Monday, December 29, 2008

سنه جديده فى البلكونه

كل سنه وانتو طيبين ..سنه جديده علينا وعليكو ..سنه فى البلكونه ..شفنا حاجات كتير منها ؟؟وقابلنا ناس حلوين فى البلكونه.. شرفونا وانسونا ..مش هاقول اسم حد عشان مانساش ..
يارب السنه الجديده نطل منها من البلكونه نلاقى ناس محترمين ماشيين فى الشارع مبسوطين ومتفائلين والشوارع نظيفه ومافيش حد بيتخانق ..يارب نبص من اليلكونه نلاقى حاجات حلوة وناس بتردم على الحاجات الزفت ..ناس مش سلوكها عشوائى ..
ناس عندها استعداد تتقبل الاخر وتفهم ان الناس كلها اراءها مش زى بعضها وان كل واحد له معتقده وكل واحد له فكره ومش معنى انى مختلف معاك انى ابقى عدوك ..لان الحياه الوانها كتير مش لون واحد بس
يارب افتح البلكونه الصبح الاقى اغانى محترمه شغاله عند الجيران ..

نفسي السنه الجديده ماشوفش فيها وش تامر حسنى وتامر هجرس وتامر امين.وافتح التليفزيون مالاقيش مرتضى منصور هو وشوبير ..والتليفزيون يبطل يجيب فيلم قبضه الهلالى بتاع يوسف منصور ..والله يارب بحس انى معتوه ومتخلف عقليا لما بتفرج عليه يارب ابعد عنا ماجد المصرى وشريف رمزى وخالد ابو النجاوخالد النبوى ..والراجل الى اسمه ممدوح فرج بتاع (هيى انت) الى بيقدم برنامج المصارعه الحرة ..احمينا يارب من بعرور وعبد الباسط حموده والواد بتاع اجوجوجوجوجو ويابا يابا يابا ...حوش عنا يارب كل مسرحيات محمد نجم واحمد بدير وسمير غانم وبالذات مسرحيه دورى مى فاصوليا بتعملى انفصام فى الشخصيه واهتزاز فى المعايير ...قادر يارب على كل شيئ زى ماقفلت قناه دريم سبورت .تقفل قنوات التخلف ..ابعد عنا يارب مسلسلات فيفى عبده.وبرامج عمرو خالد ومعز مسعود .

نفسي السنه الجديده ادخل فيلم فى السينما يكون بيحترمنى وبيحترم انى ليا عقل ومش اهطل وبرياله

يارب اصحى الصبح فى السنه الجديده الاقى المناهج الدراسيه اتلغت كلها واتعمل مناهج جديده تحترمنى انا والتلامذه ..يارب مش عايز ابقى منافق وكداب وانا بقول المناهج دى .... صبرنى يارب علي الجهله وخلينى امسك اعصابى

نفسي اقف احيي العلم من قلبى بجد وابقى منتمى بجد

ادينى يارب صبر على كل الناس الى بتحاول تقرا الجرنان جنبى فى المترو ..وكل من بيعمل تيييييت ويتهمها فى واحد تانى

يارب ابطل اقول لمشمش الفاصوليا بتاعتك هايله ياحبيبتى ..وانا عارف من جوايا انها وحشه وماتتاكلش..
يارب افتح الجرنان مالاقيش فيه ممتاز القط وسمير رجب واسامه سرايا والاقى الناس بتكتب لله مش عشان مصلحهتهم الشخصيه
نفسي اصحى الصبح افتكر انى كنت فى كابوس وحش وان كل حاجه حواليا مكانتش حقيقيه وانى كنت بحلم
يارب
يارب
ميجووووووووووووو

Friday, December 26, 2008

بواخات مصرية

قبل ما اقول اي حاجة عايزة اشكر كل الناس اللي زي الفل اللي سألوا عليا طول الفترة اللي فاتت. واقولهم معلش علشان بقالي كتير مش بطلع البلكونة ولا بروح عند حد. بس الاطفال يا جدعان مش بيتولدوا بساعه بيولوجيه متلخبطة لا ده معندهومش ساعه اصلاً. ساندو خربت ساعتي البيولوجيه ومش عارفه هارجع الشغل تاني إزاي.
بقيت اصحى وقت ما بتصحى وانام وقت ماتنام واحياناً ساندو بتنام ساعه ونص ساعتين وديه بتبقى اسعد ساعات حياتي. ممكن الحق اقرا الجرنان او اشرب كوبايه شاي او اقعد افكر في حال الناس فلقيت مثلاً
انك ساعات تتصل بحد على التليفون يرد عليك ويقولك "سلامو عليكو" .مع ان الجمله ديه من حقك انت لانك انت اللي طالب. ولو حالك زي حالي تقوم تتلخبط وتبقى منتاش عارف مين اللي اتصل انت ولا هو
مممممممممممممممممممممممممممممممم
تفتح التليفزيون وتحولبالريموت وتلاقي ممثل مستضيفينه في برنامج على قناه محدش بيتفرج عليها غير صاحبها وفي اخر البرنامج تلاقي الممثل الضيف عمال يشكر في المحطة ويقعد يقول بسم الله ماشاء الله والله احنا بنحب القناه ديه قوي يا استاذ طارق وانا طول اليوم بتفرج على القناه بتاعتكو مع انه من 10 دقايق بس لما سالوه عن رايه في مسلسلات رمضان وايه اللي عجبه فيها قال انه مش متابع ومبيتفرجش عالتلفزيون
كككككككككككككككككككككككككككككككككككككككككك
طول الوقت الناس تقولك زمان مكنتش الدنيا كدة مع ان معظم الناس ديه محضرتش زمان ده. وتلاقي واحد يقعد يشتكي من الموبايلات والنت اللي فتحت مدارك العيال الصغيرة وقضت على العلاقات الانسانيه مع انك لو خدت منه الموبايل بتاعه او النت قطع من بيتهم تلاقيه قاعد يندب زي المعدده
ححححححححححححححححححححححححححححححححححححح

لسه في ستات بيوت لعايه دلوقتي فاكرين ان دورة العصير بتبوظ الغساله الاتوماتيك وعادة واحدة من الستات دول بتكون ساكنه فوقك فتلاقي سيول وامطار غزيرة عندكو بس وبقيه البلد كلها تعاني من ارتفاع في درجات الحرارة

هههههههههههههههههههههههههههههههههههههههههههههههههه
تلاقي واحد من جيرانك بيسأل عليك البواب وباعتلك مع كل الناس انه عايز منك خدمة ويخليك طول الوقت مش عارف هو عايزك في ايه لغايه لما تلاقيه من غير مقدمات بيخبط عليك يوم الجمعه الصبح الساعه 8 علشان يضمن يلاقيك في البيت ويطلع انه عايز الجرايد القديمة اللي عندك
ططططططططططططططططططططططططططططط
المترو بينقل يومياً 5 مليون مواطن عادتاً مابيقروش ومع كدة لو ركبت المترو ومعاك اي كتاب او جرنان تلاقي كل اللي واقفين حواليك عنيهم معاك في الكتاب. ومش كدة وبس ده ممكن يكون في واحد من اللي حواليك دول بطيء الفهم بيقرا في كتابك بصوت عالي ومتاخر عنك بنص صفحه ويتضايق لو قلبت الصفحه قبل ما يخلص حصه القراءه الرشيدة بتاعته
خخخخخخخخخخخخخخخخخخخخخخخخخخخخخخ
في نفس المترو اللي بينقل 5 مليون راكب كل يوم يطلع حظك في واحد واقف جنبك عنده مشاكل في القولون لا مؤاخذه وده تعرفه لما تشم ريحه تخلي عنيك تدمع ويجيلك دوار بحر وميل للقيء وتلاقي نفسك بتترجى من ربنا انك تفقد حاسه الشم او مناخيرك كلها وصاحبنا ده واقف جنبك بيبتسم ابتسامة باهته تدل على انه صاحب التييييييييت الجامدة ديه
ىىىىىىىىىىىىىىىىىىىىىىىىى
تزهق من المترو خالص وتقرر تاخد تاكسي يقوم السواق مستغل انك معاك واحدة ست اياً كانت بقه الست ديه ويزود في الاجرة علشان يحرجك قدمها
لللللللللللللللللللللللللللللللللللللللل
تمشي علي رجليك في الشارع تلاقي بني ادمين ياما ملمومين حوالين حاجة ممكن تكون حريقه او خناقه او حادثه محدش عارف. وتلاقي واحد ساب الزحمة ديه كلها وماشي وراك ومصر يكلمك ولما تبصله يقولك: كابتن كابتن هو في ايه؟
او تلاقي مجموعه ناس عاملين زي ندوة للرأي فيها واحد بيفتي وبتكلم عن تفاصيل الحادثه وعارف اعداد القتلى والجرحى كلهم وبعدين تكتشف ان صاحبنا ده كان بيتكلم عن حادثة تانيه من تأليفه ملهاش علاقه خالص باللي حاصل في الحادثه اللي واقف جنبها
ساندو صحيت إهي إهي إهي إهي عن إذنكو بقه
Love,
MishMish

Sunday, December 14, 2008

انا مهزوم ..اذن انا محبط

صحيت امبارح بدرى حوالى الساعه 5ونص ..عشان اروح اتفرج على ماتش الاهلى وباتشوكا ..كان الكافيه زحمه جدا والجو رائع والكل متحمس للماتش ..بدأ الحديث قبل المباراة وكان الكل متفائل ....الى ان بدات المباره واحرز الاهلى هدفه الاول وارتفعت معنويات الجميع ..حتى جاء الهدف الثانى .واصبح الكل واثقا من الفوز ..وانتظرنا الشوط الثانى لكى نشاهد شوط تحصيل حاصل بمعنى ان الفوز مضمون بشكل كبير ..لكن جاءت الرياح بما لا تشتهى السفن ..ففريق باتشوكا المكسيكى احرز اربعه اهداف تلو الاخر لكى يفيق الجميع على كابوس مزعج ..وهو الهزيمه أو النكسه لحسن حد يزعل ..ذهبت الى المنزل وانا محبط ..لا اعرف لماذا مع ان الاهلى لو كسب البطوله مش هاخد منه حاجه ولا هاشارك اللاعيبه فى المكافأت ..سالتنى مشمش على النتيجه قلتلها اتنفخنا يامشمش !
قالتلى وانت زعلان ليه ؟ ايه الى حصل يعنى؟
نمت وحطيت المخده فوق دماغى وانا محبط وبرضه مش عارف ليه ؟ مع انى مش اهلاوى متعصب
بس برضه عندى احباط ..اجبرت نفسي على النوم ..الى ان قمت لاتناول الغذاء ومازالت حاله الاحباط مستمرة
اخذت ابحث عن مبرر لحاله الاحباط ..الى ان توصلت لنتيجه ...انا محبط لانى مهزوم ..فى الكورة بس؟
اكيد انا محبط لانى مهزوم فى العمل من رؤسائى الروتينيين والمناهج المتخلفه التى اقوم بتدريسها للاولاد ..بس؟
ومهزوم فى المواصلات العامه من ميكروباصات واتوبيسات وسلوكيات الناس العشوائيه ..بس؟
ومهزوم فى طوابير العيش والبنزين ..وغيره من كافه انواع الطوابير ..بس؟
ومهزوم فى المستشفيات واقسام الشرطه بسبب المعامله الغير ادميه التى يتعاملون بها معى ..بس؟
ومهزوم فى وسائل الاعلام التى تتحدث عن ناس لايعرفوننى ولا اشبههم ..اعلانات هذه الوسائل مخصصه لفيلاتهم وشاليهاتهم فى مارينا وبورتو سخنه ..بس؟
مهزوم بسبب مايحدث لنا من ضربات سياسيه واختفاء دور مصر كدوله عريقه واحتلال دول اخرى لمكانتها ..بس؟
مهزوم فى المكاتب الحكوميه وروتينها المعروف ..من صحه وكهربا وتليفونات ..بس؟
مهزوم امام فواتير الغاز والمياه والكهرباء وارتفاع الاسعار الجنونى ..بس؟
مهزوم امام التعصب الدينى والفتاوى المتخلفه وكل من يعبث بدماغى ..بس ؟
مهزوم امام التيار الاعلانى الاستهلاكى الذى يعمل ليل نهار من اجل الترويج لسلعه المختلفه
مهزوم مهزوم مهزوم
وكان الانتصار الوهمى الوحيد الذى نعرفه هو الانتصار فى كرة القدم ..هو ليس بانتصار معروف ..لكنه على الاقل انتصار فى شيئ من الاشياء حتى ولو كان وهميا او تافها ..هذا الانتصار يعطى امل فى الحياة ان هناك شيئ جميل ..لكن افقنا جميعا على ذلك الكابوس الذى عرفنا واقعنا وصدمنا بشده ..لاننا مهزومون فى كل شيئ فلذلك كانت هزيمه الاهلى صادمه ..فلم يعد فى القلب مكان لهزائم اخرى
كلمه اخيره : منك لله يا اهلى كنت خليت الهزيمه دى فى اول الاجازة على الاقل كنا نسيناها فى العيد ..انما تعكنن علينا قبل الشغل بيوم ؟ رربنا يسامحك يااهلى ...وربنا يكون فى عون الزمالكويه المهزومون دائما
انا مهزوم ...اذن انا محبط
ميجووووووووو

Friday, December 12, 2008

الى السيد فلان الفلانى

الى السيد فلان الفلانى
انا المواطن العلانى
عنوانى مش بعيد
يا ف بحرى...
يا ف الصعيد
سيب اول شارع
وتانى شارع
وعدى الناصيه
تلاقينى ساكن جنب جيرانى
المهم ياسيد
عندى كام سؤال
شغلوا البال
وحاجات مجننانى
ليه دكهوما ..زى الغمه ؟
وليه دلهوما عملو هلومه
ودوكها عاملى زعيم الامه
دوكهوما ماسكتوش
ودلهوما راحو فى الفاشوش
ورقعوا بالصوت الحيانى
وانا فى راسى الف شاكوش
ومش عارف
انا مع مين ؟
مع الفريق ده ولا التانى ؟
السلام ختام
مش هاكتر فى الكلام
ابقى رد عليا فى
العنوان المذكور اعلاه
ولو حابيت تقابلنى
دور عليا
واكيد هاتلقانى
ميجووووووووووووووو

Monday, December 8, 2008

طقم اسنان طائش


استيقظ عم صبحى فى الصباح الباكر ليذهب الى مكتب معاشات الخانكه ليصرف المعاش الاستثنائى قبل عيد الاضحى وعندما وصل الى هناك ..وجد طابور طوييييل من المسنين تحت الشمس الحارقه ..مستندين الى عكازاتهم وقوفا فى الشارع ..
وقف عم صبحى مضطرا ..ووضع سماعه ال ام بى ثرى فى اذنه مستمتعا باغانى محمد حماقى ..كان الطابور يسير ببطء شديد ولكنه وقف متحملا وصابرا ..فعم صبحى وراؤه الكثير من الالتزامات ..فهو مطالب بدفع اشتراك ال(جيم ) ويسعى للمعاش حتى يستطيع الخروج مع صديقته نرجس ليتنزهوا فى مول سيتى ستارز ويشاركها اكل الايس كريم ..فجأه جاء عم جمال ودخل فى الطابور ووقف امام عم صبحى متنطعا كعاده بعض المصريين ..ولم يعجب الامر عم صبحى

عم صبحى : فيه طابور ياخينا ..عيب كدا (لم يرد عم جمال ) يعنى انت مش عايز ترد؟ بلطجه يعنى؟

عم جمال : عايز ايه ؟ بتزعق ليه؟
عم صبحى : تاخد دورى وتقف قصادى وتقولى بزعق ليه ؟
عم جمال: انا واقف من الصبح ..انت الى مش واخد بالك
عم صبحى : واقف من امتى ؟ هو انا اعمى ولا عندى زهايمر؟لا مايغركش منظرى دنا واخد بطوله المملكه فى الملاكمه ايام الملك فؤاد الله يرحمه
عم جمال : انت بتخوفنى يعنى؟ الى قصادك دا كان حكمدار بوليس العاصمه ..فاكر الفيلم بتاع احمد ابراهيم القاطن بدير النحاس؟ اهو يوسف بك وهبى هو الى كان عامل دورى يعنى ممكن اوديك ورا الشمس
عم صبحى : حكمدار ايه انت شكلك اساسا مايديش غير اميرالاى بالكتير ..اتفضل بقى ارجع ورا
عم جمال: لا مش راجع ..انت الى ترجع ورا
عم صبحى: انت صفيق اوى يعنى الناس دول كلهم مش عاجبينك ؟ (بصوت عالى ) تعالت الاصوات من الطابور الخلفى وابتسم عم صبحى ابتسامه النصر
رجل مسن 1 : عيب كدا ياجماعه ماينفعش الى بتعملوه دا ..هو احنا صغيرين ..افتكرو اننا فى حرب 48 كنا رجاله ووقفنا وقفه رجاله .. وقفنا قصاد رصاص الانجليز بصدورنا ..ماخفناش ليه؟ عشان كنا رجاله ووقفنا وقفه رجاله

رجل مسن 2: عيب ياحجاج ..العيال الصغيرة تقول علينا ايه؟ ..خلصونا بقى عشان نروح .. انا سايب الميسنجر بتاعى اون لاين ..زمان عطيات الجيرل فريند بتاعتى بتبعتلى نودج كل شويه ..وفاكرانى مطنشها
رجل مسن 1 : ومين سمعك انا سبت الى فى ايدى وجيت ..كنت بعمل داون لود لافلام وشويه مصارعه حرة
عم صبحى : انتو مش شايفين ..هو الى معطل الطابور ازاى ؟ يعنى لما اديله باللوكميه فى وشه عشان يتعلم الادب
عم جمال : لا دانت زودتها اوى ..انت باين عليك هاتنضرب انت واللى يتشددلك ..انا واقف هنا والى مش عاجبه يضرب دماغه فى الحيط
راجل مسن 1: طب انا بقى هاتشددله ..وورينى نفسك ياصايع ..ياكلب الانجليز يابتاع الكامب ياعميل (يقترب من جمال ويهبده روصيه فى دماغه )فيقوم عم جمال يرفع عكازه لكى يضرب بها صبحى لكن صبحى يتفادى الضربه برشاقه
راجل مسن 2 : انتو كلكو عالراجل ولا ايه؟ هى دى المرجله؟ والله الى هايقربله هايعرف شغله


اختلط الحابل بالنابل وارتفعت العكازات وتطايرت اطقم الاسنان نتيجه الضرب بالبونيات والشلاليت ..وتحول المكان الى مشهد تكسير الخمارة الشهير ..انتهى الامر الى اصابه عم جمال وعم صبحى اصابات بالغه ..فعم صبحى اصيب بطاقم اسنان طائش فى صلعته ..وعم جمال اصيب بضربه عكاز فى مؤخرته لكنه لم يبوح لاحد بذلك لان صبحى الخبيث اشاع انه تعمد وضع العكاز فى مؤخره جمال ..انتهت المعركه وتناثرت الاشلاء فى المكان ...سماعه اذن عم حسين ..صفحات من جريده الاهرام متناثرة ..عكازات مكسورة ..طقم اسنان عم مينا به سنه مكسورة ..ساق عم عبد الحميد التعويضيه ..نظارة عم خليل الى لسه عاملها فى التامين الصحى
ذهب الجميع الى قسم البوليس وتصالح الجميع ..وقيد المحضر........ ضد مجهول
من وحى خبر نشر بالمصرى اليوم تحت عنوان
ميجوووووووو

Saturday, December 6, 2008

رز وبسله

ازاى اقولك بحبك
وانا مخنوق ومتضايق
اقولها ازاى من قلبى
وقلبى مش رايق
بفكر فى حاجات
فى اللى جاى والى فات
وليه ياحبيبتى يوم السبت

بقى زى الحد

بقى شبه التلات

اقولك بحبك ازاى وإمتى؟

وانا كل همى

مين يركب زرار القميص

ويتنى كم الجاكته

حتى الكلام مابيننا
مابقاش زى زمان
بقيت اسالك
هانتغدى ايه النهارده ؟

ياترى رز وبسله ؟

زى بقيه الحاجات الممله

وبقى اقصى طموحى فى التغيير

يادوبك..

يادوبك

بالكتير

اغير لون ملايه السرير

واسمع نفس الكلام

وتفضل نفس الوشوش

هى هى

من اول
مينى باص خمسه واربعين
لحد اسماعين

بتاع الحضور والانصراف

بنفس الاستظراف

لما يبص فى ساعته القديمه

ويبتسم ابتسامته اللئيمه

وافضل فى الشغل

مع نفس الملفات

وتيجى الساعه اتنين الا ربع

الاقى نمرتك

وارجع واسألك نفس السؤال

هانتغدى ايه النهارده ؟

ياترى رز وبسله ؟
ميجوووووووووووو



Tuesday, December 2, 2008

خواطرميجو وزوجته مشمش

متصدقش حد يقولك اقتل علشان ربنا يحبك. ربنا قادر على كل شيء ان كان عايز ينهي حياه حد أكيد هيقدر يعمل كده بنفسه
إذا طفيت شمعتك في الضلمه اللي احنا فيها ديه علشان انت اعتقدت انها مش فارقه. يبقى مش من حقك انك تشتكي ان الدنيا اضلمت اكتر
لو اتملك الغضب منك وحسيت انه هيغلبك، وفجأه بقيت اقرب للحيوانات عن البني ادمين. حاول ما يكنش في حد يعرفك شايفك في الحاله ديه لان نظرته ليك هتتغير للأبد
دايماً في جانب مشرق في كل مشكله حتى لو مكنتش انت قادر تشوف ده في وقتها
لو بصيت لكل الحاجات اللي حواليك هتلاقي نفسك بتستعمل نصها بس بأحسن تقدير. فقبل ما تتعب نفسك علشان تزود الحاجات اللي حواليك حاجة او حاجتين تانين اتأكد الاول انك فعلاً محتاجلها
مشمش
من وسط اكوام من البامبرز والالبان
------------------------------------------------------------
الزواج هو عمليه استنزاف لكائن ضعيف( يبدو انه قوى) لصالح كائن قوى( يبدو انه ضعيف )... الحدق يفهم
ماتلخبطش المترتب وتعمله على طريقتك عشان ماتتعبش - جمله من فيلم مش فاكر اسمه
اصبحنا شعب بلا ضمير ولا اخلاق ..من وحى ميكروباص السيده عائشه
ابص لروحى فجاة لقيتنى كبرت فجاة تعبت من المفاجاة ..جمله صادمه ..صدمت الناس لذلك انتشرت انتشار واسع
..لان هذا مايشعر به المصريون
ميجووووووووووو

Friday, November 28, 2008

البتنجان مايدخلش البيت


عودة تدوينيه مرة اخرى ...ما احلى الرجوع الى البلكونه ..بعد اللحوسه الى كنا فيها ..نأسف للتاخير بسبب استقبال العضو الجديد المنضم حديثا للبلكونه كعضو اساسي ..الانسه ساندو بنت الاستاذ ميجو ومدام مشمش

انتهى كل شيئ على خير الحمدلله بعد معاناه لاكثر من ثلاثه اسابيع وقامت مشمش بالسلامه هى وساندو ..اخيرا رجعنا لبيتنا الجميل بعد شحططه وبهدله ..كنا عاملين زى المهجرين بتوع السويس ..شويه عند حماتى وشويه عند والدتى ..وقفل شنط وافتح شنط ..التجربه كانت قاسيه جدا لكن الحمدلله .. المعاناه بدات لما مشمش تعبت ورحنا بيها على المستشفى وقعدنا حوالى 3 ايام فى انتظار الفرج ..الحقيقه كنا فى حاله من التوتر ..الى زاد وغطى التليفونات الى كانت بتجيلنا يوميا من الاهل والاصدقاء وكل واحد بيحاول ينقل خبرته لينا ..الى يقولنا بلاش الدكتورة دى والى يقولنا خلى بالكو من الشيئ الفلانى وطبعا كانت الاراء بتتضارب ..واحنا نزيد توتر قال يعنى ناقصه ..المهم ربنا سترها معانا وكل شيئ كان كويس ..لكن بدأ وجع الدماغ من بعد وصول ساندو بالسلامه .. كل واحد عمال يدى رايه .. والى عايزنى اسميها على اسم امى والى عايز اسميها على اسم خالته بمبه الله يرحمها .. المعاناه الحقيقيه بقى كانت مع الممرضات والعاملين بالمستشفى ... من بعد ما الاخت ساندو وصلت لقيت جيش طويل عريض من الممرضات والعمال واقفين طابور طويييييييل ..لدرجه انى شكيت ان فيه ناس كومبارس لابسين لبس ممرضات عشان يلهفو الحلاوة ..وكل واحد يقولك : الف مبروك ..عقبال ماتخاويها ..تتربى فى عزك ( قال يعنى ابوها مليونير ) ..وهكذا الى اخر عبارات الشحاته وطبعا الجمله من دول على الاقل ببريزة .. اتنفضنا تمام التمام ورجعنا على بيت حماتى ..وبدات اسمع حاجات غريبه لاول مرة استخدمها فى حياتى .. كنت بشوفها بس فى الافلام العربى ..وبالذات فيلم الحفيد ..لازم يعنى الناس تشرب( مغات) ..يعنى لو عملنا سحلب ولا اى حاجه تانيه يبقى بوظنا الدنيا

وتلاقى بقى الستات وتقاليعهم الغريبه : اوعى تخش على مراتك وانت حالق دقنك ( بالذمه مش احسن اخش عليها وانا حالق بدل من شكلى الى عامل زى المساجين؟ والبت تتسرع؟ ) ..الى زاد وغطى يقولك ايه بلاش تخش عليها بلحمه مش عارف ليه ( دا اليوم الى بدخل عليها بكيلو لحمه بتزغرط )

كله كوم وموضوع البجنجان (البتنجان الاسود يعني) ده كوم تاني. واحدة صعدية نعرفها اتصلت وقالت اوعوا تدخلوا البجنجان الاسود البيت وإذا كان عندكوا بجنجان ارموه. ليه يا ستي؟ قال علشان مشمش ما تكبس. تكبس يعني ايه يا طنط؟ تكبس يعني ما تقدرش ترضع ساندو طبيعي. وغير كدة ما حدش يخش على مشمش, مشمش هي اللي تخش عالناس, ليه يا حجه؟ علشان مشمش متتكبسش الله يمسيك بالخير ياعدويه ( تعالى وخش عليا ). ولما سالت علشان تطمن هو حد جالها ولا لا قلتلها اه. قالت يا نهار اسودددددددددددددددددددددددددددددددددددددد! قولتلها في ايه يا ست؟ قالت لازم تربط فتله سودة على اديها سبع لفات وبعدين تمسك بطنها ومكان الغرز حتى لو كانت كويسة وطبعاً السبب معروف من غير سؤال

العجيب في الموضوع ان كل التوتر اللي احنا كنا فيه ده كان سببه ناس بتحبنا. والمفروض انهم بيحاولوا يساعدونا ويعملوا الاصلح لينا لكنهم من غير قصد خلونا داخلين اوضه العمليات واحنا شاكين في الدكتورة والمستشفى والقطاع الطبي كله. خرجت مشمش وساندو كويسين والحمدلله. عملنا قعده عرب علشان الاسم ماما عاجبها اسم وطنط عاجبها اسم تاني وبقيه العيله كل واحد عاجبه اسم مختلف عن التاني ومشمش مدهولة في البنج وبعد ما ربنا كرمنا بالاسم. وروحنا وبعدين طلعت طنط بتاعه الصعيد اللي عايزنا ندعي المرض. هو في ايه لما نقول الحمدلله ساندو حلوة ومشمش حلوة. ومحدش ينفع يروح عند حد يسأله هي المدام بترضع طبيعي ولا لا. علشان ده موضوع عائلي مش موضوع مطروح للمناقشه ..

دخلنا بعد كدا فى مرحله السبوع .. ودا بقى اغرب حاجه فى الدنيا لان له شروط ومتطلبات : لازم المنخل يبقى جديد عشان ماينفعش انه يكون بتاع سبوع قديم ..مش عارف ايه فايده المنخل ؟ ؟ هى دقيق مدعم؟عمالين يفرهدو فيها ويدقوا هون فى ودانها ..ويقولك سبع حبوب يعنى لازم نجيب صينيه ونحط فيها سبع حبوب ..يعنى فول وعدس ورز والذى منه ..وناس ولاد حلال اتطوعو وقالك كل الستات تلم الدهب بتاعها ونحطه فى العروسه بتاعه السبوع عشان البت يبقى رزقها واسع ..طبعا المتطوعين دول احرجونا مع ستات العيله وكان منظرنا زى الشراب المدلدل ..يعنى بالليل لو طلع حرامى وقشط الدهب دا على حظنا الاسود هايبقى ايه منظرنا ساعتها ؟ ..

الحقيقه احنا شعب بنضيع وقتنا و فلوسنا وفرحتنا فى كلام فاضي بنسيب الحدث الرئيسى الى يفرحنا وندور على تفاصيل وحاجات فرعيه بتسبب مشاكل ..بصراحه مافيش اجدع من الاجانب فى المواضيع دى بيتعاملو مع الحياه ببساطه وسهوله ومن غير تكليف ..يعنى بدل ما اهتم بصحه مراتى وبنتى وافضل جنبهم ..اسيب شغلى وانزل الف على حاجه السبوع واقعد اعبى اكياس مكسرات عشان شويه تقاليد فارغه ..مش كلام منطقى ؟

سلام بقى عشان ساندو بتعيط .. هاروح احطلها ريشه غراب احول فى البامبرز يمكن تنام يا حوريه

وعقبال عندكو

ميجووووووو

Friday, November 21, 2008

عضو جديد


انضم الى البلكونه عضو جديد ...ساندو بنت ميجو ومشمش .. ..وشكرا على كل من سأل علينا فى غيابنا ..لاننا كنا مشغولين جدا ..ناسف على التاخير ..وهذه هى اول تدوينه ل ساندو

وااااااااء واااااااااااااااء واااااااااااء واااااااااااااء

ساندو تنتظر منكم تعليقات على البوست الذى كتبته

Thursday, October 30, 2008

نرجع لموضعنا

بيقولك مصر بتتقدم بينا ..... هودا الفكر الجديد
خلاص راح ندخل عصر النووي هودا التجديد
الله!؟
مش دي البت لواحظ؟!.....نازلة من عربيه مين؟
ربنا يسترها علينا وعلى ولايانا
بس سمعت الله اعلم .... وبعيد عن السامعين
انها ماشيه في الحرام
ما هي سابت اسماعيين..... بعد قصه غرام
اصله ما حلتوش اللضا
اسماعيين مانت عارفه إبن عم مرتضى
مرتضى بقى طول عمره حظه معافر
جهز باسبورة وكان هايسافر.....كان متعشم يروح اليونان
هو وحسين ابن فوزي....اللي فاتح دكان
اللي في آخر الشارع
فوزي بتاع البيض..... الحرامي
ايتنشبتن
اتشسيبي
اسكت مش قفشوا الواد مسعد....سارق وصله دش
والست أم احمد جارتة ..... وقعت منها امبارح زلعة مش
غلبانه يا عيني ومسكينه
دا جوزها لابيهش ولا بينش
كان ماشي في حاله
.... بيجري ورا رزق عياله
قام هفه ميكروباص
صاحبه الاسطى عليوة
......كان جنبه بنت حليوة
معذور مكنش مركز.....قالها ما تيجي نروح السيما
خبط الراجل وعمله عاهه مستديمه
يا ساتر يا رب....دا البني ادم مالهوش قيمةاشيبشيس
اتيشسبتشتنيسب
لا حول ولا قوة إلا
منها لله الكله...هي والمدعوء البانجو
ضيعوا الواد مجدي وصابر وكمان الواد سانجو
صابر اتخرج من الهندسه
ومجدي خدها من قصيرها وساب المدرسة
قاعدين عالقهوة ليل ونهار
مقضينها شيشه ودومنه ولعب قمار
وسانجو اشتغل صبي جزار.....عند المعلم عطية
كان مرة بيشفي دبيحه..... وفاكره عجل صغير
اتاريه بيشفي حمار!!!
واحنا ناكل
إشي كبدة وإشي سجق
يا عم بلاش ندق.... خلينا في حالنا يا عم
هانقعد نعيد ونزيد
المهم
نرجع لموضعنا
اقولك بقه ايه هو الفكر الجديد
ميجوووووووووووو

Friday, October 24, 2008

لما كنت كتكوت

زمان
لما كنت كتكوت
كان فوق السطوح فيه عشه
مليانه بالطيور
كنت اطلع العب معاهم
واحطلهم فول
وقمح
فى طبقى الزغنطوت
ولما كانو يشوفونى
يعزفو سيمفونيه
مانا قائد الاوركسترا
وجاى فى المعاد مظبوط
كنت اسمى كل واحد
ديا الفرخه نازك
والديك دا اسمه فتحى
ودكر البط.. شلتوت
كنا عايشين فى سعاده
والدنيا سكر زياده
والكل كان مبسوط
لكن ....
كنت اهرب
اهرب فى جلدى واموت
لما اشوفهم
واحد ورا التانى
بيندبح ويموت
..زمان
...زمان
لما كنت كتكوت !
ميجووووو

Wednesday, October 22, 2008

Serial Number


الراجل ده هيجنيني .... هيجنيني
الحكايه ومافيها اننا خلاص بنحضر لمجي اول انتاج مشترك ليا انا وميجو. خلاص بإذن ربنا الامورة الصغيرة فاضلها اسابيع قليله وتوصل كوكب الارض بالسلامة. ومن اول يوم في الحمل لغايه النهاردة مش عارفين نتفق على اسم يعجبنا إحنا الاتنين. وحتى لو لاقينا لما نيجي نقوله للناس ما يعجبهمش
المشكله تتلخص في اني بحب الاسماء الاجنبيه بحكم ثقافتي وبانها مش كتيره. انا بحب كل ما يخصني يبقى مختلف ومفيش زيه. يعني اسم بنتي لازم يبقى جديد ومعناه حلو ومش منتشر وسهل. قوم كل ما اقترح على ميجو اسم يطلعلي فيه القطط الفاطسه خدوا عندكم
الكسندرا: يعني معينه ومدافعه قالي: محدش هيقولها الكسندرا كله هايقولها ساندرا فنوفر حروف ونسميها ساندرا وخلاص وطبعاً ده معجبنيش
كريستي: وده اسم مسيحي معناه حاملة المسيح قالي: ده معجون سنان
سيندي: يعني قمر قالي: مانسميها قمر ونريح كل شوية حد هيسألنا يعني ايه الاسم ده هنقوله قمر هيقولنا طب ماكنتوا سموتها قمر
نادين: يعني امل قالي:نادين ميجو على اللي جابه
بترا: يعني صخرة قالي: ديه ماركة عربية لو هيدفعولنا فلوس نسميها بترا لو مادفعوش نسميها هوندا علشان نحرق دمهم
بريانا: يعني قوية قالي: لا انا بنتي مش برياله
سيرينا: يعني هدوء وسكينه قالي: سيرينا اهرون بتاعه رافت الهجان. ثم ليه الكذب البت هتطلع هاديه لمين ليكي ولا ليا
ان: قالي:ان الان موعد أذان العصر
الاسماء اللي ميجو بيحبها بقه لازم تبقى عربيه لانه بيحب اللغه العربية. مايكونش فيها نقط كتير علشان اللخبطة في الاوراق الرسمية لان معظم موظفين الحكومة تعليمهم على قدهم. يكون من النوع المألوف. ويبقى سهل الكتابه. والاسامي اللي اقترحها كانت
رقيه: قولته يا راجل دانت ستك ام ابوك اسمها جوليا هتسمي انت رقيه
عزة: علشان اغنيه حماده هلال وعايز الناس تناديه في الشارع ويقولوله منور يا ابو عزة
ست من ندلها: كنت هاطق من الغيظ مردتش عليه
بهيه: علشان بيحب محمد منير
الاسامي بقه اللي اتفقنا عليها ومعجبتش الناس
رينيه: يعني متجددة قالوا قديم مع اني عمري ما سمعته قبل كدة
سابرينا: ماما قالت لا ديه قصه فستان
كرمة: يعني شجرة العنب ماما قالت اول حفيدة ليا مش هيبقى اسمها عنبه واصلاً احنا لا هانسمي فواكهه ولا خضروات
فيرينا: اسم قديسه صحابنا اللي مش مسيحيين قالوا هتسموا البت على اسم عربية خالها
بس فاحنا بقالنا بتاع 9 شهور بنعمل دراسات جدوي وترشيحات وفشلنا اننا نلاقي اسم. فلو في حد يقدر يساعدنا في الموضوع ده يتفضل. تعاطفكم لوحده مش كفايه. مش معقوله اولد ومش عارفه اسمي البت ايه يرضيدكم اديها
Serial Number
love,
MishMish

Sunday, October 19, 2008

زي الشتا



كوباية شاي بالنعناع في عز الشتا

يفضل الراديو والع

وانا مستخبي تحت الغطاء

وقطرات المطر

تخبط على الإزاز

تنده عليا...علشان افتح لها

نلعب سوا...نرقص سوا


انا زيي زي الشتا

جوايا حاجات كتير

لكن متلخبطة

معرفش ليه بحب البرد؟

يمكن عشان إحساس الدفا؟

تمام زي الخيانه

لولاها ما عرفنا الوفا


وانا مبقتش عارف

ديه حالة نشوة...ولا حالة إكتئاب


وليه لما بفتح الدولاب

ادور عالكوفيه...السودا المقلمة

وامشي في الشوارع لوحدي

ابص عالبيوت المضلمة

ساعات نقطة مطر

من فوق ورقه شجر

تنزل على خدي

بحتار انا

دي دمعتي؟ ولا نقطة مطر؟

ميجوووووووووووو

Wednesday, October 8, 2008

ثقافة حمامات واحواض

يوم الجمعه اللي فات عملت كوبايه النسكافيه بتاعه الاستمورنج واستنيت مجاميجو يجب الجرايد. وطبعاً خطفت منه المصري علشان اقراه قبله واعكنن عليه - مش عارفه بعمل كدة ليه - المهم فتحت الجرنان من الصفحة الاولى على غير العادة وشوية وبعدين مقدرتش امسك نفسي من الضحك. قام ميجو راح بصاصلي بنظرة كلها استعباط وقالي: اتهبلتي خلاص؟ ايه اللي في الجرنان يضحك قوي كدة؟

قولتله بص الخبر ده قام واخد الجرنان وضحك قوي وقال: ايه الهبل ده صحيح!!!؟

الخبر بقه كان نصه كدة




اه والنعمة واللي مش مصدق ان في واحد عاقل ممكن يقول الكلام ده يخش عاللينك ويقرا الخبر بنفسه


الحج بتاع الإسكان قاللك مع ان الناس بتوع الدويقه هما السبب في وقوع الجبل عليهم لكن الحكومة برضه هتطلع احسن منهم وتعملهم حملات توعيه في المنطقة بعد نقلهم لمساكن التطوير خلال المرحلة الجايه عشان تعرفهم طريقه استخدام الحمامات والاحواض

بس الخبر مابينش إزاي حضرة الحج المسئول بتاع الإسكان وصل للنتيجه اللاوذعيه ديه. على رأي ميرو يعني اللي وقع الجبل واحد كان واقف يـ.......... - يتبول يعني بس بالعاميه - من فوق!!!!!!!!!!!!. قولتله ممكن يا ميرو ليه لا وتلاقي مواسير الصرف عندهم لفوق زي المداخن اللي بيحطوها محلات الكفته. وده التفسير المنطقي الوحيد لكلام الحج. لان الجبل هو اللي وقع على الدويقه مش الدويقه هي اللي وقعت عالجبل

وبعدين محدش قال برضه ايه اللي بيعملوه بتوع الدويقه في الحمامات والاحواض غير اللي - لا مؤاخذة - بنعمله . وبعدين طالما الناس ديه جامدة كدة مش المفروض نحرص افرض راحوا عند الهرم وعملوا بيب بيه هناك - لا مؤاخذه - ووقعوه بقه هنعمل ايه احنا؟

ثم فين وزير الثقافه من الحوار ده. لما في حاجة اسمها ثقافه حمامات واحواض محدش قالنا عليها ليه؟ إزاي يعني ما يبقاش في عنها برامج في النيل الثقافيه. إزاي معتز مجبش واحد من بتوع الاسكان مسئول عن ثقافه الحمامات يعلمنا ازاي نعمل بيب بيه كووووووووول


بلاش التليفزيون ليه الحج ما وضحش الحملات ديه هتتعمل فين؟ هل هتبقى جنب المراحيض العامة في الشوارع ولا في الحزب الوطني. طب حلو لما يطلعوا بتوع الاخوان يصطادوا في الميه العكرة ويعملوا هما الحملات ديه ونروح نحضر. يقوم يطلع علينا نفس الحج المسئول يقول الحملات بتاعه الاخوان من برة المنهج انما الاسئله هتيحي من نماذج الوزارة. زي ما عملوا مع المدرسين في موضوع الكادر

وهل علشان الواحد يحضر الحملات ديه لازم يكون واقع على بيته جبل ولا ممكن واحد عادي لسه مفيش حاجة وقعت علي بيته يحضر بإعتبار ما سيكون يعني. ما هو الواحد لازم يبقى مستعد تخيل انت بقه ساكن في عمارة فيها 2 او 3 معندهومش ثقافة حمامات واحواض تقوم العمارة واقعه ده مش بعيد لو مكنش في جبل جنب العمارة يعملولنا انهيارات ارضيه

بجد يا جماعه الموضوع ده جامد جداً ومحتاج فعلاً وقفة مصريه. ما ينفعش اي واحد كدة يخش الحمام والسلام لازم يفكر الاول ايه عواقب تصرف اهوج زي ده على المجتمع وسلامة المواطن وامن الدولة


Love,

MishMish

Tuesday, September 23, 2008

شخص مبالغ فيه


..هو ضخم الجثه وقلبه اكبر من جثته ..من الصعب انك تلاقى واحد زيه فى الزمن دا ..مخلص جدا لاصدقائه بطريقه مبالغ فيها) ....مواعيده مظبوطه بطريقه( مبالغ فيها) ....فى وقت من الاوقات قبل ماتجوز مشمش ..كانت عندى صدمه عاطفيه حاده وماكنتش بحب اخرج من البيت ..لقيته مرة واحده طب عليا وقعد يتكلم معايا وفجأه لقيته بيعيط زى العيال الصغيرة لانى صعبان عليه ..كأنه بالظبط هو الى خد الصدمه ..بصراحه صعب عليا وقعدت اطبطب عليه واقوله معلش ..الدنيا مش بتقف على حد ..خيرها فى غيرها وهو نازل عياط ..صاحبى ده ملكى اكتر من الملك ..يعنى فى جنازة والدى الله يرحمه ..كان هو اول واحد موجود فى العزاء ..واخر واحد مشي ..اروح البيت الاقيه موجود هناك ..يواسي اخواتى شويه.. وشويه يواسينى ..بصراحه الراجل دا مخلص لدرجه الاستفزاز ..بيعمل كل حاجه بضمير ..ساعه تجهيز الشقه بتاعتى انا ومشمش كان رجل المهام الصعبه ..انا طبعا من ذوات الهياكل العظميه المميزة الواضحه للعيان.وهو ماشاءالله عليه ربنا يحرسه من النوع العنتيل، مجرد تليفون صغير الاقيه جاى يجرى يشيل انبوبه بوتاجاز يشيل العفش..كل ما اعجز عن شيله او تركيبه يقوم هو بالمهمه .

الحاجه الوحيده الى بتضايقنى من صديقى(المبالغ فيه ) .لما ييجى ينادى عليا من الشارع ..مش بينادى عليا بس ..دا عملى شهرة واسعه فى الشارع وفى المناطق المجاورة ..ابقى نايم مثلا فى امان الله وفجاه اسمع صوت زى الطيارات الى بتسبق الصوت ...يا ميجوووووووووو..اجرى على البلكونه ابص الاقى الناس فاتحه الشبابيك والبلكونات ..الى واقف شعره منكوش عشان لسه صاحى من النوم واللى واقف بملابسه الداخليه ..وكلهم بيبصولى شذرا ..طبعا بعد ظهور الموبايلات اتفقت معاه على رنه معناها انه واقف تحت البيت ومستنينى .. وطبعا الموضوع دا عكننه ..جدا جدا .


اجمل حاجه بقى لما تروح تتفرج معاه على ماتش ..هو اهلاوى اكثر من صالح سليم ومختار التتش ،لن انسي يوم ماتش الصفاقسى التونسي فى نهائى كاس افريقيا ..كان بيموت لحد ما ابوتريكه جاب هدفه القاتل فى اخر (فانيه )على راى سعيد صالح ..فجاه تحول الى فيل هارب من السيرك ..خدنى حضن ..طبق ضلوعى .وخلانى عامل زى رغيف الفينو ابو بريزة ..وقعد يصقف بايديه (مقاس 49 )وكأنه ماسك كرسيين بلاستيك فى ايده جووووووون ..وفجأة قعد على الكرسي البلاستيك ..الرجلين بتاعت الكرسي ماستحملتش وطرقعت مرة واحده ..نزل صديقى مكانه واغمى عليه ..تجمعنا حوله حتى افاق من الغيبوبه ..لكنه اتضح بعد ذلك انه عمل كدا عشان مايدفعش تمن الكرسي الى كسره !...

بالرغم من ضخامه حجم (صديقى المبالغ فيه) الا انه يخاف من الكلاب خوف اليابانيين من قنبله هيروشيما ..بمجرد ان يسمع صوت كلب فى الشارع يتحول الى طلقه رصاص تجرى بسرعه 250 عقده فى الثانيه .

دائما يتصل بى صديقى (المبالغ فيه ) فى اوقات عصيبه يا اما فى الحمام يا اما باكل يا اما نايم ..معرفش زى مايكون منشن على المواعيد وارد عليه.. يأكد عليا انى هاقابله الساعه تمانيه بالظبط، وبعدها يتصل تانى يأكد عليا انى مش هانسي الميعاد ،والساعه سبعه ونص يتصل ياكد عليا انى مش نايم وانى صحيت و انى لبست ..وهكذا

صديقى( المبالغ فيه )..يشبه السنيده فى الافلام العربى ..زى عبد السلام النابلسي وعبد المنعم ابراهيم والشاويش عطيه ..هو ليس البطل فى قصه حياتك ولكنك لاتستطيع الاستغناء عنه ..لانه يملا فراغ الفيلم ويحرك الاحداث بدون ان تشعر.. لا يمكن تخيل احداث الفيلم بدونه .. تستطيع ان تستأمنه على ادق اسرارك لانه كاتم اسرار بطريقه (مبالغ فيها )..وتستطيع ان تطلب منه اى مهمه فيؤديها بدقه (مبالغ فيها ..) تستطيع ايضا ان تنام وترتاح لانه موجود فى حياتك ..فهو موجود فى افراحك ليفرح بك من قلبه... ومعك فى احزانك ليحزن معك من قلبه ..هو انسان نقى القلب يحبك لشخصك وليس لاى غرض اخر .. حينما يختفى صديقى المبالغ فيه فانى اشعربفراغ كبير واشعران الصورة ينقصها شخص مهم

....اعتقد ان فى حياه كل منا صديق(مبالغ فيه )لكنه لا يشعر بوجوده


ميجوووووو

من فوق سور البلكونه

Sunday, September 21, 2008

حرمت يا بوجي


حرمت يا بوجي..... حرمت.....حرمت ترمرم..... حرمت

اللي يأكل فوق عن طاقته ...... اه اه

تزعل منه قوي معلقته...... اه اه

والشوكة تعضه في لسانه ...... اه اه يانا


فاكرين الاغنيه ديه كانت جات في بوجي وطمطم. مش عارفه ليه ديه اول حاجة جات في بالي وانا بقرا الخبر ده "محامي هشام مصطفي: هيئة الدفاع تدرس «الدية» في القانون الإماراتي" في المصري اليوم بتاع امبارح. ماهو اصل الموضوع كده كان باين من اوله على انه شد ودان من حد كان زعلان. وبما اننا في رمضان شهر الصوم والعبادات والاعتكافات وكل الحاجات. فالظاهر ان الاخ اتش مصطفى. لما اعتكف قعد يفكر في خطيته واعترف وتاب وقال حرررررررررررمت


يعني هو معقول يا ناس اللي قتل 1034 بني ادم تتشال عنه الحصانه بعد اربعييييييييييييييين يوم من الحادثة علشان يطمنوا انه مش هو بس اللي ساب مصر لا ده خد معاه المدام والاولاد والكلب بتاعه ووبعت جاب زواده فضله خيركم شوية مش وملوحه وفطير مشلتت من البلد علشان غربته هتطول ودلوقتي اسم الله عليه قاعد في البلكونه في لمبم بيشرب الفايف اوكلوك تي وفي ايده سيجاره ولا على باله. والاخ اتش قتل واحدة مسمعناش عنها غير بعد مامت ولغايه دلوقتي برضه لسه مش عارفينها يقوم تتشال عنه الحصانه بعد كام ساعه من الحادثة. لا وايه وجابوه هو والراجل اللي قتلها. وبالمناسبه ديه انا عايزة اشكر الحكومة ووزارة الداخليه بالذات على التزامها بتعين 5% معاقين من اجمالي العامليين بها ومش المعاقين جسدياً بس لا ده ضمت ليهم المعاقين ذهنياً كمان. والله الوزير بيتعب يا جماعه


ولقولها حل يا جدعان وربنا فرجها عليه وهيدفع الديه كأنه كان سايق عربيه على الطريق الزراعي وخبطله بهيمه وراضا صاحبها. وزي ما قال اتش مصطفى انه كانت لديه ثقة كاملة في القضاء المصري، احنا كمان كنا واثقين في القضاء المصري زيه بالظبط

Love,

MishMish

Sunday, September 14, 2008

الناس اللي في الدويقه

لما حصل اللي حصل في الدويقه كان رد فعلي زي رد فعل معظمنا خوف من البلاوي اللي بتحصل ورا بعضها يعني مش كفايه الحكومة علينا لا ديه الطبيعه دخلت في الموضوع هي كمان. غضب شديد من الحكومة مينفعش معاه اعتراض ولا شتيمة ولا مظاهرات علشان بعد اللي حصل ده مفيش كلام يتقال.

كان احسن تعليق سمعته عن الموضوع ده ان عبور قناة السويس ودخول الحرب مع اسرائيل خد 6 ساعات والحكومة احتاجت 12 ساعه علشان يعبروا للدويقة ويعاينوا الحادثة ويطلعوا علينا بيان رائع بيقولوا فيه ان الحادثه كانت قضاء وقدر. الحمد لله انا خفت لا يكون السبب عقب سجارة او ماس كهربائي

انا لغايه دلوقتي مش قادرة اتخيل مدى الفزع اللي كانت الناس فيه سواء اللي اندفنوا بالحياه وكانوا بيحاولوا يتصلوا باللي برة علشان يحاولوا ينقذوهم او الناس اللي فضلت عايشه وشافت اسواء مأساة بشرية على الاطلاق.

كل الحوارات والكتابات والتعلقيات عن الحادثة كانت بتصب في ناحيتين: ناحيه شتيمه في الحكومة وده اقل واجب وناحيه تانيه بتوصف اهل الدويقة على انهم ملايكه بجناحات وانهم رضيوا بالهم والهم مرضيش بيهم. وان الازمة ديه كان ممكن تفاديها بنقل السكان من الدويقة لإسكان سوزان مبارك. وبما ان الحكومة فشلت في انها تتفادى الازمة يبقى عليها انها تبدأ بالتسكين الفوري للعالم ديه.

بس نقل الناس اللي في الدويقة سواء قبل الحادثة او بعدها مش هو الحل الوحيد للمشكله. انا معرفش ان كان فيكم حد كان بيروح منطقه عشوائية بانتظام لفترة طويله واتعامل مع الناس اللي هناك عن قرب. انا بقالي حوالي 4 سنين بروح مكان معين وبتعامل مع ناس هناك عن قرب وعلى فكرة المكان ده بالنسبة للدويقة يعتبر راقي والدويقة بالنسبه لهم بيئه.

هناك لاقيت ان القانون الوحيد اللي بيحكم الناس ديه هو قانون الغابه. علشان تأكل لازم تخطف لقمتك من بق اخوك. شفت هناك مخدرات في الشارع بالنهار وشفت خناقات بسيوف وسنج وكمية اسلحه تنفع نخش بيها حرب. شفت اطفال صغيرين اطفال الشوارع بالنسبه لهم عندهم اخلاق. طبعاً مش هجيب سيرة التحرش والاعتداء على اي حد غريب يخش المنطقة سواء ان كان راجل او ست. يعني انا كل مرة اروح هناك فعلاً ببقى معتمدة على ربنا وإن كان لسه ليا عمر. اتعاملت مع عائلات لما الاب فيها بيبقى شارب او ضارب ما بيفرقش بين مراته وبنته وعائلات تانيه الاب بيطلب من بناته انهم يحموه وسعمت عن انه عادي انهم يلاقوا الصبح اللي باقي من جثه طفل لسه مولود اترمى بدمة بالليل جنب الجامع يمكن حد ياخدة لكن الكلاب اللي في الشارع مبتستناش لغايه لما الناس تيجي الجامع يتكون اتعشت بالعيل وسابوا الباقي لما شبعوا. وطبعاً مع كل البهلدة ديه اقل اسرة هناك عدد افرادها 7 وكلهم ارزقيه يعني يوم شغالين و10 قاعدين في البيت

كنت من فترة اتفرجت على برنامج في ام بي سي اسمه 60 دقيقه اظن انكم عارفينه. كان في جزء من البرنامج بيتكلم عن دراسه اتعملت على المساجين في امريكيا الدراسه ديه اظهرت ان 65% من المساجين اللي بيتم الافراج عنهم بيرجعوا تاني لممارسه نشاطهم الاجرامي بعد خروجهم من السجن ويرجعوله تاني في خلال 3 سنوات من تاريخ خروجهم منه. اللي استنتجته الدراسه ديه ان السجون الامريكيه عبارة عن قنبله موقوته وان المشكله ما بتححلش بالقبض على المجرمين وابعادهم عن الشارع لمده محددة وبعدين يرجعوله تاني. فابتدت المنظمات المدنيه هناك تتبنى برامج اعادة تأهيل للمساجين عن طريق تنميه هواياتهم ومعالجتهم نفسيا ومحاضرات يكون الغرض الاساسي منها انها تفهم العالم ديه انها مش لازم تعيش طول عمرها مطاردة من الناس والقانون. وعلى فكرة الموضوع ده تمويله واعضاؤه والمشرفين عليه افراد عاديين والحكومة ملهاش دعوة بالحدوته ديه خالص

في كل الهوجه بقه اللي على الدويقه مسمعتش عن حد فكر يعمل حاجة زي كدة سواء من الحكومة او من الشعب. الناس ديه هتاخد طبايعها وعادتها للمكان الجديد. يمكن مفيش حاجة تقع عليهم لكن هما ممكن يقعوا على المجتمع كله يدمروه. علاوه على ان تعاطفنا مع الناس ديه يخلينا نعيفهم عن مسئوليتهم عن طريقه الحياه اللي هما عايشينها. في المصري اليوم بتاع النهاردة واحد بيقول دانا سحبت فلوس من البنك قبل الحادثة بيوم علشان اجيب شقه. صاحبنا سحب كام؟ سحب 60 الف جنيه. واحد تاني مش عارفه كان بيدور على ابنه ولا حفيدة وطلعولوه الجثه والفلوس اللي كانت في البيت. طيب من الواضح ان الناس مكنتش متنيله قوي. ايه اللي مخليهم قاعدين هناك؟. واكيد معظم الناس ديه هربانه من الصعيد. يعني هي العيشة في الحتت ديه وبالظروف ديه اسواء من العيشه في الصعيد؟ مش لازم كانوا يقعدوا في الزراعه هناك. كان ممكن يقعدوا في الحضر. ولا هما علشان شافوا شوية ديكورات في مسلسل تليفزيوني بتصور في القاهرة افتكروا انهم لما يجيوا القاهرة هيلاقوا الفلوس في الشارع. ومحدش يقولي مفيش فرص في الصعيد. سكان الدويقه مش علماء في الذره ولا دكاتره في البحث العلمي. وحتى لو هاربانين من التار والمشاكل هناك، طب وهي المشاكل ديه مش هما بعقلياتهم السبب فيها؟

انا مبعفيش الحكومة من واجبها بس الفكرة ان الحكومة بقت اضعف من اننا نحطها في اعتبارنا او نعتمد عليها في حل ازمة

ديه وجهه نظري وانا مش عارفه ان كانت صح ولا غلط بس يهمني اني اعرف انتوا شايفين ايه
Love,
MishMish

Thursday, September 11, 2008

كلام جرايد

جبت الجرنال مليان بكلام
بيبيع اوهام آل ايه احلام
إعلان لكريم .... وكلام تعتيم
إعلان لوظيفه .... وحزمة قطيفه
وناس حريفه وناس كييفه
إعلان لسجارة .... غرق عبارة
سقوط طيارة .... وادي حرب وغارة
فساد ودعارة وحديد اسعارة تزيد
تعويرة في قورة .... لعيبة كورة
وكلام يتعاد ومفيهش جديد

حريفة نصب .... ولاد الكلب

ضحكوا علينا وراحوا مارينا

غموا عنينا وربطوا ايدينا

ومفيش تعليم ولا حد سليم

والبوم وغراب الشوم عمال بيحوم

مهو اصل امبارح زي اليوم

الظالم ظالم والمظلوم هيبات مظلوم

دا فلوسه كتير في بسين بيعوم

وفقير محروم بيقوم من النوم

على طول بيصوم

مغموم مهموم

وان قال الآه ضربوه بالشوم

مع انه بسيط والحلم عبيط

ومهوش كفيار ولا لعب قمار

لقمه بجبنه ونص خيار

وعشانهم يشقى ليل ونهار

والوضع خطير ومفيش تفسير

واحنا بننهار

طب إيه الحل؟

نخلص من الجهل

ودا شيء مش سهل

نمسك في حقوقنا

ولا حد يسوقنا

ونعيش دنيتنا

على كيفنا وشوقنا

ولا نرضى بذل ولا ايد تخنقنا

مهداه من اشرف اخو ميجوووو

Monday, September 8, 2008

صورة....صورة

صورة.....صورة2008 - مع الاعتذار للأغنية

صورة.....صورة....صورة

في شارعنا ضاربة ماسورة

صورة للشعب الغلبان...الترسو مش المقصورة

يا زمان صورنا....صورنا يا زمان

الناس ليه في حالة توهان

والاسعار بقى حالها جنان

واللي يعارض في اللومان....واللي يعارض في اللومان

ولا عمره يبان في الصورة

ميجووووووووووووو

Monday, September 1, 2008

مجرد سؤال

اكرم في تعليقه على البوست فات طرح السؤال ده


يا ترى لو عشر حرايق مش حريق واحد ولعوا ف اماكن تجمعات اعضاء الحكومه وهما فيها ده هيغير ايه ف واقعنا وواقع البلد؟؟؟؟
تحـــديـث
appy said...

مش هيغير كتير عارفه ليه علشان الشعب زى ما هو اسكتى خلينى ساكته انا خلاص من كتر اللى بشوفه مبقتش عارفه اجمع الكلام كل سنه وانتم طيبين

مش حيغير اي حاجه خالص و لا كأن اي حاجه حصلت : (
زي مفيد فوزي اللي لسه طالع مع دينا رامز و بتسأله انت سافرت و قابلت ممدوح اسماعيل و الرأي العام كان متضايق من اللي انت عملته قالها ممدوح اسماعيل طلع براءه قالتله يعني انتي ماتأثرتش بدموع اهالي الضحايا قالها انا ماتعودتش اني اتأثر برأي العوام وصدقيني و لا مليون حريقه حتعمل حاجه :(

سعر طفاية الحريق ها يولع
( أنتبهت دلوقتي لسخرية التعليق )
/: )

البلد كانت بتولع و ناس كتير عادي علي قلبها مرواح يبقي زيه الي حيتغير فعلا غير إن سعر طفاية الحريق حيولع زي ما قال علي باب الله كل سنة و أنتي طيبة رمضان كريم
تعليقاتكم على البوست ده واللي قبله بينت ان الفكر العام واحد هو لو ان الحكومة اتغيرت او اتحرقت او حتى اتغيرت الرئاسه سيبقى الامر على ما هو عليه. وديه حاجة تحزن
بس انا ميتهيأليش ان السبب في الحاله ديه هو الفساد وحدة ولكن كمان السبب هو عدم وجود نظام للإدارة
System
يعني. طبعاً لو كل واحد فيكم راجع نفسه هيلاقي كم موقف هو اتحط فيه كان سببه عدم وجود نظام او تخطيط وان الحاجة بتاخدها الحكومة بالكيلو مش بمعاير او بمقايس. افتكر لما روحت مع اخويا نرخص العربيه من مرور البساتين وعلى فكرة مبني المرور لسه جديد وفي مكان كويس وواسع الحمدلله وبعد ماوقفنا في طابور طويللللللللللللللللللللللل وبعد ما مدام حنان - اسخف واحدة واكثر واحدة ممكن تطلب منك رشوة بطريقة فجه حتى لو مكنتش هتعملك حاجة - تلففك على كل شباك شوية علشان تنفع صحابها برضه. تقولك ادفع المخلفات في مرور المعادي. ليه يا ست في مرور المعادي تقولك اصل هنا مفيش نيابه؟؟؟؟؟؟؟؟؟؟؟؟؟؟؟؟؟؟؟؟؟
يعني المبني جديد ومبني على بابه جامع كبيرررررررررررررررررررررر- معرفش ايه لازمة جامع بالكبر ده في منشأة حكومية - وفيه مكان لكل حاجة ومحدش وهو بيقسم المكاتب والاوض افتكر يعمل مكان للنيابه. او المشكله لو مكنتش مشكله اماكن تبقى مشكله الداخليه انها مخصصتش حد من النيابه لمرور البساتين كأن مبني المرور اتبنى فجأة وعملوا سابريس بارتي علشان يفتتحوه
حاجة بسيطة زي كدة ممكن تدي مخلص عام عن طريقه الادارة في البلد: مفيش تنسيق، مفيش رقابه - الرشاوي اللي دفعناها كانت اكتر من فلوس التجديد والغرامات -، مفيش اي حاجة تدل على ان العالم ديه بتستخدم طرق منطيقه لتخزين المستندات - مش هاجيب سيرة الكمبيوتر علشان محدش يقولي رحم الله امرء عرف قدر نفسه. نظرة واحدة لارضيه مكاتب السادة الموظفين وانت تلاقي ملفات بالكوم على الارض الورق خارج منها ومبعتر على بعضه وطبعاً الورقه اللي بتضيع من ملف حضرتك مش ممكن حد يدور عليها او يلاقيها فهينتهي الحال بحضرتك بطلع بدل فاقد ولازم برضه تعدي على مدام حنان - وقيس على كدة حاجات كتير تانيه. يوم واحد في وحدة مرور البساتين ممكن تديك صورة عامة عن اللي بيحصل في مصر من فساد واهمال وتدين زائف و....و...و
بس للامانه رئيس الوحدة او اللواء - انا مبعرفش قوي في الرتب بتاعه البوليس - كان رجل ذوق ومتعاون جداً. لما دخله اخويا يطلب منه ورقه بإمضاءه انه هو اللي يعمل كل إجراءات الترخيص لاني تعبانه ومش هاقدر اقف في الطابورعمله ورقة بكدة بمنتهى السهولة. وديه كانت الحسنه الوحيدة في مرور البساتين - وطبعاً حتى الورقة ديه معجبتش مدام حنان غير لما شافت بطني ومكنتش مقتنعه برضه اني حامل في السابع فراح اخويا اداها اللي فيه النصيب وانا وريتها صورة السونار
مش عارفه ايه اللي المفروض يتعمل بس ما ينفعش يبقى الحال على ما هو عليه ابداً
Love,
MisMish

Thursday, August 28, 2008

الله!....هو الحب بالعافيه يا عم

السيد المسئول قال :الشعب المصري بطبعه طيب - يقصد سلبي - ويتحلى بالايمان - يقصد ان الناس ادروشت بعد مافقدت اي امل في تغيير الواقع - خاصة وقت الازمات تجده لا يفرق بين الظالم والمظلوم - ما هو من الحشيش يا سعاد - ولم تقل صدمته في حريق مجلسه النيابي - يا ترى ضمير الغايب في كلمة "مجلسه" عايد على مين؟؟؟؟؟؟؟ -عن صدمتنا جميعاً ولكن هناك بعض الفضائيات تروج لعكس ذلك - رجعنا تاني لنظرية المؤامرة واننا محسودين على الآمله اللي احنا فيها والمحروسة معمول لها عمل على ارموط اهبل ومرمي في النيل - وما اسهل إجراء محادثات تليفونيه مخططه - او مقلمه لسه نتائج التحقيق ما ظهرتش - في برامج فضائية تبحث عن الاثارة دون النظر للمضمون - هيهيهيهيهيهيهيهيهيهيه ايش ياخد الريح من البلاط يا راجل

بس انا عايزة اقول للسيد المسئول انا عن نفسي ومعايا عدد لا بأس بيه من المعلقين في المواقع الاخبارية والمدونين واعضاء المجموعات عالفيس بوك ومعظم فئات الشعب شمتنا في الحكومة. اه والنعمة شمتنا ورحمة ابويا شمتنا في الحكومة وفي المجلس لا وغير كدة كمان بقيت ماسكة الريموت زي الهابله ادورعلى بيان الثورة بين المحطات. اصلي افتكرت ان في ثورة قامت لكن للاسف الثورة لسه نايمة ومش عايزة ازعاج

وكانت تعليقات الناس مابتخرجش عن واحد من تلاته: ياما ناس كانت شايفه ان ده انتقام ربنا لضحايا العبارة والمركز الثقافي وغرق الشباب في عرض البحر و...و...وكل الحاجات اللي انت عارفها ومطنش

ياما كانت ناس شايفه ان قليل البخت يلاقي العضم في الكرشه. يعني حتى يوم مالحريقه حصلت كانوا- اللهم احفظنا - الاسياد اللي ساكنين المبني في اجازة وبكدة نبقى لسه محتاجين حريق تاني

واخر مجموعه كانت مضايقه من الحريق علشان قيمة المجلس - المبني يعني - التاريخيه والجماليه وبس كدة

وبرضه سيادة المسئول ٌمصر ان الشعب دايب في داباديب الحكومة موت وبيحبها زي ما بيحب بنت خالته واللي عاجبه عاجبه واللي مش عاجبه يشد في حواجبه

Love,

MishMish

Wednesday, August 20, 2008

شعب اولمبيكي

مش عارف إزاي ماجبناش ميدليات اوليمبية في اولمبيات بكين؟


حاجة تحير...... بصراحة منظرنا كان فضحيه.... اللاعب من دول تلاقيه شحط طويل عريض وينزل الماتش من هنا ...... ياخد حته علقه ويخسر الماتش باقل مجهود من اللاعب المنافس لدرجه ان مستشفى أم المصريين واحمد ماهر شغالين على ضحايا الاولمبياد من اللاعيبه المصريين


دا حتى كرم جابر....قلنا هيجيب دهب اتغلب في اقل من دقيقتين وخد الطريحه التمام من لاعب غلبان من البانيا


وده بيفكرني بموقف تاريخي ساعه لما المصريين كافحوا وحاربوا وخرجوا الانجليز و الفرنسيين والمماليك من مصر قام الحاج عمر مكرم وصحابه راحوا لعسكري الباني اسمه محمد على وقالوله ورحمه ابوك يا شيخ لا تحكمنا


من سنه 84 واحنا عايشين على ذكرى فضيه محمد رشوان في الجودو والاسطوانه المشروخه بتاعه انه ملعبش عالاصابة بتاعه اللاعب الياباني .... بالظبط زي حكايه خط بارليف الذي لايقهر واسطورة الجيش الاسرائيلي وانا على الربابه بغني


اصلنا شعب غاوي يقف عند كل خطوة ويقعد يطبلها ويرقصلها لغايه اما يتعب وينام جنبها . احنا شعب .....مصر هبه النيل ...... وهبه بنت الجيران وحضارة السبع تلاف سنه..... وفي كل مناسبه لازم يبقى الشعار والتميمه الاهرامات وابو الهول وتوت عنخ امون واللاعب اللي ربنا ينفخ في صورته يبقى الفرعون الصغير....ابن النيل....إلخ


احنا شعب عايش على قفا الفراعنه وهما اللي بيصرفوا علينا وعاملين لنا سمعه لا عندنا تخطيط ولا فكر منظم وكل حاجة ماشيه بالفهلوة والشعارات والدجل والشعوذه. كل شوية يحضرولنا روح...ايشي روح اكتوبر .....وروح الفانله الحمرا.... وروح كاس العالم سنه 90 ..وروح طنط..... وروح يا شيخ... لحد ما طلعت روحنا


بالذمة واحد زي مايكل فيلبس جاب شأله مدليات دهب تحس انه شاريها من الموسكي مش واخدها لوحدة في مسابقه من المسابقات الاولمبية معرفناش نجيب ربعهم بكل الجيش اللي احنا بعتينه. ومع كدة ماطلعش عالتلفزيون يقول انا بهدي الميداليات لراعي الرياضه الامريكية (سيادة الرئيس جورج بوش) و لا قال انا كنت بلعب بروح حرب الاستقلال ولا الصحف قالت عليه ابن المسيسبي

وبما انها وعلى رأى مغني الجيل - اللي معرفش اسمه - الدنيا خربانه يا عم خربانه. انا عندي خطه جهنميه يمكن تحل المصيبة اللي احنا فيها ونلحق اي حاجة قبل الاولمبياد ما تخلص
اول حاجة نبعت نجيب العيال اللي عرتنا دول من الصين ونبعت بعثه تانيه يكون التشكيل فيها كدة


مثلاً في سباق الجري: احنا مش عايزين لاعيبة فرافير بيدربوا في النوادي احنا عندنا اجدع عدائيين في العالم في الجري ورا لقمه العيش وورا الاتوبيسات. الناس ديه تتلم وتطلع على بكين


السباحة الايقاعيه: واعضاء الفريق ده ساهل انك تلاقيهم في الاحياء الراقيه زي ما تلاقيهم موجودين بنفس الكثافه في العشوائيات من التطنيط على الطوب وعجل العربيات القديم علشان يعرفوا يخرجوا من بيوتهم ويرحوا على مصالحهم لما المجاري عادة تكون ضاربة


الغطس: اهو ده ملهوش حق انهم ما يلاقوش حد يمثلنا فيه. يا ناس داحنا عندنا في كل شارع بلاعه او اتنين من غير غطا وبمزاجك او غصب عنك هيجيلك يوم تاخدلك غطس في واحدة منهم. بلاش دول ناخد من بتوع العبارة اللي قعدوا في المية 18 ساعه لغايه لما جم بتوع الانفاذ لا تقولي مكنش فيه سترات نجاه ولاسمك قرش ولا ميه ساقعه. الكلام ده مايكلش معانا


سباق السيارات: ننزل نلم العيال بتوع الميكروباصات اللي بيمشوا من غير نمر ولا رخص ولا اشارات وعكس الاتجاه ونعملهم تصفيات في موقف عبود ونطلع بيهم على الاولمبيكيات ويبقى يقابلني شوماخر لو عرف يعدي من واحد فيهم او يكسر عليه. ده يبقى نهار اللي جابوه مش فايت


رمي الجله والقرص : انزل في اي حته في مصر فيها حته ارض فاضيه بتاع 2 متر * 2 مترتلاقي الحي كله عملها هدف وكله بينشن بكياس الزباله وناس بتنشن من البلكونات وناس تانيه من العربيات يعني كمان يبكون اللاعب متحرك وديه مش اي حد يعملها على فكره


المصارعه: ابطالها بنشوفهم كل يوم واقفين من الساعه 5 الفجر في طوابير العيش ودول معندهومش تفاهم. ننقى اتنين تلاته من كل طابور ونعملهم تصفيات واللي يكسب ياخد بجنيه عيش ويطلع عالاولمبيكيات عدل


التايكندو والكاراتيه: نجيب فرق الكارتيه اللي بطلعهم الحكومة من العلب في المظاهرات ونقولهم على المنافسين ان العيال دول من حركة كفايه. عليا النعمه دول يكسروا عضم اللعيبة على المتفرجين كمان

رفع الاثقال: يعني اي موظف حكومة بياخد مرتب 200 جنيه في الشهر يجبهم بصباع رجله الصغير. احكموا انتوا واحد شايل حمل مصاريف المدارس والدروس وفواتير الغاز والكهربا والميه والايجار و....و....و.....هايعجز يعني عن شيل
150 كيلو
الجمباز : احنا نلم كل الناس اللى بتزوغ فى المترو وبتنط من فوق ماكينات التذاكر وبدل مانعملهم غرامات ..ناخدهم ندربهم على الجمباز لانهم مشروع ابطال اوليمبيين
بعد مانجمع الابطال الاوليمبيكيين دول نطلع بيهم على مصنع اوليبمبيك اليكتريك ونخللي اللمبي رئيس البعثه

وانا متأكد انه بفريق زي ده هنحتكر الاولمبيكيات زي احتكار عز للحديد ومحدش هيعرف يتحصل على مفتاح حتى مش ميداليه

مش بقولكم شعب اولمبيكي


ميجوووووووووووووووو

Thursday, August 14, 2008

جاف حار صيفا ..دفيئ ممطر شتاء !!!!!

بدات اشم ريحه الجوافه ..يعنى خلاص المدرسه قربت ..وبحكم انى مدرس لغه المانيه ..شعرت بانقباض لانى راجع للغم والهم والنكد من تانى ..بعد انتخه فى البيت ونوم وراحه نفسيه ..هرجع للكشاكيل ودفاتر الدرجات والتحضير واستدعاء ولى الامر واعمال السنه وحاجات كتييييير مقرفه ومزعجه لاى بنى ادم طبيعى ..
بدات اعيد ترتيب اوراقى من جديد واطلع الكتب عشان اظبط التحضير واعمل لوحات للسنه الدراسيه الجديده ..اكتر شيئ مضايقنى هو انى حاسس انى مش بفيد العيال فى المدرسه ..مش عشان انا ماعنديش ضمير ..لأ عشان حاسس انى بنفخ فى قربه مقطوعه ..العيال مش همهم انهم يتعلمو لغه كل همهم انهم ياخدو كلمتين يرصوهم فى الامتحان وخلاص على كدا ..بصراحه مصر رايحه فى داهيه ونازله فى القاع بسرعه الصاروخ ..لان العيال دول هما مستقبل مصر ..امسك اى حد منهم واساله عن اى حاجه فى اى حاجه تلاقيه تنح قصادك وبرق عينيه وبصلك باشمئزاز ..بلاش تساله فى اى ثقافه عامه اسأله فى الكورة ..تلاقيه برضه بلاص مش ..العيال اليومين دول كل همهم انهم يضربو شعرهم سبايكى ويسمعو تامر حسنى ومحمد حماقى ويقعدو عالنت ياريت بيقرو حاجه مفيده او يعملو حاجه تنفعهم ..لا تلاقيهم قاعدين عالنت بيعملو شات وبينزلو جيمز واغانى وافلام ..الى يشوفهم قاعدين على النت يقول بيحضرو الذرة وطبعا الاهالى مغفله سايبينهم عالنت فاكرينهم بيتعلمو كمبيوتر ..وكل عيل من دول تلاقيه ماسك موبايل احدث موديل وماليه افلام جنسيه وكليبات لنانسي عجرم وهيفا ..
... صدقونى ..عندنا العيال الصغيرة فى ابتدائى حاطين افلام جنسيه على الموبايل وبيبدلوها مع بعض مش حاجه تحزن ؟
الحاجه الاهم بقى هى انى بعلم العيال النفاق ..اى والله النفاق بحس انى كداب اوى ومفقوس قصاد العيال ..يعنى الصبح اول مانروح المدرسه لازم يبقى فيه طابور ..ليه طابور؟ هو احنا هانحارب ؟ وليه كله لابس يونيفورم واحد؟ دى حاجه قديمه من ايام الاشتراكيه والملوخيه ..فين شخصيه العيل ؟ انه ازاى يختار حتى لبسه ونوجهه نقوله ان دا لبس غير لائق ودا لبس لائق يبقى استفاد حاجه وبقى عنده شخصيه ..نيجى بقى للكارثه الى اسمها الاذاعه المدرسيه الى اصلا ماحدش بيسمعها ..كلمتين فارغين، بس لازم يتقالو حسب تعليمات الوزارة وخلاص ومش مهم المضمون المهم يبقى فيه اذاعه .. فقرات تقليديه عفا عليها الزمن .من نوعيه لاتؤجل عمل اليوم الى الغد ..ومن حفر حفرة لاخيه ..وكلام اهبل العيال مش سامعاه اصلا ..ولما تيجى تحيه العلم تلاقى كله مشدود.. مع ان الطالب عارف ان المدرس بتاعه بيشتم فى سره ويلعن فى سنسفيل البلد ..لان قميصه مقطع ومش عارف يجيب قميص جديد ..او لسه مافطرش ..هو دا الانتماء؟ انا مرة كنت براقب فى امتحان عربى والعيال عندهم املاء ...الموضوع كان عن مصر.. جمال مصر وحلاوة مصر وانها هبه النيل وجوها الخلاب وترابها الزعفرانى ..تحس ان القطعه بتتكلم على هاواى مثلا او سويسرا .مع ان العيل قاعد على دسك مكسر والفصل معفن ..والعيال نفسهم عندهم انيميا حاده لا نافع معاها بسكوت خشبسكو مصر بتاع الوزارة ولا اى حاجه ..احنا بنعلم العيال اكلاشيهات محفوظه فارغه بلا معنى ولو كتب غيرها فى الامتحان ..يبقى غلط ،يعنى لازم يقول ان فصل الربيع فيه تتفتح الزهور وانه اجمل فصول السنه طقسا حتى لو شاف من حواليه ان فصل الربيع فصل التقلبات الجويه وعدم استقرار الطقس وكله تراب بسبب رياح الخماسين ..المهم ان التلميذ لازم يكتب دا فى الامتحان ولو كتب غير كدا يبقى سااااااقط ..يعنى لازم يبقى كداب ومنافق عشان ينجح
انا بصراحه محبط جداا ..ودا السبب الى خلانى فترة طويله ماكتبش اى بوست جديد ..حاسس ان الكلام ماعدش له فايده وحاسس ان البلد بقت حاله ميئوس منها ولا امل فى اصلاحها .طالما ان الجو فيها استمر..(جاف حار صيفا .. دفيئ ممطر شتاءا !!!!
ميجووووووووووووو

Monday, August 11, 2008

في عيد خطوبتنا الاولاني

هديه ميجو ليا في عيد خطوبتنا


زي النهاردة

من سنه

مكنتش عارف

مين انا

ولا انا

في الدنيا ايه

قابلتك في الطريق

من غير معاد

بعد مالفيت بلاد

قابلت قلبك البرئ

خطفني من غير مأسأله

انت مين؟

واخدني فين؟

قلتي إمشي من سكات

أرمي الماضي اللي فات

دانا ..... جايه اخدك للهنا

4/8/2008

ميجو حبيبك



I Love Migo,

MishMish

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق