Friday, December 26, 2008

بواخات مصرية

قبل ما اقول اي حاجة عايزة اشكر كل الناس اللي زي الفل اللي سألوا عليا طول الفترة اللي فاتت. واقولهم معلش علشان بقالي كتير مش بطلع البلكونة ولا بروح عند حد. بس الاطفال يا جدعان مش بيتولدوا بساعه بيولوجيه متلخبطة لا ده معندهومش ساعه اصلاً. ساندو خربت ساعتي البيولوجيه ومش عارفه هارجع الشغل تاني إزاي.
بقيت اصحى وقت ما بتصحى وانام وقت ماتنام واحياناً ساندو بتنام ساعه ونص ساعتين وديه بتبقى اسعد ساعات حياتي. ممكن الحق اقرا الجرنان او اشرب كوبايه شاي او اقعد افكر في حال الناس فلقيت مثلاً
انك ساعات تتصل بحد على التليفون يرد عليك ويقولك "سلامو عليكو" .مع ان الجمله ديه من حقك انت لانك انت اللي طالب. ولو حالك زي حالي تقوم تتلخبط وتبقى منتاش عارف مين اللي اتصل انت ولا هو
مممممممممممممممممممممممممممممممم
تفتح التليفزيون وتحولبالريموت وتلاقي ممثل مستضيفينه في برنامج على قناه محدش بيتفرج عليها غير صاحبها وفي اخر البرنامج تلاقي الممثل الضيف عمال يشكر في المحطة ويقعد يقول بسم الله ماشاء الله والله احنا بنحب القناه ديه قوي يا استاذ طارق وانا طول اليوم بتفرج على القناه بتاعتكو مع انه من 10 دقايق بس لما سالوه عن رايه في مسلسلات رمضان وايه اللي عجبه فيها قال انه مش متابع ومبيتفرجش عالتلفزيون
كككككككككككككككككككككككككككككككككككككككككك
طول الوقت الناس تقولك زمان مكنتش الدنيا كدة مع ان معظم الناس ديه محضرتش زمان ده. وتلاقي واحد يقعد يشتكي من الموبايلات والنت اللي فتحت مدارك العيال الصغيرة وقضت على العلاقات الانسانيه مع انك لو خدت منه الموبايل بتاعه او النت قطع من بيتهم تلاقيه قاعد يندب زي المعدده
ححححححححححححححححححححححححححححححححححححح

لسه في ستات بيوت لعايه دلوقتي فاكرين ان دورة العصير بتبوظ الغساله الاتوماتيك وعادة واحدة من الستات دول بتكون ساكنه فوقك فتلاقي سيول وامطار غزيرة عندكو بس وبقيه البلد كلها تعاني من ارتفاع في درجات الحرارة

هههههههههههههههههههههههههههههههههههههههههههههههههه
تلاقي واحد من جيرانك بيسأل عليك البواب وباعتلك مع كل الناس انه عايز منك خدمة ويخليك طول الوقت مش عارف هو عايزك في ايه لغايه لما تلاقيه من غير مقدمات بيخبط عليك يوم الجمعه الصبح الساعه 8 علشان يضمن يلاقيك في البيت ويطلع انه عايز الجرايد القديمة اللي عندك
ططططططططططططططططططططططططططططط
المترو بينقل يومياً 5 مليون مواطن عادتاً مابيقروش ومع كدة لو ركبت المترو ومعاك اي كتاب او جرنان تلاقي كل اللي واقفين حواليك عنيهم معاك في الكتاب. ومش كدة وبس ده ممكن يكون في واحد من اللي حواليك دول بطيء الفهم بيقرا في كتابك بصوت عالي ومتاخر عنك بنص صفحه ويتضايق لو قلبت الصفحه قبل ما يخلص حصه القراءه الرشيدة بتاعته
خخخخخخخخخخخخخخخخخخخخخخخخخخخخخخ
في نفس المترو اللي بينقل 5 مليون راكب كل يوم يطلع حظك في واحد واقف جنبك عنده مشاكل في القولون لا مؤاخذه وده تعرفه لما تشم ريحه تخلي عنيك تدمع ويجيلك دوار بحر وميل للقيء وتلاقي نفسك بتترجى من ربنا انك تفقد حاسه الشم او مناخيرك كلها وصاحبنا ده واقف جنبك بيبتسم ابتسامة باهته تدل على انه صاحب التييييييييت الجامدة ديه
ىىىىىىىىىىىىىىىىىىىىىىىىى
تزهق من المترو خالص وتقرر تاخد تاكسي يقوم السواق مستغل انك معاك واحدة ست اياً كانت بقه الست ديه ويزود في الاجرة علشان يحرجك قدمها
لللللللللللللللللللللللللللللللللللللللل
تمشي علي رجليك في الشارع تلاقي بني ادمين ياما ملمومين حوالين حاجة ممكن تكون حريقه او خناقه او حادثه محدش عارف. وتلاقي واحد ساب الزحمة ديه كلها وماشي وراك ومصر يكلمك ولما تبصله يقولك: كابتن كابتن هو في ايه؟
او تلاقي مجموعه ناس عاملين زي ندوة للرأي فيها واحد بيفتي وبتكلم عن تفاصيل الحادثه وعارف اعداد القتلى والجرحى كلهم وبعدين تكتشف ان صاحبنا ده كان بيتكلم عن حادثة تانيه من تأليفه ملهاش علاقه خالص باللي حاصل في الحادثه اللي واقف جنبها
ساندو صحيت إهي إهي إهي إهي عن إذنكو بقه
Love,
MishMish

12 comments:

جدو عصام said...

كان نفسى أكتب لك تعليق بس ياخساره مش هتقراه لانك مشغول مع ساندو.

جدو عصام تانى said...

على فكره لو كانت ساندو مطلعه عينيك الاتنين ده حال كل الصغيرين مع الكبار النهارده فرقه صغيره غلبانه اسمها بنى عبيد طلعت عين الزملكاويه ونكدت عليهم مع اننا مش فى العيد.

EmY said...

ربنا يخليلك ساندو و تبوز ساعة مشمش البيولوجيه هو كمان

انا كمان بتلخبط لما حد يرد يقولي سلامو عليكو و مش بعرف اقولو ايه فغالبا بسكت و اقول طيب

النفاق بقي من كلو لكلو في الجرايد و الفضائيات و الشارع و كلو كلو

كل واحد عايز الكون يتصلح بس هو يفضل علي حاله

بوست جميل

An Egyptian said...

هاها بلوج جميل
موضوع سلامو عليكم ده نوع من انواع اسلمة الدنيا عشان نخش الجنة

انا فعلا بحب اقرا فى جرنال اللى جنبي فى المترو مش عارف ليه بمبسط اوي لما اعمل كده اللى بيضايقني بقى اني سريع فى القراية و اللى بقرا معاه دايما بطيىء

مرة سواق تاكسي بن كلب استغل اني معايا صديقة نمساوية و طالب باجر خيالي

amunraa said...

الف مبروك على ساندرا اموره ربنا يحافظ عليها
انا كمان مستني بيبي جديد

norahaty said...

مش ممكن كده!!
دول مش بس استنساخوا الاطفال لأ وكمان للامهات !!بنت اختى (ام ملك)بتعمل زيك بالظبط !واول مابنتها تنام تسيب كل حاجة وتجرى تنام جنبها على طول .
ضحكتينى يامشمش وانا مليش نفس وكله كوم وبتاع القولون كوم...:)حتقوليلى عليه؟عارفة ياحبيبتى عارفة(أكتر حته شغالة فىّ الحمد لله مناخيرى تقدرى بقى تتصورى المعاناة اللى انا عايشة فيه؟؟
سلامى وتحياتى لميجو وساندو وام ساندو كمان
نسيت اسأل هى ساندو طالع حلوة اوى كده لمين فيكو؟؟(سؤال خبيث مش كده؟

Migo Mishmish said...

جدو عصام
انا لسه سايبه ساندو من الاسبوع اللي فات. لولا الساعه اللي ماما بتمسكها فيها كان جالي انهيار عصبي
بص يا جدو انا مليش في الكورة بس اللي فهمته من موضوع الزمالك ان النادي ده ربنا تحفه بناس بتدور على مصحلتها وبس كل واحد بيدور على نصيبة وازاي يظهر نفسه
ولو فضل الحال على كدة الهزيمة الجايه هتبقى من كفر ابو طشت
Love,
MishMish

Migo Mishmish said...

ايمي الجميله
نفسي اتفرج عليكي واشوف ساعتك البيولوجيه وهي بتتلخبط
كويس اني طلعت طبيعيه طالما في ناس بتتلخبط زيي. صدقيني انا ساعات اللي قدامي بيصعب عليا لاني ساعات بحس اني فتحت عليه. وساعات تانيه اقعد ارغي واكتشف ان انا اللي طالبه وساعتها بقعد اشتم شتيمة

مش بحس الناس عندنا منافقه على قد ما بحس انهم مش عاجبهم العجب ولا الصيام في رجب. تحسي انهم لو قالوا على اي حاجة حلوة هيدفعوا ضرايب. خدي بالك كدة من كلام الناس. اسالي اي حد عن اي حاجة حتى ولو جاكت. هتلاقي اللي قدامك يقولك اه جميل عليكي بس : مش طويل شوية/ مش قصير شوية/مفيش منه اخضر فسفوري/ مفيش منه على حريمي
المفروض الناس ياما تقول اه حلو من غير بس ياما لا وحش من غير رغي
Love,
MishMish

Migo Mishmish said...

المصري
تصدق انا اعرف واحد معانا في الكنيسة دماغه شامه رطوبة ومدروش كدة وهو اساساً تعليم متوسط لما بيرد عالتليفون بيقول اغابي
المشكله بقه اننا معانا واحدة في الكنيسة اسمها اغابي. فاتصلت بيه مرة قالي اغابي قولتله لا مشمش
العالم ديه تعبانه في دماغها. انت عارف لما حد بيعمل كدة ما بردش اصلاً. لانها من حقي انا . انا اللي اقرر اذا كنت هاقول سلامو عليكو او مساء الخير او حتى العواف طالما ان اللي دافعه تمن المكالمة

وكويس انتك اعترفت انك بتعمل كدة على فكرة انا بضايق من الحركة ديه موت. عارف انا نفسي اللي بيعمل الحركة ديه اخد منه 50 قرش (نص تمن الجرنان). وعموماً انا بطلت اجيب جرايد انا بقرا فلسفه مع اني كنت علمي علوم بس بحب كتب الفلسفه علشان مش اي حد يفهمها وانكد على اللي حواليا

اما بالنسوبة للاخوة سوايقين التكسيات لينا واحد صاحبنا سواق التاكسي هلفط معاه كدة قاله قدامك حل من اتنين ياما ترجعني مكان ما جبتني ياما نطلع عالقسم وانا معاك في الاتنين قام الراجل خد منه الفلوس وهو ساكت. بس للامانه قبل ما تجرب تعمل كدة لازم تعرف ان صاحبنا كدة حاجة كدة اتنين متر في خمسه ونص وتحس ان ليه هيبه

Love,
MishMish

Migo Mishmish said...

amunraa
الله يبارك فيك وعقبال ما تجيب بنوته حلوة زي ساندو او ولد امور نجوزة لساندو
Love,
MishMish

Migo Mishmish said...

norahaty
اسكتي علي موضوع النوم ده. زمان لو مكنتش انام الضهر بتاع 3 ساعات وبالليل 8 مستريحين كنت بقول اني مطبقة. انما دلوقتي بقيت بعون الله بنام ساعه الا ربع واحلم كمان
لا ومش ساعتي البيولوجيه بس هي اللي باظت لا والاحلام كمان. يعني انا سايبه الجامعه بقالي 6 سنين ولغايه دلوقتي احلم اني عندي امتحانات وانا مش مذاكرة وبعد ما تضيع الليله وانا عماله اجري ما بين المكتبات اللي قدام الجامعه ادور عالورق بتاع الحشرات ولا الحيوان - اصل كنت في كليه العلوم زي سامح عبد الشكور في مسرحيه سك على بناتك - افتكر اني مخلصه ومتجوزة ومخلفه واقوم متعكننه علشان حتى في الحلم معرفتش اريح شوية

اما بالنسوبة بقه لموضوع القولون ده ما يقتالش فيه غير : في فحم يا بني ادميين بيتباع في الصيدليات وسعره في متناول الجميع

وساندو طالعه لامها وابوها. انتي عارفه لما كنت بنزل انا وميجو ندور على شقه الناس كانوا بيفتكروني قريبته او اخته
Love,
MishMish

^ H@fSS@^ said...

ام ساندوووووووووووووووو
الف حمدالله على السلامة يا جميل
و الف الف مبروك
البنوتة زي القمر
ربنا يخليهالكوا و يحفظها من كل شر
بس انتي لازم تكتبي لنا مذكرات اكتر من كدا شوية
يوم بيوم او اسبوع باسبوع و تخلي ميجو هو اللي يدون على الاقل
الف مبروك يا جميل و تتربى في عزك يا رب

تحياتي

There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق