 
طبعاً مع استخدام اسانيد من القران والسنه (ساعات مابيقاش ليها علاقه بالموضوع بس هو بيحب يستعرض علمه المبهوق)
والراجل قعد اكتر من ساعه يلف ويدور في المؤامرات اللي ضد الرئيس وان ازاي العالم كله عايز يوقع الاسلام بتعطيل الريس مورسي وخلصت الخطبه بفاصل طويل من الادعيه بالتوفيق للريس وجماعته وبالثبور وعجائب الامور لكل معارضيه
الخطيب ابو ذمة مبهوقه اساء استخدام ميكرفون الجامع ووقفته فيه بالكدب والتحرض بالقتل سواء الجسدي او المعنوي لكل معارض صليبي او موالي ليه .... تمييع شعور الناس وتحوليهم لجبلات وتهيف قيمة الحياة الانسانيه على اساس ان اللي الناس اللي ماتت او اتشلت او اتصابت دول من معسكر الاعداء .... وغير كدة كمان مقالش ولو حاجة واحدة كويسه عملها مورسي ...  ... يعني اللي راح يصلي يوم الجمعه اللي فات في الجامع ده سمع عن مورسي ساعه كامله بينما ذكر اسم الله وقرايه القران مخدتش اكتر من 15 دقيقه بالكتير قوي ...


(2) امبارح وانا مروحه على الساعه 6 م لاقيت واحدة منقبه بتعلق الورقه ديه على كوبري المشاه اللي بعدي من عليه ...كنت عايزة اقف اشكرها ...ساعتها حسيت ان ممكن يبقى في امل ...... النهاردة الصبح وانا معديه من على الكوبري لاقيت الورق ده متقطع ومرمي على ارضيه الكوبري .............


(3) فاكرين السلاح اللي طلع ايام اللجان الشعبيه .... اهو جه وقت استخدامه والمرة ديه اللي بيستخدمة بهيم معندوش عقل كلمه تلمه وكلمه تفرقه واحد منهم قال بالنص "لإننا شغالين عند ربنا، يتمكن الإخوان من حشد أعداد كثيرة فى أى وقت" - لينك المقال اهو 
بالنسبه لي اي كلام عن استفتاء او انتخابات تضيع وقت وهبل لان السلاح موجود والعدو بيحارب الاسلام والناس ديه بتشتغل عند ربنا ... الناس ديه غير بلطجيه الحزب الوطني اللي كانوا بيقفوا قدام لجان الانتخابات .... بتوع الحزب الوطني بياخدوا فلوس .... دول قاطعين وبيجاهدوا في سبيل الله ... 

(4) انا من مواليد التمانيات وعشت تسعينات ارهاب الجماعات الاسلامية وتفجيرات التحرير ومحاولة اغتيال نجيب محفوظ وبلاوي كتير كدة الله لا يعيدها ... كنت زمان وانا رايحه المدرسه اشوف واحد بدقن ولابس جلابيه بيضه قصيرة وشبب موقف شوية شباب يطلعوا تانيه ثانوي او اولى جامعه كدة وهاتك يا ودوده في اي وقت شتا .. صيف ... نهار ...ليل ... اي حاجة ...وبعدها بشوية عدد اللي بدقون في المنطقة يزيد والنقاب ينتشر وبعدها تسمع خطب الجمعه من الميكرفونات عن المجتمع الفاجر ... وبعدين علميات ارهابيه ... لحد مالجيش بنفسه هو اللي خلصنا من الهم ده ... لانهم كانوا بيصطادوا ظباط الداخليه زي العصافير 
المشهد ده رجع تاني ...كل يوم الصبح وانا نازلة اودي بنتي المدرسه الاقي واحد بدقن ولابس جلابيه بيضه وشبب موقف شباب يطلعوا تانيه ثانوي او اولى جامعه كدة وهاتك يا ودوده في اي وقت شتا .. صيف ... نهار ...ليل ... اي حاجة ..ربنا يستر

(5) اعتصام اتباع ابو اسمعين عند مدينه الانتاج الاعلامي ... ده يعتبر تدريب ومقدمات للمرحله اللي احنا داخلين عليها .... دول معندهومش منطق ولا عقل تماماً .... ممسوحي الدماغ بمعنى الكلمة... يعني الراجل ده بالذات كدب عليهم بخصوص جنسيه الحاجة وماشين وراه برضه ... راحوا اعتصموا في العباسيه واضربوا وباعهم على الهواء وماشين وراه برضه .... هما اللي دبحوا وسلحوا وضربوا متظاهرين سلمين ومع ذلك شحنهم وراه وطلعوا قال علشان تطهير الاعلام الفاسد ....... يا الله
مع ان ليهم قناه رسمية (مصر 25) والقنوات الدينيه تحت باطهم وجرنان الحريه والعداله ... بس لانهم انكشفوا وابتدوا يبانوا على حيقيتهم بجد ... فالحل هو الحجب والمنع وده اللي هايمشي على كل حاجة بعد كدة ...

الامل الوحيد في الرحيل
ارحل يا مورسي انت وجماعتك .....كفايه كدة ... خربتوا البلد
MishMish

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق