Friday, July 30, 2010

اللي عنده معزة يلمها


مش غريب ان ذكور الشوارع يعتبرون كل إمرأة مشروع واحدة ... لا مؤاخذه


يعني علشان اقف في الشارع استنى حد او اوقف تاكسي لازم اروح للمجلس القومي للمرأة واطلع في برامج حواريه ويتكتب عني في الجرايد واعمل مظاهرات علشان ذكور الشوارع يلاقوا حد يقولهم لا


الحكايه ان اي واحدة واقفه في الشارع تلاقي العربيات تهدي جنبها وتضرب كلاكسات او عربيات تضرب كلاكسات بمعني شتيمة واي كلب راكب عجله او موتسكيل يقل ادبه


وتلاقي بقه التعليقات في التليفزيون والبرامج الحورايه عن التحرش لازم يبقى فيها تعليق من واحد مخه مسوس يقولك اصلنا بعدنا عن الدين


بعدنا عن الدين ...................دين............... -طبعاً المعنى وصلكم


دين ايه اللي بعدنا عنه اذا كنا اتخنقنا من مظاهر الصحوة المباركة بصوا للناس وروحوا اي مصلحه حكوميه او غير حكوميه وشوفوا الدين عامل ايه


تعليق تاني لا يقل غباء عن التعليق الاول يقولك اصل المرأة مكانها البيت


بيت...............بيت ..............-برضه فاهمين


ايه مكانها البيت وانت مين اللي اداك الحق انك تقرر مصيري مش من حقك تفرض على بني ادم تاني الوصايه


طب انت الستات اللي اتعاملت معاهم جواري رضيوا انهم يبقوا زي اي كنبه او كرسي .........انا مش جاريه ومش هاقعد في البيت ومن حقي امشي في الشارع من غير ما حد ينتهك وجودي ويسمعني كلام او يبصلي بطريقه تنم على التربيه اللي اترباها واللي كان بيشوف اهله بيعملوه


ثم في شويه اسئله بقه تحتاج الى اجابه:


هل كل الناس اللي بتهدي بعربتها ديه عندها اسعتداد لممارسه الرذيله في اي وقت كدة؟


هو مفيش حاجة بتقول لاي حد انك حتى لو شايف اللي قدامك غلطان ده مايبررش خطئك؟


طيب ليه اللوم بيقع على المرأة بس هو مش الفعل الفاضح بيحتاج اتنين؟ يعني عمرك شوفت واحدة اعتدت على واحد؟ طيب ما هو اللي بيقف بعربيته او يقول كلمه بايخه ما هو كمان لا مؤاخذه؟


مش غريب ان اخطاء المجتمع المنافق تتحملها كلها المرأة: يعني اصل الشباب تعبان والستات بتلبس مش عارفه ازاي طيب هو اللي بيقول الكلام ده يرضي ان العوام والشحاتين يتقتحموا بيته وياخدوا عربيته اللي جايب فلوسها من بتوع الجاز على اساس ان الناس تعبانين ومش لاقين ياكلوا وحضرته عايم على وش الفته


العيال لو سفله يقولك اصل الام مش عارف عامله ازاي. طيب والاب كان فين؟


لما جماعه ارهابيه فاشله زي حماس تمسك البلد بدل ما يوحدوا البلد علشان يحلوا مشكلتهم بيدوروا على ازاي يذلوا الستات. يعني مش كفايه الاسرائلين والفقر والعيشه الهم على الستات لا والحكومة كمان


واحد يقتل واحدة علشان غلطت مع حد يبقى اسمها جريمة شرف لكن الحد محدش يجي ناحيته او لما يبقالي قريب سافل مستبيح لا عنده شرف ولا انسانيه مش مسموحلي اجي ناحيته علشان هو راجل


في مثل مشهور ذكور الشوارع مش حافظين غيرة بيقول: اللي عنده معزة يلمها!!!!!!!!! وتحولت المرأة من انسان الى معزة لتبرير سفاله الذكر


اي فتوة دينيه تمس بشكل او بأخر المرأة؟ السلام حرام وشها حرام صوتها حرام لو تزينت حرام لو خرجت حرام ولو.............. علشان خاطر انها بتغوي الراجل


طيب مفيش فتوى واحدة منصفه تقول ان الراجله اللي مش قادرين يتحكموا في نفسهم وبيعانوا من خلل هرموني لازم يتحبسوا في البيت ودة ليه سواب كإمطاه الاذى عن الطريق


ثم اذا كانت الستات سبب المشاكل او ناقصات عقل ودين لماذا لا توجد اي نصوص تقول ان هناك استثنى في محاسبه المرأة على اساس انها خلقت على هذا الشكل غبيه ومحرضه على الشر. يبقى اللي غلطان في الموضوع ده اللي خلقها مش هي


يعني لما تجيب كمبيوتر بكرتونته وتلاقيه بايظ يبقى العيب مش عيب الكمبيوتر عيب الشركة المصنعه


مش معقوله الست تشيل غلط البني ادمين وغلط اللي خالقهم - على حسب الوضع السائد - ولا ايه


Love,


MishMish

12 comments:

إنـســـانـة said...

بس ربنا سبحانه وتعالى خلقنا على أحسن وجه رجالاً ونساء

Hassan El Helali said...

إيه يا مشموشه؟
زعلانه ليه كده؟ الشبشب هو الحل
يا أختاه الناس جالها سعار جنسي من يوم ما بطلوا يشوفوا شعر البنات
والثابت علميا وتاريخيا إن اللي بيتربي في مدارس مختلطه
أو بيروح نوادي فيها بنات "سافرات" وبيتعامل معاهم عادي
عمره ما بيتجاوز الحدود مع اي بنت
المرض بيظهر بسبب الحرمان من التعامل الطبيعي
ومن التركيز على الجانب الجنسي في المرأة من جانب المشاخخ اياهم
مش عاوزه عالم ذرة علشان يلاحظ إن العلاقة
بين انتشار الهباب ده المعروف بالحجاب والإسدال والنقاب والزبالات دي
وبين الإنحدار الرهيب في الأخلاق علاقة طردية تماما
ولسه ياما نشوف لما تستحكم فينا أكتر أخلاق البدو
ويبقي كله مسموح من وراء الأبواب المغلقة طالما الستر والغطا ميت فله وعشره

ما تزعليش يا مشموشه... نهايتهم قربت... صدقيني

آخر أيام الخريف said...

على فكرة انا من رأى حسن ان الاختلاط الصحى المحسوب و المقنن من الصغر بيقلل من التفكير المجنون ده .... لكن الحقيقة يظل البيت أولا و أخيراً هو الأساس . يا فرحتى لما يكون فى مدارس مختلطة و أمه فى البيت بتضرب قدامه بالحزام و للا أبوه بيشجعه يجيب أخته من شعرها ... شفتها كتير للأسف فى بيوت صاحباتى اللى عندهم أخوات صبيان
حلو التوبيك يا مشمش

Ms Venus said...

الله ينور عليكى

كلام اصاب كبد الحقيقة

بس مين يفهممممممممم


ربنا يستر من اللى جاى ويرحمنا

Tears said...

معاكى فى انتشار التحرش و المعاكسات بس اعتقد انه قل عن اخر خمس سنين مش العكس و جايز ده بسبب التوعية او لاسباب اخرى اثرت على شهية المتحرشين و كسرت نفسهم

Anonymous said...

مشمش
انا مقدر زعلك و حنقك حلوة حنقك دي . صح؟
السبب فى ده كله هو التدين يجى واحد يقولى اصل التدين بقى شكلى و بعدنا عن جوهر الدين . اجى بقى انا و اقوله لا يا معلم هو ده اصل الدين لما تفهمنى ان المرأه هى ماكينه صناعه الشهوةو هى اصل النجاسه مع ان النجاسه لا تفارق رأس الرجل العربى يبقى انت بتضحك على
مع انى راجل و مايعبنيش حاجه و احط صباعى فى عين التخين لكن موضوع التحرش و المعاكسه بقى مستفز لابعد الحدود و ربنا يبعد عنا التدين الشكلى و الفعلى علشان نخلص منه
لكن الغريب يا مشمش ان فيه حاجه مجننه اهلى انى يوم الجمعه بالاقى الجوامع ضاقت بالمصلين فافترشوا قدامها و سدوا الشوارع. مش مهم . و وقت الاذان الاقى الناس بترمح علشان الصلاه اللى مجنن الافاضل اهلى انه لما كل الناس حلوة كده و بتصلى امال مين اللى بيرتشى و مين اللى بيسرق و مين اللى بيكره و مين الى بيحتكر و مين اللى معيشنا فى ديك ام الفساد ده كله كفانا الله شر التدين
شخص كان مبالغ فيه

Kontiki said...

واضح انك مشحونة بس رائعه اللوحة :)مع البوست
انا شايفة المشكلة اساسها التربية و كل المناخ العام الذكر اتربى على انه السوبريم او كائن اعلى من البنت واننا نتحمل كل الخطيئة يعنى هو يعاكس و يقل ادبة ويحاول يتحرش ويقرفنا واحنا نبقى السبب !! ثقافة عرة جدا الحل الجذرى اللى انا شايفاة للمشكلة اننا اى الستات يبطلوا يخلفوا صبيان من اصلة عشان جنسهم ينفرض ونخلص يا اما يخلفوا بس يعرفوا يربوهم عدل :)

Migo Mishmish said...

حسن الهلالي صديقي العزيز
لو سمعت كلامك هامشي حافيه في الشارع يا حسن
ومش هيكفي شبشب واحد انا عايزة بياده من بتاعه الجيش
اما بالنسبه للثابت علمياً فده يقتنع به اللي زينا انما دعاه البدوية والتصحر العلم عندهم حرااااااااام ومفسده للمجتمع
ولما يقروا الكلام اللي حضرتك بتقول عليه يتهموك في شرفك ويقولوا عليك ديوث
مع ان اتخن واحد فيهم معندوش مانع ان مراته ترضع كل المشخاخ صحابه وطلبه علم التنجيم اللي بيديهم مخضرات في "كيف تحيا وكأنك في عصر الانسان البدائي" والسواق والطباخ و...و....و
ربنا يستر من الهبل اللي جاي يا حسن
نورت المدونة
Love,
MishMish

Migo Mishmish said...

إنسانه
مانا عارفه يا ستي المشكله في اللي عايز يلتزم وهو مش قادر علشان قلبه مش نقي من جوه فبدل ما يصلح نفسه بيدور اذاي يرمي اسباب فشله على المجتمع


اخر ايام الخريف
ربنا يكرمك وكويس ان التوبيك طلع عاجبك
عندك حق طبعاً
بس الغريب بقه ان الولد اللي بيطلع سافل ده بتربيه واحدة ست برضه

واحدة ست اتزرع في دماغها انها قليله وكويس انها عايشه فمنغير ما تعرف بتنقل ده للإبنها لما تعليه على اخته ولما تقوم تحضرله حاجته او تطلب من اخته انها تخضرهاله في حين ان البنت بتتربي على انها بديل ارخص للفيلبينيه
افتكر مرة واحد كان معايا في الجامعه كسر عضم اخته علشان خلاها قاعدة بتتفرج عالتليفزيون وقالها تقوم تغسله شرباته
فمردتش عليه
كسر عضمها بمعنى الكلمة ولما بقوله وانت ايديك فين دانت لو كنت اخويا كان زماني مبيتاك في القسم. قالي انتي بتهزي هي اختي زيكو ... اختي مرتبيه
وديه كانت اخر مرة اكلمه فيها
Love,
MishMish

Migo Mishmish said...

Ms Venus
انتي عارفه المشكله في ده كله الست او المعزة زي ما بتقال عليها
لانها اقنعت ورضيت بانها قليله
وطالما انها شايفه نفسها ماتفقرش حاجة عن فيلم ثقافي لازم يخفى وذكره قبيح يبقى مفيش حاجة هتتغير

Tears
فين يا اختي الحته اللي قل فيها التحرش ديه والنبي نفسي اروحها من زمان
عموماً ربنا يكرمك انك على الاقل وضحتلنا ان في نقطة ضوء في الظلام البهيم اللي احنا فيه ده
Love,
MishMish

Migo Mishmish said...

صديقي المبالغ فيه
ما هو اللي بيحصل يوم الجمعه ورمان عالابواب اهو وبرضه ماننساش الاخوة عندنا اللي عايشين داخل عقدة الاضطهاد اللي بيبرروا بيها فشلهم
والسرقه والنهب والنصب والرشوه منتعشه انتعاش رهيب
ده الرحمه والذوق والاخلاق راحت
الناس كلها عامله زي ما تكون واقفه على فرشه في العتبه
عايزين يخطفوا اي حاجة ويلبسوا اي حد اي حاجة وعندهم استعداد فطري للنصب

ده حتى انت يا صديقي لما حبيت تقول ان التحرش سلوك مش مظبوط خفت لا الناس تقول عليك مش راجل
هاهاهاهاهاهاه


Kontiki
انا معاكي في كل اللي انتي قولتيه
بس انا مع حل ان الستات تخلف صبيان وتعلمه ان الست قيمه مش في داهيه وانا اجوزك ست ستها
وبرضه ما يخلاش من بعض التعذيب لزوم الانتقام للاجيال السابقه والقادمة
Love,
MishMish

NooN said...

يا مشمش عاوزة بس أقولك حاجة..كنت من كام يوم في تدريب تابع للجنة العليا لمراقبة الإنتخابات القادمة و ذلك بالتعاون مع اللجنة العليا لمراقبة الإنتخابات و مؤسسة نظرة للدراسات النسوية و كلام كبير يعني..و المفروض ان الناس اللي رايحة دي مثلما يطلق عليهم لقب " ناشطين حقوقيين" و الإنتخابات السنادي زي ماحنا عارفين سوف يطبق فيها الكوتا النسائية....ما علينا بكل المقدمة الكبيرة دي..المهم يا مشمش بقي يجي واحد كده من الناس الكومل دول يقولك : " ياستي ايه اللي بتقولوه ده..هو أصلا الست دي تخرج تنتخب ليه؟؟ دول حدانا في البلد كنا بنشحن الحريم كلهم في عربية نص نجل و ناخد بطايجهم و ننتخبلهم " !!!!!! و لا تعليق بعد الأخ الفاضل !!

There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق