Friday, April 10, 2009

فى القسم


رحت عالقسم ..كان الظابط الشاب الذى يشبه شكرى سرحان فى رد قلبى مشغولا مع احد المتهمين ..قلتله لوسمحت ..لم اكمل الكلمه واشار لى ان انتظر ...كان هناك شخص ممسوكا من قفاه مثل الفار المسلوخ والذى يمسكه على ما اعتقد هو احد المخبرين الذين يشبهون فرج الى اغتصب سعاد حسنى فى فيلم الكرنك ..كان هذا الشخص على مايبدو ..احد اللصوص المبتدئين ..
جلست على المصطبه الاسمنتيه حتى ينتهى الظابط من مهمته ..وكانت تجلس بجوارى احدى الفتيات التى تضع ماكياج صارخ وفهمت من نظراتها انها فتاه ليل ...وجلست اتابع الحوار
الظابط: يعنى مش هاتتكلم ياد يابن التيييييت ؟ وتقول مين الى سرق محل الكهربائى؟
المتهم : والمصحف ياباشا ما انا ..(يصفعه فرج على قفاه صفعه مدويه ..ماتحلفش ياد ياتيييييت)
الظابط طب وحياه امك لاوريك ..بتنكر ياد يابن التيييييت ؟
المتهم :ياباشا لو انا هاقول ..انت عارف انى راجل صريح
(فرج يفاجئه بصفعه على قفاه ...رد عدل يا تييييييت )
الظابط : مانا عارف انه مش انت ياد يابن التيييييت ..قلنا مين الى عمل كدا واحنا نسيبك .. بقى انتو يا شويه تييييييت تسرقو واحنا نشيل قرفكم ؟ طب قولى مين الى سرق الوليه بتاعه المعادى الجديده .. الوليه قالبه علينا الدنيا ..وعايزين نقفل المحضر ..ياتقولنا ياتلبسها انت يا تييييييت ..عشان تعمل فيها راجل
المتهم : والمصحف ماعرف ياباشا ..(فرج يفاجئه بصفعه اخرى على قفاه برضه بتحلف يا تييييييت ؟
المتهم : مانت عارف ياباشا انى لو عرفت مين الى عمل كدا هاقولك علطول ..
الظابط : طيب ..انا هاعرف اخليك تفتكر كويس .. خده يافرج على العنبوكه وخليه يفتكر ..بس اتوصي بيه حبتين
ابتسم فرج ابتسامه تنم عن سعاده داخليه ..وسحب المتهم على العنبوكه) )
قلت فى بالى ..اكيد هو بيعمل معاه كدا عشان مجرم ..انما انا راجل مدرس وهو حرامى
اشار الظابط الى الفتاه الجالسه بجوارى .. وعلى الفور قامت من مكانها واخذت تمشي بطريقه فتيات الليل المعروفه وتلوك لبانه بطريقه
مستفزة


الظابط : ايه يافتحيه ؟ مش هاتلمى نفسك بقى؟
فتحيه : مانا ملمومه اهو ياباشا
الظابط : ردى عدل يا تييييييييت ..هو احنا ماوراناش غيرك ؟كل يوم تشرفى عندنا؟
فتحيه : ياباشا هو ان ذنبى ايه ؟ ولاد الحرام ماخلوش لولاد الحلال حاجه ..انتو الى حاطينى فى دماغكو
الظابط : كنتى بتعملى ايه فى الطريق الدائرى مع الراجل ؟
فتحيه : دا ختيبى ياباشا ..كنا زهقانين وركبنا العربيه وقلنا نتمشي بيها
الظابط : تتمشي بيها على الدائرى الساعه 2 بالليل ياتيييت ؟ وكنتو واقفين بتعملو ايه بقى فى نص الليل ؟
فتحيه : كنا بنسمع نجوم اف ام ياباشا ..اصل البرنامج بتاع اسامه منير كان شغال ..وانا بابا مانعنى اسمع الحاجات دى فى البيت
الظابط: نجوم اف ام يا تيييييييت ؟ ..طب انا هاوريكى النجوم فى عز الضهر .. اتى فرج وحده دون ان يناديه الظابط .. يبدو ان غريزته نادته الى ضحيته الجديده .
الظابط : خد بنت التيييييييت دى لحد مانشوف قصتها ايه
سحبها فرج الى العنبوكه ...
ظللت جالسا على المصطبه الاسمنتيه ..مستعدا ان اعترف على زميلى محمد ابراهيم مدرس اللغه العربيه انه ضرب تلميذا بظهر المسطرة على مؤخرته الشهر الماضي ..حتى لا اذهب مع فرج الى العنبوكه
للحديث بقيه
ميجووووووو

7 comments:

أمبارح كان عمرى عشرين said...

هههههههههههه
اجمل حاجه ان فتحيه من عيله محافظة مش بتسمع نجوم اف ام هههههه
بس انتا جامد اوى انك هتعترف
هى العنكوبه دى شكلها مبترحمش
بوست جميل اوى
تقبل تحياتى

وربنا يخلى السيد الوزير المسؤال ومحدش يفهمنى صح :D

Migo Mishmish said...

امبارح كان عمرى عشرين
منور البلكونه ياريس ..شايك سكره ايه؟ ...فتحيه دى مثقفه وهاتزيد ثقافتها بعد ماتدخل العنبوكه ..
وبعدين انا هاعترف بس على زميلى بتاع العربى ..هى دخله العنبوكه دى سهله يامعلم؟
منور ياباشا وتحياتى على اول مرور
ميجوووووو

نيران said...

ماشاء الله تبارك الله ساندو زي الملاك
ربنا يحميهالكو يا رب

اما بالنسبة لحضرتك بقى..
ربنا يسترها عليك

بس صدقني نصيحة اخوية
اعترف من غير اي ضغط

لو شايفين انك تنفع تكون انت اللي سرقت الست بتاعة المعادي
مش مشكلة.. دا حتى هاتبقى حرامي بتاع مناطق راقية

واوعى تجيب سيرة النت والبلوجات والكلام دا

ربنا يسمعنا عنك سمع خير

انا عايزة كابشتينو بقى

Desert cat said...

يا نهار مش باين له ملامح يا ميجو
قسم وشرطة
الحق اجرى انا لاتكون البلكونة تحت المراقبة لحد ما تعترف
ده كفاية بس البت فتحة بتاعة الطريق الدائرى وبتسمع نجوم اف ام يا حلولى
الا قولى هى العربية مش كان ازازها فيمية تقريبا برضه هى فتحية بتاعة الفيمية
هههههههههههههه
فى انتظار البقية يا كبير
وانا شايفه انك تعترف على طول
على الهامش بقى
ساندو ما شاء الله عليها كل ما تكبر تحلى تبقى احلى واحلى
اهداء عمو كاظم الساهر

MEDUS said...

ميجو عزيزي
انا بخاف من سيرة اقسام الشرطة ربنا يجعل كلامنا خفيف عليهم
بس بردة في مجرمين مينفعش معاهم غير كدة!!تحياتي
الى الامام
في انتظارك

Bastawisi said...

هاها ده انت تلاقيك قطعت الخلف فى القاعدة بتاعة القسم دي :)

Anonymous said...
This comment has been removed by a blog administrator.
There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق