Monday, August 16, 2010

مين ديه اللي هتضيع صيام الناس يا ولاد الجذمة

افهم لما يبقى واحد جاهل مربي دقنه مابيتكلمش غير في اداب دخول المراحيض والعورات وخصوصاً عورات النساء التي حيرت العلماء -زي ما بيحبوا يسموا نفسهم - يقول الكلمتين دول ماشي
انما يتنشر مرتين (مرة في الصفحه الاولى ومرة تانيه في صفحه الكارياتير تحت عنوان لا مؤاخذه) في جريدة الدستور اللي المفروض انها صحيفه معارضه وليها قراء محترمين اهي ديه تبقى مصيبة ومش كدة وبس لا وبتدل على انعدام مستوى التفكير والفهم عند كل ما تعامل مع هذا الكاركاتير من اول اللي رسمه لغايه رئيس التحرير ابو شنب وبنطلون بحمالات - معرفش بيحبهم منين
اولاً: ابسط حاجة تتفهم من الزباله ديه ان الفنانين زيهم زي الشياطين
ثانياً: هما الفنانات لوحدهم هما اللي مسئولين عن رداءه النصوص ومحتواها الاباحي - يعني الممثله من دول تيجي من بيتها ومعها بلطجيه يكتفوا فريق العمل وتقلع هدوهما وتتصور وهي بالملابس الداخليه لا مؤاخذه وتعرض المسلسل ومحدش يقدر يعترض
ثالثاً اذا كنتم متضايقين قوي من المسلسلات ومن محتواها على اي اساس اتصرف عليها 270مليون جنيه وطبعاً اللي صرف المبالغ ديه مش عبيط ولا هيتبرع بيهم ده عارف كويس ان الاعلانات واعادة عرض المسلسلات ديه هيجبله ضعف المبلغ ده على الاقل وعلى فكرة معظم اللي بيصرفوا على الدراما امراء مملكه الجاز
رابعاً اشمعنى الست بس هي اللي تشيل عار سعار الذكور الجنسي وتركيزهم ليس على محتوى المسلسل ولكن على عدد الزراير المفتوحه في بلوزة البطله
خامساً: بجد
seriously do u still believe that satan doesn't work in ramadan
طب انزلوا الشارع كدة
بلاش: على كدة التعامل مع الناس في مصر والشيطان مفكوك ومريح كدة احسن كتيييييييييير من التعامل معاهم وهو متسلسل؟ حيث انه من الواضح ان المصريين هما اللي بيغوا الشيطان مش العكس
سادساً: اذا كانوا اللي المفروض انهم مثقفين وبيفهموا شايفين ان الست سبب الغوايه يبقى نستنى ايه من الجهله اللي في الشارع
سابعاً: ارجوا الرجوع الى عنوان التدوينه
Love,
MishMish

17 comments:

على باب الله said...

فعلاً كاريكاتير غبي و منطق غبي و شعب متعصب بيعلق فشله و خيبته على المرأة

Kontiki said...

المناخ كلة فاسد ونتن جدا معلش يا مشمش استحملى يا ختى :)

Migo Mishmish said...

علي باب الله
انا طول عمري اقول لميجو لو اشتريت بتمن الدستور سجاير فرط يبقى افيد منها. بس اعمل ايه للبيه المثقف بتاع ما ياخذ كله لا يترك كله
وفعلاً انا مش عارفه ليه الرجاله نفسهم موافقين على وصفهم بالسفه والهياج الدائم
بجد الراجل اللي يبقل على نفسه كدة ما يفرقش كتير عن الست اللي بتلبس نقاب وفاكرة نفسها فيلم ثقافي

Kontiki
هو مناخ فاسد ونتن بس ده مناخ ابن جذمة
وحاجات تانيه كتير بس انا مش عايزة ازود علشان ميجو بيزعل

Love,
MishMish

صفا سارة said...

العنوان مفيش احسن منه
واهى كلها اشكال عايزة الحرق
عالم متناقضة والمشكله انهم منتشرين بطريقة بشعة

strategicalone said...

انا لا اتفاجأ كثيراً من هكذا كاريكاتير وخصوصاً من الدستور التى كانت يوما ما محترمة قبل ان يسيطر عليها شباب الاخوان . لكن المفاجئ هو صدمتك من الرسام ، امال كنتى فاكرة ها يرسم اية ما هو طول عمرة بيسمع عن السفور والفجور من المشاخخ .
يلا معليهشى يا ميشميشة تعيشى وتكتشفى اكثر واكثر يعنى ايةالمستنقع اللى البلد فية

strategicalone said...

معليشى رجعت تانى البلكونة علشان الجو حر جوةالشقة
هو سيادتك ما اخدتيش بالك من اسم الرسام .
انا لا اعتقد انة اسمة بل هو يطلق على نفسة هكذا امعاماً فى تطرفة واظن اسلوب عمر سليم ظاهر جداً فى الصورة

Migo Mishmish said...

صفاسارة
انا حاولت على قد ماقدر اقتصد في العنوان. هو المفروض يتكب اكتر من كدة بس انا قولت الطيب احسن
اللي مضايقني ان الناس ديه رميت المشكله على الستات وغسلت ايديها خلاص
يعني الستات هما سبب غضب ربنا
وربنا بتاعهم ده على طول غضبان ودمه فاير كدة
انا مش عارفه ايه ده. المشكله بقه لما تمشي في الشارع وتلاقي واحد عربجي يقولك غطي شعرك يا كافرة - ده لو حظك حلو - انما ممكن تسمعي بلاوي تانيه
يعني الست كقيمه اختذلت في متر قماش لا اكتر ولا اقل
Love,
MishMish

Migo Mishmish said...

strategicalone
ماهو الرسام يعني فنان..وديه مصيبه
افتكر استاذ الرسم بتاعنا في ابتدائي مكنش بيرضي يخلينا نرسم علشان كان بيقول ربنا هيجي يوم القيامة وينفخ في الرسومات ديه ويقولنا انتوا بتقدلوني طب اعبدوها بقه
وانا بحب الرسم تخيل وضعي يوم القيامة وانا رسمت كل حاجة ورسمت كتيرررررر
يعني المفروض قبل ما يعيب عالممثلين كان المفروض يعرف ان نفس المشاشخ دول بيقولوا عليه كافر علشان بيرسم
اما اسمه فمش باين لكن الايميل بتاعه
caricadeh@yahoo.com
Love,
MishMish

ELVIRA said...

على باب الله انت قلتها صح

و لما هو شهر الايمان و التقوى و النساءهم ناقصات العقل و الدين طب ما الرجالة هى اللى تلم نفسها بقى باعتبارهم كاملىن العقل و الدين
حاجة تطهق

strategicalone said...

لا معليهشى الاسم واضح جداً وعلى فكرة هو فى المكان الصحيح الذى يحبة وينبغى ان يظل فية ( خلف رجل الست اللى مفروض ممثلة ) كنت فاكر ان سيادتك اللى مصورة الكاركاتير من الصحيفة.
شكراً على الشاى

Desert cat said...

ازدواجية ونفاق مجتمع واطى
اللى بيقولوا الشياطين بتتسلسل فى رمضان ياريت يتابعوا الحوادث ويشوفوا كان حادثة قتل حصلت من اول يوم رمضان لحد النهاردة الا كل يوم واحد قتل مراته واللى قتل اتنين جيرانه واللى قتل اتنين اشقائه
بلاش كدا العشوائيين اللى ماليين الشوارع وهما واقفين يقلوا ادبهم وفى الاخر يقول اللهم انى صايم ناقص يعلق لنا يافطة على صدره انه صايم وعلى الرغم من كدا برضه لسانه عايز قطعه
يبقى مين الشيطان هنا

Migo Mishmish said...

ElVIRA
او في اقتراح تاني هما يمشوا كلامهم على نساؤهم طالما نساؤهم مبسطوين انهم بيتعاملوا معامله الجواري
انما مالهومش دعوة بينا

strategicalone
والله يا اخويا ان اصلي مبحبش الدستور ديه تماماً لان انتماها الاخواني واضح وضوح قفله كوبري 6 اكتوبر في عز الضهر
فإذا كان اللي رسم الكاركاتير ليه اسم او متسماش مفرقتش معايا كتير

قطوطة
ديه اصلها عالم حافظة مش فاهمة
وبعدين الحال في غير رمضان لما تبقى الشياطين مفكوكه بتبقى احسن من كدة بكتير
فانا بأطالب بحل الشياطين فوراً علشان كدة كتير قوي
Love,
MishMish

تيمور said...

المشكلة مش فى ست فكة زراير ولا حتى عريانة

المشكلة انعدام السلوك الطيب بين الناس وبعضها سواء فى رمضان او باقى ايام السنة

تحياتى

Anonymous said...

Can anyone explain to me why do middle eastern men supposedly go in an uncontrollable frenzy just by seeing a woman's hair, elbows, or -heavens forbid- ankles; while this poses no problem to other males in all other cultures, all over the world? How come they are so controlled by their gonads while other males can manage to use their gray matter instead? Is it a question of evolution gone very wrong, or just weak character,total lack of self control, & more importantly, total absence of self-respect?
Sorry for the use of English,I don't have an Arabic keyboard.

Migo Mishmish said...

رجل مش عايز يتجوز
هو انعدام الذوق والسلوك الطيب بين الناس ديه حاجة احنا مش مختلفين عليها
انما انا بتكلم بالاساس على مجتمع فاشل فاهم الفضيله غلط
عاملين زي ما يكونوا مدافن من برة نضيفه وشكلها حلو (زي المدافن بتاعه الاجانب كدة) ومن جوة مليانه عضام ودود وعفن
الفضيله مش في لبس معين الفضيله اسلوب حياه


Anonymous
ولا تتاسف على الانجليزي ولا حاجة
بص يا سيدي / يا ستي
البني ادمين بيستخدموا مخهم
العرب معندهمش مخ. تجويف الجمجمه عندهم فيه صبته اسمنت
طول مانت ماشي تلاقي صورة مصاصه بورقتها والدبان بيعف عليها ووراها صورة بنت محجبه ومكتوب على الصورة مش هتقدري تمنعيهم لكن تقدري تحمي نفسك
وصورة تانيه فيها مصاصه واقف عليها الدبان ووراها صورة بنت مش لفه راسه بإيشارب
يعني البنات عند العرب مصاصه والرجاله دبان
شوفت احترام اكتر من كدة
واحد انت بتفهمه ان من حقه يبقى عبد لشهواته طالما البنت اللي قدامه مش ملفوفه في توب قماش لا ومش كدة وبس الموضوع ابتدى حجاب وبعدين دخلنا في الخمار والاسدال وبعدين النقاب ودلوقتي داخلين على النقاب ابو عين واحدة
يعني مش المفروض ان الست تبقى ماشيه في الشارع محبوسه في النقاب وبتبص للناس من شباك صغير لا ده المفروض انها تبص بعين واحدة بس
Love,
MishMish

Anonymous said...

واضح كده ان الأستاذ المناضل المحترم يبقي نفس الشخص اللي رسم الخراخاتير ده

Migo Mishmish said...

Anonymous
مرسي على ردك انا لسه واخدة بالي النهاردة من تعليق المنضال الشوارعي
بس هاتقول ايه ماكل اناء ينضح بما فيه. هما معندهمش مخ عندهم قله ادب
متشكرة ليك مرة تانيه
Love,
MishMish

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق