Wednesday, January 13, 2010

لأي حد عنده دم

شوفت قبل كدة بلد معظم اللي فيها معندهومش دم زي هنا

شوفت في حياتك واحدة معندهاش دم زي لبني عسل مذيعة قناة الحياة لما طلعت في برنامج "الحياة اليوم" بعد مذبحة نجع حمادي وقالت بمنتهى البرود والتناحة "...بعض وسائل الاعلام من خارج مصر حاولت تصور الاحداث على انها فتنه طائفية. الحادثة ديه أدت إلى مقتل 6 مسيحين وفرد شرطة مسلم وإصابة 9 مسيحين اخرين أثناء تجمعهم للإحتفال بأعياد الميلاد". ديه مش بس معندهاش دم ! لا ديه البعيدة غبية كمان



خدت بالك لما بيتكلموا عن الناس اللي ماتت بيقولوا عليهم "قتلى"في حين ان في نفس وسائل الاعلام ديه لما حد بيموت من بتوع حماس بيقولوا عليه "شهيد" مع ان معظمهم ارتكبوا جرايم حرب ضد شعبهم وحنودنا على الحدود

شوفت كم الخطاب الديني في برامج التليفزيون المصري والفضائيات والجرايد والمجلات وجزء اساسي منه هو اتهام العقيدة المسيحية بالشرك والتحريف والعنف الديني والتاريخ الدموي. ولما تحصل حاجة زي كدة نفس الناس اللي بتشتم تطلع تتكلم عن تعاليم المسيح وإدارة الخد الآخر وفلسفة محبة الاعداء ويطالبون المسيحين بضبط النفس!!! يعني لما اضربك تخليك راجل كدة وتمسك نفسك وماتعيطش

حتى لما تلاقي حد بيشجب تلاقيه في اخر الشجب راح قايل كلمتين يخليك تبقى هتعض في الارض من الغيظ. زي بتوع الجماعة الاسلامية اللي ايديهم غرقانه في دم المسيحين والمسلمين والسياح دعوا "إلى مواجهه ما سمته بتنامي التطرف داخل الاوساط الفاعلة في الكنيسة الارثوذكسية وفي قطاعات مسيحية شابة وضرورة وقف النشاط التبشري الذي وصفته بالمحموم وما يصاحب ذلك من حملات إساءة إلى الاسلام والرسول الكريم". بالذمة دول عدهم دم؟

مروة الشربيني اتقلت في ألمانيا قامت الدنيا ولسه لغاية دلوقتي ماقعدتش ومظاهرات ومطالبات بقطع العلاقات مع ألمانيا وطلب اعتذار رسمي من الحكومة الألمانية ووفد كبير من نقابه المحامين سافر إلى ألمانيا لمتابعة القضية ولما القاتل كان هياخد مؤبد تفتق ذهن البعض عن اجبار ألمانيا على إعدامة او تسليمه لنا لنعدمه. وفي مصر اهلها اتعاملوا معاملة الابطال وسموا شارع بإسمها في اسكندرية. ولما حاول المتهم يعمل مجنون رفضت المحكمة واتعاقب على اساس انه عارف هو بيعمل ايه. في حين في اي حادثه يتقتل فيها مسيحين بيكون الجاني دايماً مختل عقلياً او ماس كهربائي!!! لا وايه الامن المصري صاحب كليبات التعذيب الشهيرة تفاوض مع الجناة لتسليم انفسهم

العيال اللي ماتت لسه دمها مانشفش وتلاقي ابو الغيط بيطالب واشنطن بالضغط على اسرائيل لرفع الحصار "الجائر" على غزة... طب وبالنسبة للحصار الجائر للأقباط في نجع حمادي بين قوات الامن والبلطجيه اللي حرقوا ودمروا ممتلكات الاقباط ظروفه ايه؟

خش اي موقع بيتكلم عن مذبحة نجع حمادي تلاقي عدد مش قليل من اللي بيعلقوا يقولك "احسن يستاهلوا هما اللي ابتدوا. فين الحكومة من كنايسهم واديرتهم مليانه اسلحة". وسؤالي للبهيم... مابندافعش بالاسلحة ديه عن نفسينا ليه؟

تحديث: ده تعليق واحد بهيم على مقاله "هو في النار" لنجاد البرادعي - تعليقاً على كلام ا. جورجيت قليني عن محافظ قنا

التاله على الله

تعليق: مسلم تاريخ 14/1/2010

من هذا الذي يتأله على الله عز ويدخل النار من يشأ. ان الله لا يغفر ان يشرك به ويغفر ما دون ذلك لمن يشأ. فليس بعد الكفر من ذنب. ان الدين عند الله الاسلام ومن يتبع غير الاسلام ديناً فلن يقبل منه وهو في الاخره من الخاسرين

May our martyrs rest in peace,



MishMish

28 comments:

ELVIRA said...

كان نفسى أقول صباح الخير لكن معلش
ما أنت شايف الظروف
ما علينا
الرد الوحيد هو اذا لم تستحى فافعل ماشئت
امبارح باكلم فى الموضوع دة و قلت اللى ماترضاه لنفسك ماترضاه للناس
و كان الرد عليا لازم نفصل ما بين الدين و الاخلاق شوية
عجبى

Blank-Socrate said...

انا اسف انى مش هعلق على نجع حمادى
لانى وصلت لاخرى و تعبت
انا مبسوط جدا بشخصيتك و مدونتك
تحياتلا ليك انت و مشمش خلتنى متفائل :)
مينا

على باب الله said...

يا عم أنت ما تعلمش أن القبطي مالوش دية و لا حقوق و لا حماية و لا أمان و لا حد يدافع عنه ... و لا أي حاجة خالص

بس هما في النهاية أخوة أشقاء يعني .. بدليل أن أنا بروح أتعالج عند دكتور قبطي .. آه و النعمة

Anonymous said...

عزيزتي مشمش كل سنة وانتي طيبة
بصي مش قادرة الاقي كلام اقولة لان ولا عقل ولا منطق بلاش دين يا ستي يقبل كدة
بس كل ما بتخنق بلاقي نفسي بفتكر الاية اللي بتقول "ف العالم سيكون لكم ضيق ولكن ثقوا انا قد غلبت العالم" واكيد ربنا مش هايسيب ولادة
وبعدين ما تستغربيش اوي لمبدأ الازدواجية ف مصر عشان دة بقى شئ عادي جدا اعمل اللي انا عاوزة بس يا نهار اسود لو اتعمل فيا حاجة تقوم الدنيا ولا تقعدش قيسيها بقى على كل حاجة

تحياتي لميجو ولساندو
ام البنات

Desert cat said...

يا ميجو انا تعبت وقلبى محروق من البهايم دى
وكل واحد اسمعه بيتكلم بلغة الاقباط مستفزين الاقباط يستاهلوا بقوله روح يا شيخ الهى تشوفها فى اعز واحد على قلبك وتجرب حرقة قلب اهاليهم عليهم

Migo Mishmish said...

ELVIRA
يا ستي قولي صباح الخير، مش كفاية نكد. يمكن يكون الخير اوله النهاردة
فصل الدين عن الدولة ديه خطوة المفروض انها بديهيه وتتبع التطور الطبيعي للعقل والاخلاق الإنسانية
بس الناس هنا حاسة ان الدين (أي دين)محتاج حماية اجهزة الدولة المختلفه. لان الناس ببساطة متخيله ان الدين لو انفصل عن الدولة هيضيع الدين. طب إذا كان الدين بهذه الهشاشة وإذا ترك للناس حرية الاختيار سيتركونه. فما الداعي لفرضه على الناس بواسطة السلطة التنفيذية؟
قليل لما تلاقي حد عنده مبادئ. يعني الناس تشد في الشغل لو في تفتيش.تصلي لو في واحد او اتنين بينتقدهم علشان ما بيصلوش. يهتموا بدعوة الاخر ليس للخوف على هذه النفس الانسانية بل رغبه في الزيادة العددية. المواطن يببقى متحضر لو حس ان اللي قدامة عربجي
الضمير انقرض منذ زمن بعيدددددددددددددد
Love,
MishMish

Migo Mishmish said...

Blank - Socarte
طب الحمدلله انك اتبسط
بس عارف انا حاسة ان سكوتنا هو اللي هيودينا في داهية
صعب جداً انك تلاقي اغلبية بتهتم بشعور الاقليات
لسبب واحد بسيط لو مشكلتك مش واجعه غيرك هتفضل طول عمرها مشكتلك
لكن لما نقول ايه اللي بنحسه. لما نصور للناس ديه قد ايه احنا حاسين اننا مش عارفين الدور الجاي على مين. يمكن يصادف ان اللي يقرا يكون حد عنده دم والحال يتعدل
Love,
MishMish

Migo Mishmish said...

على باب الله
مين اللي قال يا عم ان الاقباط مالهومش ديه
داحنا جدعان قوي وبلطجية وخطر على الامن العام. آمال!!! ده من خوفهم مننا مخلين كل ما يخصنا في ايد أمن الدولة
يعني 10% من تعداد البلد بتتعامل معاهم القوات الخاصة
زينا زي المسجلين خطر والبلطجيه والارهابين ومروجي المخدرات والقوادين وبتوع الدعارة لا مؤاخذه والجواسيس والمرتشين و...و
يا ابني بيخافوا مننا
يا راجل ده المحافظ نفسه قال ان الاقباط هما السبب في اللي بيحصلهم
وبعدين ده مننا يعني عارف الفوله
آه والنعمة
Love,
MishMish

Migo Mishmish said...

العزيزة ام البنات
انا عارفه كويس انتي بتتكلمي عن ايه. وعارفه ان المسيح ماوعدناش بممالك ارضية ولا قالنا هتبقوا اعلى من حد ولا احسن من حد
بالعكس ده قال ان في صليب مستني كل واحد بس برضه وعدنا ان هيشيل الصليب معانا
انا فعلاً مش مضايقه من الاسلام كدين. لان زي ما بولس قال وسيدنا البابا اقتبس منه "ان حربنا ليس مع لحم ودم حربنا مع الشيطان" . اما المسيح نفسه قتلوه. احنا مفيش حد على وجهه الارض ماضطهدناش.
اللي مضايقني ان الناس ديه عندها قدر من الغل والسواد والحقد يساوي نفس القدر من الجبن اللي عندهم برضه
يعني تخيلي انتي رايحه عزاء واحد داسته عربية وانتي داخله على امه تقولي مين يقبل حاجة زي كدة والله حرام البقيه في حياتكم
بس هو برضه كان ابن جزمة ايه اللي يخليه يعدي في شارع فيه عربيات. وهو لو كان في عمره بقيه كان ربنا خده بلا بقية في حياتكم بلا نيله ويلا يلعن تيب ابوكوا غروا من هنا
ما الناس ديه تقول ايوه احنا بنقتلكم علشان احنا دينا كدة (زي ما قال الراجل بتاع ملكات اليمين مع بسمة وهبي - احنا دينا كدة) وساعتها مش هيبقى في مشكله بس الامور تبقى واضحة. الاسلام لا يحتمل الاخر وخلصنا. والكل يبعد عن المسلمين علشان ما يبقاش في مشاكل
ياما الكل يتحد ويقول لا ده مش من الدين او مش من الانسانية واي واحد يقول عكس كدة باسم الاسم يتحاسب فوراً
مش الاسلام سمح. وبعدين قاتلوا اهل الكتاب. وبعدين البلد ترسل دعاه لبلاد عدد المسلمين فيها مش كتير او مفهاش وطبعاً طالعين واكلين شاربين نايمين قايمين على حساب صاحب المحل اللي 75% من فلوسه من عندنا على حد قول وزيرة القوى العاملة وبعدين يقولك في حملات تنصير محمومة. الله! هو حلال ليكم حرام عالبني ادمين كلهم
وانتي عارفه الباقي طبعاً
مفيش حد حتى عنده دم ويتحمل مسئوليه افعاله
Love,
MishMish

Migo Mishmish said...

دانا يا قطة مش ميجو
اتسخبيت من ساندو وقعدت اكتب في البوست من الساعه واحد بالليل خلصته الساعة 3 الصبح وجيت الشغل متاخره.
:-)
ما هو اللي بتكلم بلسان الاقباط بيبقى برضه عضو من اعضاء العصابة . يعني محافظ قنا تقريباً ناوي يورثها لأبنه
القسس اللي بيجبوهم يبسوا الشيوخ دول. انتي فاكره انهم بجد. دول بيجبوهم من عند الريجيسير .والواحد منهم مرة يلبس شيخ ومرة يلبس قسيس

هما بس مش عارفين اننا مبقناش بناكل من الكلام ده. وبعدين ده بيقطع علينا سيل الاعلانات والمسلسات
المفروض بقه علشان يوفروا وقت وفلوس يقولوا في الموجز.
افاد مراسلنا في اي حته بعيدة عن مكان الحادثه انه شاهد شيخ وقسيس يتبادولون القبل ويشربون من دماء الضحايا ويقفون فوق اطلال الوطن
Love,
MishMish

صفا سارة said...

معاكى حق فى كل كلمة قولتيها يا مشمش عالم متخلفة ومش معقوله يكون حد فيهم انسان بجد
بجد فعلا شهداء نجع حمادى والوضع كله مؤلم بدرجة بشعة
المفروض نتعامل على اننا انسان مش فروق دينية وغباء لكن مين يسمع كل واحد بيعمل حاجة ويحرمها على غيرة


ربنا مع اهالى نجع حمادى ويصبرهم

كافى خيرى شرى said...

مش لاقى كلام اقوله غير ان اللى اختشوماتو لكن ربنا مش هيسيب كنيسته

نونا مجدى said...

ياجراح المسيح اجرحينا بحربة الحب الالهى

Tears said...

مهما تقولوا...طول ما النظام الفاسد ده مستمر ح نفضل فى الموال ده

Desert cat said...

معلشى يا مشموشة العتب على النظر بجد من الوجع اللى فى قلبى من يوم الحادث الغريب ده وانا مش طايقه حد فى البلد دى

Migo Mishmish said...

صفا سارة
الانسان ربنا خلقه يعرف الخير والشر بالفطرة. الناس ديه بقه الفترة بتاعتها اتفيرست.
دلوقتي مفيش صح وغلط، في فتوى تجيز وفتوي تمنع
واحسن دليل على كدة فتوى "ان فك شفرات المحطات علشان الناس تتفرج على الكورة مش حرام" يعني حتى المفهوم العام للشرف والضمير اتمحى بفتوى علشان ماتش كورة
ياما دول مش بني ادمين. دول كائنات طفيليه قتلت روح وعقل الانسان جواهم وسكنت بداله
Love,
MishMish

نونا مجدى said...

تعليقات قطة الصحراء تدل على ان البلد فيها ناس عندها دم وعاقلين انا شخصيا حبيتها وفرحت لما عرفت من عمو عصام انها مسلمه بس الحق حق عندها ربنا يكتر من امثالهاوشكرا لكل الاخوه المسلمين اللى قدمولنا التعازى

Anonymous said...

نستاهل كل اللى يجرى لنا احنا هونا على نفسنا .اولادنا ودمنا بقى رخيص قوى فى عينينا ورخيص عند اساقفتنا بقينا نخاف ونجرى من كل ضربه لو كنا وقفنا من البدايه مكنش هيقدر حد يلمسنا لو كان مات مننا 100 ولا الف ولا 5 الاف مكنتش هتفرق ما احنا بنموت كل يوم وبتتحرق كنايسنا ولسه طول ما احنا بنطلع ننزل دمعتين فى كل حادثه وبعدها نجرى نبوس اللحى واتفضت.

ودفاعنا عن نفسنا مش نقض لوصيه المسيح بالعكس المسيح دافع عن نفسه ولما العبد ضربه قاله ضربتنى ليه صحيح رجائنا فى ربنا بس ربنا مش عايزنا نكون ضعفاء او مسوخ

تحياتى
لورا

Migo Mishmish said...

كافي خيره شره
بص بعيد عن اي حاجة احنا كلنا متاكدين ان ربنا مش هيسيب كنيسته وعارفين كويس ان "لولا ان الرب كان معنا عند سخط غضبهم علينا لأبتلعونا ونحن احيا". انا بس مضايقني جداً جبن الناس ديه. انت مش متخيل انا قرفانه قد ايه من اللي بيقتلوا القتيل وبيمشوا في جنازته
يعني عارف انت لما بيتجي بندوزرات الحي ولا المحافظة تهد البيوت على اللي فيها في حماية الامن تلاقي الناس عاملين زي الفراخ ولا حد بيفتح بقه
واللي بتكلم بيتشد
لكن تعالي نفس الفراخ دول بيبقوا ديابه لو عرفوان ان في كنيسة هتتبني او هتتفتح جنبهم
لا وايه ساعات يقولك الامن لازم ياخد رأي الناس اللي في المنطقة
وده من امتى
وديه الحاله الوحيدة اللي بتتلاحم فيها قوي الفراخ المتحوله مع الامن
Love,
MishMish

Migo Mishmish said...

نونا مجدي
بعد تعليقك الاولاني ما ينفعش حد يقول حاجة
اما بخصوص القطة في ديه من القليلين اللي عندهم دم وفي زيها كتير بس المشكله ان الضغط على المسلمين المعتدلين بيبقى اشد من الضغط علينا احنا
لان البلد دلوقتي بقت يا اهلاوي يا زملكاوي ما ينفعش تشجع اللعبه الحلوة
Love,
MishMish

Migo Mishmish said...

Tears
والله يا اخت دموع الوضع اللي احنا فيه ده تضافرت فيه قوى فساد الحكومة وقوى فساد الطبيعه الانسانيه
انا لما كتبت البوست مكنش هدفي مهاجمة دين معين او اظهار اتباع دين تاني على انهم ضحايا
انا هدفي كان توضيح حالة العفن اللي صابت قلب وعقل الناس في مصر. الناس في مصر كلها بقت عامله زي كمبيوترات الويندوز بتاعها ضرب
محدش عارف يتصرف بقى عندهم سكته دماغيه. البوصله اللي ربنا حطها جوه الانسان علشان يعرف بيها الصح من الغلط باظت والتعبير الجديد دلوقتي ده حلال وده حرام
وطبعاً لان الموضوع مش حاسم واللي انا ممكن اشوفه حلال غيري يشوفه حرام
فبقى الحلال دلوقتي بحسب فلان
يعني السرقة حلال في الضرورة لو هتمشي بحسب فتوى الشيخ فلان انما الموضوع ده مش مستحب عند الشيخ علان
وهلما جرجر
والمصريون تايهن في النص ومع ذلك تجمعهم الكراهيه
Love,
MishMish

Migo Mishmish said...

لورا
ايدي على كتفك نفسي يبقالنا كمواطنين عموماً طريقه ناخد بيها حقنا. نفسي نثبت على موقف
بس إزاي نعمل كدة بطريقه تحافظ على مصر.
بصي اصل اللي بيعمل كدة او اللي شجع عليه او اللي حتى قال احسن في سره
مصر ماتفرقش معاه ببصله. اكبر من الصحرا واخلاقها اللي هما مشبعين بيها
لو في اي حد عنده اقتراح انا عندي استعداد للمشاركة فوراً
Love,
MishMish

Anonymous said...

طبعا كل بنحب بلدنا وبنعشقها رغم اننا شايفين فيها الظلم والاهانه والقتل بس هل تفتكرى يا مشمش بعد مااهلها باعوا دماغهم للى بيدفع بترودلار اكتر هيفهموا حاجه

اتبرمجوا خلاص على ان اللى يدافع مننا عن حقه يبقى عميل وخاين

مع كامل احترامى للكهنه والاساقفه والبابا لكن هما دورهم دينى وارشاد روحى وقياده دينيه داخل الكنايس وملهمش يتكلموا باسمنا ولا يتنازلوا عن حقوقنا كمواطنين مصريين ومش معنى كده اننا بنقول لهم ملكوش صوت بالعكس يا يدافعوا عن حقوقنا صح يا اما يسيبونا احنا نتكلم وندافع

وكمان جلسات الصلح العرفى لازم تترفض نهائى لانها السبب الاساسى فى تضييع حقنا

لازم صوتنا يوصل لجميع منظمات حقوق الانسان فى العالم كله ودى مش خيانه بالعكس ده الصح لان رئيسنا مفكرش حتى يعزينا والامن بيقبض على اى مسيحى برئ علشان يضغط بالناس دى فى جلسات الصلح

يا مشمش انا عن نفسى اللى بيبصلى باحتقار لانى مسيحيه ببصله باحتقار اكتر لغايه لما ينزل وشه فى الارض

ولو شخص فكر يهينى علشان ديانتى بحط صابعى فى عينه ومبسيبش حقى وبربى اولادى على كده انى مكونش ضعيفه ولا اسمح لشخص يستضعفنى ولا يهينى لانى مختلفه فى الديانه عنه
وصدقينى اموت بكرامتى افضل 1000 مره ما اعيش وانا مش قادره ارفع عينيا فى المرايه اشوف بيها نفسى اللى بعتها

بس للاسف احنا اتبعنا والاسقف او الكاهن اللى بيحاول يقف للظلم بيبعدوه عن اى وسيله اعلام وعن انه يتكلم

تحياتى
لورا

rony said...

كتير من اللى فى الاعلام معندوش دم
وحاسين اننا مكبرين الموضوع
فى حين انه فى ساعة مقتل الطفل محمد الدره
انقلبت الدنيا رأسا على عقب
وجعل الكل فى حالة هياج ودعوة الشباب للجهاد من اجل طفل
لكن نقول ايه؟؟؟؟
مالناش غيرك يا رب
انت تاخد حق كنيستك
دم القبطى رخيص فى البلد دى
ربنا مش هيسيب حقه
ويصبر اسر الشهداء
ويتصرف فى اللى عمل كده

مالناش غيرك يا رب

Migo Mishmish said...

لورا
انا معاكي قلباً وقالباً ومش كدة وبس انا بقود حمله مقاطعة لكل المحلات والاماكن التي لا يتم احترامنا فيها
البياع اللي بيقلب وشه
ولا بتاع العطور اللي بيحط حديث من تعطرت فهي زنانيه
ومحلات الاطعمة السريعه اللي بتفخر ان مفيش حد مسيحي بيشتغل فيها
لان البهوات دول فاكرين بغباؤهم انهم بيتصرفوا صح
هما مش فاهمين ان كل واحد فيهم عنده محل واحد اما الزبون فعنده 100 محل
اما اللي بيبصوا ويتلمزوا ويتغمزوا دول اقل من ان الواحد ينزل لمستواهم. وده بيخش في اطار انعدام الدم والاخلاق
ومفيش مانع لو حد منهم زود يتهزء
اما تدويل القضيه انا مش ضدده بالعكس لولا اللي بيحصل ده كان زمانا بقينا كلنا شهداء. بس بجد انا خايفه على البلد قوي
اي تغيير يجي من بره مش هيبقى بقوة اللي جوه
احنا برضه بنخاف وباعدين نفسنا
كام حد اشتكى واصر على ان اللي بيحصله نتيجه تعصب
كام واحد دافع عن قضيته لغايه الاخر
باسلوب مسيحي مهذب
مش بالافتراء ولعب دور الضحيه
اتمنى تكون وجهه نظري وضحت
Love,
MishMish

Migo Mishmish said...

Rony
اهلاً بيكي
فعلاً احنا مستنين ربنا يفتقد مصر
مش علشان ينتقم
لا
علشان يرفع عنها كل شر وحقد
ويمسح كل دمعة من عيون ولادة
امين تعالى يا رب
Love,
MishMish

Anonymous said...

رايك صح تماما يا مشمش لان اى تدخل خارجى فى مصر هيكون على حساب الجميع ووقتها هنبقى مجرد ذريعه لاحراق مصر وده طبعا كلنا نرفضه لاننا بجد بنحب بلدنا ونفسنا ترجع بلد جميله وامنه للجميع من تانى

وحملتك لمقاطعه المحلات والمطاعم التى لا يتم احترامنا فيها رائعه بمعنى الكلمه احييكى عليها وبالتاكيد منضمه لها

لورا

Migo Mishmish said...

عدي يا لورا ورايا
التابعي الدمياطي
مؤمن
الدمياطي سوبر ماركت
ارزاق
اولاد رجب
محلات المنظفات اللي بيشطبوا على وش اي بنت على المنتج (زي مزيل العرق ريكسونا) بقلم جاف او فلوماستر
ومحلات الدهب اللي كلي اما تخشي المحل في اي وقت يقولك لا معلش اصلهم خلصوا "مش عايز يقول انه ما بيشتغلش في الحاجات ديه"
المهم بقه
ان كنيستنا كلها كانوا بيشتروا من التابعي سندوتشات مش اقل من 500 جنيه كل يوم جمعة. وتروحي ساعه الصلاة تلاقيهم قافلين المحل وكلهم واقفين برة لا بيصلوا ولا حاجة ويقولك البيع بعد الصلاة
روحت لكل واحد مسئول واقنعتهم انهم ياخدوا من محل تاني بنفس الجودة. وعلى كدة صاحبة مسلم بس محترم
اولاد رجب طبعاً معروف
وبتاع المنظفات المخبول اللي بيشطب على وشوش البنات مكنتش بشتري منه في المرة الواحد باقل من 100 جنيه وساعات طبعاً الموضوع بيزيد عن كدة بكتير
بجد الناس ديه لما تتربا هتتعلم تحترم نفسها
مفيش حد دلوقتي بيتعلم الادب غير لما تعضيه في اكل عيشه
Love,
MishMish

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق