Sunday, July 11, 2010

المتحرش الفيلسوف

امبارح ركبت المترو رايحه وسط البلد. طبعاً ركبت في عربية السيدات علشان ابعد عن الشر بس ما حصلش نصيب. ركب من محطة مارجرجس 6 متحرشين صغار او حراميه من الواضح انهم لسه ماتخصصوش في العربية. من ساعه ماركبوا وهما هاتك يا تنطيط وتريقاه على الستات وشتيمه قذرة في بعض بصوت عالي وكل واحد فيهم بيوعد التاني انه هايعمل فيه افعال فاضحه يعقاب على مجرد التفكير فيها القانون. الغريب ان اكبرهم ممكن يكون في تالته ابتدائي ....عرفوا بقه الكلام ده منين؟
المهم مشي المترو والمتحرشين الصغار يعثون فساداً
لغايه لما الموضوع زاد قوي قامت بنت جنبي شكلها شيك وبنت ناس قالتهم يحترموا نفسهم شوية. الكلام ده كان لما دخلنا النفق بعد محطة السيدة وفي الطريق لسعد زغلول

قام الـ 6 متحرشين شتموها وفيهم واحد حب يقل ادبه عملي فمد ايديه عليها. فمسكت ايديه ووقعته على الارض. فشتمها وبقيه العيال اتلموا عليها قلت لا مبدهاش. قمت تخنت في صوتي واستعنت على الشقا بالله. لما المتحرشين الصغار لقوا الموضوع كبر 4 منهم جريوا وفضل الواد قليل الادب وهو بيعيط وانا مسكاه وفي اثناء ذلك بشتم البت بشاتيم قذرة وبيقلع جذمته علشان يضربها بيها ومتحرش تاني عمل دور فليسوف الغبرة

وفي خضم معركتي انا والبت في الدفاع عن حقنا في الرضا بالهم في عربيه السيدات قامت واحده قالتلي حرام عليكوا سيبوا الواد. هي قالت الكلمتين دول وانا الدم ضرب في سقف نافوخي من جوه

انا: حرام!؟..........وهي قله ادبهم علينا مش حرام

الست: يا بنتي خلاص انتوا هزقتوهم والعيال بتعمل كدة علشان يسرقوا حاجة ولا يخطفوا حاجة متديهمش فرصه يعملوا كدة

انا: طب اما انتي عارفه انهم حرميه صعبانين عليكي ليه؟

الست: انتوا اللي صعبانين عليا لحسن يقلوا ادبهم عليكوا

انا: قولتها يقلوا ادبهم ياخدوا بالجذمة او يغوروا يركبوا في عربيات الرجاله

المتحرش الفيلسوف: انتي بتضربيه علشان عيل صغير ولو كان راجل كبير كنتي اتخرستي

انا: اسكت علشان ماضربكش انت الاخر

المتحرش الفيلسوف: الحمدلله ماحدش يقدر يعملي حاجة

انا: طب انا هانزل اجيبلك الامن بتاع المحطة علشان تقضي بقيه عمرك في الاحداث

نزلت محطة جمال عبد الناصر ادور حتى على عامل نظافه ملقتش..... باب المترو قفل وفيلسوف الغبرة بصلي باستهزاء والمترو مشي والمتحرشين السته لسه في العربية

سبيت التيت في سري ومشيت

وايقنت ان

الشعب المصري متخلف عقلياً بالفطرة - راجع موقف الست بتاعه الحرام

حتى المنحرفين ليهم فلسفه - راجع موقف فيلسوف الغبرة

المتحرشين الصغار ركبوا من محطة مارجرجس - المفروض انها محطة سياحيه وفيها تواجد امني مكثف - وفضلوا يتنططوا بشكل مستفز طول السكه محدش من امن اي محطة حاول يتدخل. الخناقه فضلت مستمرة من قبل محطة سعد زغلول لغايه لما نزلت في جمال عبد الناصر وبرضه محدش من الامن اتدخل. الغريب ان الحكومة ضحت بالصحه والتعليم علشان الداخليه تعيش لكن من الواضح انه مفيش فايدة

في تقديري سب التيت لن تتم محاسبتنا عليه كخطيه \ سيئه لانه اقل واجب مع اللي بيحصل دلوقتي

اثبتت الايام ان حكمتي صحيحه وهي انك في مصر تأخذ حقك بقدر قله ادبك

Love,

MishMish

12 comments:

Kontiki said...

سلبيات الشارع كتير جدا اكتر من انها تحصى
اولاد مشردين و تجمعات عصابات صغيرة والله مشوار الشغل بقى مغامرة غير مأمونة العواقب
بس بجد جدعة انك وقفت ورديتى اهم حاجة منبقاش سلبيين

Migo Mishmish said...

Kontiki
انتي عارفه ان مفيش غير انا والبنت اللي جنبي بس اللي خدنا موقف
بقيه الناس كانوا جايين يخلصوا العيال من ايدينا بمنتهى الغباء
مع ان انا والبنت لا شتمنا ولا قلينا ادبنا
كل اللي حصل اننا كنا بنحاول نلم ايديهم
بس انتي عارفه اني لما نزلت من المترو كنت خايفه لا ينزلوا ورايا
وبعدين وسط البلد التحرش بقى اهم معلم من معالمها بس الحمدلله ربنا ستر
Love,
MishMish

Desert cat said...

لا يا مشمش انتى لو سبيتى التيت هيعملوا لك قضية ازدراء اديان لكن عيل ابن كلب يقل ادبه عليكى وعلى غيرك عادى واحدة زبالة تقولك عيب وحرام سيبى الواد ده عيل صغير برضه عادى .. تنزلى تدورى على امن ياخد حقك مش تلاقيه حتى لو لاقيتيه مش بعيد تشيلى قضية سلاح ابيض
احنا بلد قذرة معدش فيها اى احترام لاى حد ولا لاى حاجه

Ms Venus said...

ادى اللى وصلنا له

حتى الاطفال

طب دول اتعلموا الحاجات دى فين


ولما طفل فى السن ده يعمل كده امال لما يكبر يعمل ايه ؟؟


مافيش فايدة

آخر أيام الخريف said...

قلبتى عليا المواجع يا مشمش ...اساسا انا كنت ناوية اكتب عن التحرش و انتى سبقتينى

دى مدونتى..ميجو سبق و شرفنى فيها و انا مستنياكى انتى كمان

http://reeeshkalam.blogspot.com/

Migo Mishmish said...

قطة الجميله
هاهاهاهاهاه عندك حق ممكن العيال يقلوا ادبهم وانا اللي يتعملي قضيه
بس اختك ما يتخفش عليها
انا سبيت التيت للكل في سري في منتهى الهدوء من غير ما حد ياخد باله
اللي حرقني ان الست بتاعه الحرام ديه شايفه انه عيب اننا نحاول ناخد حقنا. انتي انثي يبقى مقامك زي مقام الكلب تضربي بالطوبه وتجري تستخبي. غيرت دمي بنت الصرمة


Ms Venus
معرفش ياختى
بس احنا عايشين في مجتمع بعامل الست على انها شيء
بتوع الدين شايفين انها عورة ووجودها بيفكرهم في فشلهم في الالتزام الهش بقواعد بعيدة كل البعد عن اي دين حقيقي فبيغطوها
وللاسف دعاه التحرر شايفنها برضه حاجة فبيعروا اللي يقدروا عليه منها وده واضح في الافلام بتاعه دلوقتي
والمراه حيرانه ما بين الاتنين
ملهاش ذنب غير انها اتولدت كدة


اخر ايام الخريف
يا ستي اكتبي ولا يهمك يعني هو التحرش هيخلص
طول ما في بهايم بيقولوا ان المراه وشها عورة وصوتها عورة واذا تعطرت بقت زانيه ومنتجين افلام زي السبكي
هنترحم على الايام اللي كان فيها التحرش بالكلام واللمس
Love,
MishMish

Tears said...

بجد مش قادرة اقولك اكتر من اللى بقالى فترة بنشره فى الموضوع ده بس باختصار

احنا دولة بلا قانون

Migo Mishmish said...

Tears
احنا دولة مابقلهاش لازمة
بقت عامله زي الانتريه القديم اللي في شقه امي لا هو عدل ينفع نستخدمة
ولا ليه شضكل نقول يشفعله شكله الكلاسيكي
بس امي محتفظه بيه علشان العشرة واهو الكلب بينام عليه
Love,
MishMish

Hassan El Helali said...

العيب مش عليهم
العيب علي الناس المغيبه اللي قاعده
سلبية الناس هي السبب
مع ان كان ممكن حد يفقع كلمتين
من نوع إن الله لا يغير ما بقوم حتى يغيروا ما بأنفسهم
ما دمنا ما بيحركناش الا الكلام الديني وكلنا بقينا مشايخ

صح يا مشموشه... فعلا احنا دولة مابقلهاش لازمة
بقت عامله زي الانتريه القديم
بس محتفظين بيه علشان العشرة واهو الكلب بيشخ عليه

Migo Mishmish said...

حسن بيعلق على بوست انا بكتبه ايه الهنا اللي انا فيه ديه
مكنش ينفع انا ولا البت اللي كانت جنبي نتكلم اصلها مكنتش محجبه وانا لا مؤاخذة مسيحيه
فلو حاولنا نقول الكلمتين بتوعك دول مش بعيد الموقف يتطور لاننا احنا السبب علشان احنا لبسنا مثير وماشين بالمايوهات في الشارع ومبينين عورتنا اللي هي شعرنا
وبعدين طبعاً لو البت التانيه مسلمه كانوا كلموها عن الحجاب وازاي ان المصامصه لو مش متغطيه يقف عليها الدبان. ولو كانت لا مؤاخذه زي حالتي كانوا هايقولوا والله يا تحترموا نفسكوا يا تسبوها وتمشوا

اما بخصوص الكلب فعيب تقول يشخ يا حسن سوفاج
قول يعمل بي بي
Love,
MishMish

عبد الرؤوف بن عبدالسلام (أبوهارون) said...

عالسلامة في تونس نفس المشكلة ولو ان تونس كلها هي 3/4 القاهرةاما الفرق ما فيش عربات للنساء واخرى للرجال
تلك العادة ذهبت منذ زمان
اقول لك ان تجرش بالبنت السبب هو اللباس
البنت والتحرش من طرف البنت نحو الولد اصبح موجود كذالك
رؤوف

Migo Mishmish said...

اهلاً رؤوف
معلش انا مش بتفق معاك في موضوع اللبس ده
اولاً المصريات كلهم لبسهم بقى جلاليب وعبايات سودا ولا كانهم بايعين جبنه
ثانيا:ً ايه هي شروط اللبس اللي ما يسببش تحرش
لان في بنات بتبقى لابسه نقاب وبرضخه بيتحرشوا بيهم
ثالثاً: وده المهم بالمبدأ بتاع حضرتك معاناه ان لو في حد معهوش فلوس وشاف حضرتك معاك موبيل اخر حاجة وكل حاجة في لبسك ماركة ومحفظتك هتنفجر من الفلوس اللي فيها يبقى من حقه انه يوقفك في الشارع ياخد اللي معاك (بالمصري يثبتك) لان مظهرك خلاه يعمل كدة
بيتهيالي لو الموقف ده حصل مع حضرتك مش هتقول انا السبب. هتقول ده حرامي والبلد مفهاش قانون والامن نايم علشان الاشكال الضاله اللي زي ده ماشيه في الشارع. وده مش لانه اعتدى عليك ده اعتدى على اشياء فلوس..موبيل..مش على حرمة جسم
اخيراً ايه رايك مثلاً في المقوله اللي بتقول "خطأ الاخرين لا يبرر خطئك" يعني لو في حد قدامي غلطان مش اغلط انا كمان واقول هو اللي ابتدا
love,
MishMish

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق