Tuesday, September 1, 2009

هو انتوا هتفضلوا في مصر لحد امتى؟

زي اليومين دول من كل سنة يجي حد من صحابنا اللي برة سواء إن كان مهاجر او شغال في بلد عربي. وطبعاً نقعد نعد الايام على ما يجي ونوفق مواعيدنا سوا علشان نعرف نقعد ونخرج معاه
كنت ببقى قاعدة مبسوطة قوي وانا بسمع حكاياتهم عن البلاد اللي هما فيها. بس كان دايماً جوايا شعور بإن اللي بيسيب مصر هو الخسران. مرة ورا مرة وسنه ورا سنه الشعور ده ابتدى يبههههههههههت. كل مرة احس فيها ان مصر رجعت حبه لورا وبعدين لورا حبه كمان وورا حبه كمان لغايه لما مبقاش في ورا تاني


اخر حكاية مثلاً قالتها واحدة صحبتنا شغاله في قطر. الحكاية بتقول ايه: بتقول ان مدرسين الفنون (الموسيقى والرسم) مرتبهم الشهري ما يعادل 9000 جنيه مصري. وبيتعاملوا هناك معامله الملوك والرؤساء لان قطر مفهاش كليات فنون ومع كدة ابتدوا يهتموا بتدريس الفنون في المدارس كجزء من نهضه المجتمع


في حين ان ميجو بالصدفه كام من كام يوم كان بيحكيلي انه كان رايح يقعد مع مدرس موسيقى صاحبه فلما دخل لاقى مدرس عربي وهابي ظلامي من اهل الكهف ماسك ودانه وعمال يقنعه ان شغلته حرام لان تدريس الموسيقى تحريض على الفجور. . وعامل يقوله على عذاب اللي بيسمعوا الموسيقى واللي بيعزفوا الموسيقى . فلما مدرس الموسيقى الغلبان قاله انا معرفش اعمل اي حاجة في حياتي غير الموسيقى وإن لاقى اي شغلانه تانيه غير الموسيقى هيسيب التدريس من بكرة
قام صاحبنا مدرس اللغه العربية قاله طالما مش لاقي حاجة حلال يبقى على الاقل ماتدرسهاش يا اخي

وراح باصص لميجو مرة واحدة وقاله مش كدة ولا ايه يا مستر مش الموسيقى عندكم حرام برضه. قام مستر ميجو قاله والله كل حاجة ممكن نستخدمها في الكويس وفي الوحش. وراح قاطم قالي حسيت ان الراجل دماغه مصمته. فيها صبه رصاص
يعني العرب اللي الواحد كان بيقول عليهم همج نضفوا واحنا بقينا نلم زبالات اللي حوالينا والحاجات اللي بطلوها وهانموت علشان نطبقها عندنا وتلاقي الناس فرحانه: هيه هيه هيه هيه هننبقى زي البدو الهمج

تخيلوا دلوقتي مدارس قطر تخرج واحد زي اندريا بوتشلي

ومدارس مصر تخرج الهباب ده



و كل زيارة من صحابنا تنتهي بنفس السؤال: هو انتوا هتفضلوا في مصر لحد امتى؟

Love,
MishMish


15 comments:

على باب الله said...

معاك حق ، كل شعوب العالم بتشوف مصلحتها ، و إحنا نيجي عند طيز القرد و نشمها

Migo Mishmish said...

اه يا اخويا ربنا رزقنا بشوية جرابيع صوتهم عالي
مش واخدين عالنضافه
طب اللي مش عاجبه المزيكا ما يغور في اي داهيه مابعلموش فيها المزيكا لانها تحريض على الفجور
لكن بيعلموا العيال ازاي يعملوا قنابل ويدبحوا البني ادمين
love,
MishMish

Marwa said...

9000
ريال حضرتك يعني تقريبا 12,600 جنيه
ده مرتب صاحبتي مدرسة موسيقى برضه في قطر .. وانا خالتي موجهة موسيقى في مصر ومرتبها مش مكمل 600 جنيه

حسبنا الله ونعم الوكيل

salwaa said...

;كان زمان مدرسى الفنون بأنواعها كانوا اجانب او يهخود مصريين حاليا
مدرسين كحيتى وغير اتربيه والتعليم بتعاملهم كالاحتياطى المركزى ...مدرس الرياضيات ماجاش تنقلب الحصه فنون مدرسة العلوم بتولد يدخل بتاع الموسيقى وهكذااامة بلا فن امه بلا ابداع ومشايخنا الاظلاميين فى جميع الفضائيات مصرين على ان ابداع التماثيل عباده للاصنام ..و

عمو عصام said...

عزيزتى مشمش الفن والموسيقى مرآه للمجتمع ومادام المجتمع متخلفا فلابد من تخلف الموسيقى والفن ولاتتوقعى خيرا لأن الحكومه التى تظن أن رغيف العيش أهم من الفن ستفشل فى الإثنين وهو ماحدث فعلا وعموما كفايه علينا تموره اللى فى كل مره بشوفه فيها ببقى نفسى آ..آ..طبعا عارفه آآإيه

Migo Mishmish said...

معلش يا مروة اصل عمري ما خرجت برة مصر
ومعلوماتي كلها سماعي
عموماً شكراً على التصحيح
وجاتنا نيله في حظنا الهباب
Love,
MishMish

Migo Mishmish said...

اه يا سلوى شوفي الفن بيعمل ايه في البني ادمين
بصي في وش اندريا ووش المدعوق التاني
انا فاكرة مدرس الرسم واحنا في ابتدائي مكنش بيرضى يخلينا نرسم في الحصة ابداً
كان بيقول لنا ربنا هيجي يوم القيامة ويوقف الرسمه اللي بترسمها ديه قدامك ويقولك انفخ فيها علشان تبقى فيها نفس حيه
وساعتها مكنتش فاهمه ايه دخل ربنا في كراسة الرسم

ولما الوزارة جت تكحلها عمتها
كتاب الرسم النظري اللي كنا بناخدة في الاعداديه كان في جزء بيحاول يبرئ الرسم والرسامين وكانوا بيقولوا ان الرسول كان بتعامل بالعملات والعملات ديه على رسوم ولو كانت حرام مكنش هيمسكها

يا سلام طب افرض الرسول كان ايام المقايضه كان هيبقى الوضع ايه دلوقتي

حال البلد بقى يحزن ويقرف في نفس الوقت
Love,
MishMish

Migo Mishmish said...

عمو عصام
ده تاااااااااامر كويس
ده رمز الجيل
مطرب الشباب المتحرش صاحب شعار هو دة وهي ديه
طب سمعت اغنيه
"شربت حجرين عالشيشة"
الاغاني والمزيكا حرام
مبقاش عندنا غير الاغاني اللي بتوصف قعدات الحشيش والاغاني الدينيه اللي بيبقى فيها المغني والعبال اللي حواليه لابسين بفته وعمال يغنوا وهما بيمثلوا انهم بيبتسموا. وشكلهم كلهم معمولهم غسيل مخ
ومتعرفش ابن كلب مين له مصلحة في القبح والتقيح والتصحر اللي احنا فيه
Love,
MishMish

Anonymous said...

عزيزتي مشمش
بداية نهضة اي مجتمع هى الانسان نفسة
بمعنى ان البني ادم لما بيشغل دماغة وبيخرج نفسة برة دايرة الحرام والحلال ف اتفهة وابسط الامور بيشوف الدنيا بعين تانية
الناس ف مصر مش بتتعب نفسها ف انها تفكر وجواها سلبية فظيعة فطبيعي جدا اننا نتاخر ونرجع لورا لما ان شاء الله كدة خلال سنتين هانرجع للعصور الجاهلية
انما الناس اللي ف الدول العربية دي بيحاولو يكونو حاجة كويسة هما عارفين ان معندهمش حضارة بس عندهم الاهم تخطيط كويس ورغبة ف التطور ودي حاجات مش موجود عندنا ف مصر
احنا فالحين بس نمسك ف حضارة السبع تلاف سنة ونكلم عن امجاد الماضي انما كلميني بقى عن الحاضر او المستقبل سواد وتخلف وافكار سطحية تافهة
بس انا عندي امل ف مصر والمصريين ان شاء الله ربنا يكرمنا ونفكر ثواني ونفوق لروحنا ونشوف بقينا فين وسط الناس اللي ماكانوش عاجبينا ونبطل نشتم ف الناس بقى ونبص لحالنا

تحياتي
ام البنات

Hassan El Helali said...

يا جماعه انتو ما جالكوش خبر إن العراعير استولوا علي كلية الفنون الجميله ومنعو النحت ورسم الموديل العاري؟

كمان بيحاولوا يمنعوا رسم البورتريه ويقتصر الأمر علي الطبيعه الصامته واللاندسكيب؟

أنتو نايمين في مصر يا ولاد؟

ما تقوموا تقولو حاجه... ولا أجي لكم أدرمغ الدنيا واديها كرسي في الكلوب؟

نقول كمان
المصيبة ليست في ظلم الأشرار بل في صمت الأخيار - مارتن لوثر كنج

Desert cat said...

انا بجد بحسد ميجو على قوة تحمله انا لو مكانه كنت قلعت اللى فى رجلى وحطيته فى بؤ الراجل ده ومشيت بلا ارف

Migo Mishmish said...

العزيزة ام البنات
حمدالله على السلامة.... هناك:-)
انا شايفه ان الناس في مصر خايفين من الحرية
يعني ايه؟
يعني عايزين حد يختارلهم سكه ويمشوا فيها
علشان لو طلعت صح يبقى الحمدلله ولو طلعت غلط يقدروا يقولوا بكل فخر
"حسبى الله ونعم الوكيل فيك يا فخري"
لان الحرية تعني مسئوله
طالما انت حر لازم تتحاسب على افعالك. انما لو انت اهبل مش عارف يمينك من شمالك يبقى هتتحاتسب على ايه. دوري على اي شكوي بتتقدم لمصلحه حكومية او بلاغ في القسم هتلاقيه ياما من مجهول ياما بأسم غلط
تخشي عند بقال ويقلب وش امه في وشك علشان قوتلي صباح الخير ماقولتيش سلامو عليكو
وعادي وتقفي تشتري ولا كان في حاجة
المصريين خايفين دايماً من حاجة
ربنا
الحسد
القر
الجن
العكوسات
الاعمال
البيه المدير
صاحب العمارة
حظابط
وكل دول تلاقي المصريين عايزين يتقوا شرهم فبيشوفوهم عايزين ايه وبيدهولهم
يا رب يبقى في امل يام البنات
Love,
MishMish

Migo Mishmish said...

والنعمة يا حسن عندنا فكرة
وزمايلنا دخلوا وخرجوا من الكليه وماخدوش كورس النحت علشان حرررررراااام بعيد عنك
والدكتور الحلوف الوهابي قاعد في الكليه بياخد مرتبه عادي ومابيرضاش يدرس نحت
وانا كنت في كليه العلوم جامعة القاهرة وكان عندنا تيرم كامل ندرس فيه تطور وماخدناهوش علشان حرام برضه
ادونا الاسئله بالاجوبة
والدكتور كان عامل زي المعددة وهو بيحسبن عالحكومة الفاسدة
ولا تيجي ولا تضرب كرسي في الكلوب
هي خربانه لوحدها
Love,
MishMish

Migo Mishmish said...

اهو ميجو بالذات مايقدرش يعمل حاجة يا قطة
لان ميجو نصارني صليبي صهيوني كافر
وبيدافع عن الموسيقي كجزء من مخطط الصلبيين لضياع شباب الامه وتقليل عزيمتهم وصرفهم لتوافه الامور والعياذ بالله
وممكن لو كان قال لمدرس الموسيقى سيبك منه ده جاهل
كان مدرس الموسيقى حس ان كلام الراجل بتاع العربي حقيقي
وان ميجو عميل وبيدمر مشروع الخلافه الاسلامية
Love,
MishMish

صمتي كلام said...

الجميع يعلم ان الاسلام حرم الموسيقى وذكر ذلك في القران الكريم

فمن ترك شيئأ لله عوضه خيرا منه

....

التطور ولاالزدهار لي محصورا على الموسيقى فقط
لو تركنا موسيقى لن نترك التطور
والاسلام حثنا على التطور بجميع السبل المشروعه
واعلم اخي العزيز ان الاسلام لايحرم شي الا ومضاره اكثر من نفعه

احترامي..،،

There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق