Tuesday, March 31, 2009

صاحب رأس المال

مقالة بلال فضل الجمعه اللي فاتت هي اللي خلتني اكتب في الموضوع ده
بيتهيألي اكيد عدد كبير مننا اتعرض لمواقف زي ديه. مثلاً
محل ارزاق الموجود في المعادي جراند مول - المكتوب عنه في إيلاف تحت اسم مطعم الارهاب المصري - المحل ده محل وجبات سريعه ومايفرقش اي حاجة عن اي حته تانيه غير انه لما تيجي ساعه الصلاة مش مهم انت وراك ايه ولا واقف من امتى. كل واحد يرمي اللي في إيده ويبطلوا يأخدوا اوردرات ويشيلوا التربيزات بالناس اللي عليها ويقفلوا البيبان لا حد يطلع ولا حد يخش ويوطوا النور ويفرشوا الحصر ويصلوا كلهم. الموضوع ده بياخد اد ايه يا عم. يأخد نص ساعه نقل وتتضليم وفرش حصر وصلاة ولم حصر ورجوع تاني لأماكنهم
لا ومش كفايه كدة لا دانت لو طلبت بيبسي او كوكا في الاورد تلاقي الراجل بصلك بصه تحسسك بجرمك وكفرك البين ويقولك بصوت جهوري حجنوري مفيش غير شوبس او مكه كولا
فرعهم الجديد اللي في مصر حلوان بقه مختلف شوية. كنت ماشية ناحيته انا وامي واصرت انها تعزمني على الفطار هناك. قولتلها كوك دور وبتزا بلس مفيش بينا وبينهم خطوتين والتاكسي على حسابي
امي: ما خلاص ماحنا جنبه
انا: انا عندي مبدأ ومبحبش اتعامل مع العالم ديه
امي: بلا مبدأ بلا نيله. وبعدين مفيش دلوقتي وقت صلاة
انا: يعني انتي عارفه هي الصلاة امتي
امي: يعني انتي طارشه. انتي سامعه صوت ادان
انا: لا
امي: يبقى مفيش صلاة
انا: براحتك
ودخلنا لاقيناهم مشغلين قناه المجد ومفيش حد يأخد اوردرات ولما سألت قالوا علشان الصلاة. وبعدين رجعت الترابيزة
امي: إيه؟
انا: بعد الصلاة
أمي: صلاة ايه؟
انا: أساليهم
شوية والادان ادن قولنا يا فرج الله. وبعدين لاقيتهم واقفين مكانهم مفرشوش زي فرع المول. قولت ياد النيله لسه هنستنى لما يفرشوا
انا: ماتيلا نمشي ده سكتهم لسه طويله. ده احتمال يبقى غدا مش فطار
امي: خلاص قربوا يخلصوا
انا: هما لسه ابتدوا
امي: انتي زنانه قوي
انا: طيب
بعد نص الساعه من كلام العمال مع بعض وخروج اتنين تلاته من المحل ورجوعهم تاني. لاقيت الراجل ابتدى ياخد اوردرات. أمال الصلاة فين؟ الا ما حد ساب مكانه. وطول الوقت عمالين يرغوا
انا: يعني معلمين اللي جابونا الادب ومحدش منهم حتى راح غسل وشة
وموت من الضحك وقولت لأمي احسن. قاتلي خلاص مش هانجي هنا تاني. وبعدين بعد ماجه الاوردر قالتي ده حتى اكلهم زي الزفت وفضلت تبرطم طول القعدة. قولتلها ما كان من الاول
وده نفس اللي بيعلموه التابعي شارع 9 ساعه صلاة الجمعه يقفلوا المحل ويقفوا قدامة لا بيصلوا ولا هما فاتحينه
موقف تاني حصل مع واحد قريبي. كان داخل سوبر ماركت عادي فاتح ساعه الصلاة وفيه واحدة محجبه بتشتري حاجات. قام قريبي ده منزل اللي هو عاوزة -حاجات قيمتها اكتر من 100 جنيه - وجه يحاسب
البياع: بعد الصلاة يا بيه
قريبي: هو انت مش شايفني عمال اشيل واحط من الصبح ماقولتش كدة من الاول ليه؟
البياع: والله ديه تعلميات صاحب المحل
قريبي: طب والست اللي كانت بتشتري حاجات من شوية
البياع: ديه كانت بتشتري شيبسي وحاجات بجنيه ولا اتنين
قريبي: طب هو انت مشكلتك في قيمه الحاجات اللي بتتاع يعني الجنيه مش حرام والـ 100 جنيه هي اللي حرام. ولا في مبدأ الببيع نفسه. ما هو جنيه زي ميه!!!!!!!!!؟
البياع: والله ديه تعليمات صاحب المحل يا بيه
قريبي: طب قول لصاحب المحل اني انا ومراتي كنا بناخد حاجتنا كلها من عندك وبطلنا خلاص
البياع: يا بيه ما يصحش. طب قول انت عايز ايه وانا اوصلك الحاجة لغايه العربية
قريبي سابه بيرغي ومشي وراح اشترى من محل تاني
حادثه تانيه حصلت معايا. كنت نازلة اشتري هديه: صليب دهب. دخلت محل صاحبه مسلم ومش حاطط صلبان في الفاترينه فقولت اكيد مش عنده. بس اخويا - كان معايا ساعتها - قال لا ده عنده حاجات حلوة جوة. دخلت الراجل كان في منتهى الذوق واعتذر لأخويا وقاله انت عارف انك زبون المحل لكن الصلبان كلها خلصت في الكريسماس وراس السنه والعيد فاضل عليه يومين زي مانت عارف. بس انا جيالي تشكيله كويسة كمان يومين. مكنش عندي وقت اجي كمان يومين فقولت لآخويا لا اكيد هنلاقي
دخلنا عند واحد مسيحي عندك صلبان يا عم قال اه. قولناله طب عايزين نتفرج. قال من عيني بس عن اذنكم ده وقت غدا، اتفضلوا معانا، 5 دقايق واكون خلصت. قولت يمكن جايب علبه كشري ولا سندوتش اي حاجة
قلت لاخويا خلينا قاعدين الخمس دقايق. لاقيناه طلع شنط شنط شنط اشي شورية سي فود وجمبري ورز بالسمك وايه بوفيه مفتوح يا معلم
طبعاً لطع اللي جابونا بتاع 15 دقيقه فوق الـ 5 دقايق الاصليين وبعد ما خلص وشرب الشاي. طلع الصلبان فالحاجة اللي عنده مكنتش قد كدة. وقعد يقول انا بيبع الصلبان خدمة!!!!!!!!!!!!!؟ ومبكسبش فيها. اصل انت لما تخش عند اي محل هنا وتسأله تلاقيه بيقولك انا مبشتغلش في الحاجات ديه. ومضيقين عليا وبيحاربوني
طبعاً انا فصلت منه من ساعه ما قال انه بيبيع الصلبان خدمة. اصل خدم ديه معناها عندنا انه بيعملها مجاناً. وقولتله هو مفيش حاجات ذوقها احسن من كدة؟ قالي لا الحاجة معظمها خلصت في الكريسماس لكن في حاجات كويسة جايه كمان يومين
قولتله ولا يومين ولا تلاته هات الصليب ده. قولت في عقل بالي الصليب في الاول وفي الاخر دهب لو عجب الناس يبقى كويس معجبهمش يرحوا يبعوه ولا يغيروه
خرجت عنده وانا مضايقه من اللي بيحصل. اخش محل تلاقي اللي فيه مربي دقنه لغايه نص بطنه اقوله صباح الخير يا ميردش يا يقول وعليكم السلام. ده غير طبعاً اللطعه بتاعه الصلاة ده موضوع تاني كبير
اخش عند واحد مسيحي يكون دمه تقيل عامل زي الطحينه وكل اما اسال عن حاجة مالاقيهاش والحاجة عنده تبقى اغلى من برة ربع جنيه ولا نص جنيه.وطبعاً لما يشوف الصليب يقعد يشتكيلي همه من ان محدش بيشتري منه وان المحلات اللي حواليه عايزه يقفل
هي الناس ديه مبتفهمش. صاحب راس المال الفعلي هو اللي بيشتري مش صاحب المحل. انا لو عايزة باكو شاي هشتريه ان مكنش من فلان يبقى من علان. انما الفكرة فلوسي راحت لمين
مش المفروض اني اشتري من محل صاحبه بيعاملني باستحقار ولا يلوي وشه في وشي حتى لو اللي عنده مش موجود في اي حته تانيه.
ولا المفروض لاني مسيحيه اشتري من محل مسيحي معظم الحاجة اللي فيه اسعارها زايده علشان هو مضطهد. في حين ان الحقيقه انه جشع.
انا مقدرش اعمل حمله شعبيه لمقاطعه الهبل ومحلات القتنه الطائفيه. انا عن نفسي مبشتريش من اي محل برفض يشغل ناس بسبب انتمائهم الديني اياً كان مش بسبب عدم كفائتهم.
اللي مش عايز يبع ساعه الصلاة يقفل مش يبقى فاتح لكن مش بيبيع. او ما يفتحش حاجة خدميه. محل اكل يعني الناس داخله عايزة تأكل دلوقتي مش بعد الصلاة
اللي حاسس انه مضطهد - لو كان صحيح - يحاول يجذب الزبون بأي طريقه. انا عن نفسي عندي استعداد امشي 100 متر لمحل بيبع الحاجة ارخص من المحل اللي تحت بيتنا لانها بتجمل ده علم اسمه التسويق مش يقعد يندب
بلاش ندي فرصه للعالم ديه انها تزيد. مش من مصلحتنا ان المسيحين يشغلوا مسيحين والمسلمين يشغلوا مسلمين
علشان انا قلبي حاسس باللي هايحصل: الغرض الاساسي من البوست ده محاربه سلوكيات خاطئة ستكنا عليها بدافع الخوف او الاسحتسان الغير المعلن او العيب لغايه لما الموضوع خرج من ايدنا
لا اقصد الإساءة لأي دين على حساب اي دين واروجو مرعاه ذلك في التعليقات
Love,
MishMish

40 comments:

نيران said...

أول كومنت :) يا حالولي

و مش هارغي زي المرة اللي فاتت..

انا طبعا مش المندوبة السامية للمسلمين و لا هاتكلم دفاعا عنهم
انا ضد ان الدين يتم استغلاله بالصورة دي و نطبق منه قشور بس بهدف الاستفادة
الصلاة اكيد مقدسة في كل الاديان و الدين الاسلامي حدد لها وقت بس مش هاحبس الناس في المحل عشان اصلي
ببساطة ممكن اكتب ان اوقات العمل من كذا لكذا ووقت الصلاة يكون ضمن فترة البريك
او اقسم الناس اللي عندي شفتات
او اخصص مكان دائم للصلاة لو في حد كمان عايز يصلي يروح يصلي
بصراحة انا ما دخلتش المحلات اللي بتقولي عليها دي
بس متخيلة الصورة

ودخلت محل مسيحي مرة و غلى عليا علشان لابسة حجاب مع ان صاحبتي المسيحية اشترت من المحل ارخص مني بحوالي خمسة جنيه

الامور دي امور تتعلق بالسلوكيات الشخصية ولا علاقة لها بالدين

كل الاديان بتدعو الى التسامح وحسن التعامل
مش نكشر عشان نكون مسلمين ولا نغلس على المسلمين عشان نكون مسيحيين

خلاصة القول بدل الرغي دا كله

انا اؤيد هذا البوست :)

Bastawisi said...

انا كنت بعاني كده زيك من المسلمين خصوصا لما اخش اقول صباح او مساء الخير فيعرفوا على طول ان انا مسيحي
فقررت ماشتريش غير من مسيحيين ده حتى ياعيني غلابة و بقوا فقرا من المقاطعة المسلمة عليهم

Bastawisi said...

اه نسيت اقول ان اقحامك لجزء المحل المسيحي فى البلوج محاولة مضحكة منك انك تبيني انك غير منحازة لده او ده
باين اوي يعني ان غلطة المسيحي مش فى نفس حجم ارهاب المسلم

MahaRani said...

أنا أويد هذا البوست و بشدة و أنا مسلمة على فكرة بتضايق جداً من أمثال الناس اللى مربية دقنها مترين
(قال يعنى ده ختم الإيمان
و على فكرة الناس دى مش بس بتعامل المسيحيين وحش بل بتعامل المسلمين برضه و حش لأنه شايف إنه بدقنه دى أو بنقابها أو خمارها أو حجابها لو ست إنه\إنها أحسن منى إسلاماً
تشغيلهم لقناة المجد و العسافى 24 ساعة
دى حاجة تغيظ فعلاً ده حتى الرسول (ص) قال لا تجعلوا بيوتكم مقابر
و سيدنا على قال روحوا عن القلوب فهى تمل كما تمل الأبدان
فمالهاش لازمة يعنى

يا سيدتى الفاضلة الناس دى واخدة الدين منظر بس و عشان مظلمش الدين أؤكدلك إن العته اللى هما فيه ده لا يمت للإسلام لا شكلاً و لا موضوعاً
الإسلام الصحيح مش اللى منتشر دلوقتى ده دين سمح عقلانى يتقبل الأخر و عماده المعاملة الحسنة و مراعاة الإنسانية
و الأخلاق الرفيعة

و أنا بجد نفسى أعتذر لك عن أى موقف حصل من الناس دى فعلاً أنا مكسوفة

وضع مؤسف للغاية لبلد كانت
كوزموبوليتان و أم الدنيا بجد و عنوانها التسامح و إن الدين لله و الوطن للجميع

Michael said...

Nice post!..I think we shouldn't buy or deal with who look down at us or treat us unfair or even just make lies so you will buy from them..no matter what is their background....I remember once I went to a hospital during Ramadan(when I was in egypt) with a friend, he was a muslim..anyway..his mother was there to do some blood tests and stuff like that...The doctor told him to wait for 30 mins since it was around (Ftaar) time..and my friend told him that in Islam "El 3amal 3ebada" so doing your job is part of the religion...I guess..(I'm not sure if this is Hadith or from Quraan..or just this friend)..

Migo Mishmish said...

يا نيرو يا نيرو
ولا يهمك يا حبيبتي ارغي براحتك هو احنا في محاضرة. داحنا في البلكونة

عندك حق طبعاً في موضوع ومواعيد الصلاة والشفتات ديه. على الاقل يبقى صاحب المحل واضح مش ياخد الناس رهاين

عارفه مرة كنت رايحه مشوار تبع الشغل بجيب ورق للشركة وبعدين اتصلت بالست اللي انا رايحالها وحددت معاها معاد وقالتلي انها هتستناني. روحت في معادي مظبوط. سألت عليها واحدة زميلتها قالتلي معلش اصلها راحت تصلي. قولت ماشي وبعدين الموضوع زاد شوية فقولت لزميلتها هي بقالها قد ايه ماصلتش؟ قالتلي يعني ايه؟ قولتلها يعني انا قاعدة بقالي ساعه إلا ربع وهي لسه مخلصتش صلاة. اجيلها يوم تاني ولا محتمل انها تخلص قريب
راحت مشغله المايك وندت عليها وطبعاً صاحبتنا كانت مخلصه صلاه من زمان بس مش عارفه عدت على مين اللي كانت في المكتب اللي جنبها الظاهر انها كانت وحشاها قوي فقعدوا يحكوا على الحاجات اللي حصلت من اول ما جم المكتب الصبح
الناس اللي زي الست ديه فعلاً بتسيء لكل حاجة. بتسيء ليدينها وبتسيء لشركتها وبتسيء لنفسها
اما موضوع المحل ده فالاحسن انك ماتشتريش منه طالما هو بميت ذمة كدة. وبعدين طالما قدر ينزل للي كانت معاكي 5 جنيه من الفلوس يبقى حرامي وسراقكم انتوا الاتنين. اصله مش فاتح المحل علشان يبع للمسيحين ببلاش ما هو عايز يأكل عيش برضه ده غير الضرايب والايجار والكهربة والميه و...و...ده حرامي. وعلى فكرة اللي بيعمل كدة كمان مستشفي اسمها مستشفى الفتح الاسلامي بياخدوا من المسيحين اغلى من المسلمين سواء ان كان في الكشف او التحاليل او الاشاعات
لما ابويا الله يرحمه قالي انهم عملوامعاه كدة قولتله طب ارمي الروشتات والتحاليل في الزباله. اش عرفك ان اللي عمل معاك كدة مكتبلكش علاج غلط

اللي يضايق في الحاجات ديه يا نيرو ان اللي بيعمل كدة فاكر انه بيعمل حاجة كويسة والموضوع ده بيزيد لاننا بتعاملنا مع الناس دول بنشجعهم يستمروا
Love,
MishMish

Migo Mishmish said...

Bastawisi
ازيك يا نجم
لا يا عم الموضوع معايا مش واصل لغايه المعناه ولا حاجة. هو انا هاروح لحد يقل ادبه عليا بفلوسي؟ بتاع ايه يعني
ده في محلات مبخشهاش علشان مشغله التسجيل بصوت عالي - حتى لو كان اللي شغال ده سي كاظم ذات نفسه - لان ده معناه اني موافقه ضمناً على اللي بيعمله
عارف اختي - مهندسه كهربا - هي المسسيحه الوحيدة في الشركة اللي هي شغاله فيها. وبعدين صاحب الشركة حكالها انه كان قاعد مرة مع مجموعة ناس من اللي بتعامل معاهم فواحد منهم قاله انا مش عارف انت معينها عندك إزاي فصاحب الشركة قاله هي شغلها وحش قاله لا بس ديه نصرانيه قاله وطيب ده مضايقك في ايه قاله دانا لو مش هلاقي غير النصارى اللي اشغلهم هاقفل الشركة. فصاحب الشركة قاله لا خالص طالما شايفه شغلها وعندها ضمير خلاص
بعدها بفترة مديرها كان رايح شركة تانيه يعرض عليهم انهم يشتغلوا سوا. فالمسئول عن الموضوع ده مسيحي فقاله على فكرة انا متحيز للمسيحين ومش هادي شغل غير للمسيحين. فقام صاحب الشركة بعتله اختي. وعملت العقد مع الرجل وكان مبسوط منها قوي وقالها ابعتلي صاحب الشركة انا عايز اشوفه تاني
ايه رايك في الاتنين. الاتنين بيعطلوا الشغل علشان اسباب في دماغهم. الاتنين ممكن لما تروح انت عندهم ما تشتغلش مش علشان انت مش كفء للوظيفه لا ده علشان انت مش جاي على هواهم

وبعدين انا مبقحمش جزء المحل المسيحي علشان ابين اني انا مش متحيزة. كلامك ده فكرني بالواد اللي مش موافق. قال عليا في مدونته اني بخش بمجهول واشتم فيه. في حين اني كنت عامله بوست كامل تريقه عليه.
افرض اني متحيزة ايه اللي هيخليني ماكتبش بتحيز يعني. افرض اني صحيت الصبح قررت اكتب بوست اشتم فيه المسلمين كلهم واقولهم ياولود كذا وياولود كذا. انا حره في البلوج بتاعي
البوست ده بيتكلم عن سلوكيات غلط لناس بتتصرف غلط. ومتحملوش اكتر من طاقته
Love,
MishMish

Bastawisi said...

كبداية احب اعتذر عن اسلوبي فى الرد التاني

ثانيا انا مش مرتاح للراجل الحيوان ده اللى مشغل اختك لوحدها وسط مسلمين تلاقيه عاوزها تسلم ولا تحب واحد مسلم بصراحة انا اثق فى اسرائيل وولا اثق فى المسلمين

Migo Mishmish said...

MahaRani
سيبك انتي. اول مرة تيجي عندنا شاي بقه ولا نسكافيه ولا اقولك ميجو لسه جايلبي بن بالبندق حكايه. هتدعيلي لما تشربيه. ايه رايك في البلكون الفيو هايل صح. على كل حال اتمنى انك تبقي تيجي عندنا على طول

الموضوع ابسط من كدة بكتير يا ستي وبعدين لو عايزاني اقبل اعتذارك يبقى انتي كمان اقبلي اعتذاري عن ناس بتتصرف بسخافه مع المسلمين
انا من زمان مبشتريش من اي حد من النماذج اللي موجوده في البوست ده

بصي انا مش مسلمه بس شوفت الاسلام لما كنت حامل وكان ضغطي بيوطي فكنت بدوخ في اي حته وفي اي وقت. مرة كنت بعدي كوبري عبور المشاه وكان اول يوم رمضان ومرة واحدة حسيت ان الكوبري بيتحرك تحت رجلي والدنيا اسودت في عنييا وابديت ادوخ. اللي لحقتني وجريت ووقف وريا كانت بنت محجبه وفضلت معايا لغايه لما فقت ونزلتني الكوبري وقعدتني وفضلت تجري تدورلي على ميه وجابلتي فعلاً ميه واصرت انها توصلني مع ان الوقت كان صبح وده معاد شغل او جامعه وكان واضح جداً اني مسيحيه من الصليب اللي انا كنت لابساه - علشان محدش يقول تلاقيها كانت فكراكي مسلمة

انا اللي مضايقني ان واحد زي قريبي اللي كتبت عنه في البوست عمره ما حط في دماغه هو بيشتري من مسلم ولا مسيحي و لا عمرة ما ركز في ان المحل ده بيبع اغلى من المحل ده. لكن الموقف خلاه بعد كدة مش هايشتري غير من البياع اللي بحترم نفسه وبيحترم زباينه
تصرفات غير مسئوله من ناس مبتفكرش بتسبب مشاكل كبيرة
Love,
MishMish

Migo Mishmish said...

Micho
ايزيك يا باشا وازاي الحياه في الناحيه التانيه من الكرة الارضيه

موقف صاحبك ده فكرن بعمر افندي ساعه ماكان ملك الحكومة. الموظفين مكنش ليهم زي مخصوص فتلاقي نفسك قاعد بتفاصل من الصبح على سعر وبعدين تكتشف في الاخر ان اللي انت قاعد تناهد معاه ده زبون زيه زيك. واول ما الادان يدن يجروا وسيبوا المحل بالبضاعه المعروضة ويجروا عالجامع. وحتى اللي بيقى قاعد في المحل ما بيردش على حد
عارف لما اتباع وبقى في محاسبه وخصومات مبقوش يتحركوا من مكانهم حتى لو القيامة قامت بره
ديه ناس مش عايزة تشتغل. دول ناس عايزين يبلطجوا مرة علشان الصلاة ومرة علشان الصيام ومرة علشان ماعرفش ايه
لو في حد بيحاسب العالم ديه كانت اتظبطت
Love,
MishMish

Migo Mishmish said...

Bastawisi
يا راااااااااااااااااااااجل حرام عليك يا راااااااااجل
هو مفيش حد كويس خالص. الناس كلها متأمرة. لو فضلت كدة تشوف الوحش في كل حاجة مش هتعرف تعيش. هتفضل تحارب في طواحين الهوا. يا ابني ده في الكتاب المقدس في حكايه سدوم وعامور ربنا قال لو في المدينه 10 ابرار مش هايحرق المدينه. عارف مديييييييييييييينه كامله ربنا كان هيسامح الناس اللي فيها علشان 10 كويسين
يعني في حياتك كلها ماقبلتش 10 مسلمين كويسين
love,
MishMish

Bastawisi said...

هو مفيش شك طبعا ان فى مسلمين احسن من الاقباط

بس ولاد الحرام ماخلوش لولاد الحلال حاجة و المسلم الكويس نادر جداااااااااااا جدا جدا جدا

احب ادعوكي للانفتاح على المحلات القبطية لان المسلمين بيقاطعوهم و خصوصا فى رمضان لازم نقف جنب بعض في مواجهة الاعادي

Migo Mishmish said...

يا سيدي هو انا مقاطعه الاقباط
انا مقاطعه الاعباط. انما الكويس والمحترم باشتري منه طبعاً
وبعدين انا مقدرش اتحيز للاقباط على حساب المسلمين لانه في الجهه المقابله هيبقى في مسلمين بيعلموا كدة وساعتها مش من حقي اني اقول انهم غلطانين. حتى لو تصرفي انا بيمثل دفاع مش اعتداء
لو قرايت كلام الناس المسلمين المعلقين هنا هتلاقي انهم ناس يشرفوا وزي الفل. واللي بيعمل كدة مجموعه دماغها شامه رطوبة

اما بالنسبة للرزق فده بتاع ربنا. مش في الانجيل ايه بتقول ملقين كل همك عليه لانه هو يعتني بكم. لو في حد ربنا شايف انه مظلوم انا اراهن بعمري انه مش هيسيبه. لكن لو هو اصلاً وحش انا مخلفتوش ونسيته
Love,
MishMish

Bastawisi said...

ماتتحيزيش انا بقولك بس ساعدي الاقباط فى مواجهة المسلمين

اقفي جنب الضعيف فى حرب الشرس عليه

مارتن لوثر كنج بيقول المشكلة فى اللى مش بيعمل مش فى اللى بيعمل

بالمناسبة انا لاديني

MahaRani said...

معلش إذا كنت اقتحمت عليكوا البلكونة كدة فجأة بس أصلى انفعلت لم قريت البوست و قلت لازم أرد فى ساعتها
بالنسبة للقهوة ربنا يخليكى بجد مفيش
داعى تتعبى نفسك
:))

أنا بس عندى أمنية نفسى فعلاً تتحقق نفسى إننا نحب بعض و نساعد بعض مش لأننا مسيحيين أو مسلمين بس عشان احنا مصريين فى الأول و فى الأخر

و الموضوع يا أستاذ بسطويسى مش معركة و لا مواجهة
المفروض إنه مفيش فرق بينى و ما بين حد تانى و لا تمييز على أساس الدين

البلوج بتاعتكوا فعلا تحفة و أنا بقيت
follower
ليها خلاص و هابقى أطب عليكوا كل شوية
:)

All The Best

صبرني يارب said...

تعرفي يا جميل هاقولك على حاجه تبقى تقوليها لعم الحاج بتاع ارزاق

ان احنا عندنا من السنه ان لما يكون حد بياكل والاذان يأذن انه يكمل اكل الاول وبعدين يبقى يروح يصلي

الوقت الوحيد الى محرم علينا فيه البيع هو وقت صلاة الجمعه لانه ورد بنص القرآن واذا اذن للصلاة من يوم الجمعه فذروا البيع

المهم يعنى انتى كلامك صح انا برضه باتفقع من الناس الى بيعملوا كده وفى الغالب بيبقوا عاملها منظره

وافتكر مره واحد راح لجوزي المحل وقاله انت لازم تقفل ساعة الصلاه وتسيب الناس الى عندك يروحوا يصلوا وحركات من دي

جوزي قاله ياعم هو انا مانعهم ما احنا بنصلي بس على دفعتين

ده انا عشان اقفل عايز نص ساعه على ما اقفل المحل ونص ساعه افتح فى خمس صلوات يبقى خمس ساعات وانا الدوام بتاعي كله عشر ساعات
طيب ايه ما نقفله ونقعد فى بيوتنا احسن

وفكرك يعنى هو فهم ؟؟؟
ولا حاجه
يقوله سيب المحل مفتوح!!!!!!!!!!!
هههههههههههههههههههههههه

جوزي قاله باقولك ايه صاحب ا لبيت بيدور عليك عشان انت ما دفعتش الايجار من شهرين ابقى اتصل عليه
هههههههههههههههههههه

معاكي يا جميل فى كل الكلام الى قولتيه

صبرني يارب said...

ميجو

ممكن بعد اذنك اصل رجعت وقريت شويه فى التعليقات

ممكن بعد ما قريت حديثك مع بسطاويسى اطلق ضحكه مدويه
ههههههههههههههههههههههههههههههههه

مش عارفه بس انا ضحكت كده الصراحه على كلامه

يا ربييييييييييييي


عشان تعرفوا بس ان المصريين دول كلهم دماغ واحده
اهو احنا برضه كمسلمين يعنى عندنا ادمغه زي دماغ حضرتك كده تمام

زعلان منهم ليه ما انت بتعمل زيهم
والله العظيم كوميديا الشعب المصري ده يا جودعان
ممكن اضحك تاني يا اختي ولا الضحك هنا بفلوس
هههههههههههههههههههههههههههه

صبرني يارب said...

لا رجعت تالت على فكره

عشان موضوع صباح الخير
وبجد ده سؤال عايزه اعرف اجباته

هو فى اي فكر من افكار المسحيين على اختلاف طبعا اتجهاتهم الفكريه

بيقول ان لو حد قالهم سلام عليكم ما يردوش عليه ؟؟؟

اصل عم ابو بانوب عارفاه انتى ؟
ايوه الى بيبيع كلينكس وكده قدام بيتنا
المهم
عم ابو بانوب كنت دايما وانا نازله اقوله سلام عليكم وكان بيرد عليا

بعدين فجأه بقى ما بيردش عليا الا بصوت وااااااطي ويقولي اهلا صباح الخير

طبعا انا نفضت ولا كاني سمعت حاجه وضحكت ما بينى وبين نفسي وقلت تلاقي برضه عندهم حد طلع زي مشايخنا الحلوين ما قالوا ما تسلموش على المسحيين هما برضه طلع لهم حد يقولهم ما تردوش على المسلمين

ام هند انا برضه فضلت اقوله سلام عليكم
قوووووم هو يظهر والله اعلم اتحرج مني

فبقى يقول سلاااااااام ورحمة الله
هههههههههههههههههه

ماشي ياعم حذفت عليكم يعنى مقبوله منك على اد سنك برضه

فكنت عايزه اعرف يعنى من باب العلم بس عندكم حد فعلا قال للمسحين ما تردوش السلام عليهم ولا ايه

بالامانه يا ميجو مش تضحكي عليا

انا حرة said...

موضوعك مهم جدا بجد
من غير رغى كتير انا مسلمة و اتربيت فى مدرسة راهبات و اقرب صحباتى لقلبى مسيحية..لا عمرنا حسبناها كده ولا عمره جه فى بالنا اننا نفكر بالتخلف دا..انا ماليش عند اللى قدامى الا انه يعاملنى باحترام..مسلم بقى مسيحى ولا بوذى حتى ماليش فيه

ما يمنعش ان التعصب الاعمى و الجهل بابسط قواعد الدين بقوا منتشرين لدرجة مرعبة..ابسط حاجة من كام يوم فى الشغل كنا بنتناقش فى الموضوع دا في اللى كان رايه ان اى اقلية من حقها تحمى نفسها و فى اللى كان رايه ان ابن دينى اولى باى شغل يجيلى و فى الطبيعيين اللى زينا اللى كانوا شايفين ان مفيش اولوية الا للى هيعمل الشغل احسن..يعنى الاولوية للاكفأ سواء كان مربى دقنه لحد الارض او لابس صليب او حاطط تمثال بوذا على مكتبه
كتير بيفكروا كده ما تقلقيش

و زى ما قلتلك انا مسلمة لكن منظر زى فرش سجاجيد فى مدخل مستشفى وقت صلاة الجمعة بيجيبلى حالة ذهول..و دا شوفته بعينى فى مستشفى السلام الدولى فى المعادى..ازاى تمنع مرضى من الدخول حتى لو لمدة عشر دقايق بجد مش فاهمة!!
الدين ده علاقة شخصية بحتة بينى و بين اللى خلقنى..حاجة كده لا تقبل المزايدات من اى حد ايا كان..لكن اجبار غيرى على احترام اختياراتى دا اللى غير مقبول بالمرة

انا حرة said...

نسيت اوضح حاجة معلش..انا عمرى ما شوفت فى كل اللى حواليا واحد مسلم بيفضل يشترى من محلات مسلمين لمجرد ان الدين واحد..فعلا عمرى ما شوفت ده بيحصل..و منطقيا حتى لو حد تفكيره كده فاولا و اخيرا اللى هيحكم اختياره هو السعر و الفلوس اللى معاه ده اقتصاديا و منطقيا هو دا اللى بيحصل..فمش منطقى تعميم تصرفات البعض و نقول ان دا الطبيعى لانى فعلا عمرى ما شوفته بيحصل..و ان حصل فهو بيحصل من الناحيتين فبلاش نحمل الامور باكتر مما تحتمل..التطرف غباء سواء كان من مسلم او من مسيحى

Desert cat said...

انا شخصياً عاملة مقاطعة لكل واحدة لابسه نقاب وكل واحد عامل دقن لو هموت وفى ايده يحيينى مش عايزة لو دخلت مصلحة حكومية مش اتعامل معاهم حتى لو الورق بتاعى واقف على توقيع منهم مش عايزاه لو راكبة مواصلة ومفيش مكان فاضى غير جنب المنقبة بنزل تانى
لو حد مسيحى ومحسسنى انه مضطهد او اى خيار مش بسمع له ولا حتى بلتفت له
من الاخر اللى بتعامل معاه الناس الطبيعية فقط لا المتغطى وحاسس انه هربان من عملة ولا اللى عامل دقن لتحت بطنه ولا المضطهد
من ايه ده بقى والله مش عارفه بس هو انا طبيعتى كدا اعمل ايه فى نفسى يا اوختشى

تحياتى يا مشموشة

الدرعمي said...

الموضوع تعبان أوي للأسف .. صاحب المحل حر يحط القوانين اللي تعجبه مش عاجباني قواعده وقوانينه فيه مليون غيره بس احنا أحيانا بنحب نتلكك وناخد الحاجات دي كزريعة للتهكم من مظاهر دينية زي اللحية وغيرها .. ولو على كدة نبقى مش هنتعامل أبدا لأن كل واحد هيشتري من ابن دينه أو ابن معموديته ولوكان فيه حد بيعمل كدة فيبقى أكيد مسيحي لأننا كمسلمين غير مهتمين بتنمية الاقتصاد الإسلامي وإلا ماكانش 60 % من الاقتصاد المصري في أيدي المسيحيين زي مابتقول الإحصائيات رغم إنهم 10 % من نسبة الشعب فلا تنفخي في النار

Bastawisi said...

اخ درعمي عندي سؤال:
ليه الافكار المتخلفة دايما طالعة من الشيوخ و الدرعمية و الازهريين و المتدينيين اسلاميا عموما؟؟

بقى ياراجل في حاجة اسمها صاحب المحل يعمل اللى هو عاوزه؟؟ على اعتبار ان الزباين مواشي مثلا؟؟

Migo Mishmish said...

معلش ياجماعه انا هاضطر ارد على الاخ درعمى الاول بالنيابه عن مشمش لان تعليقه استفزنى بشده ...
الاخ درعمى :
اولا منور البلكونه كاول زياره ..وطبيعى انك لما تكون فى اول زيارة عند ناس بتزورهم لاول مرة ..ماتخشش شمال كدا من غير ماتعرف الناس دول ايه دماغهم صح مش دا من اداب الاسلام؟او من اداب الاديان السماويه عموما؟
المهم انا مبسوط انك درعمى يعنى مدرس لغه عربيه اد الدنياوانا من عشاق اللغه العربيه لانها اكثر لغه ثريه فى العالم وبصفتى مدرس لغه المانيه عرفت الفرق ..انا راجل قبطى اذا كنت لاتعلم وماعنديش عقده اللغه العربيه لمجرد انها لغه القرأن او اعانى من هلاوس وعقد نفسيه او عقده اضطهاد ..وماعنديش عقده صباح الخير او سلامو عليكو ..بس واضح انك عندك مشكله زى الناس اللى بنتكلم عنهم فى البوست
: اولا انت دخلت فينا شمال من اول كلمه ومافيش حتى كلمه السلام عليكم.... يا (درعمى ) ..مش كدا ولا ايه
تانى حاجه : انت بتقول ان صاحب المحل حر فى قوانينه ولو مش عاجبنى قوانينه فيه مليون غيره ..احنا قلنا فى البوست ايه غير كدا؟ انت قريت المقال كويس ؟ اشك فى ذلك ..احنا بنهاجم سلوك الناس دى من الطرفين ..


بس احنا أحيانا بنحب نتلكك وناخد الحاجات دي كزريعة للتهكم من مظاهر دينية زي اللحية وغيرها : انت شايف فى البوست اى نوع من انواع النلاكيك ؟ يعنى شفتنا قلنا حاجه عن اللحيه؟ شفنا قلنا حاجه عن النقاب ؟ برضه اشك انك قريت المقال ..وبعدين ياعم انت من صورتك الموجوده فى البروفايل مش مربى لحيه يعنى؟ لما انت بتدافع عنها


ولو على كدة نبقى مش هنتعامل أبدا لأن كل واحد هيشتري من ابن دينه أو ابن معموديته: احنا بنقول ان المعيار فى كدا هو المعامله سواء كانو مسلمين او مسيحيين او حتى بوذيين ..اشك برضه انك قريت المقال برضه


لأننا كمسلمين غير مهتمين بتنمية الاقتصاد الإسلامي وإلا ماكانش 60 % من الاقتصاد المصري في أيدي المسيحيين زي مابتقول الإحصائيات رغم إنهم 10 % : ازاى يعنى مش فاهم ؟ يعنى واحد زى بهجت وزى عز وزى وزى ..غلابه مثلا انت بتتكلم عن فئه مختلفه عنا خالص ليها قوانينها وهم اقليه انا بتكلم عننا كفئه الاغلبيه من الشعب ..وبعدين نفترض حسب كلامك ان المسيحيين شطار فى التجارة بحكم انهم اقليه ..انت بتحاسبهم انهم شطار ؟ يعنى يعملو ايه عشان يعيشو ؟ يموتو من الجوع عشان يعجبو حضرتك .. يا اخ درعمى العبرة بالمعامله ..يعنى واحد زى ساويرس لو خدمه الموبايل بتاعته زى الزفت اضطر انى اكمل فى شبكته لمجرد انه مسيحى ؟ على فكرة انا فودافون لان موبينيل زفت
..انت بتتكلم فئه معينه واكله اقتصاد البلد كله واحنا متفرجين انت دخلتنا فى سكه غير الى احنا بنتكلم عليها ..

فلا تنفخي في النار: ههههههههه ضحكتنى جدا يا اخ درعمى يعنى انت شايف ان البوست دا نفخ فى النار ؟ اعتقد للمرة الالف انك لم تقرا المقال ولم تفهمه .....ولن تفهمه ابدا
اسف على الاطاله وتحياى على مرورك على البلكونه ...على فكرة تعليقك تعبااان مش البوست
تحيااااتى
ميجوووو وزوجته مشمش

Migo Mishmish said...
This comment has been removed by the author.
الدرعمي said...

أولا ; بسطاويسي .. ميخصكش ،، كلامي مش موجه لك ومن باب احترام أصحاب المدونة مش هدخل معاك في أي حوار

الدرعمي said...

الأستاذ المحترم ميجو أنا يا سيدي متشكر لأدبك وعاوز أقولك السلام عليكم ورحمة الله وبركاته ، أما عن كل شكوكك في إني لم أقرأ الموضوع فاطمئن والله قرأته جيدا ، أما شكوكك حول فهمي له فمش هرد على النقطة دي مش عشان مفهمتش بس عشان عيب ،، أما عن الموضوع فأحب أقولك إن مشكلة المدام دلوقتي إن المطعم بيوقف الشغل في وقت الصلاة فهو مشكور لأن ده حق العامل إن صاحب العمل يسمح له يصلي في وقت الصلاة ولا يعتبر ده من البريك ولأ ن النبي عليه أفضل الصلاة وأزكى التسليم قال ( لا يبارك الله في عمل يلهي عن الصلاة ) فإذا كان فيه عمال مبيصلوش وبيوقفوا حركة العمل أثناء وقت الصلاة فهم بيلتزموا بكلام صاحب العمل ومحدش يلومهم ده أكل عيشهم .. إيه بقى لازمة مطعم الإرهاب والكلام الخايب ده ؟؟؟ والله أنا عارف نظامه ومش عاجبني أروح لغيره وده لا يقلل من شأني كمواطن محترم زي بالظبط ما انت مش عاجبك نظام موبينيل هو كدة نظامهم بس مش مناسبك خلاص تختار شركة غيره زي ما انت اخترت فودافون وده لا يقلل من موبينيل كشركة ولا منك كمواطن وأي كلام عن إن المطعم ده مطعم إرهاب أو أي كلام من اللي اتقال يبقى نفخ في النار مع احترامي لوجهة نظرك اللي بتشوف إن ده مش نفخ في النار مستدلة بحاجات بسيطة عن محلات أقباط بتعمل فرق ف التعامل مع المسلمين .. أنا طولت ومحدش قدم شاي ولاحاجة عشان كدة هقولكم سلام عليكم

Migo Mishmish said...

الاخ ادم الدرعمى
انا مبسوط انك جيت البلكونه تانى واتمنى انك تكون صديق لينا وتنورنا ..
اولا انا ما غلطتش فيك ..انا قلت مافهمتش البوست .ومش هاتفهمه القصد انك مش عايز تفهمه ...لانك عندك حته كدا مخلياك متحيز مع انى لما دخلت مدونتك لقيتك شاعر كبير ..وحد مرهف الحس فاستغربت انك بتتكلم كدا ..قلت فى نفسي هو فاهم بس بيحاول انه يغمض عينه ..انا ماقصدش لاسمح الله انك لاتفهم

ثانيا احنا اتكلمنا فى البوست عن مشكله المعامله السيئه وليست الصلاه ..انا اول واحد اكون مبسوط لو ان الناس الى شغاله فى المحل بتصلى دا شيئ مش بتاعى ..لكن الى يضرنى انه يعاملنى وحش عشان انا قبطى او عشان انا مسلم ..يعنى الموقف بتاع السوبرماركت ..الراجل مارضيش يبيع عشان صاحبنا مراته مش محجبه وباع لواحده تانيه محجبه ..هنا بقى استوب ..مقاطعه
برضه بيقابلنى مواقف كتيرة لما ببقى رايح اركب تاكسي عشان يوصلنى للكنيسه ..فيه ناس كتير بترفض عشان كدا ..هو دا الى بنتكلم عليه ..برضه البائع الى بيضايق واحده محجبه او منقبه لمجرد انها مسلمه ..او يغلى على المسلمين ..هما دول الناس الى يستحقو بجد يطلق عليهم ارهابيين
تحياتى
الا صحيح شايك سكره ايه؟
ميجوووووو

George USA said...

العمل عباده

هو ده اللى انا اعرفه

George USA said...

العمل عبادة
تعرفى انا عندى حل كويس للناس بتوع
ارزاق ليه ميشغلوش مسيحيين معاهم و لما يجى وقت الصلاه يصلو و المحل شغال

تعرفى ايه المشكله ؟؟؟
التخلف و الجهل الناس طلعت القمر و احنا لسه بنفكر نخش الحمام برجلنا
اليمن و لا الشمال على راى جوزك

وايه حكاية مكه كولا و شويبس انتى عارفه ان اصلا ان شويبس صاحبها مسيحى واصلأ مادة الكولا ماهى اصلها بلاد الفرنجه هو الفرق فى الاسم بس يعنى بيبسى كولا حرام ومكه كولا حلال

وبرده العمل عبادة

^ H@fSS@^ said...

لا مافيش حاجة اسمها مادام المحل ده بتاعي يبقى اعمل اللي انا عاوزة فيه
فيه قانون التجارة اسمه انك فتحت منشاة تجارية لاستخدام العامة و لمنفعتهم
و بالتالي انت بتقدم خدمة
و مينفعش تمشيها على مزاجك الا في قوانين معينة بس مش من ضمنها قفلها وقت الصلاة و القرف اللي بيحصل ده
زي مشكلة حنان ترك من سنة و شوية يمكن
لما فتحت محلها بس للمحجبات
ده محل غلط
هي فاتحة منشاة
و لازم الكل يستخدمها لو حب
مش سوق خميس و جمعة احنا في قرية النجع عشان كل واحد يلم مشنته و يمشي منين ما يحب
حاجة بقت احيه بجد
هو فيه كدا يا ناس؟
فيه كدا يا مشمش؟
فيه كدا يا ميجو؟

البت ساندو و هي ملحوسة بالزبادي تجنن :)

Migo Mishmish said...

MahaRani
وانا بضم صوتي لصوتك ونفسي نحب ونحترم بعض بعيد عن اي انتماء
اكتر حاجة بتضايقني اننا مأزمين الحياه على نفسنا وعلى اللي حوالينا في حين ان الموضوع مش محتاج
وسعيدة جداً انك هتطبي علينا كل شوية
Love,
MishMish

Migo Mishmish said...

صبرني يا رب
ما هو في ناس كدة غيتها تعطيل المراكب السايرة. تخيلي بقه اللي ممكن يحصل بقه لو الموضوع ده اتعمم والحياه كلها تقف وقت الصلاة.
العمليات الجراحيه والمواصلات والطيارات والمصالح الحكوميه والمدارس والشرطة والمطافي والاسعاف
مصايب ممكن تحصل في حين ان الاساس في الدين اليسر مش العسر
اما بالنوسبة للأخ بسطاويسي فكلامي معاه كوم وتعليقه اللي بيقول فيه انه لا ديني ده كوم تاني
يعني بعد كل هذه السفسطة طلع لا ديني. امال طلع ديني انا ليه في التعليقات؟ يلا ولا يهمك كله بثوابه

وموضوع السلام ده غريب انا اول مرة اعرف ان المسيحين مش بيردوا لو حد قالهم سلامو عليكو. مع ان ده كان بيحصل معايا بس بالعكس. كنت اما بخش الشغل الصبح بحب اقول صباح الخير على اساس انه بدايه النهار وان شالله يبقى خير والبيه المدير يكون غزالته رايقه عننا النهاردة
واخر اليوم وانا مشايه بقول سلامو عليكو
بس لاقيت الزملا لو قلتلهم صباح الخير ما بيردوش في حين اني لو قلت سلامو عليكو في اي وقت بيردوا فبطلت اقول حاجة. علشان ما بحبش احس اني في بيمليني اقول ايه
بس من تعليقك واضح ان الموضوع قله ذوق من الطرفين
شكراً على التوضيح
Love,
MishMish

Migo Mishmish said...

انا حرة
بما انك ذكرتي مستشفى السلام بالمعادي فالمستشفى ديه مبتشغلش مسيحين نهائي
المهم اللي انتي بتحكيه ده مصيبة تانيه. لان المستشفي معروف ان الناس اللي فيها محتاجة ملاحظة 24 ساعه في اليوم 7 ايام في الاسبوع ده غير الحوادث. يعني هو مينفعش مجموعه تصلي ومجموعه تقف تستقبل الناس وتابع حالات المرضى

وبضيف على كلامك كمان الناس لما بتفرش الحصر قبل الصلاة بكتير قوي لما ما يبقاش لسه حد جه وتسد الشارع حتى لو كان شارع رئيسي. وتبقى المحلات واخدة الرصيف. يبقى لو حظك وحش وخرجتي ساعه الصلاة من بيتك او كنتي في حته وعايزة ترجعي بيتك لازم تقفي في الشارع لغايه لما الصلاة تخلص
ومش انتي لوحدك لا ده العربيات بجميع انواعها مش مسموح لها بالعبور
ومع ذلك تلاقي الناس ذمتها بقت اوسع من رحمة ربنا.
الناس اللي زي ديه نجحت في انها تخرب اي حاجة تحط ايديها عليها. حتى الصلاة بدل ما تبقى دعوة صامته لكل الناس علشان تتعرف على حلاوة العلاقه بالله بقت مصدر عكننه
Love,
MishMish

Migo Mishmish said...

قطوطة
كدة بقينا اتنين مقاطيعن يا اوختشي
كفايه فوضى بقه. انا علاقتي بالبياع بتدأ وتنتهي بطلب الحاجة ودفع تمنها. ماليش دعوة بقه بمشكاله العائليه متدين ولا متلحد مضطهد ولا عيشته بمبي لا ما يخصنيش

Love,
MishMish

Migo Mishmish said...

الدرعمي باشا
الموضوع لا تعبان ولا حاجة ده زي البمب وسأل عليك إمبارح
ههههههههههههههههههه
وبعدين الشاي اهو عالنار تحبه بالنعاع ولا سادة
انا متأكدة انك سمعت عن علم التسويق والمبيعات
Sales & Marketing
انا اعرف عنه علشان ده من صميم شغلي. تخيل انت علم كامل علشان يضمنلك ان العميل يشتري او يتعامل مع شركتك انت. لان راس مال شركتك متكون من حاجات صغيرة بنشتريها احنا وراس مال منافسك متكون من حاجات صغيرة بيشتروها ناس تانين زاد حاجات صغيرة نشتريها احنا منه لما نزهق من نظام حضرتك وبالتالي نبقى مال زايد لمنافسك وناقص من عند حضرتك

ثانياً انا لابتلكك ولا ليا دعوة باللحيه ولا غيرة. وبعدين لو عايزة اشتم في اللحيه ماعملها بوست اشتمها فيه. مانا حرة في المدونة بتاعتي واللي مش عاجبه يخبط دماغه فالحيط. والموقف ده بستند فيه لنظريه حضرتك في التسويق الا وهى - صاحب المحل حر يحط القوانين اللي تعجبه مش عاجباني قواعده وقوانينه فيه مليون غيره

وبعدين كمسلمين مش مهتمين ليه بتنميه الاقتصاد الاسلامي مع انكوا اغلبيه ليه مش فاهمه.حتطوا فلوسكم في الريان يعني وراحت ولا ايه اللي حصل؟

ولو حضرتك خدت باللك قبل ما تتخانق كنت لاقيت جمله مطعم الارهاب ده عنوان المقاله اللي اتكتبت عن المحل في ايلاف وديه اللي كاتبها نبيل شرف الدين مش انا. وبعدين انا مش مضايقه من انهم بيصلوا انا مضايقه من اني اتخدت رهينه لا عارفه اخرج ولا اعارفه اخش. غير لما يخلصوا صلاة
مش مصدقني انزل جراندمول المعادي وانت تشوف وقولي ايه رايك لما كل حاجة تقف مرة واحدة بما فيهم حريه حضرتك لغايه لما كلهم يبطلوا صلاة
او اتنهم يبطلوا ياخدوا اوردرات ويقفوا يرغوا وخضرتك واقف لان تعليمات صاخب المخل بتقول كدة
ارجو ان وجهه نظري تكون وصلت
حاجة تانيه انا ماعرفش اعمل شاي ما تمشيها نسكافيه
Love,
MishMish

Migo Mishmish said...

George
يا اهلاً يا اهلاً بقه يا راجل صاحب شوبس مسيحي. طب وحيات ساندو ماعرف
تلاقي هو ده سر شويبس اللي كان بيقول عليه المرحوم حسن عابدين ومات من غير ما حد يعرفه. امريكا مختلفه برضه عننا يا راجل في هناك شفافيه بجد. ما شالله عارفين عننا كل حاجة

اما بالنوسبة لمكه كولا انا بصراحه ماحولتش اجربها. انت عارف الـ
Solgan
بتاعهتا كان ايه؟
اشرب ملتزماً
يعني لازم تحترم نفسك وانت بتشرب لا تهزرو ولا تضحك وتلبس رسمي كدة
بلاش مياعه وقله ادب
وبعدين انا خفت اروح اشتري منها يبقى لازم يكون معايا محرم
عموماً هو تقريباً محدش بيشربها او بيبعها غير صاحب ارزاق
يعني شركة كوكا كولا بتعمله بتاع 30 علبه كل يومين كدة
Love,
MishMsih

Migo Mishmish said...

Hafssa
هو انتي مش عارفه ولا ايه ده في كدة وفي كدة وفي كدة

انا اللي مضايقني ان كل واحد متخيل انه رئيس جمهوريه نفسه ومش شايف ان التصرف اللي بيعمله ده بيسبب بلاوي. زي كلام صبري يا رب بأمانه يعني انا عمري مكنت اعرف ان في مسيحين ما بيردوش لما حد بيقولهم سلامو عليكو
اهي قله الذوق بتاعه الناس ساهمت في شكل او بأخر في ان الدنيا تتنيل اكتر ما هي متنيله
يعني المسيحين لما المسلمين ما يردوش عليهم يقولوا اصل عندهم حديث بيقول لا تبدءوا اليهود والنصارى بالتحيه
والمسلمين فاكرين انهم في الكنيسة بيقولولنا مانردش عالمسلمين
ديه حاجة بقت تقرف
يلا مش مهم وانتي عامله ايه دلوقت
البت ساندو بقت مجرمة
ربنا يحميها ويخليها
قريب قوي هاحطلها صور جديدة وهاقولها طنط حفصه بتسلم عليكي
Love,
MishMish

Anonymous said...

انتم عيال حلوين اوى ....وانا بجد سعيده ان فى شباب فى مصر زيكم انتم وحسن الهلالى وامنية عامر ....انا بقول لاولادى بكرة ان شاء الله احسن من النهارده بيكم انتم واللى زيكم

blackcairorose said...

ميجو

أنا بحس اننا بننفخ في قربة مقطوعة مع الاسف الشديد

التقطيب الديني في مصر في ازدياد وبقى الدين المرجعية والانتماء الاول والتاني والتالت لغالبية المصريين سواء مسيحيين او مسلمين، وممكن بعد كده ييجي الوطن،

كلامي مش مبني على بيانات ولا احصائيات لكن مجرد مشاهدة اللي بيحصل واللي مظاهره واضحة فى الشارع والمحلات والتعاملات اليومية كلها بتخلي تقديري يمشى فى الاتجاه ده

المظاهر دي باينة عند المسلمين اكتر طبعا نظرا لاننا اغلبية عددية، بس يمكن انتي تقدري تفيديني اكتر اذا كانت المظاهر موجودة بنفس القوة عند المسيحين في مصر ولا لا مقارنة بالماضي

اما موضوع تشغيل كل طرف لافراد من نفس ديانته، فدي موجودة من زمان وبالذات فى الاعمال صغيرة الحجم زى المحلات او الشركات الصغيرة، بس الجديد دلوقتي انها انتقلت حتى لمؤسسات الكبيرة ولمدارس ومستشفيات ولمنتجعات سكنية او ترفيهية، يعني حتى الجهات اللي ليها طابع خدمي أو اهداف انسانية أو ترفيهية بقت توجه خدماتها واهدافها الانسانية ضمنيا لابناء كل ديانة لوحدها

والامثلة موجودة واكتر من اني اذكرها هنا

أنا لا بدعو لهجر الدين ولا بدعو لالحاد، وبعتبر نفسي والحمد لله مسلمة وعلى درجة من الايمان والتدين ولكن اننا في مصر نبقى مرجعيتنا الاولى والاخيرة لديننا المسلم او المسيحي معناه على بلدنا السلام

There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق