Wednesday, October 22, 2008

Serial Number


الراجل ده هيجنيني .... هيجنيني
الحكايه ومافيها اننا خلاص بنحضر لمجي اول انتاج مشترك ليا انا وميجو. خلاص بإذن ربنا الامورة الصغيرة فاضلها اسابيع قليله وتوصل كوكب الارض بالسلامة. ومن اول يوم في الحمل لغايه النهاردة مش عارفين نتفق على اسم يعجبنا إحنا الاتنين. وحتى لو لاقينا لما نيجي نقوله للناس ما يعجبهمش
المشكله تتلخص في اني بحب الاسماء الاجنبيه بحكم ثقافتي وبانها مش كتيره. انا بحب كل ما يخصني يبقى مختلف ومفيش زيه. يعني اسم بنتي لازم يبقى جديد ومعناه حلو ومش منتشر وسهل. قوم كل ما اقترح على ميجو اسم يطلعلي فيه القطط الفاطسه خدوا عندكم
الكسندرا: يعني معينه ومدافعه قالي: محدش هيقولها الكسندرا كله هايقولها ساندرا فنوفر حروف ونسميها ساندرا وخلاص وطبعاً ده معجبنيش
كريستي: وده اسم مسيحي معناه حاملة المسيح قالي: ده معجون سنان
سيندي: يعني قمر قالي: مانسميها قمر ونريح كل شوية حد هيسألنا يعني ايه الاسم ده هنقوله قمر هيقولنا طب ماكنتوا سموتها قمر
نادين: يعني امل قالي:نادين ميجو على اللي جابه
بترا: يعني صخرة قالي: ديه ماركة عربية لو هيدفعولنا فلوس نسميها بترا لو مادفعوش نسميها هوندا علشان نحرق دمهم
بريانا: يعني قوية قالي: لا انا بنتي مش برياله
سيرينا: يعني هدوء وسكينه قالي: سيرينا اهرون بتاعه رافت الهجان. ثم ليه الكذب البت هتطلع هاديه لمين ليكي ولا ليا
ان: قالي:ان الان موعد أذان العصر
الاسماء اللي ميجو بيحبها بقه لازم تبقى عربيه لانه بيحب اللغه العربية. مايكونش فيها نقط كتير علشان اللخبطة في الاوراق الرسمية لان معظم موظفين الحكومة تعليمهم على قدهم. يكون من النوع المألوف. ويبقى سهل الكتابه. والاسامي اللي اقترحها كانت
رقيه: قولته يا راجل دانت ستك ام ابوك اسمها جوليا هتسمي انت رقيه
عزة: علشان اغنيه حماده هلال وعايز الناس تناديه في الشارع ويقولوله منور يا ابو عزة
ست من ندلها: كنت هاطق من الغيظ مردتش عليه
بهيه: علشان بيحب محمد منير
الاسامي بقه اللي اتفقنا عليها ومعجبتش الناس
رينيه: يعني متجددة قالوا قديم مع اني عمري ما سمعته قبل كدة
سابرينا: ماما قالت لا ديه قصه فستان
كرمة: يعني شجرة العنب ماما قالت اول حفيدة ليا مش هيبقى اسمها عنبه واصلاً احنا لا هانسمي فواكهه ولا خضروات
فيرينا: اسم قديسه صحابنا اللي مش مسيحيين قالوا هتسموا البت على اسم عربية خالها
بس فاحنا بقالنا بتاع 9 شهور بنعمل دراسات جدوي وترشيحات وفشلنا اننا نلاقي اسم. فلو في حد يقدر يساعدنا في الموضوع ده يتفضل. تعاطفكم لوحده مش كفايه. مش معقوله اولد ومش عارفه اسمي البت ايه يرضيدكم اديها
Serial Number
love,
MishMish

23 comments:

صبرني يارب said...

طب يا مشمش ما تسميها ست ابوها ؟؟؟؟

طب ست الدار ؟؟؟

طب والله الاسامي بتاعة جوزك حلوه

بصراحه الاسامي بتاعتك اغلبها صعب اوي

وبعدينما تاخدوش راي الناس
ما حدش هايعجبه حااااااااجه

انا فى لما كنت حامل فى مريم بنتى قبل ما اولد بشويه قعدنا ننقي لما تعبنا
بعدين بقى لما انا ولدت راح جوزي تاني يوم قيدها وجه قالي خلاص مريم
كله سكت بقى ورضوا بالامر الواقع

على عكس فى رحمه قلنا ناخد راي الناس بقى عشان كنا محتارين
وحياتك يا اختي قعدنا اسبوع ونغير ونبدل لما فى الاخر برضه جوزي حسم الموقف

والف مبروك وخلي بالك من نفسك وربنا يقومك بالسلامه

Empress appy said...

هههههههههههه
اولا تقومى بالف سلامه يا رب يا حبيبتى
بس انا عجبنى سابرينا
وفيه جانا
وفيه دونا
وفيه شاهيزار
ومليكا
بصى اصلى غاويه الجنان ده ههههههههههه

شوفى انتم استنوا واساليها ههههههههههههههه

Migo Mishmish said...

صبرها يا رب ..... واحنا كمان
شكراً على ذوقك يا قمر
اسامي ميجو دارجه انا عايزة اسم كدة يعمل
statement
حاجة كدة زي ما تبصليش بعين رضيه بص للي اندفع فيا. اي حد ممكن يسمي ست ابوها ولا ست الدار ولا ست ستات حتى. انما انا عايزة حاجة جديدة مطرقعه.لا معلش يا ام مريم دانا لولا اني خايفه ان الموضوع ده يعمل حزازات بينا كنت شيلت تعليقك من غير ما ميجو يقراه لحسن يقولي اهو في مؤدين لكلامي ويعيش بقه في دور رئيس المجلس ويقولك مواقفه والاقي بنتي اسمها ست من ندهلها
فكري معايا كدة في حاجة غريبة. عارفه وشوش الناس اللي بتطلع في اعلانات روتانااللي مش قادرين يغمضوا عينهم دول. اهو انا عايزة اسم بنتي يخلي اللي يسمعه يتنح كدة.
Love,
MishMish

Migo Mishmish said...

يا ست ابي
ابوس عتبه مدونتك بطلي تعملي نيو لوك كل ما تفتحي الكمبيوتر. اديني مش عارفه اخش عندك تاني. اعملي لوك ينفع كدة للكمبيوترات بتاعه محدودي الدخل. يعني شوية نجيله كدة وخروفين ومعزه وماتكتريش قوي علشان العيد جاي والناس جعانه لحد يهاك عليكي وياخد شوية الخرفان اللي عندك
اما بالنوسبة للاسامي فهي حلوة قوي. ربنا يكرمك ياختي ومايوقعك في زنقتي ابداً
وبعدين ياختي الناس عمرها ما هتقرا جانا صح وميجو هيقعد يقولك جانا الهنا جانا ولا يقولك الناس هتقعد تقول جانا ميجو يا ساتر يا رب
وشاهيزار ده مش اسم يا ابي ديه حادثه عربية
ومليكا عامل زي اسم الفيلم بس المرة ديه هيبقى اسمه فاطمة ومليكا وراشيل
بس برضه تشكري
Love,
MishMish

فلة said...

بصي يا مشمش
ارجوكي
لا تسمي سالي ولا سارة ولا مريم
اصل دول هم تقريبا الاسماء المتعارف عليها للطفلات المصريات اللي انا عارفاهم والناس بتكررهم
وان جيتي للحق
جانا مش نافع
ولو جت انك تسميها حاجة بحرف الجيم سميها جومانة
واذا كنتي عاوزة اسم اجنبي
سيلين حلو قوي
celine dion
او رين
reine
طبعا يعني ملكة بالفرنساوي
وتقومي بالسلامة يارب
وعقبالي

Anonymous said...

مبروك مقدما :)
ايه رايكم فى أيمي او لندا؟

Empress appy said...

هههههههه اقري من على الريدر بقى وخلاص وابعت الكومنت على الميل بتاعي وانا انزله بس خلاص هههههههههههه
لان بجد ده خفيف خالص انتي يا بنتى الكمبيوتر عندك ماركه ادي لزوزو زقه ولا ايه ههههههههه

Anonymous said...

How about:
- Laurice,
-Aline (noble) or Alicia or Aimée
Or, how about an Egyptian name like:
-'meryt' (which means beloved)

there are several sites like:

http://www.20000-names.com/female_l_names.htm
-http://www.notrefamille.com/v2/services-prenom/origine-prenom.asp
-http://pregnancychildbirth.suite101.com/article.cfm
/unusual_baby_names_for_girls

-http://babynamesworld.parentsconnect.com/girls-names.html

Best wishes to you & yours

Anonymous said...

عزيزتى مشمش:ارجوكى اولدى الاول وبعدين الاسامى كتير انا حاسس انى انا اللى قربت اولد من عمايلك انتى وميجو

نيران said...

صباحك عسل يا ام.. سابرينا حلو
حلو اوي

و ايمي كمان حلو
وجوليا حلو

اقولكو.. انتو اعملوا استفتاء هنا و احنا نختار

بس صدقيني سابرينا حلو اوي

و بعدين تعالي هنا يا ناصحة
الولد ابوه يسميه
و البنت الأم تسميها
يعني قولي لجوزك معلش حاول مرة اخرى
انتي اللي اختاري
و بعدين انتي اللي هاتناديها طول الوقت في البيت

تعالي يا سابرينا روحي يا سابرينا
مهو اصلك مخلفاها عشان تمشوريها
وبعدين انتي اللي هاتطلعي من البلكونة تناديها بعلو صوتك تطلع و تبطل لعب في الشارع
و انتي اللي جاراتك هاينادوكي من تحت

يا ام ساااابرييييينا يا ام سااابرينا مش عايزة حاجة من السوق ياختي
تقوليلها لا يا ام عادل ربنا يخليكي ابو سابرينا ما قبضش الشهر دا و البت صارفين عليها بتلتمية جنيه بامبرز و كدا يعني

:)

يا رب تشوفيها احلى و ابهى بنت في الدنيا
تحياتي

Migo Mishmish said...

اهلاً يا فله نورتي البلكونة
ايوه كدة انا بحب المشاركات الفعاله الاسامي اللي اقترحتيها حلوة. على الله تعجب سي ميجو. انا مش عارفه ده هيبقى اب ازاي ده بتريأ على بنته قبل ما يشوفها. وعقبالك يا ستي ويا رب ما تتزنقي زنقتي

المصري باشا
ايمي من الاسماء المرشحه بقوة بس انا خايفه من الناس اللي بتنفسن عمال على بطال على خلق الله. يعني تخيل انت بنت بريئه رايحه مصلحه حكومية بيسألوها عن اسمها تقولوهم ايمي يرد عليها الموظف ويقولها مش وقت دلع مرء اكتب يا ابني ايمان ميجو. ليندا مش عارفه قوي بس حاسه انه مش

ابي هانم
ايوة يا ستي الكمبيوتر بتاعتي ماركة اللي يحب النبي يزوق وفي التأني السلامة والصفحة اللي متفتحش النهاردة تفتح بكرة. وبعدين مجمع المدونين هما السبب في اللي انا فيه. علشان قبل ما اتجوز نشرت استغاثه على كل مدونه انا بخشها وقولت للناس الحقوني هو اللاب توب عالعريس ولا العروسة. محدش إداني عقاد نافع وكان في ناس قالت ده تجيبوه انتوا الاتنين. وانا كان نفسي حد يقول انه عالعريس. ما هو طالما اني مش هادفع تمنه يبقى كان ضروري ميجو يجيبه انما لما لاقيت نفسي هادفع فيه قولت لميجو مش هانجيب لاب توب دلوقتي احنا عندنا اولويات وقفلت الموضوع ده خالص.
Love,
MishMish

Migo Mishmish said...

السيد انونيمس
مش بس حضرتك تقول مين معنا علشان نقوم بالواجب. نجيب شاي، قهوة، نسكافيه، سحلب، شيشه تفاح
بص يا سيدي / يا ستي انا حابه اسم إلينا قوي ده اسم يوناني معناه نور والاسامي اللي انت / إنتي باعتها جميله قوي واللينكات كمان
اتمني إننا نشوفك تاني

عمو عصام
بس يا عمو انا مبحبش السربعه. وبعدين حكيم الغبرة مرة قالي: ظبط الشغل اهم من الشغل نفسه. مش اقعد حامل تسع شهور وبنت ميجو راكبه على مراوحي وزانقه كل اجهزتي الحيوية وبوزت جسمي وبقيت عاملة انبوبة البوتجاز وتقولي الاسامي كتير وبعدين علشان اخد فرصه اني اسمي تاني هيبقى على البيبي التاني ان شالله. وانا مش ناوية اعمل كدة تاني قريب. وبعدين بعد الولادة مش فاضيه. انا هادي البنت لميجو والم هدومي واروح على اسكندرية ولا راس سدر اقعد هناك اسبوع لوحدي احاول انسى فيه اللي حصلي واكل كل الاكل اللي بحبه ويمكن اتعلم شرب السجاير كمان مش عارفه لسه معنديش خطة
Love,
MishMish

Migo Mishmish said...

ربنا يخليلكي يا نيران ياختي
عندك حق فعلاً انا هالم كل الاسامي واعمل عليها استفتاء واللي هاتقولوه هو اللي هايمشي. بس مع اني بحب اسم سابرينا لكن ماما مش موافقه عليه وانا مش ممكن ازعل ست الحبايب. اصلي بيني وبينك عايزة ادبسها في فلوس السبوع. بس هي لغايه دلوقتي مش موافقه فانا بحاول اقدم السبت علشان اطلع منها ببقيه الاسبوع
بس وغلاوتك لو ما شالتش السبوع لاسميها سابرينا بالعند فيها. ما هي تحكم لو ليها في البت اسهم ودافعه فلوس. وبعدين مش معنى انها اشترتلها هدوم وعملتها بدل وفساتين كروشية وبتنزل تمشيني كل يوم مع انها تعبانه ومش بتقدر تمشي وجابتلها الحلق الدهب انها تتحكم فيا وفي بنتي. وبعدين امبارح حتى كنا ماشين سوا فاشترينا لبن فدفعت هي تمن اللبن بتاعي. وحلفت ميت يمين اني مادفع حاجة قوتلها لا انا هادفع تمن اللبن وانتي اعملي السبوع. قالتلي لا هاتي تمن اللبن. وخدته مني في الشارع شوقتي يا نيرو. حد بيعامل بنته الكبيرة كدة؟ ولا وحدة ست اول مرة في حياتها تبقى تيته تستخسر في حفديتها الف ولا الفين جنيه علشان نجيب سبوع ونفرح بيه العيال
Love,
MishMish

Desert cat said...

هو انا مش قريت الكومنتات
سميها لوجى على اسم قطتى
:)

synesthesia said...

MishMish,
'Anonymous' is a she! Sorry I didn't leave my name before.
How about composite names? A ploy I used was to give my children multiple first names, with my husband being non Egyptian, we resorted to an old tradition in his country & gave each of our children more than one first name. Both families were happy & so are the children. They use their favorite name with their friends; according to their age preference..etc. I know this is difficult in Egypt, so I advise maybe double name like Anne-Marie for example, or Sabrina-...., so you can call her Sabrina & your mom can call her by her preferred name. Don't worry about your daughter's adapting to that, children are more flexible, & have a keener sense of humor than adults.
Long comment, sorry. I dont have arabic keyboard, excuse the english.
PS. I like your blog very much...& mint tea..yum!

Anonymous said...

انتم عسل و الله
فعلا مسأله اختيار الأسم صعبه اوي و انكم تتفقوا علي اسم و الناس يعجبهم مسأله صعبه برضه

بصوا فيه أسامي انا بحبها و عاجباني واحده زميلتنا سمت بنتها اللي لسه والداها فريده مع العلم ان زميلتي اسمها هبه

فيه واحد برضه نفسه كان يسمي تمارا و كرمه
حتقولولي بلاش تمارا معجون حلاقه ماشي و انا كمان مش مياله لأسم تمارا

فيه جينفر اسم سنيمائي برضه حطوه في بالكم

اسم برضه بيعجبني مارتا

يالا بقه اتجدعني يامشمش و قوميلنا بسلامه و انشاء الله بنوته حلوه زيكم

Anonymous said...

posy ya banty neran sadeka 3andaha 7a2 anty ely tol enahar hatnady bantek eyom ma migo ynadeha haykalif 7'atro wy2olaha anty ya bat ta3ali hana wady wesh edaf as2aliny ana 3an migo ana 2adra wa7da beh ana moaf2a moot 3ala elina wkaman emey wba3dan bma 2any lia ashom felmawdo3 whageblaha el3arabia yb2a lia ra2y mo2asr felkalam dah ya2ama mesh ha7'aly loky tel3ab ma3aha w2olaha ya loky de bent be2a fa2a7sanlik tesma3y kalamy y2ama elina ya 2ama emey bye....sorika

فلة said...

مشمش
النهاردة جايبالك اسم جديد
سابين
وبالنسبة للأبوة المنتظرة لسي ميجو
اطمني
ه يعقل اول ما يشوف حد اصغر منو فالبيت
سلام

^ H@fSS@^ said...

لوووووووووووووووووووووووووووووووووووووووووووووووووووووووووووووووووووووووووووووول
انا ضحكت من هنا للصبح على ست من ندلها دي

بصي
انا مع اسم سيرينا
و يمكن عشان انتوا الاتنين مجانين فيمكن هي تطلع هادية شوية و مغايرة ليكوا
يمكن ليه لا
انا عن نفسي منقية الاسم من دلوقتي
و برضو حاجة معناها هادي عشان يمكن تطلع هادية او اتمنى هذا
اضصلي انا كمان مجنونة و شعنونة زيكوا
هههههههههههههههه

بصي
ممكن تسموها كمان ديبورا
او فيرجينا جميلة الجميلات
ممكن تسموها حفصة
اه والله
بس لا انصح باستعماله
ههههههههههه
مممممممممكن فيه اساماء زي
ثريا
نهلة
ليلى

انا عن نفسي فيه كمان اسم بحبه اللي هو ليديا
اعتقد انها كانت بائعة زهور او حاجة وردت في التوراة
مش فاكرة
ممممممم
لو جت في بالي اسماء تانية حقلكوا عليها
كله الا اسم اللي نويته لبنتي
ههههههههههههههه

Migo Mishmish said...

قطوطة حبيبتي ازيك
شكراً على حسن تعاونك معانا بس........لا يا قطة
ايه الاسم ده وبعدين ده اسم تسمي قطتك بيه. ما كان عندي قطط مكنتش بعمل فيها كدة. كانت عندي مشمش واحد واتنين وتلاته وكان عندي نوشه وسمبا وجعلص ده حتى الكلب اسمه تاتو. انما لوجي ده لا ابداً. فاكرة البت اللي كان اسمها لوجي في مسلسل يسري بتاع اين قلبي باين ولا اللي لاقى قلبي يتصل على 0900 مش فاكرة يعني
البت دمها كان يلطش ياما
وبعدين الاسم ده عامل زي ما يكون برطمان مربى. اقعد حامل 9 شهور علشان اخلف بنت اسمها على اسم برطمان مربى
بس يا قطة ما تقتريحش حاجة تاني

senysethia is a she yeah!!!!!!!!
i think doing a poll on the name is a good idea.
i'm happy that u liked our tea i hope u keep comming
& don't worry about ur key board write in any language u like
love,
MishMish

Migo Mishmish said...

قشطة يا اجندا
اهي ديه الاسامي مش الاخت اللي عايزاني اسمي بنتي لوجي. اسم فريدة حلو قوي وعارفه كمان الاسم اللي بحبه قوي عزيزة مع انه قديم لكن بموت فيه. مارتا حلو كمان اما نشوف الحجة هتقول عليه ايه. انا برضه عندي امل انها تعمل السبوع

الاخت سوريكا
هاتي العربية الاول وبعدين اقترحي. الموضوع مش ببلاش.وبعدين من يوم ما حملت وانتي عماله تسيحي هاجيب العربية هاجيب العربية ومشفناش حاجة. اللي يسمع السياح اللي انتي عماله ده يفتكر انك هتجيبلها عربية ميتسوبيشي ولا دايو لانوس. وبعدين انا مش عايزة منك حاجة. حطي الفلوس في ظرف يا بت وهاتيها بدل قله القيمة ديه. انا لسه متفقه مع سارة الصغيرة اني بنتي لو طلعت وحشه هاجوزها ابنها قولتلها تجهز الشبكة من دلوقتي علشان تلحق تحجز. انما لو طلعت حلوة هاشوف لبنتي جوازة احسن من كدة.
Love,
MishMish

Migo Mishmish said...

والله يا فله مش عارفه ميجو هايعقل ولا البيت هيبقى عامل زي الحضانه
احنا بنقول عليها رينا - لغايه لما نلاقي اسم نستقر عليه -
المهم امبارح كان قاعد يغنلها رينا رينا يا رينا يا جزمة بنص في فاترينه
وساعات تانيه يقعد جنبي يعزفلها بالناي بتاعه اغنيه حسن زعبوله
عايزة اقولك اني ماببقاش طايقهم هما الاتين. هو من برة وهي من جوه. ببقى عايزة ارقع بالصوت بس بقول يا بت يمكن حد فيهم يعقل لما يكبر

اهلاً حفصه
اديكي خدتي افكار من عندنا اهو لما ربنا يدكي ابقى فكري في ست من ندلها. انا مش عايزة فاستعمليه براحتك سمي ولادك كلهم ست من ندهلها.
حتى لو البت طلعت كويسة برضه هايجلها لطف من القعده معانا. يا بنتي احنا ممكن نسيب اللي ورانا واللي قدمنا علشان نعمل في بعض مقالب. فاكرة برنامج عفاريت حسين اللي كان بيجي في رمضان ويحكي عن الجن والعفاريت. ميجو لما لاقى اني ساعات بخاف من الحكايات ديه. بقه كل يوم الساعه واحدة ونص يناديني ويقولي تعالي نتفرج على البرنامج سوا. ويطفي نور الشقه كله. وفي نص البرنامج ملاقيهوش جنبي الاقيه طالعلي في الضلمه يمثل الكلام اللي بيقوله
عارفه عملت فيه ايه؟ خدت هدمة كلها اللي بره واللي جوه استنتهوم لما اتوسخوا كلهم. حطيت شويه في الغساله وسبتهم مبلولين والباقي سبته في سبت الغسيل وحتى الشربات نشرتله فرد. حبسته في البيت علشان يبقى بيخوفني.
الاسامي اللي انتي باعتها حلوة قوي بس مش عارفه حاسه انها مش برضه
ليديا ده كذا حد قالي عليه. ديه كانت في الانجيل "ليديا بائعة الارجوان" كانت من اوائل الناس اللي امنوا بالمسيحيه بره فلسطين. والست على عيني وراسي بس كانت بائعه متجوله اخاف من البلديه يا ستي
Love,
MishMsih

فلة said...

لا
احنا شكلنا مش ح نخلص
انا كل يوم بفتكر اسم احلى من التاني
ايه رأيك في اسم منيرفا
ومعناه الابديه
ومش ه يقدر ميجو يطبقلك عليه اغاني وحشه زي اللي بيغنيها دلوقت

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق