Thursday, September 11, 2008

كلام جرايد

جبت الجرنال مليان بكلام
بيبيع اوهام آل ايه احلام
إعلان لكريم .... وكلام تعتيم
إعلان لوظيفه .... وحزمة قطيفه
وناس حريفه وناس كييفه
إعلان لسجارة .... غرق عبارة
سقوط طيارة .... وادي حرب وغارة
فساد ودعارة وحديد اسعارة تزيد
تعويرة في قورة .... لعيبة كورة
وكلام يتعاد ومفيهش جديد

حريفة نصب .... ولاد الكلب

ضحكوا علينا وراحوا مارينا

غموا عنينا وربطوا ايدينا

ومفيش تعليم ولا حد سليم

والبوم وغراب الشوم عمال بيحوم

مهو اصل امبارح زي اليوم

الظالم ظالم والمظلوم هيبات مظلوم

دا فلوسه كتير في بسين بيعوم

وفقير محروم بيقوم من النوم

على طول بيصوم

مغموم مهموم

وان قال الآه ضربوه بالشوم

مع انه بسيط والحلم عبيط

ومهوش كفيار ولا لعب قمار

لقمه بجبنه ونص خيار

وعشانهم يشقى ليل ونهار

والوضع خطير ومفيش تفسير

واحنا بننهار

طب إيه الحل؟

نخلص من الجهل

ودا شيء مش سهل

نمسك في حقوقنا

ولا حد يسوقنا

ونعيش دنيتنا

على كيفنا وشوقنا

ولا نرضى بذل ولا ايد تخنقنا

مهداه من اشرف اخو ميجوووو

9 comments:

MEDUS said...

انا اول واحد دخل البلكونة
ازيكو عاملين اية؟؟؟
كلمات جميلة جدا واحساس صادق يعبر عن وضعنا باسلوب ساخر جميل
تحياتى

Anonymous said...

ايوة يا مشمش
انا بطلت تدوين


حفصة

Migo Mishmish said...

نعم !!!!!!!!!!!!!!!! وده ليه ان شالله
بصي انا ماليش في اني اتكلم لو انتي شايفه انك حققتي هدفك اللي علشانه فتحتي المدونة
لكن اوعي يكون السبب ان حد هو اللي خلاكي تعملي كدة. اوعي تسيبي مكانك علشان حد
Love,
MishMish

maxbeta3zaman said...

جذبنى اسم" مشمش "لأنى لسه ناشر بوست اسمه مشمش يتحدث عن نفسه ..قلت ادخل اشوف هوه مشمش اللى ف بالى والا تشابه أسماء ...اعجبنى المعنى فى القصيده الزجليه لكن الوزن والجرس عاوز تعديل تفضل بزيارة دكاننا ...موش بعيد بص م البلكونه تلاقيه عاناصيه ...تحية لكم وتفضل بقراءة مشمش التانى

زرابيح أبو الليل said...

بجد حلوة جدا

انا شايف إنها مضبوطة تمام
"مش القصيدة ..لأ كباية الشاي اللي شربتها في البلكونة" ههههههه


بجد قصيدة حلوة قوي

بـلاش تولدينــي said...

رائعة رائعة رائعة


وبتوصف الوضع صح



انا الحمد لله مقاطع الجرايد كلها من يوم ما منعوا آفاق عربية
لإني ما بثقش في أي جريدة رسمية...أو مش رسمية



تحياتشي وسلاماتشي


كل سنة وانتي طيبة

زرزور said...

أنا فعلا بتأثر جامد قوي بكل مدون يعتزل التدوين ...بحس إن فيه حتة من جسمي سابتني بجد

انا من يوم ما دخلت البلوجر وأنا حاسس إني في بيتي الأول


خيــــــــــر


بوست رائع مشمش وكل سنة وانتي طيبة ورمضان كريم

Heart Beat said...

حقيقي الكلام حلو جدا

و بيوصف الحال على لسانا جميعا

بصراحة انا بحب اقرا الجرايد و دي بتكون اول حاجه بعملها الصبح

لزوم يعني حرقة الدم على الصبح و اني الاقي حاجة مستفزة جديدة بتعملها الحكومة تخليني ادعي عليها طول اليوم

في دعاية بتيجي في التلفزيون بتقول ان في 3 مليون اسرة مصرية تحت خط الفقر

مع اني اشك ان العدد ده صحيح و ان الحقيقة اكبر من كده بكتير

لكن فكرت ساعتها و قلت ... يعني السادة اللي بيصرفوا على اهل الفن عشان يتجوزوهم و لا يموتوهم و بيصرفوا عليهم بالملايين الدولارية و اليوروية و الدراهمية

مش كانوا اتبرعوا بكام مليون للاسر اللي تحت خط الفقر دي احسن

ان شاء الله كانوا ادوا كل اسرة مية الف جنية ... بدل ما صرفوا على القتل و دلوقتي مفضوحين اودام العالم كله

اشكركم على الكلمات الجميلة دي

تحياتي

عمو عصام said...

مشروع شاعر كبير بيدور على فرصه وعلى فكره الواد ميجو اخد منى فكرة قصيده وقال انه هينشرها بس انا مش اخوه عشان ينشر لى عموما يااشرف انا مستمتع بشعرك لانى قارئ اكتر منى كاتب

There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق