Monday, January 19, 2009

الميت ...مات

خلاص ياخواننا

الميت مات

ومافيش ميت بيقوم من الاموات

خدوه عالانعاش

وابقوا تفوا على قبرى

ان عاش

لو خد الف صدمه كهربا

المخ واقف

والنبض واقف

باختصار

مافيش حياه

ادولو جلوكوز

اعملولو فرقع لوز

بصو على عنيه المفتوحه

مبحلقه فى اى اتجاه

حتى لو قلتو دا بيبتسم

دى ابتسامته الهبله

مش ابتسامه سعاده

دى صبحت عنده عاده

ابتسامه اللامبالاه

جربو كدا

اضربوه

احرقوه

بالكرباج لسوعوه

ادولو على قفاه

اتحداكو لو نطق نص كلمه

او صرخ

او اشتكى

او حتى قال كلمه اه

حطو فى بقه لقمه

وخدوها تانى

بصو نظره عينيه

بتقول رضا

الحمدلله

برضه مش مصدقيننى؟

طب ارمو عليه زباله

غطوه بالقذارة

هايفرح

مع ان جده كان صاحب حضارة

ومن فات قديمه تاه

خدوه عالكنايس

خدوه عالجوامع

لفوه بيه فى الشوارع

انصبوا الف صوان للعزا

الميت خلاص مات

وناقصه بس

شهاده وفاه

ميجووووووووووووو

8 comments:

Migo Mishmish said...

قعدت امبارح اقول لميجو الناس اليومين دول مبسوطين من الدور المصري في حل مشكله غزة. وروحنا المعنوية عاليه والقصيدة ديه مش هتسمع مع الناس. وقعدت متفأله لغايه مابتدأ برنامج الطبعة الاولى ورجعت تاني لحاله الاكتئاب وقولت لميجو
انزل بالقصيدة يا معلم الناس بتقطع نفسها على انبوبة بوتجاز
I Love Migo
MishMish

Desert cat said...

الناس دلوقتى فى مرحلة الحساب يا ميجو اللى هو بعد الموت يعنى
وتقريبا كدا الكل بقدرة قادر دخل جهنم
دى انبوبة البوتاجاز يا راجل بعشرين جنيه

George USA said...

انا مش هارد عليك علشان ريقى ناشف انتى فاهم طبعا

عمو عصام said...

الميت مات؟؟؟؟؟هو انت مكنتش تعرف انه مات من سنة 52؟؟؟؟

Migo Mishmish said...

عمو عصام
الميت مات مش من 52 بس دا بقاله سبع الاف سنه بيعافر فى الانعاش ومات اكلينيكيا

Anonymous said...

حبيبى ميجو
احنا دلوقتى فى الاخرة لان لما موتنا و اتحاسبنا كل واحد اخد كنحو اعماله اللي عمل فى دنيته صلاح و خير كانت اخرته في اوروبا و امريكا و اللي ااعماله زينا كده مرمى الرميه السوده دى
اخوك المبالغ فيه

Migo Mishmish said...

جورج
مالك ياد فيه ايه هو انا قربتلك؟ماتتكلم بالمفتشر ..

Migo Mishmish said...

اخويا المبالغ فيه
كلامك مظبوط ياكابتن ..بس الواضح اننا عملنا اعمال وحشه اوى فى الحياه السابقه والدليل على كدا شوبير وسعد الصغير وتامر حسنى ومرتضى منصور وعمرو خالد وغيره من الشخصيات الى ربنا بلانا بيها ..دول عاملين زى الشياطين الى فى الجحيم وكل وظيفتهم انهم يعذبونا ليل نهار
اخوك ميجوووووو

There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق