Wednesday, May 13, 2009

اللي ما يشوفش من الغربال يبقى اعمى


لطيف قوي تفسير الداخليه الاوذعيه لتتفجير اللي حصل قدام كنيسة العدرا الزيتون

هايل بصراحة اول ما جم بتوع الداخليه وشافوا التفجير قالك بس اللي علموا كده من المسيحين المتشددين - الاسم الحركي للدهاشنه - علشان يصغروا رقبه الريس ويخلوها زي السمسمه لما يزور امريكا


المسيحين المتشددين - اي الدهاشنة - عملوا زي كوته والست حلويات في فيلم بوحه . حطوا عبوات ناسفه قدام اهم واغلى كنيسة على قلوب المسيحين في مصر علشان يرموا بلاهم عالحكومة مع ان اللي بيقول ان اقباط مصر مضطهدين يبقى كداب كدب الابل

وبعدين بتوع الداخليه دول ماقالولناش المتشددين المسيحين دول ظهروا امتى؟ تنظيم يعني ولا خليه تحت التدريب وده كان اول يوم في العملي عندهم؟ وبعدين مش الاوقع ان المسيحيين المتشددين دول يبقلهم علميات ضد المسلمين بالاولى؟ او ياخدوا منطقه ويعلنوا سيطرتهم عليها زي ما كان حاصل في امبابه زمان؟ ولا هما حبوا يشتغلوا على المستوى المجتمعي الاول - يعني في المجمتع المسيحي - وبعدين لو ربنا وفقهم ينقلوا نشاطهم لبقيه انجاء الجمهورية؟

وبعدين لما اعلنوا الاستنتاج الرهيب ده ورفضته الكنيسة

قالك بس تاهت ولقينها مفيش حاجة اسمها متشددين اقباط يبقى الماس الكهربائي ابن الكلب ده هو السبب. ولانه افتراض على قدر من الهبل محدش رضي يكتب عنه غيرالاهرام

وبعدين لما لاقوها واسعه شوية قالك النهاردة في المصري اليوم: بس ...بس..........بس احنا عرفنا مين اللي عمل كدة الخليه بتاعه حزب الله. هما السبب في كل البلاوي اللي حاصله

مع ان في احتمال ان اللي حصل ده نتيجه طبيعيه إلى إن نسيج الامه الواحد داب وبقى باله و مبقاش ينفع معاه ترقيع ومحدش بقى بياكل من لقاءات البوس العالمي واغنيه اجيال ورا اجيال هتعيش على حلمنا
الوضع كده وصل لمرحلة خطييييييييييييييييييييييرة واللي ما يشفش من الغربال يبقى اعمي يا حكومة
Love,
MishMish

24 comments:

صفا سارة said...

وهى الحكومة ماشاء الله عليه بتطلع قرارات من غير تحقيقات كده مكشوف عنها الحجاب مثلا
حال مصر بيتدهر طول مفى اغبيه متشددين مفيش عندهم تقبل للاخر

الدين لله والوطن للجميع
واللى يعمل حاجة فى حق حد غلط المفروض يتعاقب

واحدة مفروسة said...

الموضوع الصراحة بايخ و بوخ و بقى يفرس على الآخر

خلينا الاول نتفق ان اللى بيجري ايان كان من المسلمين او الاقباط فهو لزعزعة الامان و الإستقرار اللى احنا اتربينا فيه و عليه
عمر المجتمع المصري ما كان بيحس بالتفرقة ديه
و ديه اللى بتخلى الجماعات المتطرفة تتفرس بزيادة
و تندفع لعمل افعال مبالغ فيها علشان تولعها حريقة
بس انا حفرسهم و انتو حتفرسوهم و غيري و غيركم حيفرسهم
لا ن صديقتى الانتيم مسيحية و لا عمري ولا عمرها حسينا اننا مختلفين
ولا حنحس و ما اعتقدش ان شاء الله ان حد حينجح فى دس اي غبار فى علاقتنا
بل بالعكس احنا بنتناقش فى الموضوعات اللى فيها تطرف بكل عقل وحكمة و تحليل للى بيحصل و محاولة الوصول ل ليه و علشان ايه و لمصلحة مين
و اغلب المصريين الجدعان اللى لم تنجع كل المساعي المتطرفة فى زعزعة حب الناس لبعضها
حبفضلوا يحبوا بعض و يدافعوا عن بعض و يفادوا بعض بأرواحهم

المهم خلينا فى الحكومة

انا شايفة ان كل اللى بيحصل ببين حاجة واحدة
ان الحكومة الزمام فلت منها من زمااااااااااااااااااااااااااااااااااااااان
مش عارفه تسيطر
و مش عارفه تبقى حكيمة فى التصرفات
(حكيمة مش تدى حقن) و لو اننا بناخد حقن منهم بقالنا كتير و ساكتين

و الأفعال الهابلة اللى بتحصل ديه كلها سواء اكانت بتاعة الازهر او الكنيسة
فهي ممكن تكون معمولة علشان تبين ان فيه خلل فى الداخلية
وفيه خلل فى المجتمع كله الصراحة
احنا بقينا مش بنشغل مخنا خااالص
شاطرين فى اننا نعترض و نشتم و نطلع القطط الفاطسة فى تصرفات الناس كلها كلها الا نفسنا
بنسمع و نعمل اكشن سريع بدون تفكير
انا شايفة اننا لازم نتفق على اننا نشغل مخنا اكتر ما بنشغل لساننا و الدنيا ان شاء الله حينصلح حالها بيكو و بيا و بغيرنا اللى اكيد مش عايزينا نكون عراق تاني ولا لبنان تاني ولا فلسطين تاني
و اللى اكيد اكيد مش عاوزني اتفرس اكتر من اني مفروسة
سلام خدو بالكم من نفسكم و من اللى حواليكم
الشيطان بقى قوى باللى بيسمع له و ينفذله مخطتطاته

Desert cat said...

مجرد قرارات عشوائية لحفظ ماء الوجه
انا اول مرة قريت عن الانفجار اتقال ان بطارية العربية سخنت وانفجرت يا حلولى سخنت وهى واقفة قدام الكنيسة يمكن كانت علشان 128حمرا ولا حاجه فالاحمر عمل عندها سخونة زاتية
وتم احباط القنبلة التانيةبواسطة رجال الدفاع المدنى
ايشى خيال يا ناس
السيارة انفرجت وهى واقفة واحبطوا القنبلة التانية
اى تضارب ده واى جنان
مش عارفه الحقيقة

MahaRani said...

فاضل تفسير مهم جداً

مختل عقلياًّّّّ!!!!!!!!!!!

زى كل مرة بس الظاهر بقت قديمة

مواطن مصري said...

ههههههه انا ضحوكت لما عرفت موضوع المتشددين المسيحين

و على رائيك لو هيعملو عملية مش هيعملوها في المسلمين

:)))))

بس انا مع القول ان الي وراها جماعات ظلامية منتمية لحزب الله

او القاعددة

ربنا يستر

و يحفظ مسلمين و مسيحين

الارهاب لا دين لة ولا يفرق بين المسلم و المسيحي انظرو ماذا يحدث في العراق

مواطن مصري said...

لا يا مها المختلين كلهم تم القبض عليهم و مبقاش فية ولا مختل في مصر
:)

Bastawisi said...

التفجير ده يوري اد ايه المسيحيين و المسلمين عايشين فى حب ووئام فى مصر

الاضطهاد مش من الحكومة و بس لأ ده من رجل الشارع المسلم كمان

على باب الله said...

يا ترى ها يمسكوا المسؤلين عن الإنفجارات دي , و لا عادي بقى ؟

لأن المرة دي صعب قوي حد يصدق موضوع المختل عقلياً بتاع كل مرة , و الماس الكهربائي ( المظلوم بشدة في بلدنا ) ظهرت براءته بعد ما أبطلت قوات الأمن القنبلة نمرة 2

العبد لله يتوقع سيناريو عادي بقى
و تعيش و تاخد غيرها

يا رب أطلع غلطان

Anonymous said...

والله انا ما باحبش اظلم حد
بس من واقع تجاربى مع اعمال العنف
ضد المسيحيين اعتقد اللى عمل العمل الاجرامى ده ماس كهربى مختل عقليا
اخوكم\ شخص مبالغ فيه

Migo Mishmish said...

صفا سارة
ايون يا ستي الحكومة مكشوف عنها الحجاب والنقاب
والسيد المحقق اول ما سمع البلاغ من غير ما يشوف عرف الحل واتصل بكرمبو

المتشددين دول هيفضلوا موجودين طول ما كل واحد ممنا مش بيحاول ياخد خطوة ايجابيه

يا رب يبقى الدين لله - مش لوزراة الداخليه - والوطن للجميع
Love,
MishMish

Migo Mishmish said...

صاحبتي المفروشة
بصي انا شايفه ان حاله الاحباط والفشل العام اللي فيها البلد انعكست علينا

فبقى كل واحد مننا فارس ولكن بلا جواد

اللي عمل العمل ده كان نفسه يحقق انتصار ويلاقي حد يشجعه. هو كدة افتكر انه بيقدم خدمة لربنا في حين ان ربنا يقدر يحي اللي عايزة ويموت اللي عايزة من غير اي مساعدة من حد

ثانياً زي ما قولت قبل كدة طالما المسيحين صحابهم مسلمين والمسلمين صاحبهم مسيحين يبقى في حد غريب في وسطينا

في حين اني متأكدة ان اللي علموا كدة مصريين زي زيك واتربوا في وسط المسيحين والمسلمين لكنهم زيهم زي غيرهم لما لاقوا استحسان ضمني بمعادة كل ما هو مختلف
وناس خدت مفتايح الجنه وبتوصف الطريق بمزاجها للناس وهي ابعد ما تكون عن تعاليم اي دين سوا ان كان سمائي او ارضي. حسوا ان اللي بيعلموه ده عمل بطولي ومستغربين ان في ناس بتدينه

بصي انا مبنكرش دور الحكومة لاني افتكر ان الفترة اللي كانت قبل اول اضراب (6 ابريل) مكنش فيها حوداث طائفيه ولا مشاكل ما بين اي حد
فالشعب اتلم على بعضه ودور على حقه وبانت هشاشه الحكومة قدام الفيس بوك
ورغبه الناس الشديدة في انها تعبر عن غضبها وتقول كدة كفايه

وانا معاكي اننا مع بعض هنفرسهم بس ده مش هايتم غير لما كل واحد يقوم بعمل ايجابي واحد للآخر
حتى ولو مكالمه تليفون لصديق بعدت عنه لانه مختلف

تحياتي ليكي
Love,
MishMish

Migo Mishmish said...

ده يا قطوطة لان اللي بيتكلم مجنون وفاكر ان اللي بستمع مختل عقلياً
ههههههههههههههههه
ولا يهمك ربنا يديهم على قد مخهم
Love,
MishMish

Migo Mishmish said...

MahaRani
لاي يا حببتي ولا موضه قديمة ولا حاجة
ده بس الدور لسه مجاش عليه
المختل ده كان في حادثه الحسين
ما هما اللي خاربين البلد بالترتيب:
مختل عقلياً
ماس كهربائي
واضافوا ليها اليومين دول خليه حزب الله

وهما استخدموا المختل في تفجير الحسين ولما جه الدور على الماس لاقوها واسعه شوية راحوا ناقلين على اللي عليه الدور اللي هي الخليه ولو ان ديه واسعه شوية برضه
ففي احتمالين الاولاني انهم لما ما يعرفوش مين اللي عمل كدة - ودة المرجح - هيقولوا مختل عقلياً
او يطلع اللي عمل كدة ماس كهربائي مختل عقلياً على رأى صديقنا المبالغ فيه
Love,
MishMish

Migo Mishmish said...

المواطن المصري
مش فارقه قوي مين اللي ورا التفجير من الخارج
حدوث التفجير بيدل على انه لاقى ناس تتبنى فكرة في الداخل
انا مش مع ان الكلام ده غريب او جاي علينا من برة
اللي حصل ده نتيجه تغلل وتنامي التشدد والانغلاق على جميع المستويات
Love,
MishMish

Migo Mishmish said...

باسطووووووووووووو
ازيك يا يا عم
مش عارفه اقولك ايه؟
المرة ديه انت صح
Love,
MishMish

Migo Mishmish said...

على باب الله
يا رب يا اخويا يا رب
ايكش يارب ولو مرة واحدة يتم القبض على الجاني في قضايا الفتنه الطائفيه ويتقدم للمحاكمة وياخد جزاءه
علشان لما حد زي باسطووو يتكلم نقوله عيب اختشي الحكومة واقفه للناس ديه بالمرصاد
لكن الحكومة احرجتنا اقوله ايه انا دلوقتي؟
والراجل لسه شتمنا في البوست اللي فات لما قولنا ان الاضطهاد بقه عقدة وشماعه
يعني في بوست اقوله انت غلطان وفي البوست اللي بعده اقوله عندك حق
يرضيك كدة يا عم؟
Love,
MishMish

Migo Mishmish said...

صديقنا المبالغ فيه
تصدق تعليقك موتني من الضحك
صح هو ماس كهربي مختل عقلياً
وشكراً على الشكولاته
Love,
MishMish

سمراء said...

بيتهسألى عجزهم انهم يمسكوا اي حد قبل كدة زي اللي فجروا الازهر واللي قتلوا الصائغ وغيرهم وغيرهم
خلاهم يقولوا اي حاجة علشان ميبقاش منظرهم وحش

سمراء

Migo Mishmish said...

سمراء
بصي انا اصل ما بثقش في الحكومة ابداً
ممكن يكون احتمالك صح وممكن يكون ان الحكومة ملهاش نفس تعاقب اللي عمل كدة
زي ما حصل في اعتداءات كتير على مسيحين قبل كدة
وعادتاً يإما ماكنوش بيوصلوا لحاجة ياما كانوا بيمسكو ناس غلط علشان يطلعوا بعدم كفايه الادله
ولنا في الكشح مثال واضح
love,
MishMish

Anonymous said...

watch our civilized nation.
http://www.news.com.au/story/0,27574,25500114-5018988,00.html

Marika

نيران said...

السلام عليكم
انا جيت متأخرة شوية
بس انتو فاتتكو حاجة مهمة اوي
انتو مش عارفين ان الحكومة بتاعتنا مرفوع عنها الحجاب ولا ايه؟
يعني احنا مش زي الاف بي اي ولا السي اي ايه بنعمل تحقيقات و الكلام دا
لالا نونو
الكلام دا بتاع الدول اللي مش عارفة ربنا
احنا بقى حكومتنا عقبال أملتكم بتفتح المندل
اه بتجيب عيل صغير، و شوية تراب من قدام الكنيسة و هو اللي بيقول اللي شايفه في المندل
يبقى نصدقها ولا ما نصدقهاش

دستوووور يا اسيادنا
اشتاتا اشتوت

Migo Mishmish said...

اهلاً نيرو
ماهي صفا برضه رجحت موضوع الحجاب ده
اما نشوف هيوصلوا للعمل كدة
ولا هنعمل زي النظام المتبع دلوقتي ونكشف راسنا وندعي عاللي عمل كدة
Love,
MishMish

عمو عصام said...

أنا عارف مين اللى عملها...الألنراس الأهلاوى.

Migo Mishmish said...

عمو عصام
اخيراً
يا اهلاً وسهلاً

تصدق ممكن !!!!!!!! مش عارفه عدت إزاي على شوبير

متغبش عننا كتير كدة تاني
Love,
MishMish

There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق