Sunday, September 14, 2008

الناس اللي في الدويقه

لما حصل اللي حصل في الدويقه كان رد فعلي زي رد فعل معظمنا خوف من البلاوي اللي بتحصل ورا بعضها يعني مش كفايه الحكومة علينا لا ديه الطبيعه دخلت في الموضوع هي كمان. غضب شديد من الحكومة مينفعش معاه اعتراض ولا شتيمة ولا مظاهرات علشان بعد اللي حصل ده مفيش كلام يتقال.

كان احسن تعليق سمعته عن الموضوع ده ان عبور قناة السويس ودخول الحرب مع اسرائيل خد 6 ساعات والحكومة احتاجت 12 ساعه علشان يعبروا للدويقة ويعاينوا الحادثة ويطلعوا علينا بيان رائع بيقولوا فيه ان الحادثه كانت قضاء وقدر. الحمد لله انا خفت لا يكون السبب عقب سجارة او ماس كهربائي

انا لغايه دلوقتي مش قادرة اتخيل مدى الفزع اللي كانت الناس فيه سواء اللي اندفنوا بالحياه وكانوا بيحاولوا يتصلوا باللي برة علشان يحاولوا ينقذوهم او الناس اللي فضلت عايشه وشافت اسواء مأساة بشرية على الاطلاق.

كل الحوارات والكتابات والتعلقيات عن الحادثة كانت بتصب في ناحيتين: ناحيه شتيمه في الحكومة وده اقل واجب وناحيه تانيه بتوصف اهل الدويقة على انهم ملايكه بجناحات وانهم رضيوا بالهم والهم مرضيش بيهم. وان الازمة ديه كان ممكن تفاديها بنقل السكان من الدويقة لإسكان سوزان مبارك. وبما ان الحكومة فشلت في انها تتفادى الازمة يبقى عليها انها تبدأ بالتسكين الفوري للعالم ديه.

بس نقل الناس اللي في الدويقة سواء قبل الحادثة او بعدها مش هو الحل الوحيد للمشكله. انا معرفش ان كان فيكم حد كان بيروح منطقه عشوائية بانتظام لفترة طويله واتعامل مع الناس اللي هناك عن قرب. انا بقالي حوالي 4 سنين بروح مكان معين وبتعامل مع ناس هناك عن قرب وعلى فكرة المكان ده بالنسبة للدويقة يعتبر راقي والدويقة بالنسبه لهم بيئه.

هناك لاقيت ان القانون الوحيد اللي بيحكم الناس ديه هو قانون الغابه. علشان تأكل لازم تخطف لقمتك من بق اخوك. شفت هناك مخدرات في الشارع بالنهار وشفت خناقات بسيوف وسنج وكمية اسلحه تنفع نخش بيها حرب. شفت اطفال صغيرين اطفال الشوارع بالنسبه لهم عندهم اخلاق. طبعاً مش هجيب سيرة التحرش والاعتداء على اي حد غريب يخش المنطقة سواء ان كان راجل او ست. يعني انا كل مرة اروح هناك فعلاً ببقى معتمدة على ربنا وإن كان لسه ليا عمر. اتعاملت مع عائلات لما الاب فيها بيبقى شارب او ضارب ما بيفرقش بين مراته وبنته وعائلات تانيه الاب بيطلب من بناته انهم يحموه وسعمت عن انه عادي انهم يلاقوا الصبح اللي باقي من جثه طفل لسه مولود اترمى بدمة بالليل جنب الجامع يمكن حد ياخدة لكن الكلاب اللي في الشارع مبتستناش لغايه لما الناس تيجي الجامع يتكون اتعشت بالعيل وسابوا الباقي لما شبعوا. وطبعاً مع كل البهلدة ديه اقل اسرة هناك عدد افرادها 7 وكلهم ارزقيه يعني يوم شغالين و10 قاعدين في البيت

كنت من فترة اتفرجت على برنامج في ام بي سي اسمه 60 دقيقه اظن انكم عارفينه. كان في جزء من البرنامج بيتكلم عن دراسه اتعملت على المساجين في امريكيا الدراسه ديه اظهرت ان 65% من المساجين اللي بيتم الافراج عنهم بيرجعوا تاني لممارسه نشاطهم الاجرامي بعد خروجهم من السجن ويرجعوله تاني في خلال 3 سنوات من تاريخ خروجهم منه. اللي استنتجته الدراسه ديه ان السجون الامريكيه عبارة عن قنبله موقوته وان المشكله ما بتححلش بالقبض على المجرمين وابعادهم عن الشارع لمده محددة وبعدين يرجعوله تاني. فابتدت المنظمات المدنيه هناك تتبنى برامج اعادة تأهيل للمساجين عن طريق تنميه هواياتهم ومعالجتهم نفسيا ومحاضرات يكون الغرض الاساسي منها انها تفهم العالم ديه انها مش لازم تعيش طول عمرها مطاردة من الناس والقانون. وعلى فكرة الموضوع ده تمويله واعضاؤه والمشرفين عليه افراد عاديين والحكومة ملهاش دعوة بالحدوته ديه خالص

في كل الهوجه بقه اللي على الدويقه مسمعتش عن حد فكر يعمل حاجة زي كدة سواء من الحكومة او من الشعب. الناس ديه هتاخد طبايعها وعادتها للمكان الجديد. يمكن مفيش حاجة تقع عليهم لكن هما ممكن يقعوا على المجتمع كله يدمروه. علاوه على ان تعاطفنا مع الناس ديه يخلينا نعيفهم عن مسئوليتهم عن طريقه الحياه اللي هما عايشينها. في المصري اليوم بتاع النهاردة واحد بيقول دانا سحبت فلوس من البنك قبل الحادثة بيوم علشان اجيب شقه. صاحبنا سحب كام؟ سحب 60 الف جنيه. واحد تاني مش عارفه كان بيدور على ابنه ولا حفيدة وطلعولوه الجثه والفلوس اللي كانت في البيت. طيب من الواضح ان الناس مكنتش متنيله قوي. ايه اللي مخليهم قاعدين هناك؟. واكيد معظم الناس ديه هربانه من الصعيد. يعني هي العيشة في الحتت ديه وبالظروف ديه اسواء من العيشه في الصعيد؟ مش لازم كانوا يقعدوا في الزراعه هناك. كان ممكن يقعدوا في الحضر. ولا هما علشان شافوا شوية ديكورات في مسلسل تليفزيوني بتصور في القاهرة افتكروا انهم لما يجيوا القاهرة هيلاقوا الفلوس في الشارع. ومحدش يقولي مفيش فرص في الصعيد. سكان الدويقه مش علماء في الذره ولا دكاتره في البحث العلمي. وحتى لو هاربانين من التار والمشاكل هناك، طب وهي المشاكل ديه مش هما بعقلياتهم السبب فيها؟

انا مبعفيش الحكومة من واجبها بس الفكرة ان الحكومة بقت اضعف من اننا نحطها في اعتبارنا او نعتمد عليها في حل ازمة

ديه وجهه نظري وانا مش عارفه ان كانت صح ولا غلط بس يهمني اني اعرف انتوا شايفين ايه
Love,
MishMish

13 comments:

نيران said...

مشمش..
انا مش عارفة انا مؤيدة ولا معارضة لنظرتك للناس دي،
كلامك بيفكرني بالموجة اللي طلعت تقول مهو الفلسطينيين اهم عايشين حياتهم يبقى احنا نشيل همهم ليه
معاهم فلوس و بيصرفوا و بيتجوزوا و بيخلفوا، دول حتى بيتفرجو على مسلسل نور.

انا بطبعي مش باحب التعميم
قد تكون الصورة اللي انتي بتقولي عليها دي صح
انا نشأت و ترعرعت في منطقة تصنف ضمن العشوائيات
و مع ذلك كان بيننا ناس كويسة.. ما بناكلش الناس أحياء

يمكن مش بمستوى الدويقة أو الباطنية على الإطلاق.. احنا كنا من مناطق الناس المستورة.. و فعلا كانت الناس مستورة..

بتقولي الراجل كان معاه ستين الف جنيه يجيب بيهم شقة.
حد يعرف جابهم ازاي، او يجيبوله ايه

كلامك يخليني اقول ان الحكومة مش مجرمة بس في حق الناس اللي ماتوا
دي مجرمة في حقهم و هم عايشين

تخيلي لو انتي نشأتي في الأماكن دي
كان الحال هايبقى ايه

مش ذنبهم ان التعليم مش واصلهم
مش ذنبهم انهم اتولدوا هناك
او اتربوا.. دا لو جاز اللفظ دا عليهم هناك
مش ذنبهم ان ما عندهمش اي وعي
لا وعي ديني ولا اخلاقي ولا جنسي ولا اي حاجة في اي حاجة
مش ذنبهم انهم فاقدين للآدمية

الذنب ذنبنا كلنا...

صدقيني مقالتك على قد ما هي صريحة على قد ما هي بتحط قدام عينينا مراية .. بنشوف فيها قد ايه احنا.. مقصرين

في حق مين مش عارفة..

اسفة على الإطالة..
بس كنت محتاجة اقول اللي في نفسي
ولا اكتمها في سري و اموت يعني؟؟

Migo Mishmish said...

لا يا ستي بعد الشر عليكي
بصي في فترة كدة من فترات حياتي درست كورس علم نفس ومشورة. كان من اهم الحاجات اللي اتعلمتها هناك انك مش معنى ان في حاجات سيئة حصلتلك وانت صغير او اتربيت في بيئه دفعتك لاسلوب حياه معين يبقى انت ماليكش ذنب في اللي انت بتعمله. الواحد ممكن يبقى مسير في مرحله معينه من عمره. لكن بعد المرحله ديه بيبقى مسئول عن تصرفاته. ولازم يرفض وضعه ويحاول يحسنه.
انا مش بتكلم عن كل الناس اللي عايشين في المناطق العشوائية. مانا كمان ساكنه في حته من ارقى وازحم المناطق العشوائية - هيهيهيهيه بحاول اجمل الصورة علشان معيطش - بس في منهم ناس وعددهم كبير فعلاً ممكن يفيدوا البشرية اكتر لو اتباعوا قطع غيار
ناس تبقى مش لاقيه تاكل وكل سنه جايبين عيل.
انا اعرف واحدة - من الصعيد على فكرة واهلها جم مصر- الدنيا كلها وقفت جنبها علشان تتجوز ولمينالها لم مش هاقولك قد ايه. وامها قالتلي انزلي معانا واحنا بنشتري الحاجة علشان تعرفي اننا مخدناش حاجة لينا. قولتلها يا ستي اعملي اللي انت عايزاه بس اشتري الاساسيات الاول وبعدين لو فاض ابقى دلعيها بالباقي. الاقيها بعد يومين اتصلت بيا تقول الفلوس خلصت استغربت ده كان مبلغ كبير قولتلها جبتي ايه قالت هي جابت ايه من ضمن اللي جابته كان مفرش سرير قولتها دانا معنديش واحد قالتلي لا ده لازم وطبعاً دخلت معاها في حوار بيزنطي افهمها انه ملوش لازمة. اهلها اساساً 70 بني ادم نايمين في اوضه واحدة. وطبعاً طلع في الاخر مفرش السرير ليه اهميه عظمى وانا مبهمش. الهانم راحت كمان تشتري الخلاط ماركة كبيرة طبعاً خرب الدنيا. في حين ان الخلاط بتاعي ماما جابته من الناس اللي بيبقى معاها اجهزة كهربية مضروبة وبيبعوها في الشارع. شوية ولقيتهم بيتصلوا تاني عايزين فلوس قال علشان يملوا التلاجه. قوتلهم انا وكل اللي اعرفهم فلسوا بسببهم. شوية وسمعت ان امها حكمت رايها على عريس البت انه ينقل حاجتها على عربيتين نقل؟؟؟؟؟؟؟ ومينفعش تبقى عربية واحدة تروح وتيجي مرتين - قل يعني اشتروا حاجة. وطبعاً خربوا الدنيا لما لاقوا الحاجات اللي هو جايبها (التلاجه والبوتجاز) سكند هاند ومع كدة جايب تليفزيون و..و..و وجم يشتكولي ويقولواضحك علينا وهما ما يعرفوش انه لغايه دلوقتي انا معنديش تليفزيون والتليفزيون اللي بنتفرج عليه تليفزيون قديم واخدينه من عند ميجو والريسيفر واخده من يتنا قبل ماماشي علشان عندنا في البيت جابوا واحد جديد علشان القديم باظ.وعرفت بعد كدة انهم مقاطعين عمها علشان عايز ياخد من ابوها فلوس كان جاب بيها بانجو وبيرة في فرحها قال علشان يكرموا المعازيم!!!!!؟
شوية ولقيت الحجة جاتلي قاتللي انا حامل وجوزي مش شغال وعايزة ادوية مش عارفه قد ايه. جبتهم من واحدة صاحبتي صيدلانيه واشتركنا احنا الاتنين في تمن الادوية.وبعدين لاقيت نفسي حولتها لشحاته قولتها تيجي تساعدني في توضيب الحاجات وبقيت اديها فلوس. وبعدين لاقيتها قطعت ولما سألتها قالت اصل جوزها قالها ما تروحش عند حد. جوزها نجار وبعدين لاقيت اعلان لمصنع عايز نجارين اتصلت بيها واديتها النمرة قالتلي هو فين المصنع ولما عرفت مكانه قالت لا ده بعيد وهو مش هايرضى؟؟؟؟؟؟؟ يا ولاد .......... يعني شحاته اه شغل لا
وجات الولادة قولتها بقه روحي ركبي وسيله لمنع الحمل قالتلي الجنرال قالها لا وهي ابنها عنده 9 شهور حملت تاني. اتصلت بيا قولتها وانا كمان حامل. وفهمتها بالمحسوس كدة اني خلاص معنديش اي فلوس زياده تاني
معلش انا طولت عليكي بس انا عايزاكي تعرفي ان العالم ديه مخترعه لنفسها احتياجات وعايزين اللي حواليهم يلبولهم الاحتياجات ديه. حاولي بقه تناقشي العالم ديه او تفهميها. مفيش دماغهم مصمته فيها صبه اسمنت. وبعدين لازم يحاولوا يعدلوا من سلوكهم لو عايزين يعيشوا عيشه كويسة. ما يعملوش ده على قفانا
تفتكري التحرشات اللي بتحصل في الشوارع ديه من شباب متربين او متعلمين تعليم محترم مش ممكن. الكلام ده يخرج من شوية عيال زي دول اهاليهم عمالين يخلفوا والعيال ديه متعتهم الوحيدة المخدرات وانهم يتفرجوا على فيلم ثقافي -اظن ده بيبقى واضح من عدد الاطباق الموجوده على بيوت شايله اللي فيها بالعافيه - وبعدين لما تقولي اللي بيحصل ده غلط يقولوك اصل الشباب عندها كبت. طب ما بدل اللي بيشتغلوا بيه طول اليوم يضيع في الهيافه ديه يرحوا يعملوا حاجة ترفع من مستواهم.
والحكومة برضه -منهم لله كلهم من الالف الى الياء - سبب اساسي في المهزلة ديه بيتعاملوا مع القاهرة على انها هي مصر والصعيد على انه دولة فقيرة شقيقه ملهومش دعوة بيها. مين اللي مسئول عن ان الصعيد يبقى مكان طارد للناس اللي عاشت هناك من ايام الفراعنه. فين فرص العمل؟ فين تنميه المحافظات؟ ليه متكونش كل محافظة مكان انتاج او سوق لحاجة معينه ممكن تتصنع هناك. انتي عارفه انا هاقولك على حاجة غريبة سمعتها وانا بشتري عفشي انا وميجو. كنت بتكلم مع صاحب المعرض عن اني منزلتش دمياط علشان معنديش وقت. قالي على فكرة دمياط مبقتش زي زمان قولتله ليه يا عم قالي اصل الحاجة غليت والحاجات الصيني ملت الدنيا؟؟؟؟؟؟؟؟؟؟؟!!!!!!!!!!!!!!!صيني ايه يا باشمنهدس هما دخلوا كمان في موضوع العفش قالي طبعاً وخربوا الصناعه المحليه عالاخر
الدنيا بتبوظ واحنا سبب في المشكله
Love,
MishMish

عاليا حليم said...

هي معلوماتي عن الموضوع ده أن أهالي الدويقة راحوا سكنوا غلط في المنطقة رغم زنها منطقة غيرسكنية بالمرة و فيه مشاكل هناك في طريقة حصولهم علي المية و الكهربا و الصرف الصحي أن كل ده أثر علي جزيئآت في الجبل فكانت دي النتيجة الله أعلم
بس في الأخر هم كانوا هيعملا أيه يعني ؟ حد كان فرلهم مكان يعيشوا فيه زي بقية البني آدمين و قالوا لا الحكومة لازم الجبل يقع يعني عشان تجيبلهم شقق؟
الموضوع ده بصراحة يحرق الدم زي مواضيع كتير في البلد دي

رمضان كريم

عمو عصام said...

انا مبعفيش الحكومة من واجبها بس الفكرة ان الحكومة بقت اضعف من اننا نحطها في اعتبارنا او نعتمد عليها فيحل ازمة

ياسلام يامشمش بالجمله دى اعتقد انك اخدت خبره فى الكتابه تسمح لك بعمود يومى فى اكبر جريده مصريه بس مش قوميه طبعا

Migo Mishmish said...

صباح الخير يا عاليا
بصي انا مش ضد الناس ديه. انا بس مش عايزة في وسط تعاطفنا معاهم ننسى انهم هما اللي حطوا نفسهم في المشاكل ديه
الناس ديه ومعظم اللي ناحيه المقطم - بحكم اني روحت هناك كذا مرة - بيشتغلوا في الزباله. العالم ديه بتاخد فلوس من الحكومة علشان تلم الزباله وبياخدوا فلوس مننا علشان ياخدوا زبالتنا. وبعدين بيفرزوا الزباله. بقايا الاكل بتروح لمزارع الخنازير - ومع ده كله لحم الخنزير مش رخيص - والورق بتعمل كرتون والبلاستيك والحديد والصفيح بياعد تصنيعه. وبعد ده كله الفلوس ديه كلها بتتصرف على المخدرات والدعارة. انا مش بقلل من مهنه الزباليين لكن هما اللي اختاروا مصيرهم بإديهم. وده برضه جزء من مسئوليه الحكومة اللي عايشه في ميه البطيخ. سايبين البلطجيه وتجار المخدرات والاعتداء على اراضي الدولة ومفيش رقابه على حاجة ودايرين في موكب السيد الرئيس الصغير ابن السيد الرئيس الكبير وبيعتلقوا اي حد بيبدى رايه بس. يعني لو الواحد وقف في الشارع يثبت الناس معندهومش مانع لكن هيبقى في مناع لو واحد قال هو السيد جمال مبارك مش لازم يستأذن الاول قبل ما يحكمنا ولا احنا من ضمن الورثه
Love,
MishMish

Migo Mishmish said...

ربنا يخليك يا عمو
قول لميجو علشان البوست مش عاجبه وبيقول انه كلام مكرر. انا بصراحه مش عارفه هو اتكرر فين. ثم انا كتبت وجهه نظري في الموضوع
وبعدين انا عايزة اعرف يعني لما بنجي عندك بنقعد لغايه الساعه 12 واكتر كمان وانت عمال تتكلم معانا عن حاجات كتير مش ان الاوان بقه ان تكتب لنا حاجة ننشرها في البلكونه ولا ايه
love,
MishMish

عمو عصام said...

عزيزتى مشمش الأفكار مش كل حاجه لأن الكتابه موهبه وأنا مستعد أكتب بس حد زيك يملينى

اجندا حمرا said...

اللي ضايقني يامشموش لما سمعت في الأخبار ان فرق الأنقاذ حتبطل عمليات البحث عن ضحايا و لسه سامعه النهارده ان فيه جثث لسه تحت الأنقاض
يعني يارب الناس تموت فطيس و مش قادرين و مش عايزين يستخرجوا جثثهم
هم ايه ده بس ياربي

بخصوص موضوع الدويقه اتقال كلام كتير ياجميل عن ان الأهالي بنوا البيوت دي بوضع اليد يعني سرقه
يعني زي ماقلتي قانون الغاب هو اللي بيحكمهم
اتغاظت جدا من مرتضي منصور اما طلع مع لميس الحديدي امبارح و بيتكلم عن رأيه في افلام خالد يوسف و قالها ده اسمه حين مسخره مش حين ميسره و قعد يسهب في كلام من عينه ان النماذج اللي بيتكلم عنها خالد في الفيلم مش موجوده خالص الا في عقل خالد يوسف المريض زي ماقال مرتضي
مش فاهمه هو عمنا مرتضي عايش في المدينه الفاضله و انا مش واخده بالي
ال مابيحصلش الكلام ده خالص خالص
شكله كان بيتكلم عن بلد تانيه غير مصر
فيه ناس يامشمش بتحب تعيش في السكرته
اعمل كل اللي في نفسي فيه لكن ماحدش يشوفني و قدام الناس اهاجم اللي بيعملوا نفس اللي بعمله
ازدواجيه بقي تقولي ايه
سلام ياقمر

نبراس العتمة said...

كتبت فاطمة ناعوت مقالا بعنوان أخاف حين ميسرة على وزن أخاف فرجينيا وولف..والحقيقة أن فيلم حين ميسرة عرى واقع الخرابات والدويقات قبل أن يقع المحظور..والآتي أعظم
..
بلاش نستسلم لفكر الهزيمة لكن أيضا بلاش نخفي المأساة، وكما قال أحد رفاقي الأعزاء: لا تدبر الأزمة..
مودتي اليك ولمدونتك الرصينة

Desert cat said...

صديقتى العزيزة مشموشة
اولا اعتذر عن التقصير فى زيارتى البلكونة اتمنى انك تسامحينى
بالنسبة للبوست
فانا مش روحت اماكن عشوائية لكن دائما يتردد على مسمامعى الباطنية
اوعى تدخل الباطنية الناس هناك مش حد ماشى من غير سلاح وتجارة المخدرات على اشدها والحكومة مش عارفه تعمل لهم حاجه الحكومة نفسها بتخاف منهم لحد ما اتولد جوايا انى خايفه من حاجه اسمها باطنية من غير ما اشوفها ازاى و ناسها ايه
اما الدويقة انا متعاطفة جدا معاهم لانى حسيت بمدى الاهانة لبنى ادمين كانوا نايمين وفجاة وقع فوق دماغهم صخرة
مش متخيلة المنظر الحقيقة

محبتى يا قمراية

Migo Mishmish said...

الاجندة الجميله
مرتضي منصور مش عايش في المدينه الفاضله ولا حاجة ده عايش في ميه البطيخ. وهو فعلاً رجل وطني ومش بيشهوه سمعه مصر ولا حاجة واللي رفع الجذمه في المقصورة ساعه المتش كانوا الاسياد. ولما اهان هيئة المحكمة كان الموضوع سؤ تفاهم علشان القاضي مفهمش انه بيهزر معاه. واللي اقتحم نادي الزمالك ولا اكبر بلطجي في البطنيه ده واحد شبهه. واللي خرب الزمالك وخلى مركز شباب روض الفرج احسن منه كان واحد اسمه مرتضى منصور برضه بس مش هو ده تشابه في الاسماء
Love,
MishMish

Migo Mishmish said...

نبراس العتمه اهلاً بيك ونورت البلكونة
ماهو اللي احنا بنعمله ده عدم استسلام لثقافه الهزيمة. بس المشكله ان مبقاش غير الهزيمه عندنا
عارف انا مرة حاولت الم مجموعه اخبار كويسة عن البلد في اسبوع من الجرايد. وقلت اهيه اي حاجة تفرح العيال كدة وتبقى زي قرص البروزاك في ايام الاكتئاب الشديد. وحياتك عندي ما لاقيت خبر واحد مش اقولك يفرح القلب. بس حتى يقول اننا ماشيين في سكه صح
ساعات كتير بحس ان مفيش فايده
Love,
MishMish

Migo Mishmish said...

شكراً يا قطوطة وتعالي بقه نشرب كوبيتن نسكافيه تمام بس بعد الفطار
انا مبنفيش انهم غلابه واللي حصل ده مش المفروض انه يحصل وديه طريقه مهينه جداً ان الواحد يموت بيها. دول بالظبط عملوا زي ما يكونوا شوية صراصير اداس عليهم بالجذمه.
بس انا مش عايزة تعاطفنا معاهم ينسينا ان الناس ديه زيها زي الحكومة مسئوله عن اللي حصل. معظمهم ارزقيه يقوموا يشتغلوا ويضيعوا الفلوس على المخدرات. بصي على كم وماركات الموبيلات اللي معاهم. ده ممكن تلاقي الواحد فيهم ماسك موبيل احسن من اللي انت ماسكاه ميت مرة. ومبيستخدموش غير في الرن. ليه بيحمل نفسه فوق طاقتها ما الفلوس ديه يستغلها في حاجة افيد. وحاجات تانيه كتير قوي لو عدتيها كلها هتلاقي ان العالم ديه اسلوبها كدة وهي كانت مبسوطة كدة. يا ستي ده في واحد اعرفه ساكن ناحيه الدويقه قال ان هو يعرف عيله سلموهم شقه علشان يسكونوا فيها قاموا باعوها ورجعوا تاني قعدوا في الخيام علشان ياخدوا شقه تانيه
Love,
MishMish

There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق