Monday, December 29, 2008

سنه جديده فى البلكونه

كل سنه وانتو طيبين ..سنه جديده علينا وعليكو ..سنه فى البلكونه ..شفنا حاجات كتير منها ؟؟وقابلنا ناس حلوين فى البلكونه.. شرفونا وانسونا ..مش هاقول اسم حد عشان مانساش ..
يارب السنه الجديده نطل منها من البلكونه نلاقى ناس محترمين ماشيين فى الشارع مبسوطين ومتفائلين والشوارع نظيفه ومافيش حد بيتخانق ..يارب نبص من اليلكونه نلاقى حاجات حلوة وناس بتردم على الحاجات الزفت ..ناس مش سلوكها عشوائى ..
ناس عندها استعداد تتقبل الاخر وتفهم ان الناس كلها اراءها مش زى بعضها وان كل واحد له معتقده وكل واحد له فكره ومش معنى انى مختلف معاك انى ابقى عدوك ..لان الحياه الوانها كتير مش لون واحد بس
يارب افتح البلكونه الصبح الاقى اغانى محترمه شغاله عند الجيران ..

نفسي السنه الجديده ماشوفش فيها وش تامر حسنى وتامر هجرس وتامر امين.وافتح التليفزيون مالاقيش مرتضى منصور هو وشوبير ..والتليفزيون يبطل يجيب فيلم قبضه الهلالى بتاع يوسف منصور ..والله يارب بحس انى معتوه ومتخلف عقليا لما بتفرج عليه يارب ابعد عنا ماجد المصرى وشريف رمزى وخالد ابو النجاوخالد النبوى ..والراجل الى اسمه ممدوح فرج بتاع (هيى انت) الى بيقدم برنامج المصارعه الحرة ..احمينا يارب من بعرور وعبد الباسط حموده والواد بتاع اجوجوجوجوجو ويابا يابا يابا ...حوش عنا يارب كل مسرحيات محمد نجم واحمد بدير وسمير غانم وبالذات مسرحيه دورى مى فاصوليا بتعملى انفصام فى الشخصيه واهتزاز فى المعايير ...قادر يارب على كل شيئ زى ماقفلت قناه دريم سبورت .تقفل قنوات التخلف ..ابعد عنا يارب مسلسلات فيفى عبده.وبرامج عمرو خالد ومعز مسعود .

نفسي السنه الجديده ادخل فيلم فى السينما يكون بيحترمنى وبيحترم انى ليا عقل ومش اهطل وبرياله

يارب اصحى الصبح فى السنه الجديده الاقى المناهج الدراسيه اتلغت كلها واتعمل مناهج جديده تحترمنى انا والتلامذه ..يارب مش عايز ابقى منافق وكداب وانا بقول المناهج دى .... صبرنى يارب علي الجهله وخلينى امسك اعصابى

نفسي اقف احيي العلم من قلبى بجد وابقى منتمى بجد

ادينى يارب صبر على كل الناس الى بتحاول تقرا الجرنان جنبى فى المترو ..وكل من بيعمل تيييييت ويتهمها فى واحد تانى

يارب ابطل اقول لمشمش الفاصوليا بتاعتك هايله ياحبيبتى ..وانا عارف من جوايا انها وحشه وماتتاكلش..
يارب افتح الجرنان مالاقيش فيه ممتاز القط وسمير رجب واسامه سرايا والاقى الناس بتكتب لله مش عشان مصلحهتهم الشخصيه
نفسي اصحى الصبح افتكر انى كنت فى كابوس وحش وان كل حاجه حواليا مكانتش حقيقيه وانى كنت بحلم
يارب
يارب
ميجووووووووووووو

12 comments:

George USA said...

يعنى من الاخر عايز تصحى الصبح ماتلقيش نفسك فى مصر

تعرف موضوع تييت ده موجود هنا كمان مديرى هرينى تييت تييت و ايه امريكانى يا معلم
بس مبيلزاهاش فى حد حتى فى دى عندهم صراحه ويقول انا اللى عملتها
اما بخصوص الفاصوليا قدامك حل من الاثنين الاول تخليك زى مانتا و تقولها تسلم ايدك و الحل التانى تقولها تسلم اديكى بردو لانى عن خبره انتى مش هاتقدر تغير حاجه الفاصوليا زيها زي شوبير و مرتضى منصور و عمرو خالد و صنيه المسقعه بتاعة مشمشتى

كل سنه وانتى طيب و ساندو طيبه و مشمشه طيبه ويارب يارب اقدر اشوفكو السنه دى

enjy said...

ممكن تحلميلى ان دة يحصل بصحيح مش فى حلم؟؟؟؟

Migo Mishmish said...

الاخ جورج
انا معاك ان التيت للجميع ..بس مش فى الاماكن المغلقه زى المترو ..يعنى حبكت؟ اصلا المترو مافهوش اكسجين نقوم نزوده ثانى اكسيد الكربون؟
اما بالنسبه للفاصوليا صدقنى بقول تسلم ايدك ..بس لما اقف قدام المرايا اشوف نفسي كداب ومنافق .. بس ارجع واقول ..ربى عيالك ماتتكلمش فى السياسه
كل سنه وانت طيب وميرى كريسماس وميرى محسن وميرى انيس ..سلامى لانجى والواد عريس بنتى

Migo Mishmish said...

انجى اهلا وسهلا
نورتى البلكونه وشرفتينا ولو انك ماشربتيش شاى ولا حاجه ومشيتى بسرعه
اولا انتى كاتبه ضمير المخاطب غلط
مفروض تقولى تحلملى ..لمؤاخذه انا ميجو مش مشمش الى كاتبه النهارده ..ممكن تنزلى تحت شويه وتقرى التوقيع
اما بالنسبه للحلم ..غالى والطلب رخيص
نورتى البلكونه
ملحوظه ابقى تعالى البلكونه لابسه تقيل اصل البلكونه عندنا بحرى عشان ماتاخديش برد

عمو عصام said...

ياميجو انا مره دعيت ربنا افتح الجورنال مشفش سمير رجب وابراهيم نافع وابراهيم سعده قوم اييييييه قوم انا لقيت لك اللى انت مش عاوزهم دلوقتى دول طلعوالنا من تحت الارض وندمت على دعوتى وعرفت ان دوكهمه كانوا ارحم من دولاهمه نصيحه لله يابنى ارضى بيهم وبفاصولية المدام وبالبلاوى اللى فى مصر كلها لاننا بنخلص من بلوه تيجى اللى العن منها ونرجع نندم على اللى فات على راى المثل روحى ياناكره جميلى هتعرفينى لما تجربى غيرى ولو مش عاجباك فاصولية مدامتك تعالى جرب سبانخ مدامتى عشان تعرف النعمه اللى انت عايش فيها و مش حاسس بيها وبالنسبه للتيييت انا شخصيا بنزل من العربيه واركب غيرها او اركب المترو اللى بعده ولو ان الريحه بتفضل لازقه فى مناخير الواحد لغاية ماتتم عملية الاحلال (يعنى تيت جديده مكان القديمه) وقوم بقى غير للبت واعمل لها الرضعه و كفايه رغى لانك هتوقعنا فى الغلط

Hassan El Helali said...

يا ميجوز يا صديقي
باختصار يعني نفسك تصحي تلاقي نفسك عندي في البهاماز
كل سنه وانت طيب إنت ومشموشه الجميله
واحمد ربنا على نعمة الفصوليا
لا يجيلك عقد عمل في عرعرستان وتاكل عنجبيز مخلل
ولا ضب مقلي متغمس في الجراد

واحدة مفروسة said...

انا جاية اقولكم كل سنة و انتم طيبين
و عيد سعيد عليكم يارب

هوه العيد دع بتاع الكحك؟؟؟ ولا اللحمة؟؟؟؟
يعنى لو بتاع الكحك ماتنسوش اختكم بكحكاية من ام عين جمل
اصلى بحبه مووووووووووووووووت
كل سمة و انتم طيبين و فى سعادة و سلام و راحة بال ان شاء الله
سلام

واحدة مفروسة said...

انا رجعت تاني
اصل لفت نظري انك بتدعي
ان ربنا يبعد عنك مسلسلات فيفي عبده
و برامج عمر خالد
و معز مسعود
ليه كده بس زعلتوني منكم
اقلبو المحطة و خلاص فيه ناس تانيه بتحب البرامج و المسلسلات ديه
اعملوا زي اختكو مفروسة
لما البرنامج مش يعجبها بتفضل فى ركن الافلام الاجنبي
ام بي سي 2 4 ماكس فوكس موفى فوكس سيري
سلام

على باب الله said...

يعنى من الاخر عايز تصحى الصبح ماتلقيش نفسك فى مصر

( الكابتن ده جاب من الآخر )

من الظغروف الجواني يعني

----

علي العموم الأحلام معاليهاش جمارك

ممكن نحلم معاك برضه

--

Desert cat said...

كل سنة وحضرتك واسرتك الجميلة طيبين وبالف خير
عيد سعيد يا ميجو
وسلاماتى وقبلاتى
لمشموشة اللى وحشتنى اوى وللجميلة ساندو

مواطن مصري said...

ههه صعب دة يحصل


لو مركبتش ميكروباص و مسمعتش اجوجوجوجو

مبقاش في مصر



الكلام دة صعب انو يتحقق

George USA said...

يا عم ميجو انتى فين يارب يكون المانع خير انا كل مافتح البلكونه القى البوست بتاع السنه الجديد مع
اننا فى يوم 16 منه
انا مستنى حاجه جديده
سلامى للناس كلها والاخص ساندو

There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق