Sunday, January 18, 2009

يعملوها الصغار

ميجو قالي الموضوع ده قتل بحثاً مفيش داعي تكتبي عنه، قولتله لو ماقوتلش اللي في نفسي هطق
ايه الخيبة اللي المصريين بقوا فيها ديه. ايه المظاهرات اللي ضاربه في البلد طولها وعرضها بتندد بموقف الحكومة والتخاذل المصري واستجوبات في مجلس الشعب مقدمة من الغربان طبعاً - اللي هو المفروض يحل مشاكل الشعب المصري -عن غزة. طب والحكومة المصريه مالها؟
بتوع حماس عملوا زي حزب الله وخطفوا القضيه ووقعوا في الحفرة اللي حفرتهالهم اسرائيل نقوم احنا اللي نحتمل مسئوليه افعالهم الطايشة. وكل واحد قاعد فاضي مش عارف يعمل حاجة يقولك موقف الحكومة المصرية المساند للسياسه الاسرائيليه على اساس ان تشغيل العقل عار عند الاخوة العرب.
اللبنانيين يعلموا مظاهرات ضد مصر قدام السفارة بتاعتنا في لبنان ليه ان شالله؟ ما تخدوهم عندكوا؟ علشان يكملوا تجهيز الجماهير لرفع راية الإسلام، وتطبيق الشريعة في المخيمات الفلسطينية اللبنانية، ثم فتح القدس وتحريرها من اليهود
وطبعاً علشان يرفعوا الرايه عملوا معسكرات تدريب للمسحلين وعمليات سطو المسلح على البنوك علشان التمويل وتفجير المطاعم الامريكية لزوم الجهاد الفلسطيني والمقاومة اه وعلى فكرة عادتاً المطعم بيبقى مليان بناس من اهل البلد- اللي هما لا اسرائيلين ولا اميركان- ودول ناس لا ليهم في الطور ولا في الطحين.
والسيد حسن اللي تجيله خيبة والله بيتكلم في الزحمة هو كمان وبيدعوا لعصيان شعبي. طب يا شيخنا راجل قوي كدة ما تطلع من الجحر اللي انت مستخبي فيه. ده صدام في عز ما كان الحرب دايرة في العراق طلع ومشي في الشارع وانت خربت بلدك ودخلتها حرب راح ضحيتها المدنيين اللبنانيين والبنيه التحتيه للبلد ولولا الامم المتحدة كانت اسرائيل خدت لبنان بوضع اليد وحتى ماعتذرتش للبنان عالخراب اللي حصل
او سوريا تاخدهم عندها واهو برضه يشتغلوا بلقمتهم ويحاولوا يحررو ا الجولان بالمرة في السكة وهما طالعين عالقدس اللي هيحرروها بالبمب بتاع حماس. او احمدي نجاد بتاع ايران اللي بيقول انه هيشيل اسرائيل من عالخريطة. حد يتصل بيه ولا يرنله يا جدعان ويقوله يتفضل يشيل
حتى لو فتحتنا المعابر للفلسطنيين طب ماحنا بكدة يبقى حلينا مشكله اسرائيل وساعدناهم في اخد غزة وطبعاً الاخوة العرب هيخدوها فرصه وكل واحد حاسس بصغر نفس هيشتم في مصر متخيل بكدة ان مقامه علي زي ما قعدوا يقولوا مصر باعت فلسطين علشان تحرر سينا. على اساس اننا واحنا طالعين الحرب كان المفروض نتصل بيهم واحد واحد نشوفه عايز ايه علشان نجيبه في ايدينا واحنا هناك بالمرة. ثم الفلسطنين هيجوا يقعدوا عندنا هنا لأمتى ان شالله؟ وإذا قعدناهم يا ترى هياخدوا سينا قاعدة لضرب اسرائيل ويحققوا رغبه اسرائيل في انها ترجع لسينا تاني لانها مش هتسكت. وطبعاً اذا مشيناهم هيدوروا يلولوا في الدنيا كلها ان مصر طردتهم وانها اسواء من اسرائيل
بيتهيألي كفايه كده. الرجاله بتعترف بغلطها وبتعتذر وتتحمل مسئوليه افعالها زي ما عمل عبد الناصر. انما اللي بيعك بلده ومعندوش مخ يفكر بيه ومش مهتم بقضيته وبيدورعلى منافع شخصية ما يستحقش اني اقف جنبه حتى لو كان اخويا
اسرائيل بقالها في المنطقة 60 سنه اظن ديه فتره كافيه جداً اننا نفهم ان الحرب مش هتجيب نتيجه معاها. وحرب اكتوبر اكبر دليل على كدة. الحرب مهدت لمفاوضات السلام. السادات فهمهم انه عنده جيش قوي ومع ذلك مستعد للتفاهم. مابقالكم 60 سنه عمالين تغنوا وتصوتوا وتضربوا الدبابات بالحجارة وخوتوا دماغنا ماتجربوا مرة المفاوضات. اسرائيل استغلت القضية صح مع انها كيان محتل الا انها نجحت في انها تصور نفسها قدام العالم على انهم اصحاب الارض الاصليين والفلسطنيين هما اللي غلط. نجحت في بروزة صورة العرب والفلسطنيين كارهابين وبصراحه انا شايفه ان وجود كيان ممكن التفاهم معاه وملتزم باتفاقياته معانا - حتى لو كان كيان محتل- على حدودنا احسن ميت مرة من وجود كيان زي حماس اول ما مسك السلطه بدل ما يشوف هيضيف ايه للقضية عمل حرب داخليه مع بتوع فتح وبعدين اعلن غزة إمارة اسلامية وابتدوا يقفلوا نوادي الانترنت ويفرضوا الحجاب على الستات وبقيه الخبلان بتاع التيارات الاسلامية السياسية. وسابوا اسرائيل تنعم باحسن فترات الامن والامان وادوها عزر تديهم على دماغهم في دفاعها عن نفسها
والدليل ان الانتقادات اللي بتتوجه لاسرائيل هى انتقادات لاستخدام القوة المفرطة وليس رد الاعتداء. يمكن انا مش من المؤيدين قوي لسياسات الحكومة لكن الموقف ده بالذات انا فيه ورا الحكومة 100% مش يعملوها الضغار ويقعوا فيها الكبار
Love,
MishMish

19 comments:

Layla said...

موافق تماما على موقفك ده.. كل الناس كانت بتقول ان موقف الحكومة غلط مع اني شايف ان هو ده عين العقل..من اول يوم و لحد النهاردة

رغم اننا بنكره الحكومة لكن في الموقف ده بالذات لازم نؤيدها فيه لانه هو الصح

لازم الناس تفكر بعقلها شوية.. متمشيش ورا عواطفها وخلاص

Anonymous said...

اولها فلس و اخرها طين

Anonymous said...

هما عايزين يحاربو لاخر جندى مصرى
دا اللى العرب و الفلسطنيين عايزينه احنا نحارب ونحررلهماراضيهم و بعدين هما يبيعو ارضهم للاسرائليين
وبعدين عملت ايه يعنى المظاهرات اهو تضييع وقت و خلاصانا شايف ان احنا نخلينا فى الهم اللى ما يتلم اللى عندنا خلينا نكبر و نكون متحضرين ونبنى البلد ولما نبقى تمام نبقى نفكر فى اللى باعو ارضهم من 50 سنه خلينى اديلكو مثال صغير عندنا هنا فيه محل عربى بيبيع لحوم و فراخ صاحبها بتكلم معاه من فتره و طلع فلسطينى هو متدين جدا يعنى ماشى على الشريعه الاسلاميه هنا فى امريكا وكل لما اروحله يقولى قال الله و قال الرسول و فى الاخر اكتشفت انه فلسطينى الموطن و اسرائيلى الجنسيه
اخر مره كنت عنده قولتله بطل بقى تبيع باسم العرب وكل شويه تقولى احنا عرب و الوحده العربيه
دى بقت حاجه تزهق والا بقى حكاية الاخ نجاد عايز ايه ما يشد حيله و يروح يحارب واحنا وراه
تسدق انتو عكننتونى و فكرتونى بحجات تحرق الدم
و النبى الحقونا ببوست تانى بس
بسرعه ميحرقش الدم

على باب الله said...

نرفزتني المظاهرات اللي قدام سفارات مصر في لبنان و سوريا و الأردن ؟؟

هما عايزين أيه من مصر ؟؟ تفتح باب الجهاد ؟؟ طب و هو باب الجهاد ده ما ينفعش ينفتح من الدول دي ؟؟

ما كلها ليها حدود مع إسرائيل ... طب ما يللا يدخلوا و يجاهدوا براحتهم ؟؟؟ حد قال لهم لأ ؟؟

حاسوباتيه said...

صح كل كلامك صح

Migo Mishmish said...

MaR3l
اهلاً بيك يا دكتور
والعجيب اني فاكرة المظاهرات كانت بتقفل الجامعه ايام.ولو فتحوا باب التجنيد العيال ديه كانت هتبقى اول عيال تقطع صوابعها وتفقع عينها علشان ما تروحش الحرب
مش معني ان الناس مرتبطه بفلسطين ارتباط عرقي او ديني او اياً كان الارتباط ده. انها تأيدها حتى ولو في الغلط. اللي هما فيه ده نتيجه انهم اتعدوا يغلطوا وما يتحملوش مسئوليه تصرفاتهم
علاوة على انهم لا عندهم قدرة على الحرب المنظمة ولا قدروا حتى يقنعوا الرأي العام العالمي انهم ناس كويسيين يستحقوا انهم يعيشوا في سلام
تحياتي ليك وربنا معاك في الامتحانات. انت مش كاتب في مدونتك انت عايز انهي تخصص. عموماً انا لو كنت دخلت طب كنت احب اخش قسم جراحه عامة
بعد خلفت معايا على اربع درجات. ودخلت علوم
Love,
MishMish

Migo Mishmish said...

An Egyptian
اهو اخرها ده اللي احنا شايلنه من يوم ما ربنا خلقها وتحفنا بعبد الناصر بتاع القومية العربية كاننا خلفناهم ونسيناهم
Love,
MishMsih

Migo Mishmish said...

George
ازيك يا باشا
ماهو اللي حصل دلوقتي ان المصريين اتهبلوا. سابوا اللي وراهم وحال البلد اللي زي زفت ومهتمين قوي بحماس وغزة ومعرفش ايه. والغريب يا اخي انك تلاقي حروب اهليه علشان انبوبة بوتجاز او رغيف عيش ومفيش ولا مظاهرة بتطلع ولا اعتراض ولا شتايم في الحكومة المتخاذله
عارف المثل بتاع اقرع ونزهي اهو المصريين بقوا كدة
لا ولا يغيظك قوي البهايم بتاع ان ده بيحصل علشان احنا بعدنا عن الدين. طب احنا بعدنا عن الدين يقوم ربنا يخربها على غزة. طب ماهي السعوديه وطالبان وايران بطبق الدين بحزافيرة وحالهم غم برضه
اوعدك البوست الجاي هيبقى يفطس من الضحك بس اصل زي ما قولت في اول البوست ده لو ماتكلمتش كنت هاطق. تحياتي للجميع عندك وسلملي عللا عريس بنتي
Love,
MishMish

Migo Mishmish said...

على باب الله
ما هو علشان العالم ديه مش عارفة تعمل حاجة. وفي منهم اللي لغايه دلوقتي مش عارفين ياخدوا من اسرائيل لا حق ولا باطل. وعلشان لازم يبقى في حد يشتموا فيه ويدعوا عليه فبقت المشكله دلوقتي مصر. مصر هي جابت البجامة الحمرا - على راي سعيد صالح في العيال كبرت- لو حد قالهم طب مانجاهد احنا ترد اجهزة الاعلام بتاعه البهوات دول ويقولوا ما تغيرش الموضوع
Love,
MishMish

Migo Mishmish said...

حاسوباتيه
اهلاً بيكي يا باشمهندسه
الغريب ان اللي رايه زي راينا بيعتبر خاين وضد القضية
ومحدش شايل القضيه ديه على دماغه غيرنا
Love,
MishMish

Desert cat said...

ازيك يا مشموشة واخبار ساندو ايه
الف بوسة منى ليكى وليها

بالنسبة لموضوع البوست طبعا تحليلك للموقف منطقى جدا لكن اان اكثر ما بيضايقنى بجد انى الاقى اى عيل مصاب كانت حماس واخده درع بشرى ولا شاى انضرب له رصاصه وهو بيحدف طوبة تلاقى اربعه ولا خمسه من اهله رافعينه فوق علشان الاعلام يصور وكل واحد فاتح لى بؤه قال يعنى بيصوت عليه لكسب التعاطف بالظبط زى اللى بيروح يعور نفسه ويظهر اصابته علشان يشحت
طيب الناس زعلت وعيطت وبعتت ليكو اعانت والحمساوية لهفوها فى كروشهم طيب وبعدين هتفضلوا كدا لحد امتا ما تتنيلوا تتفاوضوا ولا تبطلوا قرفكو للعالم العربى وقلة الادب اللى كل عاجز قاعد يرمى اللوم على مصر اتفضلوا ورونا شطارتكو وحرروهم يا عجزة

مودتى ومحبتى ليكى يا مشموشة

Unknown said...

مساء الخير واسمحيلى يامشمشة ياأم الانسة ساندو وزوجة الاستاذ ميجو انى اقول كل سنة وانتم طيبين ومنوريين البلكونةكمان ومعلش انى اتأخرت فى التهئنة دى لكن الحمد لله لحقت اجى قبل السنةالتانية وسامحينى انى حطيت الكومنت هنا يمكن ماتاخدوا بالك لو اتحط فى التدوينة اللى فاتت.المهم انتم عامليين ايه ؟ واخبار الانسة ساندو والساعة البيولوجية بتاعتها المتلخبطة اية؟لسة.....؟معلش بكرة تنتظم وتعرف الليل من النهار.وشكرا للشاى الممتاز اللى فى البلكونة

صفا سارة said...

فعلا موقفك متفقة معاه جدا لا وايه المظاهرات ركزت على مصر اكتر من اسرائيل بدون اى تفكير فى حاجة والموضوع ذاد عن حده اوى وكل من هب ودب ومش فاهم حاجة يتكلم فيه والنواب سابوا الشعب ومسكوا فيه هما كمان اصلها ناقصة

Migo Mishmish said...

القطة العزيزة
البلكونة نورت
الفكرة اني مش عارفه على اساس هما مستحلين الوضع. الناس ديه محتاجة عمل منظم علشان يطلعوا من اسرائيل بحاجة. وبعدين لما اسرائيل عملت الاجتياح الاول لغزة من كام سنه سمعت مندوبهم وهو بيتكلم في جلسه الامم المتحدة. الراجل قال احنا اديناهم غزة امالين في انهم يبنوها ويبدوا يشتغلوا فيها كدليل واضح على رغبتنا في السلام.انما هما استخدموا كارض للمعارك الداخليه ومهاجمه امن اسرائيل. شفتي الدماغ لما اسرائيل وهي معتديه اساساً على فلسطين استثمرت موضوع غزة ده صح. وحماس نجحت انها تبين للعالم ان الفلسطنيين لو خدوا الارض او بقالهم وطن مش هيبقى اكتر من بؤرة لتصدير الارهاب والتخلف للعالم كله.
والفلسطنيين عاملين زي الخرفان ماشيين ورا العشب وخلاص. لا في دماغ ولا تخطيط ولا دراسه كل اللي بيحصل انهم بيغنوا وزي ما بتقولي يرقعوا بالصوت قدام الكاميرات
Love,
MishMish

Migo Mishmish said...

norahaty
وانتي طيبة يا ست الكل
الانسه ساندو بقت تمام وساعتها البيولوجيه اتظبطت. بقت تنام الضهر ساعتين متواصلتين يعني 120 دقيقه كاملة ودول بيبقوا اسعد لحظات حياتي واتعلمت استفيد من كل دقيقة فيهم باتغدى واتكلم مع ميجو اقرا الجورنال ولو حظي كويس بنام 29 او 30 دقيقة
وبالليل هي وذوقها بتسبني انام 3 او 4 ساعات قبل ماروح الشغل الصبح
يعني بتصحيني بتاع 18 ساعه في اليوم بس وديه احسن حاجة حصلتلي من يوم ما شوفت وشها
ومع اني ساعات كتير ببقى عايزة اضربها بالحزام لكن لما ببص في عينها واشوف ضحكتها اللي زي السكر من بقها اللي مفهوش ولا سنه
ببقى عايزة افضل صاحيه طول العمر علشان ابص على جمالها بس
وكويس ان الشاي عجبك وعلى فكرة مش انتي لوحدك اللي بتقولي كدة. وعلشان كدة انا بفكر اعمل مينم تشارج للبلكونة
هههههههههههههههههه
Love,
MishMish

Migo Mishmish said...

صفا
اهلاً اهلاً
ماهو اصل اللي بيشتم ده معندوش حاجة يعملها. وكل واحد عايز يعمل ريس وهما فاكرين انها خناقه في شارع وكل واحد هياخد الناس في بيته ويعمل قعده عرب ويشربوا الشاي ويبوسوا على راس بعض وتخلص الليله
وطبعاً لانهم ما بيكلموش غير نفسهم فحتى كل القعدات اللي عملوها كانت زي قلتها.
انما الريس بتاعنا معلم كبير حل الموضوع من اساسه. ولم الناس اللي ليها كلمة على اسرائيل ورمي الكورة في ملعب اسرائيل. وطبعاً اسرائيل اتحرجت ولمت نفسها علشان شكلها ما يطلعش وحش وعلشان تقول اهو احنا كويسين مع الكويسين معانا
واللي يغيظك بقه ان الغجر بتوع حماس يقولوا على قمة شرم الشيخ هامشية لا وايه بعد ما اسرائيل وقف الهجوم من ناحيه واحدة. اللي هو منتهى التهزيق لحماس. تطلع تصريحات بتوع حماس تقولك احنا مديين لاسرائيل مهله اسبوع للانسحاب. والله العظيم انا لو من اولمرت لارجع تاني افتش غزة بيت بيت لغايه لما الاقي اللي عامل يطنطط زي فرع لوز واعلمه ان اللي بتخرج من بقه كلمه لازم يبقى قدها
واشوف هايعمل ايه يعني لو اسرائيل مانسحبتش
اما السادة نواب الغربان فولاهم واضح من اول الظط لغايه الجذمة اللي هيردوا بيها على المعارضه. ده حتى الحكومة وكل الناس اللي فيها بما فيهم الريس وابنه بيتبهدلوا في الجرايد وفي المدونات والنكت والشارع وبتقال فيهم كلام زباله. الا ما في حد منهم طلع وقال اللي هيعارض هياخد بالجذمة
Love,
MishMish

Unknown said...

مساء الخير مشمشة
كده برضه؟مينيم تشارج!!يعنى كنتى بتجرى رجلى وبعد كده تقوليلى مينيم تشارج!!عارفة النكتة اللى تقولك المطعم اللى عمل الدخول فيه مجانا والخروج بفلوس!!! طيب ينفع اجى واجيب معايا ترمس شاى ووترمس نسكافية:اشرب ووزع كمان :).مرسى لردك الظريف وربنا يخليلك ساندوا الجميلة اللى بتسمح لك تنامى 29-30 دقيقة :حُنينة البنت دى باين عليها:)

Migo Mishmish said...

norahaty
صباح المورنينج يافندم
ولا يهمك مش هادفعك مينم ولا حاجة
هاتي الترمس وحطي فيه شاي / ببس / سحلب/ ان شالله شربة خضار هو احنا لينا غير الغالين اللي بيشرفونا في البلكونة
بس هو في حاجة اخيرة. توكيل الكوبات والاطباق البلاستيك معانا. يعني مش هندفعك غير تمن الكوبايه او الطبق + 50% خدمة و30% ضرايب و20% معونة شتا
معلش يا حبيبتي الدولار ارتفع زي مانتي عارفه
تحياتي ونورتي
Love,
MishMish

Anonymous said...

عندهم حق لاننا المغفلين اللى كل مره يحاربوا عشان غيرهم يقبض

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق