Thursday, April 30, 2009

حرقه دم

اغتصاب سيده عجوز سنها 97 سنه : كان معجب بالطقم ولا ايه؟..الدهن فى العتاقى ...وانا اقول صباح عماله تتجوز عمال على بطال ليه ؟ لا حول ولا قوة الا بالله
حادثه القطاميه بتاعه التريلا : البانجو سيد الموقف
تفويت الزمالك للاسماعيلى : عادى ...واحده وعشيقها متوقعين ايه يعنى ؟؟
استهبال الحكام : بتكلم عن حكام الكورة مش حاجه تانيه ..ماحدش يفهمنى غلط
لا علاوة سنويه ولا اجازة للعمال : الحمدلله مافيش علاوة ..ماهو كانو بيغلو الاسعار بعدها
اعدام الخنازير: ..مع ان الخنازير مبرطعه فى البلد ..لا والى يضحك بقى ان فيه ناس خدتها من ناحيه الدين برضه ..يعنى بعض المسلمين قالت شفتو حكمه ربنا فى تحريم اكل الخنزير ؟ ..طب مالفراخ برضه جالها ..وبعض المسيحيين قالو ازاى يموتو الخنازير .. دا اضطهاد ..
الجزمه الجديده بتاعه مشمش اتقطعت مع ان بقالها اسبوع بس ..
خصم يومين من مرتبى لان طالب عندى زقنى وقالى هاجيب بابا ينفخك ..وانا بقول لكل شاب وكل فتاه ..لو طالب عندك شتمك وضربك ..بوس ايدك شعر ودقن ..وقوله انا اسف حقك عليا عشان ميتخصمش منك يومين
فيلم دكتور سيليكون ..وفيلم علقه موت ...رجعنا تانى للايام دى ؟؟
قضيه حزب الله وتوابعها : ياعم نصر هو احنا ناقصينك؟ روح جاهد فى حته تانيه سيبنا فى الهم الى احنا فيه
الغاء برنامج حمدى قنديل ( قلم رصاص ) : الظاهر خدوا منه البرايه
للمرة الالف فيلم الطريق الى ايلات فى عيد تحرير سينا : ياريتنى كنت معاهم
بتاع السجاد الى تحت بيتنا مصمم برضه ياخد الشارع لحسابه
الراجل صاحب العمارة : كل شهر يلهف مننا فلوس جديده للاسانسير ..قمه الابتزاز
تقليل ميزانيه الزراعه والرى : قال يعنى احنا كنا بنزرع اوى
الداخليه طلبت زياده الميزانيه لمواجه الاضرابات : معاهم حق الاضرابات كترت اوى فى البلد
البامبرز بتاع ساندو بقى مكلف جداااااا ..بفكر اقعدها عالبوووتى من دلوقتى
احمد زويل مستشار لاوباما : احنا مش كرمناه بقى وحطينا موضوع عنه فى كتاب القراءة؟
اتقلبت انا وساندو فى الشارع وايديا ورجلى اتبهدلو من الوقعه بس الحمدلله ربنا ستر... وكله من واحده غبيه ماشيه فى الشارع بتتفرج على المحلات
سعيد البواب فى العمارة الى قصادنا ساب العمارة ومشي بعد ماسرق ممسحه وشرشوبه وجردل تمنهم 45 جنيه
وضرب خمسه جنيه كمان من ساكن كان مفروض يديهم للزبال ..
جارنا الرخم بييجى كل شويه يسأل على الجرنال بتاع النهارده ..طب مايشترى
ميجوووو المحروق دمه

25 comments:

Bastawisi said...

ايوة موضوع الخنازير اضطهاد
يعني لو اصحابها مسلمين و الاسلام مش بيحرمها كان خد بسلامته القرار بقلب جامد كده؟

على فكرة النفاق للمسلمين مش هايخليهم يحترموك برضو

Migo Mishmish said...

بسطاويسي
اولا : منور البلكونه .. انت قبل كدا زعلت لما قلتلك انت بتدخل شمال من غير ماتحسب او تفكر ..دايما انفعالك ومشاعرك بيسبق تفكيرك .. وتعليقك دا اثبت كلامى ..
ثانيا : لما تكون عند حد فى بيته وقاعد عنده فى البلكونه ..من الادب انك تحترمه وتحترم بيته ..مش تشتمهم وتقولهم انهم منافقين ..
ثالثا : احنا بنكتب بشخصيات افتراضيه ومش هانخاف اننا نقول ان فيه اضطهاد ..فعلا فيه مشكله بالنسبه للمسيحيين فى مصر انهم بيعانوا من تمييز ..واخوتنا المسلمين المتفتحين منهم متفقين معانا على ذلك ..بالنسبه للاقباط والمرأة والصعايده والبدو فيه تمييز ضدهم ..
انما سيادتك على راسك بطحه وعندك عقده ذنب وكل حاجه تحولها لاضطهاد والذى منه ... طب مالفراخ مش حرام عند المسلمين والمسيحيين ..نسيب الناس تموت عشان خاطر سيادتك بتعانى من عقده الاضطهاد ..بطلو بقى نظرة ضيقه للمواضيع ومتاخدش كل حاجه بحساسيه زياده عن اللزوم ...انا معاك ان فيه ناس خدتها بمحمل الدين ..يعنى فيه ناس طالبت ان خنازير تتعدم عشان اكلها اصلا حرام وكيدا فى المسيحيين ..وفيه ناس زى سيادتك خدتها على انها اضطهاد ..انما الصالح العام بيقول ايه ؟ ياريت يا اخ بسطاويسي تبقى محايد اكتر من كدا ..وتبقى عقلانى ..واكثر حكمه من كدا : كونوا حكماء كالحيات ودعاء كالحمام ..مش كدا ولا ايه يا باستووو ؟
ميجووووووو

Desert cat said...

اهم الانباء فى البلكونة
بصراحة كلها اخبار تحرق الدم اكتر من بعضها خصوصا حسن زعبولة ده الله يحرقه
والف حمد الله على سلامتك انت وساندو

magi said...

ازيكم بلكونتكم زى العسل
فعلا حاجه تحرق الدم
خصوصا الناس الى ماشيه مش باصه قدامها دى

انا اصلا لو مكان الحكومه كنت دبحت الفراخ والطيور والخنازير وكل كائن يجيله انفلونزا يعنى هنضحى بال 80 مليون عشان خاطر كام فرخه وخنزير رغم برده ان الحيوانات بتصعب على بس الظروف دلوقت بقت صعبه
ربنا يستر

Bastawisi said...

احترمك فى بيتك او بره بيتك ازاى و انت منافق؟؟

انا بعبر عن رايي فيك و فى كلامك عاجبك عاجبك مش عاجبك يبقى انت اللى على راسك بطحة و حاسس من جواك فعلا انك زى مانا مابقول

الفاو و الهو قالو ان دبح الخنازير مالوش لازمة تماما لان المرض اسمه انفلوانزا خنازير انما اللى بيجيله و بينقله بني ادمين
الخنازير مظلومة فى الموضوع لكن طبعا واحد جاهل زيك هايعرف منين كلام الهو و الفاو؟؟

على فكرة انت مريض نفسي و من وشدة وطئة الاضطهاد عليك بقيت تضحك على نفسك و تقول ده مفيش اضطهاد و انما الجنازير حلال قتلها زي مالاسياد مابيقولوا!!!!!!!!

Bastawisi said...

خد اقرا
http://www.copts-united.com/article.php?I=64&A=2343

Mowatten Ardi - مواطن أرضى said...

Migo we Mishmish, ta7eyatti.
Nice blog. Keeping the Egyptian spirit in your writing make it pleasure to read.

Salaam
Mowatten Ardi.

مواطن مصري said...

بسطويسي انت عامل زي ايمن الظواهري يعني ظلامي

بطل تقلب اي خطر لطائفية و الله انتم اول ناس اصحاب الخنازير هيموتو


بطلو ام الظلامية الي فيكو

موضوع الزمالك عادي يعني احنا و الدراوي ش واحد

مواطن مصري said...

و كمان يا بسطويسي جايب مواقع مضروبة زي المصريون

مواقع ظلامية لا اثق فيها

على باب الله said...

الغاء برنامج حمدى قنديل ( قلم رصاص ) : الظاهر خدوا منه البرايه

عجبتني قوي

Migo Mishmish said...

بسطاويسي
اولا انت شخص غير جدير بالاحترام ...وعندك مشكله فى عقلك الباطن ..وافقك محدود ..ومعندكش غير عين واحده بتبص منها على الدنيا ..وانا مش هاضيع وقتى مع واحد زيك محدود الفكر ..انت لو عندك قضيه ممكن تكسب احترام الناس لو اتكلمت بالعقل وبالحكمه عشان تقنع الناس بموقفك ..وبقولهالك للمرة الالف انا محدش يعرفنى انا مين ولا ساكن فين عشان خاطر اخاف اكتب فى اى موضوع .. معلش ياسيدى انا منافق يمكن هايدولى نيشان ولا يمكن هادخل مجلس الشعب عشان كدا بحاول انى اكسب اصوات ..بطل بقى عقد وهلاوس ..تصدق انا حاسس ان عندك عدم توافق عضلى عصبى وفى حاله متأخرة ..انت الى حاسس بالاضطهاد ربما لانك فاشل فى حياتك فبتحاول انك ترمى على اسباب وهميه وغيبيه ..الحمدلله انا راجل ناجح فى شغلى وبكسب احترام الناس ولو فيهم حد متعصب او دماغه زى حضرتك برضه بيحترمنى لان اسلوبى واضح وبجبره على احترامى ...انما سيادتك واضح انك كنت بتنضرب وانت صغير فربت عندك عقده الذنب وعقده الاضطهاد ..
الجاهل هو انت ..بتفكرنى بالعيال المتخلفه الى بيقعدو يتفرجو على ماتشات الاهلى والزمالك ويعايرو بعض ..لو رجعت للارشيف بتاع المدونه هاتلاقى اننا كتبنا عن الاضطهاد بس بموضوعيه وبكلام يخلى الناس تحترمك وتقتنع بموقفك ..مش كل هفوة نقول عليها اضطهاد ..وبعدين الرابط الى انت باعته ده بتاع عدلى ابادير بيدخلو العيال الى زيك ..عدلى ابادير الى عمالى يولول ويعيط وقاعد فى سويسرا مابيعملش حاجه غير الشتيمه عشان يبقى بطل ..طب عدلى ده عمل ايه عشان الغلابه او ساهم فى ايه للمصريين او فى الكنايس لما هو بطل كدا ؟ فى حين ان واحد زى مجدى يعقوب اجبر الناس على احترامه باعماله وصمته ..مش عمال يتكلم ويرغى ويهبل فى الكلام وخلاص ..
نسيت اقولك حاجه ..كان مفروض انى اكتب فى البوست عن باقى حرقه الدم ..ان لسه فيه فى مصر بنى ادمين زيك وبيفكرو بطريقتك ..زيك بالظبط زى العيال المتطرفين بتوع الاخوان ..نصيحه روح انضم ليهم واعملو توليفه عشان البلد تولع ..
على فكرة لو مش عاجبك البلكونه بتاعتنا ممكن تشوف اى بلكونه تانيه تساعك ولو انى اشك ان فيه بلكونه هاتقبلك لانك شخص غير جدير بالاحترام وقليل الذوق وقليل ال .....كمل انت بقى
مش منور البلكونه ولا حاجه
ميجووووووو

Migo Mishmish said...

قطه
منورة البلكونه كالعاده ..على فكرة من الحاجات الى بتحرق الدم الواد الى علق عندك وقعد يشتم ويقول كلام متخلف بجد الوضع بقى زفت ..الناس بقت تقرف فى سلوكياتهم ...هانلاقيها من برة ولا من جوة ؟
تحيااااتى
ميجووووو

Migo Mishmish said...

ماجى
منورة ياهانم
هانعمل ايه بقى ..فيه ناس دماغها ضيقه ..زى مايكون الخنزير دا رمز المسيحيه او عدو الاسلام ..طب مالفراخ محلله فى المسيحيه والاسلام نقوم نسيب الفراخ تعدى الناس عشان خاطر كام واحد محدودى الفكر مايزعلوش؟
تحيااااتى
ميجووو

Migo Mishmish said...

مواطن ارضى
سعيد بوجودك فى البلكونه ..ومتشكرين عالكلمتين الحلوين ..تحب تشرب شاى بالنعناع ولا ساده اصل واضح ان القعده هاتطول معاك
الا قولى هو انت مواطن ارضى عشان انت زينا فى البدروم ؟ ولا انت مواطن ارضى من كوكب الارض؟
تحيااااااتى
ميجوووووو

Migo Mishmish said...

مواطن مصرى
منور ياباشا
متتعبش نفسك مع الاخ بسطاويسي عمرك سمعت عن واحد بسطاويسي فهم ؟
بس انا زعلان منك لانك قلت بطلو ام الظلاميه الى فيكو ..احنا مش كلنا كدا يا مواطن ..
تحياااااتى
ميجووووووو

Migo Mishmish said...

على باب الله
منور البلكونه
بصراحه حمدى قنديل غلب معاهم كل مايروح قناه يلغو البرنامج ..الظاهر المرة دى خدو البرايه ..ممكن بقى حمدى قنديل يشرى قلم جاف ويريح نفسه
تحيااااتى
ميجووووووو

Hassan El Helali said...

يا سلام يا عم ميجو

بوست يحرق الدم فعلا والله
كل بند فيه يحرك المواجع
ما تاخدش في بالك من بسطويسي
ده دار شتمني عند اللي يسوي
وخصوصاِ عند اللي ما يسواش
ومصر يجلد نفسه بموضوع الإضطهاد
وشغال علمانية وحرية رأي إتجاه واحد
مسموح بالدخول بس مش بالخروج
زي عراعير الحجاب بالظبط... البنت لها حرية التحجب
لكن يا ويلها يا سواد ليلها لو قلعته

Bastawisi said...

سمعت ياطرش لما قلت ان الفاو و الهو قالوا ان المشكلة مش فى الخنازير؟ ولا انت انت عاوز تشتم و خلاص؟؟

طيب مادبحوش الطيور ليه مع ان فعلا الطيور بتنقل المرض بعكس الخنازير

المقال ماكانش عن عدلي ابادير و انما كان عن انفلوانزا الخنازير ياجعر
بطل حقد شراميطي بقى

Migo Mishmish said...

كدة عيب يا ابني
انت شايف ان موضوع دبح الخنازير اضطهاد
ماشي يا عم انت حر
احنا منافقين. طيب يا عم تشكر
كدة كويس
يلا
Love,
MishMish

Anonymous said...

bastawesi bgad anta mota7'alif ana mesh 3arfa anta 3ayesh ezay l3'ayet detwa2ty walahy anta ely g3ar mesh migoo ezay amsalak 3aysheen any how rabena yhdeek

ابن المليونير said...

يااااااااة كل دة شايله فى قلبك
و ضيف عندك واحد بسطاويسى كمان داير يشتم اى مدونة صاحبها مسيحى معتدل ، عجيبة مع إنة بيقول إنة مسيحى بس الظاهر المتطرف بيكره نفسه حتى
و النبى يا عم ميجو ما ترد عليه لحسن دة بيفرح قوى لما حد يعبره
تحياتى وكل سنة و ساندو طيبة

Anonymous said...

صباح الفل عيكو
سيبك من كلام بسطاويسي دة يا عم حد يرد على بسطاويسي برضو كفاية ان افكارة واضحة ومرفوضة من الكل
بس المشكلة ف جزمة مشمش هاتعملة اية
الظاهر ان مشمش مااخدتش الكتالوج مع الجزمة عشان كدة ما استحملتش معاها اكتر من اسبوعين

تحياتي
ام البنات

Mowatten Ardi - مواطن أرضى said...

Yasalaam ya Migo 3ala el shai belne3na3. Teslam eedak :-)
La2, ana mosh saken fe el badroum, ana ya sidi men kawkab el ard zayouko. Ya3ni entema2atti ardiah lekol el nass elli 3alla el kawkab dah.

Ta7eyatti,
Mowatten Ardi.

^ H@fSS@^ said...

اولا الف حمدا على سلامتك و الاهم ساندو
حصلها ايه و ازواي تقع بيها؟
مش فاهمة واحدة ماشية بتتفرج على محلات تعمل كدا ليه؟
شكلها كانت ضاربة سوجارة من اياهم

اما باقي الحاجات فحقلك حسبي الله و نعم الوكيل لما يخصموا منك انت و ميمسكوش الولد ده يعجنوه
بس اجي مصر
تشاور لي عليه و احنا نخلص لك الموضوع

اخيرا
و ده مش دفاع عن الحكومة او المسلمين
لكن فيه من صحاب الخنازير دول مسلمين كتار و بيشتغلوا في لم الزبالة هما كمان
فالقرار معتقدش انه اتعمل على اساس ديني و لكن بسبب تجاري بحت و بس

تحياتي و سلامي لمشمش و جميع قبلاتي لساندو

عاليا حليم said...

هو الواحد يدخل هنا يضحك و يفك شوية و لا يدمع على الأحوال إللى تحزن
:)
:(

There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق