Wednesday, September 5, 2012

...اللي قالقني ...

من يوم إعلان نتايج انتخابات الرئاسه وانا قررت ابطل سياسيه وابطل قرايه جرايد وفرجه على برامج ... لاقيت ان كلها محصله بعضها منا اهتميت ايه اللي حصل يعني ... قولت لانزع البلف واعيش في البخاخة يمكن الاقي في التوهان راحه البال ورغم كدة لسه قلقانه
  • قلقانه على مستقبل بنتي اللي دفعتلها 7000 جنيه مصاريف للمدرسه علشان بس اضمن انها تلاقي كرسي تقعد عليه وانا عارفه كويس ان مناهج التعليم اللي هتدرسها ماتساويش تمن الورق والحبر اللي مطبوعة بيه الكتب وانها في ظل التوجهات الظلاميه الجديدة مستقبلها هيتحكم فيه امثال الاخ اللي متكسفش يقول "اشفق على المرأة في ظل احوال البلد الان من تحمل تلك المسئوله" لما سألوه عن سبب تجاهله لترشيح المرأة لمنصب محافظ واحنا في اقرن الـ 21. 
  • قلقانه علشان كل الاعتصامات والمظاهرات بتطالب بزيادة الحوافز الماليه والثبيت ورفع الاحد الادني للاجور ومفيش مظاهرة واحدة او اعتصام واحد من المدرسين مثلاُ يطالبوا فيه بتطوير مناهج التعليم او من عمال المصانع بيطالبوا بحقهم في التدريب على الاساليب الجديدة والمكن الجديد علشان يزودوا الانتاج او علشان يعملوا استجواب للحكومة وقطاع الصناعه عن خروج المنتجات المصريه عن المنافسه
  • قلقانه من شيوع ثقافه الانتقام واخلاق الزحمة في كل حته في البلد وظهور بوادر لحروب اهليه وتطهيرات عرقيه بسبب خناقه عادية كانت زمان بتخلص بعد شويه شتايم بالاب والام وسب دين وبعدين قعده عرب يقوم منها الطرفين حباب ... دلوقتي مبقاش عندنا واحد بتخانق مع واحد بقت حروب ما بين مليشيات مسلحه
  • قلقانه علشان الحال بقى سمك لبن تمر هندي ... ومحدش عارف ياخد موقف تلاقي واحد بلطجي فجأة وبدون مقدمات خد حته من الرصيف عملها تعريشه وخد قدمها مترين من الشارع وساب الناس على العربيات وخنق المنطقة بحالها علشان يعمل كشك طبعاً ما ينفعش تقوله اللي انت بتعمله ده غلط واعتداء على الطريق العام لانه ببساطة هايكالك ... انما لو فكرت فيها هتلاقي انه عمل كل ده علشان ياكل لقمه عيش بشرف بدل ما يقف بمطوة على اول الشارع يثبت الناس وياخد اللي معاهم ويبقوا بيبوسوا ايديهم وش وضهر انه ماغزهمش
  • قلقانه لان مش كفايه الديون اللي كانت علينا وعلى اهلينا من ايام عصابه المقلوع وحاشيته لا ده كمان النظام الجديد اللي جه بعد الثورة داين ولادنا وولاد ولدنا وباع مستبقلهم لصندوق النقد الدولي علشان يقعدله شوية على الكرسي
  • قلقانه لان في ناس ماتت وناس هتعيش بعاهات طول عمرها وناس اتجرحت انسايتها للابد وناس اتسجنت علشان كان عندها امل في بكرة احسن ومحدش داري بيهم ولا حتى معروف لهم عدد محدد ولا في سجل باسميهم
  • قلقانه لان اللي بيدوروا على مصلحتهم بس من البلد دي وعندهم استعداد يدوسوا عليها في اقرب فرصه اكتر بكتير قوي من اللي بيحبوها ومستعدين يضحوا علشانها.
  • قلقانه لان من بدايه 2012 وانا معظم عيلتي وصحابي هاجروا لدرجه اني بقت انا اللي في غربه مش هما ... انا فعلاً مش لاقيه حد اعرفه اخرج معاه
  • قلقانه لاني زمان كنت لما بسمع "انتي هتفضلي في مصر لحد امتى؟" كنت بضحك واقول لحد ما اموت فيها ... دلوقتي بسأل نفسي بجد وبقلق "هو انا هافضل في مصر لحد امتى؟؟؟؟؟؟؟؟؟؟؟؟"
  • قلقانه لاني اول مرة من يوم 25 يناير 2011 اقول الثورة ديه جات نكبه على البلد ورجعتها 100 سنه ورا ... ربنا يخرب بيوتنا خربنا البلد.

MishMish

11 comments:

لورنس العرب said...

انتي اللي غلطانه
لو أمامك الفرصه للخروج أخرجي- هاجري
قاعده تعملي ايه؟
هنا فيه ايه؟
لا شغل نافع ولا عيشه نافعه
زمان كانت الفلوس بتيجي بالعافيه- لكن الواحد كان بيفرج عن روحه بالتمشيه في الشارع كل يوم باليل او الخروج او مقابلة الاصدقاء او التنزه بالسيارة، ينسى شويه اللي و فيه
دلوقت الشوارع كلها ناس قذره- والعيال اللي مش متربيه موجوده في كل مكان- رائحة البانجو فايحة من تحت البلكونه عندي ولما بطل براسي منها بشوف الغرزه مجتمعه
لي صديق العمر قدر له الله أن يسكن في (فيصل) بعد الزواج- كلما اتصلت به يشكي لي المر مما يراه في المنطقه
البوليس عاجز عن فعل أي شيء وبينضرب من البلطجيه في الشوارع
الناس زي ما يكونوا وجدوا الفرصه فأطلقوا لأنفسهم حرية البلطجه- كأنهم كانوا محبوسين أيام العادلي
حتى الشغل أصبح لا يجيب همه- فمع انعدام الرقابه، ما معنى ان تحوش طول السنه حتى تدبر لأطفالك مصاريف المدرسه
احنا مش عرفين نلعب "ماتش كوره" لأننا خايفين من (الناس) وحطي تحت كلمة (الناس) دي 100 خط
__________________
ملحوظه

اليوم كنت في التأمين الصحي مع والدي الذي يصمم انه يكشف في التأمين الصحي لأنه كما يقول "دافع التأمين 40 سنه"- ذهب لهناك وأدركت أن البلد دي اللي مش معاه فلوس فيها هايموت- وخرجت به على مستشفى خاص بعد معاناه 4 ساعات
يومها مساءا اتصلت بي ابنة خالتي التي تعيش في الامارات من سنين طويله ومعها الجنسيه لتخبرني بأن زوجها حالته حرجه- وسافر إلى أمريكا ليعالج هناك بصحبة ابنته ومندوب السفارة استقبل ابنته في المطار واعطاها مصاريف يدها لتشتري ما تحتاجه وتدفع الانتقالات اثناء تواجدها هناك
ففكرتني بواحد صديقي من الاخوان قال لي يجب ان نسمع كلام الحكومه عندما تقول لنا "عليكم ترشيد الكهرباء" مثلما يفعل اهل الامارات
فضحكت وقتها وقلت طيب اهل الامارات بيستفيدوا من الحكومه عندما يقعوا في مشكله ولهاذ بيسمعوا كلام الحكومه- انما احنا هانسمع كلام الحكومه ليه؟ وبناخد منا ايه أو هناخد منها ايه؟
انا عن نفسي الحكومه لا تبحث عني إلا أول شهر مارس من كل عام لأدفع الضرائب- بإستثناء هذا لا أحد يسأل في أهلي باقي السنه

وكفايه كده احباط على جماهير البلكونه

إميل فتح الله said...

حضرتك لو تقدري تهاجري ولكن قاعده بإرادتك تبقي بتظلمي نفسك وأولادك والندم وإكتشاف أن الموقف ده غلط هيكون متأخر , أحنا ممكن نقف قصاد مبارك أو العسكر أو الإسلاميين , أنما المشكلة في الشعب والمجتمع وبالتالي مفيش أمل ,هاجري قبل ما القرار ميبقاش في إيدك , هاجري لو عايزه تقدمي أكبر خدمه لأولادك .
إميل فتح الله
(مدونة المنطق)

نوال said...

وأنا ودي أهاجر من السعودية ...لكن يدي مربطة ...ماذا يفعل المستضعفون أمثالنا ؟

strategicalone said...

معليهشى يا مشمش احب اصحح لك معلومة يمكن تكونى نسياها . لما الانقلاب حصل الذى يسمى ثورة علشان كان فية استغلال للعيال السيس كانت مدونة البلكونة من اشد الناس تاييدا لها وكنا بنعلق عندكم ونقول ان الوضع الحالى احسن لكن كنتم تقولون مهما حصل التغيير احسن . معليهشى كل واحد يتحمل نتيجة اختياراتة . طبعا انتوا دلوقتى فى حاجة اسمها مبتدا الاوجاع يعنى لسة فى بداية الايام السودة يعنى مصر دى ها تكون اسواء من افغانستان لية اسواء لان افغانستان عندهم حد يديهم مساعدات لكن مصر لا حتى المعونة حا نحاول نقطعها من هنا انشاء رع بس بعد ما نشيل الكلب اوباما . يلا باى بس حاولوا تنقذوا عيالكم وسيبوا البلد

Migo Mishmish said...

لورنس العرب صديقي العزيز مش عارفه اقولك ايه مش هاين عليا امشي ولا قادرة اقعد
بقدم كل سنه في الهجرة العشوائيه وانا بقول يا رب ومش قادرة اكمل الدعوة .
.... مش هاين عليا اقول يا رب تيجي وعلشان عيالي بقول يارب تيجي
********************
اما بالنسبه للتامين الصحي فحدث ولا حرج امي بعد ما فضلت طول عمرها تدفع اشتراك التأمين جالها سرطان فجأة عملنلها علميه الاستصال على حسبنا وقولنا نكمل الكيماوي في التأمين واللي كان لازم تاخده بعد العمليه في مدة متزيدش عن شهر .... راحت مستشفى التامين قعدنا 6 ساعات والله وهي مكنش مر على تاريخ العمليه 3 اسابيع وبطنها مفتوحه بالطول ... وبعد ما دخلت عملولها تحويل بجرعه واحدة ...قولت للدكاترة ديه محتاجة 6 جرعات بمعدل جرعه كل 3 اسابيع قالولي ما قبل كل جرعه تيجي نعملها تحويل
قوتلهم طيب
قومي ياما حقك عليا مش كفايه عليها السرطان ... لا كمان تتذل علشان تاخد العلاج اللي دفعت تمنه من مرتبها طول عمرها
احلى حاجة بقه في دخولنا المستشفى سبت معاها بنتي واخويا يطلعوا في الاسانسير وانا معايا الولد الصغير على ايدي بخلص ورق تحت ... على منزلت كان الاساسنير وقع بالناس اللي فيه واحدة رجلها اقتطعت واتنين رجاله شالوهم جثث زي الخرفان المدبوحه بيدوروا على حد يسعفهم
الاسانسير اللي كان المفروض تركبه امي وبنتي واخويا طبعاً روحي راحت ... بس الحمدلله ماركبهوش علشان كان زحمة قوي ملقوش مكان يقفوا فيه

Migo Mishmish said...

استاذ اميل: كل اللي اقدر اعمله اني اقدم على الهجرة العشوائيه انما اعمل زي بقيه اللي اعرفهم اللي سافروا وكسروا الفيزا ووقفوا وقالوا احنا مضطهدين في بلدنا وخايفين نرجع ... ما قدرش اعمل زيهم لان موقفهم رخيص
هما قدروا يهربوا وسابوا اللي مش قادر يهرب علشان الاقليه تقل اكتر واكتر !!! ومتاعبهم تزيد
ربنا يحافظ على الولاد ويسيج حواليهم ويحمي بلدنا

Migo Mishmish said...

نوال: كلنا حالنا زي بعضنا في بلاد الشرق الاوسط السعيد
نفسنا نرمي نفسنا بره الخريطة
***********************
strategicalone
كنا مؤيدين للثورة اللي كانت هتخلي البرادعي رئيس مصر
عمرنا ما كنا نتخيل ان الثورة ترجع مصر للعصور الوسطى

Android said...

بصراحه موضوع جميل بس مش الحياه كئيبه اوووى كده اعتقد انو لسه فى امل برضو

نوال said...

الله يكون بالعون ...عانينا من مرض أختي رحمها الله بسرطان الثدي ...عندنا في المنطقة الشرقية بالسعودية مستشفى واحد حكومي للأورام ...ما أقول لكم العلاج بالمجان ومسوتيات عالية جداً ...لكن المشكلة أن المستشفى مليااااااااان يا كافي الشر ...ومعاه أرماض ثانية مثل القلب والكلى والعظام وفي الدمام ...مع أن المنطقة الشرقية مبتلاة بالأورام ومن جميع الأنواع بسبب الحروب المتتالية ورمي القنابل النووية على شواطئ الخليج وإيران والعراق ...ونحن دولة أمام العالم غنية وذات ثروات لكن كلها منهوبة إما من الحكام أو الاستعمار الأمريكي ...تخيلوا أن المرضى يأتون من جنوب المملكة عشان يتعالجون مع أنه بالإمكان فتح مئات المستشفيات من هذا النوع وبمستويات عالية من العلاج ومن طرف الجيب بسبب عائدات النفط التي يحسدنا عليها الجميع ...لن أنكر نعمة ربي ...لكن ما يحدث عندنا يخلي العقل والقلب حزييييييين ...يا ناس أموالنا وثرواتنا منهووووووووبة وما من مصدق لكلامنا ...آسفة على الاسترسال لكن كلامك هيج أحزاني على أختي ...الله يشافي الوالدة ومرضى المؤمنين والمؤمنات بحق محمد وآل محمد

لورنس العرب said...

لو لا تريدي الخروج الآن يجب أن تفكري في الأولاد
المستقبل لن يكون أفضل عندما يكبروا - ده توقع واتمنى ان أكون مخطيء
يعني حتى التعليم اللي كانوا بيقولوا عليه بايظ أيامنا كان أفضل من الآن
وكل ما الوقت بيتقدم بيكون الوضع فيه اسوأ مما كان قبله
ولو كان الواحد شاف بارقة أمل في المستقبل القريب كان التفاؤل حل عليه
لكن مع الاسف الامور تزداد تعقيدا
لي 3 اصدقاء مهاجرين امريكا
كل يوم بكلمهم على النت بيحسروني على اللي انا فيه
ولما بيرجعوا كل سنه بكون موصيهم على هدوم وأحذيه لو فضلت اشتغل طول السنه اشتغل مش هعرف اشتريهم في مصر ولو مشيت على الحيط

آآآآآآآآآآآآآآآآآآآآآآآآه

تعبااااااااااااااااان جدا

لورنس العرب said...

بخ

There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق